སྐུ་ངལ་གསོ་རོགས། ངའི་བླ་རྒན། རྩམ་ཁུག་གིས།

དྲ་གྲོགས་རྩམ་ཁུག་ལགས།
མིའི་འདུ་ཤེས་འཛིན་སྟངས་ཟེར་བ་འདྲ་མིན་ལ་གཞི་བཅོལ་ཡོད་ཕྱིར།
ཁྱེད་ཀྱི་བསམ་ཚུལ་གྱི་ཁ་བྱང་འདོགས་ཚུལ་ལ་བོད་མི་མང་ཆེ་བས་དང་ལེན་བྱེད་ཐུབ་ཀྱི་མ་རེད་བསམ་ཀི ཡིན་ནའང་ཁྱེད་ཀྱིས་རང་དབང་ཞེས་བའི་མིང་ཚིག་འདིས་རྒྱབ་ལོག་ནས་གནམ་མཆོང་རྒྱག་ན་ཐང་མོད།
དེ་ནི་ཕལ་ཆེར་རང་དབང་གི་གོ་དོན་མི་ཤེས་བ་ལས་གཞན་ཅི་ཡང་མ་རེད།

རྩམ་ཁུག་གི་རྩོམ་ཡིག་དེ་སོ་སོ་ཁ་རུ་ཁ་ཐུག་ཡིན་མདོག་གིས་ཚིག་ཁྱད་མཚར་དེ་འདྲ་མང་པོ་བེད་སྤྱོད་བཏང་འདུག གུས་ཞབས་ཀྱི་ཚིག་ཡང་གལ་ཆེན་པོ་རེད། ཧོབ་སྟེ་རྩོམ་ཡིག་དེ་ཀློག་སྐབས་༧གོང་ས་མཆོག་ལ་གུས་ཞབས་མེད་པ་ལྟ་བུ་མཚོན་གྱི་འདུག

ད་དུང་བཤད་འདོད་པ་ཞིག་ལ། རྩོམ་ཡིག་དེའི་ནང་”བོད་མི་ཚོས་སྐུ་ཉིད་ཟ་ཤེས་ལ་གོན་ཡང་ཤེས། ད་དུང་སྐུ་ཉིད་བཞོན་ཏེ་རང་ཉིད་ཀྱི་ཆེད་དུ་འགྲོ་སོང་།”ཞེས་འཁོད་འདུག བོད་མི་ཚོ་གང་དུ་སོང་ཡང་ཁྱོད་འགྲོ་སྟངས་ལྟར་འགྲོ་མཁན་ཉུང་ཉུང་རེད། ཁྱེད་ཀྱིས་ཚོགས་པའི་འགྲིག་གལ་དང། ལས་རོགས་ཚོར་བསམ་བློ་མ་བཏང་བར་ཁོང་ཚོ་ཁྲིམས་མཐུན་གྱི་ཕྱི་བསྐྱོད་མདུན་ལམ་བཀག་པ་སོགས་དྲན་གྱི་འདུག་གམ།
རྗེས་སོར་རང་ཉིད་ལ་ལྟ་ཞོར་བཀའ་མོལ་གནང་ན་ཡག་པོ་འདུག

ཀ་ངོ་ཡིག་ངོ་ཆོད་པའི་པུར་མིང་ཅན།། རྩམ་བཟན་ཡིན་པ་ཁོ་བོས་ཤེས་མོད་ཀྱང་།། བྱེད་སྒྲ་འབྲེལ་སྒྲའི་ཁྱད་པར་མི་ཤེས་ན།། རྩམ་པ་ཟོས་བ་འཕྲོ་ལྷག་མ་རེད་དམ།། དམ་པའི་ལྷ་ཆོས་ཁྱོད་ཀྱིས་མི་ཤེས་ཀྱང་།། འཇིག་རྟེན་མི་ཆོས་ཀུན་གྱིས་བརྩི་དགོས་བས།། མཐོང་ཆུང་ཁྱད་གསོད་ཅན་གྱི་ཡིག་རྙོག་འདི།། དུས་བཟང་སྐལ་བཟང་ཉིན་ལ་སྤེལ་རོགས།།

