འཕྲིན་ལས་རྒྱ་མཚོ།
ང་ཚོས་འདས་པའི་ལོ་རབས་ཁ་ཤས་ཀྱི་རིང་དུ་ང་ཚོའི་སྤྱི་ཚོགས་འདི་དམངས་གཙོ་ཚད་ལྡན་ཞིག་ཡིན་ཞེས་བསྒྲགས་གཏམ་མ་ཎི་བགྲང་བ་བཞིན་དུ་སྤེལ་བ་རེད། དོན་དངོས་སུ་ང་ཚོ་དམངས་གཙོ་ཅན་དུ་གྱུར་ཡོད་དམ་ཞེ་ན། མེད། བཤད་སྟངས་གཞན་ཞིག་གིས་བཤད་ན་ང་ཚོ་ནམ་ཡང་དམངས་གཙོ་ཆགས་མ་མྱོང་ལ། དམངས་གཙོ་ཚད་ལྡན་ཞིག་ཏུ་འགྱུར་བར་ལམ་ཐག་ཀྱང་ཧ་ཅང་རིང་། རྒྱུ་མཚན་གང་ལ་ཞེ་ན་བོད་པ་རྣམས་ཀྱི་བསམ་བློའི་རང་དབང་དང་སྨྲ་བརྗོད་ཀྱི་རང་དབང་བྱ་ཐབས་འདྲ་མིན་གྱི་འོག་ཏུ་བཀག་ཡོད།
བོད་གཞུང་དང་དེའི་ལས་ཀྱི་སྣེ་མོར་གཏོགས་པའི་མི་རྣམས་ཀྱི་ནོར་འཁྲུལ་ཅན་གྱི་བྱ་བཞག་ལ་སྐྱོན་བརྗོད་བྱས་ཚེ། ༧རྒྱལ་བ་རིན་པོ་ཆེ་དང་བོད་གཞུང་ལ་ངོ་ལོག་བྱེད་ཀྱིན་པའི་སྙོན་འཛུགས་བྱས་ཏེ་ཁྱེད་རང་གི་ཁ་གཅོད་ཐབས་བྱེད་པ་ཡིན། ང་ཚོས་དམངས་གཙོ་ཡིན་པར་རློམ་པའི་བོད་གཞུང་འདི་ལ་ལྟ་བརྟག་བྱེད་པའི་ཕྱོགས་འགལ་ཚོགས་པ་མེད་པར་བརྟེན། བོད་གཞུང་གི་ལས་བྱེད་རྣམས་ཀྱིས་འབངས་མི་གཉོམ་ཆུང་ཚོར་བྱ་སྤྱོད་མི་ལེགས་པ་ཇི་ལྟར་བསྟན་ཀྱང་གཉོམ་ཆུང་གིས་གཉོམ་ཁུར་བ་ལས་བྱ་ཐབས་གང་ཡང་མེད། བོད་གཞུང་གི་ལས་ཁུངས་ཤིག་ཏུ་སོང་སྟེ་རང་གི་དགོས་དངོས་ཀྱི་ཡིག་ཆའི་ལས་ཀ་ཞིག་བྱེད་པ་ནི་སྲང་ལམ་དུ་ལྟོ་སློང་བ་ལས་ཀྱང་ཁག ལས་ཁུངས་གང་ཞིག་གི་ནང་དུ་འཛུལ་བ་ནས་མགོ་དམའ་མོ་བྱས་ཏེ། “སྐུ་ངོ་ལགས། ལགས་སོ། ལགས་སོ།” ཞེས་རང་ཉིད་ཀྱིས་གང་ཤེས་པའི་ཞེ་ས་ཡོད་ཚད་མ་བརྒྱབ་ཚེ། “ག་རེ། གོ་མ་སོང་” ཞེས་ཁྱོད་ནི་བོད་པ་ཞིག་ཡིན་པ་ཕར་ཞོག གླིང་གཞན་ཞིག་ནས་ཡོང་བའི་སྲོག་ཆགས་ཤིག་ཡིན་པ་ལྟར་བྱེད་ངེས་ཡིན།
དེ་ལས་སྡིག་དམོད་དང་ཁ་འཛིང་བྱེད་ཞོར་དུ་རྒྱ་གར་ཡིག་ཚང་དག་ཏུ་ལས་ཀ་བྱས་ན་ཧ་ཅང་སྟབས་བདེ་བོ་འདུག
ཡིད་སྐྱོ་བ་ཞིག་ལ་གཞུང་གི་མི་སྣ་འདི་ཚོས་དམངས་གཙོའི་སྤྱི་ཚོགས་སུ་དམངས་ཏེ་འབངས་རྣམས་གཙོ་བོ་ཡིན་པ་དང་གཞུང་དང་དེའི་ལས་ཀྱི་སྣེ་མོར་གཏོགས་པའི་མི་རྣམས་དམངས་ཀྱི་ཞབས་གཡོག་ཡིན་པའི་ཆེས་སླ་བའི་དམངས་གཙོའི་རྩ་འཛིན་འདི་ཡང་ཤེས་ཀྱིན་མེད་པ་འདྲ། ལས་ཁུངས་ཤིག་གི་དྲུང་ཡིག་ཆུང་ཆུང་ཞིག་ལས་མིན་ན་ཡང་། དཔོན་ཚུགས་གཏོད་རྒྱུར་དགའ་བ་མ་ཟད། འབངས་མི་གཉོམ་ཆུང་ཚོར་དགོས་མེད་ཀྱི་གཤེ་གཤེ་ཡང་གཏོང་ངེས་ཡིན། ཉེ་བའི་བདུན་ཕྲག་འགའི་སྔོན་དུ་ང་རང་གི་རང་བཙན་ལག་དེབ་ཀྱི་དུས་ཡུན་ཕྱིར་འགྱངས་བྱེད་དགོས་པར་བརྟེན། བདེ་སྲུང་ལས་ཁུངས་སུ་སོང་སྟེ་དྲུང་ཡིག་ག་གེ་མོ་ཞིག་གི་འགྲམ་དུ་བཅར་བ་ཡིན། ངས་ “ཨ་་་་འདིར་” ཞེས་ཁོང་ལ་སྐད་ཆ་ཞིག་འདྲི་བའི་འགོ་བརྩམས་མ་ཐག ཁོང་གིས “ཨ་་ཨ་་ ག་རེ་” ཞེས་རྣམ་འགྱུར་མི་ལེགས་པ་ཞིག་དང་མཉམ་དུ་གཤེ་གཤེ་གཏང་རྒྱུ་ཡིན་པའི་ཉམས་བསྟན་སོང་། ཁོང་གི་རྣམ་འགྱུར་དེས་ང་ལ་གློ་བུར་བའི་ཁོང་ཁྲོ་ཞིག་བསླངས་བྱུང་བས། “ཁྱོད་ལ་སྐད་ཆ་ཡང་འདྲི་ཆོག་གི་མ་རེད་དམ་” ཞེས་ཁོང་ཁྲོའི་ཉམས་ཀྱིས་བཤད་པས་ཁོང་ཡང་དེ་མ་ཐག་ལྷོད་དུ་བབས་ཏེ་ “ཆོག་གི་རེད། ཆོག་གི་རེད།” ཞེས་བཤད་བྱུང་། འདི་ནི་ངན་པ་རྒྱུན་འཇགས་སུ་སོང་བའི་ཐ་ཤལ་གྱི་བྱ་སྤྱོད་ཅིག་གམ་སྐུ་དྲག་ཚོའི་ཤུལ་བཞག་སྲོལ་རྒྱུན་རིག་གནས་གང་ཞིག་ཡིན་པ་བདག་གིས་མ་ཤེས།
