མདོ་སྨད་སྤྱི་འཐུས་ཆབ་བྲག་ལྷ་མོ་སྐྱབས་ལགས། ད་ལོའི་དབྱར་ཁའི་དགུང་མོ་ཞིག་ལ་པེ་རི་སིའི་གྲོང་ཁྱེར་གྱི་ནུབ་མཐའ་རུ་ཡོད་པའི་ཁྱིམ་ཚང་ཞིག་ཏུ་ང་ཚོའི་ཆོས་བརྒྱུད་སྤྱི་འཐུས་དགོས་མིན་གྱི་གནད་དོན་འདི་གླེང་བཞིན་པ་ཞིག་རླུང་བསེར་བུས་ཁུར་ནས་འདིར་བསླེབས་སོང་།
དེ་དུས་ངས་ ༼དགའ་ལྡན་དགོན་པའི་ཤུལ་གཉིས་པ་༽ ཞེས་པའི་སྒྲུང་ཐུང་ཞིག་ལ་བསམ་བློ་བཏང་ནས་བསྡད་ཡོད། སྒྲུང་ཐུང་དེ་རྨི་ལྟས་ངན་པ་ཞིག་དང་བཅས་ངའི་ཀླད་པའི་རྒྱ་དར་ལ་འབྱར་ནས་ཡུན་རིང་ལྷག་སོང་།
ཆོས་བརྒྱུད་སྤྱི་འཐུས་དགོས་མི་དགོས་ཀྱི་རྩོད་གཞི་འདི་ནི། ངའི་རྨི་ལམ་དུ་འཁོར་བའི་དགའ་ལྡན་དགོན་པའི་ཤུལ་གཉིས་པ་དེར་ཡང་འབྲེལ་བ་ཡོད་པར་འདོད།
ད་ནས་རྩིས་པའི་ལོ་གང་འཚམ་ཞིག་གི་རྗེས་ནས། རྒྱབ་ཁུག་ཁུར་བའི་འཛམ་གླིང་གི་ཡུལ་སྐོར་བ་དག་གིས་རྒྱ་གར་ལྷོ་ཕྱོགས་ནས་དགའ་ལྡན་དགོན་པའི་ཤུལ་གཉིས་པ་དེ་མཐོང་རྒྱུ་རེད། དེ་དང་མཉམ་དུ་དགོན་ཤུལ་གཞན་པ་ཚོ་ཡང་རྙེད་གི་རེད།
དགའ་ལྡན་དགོན་པའི་ཤུལ་དང་པོ་དེ་ལྷ་ས་རུ་ཡོད་པ་རེད། ལྷ་སའི་དགའ་ལྡན་དགོན་པ་སྟོང་བར་ལུས་ནས་ལོ་གང་འཚམ་ཞིག་གི་རྗེས་ལ་རྒྱ་གར་ལྷོ་ཕྱོགས་སུ་ཆགས་པའི་དགའ་ལྡན་དགོན་པའི་གདན་ས་གཉིས་པ་དེ་ཡང་སྟོང་བར་འགྱུར་རྒྱུ་རེད།
དུས་ཚོད་དེ་མ་བསླེབ་པའི་ལོ་ ༣༠ ཡར་སྔོན་ནས་བཟུང་རང་ཅག་གིས་དེ་རིང་ཁ་ཤེད་ཆེ་ཆུང་དང་མིག་རྒྱང་རིང་ཐུང་ལ་མ་ལྟོས་པར་རྩོད་ཀྱིན་པའི་ཆོས་བརྒྱུད་སྤྱི་འཐུས་ཚོའི་རྐུབ་སྟེགས་དེ་ཡང་སྟོང་བར་ལྷག་རྒྱུ་རེད། ཐལ་རྡུལ་དང་བཅས་ག་ལེར་ལྟེབ་རྩེག་མ་བརྒྱབ་རང་བརྒྱབ་ཆགས་ཡོང་གི་རེད།
དགའ་ལྡན་དགོན་པའི་ཤུལ་གཉིས་པ་དེའི་རྒྱབ་ལྗོངས།
དུས་རབས་ཀྱི་འགྲོས་དང་། སྤྱི་ཚོགས་ཀྱི་ཁོར་ཡུག མིའི་ཤེས་རིག་གི་འཕེལ་འགྲིབ་བཅས་ཀྱི་དབང་གིས། བཙན་བྱོལ་སྤྱི་ཚོགས་ནས་གྲྭ་རྒྱུན་ཆད་དེ་ལོ་ ༣༠ ནས་ ༤༠ འགོར་གྲབས་ཡོད་ལ། བོད་ནང་གི་མདོ་དབུས་ཁམས་གསུམ་ནས་ཀྱང་ད་སྐབས་གྲྭ་རྒྱུན་ཆད་ཀྱིན་ཡོད། གནས་སྟངས་འདིར་ཚོད་དཔག་བྱས་ན། ལོ་རེར་ཆ་སྙོམ་གྱིས་དགེ་འདུན་པ་ ༥༠༠ རེ་ཇེ་ཉུང་དུ་འགྲོ་གིན་ཡོད་སྲིད་ལ། དེ་ལྟར་ལོ་ ༢༠ ཕྱིན་རྗེས་བོད་ཕྱི་ནང་གི་གདན་ས་ཆེན་པོ་འདི་དག་ཀྱང་རང་བཞིན་གྱིས་སྟོང་འགྲོ་གི་རེད། གྲྭ་རྒྱུན་ཆད་ཀྱིན་སྐབས་འདིར་གྲྭ་བ་ལོག་གིན་པའི་གནས་ཚུལ་དེ་ཡང་ལྡབ་ཉིས་འགྱུར་སུམ་འགྱུར་གྱིས་ཇེ་མང་ལ་འགྲོ་རྒྱུ་རེད། ཤུལ་དུ་ལྷག་མཁན་ཚོ་ནི་གོས་སེར་པོ་མནབས་མཁན་གྱི་བོད་པའི་བླ་མ་དང་སྤྲུལ་སྐུ་སྐོར་ཞིག་ཡིན། ཁོང་ཚོ་མུ་མཐུད་ནས་བཞུགས་དོན་ལ་བློས་མི་ཐོངས་པའི་རྒྱུ་མཚན་གལ་ཆེན་དེ་འདྲ་ཡོད།
ཧི་མ་ལ་ཡའི་རི་བརྒྱུད་ནས་ཕེབས་པའི་དགེ་འདུན་པ་རྣམས་ནི་གདན་ས་ཁག་གི་དགེ་འདུན་པའི་མི་རབས་མཐའ་མ་དེ་ཆགས་འགྲོ་གི་རེད། མི་འགྱངས་པར་བོད་པའི་གདན་ས་དང་གྲྭ་ས་ཁག་ཏུ་ཧི་མ་ལ་ཡའི་རི་བརྒྱུད་ཀྱི་མི་རིགས་ཚོས་བརྒྱ་ཆ་ ༦༠ ནས་ ༧༠ ཟིན་འགྲོ་གི་རེད། ད་ལོར་ལོ་རྒྱུས་ཐོག་ཐེངས་དང་པོར་དགའ་ལྡན་ཁྲི་པ་དེ་ཧི་མ་ལ་ཡའི་རི་བརྒྱུད་ཀྱི་མི་ཞིག་ཆགས་པ་འདི་ཡང་རྨི་ལམ་འདིའི་སྔ་ལྟས་རེད། གང་ལྟར། དེ་དུས་ཆོས་བརྒྱུད་ཁག་གི་སྤྱི་འཐུས་དེ་ཡང་དགོས་མཁོ་ཡོད་ན་རྒྱ་གར་གྱི་གྲོས་ཚོགས་ནང་དུ་འགྲོ་བ་ལས། ང་ཚོའི་ཆབ་སྲིད་ཀྱི་ར་བའི་ནང་ཁྲིད་ཡོང་ཐབས་མེད་པ་ཆགས་འགྲོ་གི་རེད།
