རྒྱ་ནག་ཏུ་གཟིགས་སྐོར།

འཇར་མན་སྲིད་བློན་མཆོག་རྒྱ་ནག་ཏུ་ཕེབས་ཏེ་ཡུལ་དེའི་དཔོན་རིགས་ཚོར་ཚོང་དོན་སྐོར་ལ་གྲོས་བསྡུར་བྱས་ཡོད་འདུགཧ

ཧྥ་རན་སིའི་གསར་ཁང་གིས་གནས་ཚུལ་སྤེལ་བ་ལྟར་ན། འཇར་མན་སྲིད་བློན་ལྕམ་ཨན་གྷིལ་མེར་ཁལ་མཆོག་གིས་ཁོང་གི་ཨུ་རུ་སུའི་གཟིགས་སྐོར་ལེགས་པར་གྲུབ་རྗེས། ཕྱི་ཚེས་ ༡༥ དགོང་མོར་པེ་ཅིན་དུ་ཕེབས་ཡོད་འདུག་ལ། འདི་ནི་ལྕམ་མེར་ཁལ་མཆོག་གིས་ཕྱི་ལོ་ ༢༠༠༥ ལོར་སྲིད་བློན་གྱི་ལས་འགན་འཁུར་རྗེས་རྒྱ་ནག་ཏུ་ཕེབས་ཐེངས་བཞི་བ་དེ་ཆགས་ཡོད། ཁོང་ཕེབས་དོན་གཙོ་བོ་ནི་ཡུལ་གཉིས་བར་གྱི་དཔལ་འབྱོར་དང་ཚོང་འབྲེལ་ཡར་རྒྱས་གཏོང་ཆེད་དུ་རེད་འདུག  ཧྥ་རན་སིའི་གསར་ཁང་གིས་བརྗོད་ན། འཇར་མན་སྲིད་བློན་མཆོག་རྒྱ་ནག་ཏུ་ཕེབས་པ་དེ་གཙོ་བོ་རྒྱ་ནག་རྒྱལ་སྲིད་སྤྱི་ཁྱབ་ཁང་གི་སྲིད་བློན་ཝུན་ཅ་པའོ་ཡིས་གདན་ཞུ་བྱས་པ་བཞིན་ཕེབས་པ་ཞིག་རེད་འདུག་ལ། ཉིན་བཞིའི་རིང་གི་གཟིགས་སྐོར་སྐབས་ཁོང་གིས་སྲིད་འཛིན་ཧུའུ་ཅིན་ཐོ་དང་སྲིད་བློན་ཝུན་ཅ་པའོ། དེ་བཞིན་སྲིད་བློན་གཞོན་པ་ཞི་ཅིན་ཕིན་བཅས་སོ་སོར་ཐུག་འཕྲད་ཀྱིས་གྲོས་མོལ་གནང་རྒྱུ་ཡིན་ལ། གྲོས་མོལ་གྲུབ་རྗེས་ལྕམ་མེར་ཁལ་མཆོག་ཞི་ཨན་དུ་ཕེབས་རྒྱུ་ཡིན་འདུག འཇར་མན་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། འཇར་མན་སྲིད་བློན་གྱི་ཐེངས་འདིའི་གཟིགས་སྐོར་དེ་གཞི་རྒྱ་ཆེན་པོ་ཞིག་ཡིན་པར་མ་ཟད། སྲིད་བློན་དང་མཉམ་དུ་ཡོད་པའི་སྐུ་ཚབ་ཁོངས་སུ་འཇར་མན་གྱི་ཁེ་ལས་ཚན་པའི་མགོ་ཁྲིད་བཅས་ཕེབས་ཡོད་པ་དང་། ཚོགས་འདུའི་སྐབས་སུ་རྒྱལ་ཁབ་གཉིས་ཀྱི་ཚོང་འབྲེལ་མཉམ་ལས་གྲོས་ཆོད་ཁག་ལ་མིང་རྟགས་ཀྱང་འགོད་རྒྱུ་ཡིན་འདུག

རྒྱ་ནག་ནི་ཨེ་ཤ་ཡའི་རྒྱལ་ཁབ་ཁག་གི་ནང་འཇར་མན་གྱི་ཚོང་རོགས་ཆེ་ཤོས་དེ་ཡིན་ལ། འཇར་མན་ཡང་ཉི་ཧོང་དང་ཨ་རི། ལྷོ་ཀོ་རི་ཡ་བཅས་ལས་གཞན་པའི་རྒྱ་ནག་གི་ཚོང་རོགས་ཆེ་ཤོས་བཞི་བ་དེ་ཆགས་ཡོད། ༢༠༠༩ ལོའི་ཡུལ་གཉིས་བར་མ་གནས་ཡུ་སྒོར་དུང་ཕྱུར་ ༩༢༠ ལྷག་གི་ཚོང་བརྒྱབ་ཡོད་པའི་ནང་རྒྱ་ནག་ལ་ཡུ་སྒོར་དུང་ཕྱུར་ ༢༠༠ ཙམ་གྱི་ཁེ་བཟང་རག་ཡོད། ད་ལོའི་དུས་ཚིགས་དང་པོའི་ནང་འཇར་མན་དང་རྒྱ་ནག་བར་གྱི་ཚོང་འབྲེལ་དེ་བརྒྱ་ཆ་ ༣༤ ཙམ་འཕར་སྣོན་བྱུང་ཡོད་འདུག འཇར་མན་སྲིད་བློན་ལྕམ་ཨན་གྷིལ་མེར་ཁལ་མཆོག་ནི་འགྲོ་བ་མིའི་ཐོབ་ཐང་དང་བོད་དོན་ལ་སེམས་ཁུར་ཡོད་མཁན་ཞིག་ཡིན་ནའང་། ཐེངས་འདིར་རྒྱ་ནག་དང་མཉམ་དུ་ཚོང་འབྲེལ་སྐོར་ལ་གྲོས་མོལ་བྱ་རྒྱུ་ལས་གནད་དོན་གཞན་གླེང་རྒྱུའི་འཆར་གཞི་གང་མང་མི་འདུག

གསར་འགོད་པ། དཔལ་ལྡན་རྒྱ་མཚོ།