སློབ་མ་ཆིག་སྟོང་སི་ཁྲོན་ཏུ་བསྐྱལ་བ།

ང་རང་གི་བསམ་ན་བྱིས་པ་དེ་དག་ངེས་པར་དུ་རྒྱ་ནག་ལ་བསྐྱལ་དགོས་པ་ཞིག་མ་རེད་བསམ། བོད་ཁུལ་ཏུའང་མི་རིགས་སློབ་འབྲིང་དང་མཐོ་འབྲིང་མང་པོ་ཞིག་ཡོད་པ་རེད། དེ་དག་ནང་བཏང་ཚེ། མ་མཐར་ཡང་བོད་པ་གཙང་མ་ཞིག་ཉར་ཐུབ་ཀྱི་རེད་ལ། མ་འོངས་རྒྱ་ནག་གི་སློབ་གྲྭར་བཏང་བ་ལས་ཀྱང་སྡུག་པའི་འབྲས་བུ་ཞིག་འབྱུང་སྲིད་ཀྱི་མ་རེད་བསམ་ཀི གང་ལྟར། འདི་ཡོད་ཚད་ང་ཚོའི་མི་རིགས་འདིའི་མགོ་ཐོག་ལ་ཡོང་བཞིན་པའི་ཆག་འཇིག་ཞིག་ཏུ་ཁོ་བོས་མཐོང་འོང་གི་འདུག