ད་སྐབས་ང་ཚོས་ཆོས་བརྒྱུད་སྤྱི་འཐུས་དགོས་མི་དགོས་ཀྱི་གླེང་སློང་བྱེད་བཞིན་པ་དེ་ནི་ངའི་རྨི་ལམ་འདི་ལ་འབྲེལ་བ་འདུག་གམ།
ལུང་རིགས་རྒྱལ་ལགས། ངས་ལྷོ་ཕྱོགས་ཀྱི་དགའ་ལྡན་དགོན་པ་ཟེར་བ་མིན། བོད་ཀྱི་དགའ་ལྡན་དགོན་པ་དེ་ཟེར་བ་ཡིན། ཕལ་ཆེར་ངས་གོ་བརྡ་ཡག་པོ་ཞིག་སྤྲད་ཐུབ་མེད་པ་འདྲ། དགོངས་པ་མ་འཚོམས།
སུ་ལ་རྒྱུ་མཚན་མངའ་ན་དེ་ལ་བརྒྱབ་སྐྱོར་བྱེད་དགོས།
མི་ནག་ཚང་ལགས། ཁྱེད་ཀྱི་རྩོམ་ཡིག་གི་མདའ་མོ་དེ། དོན་གྱི་འབེན་ལ་ཕོག་འདུག་པ་ཞིག་རེད། འདི་ནི་དུས་འགྱུར་གྱི་དེད་འོངས་པའི་གནད་དོན་ཞིག་རེད། འདིའི་སྐོར་ལ་མཁྱེན་དཔྱོད་ཅན་གྱི་མཁན་པོ་ཁ་ཤས་ཀྱིས་ཐུགས་ཁྲལ་གནང་གིན་ཡོད་ལ། ཡང་མཁན་པོ་ཁ་ཤས་ཀྱིས་བལ་ཡུལ་དང་། འབྲུག འབྲས་ལྗོངས། ལ་དྭགས་བཅས་ནས་གྲྭ་རྒྱུན་བསྡུ་བ་དགོས་པ་རེད་གསུངས་ཀྱིན་འདུག མི་ནག་ཚང་ལགས། ངས་ཀྱང་གདན་ས་ནི་ལྟག་ཆུ་ཆད་པའི་རྫིང་བུ་ཞིག་འདྲ་བར་མཐོང།
༧གོང་ས་རྩོམ་སྒྲིག་རྨི་ལམ་དེ་འཁྲུལ་སྣང་གི་ཆེས་འཁྲུལ་སྣང་ཞིག་ཏུ་འཁུམས། དེང་སྐབས་བོད་ཕྱི་ནང་གཉིས་སུ་གྲྭ་པ་བཟོ་མཁན་ཅུང་ཙམ་དཀོན་པོ་ཆགས་པ་ནི་རྒྱུ་རྐྱེན་གཉིས་ཡོད། ༼ གཅིག ༽བོད་མི་བྱིངས་ལ་ནང་ཆོས་ཀྱི་གོ་རྟོགས་ཤིན་ཏུ་རབ་ཏུ་ཞན་པ་དང་། ༼གཉིས་༽བོད་པའི་སྤྱི་ཚོགས་འདི་ཤེས་ཡོན་གྱིས་མ་འདང་པའི་རྐྱེན་གྱིས་གཞན་གྱིས་བསླུ་ཆོག་ཆོག་ཡོད་པས་སོ། འདི་ནི་རྟག་བརྟན་དུ་གནས་པ་ཞིག་ག་ལ་ཡིན་ཏེ་ཡིན་མི་སྲིད། རྒྱུ་ཅན་འདི་༧གོང་ས་མཆོག་གིས་ཡེ་ཤེས་གཟིགས་ཆེན་པོས་མཁྱེན་ནས་མི་མང་ནང་ཆོས་ཀྱི་གོ་རྟོགས་སྤེལ་དང་སྤེལ་མུས་ཡིན། ནམ་ཞིག་བོད་མི་རིགས་ཀྱིས་ནང་ཆོས་སྙིང་བཅུད་མྱོང་ནས་སེར་མོ་གྲངས་ཚད་འཕེལ་བར་གདོན་མི་ཟ། དེང་གི་ཆར་བཙན་བྱོལ་ནང་གྲྭ་ཅུང་ཙམ་དཀོན་པོ་ཆགས་ཡོད་ནའང་སྲོག་འབེན་དུ་བཙུགས་ནས་ཡོང་མཁན་གང་འཚམས་ཡོད།
ཤེས་ཡོན་ལྡན་པའི་མགོ་སེར་རྣམས་ཀྱིས་དད་མོས་བྱེད་སྟངས་དང་། རྒྱ་གར་མི་སེར་ནང་གྲྭ་པ་བཟོ་མཁན་གང་འཚམས་ཐོན་གྱིས་ཡོད། ལོ་ཉི་ཤུའི་རྗེས་སུ་
རྩོམ་སྒྲིག་པའི་རྨི་ལམ་ལས་ལྡོག་སྟེ་དགའ་ལྡན་དུ་གྲྭ་གྲངས་ཁྲི་ཚོ་བརྒལ་བ་དང་། སེ་འབྲས་གཉིས་སུ་རིམ་པ་ལྟར་ཆིག་ཁྲི་ལྔ་སྟོང་དང་བཞི་སྟོང་བར་འཕེལ་བར་ངེས།
དེ་དུས་བུད་མེད་ཚོགས་པས་གཙུག་ལག་མདུན་དུ་རྟག་པར་ངོ་རྒོལ་བྱེད་པར་ངེས། ཧེ་ཧེ་ཧེ་ཧཧཧཧ། འདི་ནི་ངའི་བཀྲ་ཤིས་པའི་རྨི་ལམ་ཡིན་ལ། དོན་དངོས་ཀྱང་ཡིན།
རྩོམ་སྒྲིབ་པ་ལགས། ཆེས་མཐའ་མ་ཞིག་ལ་དེ་ལྟར་འགྱུར་སྲིད། དེར་སྔོན་འགོག་ཙམ་གྱི་ཐབས་ཤེས་ནི། གཅིག་ནས་བོད་ཀྱི་སྐད་ཡིག་གིས་དེང་རབས་རིག་གནས་ཚུར་འདྲེན་ཐུབ་དགོས། གཉིས་ནས་ནང་ཆོས་དེ་གྲྭ་ས་ཙམ་གྱི་སློབ་གཉེར་མ་ཡིན་པར་སློབ་གྲྭ་ཁག་ནང་ལ་བསླབ་དགོས། དེ་དག་ཚགས་ཚུད་ཡུན་བརྟན་ཡོང་བར་མདོ་དབུས་ཁམས་གསུམ་པོ་རང་སྐྱོང་གཅིག་ཡོང་དགོས། དེ་ལྟར་བྱུང་ན་ཚེ་བསྲིང་ཐུབ།
ལུང་རིགས་རྒྱལ་གྱི་མ་རྙིད་པའི་རྨི་ལམ་དེ་ངའི་ཡང་ཐེངས་མང་པོར་རྨིས་མྱོང་།
