སྤྱིར་བོད་ལ་ཆོས་སྲིད་ཟུང་འབྲེལ་གྱི་ལམ་ལུགས་གལ་ཆེ་བའི་སྐོར་ངས་བཤད་པ་དང་བྲིས་པ་གཉིས་ཀ་ཡོད། གཙོ་བོ་ཆོས་བརྒྱུད་སྤྱི་འཐུས་ཡོད་མེད་ཙམ་གྱིས་ང་ཚོའི་ཆོས་སྲིད་ཟུང་འབྲེལ་གྱི་རྣམ་གཞག་འཇིག་པར་འགྱུར་མིན་དང་དགེ་སྐྱོན་གང་ཆེ་ལ་ཞིབ་ཏུ་བསམས་པ་ལས། ངས་བྱུང་དང་འབྱུང་བཞིན་པའི་ཉོག་དྲ་ཙམ་པོ་བ་འདི་དག་གཙོ་བོར་འཛིན་གྱིན་མེད་ལ། འདི་ཆོས་བརྒྱུད་སྤྱི་འཐུས་གཅིག་པུའི་སྐྱོན་ཞིག་ཡིན་པ་དེ་བས་ཀྱང་བསམས་མ་མྱོང།
ཚང་མས་ཤེས་གསལ་ལྟར་མི་རབས་གསར་བ་སྔ་རྗེས་དུ་མ་ཞིག་གིས་བོད་ཀྱི་ཆོས་སྲིད་ཟུང་འབྲེལ་ལམ་ལུགས་ལ་སྐྱོན་བརྗོད་ཤུགས་ཆེན་བྱས་དང་བྱེད་ཀྱིན་ཡོད། བོད་ལ་བྱུང་བའི་བྱས་ཉེས་ཚང་མ་དེས་མ་འགྲིགས་པར་འདོད་ཡོད། དེ་བས་ང་ཚོས་ཆོས་སྲིད་ཟུང་འབྲེལ་གྱི་ལམ་ལུགས་གསར་བ་འདིས་ད་ལྟ་དང་མ་འོངས་པར་བོད་ཀྱི་སྤྱི་ཚོགས་ལ་དགེ་མཚན་གསར་བ་རེ་འདོན་ཐུབ་པའི་བདེན་དཔང་བྱེད་དགོས་ཀྱི་ཡོད། འོན་ཀྱང་དེང་སང་སྤྱིར་གྲྭ་བའི་མཐོང་དམའ་རུ་འགྲོ་བཞིན་ཡོད་ལ་ལྷག་པར་བླ་སྤྲུལ་རིགས་ལའང་དད་པ་ལོག་གིན་ཡོད། ཆོས་ལུགས་མི་སྣའི་གནས་བབ་འདི་འདྲའི་སྐབས་སུ་ཚད་མཐོའི་གྲོས་ཚོགས་ར་བའི་ནང་དུ་ཆོས་བརྒྱུད་སྤྱི་འཐུས་རྣམ་པས་རྒྱ་ཆེ་བའི་དད་ལྡན་མི་དམངས་ལ་ཤུགས་རྐྱེན་བཟང་པོ་ཞིག་འཇོག་རྐྱུ་ཅི་བས་ཀྱང་གལ་ཆེ་བར་མཐོང་གིན་ཡོད་མོད། འདི་ཐུབ་ཀྱིན་མི་མེད་པས་ཆོས་བརྒྱུད་སྤྱི་འཐུས་དེ་ཡོད་པ་ལས་མེད་ན་བཟང་བའི་སྣང་ཚུལ་འདི་རིགས་བྱུང་དང་འབྱུང་བཞིན་པ་ཞིག་རེད། དེ་བས་ང་ཚོ་མུ་མཐུད་ལམ་ལུགས་འདིའི་ཐོག་སོང་ན་བོད་ཀྱི་ནང་ཆོས་དང་དེ་འཛིན་གནང་མཁན་གྱི་སྐྱེས་བུ་དམ་པས་གཙོས་དགོན་སྡེ་ཁག་ལ་ཡི་རང་དད་མོས་ཡོང་བ་ཞིག་ཏུ་བསྒྱུར་ཐུབ་རྒྱུ་རེད་དམ། ཡང་ན་ཇེ་སྡུག་ཏུ་འགྱུར་རྒྱུ་རེད། གལ་ཏེ་མི་རབས་གསར་བའི་ཆོས་ལུགས་ཀྱི་དད་འདུན་བརླགས་ན་དེའི་མཇུག་འབྲས་ཇི་ལྟ་བུ་ཞིག་ཏུ་འགྱུར་རྒྱུར་ངེས་པར་ཐུགས་བསམ་བཞེས་དགོས། ངས་ནི་ཧ་ཅང་གི་ཚབས་ཆེན་པོ་ཞིག་མཐོང་གིན་འདུག སྤྱིར་བཏང་གི་བླ་སྤྲུལ་ཞིག་དང་གྲྭ་བ་འགའ་རེའི་ཚུལ་མིན་སྤྱོད་པས་ཀྱང་གཞོན་སྐྱེས་ཚོར་ཤུགས་རྐྱེན་ཅི་ཙམ་འཇོག་གིན་འདུག ཆོས་བརྒྱུད་སྤྱི་འཐུས་རྣམ་པ་ནི་བོད་ཀྱི་དགོན་སྡེ་ཡོངས་ཀྱི་ཚབ་མཚོན་གྱི་མི་སྣ་ཞིག་ཆགས་ཀྱིན་ཡོད་པས་ཁོང་ཚོའི་གནང་སྟངས་ཀྱིས་ཤུགས་རྐྱེན་བཟང་ངན་གཞན་ལས་ལྷག་པ་འཇོག་གིན་ཡོད།
