༼ཟླ་ ༧ ཚེས་ ༣ རེས་གཟའ་སྤེན་པ། ངྷ་ས།༽ བོད་ཀྱི་ཁོར་ཡུག་སྲུང་སྐྱོབ་པ་དང་ཚོང་པ་གྲགས་ཅན་ཀརྨ་བསམ་འགྲུབ་ལགས་སུ་ལོ་ ༡༥ བཙོན་འཇུག་ཁྲིམས་ཐག་བཅད་དེ་ཉིན་བཅུ་ཙམ་ལས་སོང་མེད་པའི་སྐབས་འདིར། ཆབ་མདོ་འབྲིང་རིམ་མི་དམངས་ཁྲིམས་ཁང་གིས་ཁོང་གི་སྤུན་མཆེད་རིན་ཆེན་བསམ་འགྲུབ་ལགས་སུ་ལོ་ ༥ བཙོན་འཇུག་ཁྲིམས་ཐག་བཅད་འདུག
ཕྱི་ཚེས་ ༢༤ ཉིན་མི་ལོ་ ༡༥ ཁྲིམས་ཐག་བཅད་ཡོད་པའི་བོད་ཀྱི་ཁོར་ཡུག་སྲུང་སྐྱོབ་པ་དང་ཚོང་པ་གྲགས་ཅན་ཀརྨ་བསམ་འགྲུབ་ཀྱི་སྤུན་མཆེད་རིན་ཆེན་བསམ་འགྲུབ་ལ། དེ་རིང་ཆབ་མདོ་འབྲིང་རིམ་མི་དམངས་ཁྲིམས་ཁང་ནས་ལོ་ ༥ ཡི་ཁྲིམས་ཐག་བཅད་པ་དང་ལོ་ ༣ གྱི་ཆབ་སྲིད་ཁེ་དབང་འཕྲོག་ཡོད་འདུག རིན་ཆེན་བསམ་འགྲུབ་ལགས་ད་ལྟ་རང་ལོ་ ༤༤ ཡིན་ལ་ཁོང་ལ་ཁོར་ཡུག་སྲུང་སྐྱོབ་ཐད་ཀྱི་བྱ་དགའ་ཡང་ཐོབ་མྱོང་ཡོད་འདུག
ཁོང་གི་ཁྲིམས་རྩོད་པ་ཞ་ཅིན་གྱིས་རོའུ་ཊར་གསར་འགོད་པར་བརྗོད་ན། ཁོང་ལ་ཁྲིམས་ཐག་གཅོད་དགོས་དོན་ནི་སྐུ་ཞབས་རིན་ཆེན་བསམ་འགྲུབ་ལགས་ཀྱིས་གཙོ་གཉེར་བྱེད་བཞིན་པའི་ཁོར་ཡུག་དྲ་ཚིགས་དེའི་ཐོག ༧གོང་ས་མཆོག་ལ་ནོ་བྷེལ་ཞི་བདེའི་གཟེངས་རྟགས་བཞེས་པའི་སྐོར་གྱི་རྩོམ་ཡིག་འགའ་བཀོད་ཡོད་སྟབས། ཁོང་ལ་རྒྱལ་ཁབ་ཁ་བྲལ་གྱི་ཉེས་འདོགས་འོག་ཁྲིམས་ཐག་བཅད་པ་རེད་ཟེར།
འདི་གའི་གསར་འགོད་པས་བོད་གཞུང་ཕྱི་དྲིལ་ལས་ཁུངས་ཀྱི་དྲུང་ཆེ་ཐུབ་བསྟན་བསམ་འཕེལ་ལགས་ཀྱིས་གསུངས་དོན། ཀརྨ་མ་བསམ་འགྲུབ་དང་ཁོང་གི་སྤུན་མཆེད་རིན་ཆེན་བསམ་འགྲུབ་གང་ཡིན་རུང་། ཁོང་རྣམ་པ་གཉིས་ཀྱིས་བོད་མི་ཚོར་ཁོར་ཡུག་སྲུང་སྐྱོབ་ལེགས་པོ་བྱོས། གད་སྙིགས་དེ་ཚོ་ཡར་སྒྲུག་རོགས་ཟེར་ནས་སློབ་གསོ་གཏོང་མཁན་ཡིན་སྟབས། སྤྱི་ཚོགས་གཞན་པ་དེ་འདྲ་ཡིན་ན་བསྔགས་བརྗོད་དང་སེམས་ཤུགས་སྤར་གི་རེད། ཡིན་ནའང་། རྒྱ་ནག་གིས་འདི་ལྟ་བུའི་བྱ་བ་བསྒྲུབས་མཁན་ལ་ཁ་བྲལ་རིང་ལུགས་པ་དང་ཁ་བྲལ་གྱི་བྱ་བ་སྤེལ་འདུག་ཟེར་ནས་བཙོན་འཇུག་ཁྲིམས་ཐག་གཅོད་པ་འདི། ཧ་ཅང་བློ་ཕམ་བྱ་ཡུལ་རེད། དེ་ནི་མང་ཚོགས་ཀྱི་སེམས་ཤུགས་ལ་ཞེད་ཐག་ཆོད་པའི་བཟོ་འདྲ་བོ་རེད།
གང་ལྟར་དེ་རིང་རིན་ཆེན་བསམ་འགྲུབ་ཁོང་ལ་མི་རིགས་ཁ་བྲལ་གྱི་ཉེས་མེད་ཉེས་འཛུགས་བྱས་ཏེ་ལོ་ལྔའི་བཙོན་འཇུག་ཁྲིམས་ཐག་བཅད་པར་བློ་ཕམ་ཡོད་ལ། ཁོང་གི་སྤུན་མཆེད་ཀརྨ་བསམ་འགྲུབ་དང་ཁོང་རྣམ་གཉིས་གཙོས་བོད་ནང་གི་ཆབ་སྲིད་པ་བཙོན་པ་རྣམས་འཕྲལ་དུ་གློད་གྲོལ་གཏོང་དགོས་པའི་འབོད་སྐུལ་ཞུ་རྒྱུ་ཡིན་ཞེས་གསུངས་ཡོད།