འདི་ནི་དངོས་འབྲེལ་རེད་ཟེར་ཐུབ་མིན་གང་ལྟར་ངའི་རྨི་ལམ་དང་ཧ་ཅིང་བར་
ཐག་ཉེ།།
སྣང་རྒྱལ་ཤེར་དགེ་ལགས།
ད་ལྟའི་ལྷོ་ཕྱོགས་ཀྱི་དགའ་ལྡན་དགོན་པ་འདི་ཆགས་ས་ནི་དགོན་ཤུལ་ཞིག་ཡིན་པའི་གནས་ཚུལ་གོ་མྱོང་མེད། ཡིན་ཡང་། དེ་འདྲའི་བཤད་སྲོལ་ཞིག་ཡོད་དུས་བདེན་སྲིད། འབྲེལ་ཡོད་མི་རེ་ལ་སྐད་ཆ་འདྲི་ཐུབ་ན་ཐུགས་ཕན་སོས་པའི་ལན་རེ་རག་སྲིད་པ་རེད།
བློ་བཟང་མཐུ་སྟོབས་ལགས།
ད་ལྟའི་གནས་ཚུལ་གྱི་ཐོག་ནས་སྐུ་ཉིད་ཀྱིས་བཤད་པ་བདེན་ངེས། ཡིན་ཡང་། འཕེལ་ཕྱོགས་ཀྱི་ཆ་ནས་ང་ཡང་བདེན་སྲིད། ལྷག་པར་དུ། གནས་སྟངས་འདི་དག་ཅུང་བསྡད་ན་ཇེ་མགྱོགས་སུ་འགྲོ་རྒྱུ་ཡིན་པ་ནི་ངའི་རྣམ་རྟོག་ཙམ་ཡིན།
བཙན་བྱོལ་གཞུང་དེ་རང་བཙན་ཡོད་པའི་མང་གཙོ་གཞུང་དང་པར་བཀབ་བྱས་ན་ནོར་བ་རེད། བཙན་བྱོལ་གཞུང་ནང་ལ་འོས་འཕེན་མིན་ལ་མ་ལྟོས་པར་འདིའི་སྟོབས་ཤུགས་དེ་རང་བཙན་ཡོད་པའི་གཞུང་གཞན་ལྟར་ཕ་གཞིས་བུ་འཛིན་དང་དཔྱ་ཕྲལ་བཅོག་ཆ་དང་སྲུང་སོགས་ལ་རེ་བ་མིན་པར་བོད་ཕྱི་ནང་གཉིས་ལ་ཡོད་པའི་བོད་མི་རྣམས་ཀྱི་རང་རང་གི་ཕ་ཡུལ་གྱི་ཞེན་པ་དང་ཆོས་དད་ཀྱི་ཞེན་པ་གཉིས་ལས་དང་པོ་ལས་ཆོལ་ཁའི་སྤྱི་འཐུས་དང་གཉིས་པ་ལས་ཆོས་བརྒྱུད་ཡོང་དགོས་དོན་དེ་རེད།
ད་ལྟ་ཁ་ཐུག་ལ་དགོན་སྡེ་ཁག་ནང་རྒྱ་བལ་གྱི་མི་སེར་བོད་རིགས་མང་པོ་ཡོད་པ་སོགས་མིག་རྒྱང་ཐུང་བའི་རྒྱུ་མཚན་གྱིས་བྱས་ན་ནོར་བ་རེད། ངས་བྱས་ན་བོད་རིགས་ཡུལ་གཞན་གྱི་མི་སེར་བླངས་པའི་རིགས་ཅིག་གིས་བཀའ་ཁྲིའི་འོས་མི་འཕེན་པའི་ཚབ་ལ་མི་སེར་གཞན་གྱི་ནང་པ་ཚུར་བཀུག་ནས་དྭང་བླངས་དཔྱ་ཕྲལ་དང་བཀའ་ཁྲིའི་འོས་འཕེན་མཁན་གསར་པ་བཟོ་ཐུབ་པ་བྱེད་དགོས་རེད་སྙམ།
ཡང་ཁ་ཅིག་ལ་བོད་གཞུང་དེ་ཆོས་ལུགས་གཅིག་གི་གཞུང་ཟེར་མཁན་དེ་ང་ཡིན་ན་ཁྱོད་བདེན་ལ་ཁ་རྡུང་གཏོང་ཡེ་གོ་སྐབས་ཡོད་ན་ནཡང་དེ་ཚོ་ང་མ་རེད་ངའི་མཆན་བུ་ཡང་བསྐྱར་ལྷོད་ལྷོད་བྱས་ནས་བཀླགས་ནས་གསུང་རོགས་གནོངས།
མཐར་གཏུགས་ན་བོད་བཙན་བྱོལ་གཞུང་གི་མངའ་ཐང་མ་ཉམས་པ་བྱེད་རྒྱུ་དེ་མདོར་དོན་གཙོ་བོ་དེ་རེད། ཆོས་བརྒྱུད་སྤྱི་འཐུས་མེད་པ་བཟོས་ནས་མང་གཙོའི་ནུས་ཤུགས་ཆེ་རུ་འགྲོ་ན་ངས་ཀྱང་རྒྱབ་སྐྱོར་ཞུ་ཆོག དེ་ཡིན་ས་མ་རེད་སྙམ།
མི་ནག་ཚང་ལགས། ་ཁ་ཕྱིར་ལོག་མེད་མ་གཏོགས་ལོག་རན་ཞིག་འདུག ད་དུང་ཁྱེད་ཀྱིས་(ངས་༼རྒན་ལྷ་མོ་སྐྱབས་ལགས། ཁྱེད་ཀྱིས་སྐད་མ་རྒྱོབ་དང་། རྐུབ་སྟེག་དེ་ཚོ་ལྟེབ་རྩེག་རྒྱག་རྒྱུ་རེད་༽ཅེས་བཤད་མེད།)ཟེར། ད་ཁྱོས་མངོན་སུམ་ལ་བསྙོན་རྒྱུ་ཡིན་ནམ།
ཨ་དགེ་ལགས། འདིར་ཕེབས་པར་དགའ་བསུ་ཡོད།
བོད་ཀྱི་དགའ་ལྡན་བའི་མིང་ཅན་གསུམ་དེའི་སྐོར་ཞིབ་ཙམ་གསུང་ཐུབ་བམ།
རྗེས་དཔག་གི་རིག་པས་བྲིས་པའི་ལྷུག་བརྗོད་འདི་ཅི་འདྲའི་སྙན་པ་ལ། འདི་ནི་རྩོམ་སྒྲིག་པ་ཁོང་གིས་བྲིས་པའི་རྗེས་དཔག་གི་རིག་པས་ཁྱབ་པའི་ལྷུག་བརྗོད་རྩོམ་ཡིག་དང་བོ་དེ་མིན། འདི་འདྲའི་ཁྱད་ཆོས་ལྡན་པའི་རྩོམ་ཡིག་ནི་དེང་གི་ཡར་རྒྱས་མེད་པའི་རྩོམ་མཁན་ཆུང་ཆུང་ཚོར་ཅི་འདྲའི་མཁོ་ཨང་།
ཀརྨ་རྡོ་རྗེ་ལགས། བོད་གཞུང་དེ་ཆོས་བརྒྱུད་གང་གི་གཞུང་ཡང་མ་རེད། བོད་མི་དམངས་ཀྱི་གཞུང་རེད།