མཚམས་རེར་དམངས་གཙོའི་སྤྱི་ཚོགས་འདིའི་འགོ་ཁྲིད་ཚོའི་སྐད་ཆ་ལ་ཉན་ན་དགོད་བྲོ་བ་ཞིག་ཀྱང་རེད། ང་ཚོའི་དམངས་གཙོ་འདི་ནུབ་ཕྱོགས་པའི་དམངས་གཙོ་ལ་དཔེ་བྱས་པ་སྨྲོས་མེད་ཡིན་ཞིང་། སྤྱི་ཚོགས་འདིའི་འགོ་ཁྲིད་ཚོ་བྱ་བཞག་ཡོད་ཚད་ནུབ་ཕྱོགས་པའི་དམངས་གཙོ་ལ་ཚད་བཙུགས་ཏེ་གཏམ་བཤད་བྱེད་རྒྱུར་ཡང་ཧ་ཅང་དགའ་བ་ཡིན། འོན་ཀྱང་། ནུབ་ཕྱོགས་པས་དོན་དངོས་ཀྱི་བྱེད་སྟངས་དང་ཁོང་ཚོས་བྱ་བ་སྒྲུབ་ཕྱོགས་གཉིས་འགལ་བ་ལྟག་སྤྲོད་དུ་སོང་ཡོད་པ་དེ་ལ་ནམ་ཡང་དོ་སྣང་བྱེད་ཀྱིན་མེད། ང་ཚོས་དཔེ་རུ་བྱེད་པའི་ནུབ་ཕྱོགས་པའི་དམངས་གཙོའི་རྒྱལ་ཁབ་དེ་དག་གི་འགོ་ཁྲིད་རྣམས་ཀྱིས་མི་དམངས་ཀྱིས་ཅི་ཞིག་བཤད་པར་དོ་སྣང་དང་གཙིགས་ཆེན་བྱེད་པ་ཡིན་ལ། གཞུང་གི་སྲིད་ཇུས་མང་པོ་ཞིག་ཀྱང་དེ་ལྟར་གཏན་འབེབ་བྱེད་བཞིན་ཡོད། ང་ཚོའི་འགོ་ཁྲིད་ཚོ་དམངས་ཀྱིས་བདམས་པ་ལས་དམངས་གཙོའི་སྲོག་སྙིང་སྟེ་དམངས་ལ་ཉན་སྲོལ་མེད། ད་ལོའི་ལོ་སྟོད་དུ་འཚོགས་པའི་སྤྱི་འཐུས་གྲོས་ཚོགས་ཀྱི་སྐབས་སུ་སྤྱི་འཐུས་ཚང་མས། ༧སྐྱབས་མགོན་༧རྒྱལ་བ་རིན་པོ་ཆེས་ཅི་གསུངས་བཀའ་བསྒྲུབ་ཞུ་གི་ཡིན། ཞེས་བཤད་པ་ལས་དམངས་ཀྱི་བསམ་ཚུལ་ལ་ཉན་ཏེ་ལས་ཀ་བྱ་རྒྱུ་ཡིན་ཞེས་བཤད་མཁན་ང་ནོར་བ་མིན་ན་བྱུང་མ་སོང་། བསམ་བློ་ཞིག་ཐོངས་དང་། འདི་ནི་དམངས་གཙོ་ཞིག་རེད་དམ། དམངས་ཞེས་པའི་ཡིག་འབྲུ་འདི་ལ་གོ་གནས་ཤིག་སྤྲད་འདུག་གམ།
བཙན་བྱོལ་བོད་གཞུང་འདི་སྐུ་དྲག་ལམ་ལུགས་དང་ཁ་ཐག་རིང་དུ་གྱེས་མི་འདུག་ཅེས་བཤད་ན། མི་མང་པོ་ཞིག་ལ་ཕོག་འགྲོ་བ་བཤད་མི་དགོས་པ་ཞིག་ཡིན། འོན་ཀྱང་། དོན་དངོས་སུ་བཙན་བྱོལ་གཞུང་འདིའི་བསམ་བློ་གཏོང་ཕྱོགས་ཡང་དག་པའི་དམངས་གཙོ་ཅན་དུ་འགྱུར་བར་ད་དུང་ཡང་ལམ་ཐག་ཧ་ཅང་རིང་། སྔོན་ཆད་ངས་ཀྱང་གཞུང་འདི་ནི་དམངས་གཙོའི་གཞུང་ཞིག་ཡིན་པར་ཡིད་ཆེས་བྱས་པ་ཡིན། སྐབས་དེ་དུས་ཀྱི་བདག་གི་བསམ་བློ་ནི་ཕྱོགས་རིས་པ་ཁོ་ན་ལས་མ་འདས། བོད་གཞུང་འདི་དམངས་གཙོའི་གཞུང་ཞིག་དང་མི་མཚུངས་པར་མི་དམངས་ཀྱི་འདོད་ཚུལ་དང་སྐྱོན་བརྗོད་ལ་ཉན་རྒྱུར་གཏན་ནས་མི་དགའ། དཔེ་ཆུང་ཆུང་ཞིག་བཤད་ན། ཉེ་སྔོན་བོད་ཡིག་དུས་དེབ་ཅིག་གི་རྩོམ་སྒྲིག་པའི་འགན་འཁུར་བཞིན་པའི་བདག་གི་གྲོགས་པོ་ཞིག་བཀའ་ཤག་ཏུ་རོགས་དངུལ་ཅུང་ཙམ་སློང་དུ་སོང་འདུག སྐབས་དེ་དུས་ཁོང་ལ་བཀའ་ཤག་གིས་དུས་དེབ་ཀྱི་ནང་དུ་བོད་གཞུང་ལ་སྐྱོན་བརྗོད་བྱེད་ཀྱིན་ཡོད་ན་རོགས་དངུལ་ཡོད་པ་མ་རེད་ཅེས་བཤད་འདུག ལྟོས་དང་། དམངས་གཙོའི་རྒྱལ་ཁབ་གཞན་གྱི་གཞུང་གི་མ་དངུལ་བཏང་སྟེ་གསར་འགྱུར་དང་རྩོམ་རིག་གི་བྱ་བཞག་ཚོགས་པ་སྒེར་ལ་སྤེལ་དུ་འཇུག་གི་ཡོད། དཔེར་ན། BBC དང VOA ཨེ་ཤ་ཡ་རང་དབང་རླུང་འཕྲིན་ཁང་སོགས་གཞུང་གི་མ་དངུལ་གཏོང་བའི་ཚོགས་པ་རྐྱང་རྐྱང་ཡིན་ལ། འདི་དག་གི་བརྗོད་གཞིར་གཞུང་གི་ཐེ་གཏོགས་རྩ་ནས་མེད། དམངས་གཙོ་ཅན་གྱི་བོད་གཞུང་གི་ཚགས་ཤོག་དང་དུས་དེབ་ཁག་ཏུ་དམངས་ཀྱི་ཟུར་ཙམ་ཡང་མེད། འདིས་ཅི་ཞིག་བསྟན་ཡོད་ཅེ་ན། དམངས་གཙོ་ཡིན་པར་བཤད་པའི་གཞུང་འདིར་དམངས་མི་དགོས་པ་དེ་རེད།