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཨོ་རྒྱན་བསྟན་འཛིན་ལགས་སུ་བཀའ་འདྲི་ཞུས་པར་ཁོང་གིས་གསུངས་དོན། ༢༠༠༨ ལོ་ནས་བཟུང་བོད་ནང་གི་ཤེས་ལྡན་མི་སྣའི་ཐོག་ལ་སྲིད་ཇུས་གསར་བ་ཞིག་བཟུང་སྟེ། ཁོང་ཚོར་ཆབ་སྲིད་ཀྱི་ནག་ཉེས་གང་ཡང་མེད་པར་སྦྱར་ཡིག་སྦྱོར་བ་དང་སྐད་འབོད་བྱེད་པ་སོགས་བྱས་པར་ཁྲིམས་ཆད་ལྕི་མོ་གཅོད་ཀྱིན་ཡོད་ལ། དེ་ཚོ་མང་ཆེ་བས་བོད་ནང་གི་རིག་གཞུང་སྲུང་སྐྱོབ་དང་ཁོར་ཡུག་སྲུང་སྐྱོབ་སོགས་ཀྱི་ཆེད་དུ་ཕྱག་ལས་གནང་གི་ཡོད། ཡིན་ནའང་། ཁོང་ཚོ་ཚང་མར་ལྟ་སྟངས་གཅིག་པ་ཞིག་བཟུང་སྟེ་ཁ་བྲལ་དང་རྒྱལ་ཁབ་ཀྱི་བདེ་འཇགས་ལ་གནོད་པར་ཁག་གཡོག་སྟེ། དྲང་བདེན་མ་ཡིན་པའི་ཁྲིམས་ཐག་བཅད་ཡོང་གི་འདུག
དེ་བཞིན་དེ་རིང་ལོ་ལྔའི་ཁྲིམས་ཐག་བཅད་པའི་རིན་ཆེན་བསམ་འགྲུབ་དང་ཀརྨ་མ་བསམ་འགྲུབ་ལྟ་བུར་མཚོན་ན། དེ་སྔོན་ནས་རྒྱ་ནག་རང་གིས་ཆེ་མཐོང་ཡོད་པ་དང་ཆ་འཇོག་ཡོད་པ། བྱ་དགའ་རེག་མྱོང་བའི་མི་སྣ་དེ་འདྲ་ཡིན་མོད། ཁོང་ཚོར་ཡང་བོད་ནང་གི་གནད་དོན་ཞིག་དང་ཐུག་དུས། གནད་དོན་གང་འདྲ་ཞིག་ཡིན་ནའང་བསམ་ཚུལ་འདོན་མི་ཆོག་པ་དང་། སྨྲ་བརྗོད་རང་དབང་མེད་པའི་གནས་སྟངས་ཤིག་ཆགས་ཡོད། དེར་བརྟེན་བོད་མི་ཚོའི་ཐོག་ཏུ་རྒྱ་ནག་གི་དྲང་བདེན་མ་ཡིན་པའི་སྲིད་ཇུས་ཤིག་དང་། ལྷག་པར་དུ་མི་རིགས་དབྱེ་འབྱེད་ཀྱི་སྲིད་ཇུས་ཤིག་འཛིན་གྱིན་པ་གསལ་བོ་རེད་ཅེས་གསུངས་ཡོད།
ཁོང་རྣམ་གྱི་སྤུན་ཆུང་བ་འཆི་མེད་རྣམ་རྒྱལ་ལ་ཟླ་ ༢༡ ཙམ་གྱི་དུས་བཀག་བཙོན་འཇུག་བྱས་ཡོད།
གསར་འགོད་པ། ཨ་རིག་འགྱུར་མེད་དང་དཔལ་ལྡན་རྒྱ་མཚོ།
དྲ་གྲོགས་རྣམས་རིན་ཆེན་བསམ་གྲུབ་སྐོར་གྱི་དྲ་ཚིགས་འདི་ཚོ་ལ་གཟིགས་དང་།
http://cid-84797abf9719682b.spaces.live.com/?lc=1033
http://www.rfa.org/english/news/tibet/rinchen-samdrup-sentenced-07042010151600.html
རྒྱ་གཞུང་གིས་མི་རིགས་དབྱེ་འབྱེད་ཀྱི་སྲིད་ཇུས་ཤིག་འཛིན་ན་མཐའ་མ་རྒྱ་གཞུང་དང་རྒྱ་མི་རིགས་ལའང་གནོད་སྲིད་པ་རེད།
པེ་ཅིན་གྱི་ཧམ་པ་ཇེ་ཆེ་ཡིན་པ་འདིའང་རྡ་རམ་ས་ལས་རྒྱ་ཡན་དུ་བཏང་བར་འབྲེལ་བ་མེད་པ་ཞིག་མ་རེད།