མཚོ་སྔོན་ཞིང་ཆེན་གྱི་སྟོང་སྐོར་རྫོང་གི་ཞང་གྲོང་དྲུག་ལ་དྲག་ཆར་གྱི་རྐྱེན་པས་ཆུ་ལོག་བྱུང་སྟེ་མི་བདུན་རྐྱེན་ལམ་དུ་ཕྱིན་པ་དང་། མི་བརྒྱད་གར་སོང་ཆ་མེད་དུ་གྱུར་ཡོད་འདུག
མཚོ་སྔོན་གསར་འགྱུར་དྲ་བས་གནས་ཚུལ་བཀོད་པ་ལྟར་ན། ཟླ་འདིའི་ཕྱི་ཚེས་ ༦ ཉིན་གྱི་དགོང་མོར་མཚོ་སྔོན་ཞིང་ཆེན་སྟོང་སྐོར་རྫོང་དུ་དྲག་ཆར་བབས་ཏེ། རྫོང་དེའི་སི་ཀྲེད་ཞང་དང་ཉི་ཟླ་ཞང་། པོ་ཧང་། ཧི་ཕེན། ཏ་ཧྭ། བ་ཡན་ཞང་སོགས་ཞང་དྲུག་གི་ཡུལ་མི་ ༡༢ རྐྱེན་ལམ་དུ་ཕྱིན་ཡོད་པ་དང་། མི་ ༣ གར་སོང་ཆ་མེད་དུ་གྱུར་བ། མི་ ༡༡ ལ་རྨས་སྐྱོན་ཚབས་ཆེན་ཕོག་ཡོད་འདུག འབྲེལ་ཡོད་གནས་ཚུལ་ནང་འཁོད་དོན་ལྟར་ན། གྲོང་སྡེ་དྲུག་གི་ཁང་པ་མང་པོ་ཞིག་ལ་གཏོར་སྐྱོན་ཐེབས་ཏེ་རྒྱུ་ནོར་གྱི་གྱོང་གུད་ཚབས་ཆེན་ཕོག་ཡོད་འདུག་ལ། གྲོང་སྡེ་དེ་དག་གི་ལམ་ཁ་དང་བརྒྱུད་ལམ་ཁག་ལ་གནོད་སྐྱོན་ཚབས་ཆེན་བཟོས་ཡོད་ཚུལ་བརྗོད་ཡོད་པར་མ་ཟད། སྟོང་སྐོར་ས་མཚམས་སུ་ཡོད་པའི་མདོ་དབུས་ལྕགས་ལམ་དང་མཚོ་སྔོན་བར་གྱི་གཞུང་ལམ། ཙོང་ཆུའི་སྟོད་བརྒྱུད་ཀྱི་ཆུ་མཛོད་སོགས་ལ་གནོད་སྐྱོན་ཚབས་ཆེན་བྱུང་ཡོད་པ་རེད། ཕྱི་ཚེས་ ༧ ཉིན་ཟི་ལིང་གྲོང་ཁྱེར་ཉེན་སྐྱོབ་རུ་ཁག་འབྱོར་ཡོད་ཀྱང་། ད་ལྟའི་ཆར་གནོད་སྐྱོན་གྱི་ཞིབ་ཕྲའི་གནས་ཚུལ་ཅི་ཡང་ཤེས་རྟོགས་ཐུབ་ཀྱིན་མེད་པ་རེད། གཞན་ཡང་། འདས་པའི་དུས་ནས་བཟུང་མཚོ་སྔོན་གྱི་ས་ཁུལ་མགོ་ལོག་དང་མཚོ་བྱང་། མཚོ་ལྷོ། རྨ་སྟོད། གཏེར་ལེན་ཁ། ན་གོར་མོ་བཅས་ཀྱི་ས་ཁུལ་མང་ཆེ་བར་བསྟུད་མར་ཆུ་ལོག་དང་ཆར་ཞོད། རླུང་ཆེན་དང་སེར་བ། བྱེ་རླུངས་སོགས་ཀྱི་གནོད་འཚེ་ཐེབབས་ཏེ། ས་ཁུལ་དེ་དག་གི་མིའི་སྡོད་ཁང་དང་ས་ཞིང་། གཞུང་ལམ་སོགས་ལ་གནོད་འཚེ་ཆེན་པོ་ཐེབས་ཡོད་འདུག