བློ་གྲོས་རྒྱལ་པོ་ལགས་ཁྱེད་ཀྱི་ཧྲ་མི་ཧྲ་གི་ཐ་སྙད་འདི་ཡང་དག་པ་ཞིག་རེད་དགོངས་ཀྱི་ཡོད་དམ་།
ཁ་སྐད་དང་ལོག་་སྐད་བད་སྤྱོད་མི་གཏང་བར་ ཡིག་སྐད་ཁོ་ན་བད་སྤྱོད་གཏོང་གནང་ཡོང་བར་དྲ་གྲོགས་ཚོས་ལན་བརྒྱ་ཕྲག་འབོད་བསྐུལ་ཞུས་པ་རྩི་མེད་གཏོང་རྐྱང་གནང་གི་ཡིན་པས་ལགས།

༼སྐུ་ངལ་གསོ་རོགས། ངའི་བླ་རྒན། རྩམ་ཁུག་གིས།༽
ཁ་བྱང་འདི་མཐོང་དུས་ངའི་སེམས་ལ་མི་བདེ་བ་ཞིག་རང་བཞིན་གྱིས་སླེོབས་སོང། མི་གཞན་པའང་ཕལ་ཆེར་གཅིག་མཚུངས་ཡིན་པར་སྙམ། ཅིའི་ཕྱིར་ཞེ་ན། ཁ་སང་དགོང་མོ་ང་ཚོ་གྲོགས་པོ་མང་པོ་ཞིག་མཉམ་དུ་འཛོམས་ནས་འདིའི་སྐོར་གླེང་བ་ཡིན། ཁོང་ཚོའང་གཅིག་མཚུངས་ཀྱི་ལྟ་ཚུལ་དེ་སླེབས་འདུག དྲིན་ཆེན་གྱི་ཕ་མ་ལ་སྤོ་ཏོ་རྨོ་ཏོ་ཞེས་འབོད་པ་དང་། ༸གོང་ས་མཆོག་ལ་བླ་རྒན་ཞེས་འབོད་པ་ནི་ཧ་ཅང་གི་ཚད་ལས་བརྒལ་བ་རེད། ཐོས་ན་རྣམ་རྟོག་ཟ་བ་དང་སྙིང་རླུང་ལྡང་བའི་ཚིག་སྡུག་ཅག་དེའི་རིགས་སྤྱི་ནོར་༸གོང་ས་མཆོག་ལ་སྦྱར་ན་ཧ་ཅང་མི་འོས། རྩམ་ཁུག་ནི་མི་སྒེར་ཞིག་རེད་མི་སྒེར་ཞིག་གི་ངོས་ནས་༸གོང་ས་མཆོག་ལ་བླ་རྒན་ལས་སྡུག་ཅིག་ལབ་ནའང་སྒེར་གྱི་ལྟ་ཚུལ་ང་ཚོས་འགོག་མི་ཐུབ་ལ་འགོག་དགོས་དོན་ཡང་མེད། ཡིན་ནའང་དུས་བབ་རྩོམ་སྒྲིག་པས་མདུན་ངོས་ཀྱི་མཆན་ཚུན་ཆད་ལ་ཞིབ་བཤེར་བྱས་ནས་གཏོང་བཞིན་ཡོད། དེ་ནི་མི་རིགས་འདིའི་ཆེད་དུ་རང་ཉིད་ལྷོད་སྡོད་ཀྱི་བདེ་སྐྱིད་བློས་བཏང་ནས་དཀའ་ངལ་ལ་གདོང་གཏད་ཡོད་པ་རེད། དེ་ནི་འུ་ཚོས་ངེས་པར་དུ་ཤེས་དགོས་པ་དང་ཡི་རངས་ཞུ་དགོས་པ་ལོས་ཡིན་མོད། ཁ་བྱང་རྫོབ་རོ་དེ་དུས་བབ་ཀྱི་མདུན་ངོས་ལ་བཤམས་ཡོད་པ་ནི་ང་ལྟ་བུའི་ཀློག་པོ་མང་བོ་ཞིག་གི་མིག་ནང་གི་ཚེར་མར་གྱུར་ཡོད། དུས་བབ་མདུན་ངོས་ཀྱི་རྩོམ་ཡིག་ལ་དམིགས་བསལ་ཅན་ལས་གཞན་རང་མིང་དངོས་སུ་དགོས་པ་རྩ་དོན་ཡིན་ན། རྩམ་ཁུགས་ཟེར་བ་དངོས་མིང་མིན་པ་ཤིན་ཏུ་གསལ་བས་རྩོམ་ཡིག་འདི་ལ་དམིགས་བསལ་ཅི་ལྟར་རེག་སོང་ངམ། ཁྱེད་ཀྱིས་དམིགས་བསལ་གྱི་ཁོངས་སུ་བགྲངས་པ་ཡང་བརྗོད་བྱ་དང་རྗོད་བྱེད་ཀྱི་དགེ་མཚན་ཞིག་གི་ངོས་ནས་ལྟ་བཞིན་ཡོད་ཀྱི་རེད་མ་གཏོགས། འདི་དམིགས་བསལ་ཞིག་ཡིན་ཞེས་ལབ་ཙམ་གྱིས་དམིགས་བསལ་ཆགས་འགྲོ་ན། དམིགས་བསལ་དེ་ཡང་དེ་ཙམ་ཞིག་མ་རེད་དམ། ངས་བལྟས་ན་རྩོམ་ཡིག་འདིར་བརྗོད་བྱ་དང་རྗོད་བྱེད་གང་གི་ཐད་ནས་དམིགས་བསལ་གྱི་དགེ་མཚན་ཅང་མ་མཐོང་བས་རབ་བྱུང་ན་རྩོམ་ཡིག་འདི་མདུན་ངོས་ནས་མར་གཡུག་རྒྱུ་དང་། ཡང་ན་ཁ་བྱང་རྫོབ་རོ་དེ་བརྗེ་བོ་རྒྱགས་རོགས་ཞེས་འབོད་སྐུལ་ཞུ་བཞིན་ཡོད།