གནད་དོན་འདི་འདྲ་ཞིག་ལ་ཐུག་ཡོད་པས་འདིའི་ཐད་ལ་གཡུང་དྲུང་བོན་བཅས་པའི་ཆོས་བརྒྱུད་ཁག་གི་དབུ་ཁྲིད་རྣམ་པས་གཙོས་དགེ་འདུན་པའི་སྡེས་ཐུགས་བསམ་ལེགས་པོ་ཞིག་བཞེས་དགོས་པ་མ་ཟད། ཆེད་དུ་དམིགས་བསལ་ཚོགས་འདུ་བསྐོང་ནས་ཆོས་ལུགས་འཛིན་སྐྱོང་ཐོག་ལ་ཅི་དགེའི་བཀའ་མོལ་གནང་འོས་པར་མཐོང། ངས་འདི་ལྟར་བསམ་བློ་གཏོང་ཁུལ་བྱེད་ཀྱིན་ཡོད།
ངས་ཇོ་ནང་བར་སྤྱི་འཐུས་དགོས་ཚུལ་ཅང་བཤད་མ་མྱོང། ཡིན་ན་ཡང་ཇོ་ནང་བའི་མཁན་པོ་སོགས་ཀྱིས་ལོ་ནས་ལོ་མཐུད་དེ་གྲོས་ཚོགས་ར་བའི་སྒོར་ཕེབས་ནས་ཡིག་ངག་གཉིས་ཐོག་ནས་རེ་བསྐུལ་ཞུས་ཀྱིན་ཡོད་པས་ང་ཚོས་དོ་སྣང་མ་བྱས་ས་མི་འགྲོ་ལ། ཁོང་ཚོས་རྩོད་བཞིན་པ་དེ་འོས་དང་མི་འོས་ཀྱི་ཐག་གཅོད་ཅིག་ཀྱང་གནང་དགོས་པ་རེད་དེ། དེ་དོན་ས་སྐྱ་བའི་ནང་གི་ཉོག་དྲ་ཞིག་ཡིན་ཚུལ་དང། ཆོས་དོན་ལྷན་ཁང་དང་ཆོས་བརྒྱུད་ཁག་གི་ཚོགས་ཆེན་བཅས་ཀྱིས་ཐག་གཅོད་དགོས་པ་ཞིག་ལ་བརྩིས་ནས་ང་ཚོའི་གྲོས་ཚོགས་ལ་འགན་མེད་པ་འདྲ་བོ་ཞིག་ཆགས་བསྡད་ཡོད་པ་དོན་དངོས་རེད། འདི་ཐད་ལ་ཆོས་བརྒྱུད་སྤྱི་འཐུས་ཚོས་དམིགས་བསལ་འགན་ཞིག་བཞེས་ནས་གནང་རྒྱུ་ཅང་མེད་པའམ་མི་ཤེས་པ་ཞིག་རེད། ཡང་ན་ཆོས་ལུགས་ཐད་ཀྱི་གནད་དོན་འདི་རིགས་ཐད་ལ་ཆོས་བརྒྱུད་སྤྱི་འཐུས་རྣམ་པར་དམིགས་བསལ་ཐག་གཅོད་ཀྱི་སྐུ་དབང་ཞིག་ཁྲིམས་ཐོག་ནས་བཟོ་དགོས་ཀྱི་འདུག དེའི་མཚུངས་ཆོས་བརྒྱུད་སྤྱི་འཐུས་འདེམས་ཕྱོགས་ལ་བསམ་འཆར་ཡོང་གིན་ཡོད། འོས་འཕེན་གྱི་ཐོབ་ཐང་གཉིས་ཡོད་པ་དེ་རེད། གང་ལྟར་ལེགས་བཅོས་ཤིག་བྱེད་དགོས་པ་ཆགས་ཡོད་པས་ཇི་ལྟར་བྱེད་མིན་དེ་ང་ཚོས་བསམ་བློ་གཏོང་དགོས་ངེས་རེད། དེ་སྔོན་ནས་གྲོས་ཚོགས་ནང་ལ་གྲོས་འཆར་ཞིག་འདོན་རྩིས་བྱས་མོད། གཅིག་ནས་དུས་ལ་མ་རན་པ་ཞིག་དང་གཉིས་ནས་གནད་དོན་འདི་མི་དམངས་ཀྱིས་གླེང་འོས་པ་ཞིག་ཏུ་མཐོང་ནས་ད་བར་ངག་ནས་བཤད་པ་ལས་ལག་ནས་བྲིས་མེད། དེ་གཅིག་ཡིན།