ལུང་རིགས་རྒྱལ་ལགས། ངའི་སྐད་ཆ་འདི་རྩོམ་ཡིག་འདིའི་གནད་དོན་དང་འབྲེལ་བ་མི་འདུག་མོད། འོན་ཀྱང་ངའི་མིད་ཐག་ལ་ཟ་འཕྲུག་ལང་ནས་སྡོད་ཐབས་མི་འདུག་པས་དྲི་བ་འདི་འདྲི་དགོས་བྱུང་། དགའ་ལྡན་དགོན་པ་སུའི་ཤུལ་དུ་བརྒྱབ་པ་རེད། དགའ་ལྡན་དགོན་པ་མ་བརྒྱབ་པའི་སྔོན་དུ་འདིར་དགོན་པ་གཞན་ཞིག་ཡོད་པའི་བཤད་ཚུལ་འདུག་པས་དེ་ཅི་འདྲ་ཡིན་ནམ།
སེ་ར་དགོན་དུ་ད་ལྟ་གྲྭ་རྒྱུན༥༠༠༠ལྷག་ཡོད་་་་་་་་་དེའི་ནང་ནསཧི་མ་ལ་ཡའི་གྲྭ་རྒྱུན་༨༠༠ཟིན་གི་མ་རེད།
སྔར་ཆོས་རྒྱལ་མེས་དབོན་རྣམ་གསུམ་སྐབས་ལ་བྶཏན་པ་སྟོབས་ཀྱིས་བསྐྱངས་པ་རེད། བོད་བསིལ་བུར་གནས་དུས་རྒྱལ་སྲས་ཡུལ་དཔོན་དང་མི་མང་གིས་སྤེལ་བ་རེད། དགའ་ལྡན་ཕོ་བྲང་གི་གཞུང་དབུ་བརྙེས་ནས་བཟུང་གཞུང་དང་མི་མང་གིས་དང་། བཙན་བྱོལ་དུ་ད་ལྟའི་བར་༧གོང་ས་མཆོག་གིས་དབུ་འཁྲིད་པའི་བོད་གཞུང་གིས་ཆོས་དོན་ལས་ཁུངས་ཙམ་གྱིས་གོ་མ་ཆོད་པར་ཆོས་བརྒྱུད་སྤྱི་འཐུས་དགོས་པའི་དགོས་པ་ད་ལྟ་འཇའ་ལྟར་ཡལ་ཟིན་པ་ཡིན་བགྱིད་མ་རེད། ད་ནས་ཆོས་བརྒྱུད་མེད་པ་ཆགས་ན་བཀའ་ཁྲིའི་འོག་གིས་བོད་སྲིད་གཞུང་གིས་བོད་བསྟན་ཇི་ལྟར་སྐྱོང་ཐུབ་བམ།
ད་ལྟའི་བར་གྱི་བོད་གཞུང་དེ་དགེ་ལུགས་པའི་གཞུང་མིན་པ་དེ་ཆོས་ལུགས་སྤྱི་འཐུས་ཡོད་པ་ཙམ་གྱིས་འགོག་ཐུབ་རེད། ༧གོང་ས་མཆོག་རྙིང་མ་ཆགས་ནས་ད་ལྟའི་གཞུང་དེ་རྙིང་པ་པའི་གཞུང་རེད་ཟེར་མཁན་བོད་རིགས་ཚོ་ཁག་མེད་པ་མ་རེད།
མ་འོངས་པ་ལ་བོད་གཞུང་ལ་རྒྱ་གར་གཞུང་གིས་རྩིས་མེད་བྱེད་མི་ཐུབ་པའི་དགེ་མཚན་མཐར་ཐུག་དེ་བོད་ཀྱི་ཆོས་བརྒྱུད་སྤྱི་འཐུས་ཡོད་པ་དང་། དེ་ཡོད་པ་གཅིག་པུས་སྐྱོབ་ཐུབ་པའི་དུས་ཚོད་མི་ཤར་བའི་ངེས་པ་ཡོད་མ་རེད་སྙམ།
དེས་ན་ཆོས་བསྒྱུད་རེ་རེའི་འཐུས་མི་རེ་རེར་མ་ཟད། ད་དུང་ད་ཆ་ཇོ་ནང་ཞི་བྱེད་སོགས་ཐུན་མོངས་ཀྱི་ཆོས་བརྒྱུད་གསར་པ་ཞིག་བསྐོ་དགོས་པའི་དུས་ཚོད་ལ་བསླེབས་ཡོད་རེད། ད་ལྟ་ཁ་ཐུག་དྲན་པའི་རྒྱུ་མཚན་དེ་ཙམ་གྱིས་ཆོག་པར་བྱས།
མི་ནག་ཚང་ལུང་རིགས་རྒྱལ་གྱིས་གསུང་བ་ནི་ཅི་མ་བདེན་ངས་ཡང་རྒྱ་གར་གྱི་གནམ་གྲུ་ཐང་ལས་རྫིག་པའི་དེང་སང་གི་འབྲས་བློ་གསལ་གླིང་གི་འདུ་ཁང་ཆེན་མོ་དེ་ནམ་ཞིག་རྒྱ་གར་བའི་འགྲེམ་སྟོན་ཁང་ངམ་བྱ་ཚང་བྱེའུ་ཚང་གི་འགྱུར་རྒྱུ་རེད་བསམ་པའི་སེམས་འཕྲད་འདུག
དེང་སང་མགོ་ལོག་ཁུལ་གྱི་བླ་མ་འགའ་རེས་བོད་ནང་དུ་དགོན་པ་ལྷ་ཁང་སོགས་གསར་བཞེང་གནང་པ་དེ་ཚོ་ནི་ངོ་མ་བཤད་ན་ཤ་ཁུ་ཤ་ལ་འཐུམ་སོང་ཟེར་བའི་དཔེ་བཟང་ཤོས་དེ་རེད་བསམ།
རི་བོང་ལགས།
ད་ཐེངས་ཀྱི་མཆན་གྱི་ནང་ནས་ཁ་ཕྱིར་ལོག་དེ་རི་བོང་ཁ་ཤོ་ཁྱེད་རང་རེད།
ངས་༼རྒན་ལྷ་མོ་སྐྱབས་ལགས། ཁྱེད་ཀྱིས་སྐད་མ་རྒྱོབ་དང་། རྐུབ་སྟེག་དེ་ཚོ་ལྟེབ་རྩེག་རྒྱག་རྒྱུ་རེད་༽ཅེས་བཤད་མེད།
ལྷ་མོ་དོན་གྲུབ་ལགས།
འདི་ལ་བཅོས་སུ་ཡོད་ན་སྐུ་ཉིད་ཀྱིས་སྟོན་རོགས། ཕྱོགས་ཙམ་རེ་བསྟན་ན་ཡང་འགྲིག་གི་རེད། སྔ་ཕྱི་གང་དུའང་རྒྱ་ནག་ནི་བོད་ལ་དོན་དངོས་ཀྱི་དབང་སྒྱུར་བྱེད་མཁན་དུ་འགྱུར་རྒྱུ་ཡིན་པ་ལྟར། སྔ་ཕྱི་གང་དུའང་གོང་གི་རྨི་ལམ་འདི་ཡང་མངོན་འགྱུར་འབྱུང་རྒྱུ་ཡིན་པ་དེ་གསལ་བོ་རེད་དྲན།