དོན་དག་ཅིག་ད་བཤད་ཀྱི་ཡོད་པ་འདྲ། ཡིན་ནའང་ཐ་སྙད་སྤྱོད་སྟངས་ཧ་ཅང་མི་ཧྲ་གི་ཡ།

ཅི་ཡིན་ཆ་མི་འཚལ་བར་བདག་གི་སེམས་སུ་《བླ་རྒན་》ཞེས་པའི་ཚིག་འདི་ནི་གུས་བརྩི་མེད་པའི་ཚིག་ཅིག་ཏུ་སྣང་ཡོང། ང་ཚོ་བོད་མིའི་གོམས་སྲོལ་དུ་ཨ་ཁུ་འདོན་ཆོག་གཅིག་པུ་ལ་བྱང་ཡོད་པ་ཞིག་ལའང་ཁོ་དང་སྙིང་ཉེ་བ་ཚོས་བླ་རྒན་ཞེས་འབོད་མི་སྲིད། དེ་ནི་དམའ་འབེབ་ཀྱི་ཚིག་ཏུ་འཁུམ་པས་ཡིན། ཡིན་ན་ཡང་། ད་ལྟ་རང་རློམ་ཆེ་ཞིང་རྩམ་དྲི་མི་བྲོ་བའི་རྩམ་ཁུག་སོགས་ཀྱིས་༸གོང་ས་མཆོག་ལ་ཞེ་ཚིག་ཅིག་འབུལ་བའང་ངལ་བའི་ཚོད་དུ་འདུག
རྩམ་ཁུག་ལགས། རྩོམ་ཡིག་བཀླགས་རྗེས་ནང་དོན་གྱི་ཕྱོགས་ནས་སྤྱིར་བཏང་བ་ཞིག་ལས། བློ་བསྐྱེད་འདྲ་ཅི་ཡང་རེག་མ་བྱུང།

རྩོམ་ཡིག་འདི་ཀློག་རྒྱུའི་དུས་ཚོད་མ་བྱུང་ཡང་། ཁ་བྱང་འདིའི་ཕྱོགས་གཅིག་ལ་རྒྱབ་སྐྱོར་ཡོད། དེ་ནི་ཚོགས་སྡེ་སྒེར་པ་ཁག་དང་དགོན་པ་ཁག་གིས་དོན་ཆེ་ཆུང་གང་ཡིན་ཡང་ཁོང་གདན་འདྲེན་ཞུ་འགྲོ་བ་དེ་རེད། རྩོམ་ཡིག་སྤེལ་བར་ཐུགས་རྗེ་ཆེ།