གཉིས་ནས། ཆོལ་ཁའི་སྤྱི་འཐུས་མང་ཉུང་སྐོར་རེད། འདིའི་དགོས་པ་གཙོ་བོ་དེ་སྔོན་ཁ་ཐོར་ཡ་ཐོར་གྱི་བོད་རིགས་ཡོངས་སུ་རྫོགས་པ་ཁྱིམ་གཅིག་གི་མི་ཡིན་པ་དང་ཕྱིར་ཁྱིམ་གཅིག་ལ་འདུ་བའི་ཆེད་ཡིན་པས་བཙན་བྱོལ་བའི་ཆོལ་ཁོངས་ཀྱི་མི་གྲངས་མང་ཉུང་ལ་མ་བལྟས་པ་རེད། འོན་ཀྱང་འདིའི་ཐོག་ནས་ཀྱང་བསམ་ཚུལ་མང་པོ་ཞིག་བྱུང་དང་འབྱུང་བཞིན་པ་རེད། དེ་རིང་འདི་ཡང་ཞོར་དུ་གླེང་དགོས་བྱུང་སོང།
གཅིག་ནས་བོད་པ་ཚང་གི་ཁྱིམ་ཚང་ཆེན་པོ་མཚོན་ཕྱིར་ཆོལ་གསུམ་སྤྱི་འཐུས་ངེས་པར་མཁོ། གཉིས་ནས་བཙན་བྱོལ་བོད་མིའི་ཆོལ་ཁོངས་མི་འབོར་གི་མང་ཉུང་ཐོག་ནས་འཐུས་མིའི་མང་ཉུང་བཏོད་ཆོག འདི་ལ་ང་མོས་མཐུན་ཡོད། དེང་སང་གི་དབུས་གཙང་ཆོལ་ཁོངས་ལ་ས་ཁུལ་མང་ཐོག་མི་གྲངས་ཀྱང་མང། དེ་བས་སྤྱི་འཐུས་ཀྱང་མང་ཤོས་ཡིན་དགོས།་ དེ་ནས་མདོ་སྟོད། ཉུང་ཤོས་་མདོ་སྨད་ལོས་ཡིན། དེ་དག་གི་ཐོག་ལ་རྒྱལ་ཁོངས་གཞན་གྱི་བོད་མིའི་སྐུ་ཚབ་འཐུས་མི་གང་འཚམ་དགོས། དེ་དག་གི་ནང་ལ་སྐྱ་སེར་ཕོ་མོ་སུ་ཡང་ཡོང་ཆོག དེ་རིང་ནས་ངས་བོད་ཀྱི་དུས་བབ་དྲ་ཐོག་ལ་དེབ་སྐྱེལ་བྱས་ཡོད་པས་ང་ཚོས་ཁ་བརྡ་ཡང་ཡང་བྱེད་ཆོག བདེ་མོ།༢༠༡༠།༧།༣
སྤྱི་འཐུས་ལྷ་མོ་སྐྱབས་ལགས། དྲི་བ་ཁ་ཤས་ཞུ་རྒྱུར་བཀའ་ལན་གནང་སྐྱོང་ཞུ།
1 ཆོས་བརྒྱུད་སྤྱི་འཐུས་ཡོད་པ་འདི་ཆོས་སྲིད་ཟུང་འབྲེལ་གྱི་ལམ་ལུགས་གསར་པ་ཞིག་ཡིན་ན། སྐུ་ཉིད་ཀྱིས་ཆོས་སྲིད་ཟུང་འབྲེལ་ཞེས་པའི་རྩ་བའི་ངོ་བོ་ཅི་འདྲ་ཞིག་ལ་འདོད་ཀྱི་ཡོད།
2 ཆོས་བརྒྱུད་སྤྱི་འཐུས་ཀྱི་ལམ་ལུགས་འདི་དང་པོ་༸གོང་ས་མཆོག་གི་དགོངས་གཞི་ལྟར་བཟོས་པ་ཞིག་ཡིན་ཚོད་འདུག་ན། འདིའི་དགོས་པ་རྒྱུ་མཚན་གཙོ་བོ་དེ་ཅི་ཡིན་ནམ།
3 ཆོས་བརྒྱུད་སྤྱི་འཐུས་རྣམ་པས་ཤུགས་རྐྱེན་ངན་པ་ཐེབས་བཞིན་པས་འདི་མེད་ན་ལེགས་གསུངས་པ་ལ་ང་ཡང་མོས་མཐུན་ཡོད། འོན་ཀྱང་འདི་ཆོས་བརྒྱུད་སོ་སོས་ཁས་ལེན་དཀའ་བའི་ཉམས་མྱོང་སྔར་བྱུང་ཟིན་པ་དེས་ན་འདི་ཁས་ལེན་ཐུབ་ཐབས་ལ་ཇི་ལྟར་བྱས་ན་བཟང། ཆོས་རིག་ལས་ཁུངས་ཆོས་དོན་ལྷན་ཚོགས་ལ་སྒྱུར་བཞིན་པ་འདིས་གོ་ཆོད་ཀྱི་ཡོད་ན་དེ་ལ་བལྟ་ས་ཞིག་འདུག
4 དྲ་གྲོགས་ཚོའི་མཆན་ལ་བལྟས་ན་ཆོས་སྲིད་ཟུང་འབྲེལ་དང། ཆོས་ལུགས་རིས་མེད། ཆོས་མེད་རིང་ལུགས་བཅས་ཀྱི་གོ་དོན་དང་ཁྱད་པར་དེ་ཚོ་ཏག་ཏག་ཅིག་ཤེས་ཀྱི་མེད་འདུག་ལ། ཟམ་གདོང་རིན་པོ་ཆེས་དེའི་སྐོར་གསུངས་པ་རྣམས་ཀྱང་གསལ་པོ་ཞིག་དྲན་གྱི་མི་འདུག་པས། སྐུ་ཉིད་ཀྱིས་དེ་ཚོའི་སྐོར་ངོ་སྤྲོད་ཅིག་གནང་ཐུབ་ན་ཀུན་ལ་ཐུགས་ཕན་གསོས་ངེས་རེད། དེ་ཙམ་ཡིན། ཐུགས་རྗེ་ཆེ།