སྟོང་སྐོར་རྫོང་ནི་མཚོ་སྔོན་ཞིང་ཆེན་ཟི་ལིང་གྲོང་ཁྱེར་ནུབ་ཕྱོགས་ཀྱི་སྤྱི་ལེ་ ༥༢ མཚམས་སུ་ཡོད་པ་དང་། སྤྱིའི་རྒྱ་ཁྱོན་ལ་སྤྱི་ལེ་གྲུ་བཞི་མ་ ༡༥༠༩ ཡོད་འདུག ཡུལ་དེར་གྲོང་བརྡལ་ ༢ དང་ཞང་གྲོང་དྲུག་ཡོད་འདུག་ལ། སྤྱིའི་མི་གྲངས་ཁྲི་ ༡༤ ལྷག་ཡོད་འདུག དེའི་ནང་བོད་ཀྱི་ཞང་གྲོང་ཉི་ཟླ་ཞང་གཅིག་པུ་ལས་མི་འདུག་ལ། ཞང་དེའི་ནང་བོད་རིགས་ཁྱིམ་ཚང་ ༣༢༠༠ དང་། མི་གྲངས་ཁྲི་ ༡༤༠༠༠ ལྷག་ཡོད་འདུག
གསར་འགོད་པ། དོན་གོ།
ད་ནི་འབྱུང་བ་འདིའང་དགྲ་ལངས་གིན་འདུག
ཨོཾམཎིཔདྨེཧཱུཾ། གདུང་སེམས་མཉམ་བསྐྱེད་ཞུ།
བོད་ཀྱི་དུས་བབ་རྩོམ་སྒྲིག་པ་གཙོས་གསར་འགོད་པ་རྣམ་པར་ཞུ་རྒྱུ། དེ་རིང་ནས་བཟུང་ཁྱེད་བོད་ཀྱི་དུས་བབ་དྲ་ཚིགས་ནས་གསར་འགྱུར་དང་རྩོམ་ཡིག་གང་ཡིན་ངེད་རང་དབང་དྲ་བར་བརྒྱུད་འགོད་བྱས་ཆོག་པར་སྙིང་ནས་རེ་བ་ཞུ། རྒྱུ་མཚན་ནི་ངེད་རང་དབང་དྲ་བ་འདི་ནི་ཁ་སྔོན་སྐུའི་འཁྲུངས་སྐར་སྟབས་བསྟུན་ནས་གསར་དུ་སྒོ་ཕྱེ་བའི་དྲ་ཚིགས་གསར་པ་ཞིག་ཡིན་པས། གསར་འགྱུར་དང་ཟིན་བྲིས། ཆེད་རྩོམ་སོགས་གང་ཐད་ནས་འགོད་མཁན་ཉུང་ཞིང་མང་ཆེ་བས་ཤེས་རྟོགས་མེད་པས་ན། ཁྱེད་བོད་ཀྱི་དུས་བབ་གཙོས་བོད་ཡིག་དྲ་ཚིགས་གཞན་ལས་བརྒྱུད་འགོད་བྱེད་དགོས་ཐུག་ན། དེ་དོན་བཞིན་བྱེད་ཆོག་པའི་རེ་བ་དང་ཆོག་མཆན་སྙིང་ནས་ཞུ་ཞུ་ཞུ།
གོང་གི་གསར་འགྱུར་འདི་ངེད་རང་དབང་དྲ་བར་བཀོད་ཟིན་པ་ཡིན།
http://www.rangwang.net/