མངའ་རིས་སྤྱི་མཐུན་ཚོགས་པས་མི་མང་གིས་ཐད་ཀར་འདེམས་རྒྱུའི་སྐབས་གསུམ་པའི་བཀའ་ཁྲིའི་འོས་མི་ལྔ་དང་། སྐབས་བཅོ་ལྔ་བའི་དབུས་གཙང་ཆོལ་ཁའི་འོས་མི་ཉེར་བརྒྱད་ཀྱི་མཚན་གཞུང་ཕྱིར་བསྒྲགས་གནང་ཡོད།
ཕྱི་ཚེས་ ༤ ཉིན་གྱི་ཞོགས་པའི་ཆུ་ཚོད་ ༡༠ དང་ཕྱེད་ཀའི་སྟེང་ངྷ་ས་མངའ་རིས་སྤྱི་མཐུན་ཚོགས་པའི་དབུས་རྒྱུན་ལས་ཁང་གི་ཚོགས་ཁང་དུ། མངའ་རིས་སྤྱི་མཐུན་ཚོགས་པས་གསར་འགོད་གསལ་བསྒྲགས་ཤིག་སྤེལ་ཏེ། སྐབས་གསུམ་པའི་བཀའ་ཁྲིའི་འོས་མི་ལྔ་དང་། སྐབས་ ༡༥ བའི་དབུས་གཙང་ཆོལ་ཁའི་སྤྱི་འཐུས་འོས་མི་ ༢༨ ཀྱི་མཚན་གཞུང་ཕྱིར་བསྒྲགས་གནང་ཡོད། སྐབས་དེར་བོད་མི་མང་སྤྱི་འཐུས་ལས་ཐོག་དང་མངའ་རིས་སྤྱི་མཐུན་ཚོགས་པའི་ཚོགས་གཙོ་ཨ་ཅརྱ་ཡེ་ཤེས་ཕུན་ཚོགས་ལགས་ཀྱིས། ཐེངས་འདིའི་མངའ་རིས་སྤྱི་མཐུན་ཚོགས་པའི་བཀའ་ཁྲིའི་འོས་མིག་ས་བོན་དང་སྤྱི་འཐུས་འོས་མིག་གི་ས་བོན་དེ་དག་ཉེ་ཆར་འཚོགས་ཟིན་པའི་མངའ་རིས་སྤྱི་མཐུན་ཚོགས་པའི་ཚོགས་ཆེན་ཐེངས་བདུན་པའི་སྐབས་གྲོས་གཞི་དོན་ཚན་བཅུའི་ཐོག་བགྲོ་གླེང་གོ་བསྡུར་གནང་སྟེ། མཐའ་མའི་གྲོས་ཆོད་ཁག་ ༥༤ ནང་མངའ་རིས་སྒྲིག་གཞི་དང་ས་ཁང་སྒྲིག་གཞི་བཅས་ཚོགས་ཆེན་དུ་གཏན་འབེབས་གནང་བར་མ་ཟད། མངའ་རིས་སྤྱི་མཐུན་ཚོགས་པའི་དབུས་ས་གཉིས་དང་དབུས་རྒྱུན་ཟུར་པ་བཅས་ཀྱིས་ཚོགས་ཆེན་ཐོག་གྲངས་བཤེར་གྱིས་གྲངས་ཀ་རྩེ་ཏོག་བྱས་ཏེ། བཀའ་ཁྲིའི་འོས་མིག་ས་བོན་ལྔ་ནི་བོད་གཞུང་བཀའ་དྲུང་མི་འགྱུར་རྡོ་རྗེ་དང་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ། བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ། མཁས་དབང་བློ་བཟང་སེང་གེ སྐུ་སྒེར་དྲུང་ཆེ་རྔ་པ་ཚེ་རྒྱམ་བཅས་ཡིན་ཞེས་གསུངས་བྱུང་།
མངའ་རིས་སྤྱི་མཐུན་ཚོགས་པའི་སྐབས་ ༡༥ པའི་དབུས་གཙང་སྤྱི་འཐུས་འོས་མིག་ ༢༨ ནི། སྤྱི་འཐུས་དང་མངའ་རིས་ཚོགས་གཙོ་ཨ་ཅརྱ་ཡེ་ཤེས་ཕུན་ཚོགས་དང་མངའ་རིས་དབུས་རྒྱུན་བསོད་ནམས་བཟང་པོ། སྤྱི་འཐུས་ལས་ཐོག་པདྨ་འབྱུང་གནས། དབུས་རྒྱུན་ཟུར་པ་རིན་ཆེན་ཚེ་རིང། མངའ་རིས་དབུས་རྒྱུན་བསོད་ནམས་སྟོབས་རྒྱལ། སྤྱི་ཟུར་དང་མངའ་རིས་དབུས་རྒྱུན་སྨན་པ་ཐོག་མེད། མངའ་རིས་ཚོགས་གཞོན་སྐལ་བཟང་གཡུ་སྒྲོན། གཞུང་ཞབས་ཟུར་པ་འཇིགས་མེད་འབྱུང་གནས། སྤྱི་འཐུས་ལས་ཐོག་ཀརྨ་ཡེ་ཤེས། སྤྱི་འཐུས་ལས་ཐོག་ཀརྨ་ཆོས་འཕེལ། སྤྱི་འཐུས་ལས་ཐོག་ཟླ་བ་ཕུན་སྐྱིད། གཞུང་ཞབས་པ་ཉི་མ་བསམ་མཁར། བུད་མེད་ཚོགས་གཞོན་བསམ་གཏན་ཆོས་སྒྲོན། སྤྱི་འཐུས་ལས་ཐོག་ཚེ་བརྟན་ནོར་བུ། ས་གནས་འགོ་འཛིན་ཟུར་པ་ལེགས་བཤད་རྒྱལ་མཚན། ས་འཐུས་ཚོགས་ཟུར་ཚེ་དབང་བསོད་ནམས། མངའ་རིས་དབུས་རྒྱུན་ཁམས་གསུམ་དབང་འདུས། སྤྱི་འཐུས་ལས་ཐོག་ཟླ་བ་ཚེ་རིང། སྤྱི་འཐུས་ལས་ཐོག་སྒྲོལ་མ་ཚེ་རིང། སྤྱི་ཟུར་ཨོ་རྒྱན་བསྟན་འཛིན། བུད་མེད་དབུས་རྒྱུན་བསྟན་འཛིན་སྒྲོལ་མ། བོད་ཁྱིམ་སློབ་དགེ་བསོད་ནམས་ཚེ་རིང། བོད་ཁྱིམ་ཤེས་ཡོན་འགན་འཛིན་བསོད་ནམས་སྒྲོལ་དཀར། ཆབ་སྲིད་བཙོན་ཟུར་དགའ་ལྡན་བག་གྲོ། དབུས་རྒྱུན་ཟུར་པ་རྟ་མགྲིན་ཆོས་དར། དབུས་རྒྱུན་ཟུར་པ་འཇིགས་མེད་བཀྲ་ཤིས། ས་གནས་འགོ་འཛིན་ཟུར་པ་གཡང་དྲུང་འཆི་མེད་བཅས་ཀྱི་མཚན་གཞུང་ཕྱིར་བསྒྲགས་གནང་སོང།
ཚོགས་གཙོ་ཨ་ཅརྱ་ཡེ་ཤེས་ཕུན་ཚོགས་ལགས་ཀྱིས་གསར་འགོད་པའི་དྲི་བར་ལན་འདེབས་གནང་སྐབས། ཐེངས་འདིའི་འོས་མི་དེ་དག་ནི། ང་ཚོའི་སྒྲིག་འཛུགས་ཀྱི་ངོས་ནས་མི་མང་ལ་ངེས་པར་དུ་འདེམས་དགོས་པའི་འབོད་སྐུལ་གནང་བ་མ་ཡིན་པར་། མ་འོངས་པའི་འོས་འདེམས་ལ་ས་བོན་གྱི་ཚུལ་དུ་མཚན་གཞུང་ཕྱིར་བསྒྲགས་བྱས་པ་ཞིག་ཡིན་ཞེས་གསུངས་བྱུང་བར་མ་ཟད། འདེམས་ཐོན་བྱུང་བའི་འོས་མིག་ཁྲོད་ལེགས་འདེམས་ཇི་ལྟར་བྱ་མིན་མི་མང་ལ་རག་ལས་ཡོད་པའི་སྐོར་གསུངས་ཡོད་ལ།མ་འོངས་པར་མངའ་རིས་སྤྱི་མཐུན་ཚོགས་པས་ཐེངས་འདིའི་འོས་མིག་ས་བོན་དེ་དག་ས་གནས་ཡན་ལག་ ༢༤ ལ་སྤྲགས་ཐོག་དང་ཡིག་ཐོག་ནས་གསལ་བསྒྲགས་གནང་འཆར་ཡོད་ཅེས་གསུངས་བྱུང་།
གསར་འགོད་པ་ཨ་རིག་འགྱུར་མེད་དང་དོན་གོ།
ག་རེ་ཞིབ་བཤེར་དྲ་རྒྱ་འདིར་སྨྲ་བརྗོད་ཀྱི་རང་དབང་མེད་པ་རེད་པས། ངས་བྲིས་པའི་བསམ་ཚུལ་འཇུག་འདོན་མེད་པའི་རྒྱུ་མཚན་དྲ་གྲོགས་རྣམས་ཀྱི་སྤྱན་དུ་བཤམས་རོགས་དེ་མིན་ངས་ཉིན་ཤས་གོང་བཏོན་པའི་བསམ་ཚུལ་འགོད་རོགས།