རྒན་ལྷ་མོ་སྐྱབས་ལགས་
ཁྲིམས་ལུགས་ཚང་མ་སྤྱི་ཚོགས་ཀྱི་དགོས་མཁོ་ལྟར་བཟོས་པ་ཞིག་ཡིན་པས་དགོས་མཁོ་ལྟར་བཟོ་བཅོས་དང། སྣོན་འཕྲི་གང་ཡང་བྱ་ཆོག་པ་ཞིག་ཡིན་པ་ངའི་ཤེས་ཀྱིན་ཡོད་་་་འོན་ཀྱང་འདི་ཁྱོད་དང་ང་ཙམ་གྱི་ཤེས་པ་ཙམ་ལས་དོད་དངོས་ཐོག་བསྒྱུར་ཆོག་ཆོག་ཞིག་ཡོད་དམ།
ཡང་ཅིག་བཤད་ངའི་ཁྱོད་ཀྱི་ནང་གི་ཀུན་སློང་འདི་རེད་ཞེས་ཁ་ཙོན་ཆོད་མི་ཐུབ་ན་ཡང། ཁྱེད་ནས་ལན་བཏབ་པ་དེ་ནས་ཆོས་རྒྱུད་ཁག་གི་སྤྱི་མཐས་ཚོ་ལ་ཐེར་འདོན་བྱེད་བཞིན་པ་འདི་རེད། འདིའི་ཀྱང་ཆོས་རྒྱུད་ཁག་ལ་ལན་ཚག་ངན་པ་ཞིག་འཇོག་མི་སྲིད་པ་མ་རེད།
ཆོས་རྒྱུད་ཁག་གི་ཆོས་མཐུས་འགའ་ལ་སྐྱོན་ཡོད་པ་བཞིན་ཆོལ་ཁ་དག་གི་སྤྱི་མཐུས་འགའ་ལ་ཡང་སྐྱོན་དེ་གར་རང་ན་ཡོན་པ་ཁྱེད་ཀྱི་མཁྱེན་ངེས་རེད།དེ་བསམ་ཚུལ་གང་འདྲ་ཡོད
སྤྱིར་ཡིན་ན་ང་ཆོས་རྒྱུད་ཆོས་མཐུས་ཕར་ཟད་ཆོལ་ཁའི་སྤྱི་མཐུས་ལ་ཡང་འགྱུར་པ་གཏོང་ན་འདོད་མཁན་ཞིག་ཡིན་མོད་།་འོན་ཀྱང་ཁ་ཆུང་དབང་ཆུང་ལས་ཁ་ཆེན་དབང་ཆེན་ཚོའི་ཕྱོགས་གཅིག་གི་སྐྱོན་མ་ཡིན་པར་ཕྱོགས་ཐམས་ཅད་ལ་གཟིགས་ཏེ་སྤྱི་ཚོགས་ཀྱི་དགོས་མཁོ་ལྟར་བཟོ་བཅོས་དང། སྣོན་འཕྲི་དོད་ལ་ཁ་སྣོན་རེད་བྱས་ན་མ་རེད་དམ།
ངས་སྔོན་ཆད་ཀྱང་འདི་ལྟར་དྲྭ་ཐོག་ཏུ་འགོད་མྱོང་། དྲྭ་གྲོགས་འགའ་ཞིག་གིས་རང་གིས་བཤད་པའི་སྐད་ཆའི་གནད་འགའ་རེར་གཞན་གྱིས་དྲི་བ་བྱས་པའི་ལན་འདེབས་མ་ཐུབ་ན། ༼བླུན་པོ་འདི་དག་ལ་གོ་བརྡ་མི་འཕྲོད་༽ཅེས་གཡོལ་ཐབས་ཀྱི་སྐད་ཆ་སྐྱུགས་རྫོབ་འདི་བཤད་རྒྱུ་ངན་ལངས་སུ་ཤོར་འདུག སྡུག་ས་ནས་བཤད་ན་སྐད་ཆ་འདི་ཤེས་བྱ་དང་ཤེས་བྱེད་ཀྱི་སྒོ་འགོག་པའི་ཕ་བོང་ཞིག་དང་བདེན་པ་དང་རྫུན་པའི་གོ་བསྲེ་བའི་ངན་ཇུས་ཤིག་རེད། ཁྱོད་ཚོ་མཁས་པ་ཡིན་ན། ཁྱོད་ཚོ་སྤྱང་པོ་ཡིན་ན། ཡི་གེ་འབྲི་ཤེས་པའི་དྲྭ་གྲོགས་བླུན་པོ་ཚོར་གོ་བརྡ་ཞིག་སྤྲོད་དང་།
རྒན་སྤྱི་འཐུས་ལྷ་མོ་སྐྱབས་ལགས།
མཆན་བུ་རྣམས་ལ་མུ་མཐུད་ལན་གནང་གི་ཡོད་པ་ཐུགས་རྗེ་ཆེ།
ཁོ་བོའི་སྔོན་གྱི་མཆན་བུ་དེ་ནང་མི་གུས་པ་དང་ཟུར་ཟ་སོགས་བྱུང་ཡོད་ན་༧རྒྱལ་བའི་འཁྲུངས་ཚེས་ཉིན་འདིར་དགོངས་དག་ཞུ་སྙིང་འདོད་བྱུང་།
