ལྕགས་ལམ་ལ་དོགས་ཟོན་བྱོས།

རྒྱ་ནག་གིས་པཱ་ཀི་སི་ཐན་ནང་མེ་འཁོར་ལྕགས་ལམ་མཐུད་འཆར་ཡོད་པ་དེ་རྒྱ་གར་གྱིས་ཡིད་གཟབ་བྱེད་དགོས་པའི་གནད་དོན་ཞིག་ཡིན་ལ། དེའི་ཐད་རྒྱ་གར་གཞུང་ཕྱོགས་ནས་གདོང་ལེན་བྱ་རྒྱུའི་གྲ་སྒྲིག་དགོས་པ་རེད་ཅེས་རྒྱ་གར་བདེ་སྲུང་བློན་ཆེན་མཆོག་གིས་གསུངས་འདུག

ཟླ་འདིའི་ཚེས་ ༡༡ ཉིན་རྒྱ་གར་གྱི་ཊི་བྷུན་ TRIBUNE ཞེས་པའི་གསར་ཤོག་སྟེང་གནས་ཚུལ་སྤེལ་བ་ལྟར་ན།  རྒྱ་ནག་གཞུང་གིས་ཟླ་སྔོན་མ་ནས་བཟུང་པཱ་ཀི་སི་ཐན་གྱི་ས་ཁུལ་གྷི་ཇཱི་དང་སྦལ་ཏི་ Gilgit-Baltistan དང་། ཧི་མ་ཡའི་རི་རྒྱུད་ཀྱི་གངས་རི་ཀཱ་ར་ཀོ་རམ་ Karakoram གཉིས་བར་མེ་འཁོར་ལྕགས་ལམ་མཐུད་རྒྱུའི་ལས་འཆར་ཞིག་གྲ་སྒྲིག་བྱེད་ཀྱིན་ཡོད་པར་མ་ཟད། ཐེངས་འདིའི་མེ་འཁོར་ལྕགས་ལམ་དེ་རྒྱ་གར་དང་པཱ་ཀི་ས་ཐན་གྱི་ས་མཚམས་བརྒྱུད་ཨ་རབ་རྒྱ་མཚོ་  Arabian sea  བར་མཐུད་འཆར་ཡོད་ཚུལ་བརྗོད་ཡོད་འདུག་ལ། ཉེ་བའི་ལོ་འགའི་སྔོན་གྱི་རྒྱ་ནག་དང་པཱ་ཀི་སི་ཐན་གཉིས་བར་ཆབ་སྲིད་དང་དཔལ་འབྱོར། རྡུལ་ཕྲན་མཚོན་ཆའི་མ་ལག་མཁོ་གཏོང་སོགས་ཕྱོགས་མང་པོའི་ཐོག་ནས་མཉམ་འབྲེལ་གྱི་ལས་གཞི་མང་པོ་ཞིག་བསྒྲུབས་ཡོད་པ་དང་། ཐེངས་འདིའི་ལྕགས་ལམ་མཐུད་ས་ནི་ཕྱོགས་གཉིས་ཀྱི་ལོ་མང་རིང་གི་རྩོད་གཞི་ཅན་གྱི་ས་ཁུལ་ཞིག་ཆགས་ཡོད་སྟབས།  རྒྱ་གར་གྱི་དོགས་གཞི་སྐྱེ་ཡུལ་ཞིག་ཏུ་གྱུར་ཡོད་པ་རེད།
 
འདིའི་ཐད་རྒྱ་གར་གྱི་མངའ་སྡེ་བདེ་སྲུང་བློན་ཆེན་མཆོག་གིས་ཕྱི་ཚེས་ ༡༡ ཉིན་རྒྱ་གར་གྱི་གསར་འགྱུར་བརྒྱུད་ལམ་ཊི་བྷོན་ཞེས་པའི་སྟེང་བློ་འཚབ་ཡོད་སྐོར་གྱི་བཀའ་མོལ་གནང་ཡོད་འདུག  ཁོང་གིས། ལོ་མང་རིང་གི་རྒྱ་ནག་དང་པཱ་ཀི་སི་ཐན་གཉིས་ཀྱི་མཉམ་འབྲེལ་གྱི་ལས་གཞི་གང་མང་ལ་གཞིར་བཞག་སྟེ། རྒྱ་གར་གཞུང་གིས་དོགས་ཟོན་བྱ་དགོས་པ་ཞིགས་ཆགས་ཡོད་ཚུལ་བརྗོད་ཡོད་པར་མ་ཟད།  གཞུང་ཕྱོགས་ནས་ཀྱང་ཡིད་གཟབ་བྱས་ཏེ། གདོང་ལེན་བྱ་རྒྱུའི་གྲ་སྒྲིག་བྱ་དགོས་པའི་སྐོར་འགྲེལ་བརྗོད་གནང་ཡོད་པ་རེད།

དེ་ལྟར་ཡང་། པཱ་ཀི་སི་ཐན་གྱི་མགྲིན་ཚབ་པ་སྐུ་ཞབས་ Albul Baslt ལགས་ཀྱིས། ལས་གཞི་འདི་ ༢༠༠༤ ལོ་ནས་མགོ་འཛུགས་གནང་བའི་ལས་འཆར་ཞིག་ཡིན་ཡང་། གནད་དོན་གང་མང་ཞིག་གི་རྐྱེན་པས་ལེགས་འགྲུབ་བྱུང་ཐུབ་མེད་པ་དང་། ཐེངས་འདིར་རྒྱ་ནག་དང་པཱ་ཀི་སི་ཐན་གཞུང་གཉིས་མོས་ཀྱི་ཐོག་ནས་གྲོས་ཆོད་གཏན་འབེབས་གནང་སྟེ།  རིང་ཚད་ལ་མེལ་ལེ་  ༤༢༣ ཡོད་པའི་མེ་འཁོར་ལྕགས་ལམ་གྱི་འཆར་འགོད་ལ་མིང་རྟགས་འགོད་རྒྱུ་ཡིན་ཚུལ་འགྲེལ་བརྗོད་གནང་ཡོད་པར་མ་ཟད། ལས་གཞི་འདིའི་ཐད་རྒྱ་གར་སྲིད་གཞུང་ལ་བློ་འཚབ་སྐྱེ་ཡུལ་གྱི་གནད་དོན་ཅི་ཡང་མེད་སྐོར་འགྲེལ་བརྗོད་གནང་ཡོད་པ་རེད། དེ་ལྟ་ནའང་། རྒྱ་གར་གཞུང་ཕྱོགས་ནས་སྔོན་མར་བོད་ཀྱི་ས་མཚམས་བརྒྱུད་རྒྱ་ནག་གིས་རྒྱ་དཀར་ནག་གཉིས་ཀྱི་ས་མཚམས་བར་མེ་འཁོར་ལྕགས་ལམ་མཐུད་ཐུབ་ཡོད་པ་དང་། མ་འོངས་པར་རྒྱ་གར་གྱི་ས་འབྲེལ་ཡིན་པའི་པཱ་ཀི་སི་ཐན་ནང་རྒྱ་ནག་གི་ལྕགས་ལམ་མཐུད་རྗེས། རིམ་གྱིས་ཆབ་སྲིད་དང་དཔལ་འབྱོར། དེ་བཞིན་ས་ཁོངས་སོགས་རིམ་གྱིས་རྒྱ་བསྐྱེད་བྱ་རྒྱུའི་ཐད་བློ་འཚབ་སྐྱེ་བཞིན་ཡོད་འདུག 

གསར་འགོད་པ་དོན་གོ།