ལོན་ཌོན་དུ་སྐུའི་འཁྲུངས་སྐར་དང་བསྟུན་ནས་བོད་དོན་སྐོར་གྱི་གློག་བརྙན་གཟིགས་འབུལ་ཞུ་རྒྱུ་རེད་འདུག
བོད་གཞུང་དྲ་རྒྱའི་ཐོག་གནས་ཚུལ་སྤེལ་བ་ལྟར་ན། ཁ་སང་ཚེས་ ༡ ཉིན་ Day for Night ཞེས་པའི་གཞུང་འབྲེལ་མ་ཡིན་པའི་ཚོགས་པའི་གོ་སྒྲིག་འོག་དབྱིན་ཇིའི་རྒྱལ་ས་ལོན་ཌོན་དུ་བོད་ཀྱི་གློག་བརྙན་དུས་སྟོན་ཞིག་མགོ་འཛུགས་བྱས་ཡོད་པ་དང་། ཐེངས་འདིའི་དུས་སྟོན་གྱི་སྐབས་སུ་བོད་ཀྱི་ལེགས་བྱང་དང་སྒྱུ་རྩལ་རང་བཞིན་ལྡན་པའི་གློག་བརྙན་ཁག་དྲག་འདེམས་ཀྱིས་མང་ཚོགས་ལ་སྟོན་རྒྱུ་ཡིན་ལ་དེ་ནི་༧གོང་ས་མཆོག་དགུང་གྲངས་ ༧༥ ཕེབས་པའི་འཁྲུངས་སྐར་གྱི་ཉིན་མོ་དང་བསྟུན་ནས་གོ་སྒྲིག་ཞུས་པ་ཞིག་རེད། གློག་བརྙན་གཟིགས་འབུལ་ཞུ་དོན་གཙོ་བོ་ནི་བོད་ཀྱི་ཁོར་ཡུག་དང་གླུ་གཞས་སོཊ་ལ་དོ་སྣང་ཡོང་ཆེད་ཡིན་འདུག་ལ། དེ་བཞིན་སྐབས་དེར་ཧིན་བོད་གཞོན་སྐྱེས་ཁག་ཅིག་གིས་བཟོས་པའི་གློག་བརྙན་སྟོན་རྒྱུ་དང་། འཛམ་གླིང་སྣེ་གསུམ་པ་ཞེས་པའི་པར་རིས་འགྲེམས་སྟོན། བོད་ཀྱི་གནམ་གཤིས་དང་ཆུའི་གནད་དོན་བཅས་ཀྱི་སྐོར་ལ་གོ་རྟོགས་སྤེལ་རྒྱུ་རེད་ལ། ཚེས་ ༩ ཉིན་རང་དབང་དང་དྲང་བདེན་ཞེས་པའི་བརྗོད་གཞིའི་ཚོགས་འདུ་ཞིག་ཀྱང་འཚོགས་འཆར་ཡོད་འདུག ཐེངས་འདིར་གཙོ་བོ་ངའི་མིང་པདྨ་ཡིན་ཞེས་པ་དང་། སྤྲིན་རྒྱབ་ཀྱི་ཉི་མ། བོད་གཞུང་ཟློས་གར། རྒྱལ་སྤྱིའི་གློག་བརྙན་དུས་སྟོན། བོད་རང་དབང་འཐབ་རྩོད་ཀྱི་གློག་བརྙན་བཅས་སྟོན་རྒྱུ་རེད། ཕྱི་ཟླ་ ༨ པ་ནས་བཟུང་གློག་བརྙན་དུས་སྟོན་དེ་ས་གནས་གཞན་ཁག་ཏུ་སྐོར་བསྐྱོད་ཀྱིས་མང་ཚོགས་ལ་གཟིགས་འབུལ་ཞུ་རྒྱུར་མ་ཟད། ཡོང་འབབ་ཚང་མ་བོད་ནང་ས་ཡོམ་གྱི་གོད་ཆག་བྱུང་མཁན་ཚོར་ཞལ་འདེབས་སུ་འབུལ་རྒྱུ་རེད། གློག་བརྙན་དུས་སྟོན་ཚོགས་པ་དེའི་ཚོགས་གཙོ་རྒྱ་གར་ནས་ཡིན་པའི་ལྕམ་སོ་ནི་ཡ་ཇོ་ཤི་ལགས་ཡིན་འདུག
གསར་འགོད་པ། དཔལ་ལྡན་རྒྱ་མཚོ།
ཐུགས་རྗེ་ཆེ། བྱ་བ་འདི་འདྲ་གང་མང་བྱེད་ཐུབ་པར་སྨོན།
དུས་ཆེན་རོལ་སྟངས་འདི་རིགས་བཟང་གི བོད་མི་ཚོ་གནས་སྡོད་ཀྱི་རྒྱལ་ཁབ་ཚང་མ་འདི་འདྲ་ཡིན་ནམ། དྲིལ་བསྒྲགས་འདི་རིགས་རྒྱ་མི་རིགས་ནང་ལ་བྱེད་ཐུབ་ན་དེ་བས་ཀྱང་བཟང་གི
གློག་བརྙན་དེ་ཚོ་བོད་སྐད་ཡིན་པའི་རེ་བ་ཡོད།