གུས་པའི་སླར་ཡང་བཤད་འདོད་པ་ནི་ཆོས་བརྒྱུད་སྤྱི་འཐུས་མཁོ་བ་ཡིན་ཏེ་བོད ཀྱི་སྤྱི་ཚོགས་ཧྲིལ་པོ་འདི་སྔར་མེད་པའི་ ཐོབ་ཐང་དང་ སྔར་མེད་པའི་རང་དབང་ སྔར་མེད་པའི་འདྲ་མཉམ་ ཕོ་མོ་དང་ སྐྱ་སེར་ཁྱད་མེད་བཅས་ཆེས་ཁྱད་དུ་འཕགས་པ་དང་ ཆེས་གཟི་བརྗེད་དང་ལྡན་པ་ ཆེས་གསར་གཏོད་ཀྱི་རང་བཞིན་དང་ལྡན་པའི་ལམ་ལུགས་འདི་ནི་ཤིན་ཏུ་ངོ་མཚར་ཆེ་བ་དང་གཟི་བརྗེད་ཅན་ཞིག་ལ་ངོས་འཛིན་ཡོད།
རྒན་ལགས་ཀྱིས་གཤམ་གྱི་མཆན་བུ་ཞིག་ནང་༼ཆོས་ལུགས་མི་སྣ་ཆོལ་ཁའི་ཕྱོགས་སུ་ལྷུང་བཞིན་པའི་སྣང་ཚུལ་༽ཞེས་པའི་གསུངས་འདི་རྒན་ལགས་ཀྱི་གསུངས་འདོད་པའི་ཚིག་ངོ་མ་དེ་རེད།
འདི་ལས་སླ་པོ་ཞིག་རེད་ ཆོལ་ཁ་རེ་རེ་ཁོངས་གཏོགས་ནས་ཆོས་བརྒྱུད་སོ་སོའི་སྤྱི་འཐུས་རེ་རེ་ཕེབས་པ་ཡིན་ན་ཁ་གྲངས་མང་རུ་འགྲོ་གི་རེད་མ་གཏོགས་ཆོས་ལུགས་མི་སྣ་ཆོལ་ཁའི་ཕྱོགས་སུ་ལྷུང་བཞིན་པའི་སྣང་ཚུལ་འདི་རྩ་མེད་མ་འགྲོ་ནའང་ཉུང་དུ་གཏན་གཏན་འགྲོ་གི་རེད་དྲན་བརྒྱི་འདུག་།
ཡང་ཆོས་བརྒྱུད་སྤྱི་འཐུས་ལ་ལས་ཀ་ཅང་བྱེད་རྒྱུ་མེད་པ་འདྲ་ཞིག་གསུངས་འདུག་ཀྱང་ཆོས་བརྒྱུད་སྤྱི་འཐུས་ཀྱི་མིང་དང་ངོ་བོའི་ཐོག་ནས་ཀྱང་ཆོས་བརྒྱུད་ཁག་ལ་ཐོབ་ཐང་དང་ རང་དབང་ འདྲ་མཉམ་བཅས་མཚོན་ཐུབ་པའི་བྱེད་ནུས་ལྡན་མེད་དམ་
དེ་མིན་ན་རྒན་ལགས་ཀྱང་མདོ་སྨད་སྤྱི་འཐུས་ཀྱི་མིང་ཙམ་ཞིག་འཁུར་ཏེ་པ་རི་སིར་བཞུགས་བསྡད་རྒྱུ་ལས་བྱེད་རྒྱུ་ཅང་མེད་པ་
གང་ལྟར་སྐུ་ཉིད་ཀྱི་ཡོད་པའི་སྟེང་ལ་ཡོད་ཐོག་ཡོད་བརྩེགས་དང་སྐྱོན་སེལ་དག་སེལ་གནང་ན་རྒྱབ་སྐྱོར་མཐའ་གཅིག་ཏུ་ཞུ་རྒྱུ་དང་དེ་མིན་ཡོད་པ་མེད་པ་བཟོ་བརྩིས་གནང་ན་སླར་ཡང་ངོ་རྒོལ་མུ་མཐུད་ཞུ་རྒྱུ་འཁེལ་སོང་།
བཀུར་འོས་རྒན་ལྷ་མོ་སྐྱབས་ལགས། ངའི་ཞེ་འདོད་ངོ་མ་དེ་ལྟར་མིན། དཔེར་ན་ལོ་རྒྱུས་སྟེང་རྒྱ་གར་ལྟ་བུ་ནང་བ་སངས་རྒྱས་པའི་ཆོས་ཀྱི་འབྱུང་ཁུངས་ཡིན་ལ། དེ་བཞིན་རྒྱ་ནག་དང་བོད་གཉིས་ལས་རྒྱ་ནག་ལ་ནང་ཆོས་དར་སྔ་ཟེར། དེ་བཞིན་ནང་ཆོས་དར་བའི་རྒྱལ་ཁབ་གཞན་ལའང་གྲྭ་བ་ཡོད་ས་མང་གི དེ་དག་ལ་གྲྭ་བ་སྲིད་སྟེགས་ལ་བཞུགས་པའི་ལམ་ལུགས་ཡོད་ཨེ་མྱོང་། བོད་ལ་མཚོན་ན་གྲྭ་བས་སྲིད་སྟེགས་ལ་འཚང་ཁ་གནའ་ནས་ད་བར་བརྒྱབ་འདུག དེ་འགྲིག་གི་མི་འདུག་བསམ་ཡོད།༼ ཆོས་དད་ཅན་གྱི་དཔོན་རིགས་ངེས་པར་མཁོ།༽སྐད་ཆ་དེ་ལ་རྒྱབ་སྐྱོར་བརྒྱ་ཆ་བརྒྱ་ཡོད། ཡིན་ནའང་། ཆོས་དད་ཅན་ཅན་གྱི་དཔོན་རིགས་གྲྭ་བ་ཡིན་དགོས་ཟེར་ན་མི་འགྲིག་གི་བསམ་ཡོད། དེའི་ཕྱིར་རྒྱལ་ཁབ་གཞན་དང་བོད་རྒྱལ་ཁབ་བསྡུར་ནས་བལྟས་ན་རྒྱལ་ཁབ་གཞན་གྱི་ལམ་ལུགས་དེ་ཡག་ས་རེད་དྲན་སོང་།