ད་དགོན་པ་ལ་ཤ་ཚ་མཁན་གྱི་བླ་རྒན་དག་གྲྭ་རྒྱུན་གྱི་ཆེད་དུ་སྐྱ་ས་བབ་ན་ཡག་ས་རེད།
ཀརྨ་རྡོ་རྗེ་ལགས། དེའི་ཐད་ལ་རྒྱུ་མཚན་གསལ་བོ་རེ་འདྲེན་རྒྱུ་ཡོད་ན་ཕན་ཐོགས་ཆེན་པོ་ཡོད་ཀྱི་རེད།
འདྲེ་ཁེར་འདུག་ལགས། ངའི་རྨི་ལམ་དེ་ལ་ང་རང་ཉིད་ཀྱང་སྐྲག་ནས་བསྡད་ཡོད། འོན་ཀྱང་། རྒྱ་ནག་པའི་ལུགས་ལ། གཉིད་ལམ་ལྡོག་སྟེ་ ཡོང་ཞེས་པའི་བཤད་སྲོལ་ཞིག་ཀྱང་ཡོད་པས་ད་དུང་ལྟ་ཆོག་གི་རེད།
ཨ་ཁུ་ཁ་བ་དཀར་པོ་ལགས།
ཁྱེད་ཀྱིས་རྒྱུ་རྐྱེན་གལ་ཆེ་ཤོས་དེ་དྲངས་མི་འདུག གལ་སྲིད་རྒྱུ་རྐྱེན་གལ་ཆེ་ཤོས་དེ་གཉིས་ཀྱི་དབང་གིས་མིན་རྒྱུ་ན། ༡། གྲྭ་པ་རྒན་པ་དག་གྲོངས་སོང་ནའང་གཞོན་པ་དག་ཡོད་པ་རེད། ༢། སྐྱ་སར་བབ་པ་མང་ནའང་སྒར་ལ་ཞུགས་མཁན་ཡང་དེ་ལས་མང་གི་རེད། ༣། ཡུལ་བྱོལ་དུ་འགྲོ་མཁན་གྱིས་བརྒྱ་ཆ་ ༡༠༠ ཟིན་པ་ཡང་ཅུང་མཐོ་དྲག་འདུག
ཡིན་རྒྱུ་ནི། དང་པོ་དེར་རྒྱ་ནག་གི་སྲིད་བྱུས་ལ་འབྲེལ་བ་ཡོད་པ་རེད། སྲིད་བྱུས་འདིའི་འོག་ནས་བོད་པའི་ནང་པའི་གྲྭ་རྒྱུན་མ་ཆད་རང་ཆད་རེད། དཔེར་ན། འཆར་ལྡན་བུ་སྐྱེས་ལྟ་བུ་རེད། གཉིས་པ་ནི། བོད་པ་རང་སྟེང་གི་བསམ་ཚུལ་རེད། མ་གཞི་ནས་ཁྱིམ་ཚང་ཞེས་པ་དེ་སྔོན་མ་ནང་བཞིན་བྱིས་པ་བརྒྱད་དགུ་དང་ཕ་མ་གཉིས་བཅས་མི་མགོ་བཅུ་གྲངས་ལས་གྲུབ་པ་ཞིག་མིན་པར། རབ་ཡིན་ན། བུ་གཅིག་དང་བུ་མོ་གཅིག དེ་མ་བྱུང་ན་བྱིས་པ་གཅིག་གི་བསམ་ཚུལ་རེད། འདི་དག་གིས་བྱིས་པ་དེའི་མདུན་ལམ་དགོན་པ་ཞིག་ལ་སྙེག་གི་རེད་དམ།
འདི་ནི་རྐྱེན་གཙོ་བོ་དེ་རེད་འདོད།
བོད་ནང་རྒྱ་དམར་གྱིས་ངན་ཇུས་སྣ་ཚོགས་ལག་ལེན་བསྟར་ནས་གྲྭ་བ་རྩ་སྟོང་བཟོ་གི་ཡོད་པ་རེད། བཙན་བྱོལ་ནང་གྲོས་ཚོགས་ལྟ་བུ་མི་མང་གི་ཆེས་དོ་སྣང་བྱེད་སར་ཡོད་པའི་གྲྭ་བ་རྫུན་མ་འདི་ཚོའི་བྱ་སྤྱོད་ལ་བསྟེན་ནས་དགོན་པ་དང་གྲྭ་བ་ཚོ་ལ་ལྟ་སྟངས་ངན་པ་བསུ་བ་རེད། ཐ་ན་ཕ་མ་དང་ཕྲུ་གུ་ཚོའང་གྲྭ་བ་བྱེད་རྒྱུར་དགའ་བོ་མེད་པ་ཆགས་འགྲོ་གི་འདུག གྲྭ་བ་ཟེར་དུས་ང་རྒྱལ་ཞེ་སྡང་ཆེན་པོ། བརྒྱག་རེས་ཚ་བོ། ཚིག་རྩུབ་པོ། འཇིགས་བསྐུལ་གྱི་རྣམ་འགྱུར་ལྷུན་ཆགས་སུ་གྲུབ་པ། ངོ་ཚ་མེད་མཁན་གླང་སྤྱོད་ཅན་ཞིག་ཡིན་པའི་བགས་ཆགས་བཞག་ཡོད་པ་རེད། ཐ་ན་སློབ་ཆུང་གི་སློབ་མ་ཚོའི་ཀུན་སྤྱོད་ལས་ཞན་པ་གྲོགས་ཚོགས་ནང་གི་སྤྱང་རྒན་དམར་པོ་དེ་ཚོ་ལམ་སང་མིག་ལ་ཤར་ཡོང་གི་ཡོད་པ་རེད། ཁོ་ཚོར་ཁ་བདེ་བོ་ཙམ་ལས་སློབ་སྦྱོང་སྣ་གཅིག་ཡོད་པ་མ་རེད།
དོན་གྱིས་མི་མང་གིས་མཐོང་བཞིན་པ་འདི་ཚོ་གྲྭ་བ་མ་རེད། གྲོས་ཚོགས་ནང་གི་སྤྱང་རྒན་དམར་པོ་དེ་ཚོའི་ནང་དམིགས་ཡུལ་སྣ་ཚོགས་ཡོད་པ་རེད། བོད་པ་ནང་ཁུལ་མ་མཐུན་བཟོ་འདོད་པ་དང་། ཆོལ་ཁ་དང་ཆོས་རྒྱུད་ལ་ཤ་ཞེན་ཡོད་ཁུལ་བསྟན་ནས་འོས་ཤོག་ཐོབ་ཐབས་བྱེད་པ་དང་། གཅིག་བྱས་ན་རྒྱ་མིའི་ལས་བྱེད་པ་དེ་འདྲ་ཆོས་རྒྱུད་སྤྱི་འཐུས་ཀྱི་མིང་གི་ཐོག་ནས་གྲྭ་ཆོས་གྱོན་སྟེ་གྲོས་ཚོགས་ནང་ཞུགས་མི་སྲིད་པ་མ་རེད། བོད་ནང་རྒྱ་མིའི་དམག་མི་ཚོས་གྲྭ་ཆོས་གྱོན་ནས་གང་བྱུང་བྱེད་ཀྱི་ཡོད་པ་ཤེས་གསལ་རེད།