རྣལ་ལ་བབས་ཏེ་བསམ་བློ་རེ་གཏོང་ཚེ་འདི་ནི་༧རྒྱལ་བ་རིན་པོ་ཆེ་ཐུགས་རྒྱས་པའི་མཆོད་པ་ཞིག་གཏན་ནས་མིན། ཁོང་གིས་ཐོས་འདོད་པ་ནི་གཞུང་གིས་དམངས་ལ་སྲི་ཞུ་སྒྲུབ་བཞིན་པ་དང་། དམངས་ཀྱིས་གཞུང་གི་སྲིད་ཇུས་དང་བྱ་བཞག་ལ་ཐེ་གཏོགས་བྱེད་བཞིན་པའི་དམངས་གཙོའི་སྤྱི་ཚོགས་སྲ་ཐག་ཐག་ཅིག་ཡོང་རྒྱུ་དེ་ཡིན། ༧རྒྱལ་བ་རིན་པོ་ཆེའི་བཀའ་གསུང་ཅི་སྒྲུབ་བྱེད་པ་ལས་ཅི་ཡང་མི་མཁོ་ན། དམངས་གཙོ་མི་མཁོ་ལ། ཤེས་འཇོན་ཅན་གྱི་འགོ་ཁྲིད་ཀྱང་མི་མཁོ།
ད་ལྟ་བཙན་བྱོལ་སྤྱི་ཚོགས་ཀྱི་གང་ཡིན་སར་ལོ་རྗེས་མའི་འོས་བསྡུ་ནི་ཉིན་རེ་འཚོ་བའི་ཁྲོད་ཀྱི་བརྗོད་གཞི་གལ་ཆེ་ཞིག་ཏུ་གྱུར་འདུག་མོད། བདག་ལ་མཚོན་ན་འདི་ནི་ཉི་མ་གཏོང་བྱེད་མེད་པའི་ཚོགས་པ་ལྔ་དང་ཨ་རིར་ཝེ་བཟྭའ་རག་གི་མེད་པའི་མགོ་བདེ་ཚོའི་གར་སྟེགས་ཀྱི་གཏམ་རྒྱུད་ཅིག་ལས་མ་འདས།
ང་ཚོ་མང་གཙོ་དང་ཁ་ཐག་ཧ་ཅང་རིང་བ་མངོན་སུམ་རེད། མང་གཙོ་གཞུང་ནི་མི་མང་གི་ཆེད་དུ་མི་མང་གིས་བཙུགས་པའི་མི་མང་གི་གཞུང་ཡིན་ན། ང་ཚོ་དངོས་ནས་ཁ་ཐག་རིང་གི
རྭ་ལོ་མིང་ཅན། མི་འགྱུར་རྡོ་རྗེ་ཡག་སྡུག་གི་སྐད་ཆ་དེ་ཁོའི་ལས་རོགས་དང་གཤམ་འོག་གི་ལས་བྱེད་ཚོར་སྐད་ཆ་དྲིས་དང་གསལ་པོ་ཆགས་ངེས། དེ་མ་གཏོགས་ངས་ཁྱོད་ལ་གསལ་བཤད་དགོས་ངེས་མ་མཐོང༌།
རྨོག་རི་བསྟན་པ་ལགས།
ཁྱེད་ཀྱིས་ཐམས་ཅན་མཁྱེན་པ་གསུང་གི་ཡོད་དམ།
ང་ནི་ཐམས་ཅད་མཁྱེན་པར་ཡིད་ཆེས་བྱེད་མཁན་ཚོའི་རིགས་སུ་མི་གཏོགས་ལ། རང་ཉིད་ཐམས་ཅད་མཁྱེན་པ་ཡིན་མདོག་གིས་གང་ཡིན་སར་མགོ་རྒྱག་རྒྱུར་ཡང་མི་དགའ།
གནའ་རབས་བོད་ཀྱི་སྐུ་དྲག་རང་ལུགས་དང་། །
ད་ལྟའི་དམར་པོའི་སྲིད་དབང་སྒེར་འཛིན་གཉིས། །
ཟུང་དུ་འབྲེལ་བའི་ལ་ཤན་འཕར་མ་ཞིག །
ད་དུང་བོད་མའི་གཤེས་ལ་ཉལ་བ་འདྲ། །
འཕྲིན་ལས་ལགས། སེམས་ཚོར་གྱི་ཆ་ནས་འདྲ་ས་མང་པོ་འདུག
ཡིན་ཡང་སྐད་ཆ་འདི་རིགས་བཤད་སྐབས་ཕྱོགས་མང་པོ་ཞིག་ནོན་དགོས་པ་གལ་ཆེན་པོ་རེད།
དྲ་གྲོགས་ཚོ། ཁྱེད་རྣམ་པས་རང་བཙན་ལག་དེབ་ཤི་ནས་ཕུང་པོ་རོ་ཁང་ནང་དུ་བསྐྱལ་ཚར་བ་མ་ཤེས་པར་རང་བཙན་ལག་དེབ་ཅིག་ཅིག་མོག་མོག་གསུངས་བསྡད་པ་འདིར་ག་རེ་རེད་དམ།
བཙན་རང་ལག་དེབ་ཟེར་བ་ཞིག་དེང་སང་ཡོད་དམ། 1970ནང་དུ་བསྡད་ཡོད་པ་མ་རེད་ད།
བྱ་གཞུང་དཔལ་རྡོར་ལགས།
ད་དུང་ཁྱེད་ལ་བཤད་རྒྱུ་ཞིག་ལྷག་འདུག
སྐྱོན་ངོས་འཛིན་བྱེད་པ་ནི་དྲང་ཕྱོགས་སུ་བསྐྱོད་པའི་ལས་དང་པོ་ཡིན་པ་ལས་ཁྱེད་ཀྱིས་བཤད་ལྟར་འཐབ་འཛིང་གི་སྟ་གོན་ཞིག་གང་ནས་ཡིན། དམངས་གཙོའི་གཞུང་ཞིག་ལ་ལས་ཀ་བྱེད་ཀྱིན་ཡོད་ན་སྐྱོན་དང་ལེན་བྱེད་རྒྱུར་གོམས་པར་གྱིས།