གཉའ་འབྲོང་ཐུ་བུ་ལགས། ཁྱོད་ཀྱིས་ཟེར་ན་ནང་ཆོས་ཡོད་པའི་རྒྱལ་ཁབ་གཞན་དག་ལ་ཆོས་པའི་དཔོན་རིགས་མེད། བོད་ལ་ཡོད། དེ་བས་བོད་ལུགས་འདི་གཞན་དག་ལས་བཟང་བསམས་པ་འདྲ། དེ་ཙམ་གྱིས་དགེ་སྐྱོན་གསལ་བཤད་མི་ཐུབ། བོད་ལུགས་འདི་ལོ་རྒྱུས་རང་བཞིན་ཅན་གྱི་ཆོས་ཀྱི་རྒྱལ་ཁབ་ཅིག་ཡིན་པས་ཆོས་པའམ་ཆོས་ཤེས་མཁན། ཡང་ན་ཆོས་དད་ཅན་གྱི་དཔོན་རིགས་ངེས་པར་མཁོ། ཡིན་ཡང་ཆོལ་ཁ་གསུམ་དང་ཆ་མཉམ་པའི་སྤྱི་འཐུས་གྲངས་ཚད་མཐོ་བ་འདི་འདྲ་དགོས་དོན་མེད། ངས་བལྟས་ན་ཆོས་བཀའ་བློན་ལ་གཡུང་དྲུང་བོན་དང་བཅས་པའི་ཆོས་བརྒྱུད་ཁག་གི་དབུ་འཛིན་ཆེ་གྲས་རྣམས་ལས་གདམ་འོས་སྙམ་མོ།
གཉའ་འབྲོང་ཐུ་བུ་ལགས། དཔོན་སར་ཆོས་པ་ངོ་མ་སླེབས་ན་ལོས་བཟང། ༸གོང་ས་མཆོག་ལྟ་བུ་རེད། རྒྱལ་ཁབ་གཞན་དག་ལའང་ཆོས་ལ་དགའ་ཞེན་ཅན་གྱི་དབུ་ཁྲིད་བཟང་བོའི་རིགས་སླེབས་པ་མང་ལ་དེ་དག་གིས་ཆོས་ལུགས་ལ་སྲུང་སྐྱོབ་ལས་གཏོར་བཤིག་བཏང་མེད་པ་རེད། དེང་སང་དམངས་གཙོ་ཡིན་པས་ཁྲིམས་ཀྱི་དབང་སྒྱུར་ལས་གང་ཟག་གི་དབང་སྒྱུར་འོག་འགྲོ་ཉེན་མེད་པས་དཔོན་སར་ཆོས་པ་ངོ་མ་སླེབས་མ་སླེབས་ལ་ཁྱད་པར་དེ་ཙམ་མེད་པར་མཐོང།
ཡང་བསྐྱར་ཀུན་ལ་གསལ་བཤད་ཅིག་མ་ཞུས་ཐབས་མེད་ཆགས་སོང་། དྲྭ་གྲོགས་ངང་སེར་ལགས། ད་ལྟར་འཚོ་བཞུགས་ཡིན་པའི་གཞིའི་བྱེས་ཀྱི་བོད་མི་ཙམ་མ་ཟད། ཐོག་མར་བོད་འདི་འགོ་ཚུགས་ནས་མཐར་མ་སྟོང་གི་བར་གྱི་བོད་མིར་གྱུར་ཚད་ཀྱིས་བོད་ཀྱི་དབུ་འཛིན་སུ་དགོས་ཀྱི་འོས་ཤོག་འཕེན་རྒྱུ་ཡོད་པའི་དབང་དུ་བཏང་ན། མ་གྲོས་བསམ་པ་གཅིག་མཚུང་གིས། རྒྱ་ཆ་གོ་དགུ་ལྷག་གིས་ཡིད་གཉིས་ཙམ་ཡང་མི་དགོས་པ་གདམ་པའི་ད་ལྟ་ཞལ་དངོས་སུ་བཞུགས་པའི་༧གོང་ས་སྐྱབས་མགོན་ཆེན་པོ་ནི། རང་རེ་བོད་ཀྱི་ཨ་རིས་ལྟར་ན། སྲིད་འཛིན། རྒྱ་གར་ལྟར་ན་སྲིད་བློན་དེ་ཡིན་པ་དུས་ནམ་ཡང་བརྗེད་རྒྱུ་མེད།
བཀའ་བློན་ཁྲི་བ་ནི། བོད་ཀྱི་དྲུངས་ཆེན་ལྟ་བུ་ལས། གོང་ས་མཆོག་ཞལ་བཞུགས་པའི་ཚེར་མིན།