དོན་དངོས་ཀྱི་བླ་མ་དགེ་བཤེས་ཚད་ལྡན་དད་པའི་ཡུལ་དུ་འོས་པ་རྣམས་དགོན་པ་སོགས་སུ་མངོན་མེད་དུ་ཆོས་བྱེད་བཞིན་ཡོད་པ་རེད། ཁོ་བོ་ཡང་གྲྭ་བ་ཟེར་དུ་ཐ་ན་རྣམ་འགྱུར་འཇམ་པོ་ཙམ་ཡང་སྟོན་མི་ཤེས་པའི་སྐྱུགས་བྲོ་བོ་གྲོས་ཚོགས་ནང་གི་སྤྱང་རྒན་དེ་ཚོ་ལྟ་བུར་ངོས་འཛིན་བྱེད་ཀྱི་ཡོད་མོད། ཐེངས་གཅིག་གུང་གསེང་དང་སྟབས་བསྟུན་དགོན་པའི་ནང་ཕ་ཡུལ་གཅིག་པ་ཁ་ཤས་སར་བསྡད་པ་ཡིན། སྐབས་དེར་བླ་མ་དང་དགེ་བཤེས་དཔེ་ཡག་པོ་དེ་འདྲ་མཇལ་སོང་། སྐབས་དེར་རང་གི་དུས་རྒྱུན་གྲྭ་བར་ལྟ་སྟངས་ངན་པ་དེ་ཡང་དག་པ་མ་ཡིན་པ་ར་འཕྲོད་དང་གྲྭ་བ་ཡག་པོ་དེ་ཚོ་མཐོང་དུས་རང་ཉིད་ཁ་སྐྱེངས་པོ་བྱུང་། འོན་ཀྱང་སྤྱི་ཚོགས་ནང་གི་གྲྭ་སྨྱོན་དེ་ཚོ་དམིགས་བསལ་རེད། ཁོ་ཚོས་གྲྭ་ཆས་ལ་བསྟེན་ནས་ཐོབ་ཐང་ཞིག་ལེན་འདོད་པ་དེ་རེད། དཔེར་ན་གྲོགས་ཚོས་ནང་གི་དེ་ཚོ་རེད། དེ་ཚོ་གྲྭ་བ་མ་རེད། གྲྭ་ཆས་བེད་སྤྱོད་གཏོང་མཁན་རེད། ཁོ་ཚོའི་བྱེད་སྤྱོད་ངན་པས་བོད་ཀྱི་བླ་སྤྲུལ་དང་དགེ་འདུན་པ་རྣམས་ཀྱི་མཚན་མཐོང་བརླག་འགྲོ་གི་འདུག
སྔོན་མ་གྲྭ་ཆས་གྱོན་མཁན་པ་ཁོག་པར་རྒྱ་འདྲེ་ཞུགས་མཁན་ཁ་ཤས་ཀྱིས་རྡ་སར་དགེ་བཤེས་གསུམ་དམར་བསོད་བཏང་བའི་ཞེད་སྣང་དང་བགས་ངན་པ་ཡོད་ཡོད་པའི་སྒང་ལ། འདས་ལོར་ཆོས་རྒྱུད་སྤྱི་འཐུས་ཀྱི་མིང་ཁྱེར་མཁན་གྱི་གྲྭ་བ་དེ་གྲོས་ཚོགས་གནས་སྐབས་རིང་གཏོར་ཐབས་བྱས་པར་བསྟེན། བོད་པའི་སྤྱི་ཚོགས་གྲྭ་བར་རྦད་དུ་ཞེན་པ་ལོག་པ་རེད། ཉེས་དམིགས་ལ་མ་འཛེམས་པར་གྲྭ་བའི་སྤྱི་ཚོགས་ཡོངས་ལ་རྒྱུགས་པ་ལེབ་བརྡུང་གིས་ཁ་གཏད་དང་ཁ་བརྡུང་བཏང་བ་རེད།
ཨ་ལ་ཨ་ལ་བྲིས་ནས་དཱ་ལུང་རིགས་རྒྱལ་ལ་གླག་ཁེལ་ས་མ་རེད། དེ་རིང་འདི་མ་གཞི་ནས་ནང་ཆོས་ཀྱི་རིག་ལམ་བེད་སྤྱོད་བཏང་ནས་བྲིས་པ་འདྲ་བོ་ཞིག་རེད། འོན་ཀྱང་མི་ནག་ཚང་གིས་བསྡུས་གྲྭའི་རིག་པ་སྦྱང་ཡོད་མེད་མི་ཤེས་ཀྱང་དེ་འདྲ་ཞིག་ཆགས་འདུག ཀློག་ན་ངོ་མ་འདོད་ནི་ཟིག་རེད
གནད་དོན་ཞིག་ལ། ད་ལྟ་བོད་ལ་དགའ་ལྡན་བའི་མིང་ཅན་གསུམ་དུས་གཅིག་ཏུ་ཡོད་པ་འདིའི་སྟེང་བསམ་འཆར་འབྲི་རྒྱུ་མ་བརྗེད། མི་ནག་ཚང་ལགས།
ཁ་ཉེས་བོས་དང་ནས་ཟེར་ནས། གྲྭ་སའི་བླ་རྒན་ཚོ་གཅིག་ཤོར་གཉིས་ཤོར་བྱས་ཐོན་དང་ན་དཀའ་ཞི་ལི། པདྨ་འབུམ་གི་རྫ་འགྱོ་ནོ་ཡིན་ཡ།
ད་ལོ་སྐྱེ་རྒུ་མདོའི་ས་ཡོམ་གྱི་གེགས་ཆགས་འོག་བོད་མའི་ཁྲི་གཅིག་ལྷག་ཙམ་འདས་གྲོང་དུ་ཕྱིན་པ་ནི་ང་ཚོས་ངོ་ནས་ཧ་ཅང་གི་བློ་ཕམ་ངང་ཐུགས་གསོའི་སེམས་གསོ་ཞུ་བཞིན་ཡོད་ཀྱང་།
རྒྱ་ནག་གི་མི་འབོར་གྱི་ཆ་ནས་ཁྲི་གཅིག་ཙམ་གྲངས་ཉུང་ཉུང་ཞིག་དང་ལྷག་དོན་བོད་མི་རིགས་རྩ་མེད་བཟོ་བའི་ལས་འགུལ་རབ་དང་རིམ་སྤེལ་བའི་རྒྱུད་རིམ། ཆ་ལྡན་བུ་བཙའི་སྲིད་འཇུས་སོགས་ཕྱོགས་གང་ནས་བསམ་ཀྱང་ད་རེས་ཀྱི་རྐྱེན་ངན་བྱུང་བར་དམར་གཞུང་དབུ་འཁྲིད་ཚོས་ཕྱི་ཚུལ་ལ་དུང་སེམས་ཀྱི་རྣམ་པ་ཞིག་བསྟན་ཀྱང་བཞེད་ཕུགས་ནས་དགའ་ལྷང་ལྷང་གི་སེམས་འཚོར་ཞིག་ཡོད་པ་དངོས་ཡོད་ཡིན།
ང་ཚོ་རང་ས་རང་དུ་གྲངས་ཉུང་མི་རིགས་ཞིག་ཏུ་འགྱུར་ཚུལ་ལ་བསམ་ན་ཤིན་ཏུ་བློ་ཕམ་ཞིག་དང་ཧ་ཅང་ཉེ་ཁ་ཆེ་བཞིན་འཇིགས་སྐྲགས་ཀྱི་གནས་ཚུལ་ཞིག་ཀྱང་ཡིན།
བསམ་བློ་ཞིབ་མོར་བཏང་ན་ང་ཚོས་རྒྱ་དམར་གཞུང་གི་ཚོས་སྲིད་འཇུས་སམ་ལམ་ལུགས་སོགས་ལ་ངོ་རྒོལ་བྱ་བཞིན་ཡོད་ཀྱང་ཁོ་པ་ཚོས་བཞེད་འདོད་ཡོངས་རྫོགས་ང་ཚོས་མངོན་མེད་ངང་སྒྲུབ་དང་སྒྲུབ་བཞིན་ཡོད།