བྱ་གཞུང་དཔལ་རྡོར་ལགས།
ཁྱོད་ལ་སྐད་ཆ་མང་པོ་ཞིག་བཤད་འདོད་མ་བྱུང་ལ་བཤད་པའི་དགོས་པ་ཡང་མ་མཐོང་། ཁྱེད་ཀྱིས་རང་གིས་བྲིས་པའི་ཨ་མ་ལ་སྐྱོན་བརྗོད་ཅེས་པ་དང་རང་དོན་ཞིག་བོད་གཞུང་ལ་སོང་ནས་འགྲུབ་མ་འགྲུབ་ཅེས་པ་འདི་ལ་གཟིགས་ཏེ་བསམ་བློ་ཡག་པོ་ཞིག་ཐོངས།
སྤྱིར་དམངས་གཙོ་ཡོད་ཚད་སྒེར་སོ་སོ་ནས་འཛུགས་དགོས་པ་ཡིན་ལ། སྒེར་སོ་སོའི་ཕན་ན་དམངས་ཞེས་པ་འདི་མེད་པ་ཤེས་པར་གྱིས། དམངས་ཀྱི་དོན་ཞིག་འགྲུབ་གི་མེད་ན་གཞུང་གི་དོན་འགྲུབ་གི་མེད་པའི་ཁྱབ་པ་ཡིན། དམངས་དོན་མི་དགོས་ན་གཞུང་ཡོད་པའི་དགོས་པ་ཅི།
ཁྱེད་ཀྱིས་ཨ་མར་དཔེ་སྤྱར་འདི་ནི་སྐུ་དྲག་ཚོས་འབངས་ལ་བྱམས་བརྩེ་ཡོད་ཁུལ་བྱེད་པའི་སྔར་གྱི་འགྲོ་ལུགས་ཤིག་ལས་དུས་རབས་ ༢༡ ནང་དུ་ཚིག་འདི་ལྟ་བུ་ལ་གོ་གནས་མེད།
དུས་བབ་ཟིན་བྲིས་ནང་གི་མི་འདི་ཚོས་གཞུང་གི་ལས་བྱེད་ཚོར་སྐྱོན་བརྗོད་དང་རྒོལ་གཏམ་བཏང་ཆོག་ན་བོད་གཞུང་གི་ལས་བྱེད་ཚོས་ཁོང་ཚོར་མངོན་ཚང་བྲིས་མ་ཆོག་པ་མེད་པས། གཞུང་གི་ལས་བྱེད་ཚོས་ཀྱང་མི་དག་ལ་ཞིབ་འཇུག་གིས་ཁྲིམས་དང་སྒྲིག་སྲོལ་དང་འགལ་བའམ། ཁུངས་མེད་འཆལ་གཏམ་ཡིན་ན་ཁྲིམས་ལྟར་ཐག་གཅོད་བྱེད་དགོས་ངེས་རེད། དེ་ལྟར་བྱས་ན་གཞི་ནས་མང་གཙོ་ཡར་རྒྱས་འགྲོ་གི་རེད་ལ། མང་གཙོ་སྲུང་ཐུབ་པ་རེད། དེ་མིན་མང་གཙོ་དེ་ཁྱི་གཙོ་མི་ཆགས་པའི་ངེས་བ་མི་འདུག་གོ
བཙན་བྱོལ་བོད་གཞུང་མང་གཙོ་ཚད་ལྡན་ཞིག་མིན་པ་བདེན་ཡང་ཁོའི་ལོ་ཚོད་དང་གནས་སྟངས་ལ་ལྟོས་པས་ཡག་ཐག་ཆོད་ཡོད་པ་རེད། སྐྱོན་གཅིག་པུ་ལ་བསམ་བློ་མ་གཏོང་དགེ་མཚན་ལའང་བསམ་བློ་གཏོང་དགོས་པ་རེད། དེ་ལྟར་བྱས་ན་བློ་གཟུར་བོར་གནས་བ་རེད། དྲང་མོར་བཤད་ན་བོད་གཞུང་ད་ལྟ་བར་ཁྲིམས་དང་སྒྲིག་གཞི་ལྟར་ཡག་ཐག་ཆོད་འགྲོ་ཐུབ་པ་དེའང་ང་ཚོ་ཟིན་བྲིས་བ་ཚོས་རྩོམ་བྲིས་ནས་བྱུང་བ་ཞིག་མ་ཡིན་པར་གཞུང་གི་ལས་ཀྱི་སྣེ་མོར་གཏོགས་པ་ཚོས་དཀའ་ལས་བརྒྱབ་ནས་བྱུང་བ་རེད། མང་གཙོ་ཚད་ལྡན་ཅི་འདྲ་ཞིག་མིན་ནའང་བཙན་བྱོལ་ནང་དུ་ཡག་ཐག་ཆོད་བྱུང་བ་རེད། གཙོ་བོ་ནི་ཁ་བདེ་བོ་བཤད་ནས་ཅི་ཡང་ཡོང་རྒྱུ་མེད་པར་གཙོ་བོ་དཀའ་ལས་རྒྱག་དགོས་པ་རེད།
ཁྱེད་ཀྱིས་བཤད་པ་ལ་རྒྱུ་མཚན་ལོས་ཡོད་ཀྱང་། བོད་བཙན་བྱོལ་གཞུང་འདི་མང་གཙོ་མ་ཡིན་ཞེས་ནའང་ག་ལ་འགྲིག མང་གཙོ་ཡིན་མིནནི་་ཁྱེད་ཀྱིས་མ་རེད་ཟེར་ན་མིན་འགྲོ་བ་ཞིག་ཀྱང་མ་རེད། དེ་མ་ཚད་མང་གཙོ་ཡིན་མིན་ནི་སྨྲ་བརྗོད་རང་དབང་ཡོད་མེད་དང་། འོས་བསྡུ་བྱེད་དབང་ཡོད་མེད། ཁྲིམས་ཀྱིས་དབང་སྒྱུར་ཡིན་མིན་སོགས་ལ་ལྟ་དགོས་པ་ལས་རང་དོན་ཞིག་བོད་གཞུང་ལ་སོང་ནས་འགྲུབ་མ་འགྲུབ་ལ་བརྟེན་ནས་བོད་གཞུང་མང་གཙོ་མ་རེད་ཟེར་ན་དགོད་བྲོ་བོ་འདུག དེ་མི་ཚད་གཞུང་གི་ལས་བྱེད་ག་གེ་མོ་ཞིག་གི་སྤྱོད་ཚུལ་ལ་བལྟས་ནས་བོད་གཞུང་གི་ལས་བྱེད་ཚང་མར་རྒྱུགས་པ་ལེབ་རྡུང་བྱས་ན་ག་ལ་རུང་། བཙན་བྱོལ་སྤྱི་ཚོགས་དང་བོད་གཞུང་ལ་སྐྱོན་བརྗོད་བྱེད་དགོས་ན་རང་གི་ཨ་མ་ལ་སྐྱོན་བརྗོད་དང་གསལ་འདེབས་བྱེད་པ་ལྟར་བྱེད་དགོས་པ་ལས། རང་དོན་ཁོག་བཅིང་གིས་མགོ་རྔ་གང་ཡང་མེད་པར་བསམ་ཚུལ་བཤད་ན་ཅི་ལ་འགྲིག བོད་གཞུང་གི་ལས་བྱེད་དང་མི་མང་སུ་ཞིག་འགྲིག་གི་ཡོད་མེད་ཀྱང་བཤད་དཀའ་སྟེ། རང་དབང་ལག་དེབ་ནི་བོད་རང་དབང་སླར་གསོའི་ལས་དོན་ལ་ཤིན་ཏུ་གལ་ཆེ་བའི་བོད་མི་ཚོའི་ཁྲིམས་མཐུན་གྱི་ཡིག་ཆ་ཞིག་ཡིན་ནའང་བོད་མི་ཚོས་ཕྱི་རྒྱལ་ལ་འགྲོ་བའི་ཆེད་བློ་ཡུལ་དུ་མི་ཤོངས་རྫུན་བཟོ་བྱེད་བཞིན་པ་དང། བོད་གཞུང་གི་དེའི་འགོག་ཐབས་སུ་ཁྲིམས་ལྟར་ལག་བསྟར་བྱེད་སྐབས་མི་མང་པོས་རང་དོན་ཆེད་དུ་བོད་གཞུང་གི་ལས་བྱེད་ཚོར་འཇིག་སྐུལ་དང་། སྙད་འདོགས། འུར་སྒྲོགས། གཅར་རྡུང་བྱས་པ་ལྟ་བུ་རེད། དེ་མི་ཚད་དཔལ་འབྱོར་ལས་ཁུངས་བཀའ་བློན་ལ་གཅར་རྡུང་བྱེད་ཉེར་ཡོད་དུས་མི་འགའ་ཤས་ཀྱིས་མཐོང་སྟེ་འགག་འགོག་བྱས་པ་ལྟ་བུ་རེད། གཞུང་གི་ལས་བྱེད་ཚོས་མི་མང་ལ་ཁྲིམས་དང་སྒྲིག་གཞི་ལག་བསྟར་བྱེད་སྐབས་རང་དོན་དང་འགལ་བ་ཞིག་ཡིན་ཚེ་ཐབས་བརྒྱ་ཇུས་སྟོང་གི་བོད་གཞུང་ལ་སྐུར་འདེབས་བྱེད་ཞོར་སོ་སོ་རང་ཉིད་ནི་མང་གཙོ་བསམ་མཁན་དང་། སྤྱི་ཚོགས་བསམ་མཁན། ཆབ་སྲིད་རིག་པར་མཁས་མདོག་སྟོན་པ་རེད། ད་སྐབས་ང་ཚོར་བོད་གཞུང་མང་གཙོ་ཇི་འདྲ་ཡིན་མིན་གྱི་དཀའ་ངལ་དེ་མིན་པར་མི་སྐོར་ཞིག་གིས་བོད་གཞུང་ལ་གཏིང་ནས་གནག་བསམ་པ་རེད། ཁོ་བ་ཚོས་བོད་ཀྱི་ཆེད་དུ་ལས་ཀ་ཅི་ཞིག་བྱས་པ་དང་བྱེད་བཞིན་ཡོད་མེད་ལ་བལྟས་ན། མང་ཆེ་ཤོས་ནི་ཉིན་མ་བསྐྱལ་མཁན་དང། དུས་ཚོད་སྐར་ཆ་ཙམ་ལ་རང་ཉིད་ལ་ཞུ་དག་མི་བྱེད་པར་ཉིན་མཚན་དུས་དྲུག་ཏུ་བོད་གཞུང་ལ་སྙད་འདོགས་ཅི་ཞིག་བྱེད་མིན་ལ་བསམ་བློ་བཞི་གསུམ་བཅུ་གཉིས་དང་བློ་རྩེ་ཉི་ཤུ་རྩ་གཅིག་བཏང་སྟེ་འཆལ་གཏམ་སྒྲོག་པ་རེད། དངོས་གནས་ཕན་བསམ་ན་བཤད་སྟངས་དེ་འདྲ་ཞིག་མ་ཡིན་པར་དུས་ཚོད་དང་ནུས་པ་བཏང་ནས་ཞིབ་འཇུག་ལེགས་པོ་ཞིག་བྱས་རྗེས་བཤད་ན་དོན་ལ་གནད་པ་རེད།
རང་བཙན་ལག་དེབ་ཀྱི་དུས་ཡུན་ཕྱིར་འགྱངས་ཆེད་བདེ་སྲུང་ལས་ཁུངས་སུ་འགྲོ་དགོས་པ་འདྲ།
ངའི་ཅི་ཡང་མི་ཤེས་མོད། དེས་སྐོར་བཤད་མཁན་ཡང་མི་འདུག གང་ལྟར་རང་བཙན་ལག་དེབ་གྱི་ཐོ་འགོད་བྱེད་བཞིན་པ་གོ་བ་དང་དེ་གར་ཐོ་འགོད་བྱེད་སེར་འགྲོ་གིན་ཡོད། ལོ་ལྔ་རེ་དུས་འགྱངས་དགོས་ཟེར་བ་གོ་ཐོས་བྱུང་།འོན་ཀྱང་ལོ་རེ་རེའི་ནང་ལ་ཡང་དཔྱ་ཁྲལ་རེ་འབུལ་དགོས་ཀྱིན་འདུག་གཱ། དཔྱ་ཁྲལ་འབུལ་སྐབས་ཀྱི་སྒོར་གྱི་ཚད་ཀྱང་མི་འདྲ་བ་རེ་ཡོང་གིནའདུག་ དེ་དག་གང་འདྲ་ཡིན་ངའི་མི་ཤེས་ལ་བཤད་མཁན་ཅང་མི་འདུག
གངལྟར་རང་ཉིད་བོད་པ་ཡིན་པ་རྒྱུ་མཚན་དུ་བྱས་ནས་ཐོ་འགོད་བྱེད་རྒྱུ་ལས་གཞན་པའི་རྒྱུ་མཚན་ངའི་མི་ཤེས
དྲ་གྲོགས་ཚོ་འདི་ངའིལེན་པ་ཨེ་ཡིན་ནམ
ཨ་རོགས་དྲ་གྲོགས་ཚོ་བདེ་མོ་ངང་ནས་བཤད་ན་ཡག་ཁི་།
སེམས་ལ་མ་འཛིན་ཞེས་བཅོས་རོགས།