སྤྱི་འཐུས་རྣམ་པ་ནི། བོད་ཀྱི་ས་གནས་ཁག་གི་སྐུ་ཚབ་ཡིན། བོད་ཀྱི་སྐུ་ཚབ་ཀྱིས་བོད་ཀྱི་དབུ་ཁྲིད་ཀྱི་དགོངས་བཞེད་དང་བསྟུན་དགོས་ལ། བོད་ཀྱི་དབུ་ཁྲིད་ཀྱིས་བྱ་བ་ཆེ་ཁག་གང་དང་གང་བྱེད་པ་ཡིན་ནའང་བོད་ཀྱི་སྐུ་ཚབ་ཀྱི་རྒྱབ་སྐྱོར་གྱི་རྒྱ་ཆ་ཚང་མིན་ལ་ལྟོས་དགོས། དེ་ནི། བོད་ཀྱི་དབུ་ཁྲིད་དེ་བོད་ཀྱི་མི་མང་གི་ཚབ་ཡིན་པ་དང་། བོད་ཀྱི་་དབང་ཆ་དེ་བོད་ཀྱི་མི་མང་ལ་ཡོད་པའི་རྒྱུ་མཚན་གྱིས་ཡིན།
གོང་ས་མཆོག་སྐུ་འཚོ་བཞུགས་ཀྱི་རིང་བཀའ་བློན་ཁྲི་བ་ལས་ཀྱང་ཁྲིམས་བཟོ་ལྷན་ཁང་འདི་གནད་ཆེ་བ་མཐོང་གིན་འདུག རྒྱུ་སྐར་ཇི་ཙམ་གསལ་ཡང་རྟ་བདུན་ལས་ལྷག་མི་སྲིད་པ་ལྟར། གོང་ས་མཆོག་གི་ཆོས་སྲིད་ཀྱི་སློབ་སྟོན་རྣམས་རྩ་བའི་སྲོག་ཏུ་ཟིན་ནས། ཁྲིམས་བཟོ་ལྷན་ཁང་གིས་དེ་དང་མཐུན་པའི་རྩ་ཁྲིམས་ལ་སྙིགས་དོར་བཅུད་ལེན་བྱེད་དགོས་པའི་དུས་སྐབས་གཅིག་ཆགས་ནས་སྡད་འདུག
དེར་བརྟེན། བཀའ་ཁྲི་ཟམ་གདོང་རིན་པོ་ཆེ་ལྟ་བུར་མཚོན་ན། ཉམས་མྱོང་དང་ཤེས་ཡོན་གང་གི་ཐད་ནས། ཀུན་གྱིས་བརྩོད་མེད་ཀྱི་མཁས་དབང་ཆེན་པོ་ཞིག་རེད། ཁོང་ཡང་བསྐྱར་བཀའ་ཁྲིར་འགྲོ་བའི་ལམ་འགག་མེད་ན་རུང་། སྤྱི་འཐུས་སུ་འགྲོ་བའི་ལམ་འགག་གཏན་གཏན་ཡོད་འགྲོ། བོད་དོན་ལ་སེམས་མཁན་རྣམས་ཀྱིས་རྒྱུ་མཚན་གང་གིས་བཀའ་ཁྲི་ཡང་བསྐྱར་སྤྱི་འཐུས་ཀྱི་འོས་བབ་ཡོད་པའི་མིང་ཐོའི་ནང་ལ་མི་བགྲངས་པ་ཡིན་ན།
བོད་དོན་ལ་གཅིག་ཏུ་དཀར་བའི་རིན་པོ་ཆེ་མཆོག་སྤྱི་འཐུས་ཀྱི་ཚོགས་གཙོ་ཞིག་ཡང་བསྐྱར་ཕེབས་རྒྱུ་བྱུང་ན། བཀའ་ཁྲི་ལས་ཀྱང་ཕྱག་ལས་བསྟར་སའི་སྐུབ་སྟེགས་དེ་ཆེ་འདུག
བསམ་ཆར་ཙམ་ཡིན།
ཆོལ་ཁ་གསུམ་དང་ཆོས་བརྒྱུད་ཚང་མའི་མི་སྣ་སླེབས་པའི་འཐུས་མི་རྣམས་བཀའ་ཁྲི་འདེམས་སྟངས་ལྟར་བྱས་ན་བཟང། ད་དུང་བོད་ནང་ནས་ཀྱང་དངོས་སུ་འོས་ལྡུག་མི་ཐུབ་ཀྱངསྔོན་འགྲོའི་འོས་གཞི་གང་འོས་ཀྱི་བསམ་ཚུལ་མང་ཙམ་སྡུད་ཐུབ་རྒྱུ་རེད། དེ་ལྟར་བྱུང་ན་བོད་ཀྱི་སྤྱི་འཐུས་ཞེས་པའི་མིང་དོན་དང་མཐུན་ལ་གཟི་བརྗིད་ཀྱང་ཆེ་རུ་འགྱུར་ངེས། ད་དུང་ཨ་ཞང་ཚང་གི་མགོ་ན་བར་ཡང་་་་་
བཀུར་འོས་རྒན་ལྷ་མོ་སྐྱབས་ལགས་སུ་བཀའ་འདྲི་ཞུ་རྒྱུར།