2008ལོ་ནས་བཟུང་བཙན་བྱོལ་གྱི་སློབ་གྲྭ་ཁག་དང་དགོན་སྡེ་གྲྭ་ཚང་ཁག་ནང་སློབ་ཕྲུག་དང་གྲྭ་བ་གསར་བཞུགས་བྱེད་མཁན་ཧ་ཅང་གི་གྲངས་ཉུང་ཉུང་ཆགས་ཡོད་པ་ཡིན། སློབ་གྲྭ་དང་དགོན་སྡེ་ཁག་སྟོང་བ་ཡིན་ན་ང་ཚོའི་ཆོས་དང་རིག་གཞུང་རྗེས་འཛིན་དང་བོད་ཀྱི་རྩ་དོན་གང་འདྲ་རྩོད་དམ། ང་ཚོས་མིག་གི་མཐོང་ཆོས་སུ་གྱུར་བའི་ཧི་མ་ལ་ཡའི་ཁུལ་གྱི་བོད་གཞུང་གི་གཏན་ཉིན་སློབ་གྲྭ་ཁག་ནང་ད་ལྟ་ནས་བོད་ཕྲུག་བརྒྱ་ཆ་ལྔ་བཅུ་ལས་ཟིན་གྱི་མེད་དེ་ལས་མང་ནི་ཡུལ་མའི་བུ་ཕྲུག་ཡིན་དེ་ནི་ཉེན་ཁ་ཞིག་ཏུ་མཐོང་ལའང་ཧ་ཅང་དངངས་སྐྲགས་བསྐྱེད་དགོས་པའི་རྫ་དྲགས་ཀྱི་གནས་ཚུལ་ཞིག་ཀྱང་ཡིན། ཚོགས་པར་ཚོགས་མི་དགོས། སློབ་གྲྭར་སློབ་ཕྲུག་དགོས། དགོན་པར་གྲྭ་བ་དགོས། རྒྱལ་ཁབ་ལ་སྤྱི་འབངས་དགོས། འོན་ཀྱང་ད་ཆ་ཚང་མ་བཀག་འདུག
དེ་ཡི་རྒྱུ་རྐྱེན་གང་ལ་ཐུག་ཡོད་དམ་བཞེད་ན་བོད་ནང་རྒྱ་དམར་གྱི་བཙན་དབང་གིས་ཆ་ལྡན་བུ་བཙའི་སྲིད་འཇུས་ལག་བྱས་ཏེ་ཁྱིམ་ཚང་རེ་ཕྲུག་གུ་གཉིས་རེ་ལས་སྐྱེས་མི་ཆོག་པ་སྐྱེ་སྒོ་བཙན་གྱིས་འགོག་པ་དང༌གཅིག བོད་མི་གང་བྱུང་དུ་འཛིན་བཟུང་དང་ལྐོག་གསོད་གཏོང་བ་དང་གཉིས། དེ་བཞིན་བཙན་བྱོལ་ནང་དུ་ཡང་ཕ་མ་རྣམས་ནས་ཕྲུག་གུ་གཉིས་ལས་ལྷག་པ་བསྐྱེད་འདོད་མི་བྱེད་ཅིང་སྦྲུམ་འགོག་སྨན་བཟའ་བ་དང་གསུམ། རྒྱུ་རྐྱེན་དེ་དག་ལ་རྟེན་ནས་བོད་མི་རིགས་གྲངས་ཉུང་དུ་གྱུར་བའམ་བོད་པ་རང་ཉིད་ནས་གྲངས་ཉུང་མི་རིགས་ཞིག་ཏུ་བཟོ་དང་བཟོ་བཞིན་པ་ཞིག་ཡིན་པས་གཞུང་མང་ཚང་མས་དེའི་འཐད་རྫ་དྲག་གི་ལས་འགུལ་ཞིག་སྤེལ་དགོས་པ་ཁ་ཚ་དགོས་གཏུགས་ཞིག་ཏུ་མཐོང༌། དེའི་ཕྱིར་གངས་ཅན་བཞེད་ཕུགས་ལ་ཡོད་པའི་ཨ་མ་ཞིག་ཡིན་ན་སྦྲུམ་འགོག་གི་གསོལ་སྨན་མ་མཆོད་རོགས། དེ་ནི་བོད་དོན་ངོ་མ་ཡིན།
དེ་ཡི་མཐད་བུད་མེད་རྩོམ་པ་པོ་རྣམས་དང་བོད་ཀྱི་བུད་མེད་ཚོགས་པ་སོགས་ཀྱི་འགན་ཞིག་བཞེས་ན་ཕན་དོགས་དང་ནུས་པ་མི་འདྲ་ཞིག་ཡོངས་ངེས་སྙམས། དེ་སྔོན་བརྗོད་གཞི་གཞན་ཞིག་གི་སྟེང་དུ་བཀོད་པ་ཡིན་ལགས་ད་རེས་འདིར་བརྗོད་གཞིག་དང་མཚམས་པོ་ཞིག་མཐོང་བསྐྱར་བཀོད་བྱས་ཡིན།
དེ་ནི་བླ་རྒན་ཞིག་གི་རེ་བའང་ཡིན།
༧གོང་ས་མཆོག་གིས་གྲྭ་པ་ཡག་པོ་ཞིག་གི་བཞི་བྱུང་ན་འགྲིག་པ་འདུག་ཞེས་གསུངས་ཚ་པོ་ཚ་པོ་གོ་མྱོང་ཡོད་ད། གྲྭ་པ་མང་དགོས་པ་མ་རེད། སྤས་དག་པོ་དགོས་གསུངས་གནང་ཡོད་རེད།
གྲྭ་པ་མང་ན་སངས་རྒྱས་བསྟན་པ་དར་པ་རེད་བསམ་མཁན་ཚོའི་ནང་ཆོས་ཀྱི་གོ་བ་མ་ལེན་པས་སྐྱོན་རེད།
བོད་སྨན་ལྟར་ན། རྨི་ལམ་ལ། མཐོང་ཐོས་མྱོང་དང་གསོལ་བ་བཏབ་པ་དང་།།
གྲུབ་པ་ནད་ལས་བྱུང་བ་བཅས་རྣམ་པ་དྲུག་ཡོད་པ་ལས་ཁྱེད་ཀྱི་རྨི་ལམ་དེ་དགའ་ལྡན་དང་པོའི་ཤུལ་གྱི་མྱོང་བ་ལ་བརྟེན་ནས་བྱུང་བ་ཞིག་རེད།
ད་དུང་རྨི་ལམ་དེ་མངོན་འགྱུར་འོང་མིན་ལ་དུས་ཀྱི་ཁྱད་པར་ཡོད་དེ།
མཚན་སྟོད་རྨི་ལམ་བརྗེད་ངེས་འབྲས་བུ་མེད།།
ཐོ་རེངས་མཐོང་དང་གསལ་ན་འབྲས་བུ་འབྱིན།། ཞེས་གསུངས་པས་ཕལ་ཆེར་ཁྱེད་ཀྱིས་རྨི་ལམ་དེ་མ་བརྗེད་པར་ཡིག་ཐོག་ཏུ་བཀོད་འདུག་པས་ཉེན་ཁ་ཆེན་པོ་རེད། ད་དུང་རྨི་ལམ་སྐོར་གྱི་ཤེས་ཡོན་ལ་སྦྱོང་འདོད་ཡོད་ན།