ཁྲ་གླག་སྤྱང་གསུམ་ལགས།
ཁྱོད་ལ་ཕོག་སོང་ན་དགོངས་དག ངས་ཧམ་བཤད་རྒྱག་མཁན་དང་མི་ཤེས་ཤེས་འདོགས་བྱེད་མཁན་དེ་ཚོར་དམིགས་པའི་སྐད་ཆ་དེ་ཚོ་སེམས་ལ་འཛིན།
ཨོ་ཡ་་་
སྐུ་དྲག་ཚོའི་ཕྱོགས་སུ་གཏོགས་པ་འགའ་རེ་ཡོད་པ་སྔོན་ནས་ཚོར་བྱུང་།
དེ་ལྟར་སྐད་ཆ་དྲང་བོར་ཤོད་དང་ཉེས་པ་མེད།
ཡ་ཡ། འཕྲིན་ལས། ངས་ཁྱོད་ཀྱི་རང་བཞིན་ཚང་མ་ཤེས་སོང༌། ཐུགས་ཆེ་གནང་
བོད་མིའི་ལས་དབང་ཟེར་མཁན་ཁོང་ལགས། བཀའ་དྲུང་མི་འགྱུར་རྡོ་རྗེ་ནི་དངོས་གནས་མི་ཡག་པོ་ཞིག་ཡོད། ཁོང་གི་གསུང་མོལ་བཙན་པོ་འདྲ་ཡོད། འོན་ཀྱང་། དོན་ལ་འབབ་དུས་ཁོང་ནི་ཕན་ཐོགས་ཆེ་ཤོས་ཀྱི་མི་ཞིག་ཡིན། མིའི་སྐྱིད་སྡུག་ཤེས་མཁན་ཞིག་ཡིན། ང་ཁོང་ཉིད་ལ་རྒྱུས་མངའ་ཡོད།
རྒྱུས་མ་ལོན་གོང་ལ་སྐྱོན་བརྒྱབ་ན་ཡག་པོ་མ་རེད།
མ་གཞི་ནས་སྐུ་དྲག་གི་བྱེད་སྟངས་ནི་ཁྱེད་ཚོས་བཤད་པ་དེ་འདྲ་མ་རེད། དེ་ཚོའི་རྩེད་མོ་དེ་རྩེས་ཁག་པོ་ཡོད་པ་རེད། ཞལ་འཛུམ་གྱིན་འཛུམ་གྱིན་ཏུ་ཕྱག་ནས་སྟར་ཀ་གཅོག་གི་རེད། ད་ཤེས་སོང་ངམ།
ཁྲ་གླག་སྤྱང་གསུམ་ལགས།
ཁྱེད་ལ་དུས་ཚོད་ཡོད་ཀྱང་ང་ལ་ལམ་སྟོན་དང་སློབ་ཁྲིད་བྱེད་པའི་དུས་ཚོད་མི་འདུག མི་གཞན་ཞིག་གི་འགྲམ་དུ་སྤྱོངས།
དེ་རིང་ང་ལ་དུས་ཚོད་ཏོག་ཙམ་ཡོད། ཁ་བརྡ་འདྲ་བྱས་ན་འགྲིག
རང་བཙན་ལག་དེབ་དུས་འགྱངས་ཀྱང་ལོ་ལྔ་རེའི་མཚམས་སུ་བྱེད་དགོས་པ་དེ་དངོས་གནས་ཤེས་མ་བྱུང༌། ངས་དེབ་གསར་རྙིང་སྤྱོད་པ་ཡིན་ཏེ་ཤེས་མ་བྱུང༌། ག་དུས་འགོ་བཙུགས་པ་རེད། ༢༠༠༥་ལོ་ནས་འགོ་བཙུགས་པ་མིན་འགྲོ། ཉེ་ཆར་སྐུ་ཉིད་རིང་ནུར་གནང་བར་པེབས་འདུ་ག
ཁ་རྡུང་ལ་བཟོད་སེམས་དང་དེའི་གོང་དུ་རང་སྲོག་བློས་གཏོང་ཞེས་པ་གཉིས་དེ་རང་དུ་དོན་འགལ་དུ་སོང་མི་འདུག་གམ་ཟེར། འདི་དོན་ངོ་མ་གོ་རྒྱུ་ཚོར་རྒྱུ་ཅིག་ཀྱང་མི་འདུག སྐད་ཆ་བཤད་མི་ཤེས་ན་བཙན་གྱིས་ཤོད་ཟེར་མཁན་མེད་ཟེར་བ་དེ་རང་ཐོག་ལ་ཕར་གསུང་པར་ཞུ།
བོད་ཀྱི་རང་དབང་རྩོམ་རིགས་སྡེ་ཚན་ཁག་འཇིག་སྐུལ་དྲག་སྤྱོད་རིང་ལུགས་པར་དཔེར་བྱས་པ་མ་རེད། ཨ་རིའི་གཞུང་ལ་ཁ་གཏོང་མཁན་ལ་ཨ་རིའི་གཞུང་གིས་རོགས་པ་བྱེད་ཀྱི་མེད་པའི་དཔེར་བཀོད་པ་རེད། སྐད་ཆ་ཉན་མི་ཤེས་ན་བཙན་གྱིས་ཉན་ཟེར་མཁན་མེད་ཟེར་བ་དེ་རང་ཐོག་ལ་ཕར་གསུང་པར་ཞུ།
CNN ནི་སྒེར་གྱི་ཚོགས་པ་ཞིག་ཡིན་པས་དེ་གཞུང་ཞིག་དང་དཔེར་འགོད་ས་མེད་ཟེར། ཨ་རི་དེ་མང་གཙོ་སྤྱི་ཚོགས་ཡིན་པ་དང༌། cnn དེ་ཡང་མང་གཙོའི་མགྲིན་ཚབ་མ་ལྟ་བུ་ཡིན་ཀྱང༌། ར་རང་ལ་ལངས་ཕྱོགས་རེ་ཡོད་པ་དེ་བྟན་པ་རེད། དཔེ་རྒྱན་ཡག་པོ་སྐུ་ཉིད་ཀྱིས་སྤྱོང་།
ཁྲ་གླག་སྤྱང་གསུམ་ལགས། ཁྱེད་ཀྱང་དཔྱ་ཁྲལ་མ་འཇལ་བར་ཡུན་རིང་སོང་བའི་བོད་རིགས་ཁག་ཅིག་གི་ནང་དུ་གཏོགས་ཡོད་པ་འདྲ། ཁྱོད་ཀྱི་དྲི་བ་དང་པོའི་ལན། ད་ལྟ་རང་བཙན་ལག་དེབ་ཀྱི་དཔྱ་ཁྲལ་འཇལ་བ་གཅིག་པས་མི་ཆོག་ལ། དུས་འགྱངས་ཀྱང་ལོ་ལྔ་རེའི་མཚམས་སུ་བྱེད་དགོས་པ་ཡིན། འདི་ནི་དཔྱ་ཁྲལ་དུས་སུ་འབུལ་མཁན་ང་ལྟ་བུ་ཚང་མས་ཤེས་ངེས་ཡིན།