འཛམ་བུ་གླིང་གི་སྒང་ལ་ཆོས་ལུགས་དར་སའི་རྒྱལ་ཁབ་མང་པོ་ཡོད་པ་རེད་ལ། སྔོན་ཆད་དང་དེང་གི་ཆར་གཉིས་ཀར་བཤད་ནའང་ནང་ཆོས་དར་ཡོད་པའི་རྒྱལ་ཁབ་ཀྱང་མི་ཉུང་བ་བརྩི་རྒྱུ་འདུག ཡིན་ནའང་། རྒྱལ་ཁབ་གཞན་ལ་མཚོན་ན་མཐོ་རིམ་དཔོན་རིགས་དང་དབང་འཛིན་གཞུང་ཞབས་མི་སྣའི་ནང་བླ་མ་གྲྭ་བ། ཡང་ན་ཆོས་པ་ངོ་མ་ཞིག་ཚུད་ཡོད་རྒྱུ་ཨེ་རེད། གལ་སྲིད་མེད་ན་དེ་ནི་བོད་པ་ཚང་གི་བྱེད་སྟངས་དང་མ་འདྲ་བ་ཞིག་ཆགས་སོང་བས་དོན་ངོ་མར་ལམ་ལུགས་གང་གི་བཟང་།
རང་རེའི་བོད་དུ་ཆོས་སྲིད་ཟུང་འབྲེལ་ཞེས་པའི་ཐ་སྙད་བྱུང་བ་ནས་བཟུང་ད་བར་དགེ་སྐྱོན་མང་དག་ཤིག་བྱུང་ཡོད་ལ། འགྲོ་བ་མིའི་འཕྲལ་ཕུག་གི་བདེ་སྐྱིད་ཀྱི་གཞི་རྩ་ཆོས་ཡིན་པ་དང་དེ་ལ་ཞབས་འདེགས་ཆབས་སྲིད་ཀྱི་ལས་ཀྱི་སྣེ་མོ་བ་ཚོས་ཞུས་སྟེ་ཆོས་སྲིད་ཟུང་འབྲེལ་དེ་བཞིན་དོན་དངོས་ཐོག་ཚང་མར་འཕྲལ་ཕུགས་ཀུན་ཏུ་ཕན་ཐོག་བྱ་ཐུབ་པ་ཞིག་ཡིན། དེ་འདྲའི་རྒྱུ་མཚན་གྱིས་ཆོས་རྒྱུད་སྤྱི་འཐུས་རང་རེའི་བོད་ཀྱི་སྤྱི་ཚོགས་ལ་ངེས་པར་མཁོ་བ་ཞིག་ཡིན་པ་ལས་འདོར་དུ་མི་རུང་བ་ཡིན། ཆོས་རྒྱུད་སྤྱི་འཐུས་རྒྱུད་ནས་ཆོས་རྒྱུད་སོ་སོའི་འཛིན་སྐྱོང་སྤེལ་གསུམ་གྱི་བྱ་བར་གཞུངས་ནས་ཞབས་འདེགས་ཇི་འདྲ་ཞུ་དགོས་དང་བཀའ་རྙོགས་ཇི་ལྟར་སེལ་དགོས་ཀྱི་ལམ་སྟོན་སོགས་གནང་བར་ཆོས་རྒྱུད་སྤྱི་འཐུས་མེད་དུ་མི་རུང་བ་ཡིན་སྙམས། ཡང་ཆོས་རྒྱུད་དེ་བཞིན་ཆབ་སྲིད་ཀྱི་བེད་སྤྱོད་གཏོང་རྒྱུའི་ལག་ཆ་འདྲ་བོ་གནང་ཚེ་དེ་ནི་ཆོས་ལ་ཤིན་ཏུ་གནོད་སྐྱོན་ཆེ་ཞིང་དེ་འདྲའི་དབང་གིས་ད་ལྟ་ཆོས་དང་ཆོས་བྱེད་ལ་དད་པ་དང་ཡིད་ཆེས་ཉུང་དུ་འགྲོ་རྒྱུའི་རྒྱུ་རྐྱེན་གཅིག་ཆག་གི་འདུག་པས་དེས་ན་ཆོས་རྒྱུད་སྤྱི་འཐུས་མཁོ་ཞིང་སྤྱི་འཐུས་ཀྱི་སྤུས་ཚད་ལེགས་པོ་དང་ལྷག་བསམ་ཅན་ཞིག་དགོས་རྒྱུ་ནི་དེ་བས་གལ་ཆེ། ཉེ་བའི་ཆར་བཀའ་བརྒྱུད་སྤྱི་འཐུས་ཀྱི་ཕྱག་ལས་ལ་མཚོན་ན་བཀའ་བརྒྱུད་སྤྱི་ཡི་སྐུ་ཚབ་བསྐོ་རྒྱུའི་ཐད་ཀཾ་ཚང་ཕྱོགས་གཉིས་ཡོད་པའི་ནང་ཚན་གཅིག་ཤོས་ཀྱི་ཕྱོགས་སུ་བཟུང་སྟེ་ཕྱོགས་གཞན་པ་དེར་ཁྱད་གསོད་ཀྱིས་གྲོས་འདྲི་ཙམ་ཡང་མ་བྱས་པར་གྲོས་ཆོད་གནང་འདུག་པ་འདི་འདྲའི་མཚོན་པའི་ཕྱོགས་ལྷུང་གི་ལས་ཀ་གནང་བ་ཡིན་ན་སྤྱི་འཐུས་ཡོད་པ་ལས་མེད་པ་ལེགས་སམ་སྙམ་པའང་ཡོང་གི་འདུག
དེའི་སྐོར་དྲྭ་རྒྱ་ཞིག་འདུག་པས་གཟིགས་ན་ http://www.hetuprabav.blogspot.com