མི་བུ་སུ་ཞིག་ཡིན་ཡང་རང་ཉིད་མི་འཐད་སའི་ཕ་རོལ་པོས། བྱ་བ་ཅི་ཞིག་སྒྲུབ་ཀྱང་ངན་པར་མཐོང་བ་ནི་ཆོས་ཉིད་རེད། བོད་པ་ཚང་ལ་མཚོན་ན་དགྲ་དམར་སྲིད་གཞུང་ལས་ལྷག་པའི་དགྲ་བོ་ཞིག་འཇིག་རྟེན་གྱི་ཆ་ཡོངས་སུ་རྫོགས་པར་བཙལ་ཀྱང་རྙེད་དུ་མེད་ཅེས་བཤད་པར་ཆོག དེའི་སྟབས་ཀྱིས་ཁོང་ཚོས་ཐབས་བརྒྱ་ཇུས་སྟོང་གིས་མ་ཡུལ་གངས་ལྗོངས་ཀྱི་པང་དུ་ལས་དོན་ཅི་ཞིག་གཉེར་ཡང་། དེ་ལ་གདོང་དམར་བ་དག་གི་སེམས་པར་དོགས་འཆར་མང་དུ་སྐྱེ་བ་ནི་ལོ་རྒྱུས་ཀྱི་ཕམ་ཁས་སྤྲད་པའི་ཚོར་བ་གསོན་པོ་ཞིག་རེད། དོན་དངོས་སུ་ཡང་མདོ་དབུས་ཁམས་གསུམ་ནི་ཁོང་ཚོའི་མི་སེར་སྤེལ་བར་དཀོན་མཆོག་གིས་བསྩལ་བའི་ཞིང་ས་ཞིག་དང་འདྲ་བར་འདས་པའི་མི་ལོ་ལྔ་བཅུ་ལྷག་གི་རིང་ཅི་འདྲ་བྱས་དང་བྱེད་ཀྱིན་ཡོད་པ་ནི་ན་ཕྲ་བའི་བོད་པ་ཚང་གི་བྱིས་པ་ཡན་ཆད་ཀྱི་སེམས་སུ་ཁྲ་ལམ་མེར་ཡོད། ཕྱོགས་གཞན་ཞིག་ནས་བསམ་བློ་བཏང་བ་ཡིན་ན། ཁ་སང་ལྟ་བུ་གློ་བུར་བའི་དོན་རྐྱེན་ངན་པས་བསམ་ཡུལ་ལས་འདས་པའི་འཇིགས་སྣང་དང་། གྱོང་གུད་ཕོགས་པའི་ཡུལ་ཤུལ་གྲོང་ཁྱེར་ལ་ཆ་མཚོན་ན། དོན་རྐྱེན་མཇུག་གི་ཉིན་ཤས་རྗེས་ནས་རྒྱ་ནག་གི་སྲིད་འཛིན་དང་། སྲིད་བློན་གཙོ་བའི་མི་སྣ་ཆེ་ཁག་ཆེད་བཅར་གྱིས་སྐྱོ་སྣང་གི་མེ་འུབ་ཏུ་ཚུད་མི་སེར་ཚོར་སེམས་གསོ་དང་། ལྟ་བསྐོར་གང་འཚམས་བྱས་ཡོད་ལ། འཐོར་ཞིག་ཏུ་སོང་བའི་སློབ་གྲྭ་ཁག་གི་སློབ་མ་ཚོའི་སློབ་སྦྱོང་ལ་འཐུས་ཤོར་མི་འགྲོ་བའི་ཐབས་ལམ་ཡང་བྱས་ཡོད། དེ་མ་ཚད་ད་རེས་ས་གནས་བོད་རིགས་ཀྱི་དགེ་སློབ་དུ་མ་ཞིག་སི་ཁྲོན་ཏུའུ་ཅང་ཡན་གྲོང་ཁྱེར་དུ་སློབ་སྦྱོང་དུ་བཏང་བ་དེ་ཡང་བྱ་བ་ངན་པ་ཞིག་གས་མ་རེད་སྙམ། རྒྱ་ནག་སྲིད་གཞུང་གིས་ང་ཚོར་སྤྲད་པའི་ཕམ་ཁ་དེ་ང་ཚོའི་སེམས་ནས་ནམ་ཡང་བརྗེད་ཐབས་མེད་ཀྱང་། མཚམས་རེར་ང་ཚོའི་ངོས་ནས་ཀྱང་དོགས་པ་ཏོག་ཙམ་ཚ་དྲག་པའི་ཚོར་སྣང་ཞིག་ཡོང་གི་འདུག འོན་ཀྱང་དེ་ནི་ང་ཚོར་མཚོན་ན་ཕམ་ཁ་རབས་དང་རིམ་པར་རག་པའི་མཐའ་མཇུག་གི་འཇིགས་སྣང་ཞིག་ཡིན་སྟབས་ཁག་ཅི་ཡང་མེད། ཕ་གཞིས་ཁྲག་ལ་སྦྱར་མཁན་གྱི་དགྲ་བོ་དེས་ཉིན་ཞིག་ལྷག་བསམ་གྱི་སྒོ་ནས་རང་ལ་རོགས་རམ་ཅི་ཞིག་བྱས་ཀྱང་། རང་གི་སེམས་ནང་གི་དོགས་འཆར་མང་དུ་འགྲོ་བ་ནི་སྨོས་མེད་ཅིག་རེད། སྐབས་རེར་ང་ཚོ་ཡང་དེ་དང་འདྲ་བར་ཆགས་ཀྱིན་མེད་དམ་སྙམ། མདོ་དོན་བདག་གི་བསམ་ཚུལ་ནི་རྒྱ་ནག་གི་ས་ཁུལ་དུ་བཏང་བའི་སློབ་མ་དེ་ཚོའི་རྒྱུད་ལ་ཚད་ལོངས་བའི་སློབ་སྦྱོང་ཞིག་འཇགས་ཡོང་རོགས་བྱས་ན། ད་རེས་ཁོང་ཚོས་བྱེད་སྟངས་དེར་མི་ཆོག་རྒྱུ་ཅི་མི་འདུག་སྙམ་མོ། །

བོད་ཡུལ་དགྱ་ཡུལ་དུ་བསྒྱུར། བོད་མི་དགྱ་ནག་ཏུ་བསྒྱུར། ད་ཚར་ཐལ།