ཁྱེད་ཀྱི་དོན་ཚན་གཉིས་པར་ ༼ཁྱེད་ནས་ཁ་རྡུང་ཞིག་བཟེད་མི་ནུས་པར་མང་གཙོ་ག་འདྲ་བཤད་དགོས་རེད།༽ ཅེས་བྲིས་འདུག་པ་འདིར་ཁྱེད་ཀྱིས་ཡང་བསྐྱར་ཅིག་གཟིགས་དང་། ཁ་རྡུང་ལ་བཟོད་སེམས་དང་དེའི་གོང་དུ་རང་སྲོག་བློས་གཏོང་ཞེས་པ་གཉིས་དེ་རང་དུ་དོན་འགལ་དུ་སོང་མི་འདུག་གམ། སྐད་ཆ་བཤད་མི་ཤེས་ན་བཙན་གྱིས་ཤོད་ཟེར་མཁན་མེད།
ཁྱེད་ཀྱི་དོན་ཚན་གསུམ་པར། བོད་གཞུང་དང་བོད་ཀྱི་རང་དབང་རྩོམ་རིགས་སྡེ་ཚན་ཁག་ཨ་རི་དང་འཇིག་སྐུལ་དྲག་སྤྱོད་རིང་ལུགས་པར་དཔེར་བྱས་འདུག བོད་རིགས་ན་གཞོན་རྩོམ་པ་པོ་རྣམས་ཀྱིས་བོད་གཞུང་རྩ་མེད་གཏོང་བར་འབེད་པ་བྱེད་ཀྱིན་ཡོད་རེད་ཟེར་གྱི་ཡོད་དམ།
CNN ནི་སྒེར་གྱི་ཚོགས་པ་ཞིག་ཡིན་པས་དེ་གཞུང་ཞིག་དང་དཔེར་འགོད་ས་མེད། དཔེ་རྒྱན་ཡག་པོ་སྤྱོང་།
མདོར་བསྡུས་ཏེ་བཤད་ན། མཆན་འབྲི་མཁན་ཚོའི་ནང་དུ་ཁ་རྒྱགས་པ་ལས་དམངས་དང་གཞུང་ཤེས་མཁན་ཞིག་ཀྱང་མི་འདུག
མ་ཤེས་པ་མ་གཏོགས་བོད་སྐད་བཤད་དང་བོད་ལ་དུང་བ་ཡོད་འདོགས་བྱེད་མཁན་འདི་ཚོའི་ནང་དུ་རང་བཙན་ལག་དེབ་ཀྱི་དཔྱ་ཁྲལ་ཙང་ཡང་འཇལ་གི་མེད་མཁན་མང་ས་རེད། དཔྱ་ཁྲལ་འཇལ་གི་མེད་ན་སྐད་ཆ་མང་པོ་མ་བཤད་གཏོགས་ཞབས་འདྲེན་ཞུ་བཞིན་འདུག
ཁ་རྒྱག་པ་བཤད་པ་མིན། ངས་གྲོགས་པོ་འདིའི་རྩོམ་ཡིག་གི་དོན་སྐྱོན་དང་ཚིག་སྐྱོན་རེ་རེ་བྱས་ནས་བཤད་གི་མེད། མཆན་འདེབས་མཁན་ཚོ་ཡང་དེ་དང་གཅིག་པ་ཡིན། དཔེར་ན། དམངས་གཙོ་ཚད་ལྡན་ཞེས་པ་འདིའི་ཚད་འཛིན་ཤེས་མཁན་དང་། དམངས་གཙོའི་རྩ་དོན་ཞེས་པ་འདི་ཚོ་གཅིག་གཅིག་གཉིས་གཉིས་བྱས་ནས་བཤད་ཐུབ་མཁན་ཡོད་ན་བགྲོ་གླེང་འདི་མཇུག་སྐྱོང་ཆོག དེ་མེད་ན་འུར་ཟུག་མ་བྱེད་རོགས་ཞུ་རྒྱུ་ཡིན།
ཁྲ་གླག་སྤྱང་གསུམ་གྱི་སྐད་ཆར་རྒྱབ་སྐྱོར་ཡོད།
སྐད་ཅ་འདི་ལ་རྒྱུ་མཚན་ཞིག་འདུག ཁྱེད་ཀྱིས་རང་བཙན་ལག་དེབ་བདེ་སྲུང་ནང་ག་རེ་བྱེད་ས་ཁུར་ཡིན་ནམ།
བོད་གཞུང་ལ་ནོར་འཁྲུལ་ཅན་གྱི་བྱ་བཞག་ལ་སྐྱོན་བརྗོད་བྱས་ཚེ་ངོ་ལོག་བྱེད་ཀྱིན་པའི་སྙོན་འཛུགས་ཀྱིས་ཁ་གཅོད་ཐབས་བྱེད་ཀྱི་འདུག་ན། དེ་ལ་གདོང་ལེན་བྱེད་ཕོད་པའི་སྙིང་སྟོབས་དགོས་པ་རེད། མི་གཞན་དག་གིས་མང་གཙོ་ལ་སྲོག་གི་འགྲོ་སོང་གཏོང་གི་ཡོད་རེད། ཁྱེད་ནས་ཁ་རྡུང་ཞིག་བཟེད་མི་ནུས་པར་མང་གཙོ་ག་འདྲ་བཤད་དགོས་རེད།
བོད་གཞུང་ལ་སྐྱོན་བརྗོད་བྱེད་ཀྱིན་ཡོད་ན་རོགས་དངུལ་ཡོད་པ་མ་རེད་ཅེས་བཤད་འདུག་ཟེར། དེ་བདེན་པ་ཡིན་སྲིད། ཨ་རིའི་རོགས་དངུལ་གྱིས་གཙུགས་པའི་ཨ་རབ་སྐད་ཀྱི་རླུང་འཕྲིན་ནས་སྦན་ལ་ཊིན་གྱི་མི་སྣར་བཅར་འདྲི་མང་པོ་བྱས་རྐྱེན་རོགས་དངུལ་བཅད་པ་རེད། རྒྱུ་མཚན་ནི། ཨ་རིའི་དངུལ་དེ་ཚོ་སྦན་ལ་ཊིན་གྱི་ཁྱབ་བསྒྲགས་བྱེད་སའི་གླེང་སྟེགས་བསྐྲུན་ན་མི་འགྲིག་ཟེར་བ་དེ་རེད།
དེ་ག་ནང་བཞིན་ཉེ་ཆར་cnn གྱི་གསར་འགོད་པ་ཞིག་གིས་ཁ་ཆེ་འཇིགས་སྐུལ་བའི་བླ་མ་ཞིག་ལ་དད་མོས་ཡོད་པར་བཤད་པས་མོ་རང་ལམ་སང་ལས་ཁུངས་ནས་ཕུད་པ་རེད།
