༧གོང་ས་མཆོག་གི་འཁྲུངས་སྐར་ཉིན་བལ་ཡུལ་དུ་ཉེན་རྟོག་པས་བོད་མི་ ༢༢ ཙམ་འཛིན་བཟུང་བཀག་ཉར་བྱས་ཡོད་འདུག
བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་བལ་ཡུལ་དུ་གནས་སྡོད་བོད་མི་ཚོས་༧གོང་ས་མཆོག་དགུང་གྲངས་ ༧༥ ལ་ཕེབས་པའི་སྐུའི་འཁྲུངས་སྐར་སྲུང་གཙི་བྱས་ཡོད་ནའང་བལ་ཡུལ་ཉེན་རྟོག་པས་བོད་མི་ཚོར་འཁྲུངས་སྐར་སྲུང་གཙི་བྱས་མི་ཆོག་པའི་བཙན་བཀའ་བཏང་སྟེ་མཐར་བོད་མི་ ༢༢ ཙམ་འཛིན་བཟུང་བཀག་ཉར་གྱིས་འདྲི་གཅོད་ཀྱང་བྱས་ཡོད་འདུག གནད་དོན་དེའི་ཐད་ཀ་ཐ་མན་གྲུ་ས་ཁུལ་གྱི་འཛིན་སྐྱོང་མགོ་བ་ཌ་ཁིར་གྱིས་བརྗོད་དོན། བལ་ཡལ་སྲིད་གཞུང་གིས་རྒྱལ་ཁབ་ཀྱི་མཛའ་འབྲེལ་ལ་གནོད་གཞིའི་ངོ་རྒོལ་ལས་འགུལ་སྤེལ་རྒྱུར་བཀག་འགོག་བྱེད་ཀྱིན་ཡོད་ལ། ལྷག་པར་དུ་ངོ་རྒོལ་དེའི་རིགས་ལ་བཟོད་སྲན་བྱ་ཐུབ་ཀྱི་མེད་ཅེས་དང་། ཡང་ཁོང་གིས་བོད་མི་ཚོས་སོ་སོའི་དགོན་པའི་ནང་༧ཏཱ་ལའི་བླ་མའི་འཁྲུངས་སྐར་སྲུང་གཙི་བྱ་ཆོག་ཀྱང་། ཕྱི་ལོགས་སུ་རྒྱ་ནག་ལ་རྒོལ་བའི་སྐད་འབོད་དང་འཕྲེད་དར་རིགས་རྩ་བ་ནས་འཁྱེར་ཆོག་གི་མ་རེད་ཅེས་ཉེན་བརྡ་ཡང་བཏང་ཡོད། ཀ་ཐ་མན་གྲུ་ཉེན་རྟོག་མགོ་བ་དེས་བརྗོད་ན་འཛིན་བཟུང་བྱས་པའི་བོད་མི་དེ་ཚོ་གང་མགྱོགས་གློད་གྲོལ་གཏོང་གི་ཡིན་ཞེས་བརྗོད་ཡོད།
འཁྲུངས་སྐར་ཉིན་བཞུགས་སྒར་དུ་བོད་དང་ཕྱི་རྒྱལ་མི་རིགས་ ༥༠༠༠ ཙམ་འདུ་འཛོམས་ཀྱིས་༧གོང་ས་མཆོག་གི་འཁྲུངས་སྐར་གཟབ་རྒྱས་ཤིག་སྲུང་གཙི་ཞུས་ཡོད་ལ། དེ་བཞིན་ཨ་རི་དང་། ཡུ་རོབ། ཨོ་སི་ཊོ་ལི་ཡ་བཅས་ཀྱི་བོད་མི་ཚོས་ཀྱང་འཁྲུངས་སྐར་སྲུང་གཙི་བྱས་ཡོད་པ་རེད། ༧གོང་ས་མཆོག་དགུང་ལོ་ཆེ་རུ་ཕྱིན་པ་དང་མཉམ་དུ་མི་དམངས་ཚོས་ཀྱང་གནད་དོན་དེར་དོ་སྣང་བྱེད་མགོ་ཚུགས་ཡོད་ལ། ཉེ་ཆར་བོད་ལྗོངས་དམར་ཤོག་དྲུང་གཞོན་ཧོ་ཕིན་གྱིས་ཤིག་ཕྱི་ཕྱོགས་གསར་འགོད་པར་ཐུག་འཕྲད་སྐབས་༧ཏཱ་ལའི་བླ་མ་ཚུད་པའི་བོད་ཀྱི་བླ་ཆེན་རྣམས་ཡང་སྲིད་ལམ་ལུགས་བརྒྱུད་ཐག་གཅོད་བྱ་དགོས་རྒྱུར་མ་ཟད། ད་དུང་ཐག་གཅོད་དེར་པེ་ཅིན་གྱི་ཆོག་མཆན་ངེས་པར་དུ་ཐོབ་དགོས་ཚུལ་བརྗོད་ཡོད། ཡང་ཁོང་གིས་ཐག་གཅོད་དེར་ད་ལྟ་དང་མ་འོངས་མ་གང་ཡིན་རུང་ངེས་པར་དུ་བརྩི་བཀུར་དགོས་ཚུལ་བཤད་ཡོད། ཡིན་ནའང་། ༧གོང་ས་མཆོག་ཕྱི་ཟླ་གཉིས་པའི་ནང་ཨ་རིར་ཕེབས་ཏེ་ཡུལ་དེའི་ཀུན་ཁྱབ་རླུང་འཕྲིན་ཁང་གི་བཅར་འདྲིར་དང་ལེན་གནང་སྐབས་ཁོང་གིས། གལ་སྲིད་བོད་རིགས་མང་ཚོགས་ཀྱི་ངོས་ནས་༧ཏཱ་ལའི་བླ་མའི་ལམ་ལུགས་དེ་དུས་ལས་བརྒལ་བ་ལྟ་བུར་འདོད་ཀྱི་ཡོད་ཚེ། ལམ་ལུགས་དེ་རང་བཞིན་གྱི་མེད་པ་ཆགས་འགྲོ་གི་རེད། ང་ལ་ཁྱད་པར་གང་ཡང་མེད་ཅེས་གསུངས་ཡོད།
ཧི་མ་ལ་ཡའི་དུས་བབ་ཅེས་པས་གནས་ཚུལ་སྤེལ་བ་ལྟར་ན། ཉིན་དེར་བོད་མི་ ༣༠༠ འཇུས་འདུག་ཟེར།
གསར་འགོད་པ། དཔལ་ལྡན་རྒྱ་མཚོ།
ཁ་སང་རང་བཅག་རྣམས་ཀྱི་འདི་ཕྱི་ཀུན་གྱི་༧སྐྱབས་གནས་འཛམ་གླིང་ཞི་བདེའི་དེད་དཔོན་༧སྤྱི་ནོར་གོང་ས་རྒྱལ་དབང་ཐབས་ཅད་མཁྱེན་ཅིང་གཟིགས་པ་ཆེན་པོ་དགུང་གྲངས་ ༧༥ ལ་ཕེབས་པའི་སྐུའི་འཁྲུངས་སྐར་དུས་ཆེན་ཡིན་ཀྱང་ཞོགས་པ་ཚོུད་ ༧ པ་ཙམ་ནས་ཀོ་པཎ་བཙུན་དགོན་གྱི་རྒྱས་སྒོ་མདུན་བལ་པོ་ཉེ་རྟོགས་པ་དྲུག་བདུན་ཞིག་གི་ལག་ཏུ་དབྱུག་པ་དང་སྐེད་པར་འཕྲུལ་མདའ་འཁྱེར་ནས་དགོན་པ་ནས་ཕྱི་ལ་བསྐྱོད་མི་ཆོག་པ། གལ་ཏེ་ཕྱིར་བསྐྱོད་བྱས་པ་ཡིན་ན་ཉིན་གཉིས་རིང་བཀག་ཉར་བྱ་རྒྱུ་ཡིན་པ་བལ་གཞུང་ནས་བཀའ་ཡོད་ཟེར་བས་ཉིན་གང་ཨ་ཎེ་རྣམས་དགོན་པའི་ནང་བཀག་ཉར་བྱས་སོང་། འོན་ཀྱང་ཨ་ཎེ་རྣམས་ནས་དགོན་པའི་ནང་བསང་གསོལ་དང་རྒྱལ་བའི་ཞབས་བརྟེན་དང་འཕྲིན་སྐུལ་དང་བོད་རྒྱལ་ཁབ་ཆེན་པོ་རྒྱལ་གླུ་གཏོང་བ་སོགས་མཛད་སྒོ་ལྟབས་བདེ་ཞིག་སྤེལ་ནས་ཉིན་གང་དགོན་པར་སྡོད་དགོས་ཆགས་ཡོད། ཉིན་དེར་སོ་སོའི་རྒྱལ་ཁབ་དགྲ་བོས་བཙན་འཁྲོག་བྱས་ཏེ་མིའི་ལུང་པའི་ནང་བདེ་སྐྱིད་ཇི་ཙམ་ཞིག་ང་ཚོར་ཐོབ་ཀྱི་ཡོད་མེད་ཀྱི་སློབ་གསོ་ཞིག་མི་མང་ཚང་མར་བྱུང་ཡོད་པའི་འཚོར་སྣང་ཞིག་ཀྱང་འགོག་མེད་དུ་ཤར།
གལ་ཏེ་བལ་གཞུང་གི་ཁྲིམས་ལུགས་ཡིན་ཀྱང་ཁྲིམས་དེ་རྒྱ་ནག་གིས་གནོད་ཤུག་འོག་བཞག་པ་གསལ་པོ་རེད་་ནམ་མཁའི་མིག་གིས་ཡག་པོ་ཞིག་ལྟ་རིཾོགས་གནང་།
བལ་ཡུལ་ཉེན་རྟོག་པས་བོད་མི་འཛིན་གཟུང་བྱས་པ་དེ་རྒྱ་མིའི་གནོད་ཤུགས་རེད་དམ།་
ཡང་ན་བལ་ཡུལ་བྱུང་གི་ཁྲིམས་ལུགས་རེད་