༼ སྐུ་ངལ་གསོ་རོགས། ངའི་བླ་རྒན། ༽ཁྱོད་ཀྱི་ཁ་ཡིག་འདི་མཐོང་མ་ཐག་ནས་འགལ་ཟླའི་རྣམ་པ་ཞིག་འདུག ཀློག་གིན་ཀློག་གིན་འགལ་ཟླ་ཆེ་རུ་འགྲོ་བ་དང་། མཚམས་མཚམས་ལ་གོ་རྒྱུ་ཅི་ཡང་མི་འདུག ད་དུང་ཡིག་ནོར་སོགས་ཧ་ཅང་མང་པོ་འདུག ཉམས་འཇོག་བྱེད་རོགས།
གལ་ཏེ་ཁྱེད་རང་ཡིད་མི་ཆེས་ཚེ་ངས་འདི་རུ་རེ་གཉིས་བཀོད་ཆོག ༼རྒྱ་དཔོན་ཚོའི་གམ་ནས་མགོ་སྐོར་དང་གཡོ་སྒྱུ་ཞིག་ལས་ཅི་ཞིག་རྙེད།༽ ༼ཉིན་རེའི་འགྲོ་འདུག་སྤྱོད་གསུམ་ཡན་ལ་ལམ་སྟོན་མཐའ་མེད་གནང་སོང་།ཡིན་ནའང་བོད་མི་ཚོས་སྐུ་ཉིད་ཟ་ཤེས་ལ་གོན་ཡང་ཤེས།༽ ༼ཁྱོད་ཀྱིས་བོད་མིའི་ཆེད་དཀའ་ལས་ཅི་ཙམ་བརྒྱབ་པ་ཤེས་མཁན་ཉུང་ལ།༽་་་་་་་་་་་་་་་་་་་ བསྟོད་མི་མཁན་ཞིག་གིས་བསྟོད་པ་ལས་སྨད་མི་ཤེས་མཁན་ཞིག་གིས་སྨད་ན་དགའ་ཟེར་བ་མི་བདེན་པ་ཆེར་མི་འདུག
སྤྱིར་ཁྱོད་ཀྱིས་བསྟོད་པ་ཞིག་འབྲི་ཁུལ་བྱས་པ་ཡིན་མོད། འོན་ཀྱང་མཚམས་ལ་ལར་བསྟོད་པ་ཡིན་ནམ་སྨད་པ་ཡིན་པར་མི་ཤེས། ང་ལྟ་བུའི་ཀློག་མཁན་ཞིག་འཁྲུལ་འགྲོ་འདུག

ཨ་རོ་རྩམ་ཁུག ཁྱོད་ཀྱིས་བླ་རྒན་ཟེར་བ་སྒྱུ་རྩལ་གྱི་རོ་བྲོ་ཐུན་མོང་མ་ཡིན་པ་ཞིག་ལ་དམིགས་ནས་བྲིས་པ་ཡིན་རྒྱུ་རེད་དེ། ཡིན་ནའང་། བླ་རྒན་ཞེས་པ་ནི་ཕལ་ཆེར་བླུན་པོ་ཞེས་པ་དང་དོན་འདྲ་བ་རེད། ་དེའི་ཕྱིར་ཐ་སྙད་འདི་རྒྱལ་བ་རིན་པོ་ཆེ་ལ་ཕུལ་རྒྱུ་ཞིག་མ་རེད། དེ་ཤེས་པར་གྱིས།

ད་དུང་མི་ཤེས་ན་དུས་འགྱུར་སྟེང་གི་བླ་རྒན་ལ་དཔྱད་པ་ཞེས་པའི་རྩོམ་ཡིག་དེ་ལ་ལྟོས་དང་དེ་ན་འདྲེ་མགོ་རྡོ་ཟེར་བ་ཞིག་གིས་བླ་རྒན་ཞེས་པ་ལ་འགྲེལ་བཤད་གསལ་བོ་བྱས་ཡོད་པ་རེད།