http://www.gorig.net ཞེས་པར་ཕེབས་དང་སྨན་པ་ཉི་ཟླས་སྟབས་བདེ་ཞིག་ངོ་སྤྲོད་གནང་འདུག སྤྱིར་རྨི་ལམ་འབྱུང་རྐྱེན་དང་སྐབས་དེའི་ལུས་སེམས་ཀྱི་གནས་སྟངས་སོགས་ཤེས་ན་རྨི་ལམ་ནི་ཤེས་བྱ་རྩ་ཆེན་ཞིག་ཡིན་པ་མ་ཟད། རྨི་ལམ་ལས་བདེ་བ་རྩ་ཆེན་པོ་དེ་འདྲ་ཐོབ་ཐུབ་ཀྱི་ཡོད།
འདི་རྨི་ལམ་མ་རེད་མངོན་སུམ་རེད། མངོན་སུམ་ག་ལེར་གྲུབ་གི་རེད། ངས་ཀྱང་འདི་ལྟར་དྲན་གིན་ཡོད་ཀྱང་བཤད་ན་ཉེ་སྐོར་འདི་དག་ཤོར་ཡོང་ནས་ངའི་མགོ་འདི་ཐང་པོ་འཇོག་རྒྱུ་མ་རེད། ད་ཅི་དྲག
གསར་འགོད་པའི་རྨི་ལམ་དེ་རྨི་ལམ་མ་རེད། ལུང་བསྟན་རེད། ད་ཆ་བོད་ནས་གསར་འབྱོར་བའི་གྲྭ་རྒྱུན་ཕར་ཆེར་རྒྱུན་ཆད་ཟིན། བཙན་བྱོལ་དུ་སྐྱེས་
པའི་བོད་ཕྲུག་ཚོ་ནི་གྲྭ་པ་བྱེད་འདོད་གཏན་ནས་མེད། བྱེས་ཀྱི་གདན་ས་དང་། བཤད་གྲྭ་ཁག་ནས་འབྲུག་དང་བལ་ཡུལ་སོགས་ཧི་མ་ལ་ཡའི་རི་རྒྱུད་ནས་གྲྭ་པ་དང་ཕྲུ་གུ་བཙལ་བཞིན་ཡོད། དེ་ཚོ་ཕལ་ཆེ་བ་ནི་གྲངས་ཀ་རྩི་བྱེད་ཙམ་ཡིན། ཆོས་རྒྱུད་སྤྱི་མཐུས་མི་དགོས་ཟེར་མཁན་ཚོས་ཤུགས་རྒྱབ་དགོས་མི་འདུག ཁྱོད་ཚོའི་དགོས་འདུན་རང་བཞིན་གྱིས་འགྲུབ་རྒྱུའི་སྔ་ལྟས་ཤར་ཟིན།
རྨི་ལམ་ལྟས་ངན་ཟེར་བ་བཏང་འདུག དེ་མངོན་གྱུར་ཡོང་བར་སྒུགས་སྡོད་ཨ།
རེད་ཡ། དེ་ལོས་ཡིན། མང་ཉུང་ཙམ་ཞིག་མིན་པར”སེར་མོ་བའི་རྟགས་ཙམ་འཛིན་པ”ཡི་སྐལ་བ་ལ་ཐག་ཇེ་ཉེ་ལས་ཇེ་རིང་ཡོད་པ་མ་རེད། འོན་ཀྱང་གནད་དོན་ནི་ད་ལྟའི་བོད་ཀྱི་བདེན་མཐའ་གསལ་ཐབས་ལ་བོད་མི་ནང་གི་མཐུན་སྒྲིལ་གྱི་ནུས་པ་དགོས་པས། ཞན་ཆ་དང་སྐྱོན་ཆའི་སྐོར་ལེགས་བཅོས་ཐུབ་རྒྱུ་གལ་ཆེ་བ་ལས། དྲག་གི་སྒུག་བསྡད་ན་ཁོང་ཚོ་སྟོངས་འགྲོ་རེད་ཟེར་ནས་འདུག་ག་ལ་ཉན། དེ་ལྟར་ན་བོད་མི་རིགས་ཀྱང་འཇིག་ཉེན་ཤིན་ཏུ་ཆེའོ།།
སངས་རྒྱས་ཀྱི་བསྟན་པ་དགེ་འདུན་ལ་རག་ལས་པ་གསུངས་ཡོད་པས། ཆོས་བརྒྱུད་ཀྱི་སྤྱི་འཐུས་མེད་པ་བཟོ་བ་ནི་བསྟནན་པ་བཤིག་པའི་བྱ་ངན་ལ་འགྱུར་མི་སྲིད་པ་མ་རེད།
ཁྱོད་ཀྱི་རྨི་ལམ་དེ་སྤྲུལ་སྐུ་ག་གེ་མོ་ཞིག་གི་ལུང་བསྟན་ལྟར་དུས་ཐོག་གི་ཆར་བ་ཞིག་ཏུ་འགྱུར་ངེས་རེད། ནམ་གསལ་ལ་ཉེ་བའི་དུས་ཀྱི་རྨི་ལམ་ནི་མངོན་དུ་གྱུར་ངེས་རེད་ཟེར། ངོ་མ་དེ་འདྲ་ཡིན་ངེས་རེད།
དེང་སྐབས་ངའི་ཕ་ཡུལ་གྱི་དགོན་པ་ཆུང་ཆུང་འགའ་རེ་གྲྭ་པ་རྒན་པ་དག་གྲོངས་པ་དང་སྐྱ་བབས་པ། ཡུལ་གཞན་དུ་བྱོལ་བ་སོགས་ཀྱི་དབང་གིས་གྲྭ་པ་གཅིག་ཀྱང་སྡོད་མཁན་མེད་པར་སྒོ་བརྒྱབ་འདུག་ཟེར། སྐད་ཆ་འདི་གོ་དུས་ངའི་མིག་ལམ་དུ་ཆུ་ངོགས་གཏམ་རྒྱུད་ནང་གི་ལུའུ་ཀྲི་ཧྲིན་དགོན་པ་ཆེན་པོ་ཞིག་སྟོང་ཤུལ་དུ་བསླེབས་དུས་ཀྱི་ཡུལ་ལྗོངས་ཀྱི་བཀོད་པ་ཞིབ་འབྲི་དེ་ཤར་སོང་། ད་ལྟ་རྒྱ་གར་དང་བལ་ཡུལ་དུ་གསར་རྒྱག་བྱེད་བཞིན་པའི་བོད་པའི་བླ་མའི་དགོན་པ་དེ་དག་གི་བརྒྱ་ཆའི་གོ་དགུས་བལ་ཡུལ་དང་ལ་དྭགས་ཀྱི་བྱིས་པ་ཚོ་ཁྲིད་ཡོང་ནས་དགོན་པའི་ཚུགས་ཀ་རེ་འཛིན་བཞིན་འདུག སངས་རྒྱས་ཀྱི་བསྟན་པ་འཇིག་གིན་ཡོད་མིན་མི་ཤེས་ཏེ་གྲྭ་པའི་བསྟན་པ་འདི་ངོ་མ་ཉེན་ཁ་ཆེན་པོ་ཞིག་དང་ཕྲད་འདུག་པ་ནི་དངོས་ཡོད་གནས་ཚུལ་རེད། དེ་བས་ཁྱོད་ཀྱི་རྨི་ལམ་འདི་ཡང་དངངས་ལོག་རྒྱག་པའི་རྨི་ལམ་ཞིག་རེད།