ཇི་ཙང་། རྩོམ་ཡིག་དེས་མང་གཙོ་མ་ཤེས་པ་དེ་ཚོ་མགོ་བོ་རྨོངས་པའི་ཉེན་ཁ་མཐོང་ནས་ཟུར་ཙམ་བཤད་པ་ཡིན།
འཕྲིན་ལས་ལགས། རེད། ད་བར་དུ་ཚད་ལྡན་གྱི་དམངས་གཙོ་ལམ་ལུགས་ཞིག་ང་ཚོའི་མི་རིགས་ལ་བྱུང་མེད་པ་མ་མཁྱེན་པ་སུ་ཡོད། འོན་ཀྱང་དམངས་གཙོ་ཚད་ལྡན་ཞིག་བྱུང་མ་ཐུབ་པའི་གཞི་རྩ་དེ་ང་ཚོས་ངེས་པར་དུ་ཤེས་ཐུབ་པ་བྱེད་དགོས། གཞི་རྩ་གཙོ་བོ་གཅིག་ང་ཚོ་དམངས་ཀྱིས་དམངས་གཙོའི་ཁེར་དབང་ལ་ཡོངས་སུ་ལོངས་སྤྱོད་མ་ཐུབ་པ་ཡེ་ཤེས་ཀྱི་སྤྱན་ལ་ཡིད་ཆེས་བྱས་པའི་རྐྱེན་གྱིས་རེད། བོད་ཀྱི་ལུང་པ་དེ་ཆོས་ལྡན་གྱི་ལུང་པ་ཞིག་སོང། མཚན་ཉིད་ཚང་ལ་མ་ཚང་བའི་དམངས་གཙོའི་ལམ་ལུགས་འདི་ང་ཚོའི་བོད་ལ་འཚམ་པོ་ཡོད་རེད། འཕྲིན་ལས་ལགས་ཀྱི་གསུངས་པ་ལྟར་བོད་གཞུང་གི་ལས་ཀྱི་སྣེ་མོ་བ་ཐམས་ཅད་སྐུ་དྲག་གི་བརྗིད་ཉམས་སྟོན་གང་ཐུབ་བྱེད་མཁན་ག་ལ་ཡིན། སྙིང་སྟོབས་དང་ཤ་ཞེན་ཅན་གྱི་ལས་བྱེད་མང་པོ་ཡོད་པ་དེ་གསལ་པོ་རེད། བྱས་ཙམ་དམངས་གཙོ་ཚད་ལྡན་ཞིག་མ་བྱུང་བ་དེ་སྐུ་ངོ་ཚོ་འབའ་ཞིག་ག་ལ་ཡིན། ང་ཚོ་དམངས་ལ་ཡང་ལེན་པ་ཡོད་རེད།
སྐྱག་རྫུན་རྐྱང་རྐྱང་རེད། རྫུན་ཡག་པོ་ཞིག་ཡང་གཏམ་ཤེས་མི་འདུག
ཁྱེད་ནས་་་་་་་་་་་་། ཉེ་བའི་བདུན་ཕྲག་འགའི་སྔོན་དུ་ང་རང་གི་རང་བཙན་ལག་དེབ་ཀྱི་དུས་ཡུན་ཕྱིར་འགྱངས་བྱེད་དགོས་པར་བརྟེན། བདེ་སྲུང་ལས་ཁུངས་སུ་སོང་སྟེ་དྲུང་ཡིག་ག་གེ་མོ་ཞིག་གི་འགྲམ་དུ་བཅར་བ་ཡིན།
༡ རང་བཙན་ལག་དེབ་ལ་དུས་ཡུན་ཕྱིར་འགྱངས་བྱེད་རྒྱུ་ཞིག་ཨེ་ཡོད།ཤོག་ངོས་ཚར་སོང་ན་གསར་བ་ལེན་ཡ་རེད།
༢ རང་བཙན་ལག་དེབ་་་བདེ་སྲུང་ལས་ཁུངས་ལ་འབྲེལ་བ་ཨེ་ཡོད། རང་བཙན་ལག་དེབ་རང་བཙན་ཚོགས་ཆུང་ལ་འགྲོ་དགོས་བ་རེད་ལོ།
ཁྱེད་རང་ཚོས་མཐོང་ཡོད་སྲིད། ཉེ་ལམ་དེང་དུས་དམངས་གཙོའི་ཨ་མར་གྲགས་པའི་དབྱིན་ཡུལ་ཀྱི་འོས་བསྡུ་ཆེ་མོ་སྐབས་སུ་སྲིད་བློན་ Golden Brown བུད་མེད་དཀྱུས་མ་ཞིག་དང་མཉམ་དུ་ཁ་རྩོད་ཅང་ཙམ་ཤོར་བའི་རྗེས་སུ་སྲིད་བློན་གྱིས་ཨུ་ཚུགས་ཚ་ལ་ཞེས་བཤད་པའི་ཚིག་འབྲུ་དེས་ཁོང་དངོས་སུ་མོ་རང་ཡོད་སར་སོང་སྟེ་དགོངས་དག་ཞུ་དགོས་བྱུང་བ་རེད། ཨ་རིའི་སྲིད་འཛིན་ཨོ་བྷ་མ་འདེམས་པའི་སྐབས་སུ་ཡང་དོན་དག་དེ་འདྲ་ཞིག་བྱུང་བ་རེད། དེ་ཚོ་ཚང་མ་འདིར་བཤད་པའི་དགོས་པ་མེད་ཀྱང་དམངས་གཙོ་ཞེས་པའི་ཆབ་སྲིད་ལས་ལུགས་འདིས་ལས་ཀ་ཇི་ལྟར་བྱེད་ཀྱིན་ཡོད་པ་ཤེས་པར་བྱས་ཏེ་གླེང་སློང་རོགས། དེ་མིན་ཨུ་ཚུགས་ཀྱིས་གང་ཡང་འགྲུབ་མི་སྲིད།
ངས་འདིར་དམངས་གཙོ་ཞིག་ལ་མེད་དུ་མི་རུང་བའི་ཕྱོགས་གཉིས་ཀྱི་གུས་ཞབས་mutual respect དང་དམངས་གཙོའི་རྩ་འཛིན་ principles of democracy བཤད་ཀྱིན་ཡོད་པ་ལས། སྔར་སྲོལ་གྱི་དཔོན་གཡོག་གི་ཉོག་གཏམ་བཤད་ཀྱིན་མེད།
མཐུ་སྟོབས་ལགས།
ངས་བལྟས་ན་སྲོལ་རྒྱུན་གྱི་གུས་ཞབས་བྱེད་སྟངས་མང་པོ་ཞིག་སྐུ་དྲག་དེ་ཚོའི་འགྲོ་སྟངས་ཤིག་མི་འགྲོ།
དམངས་གཙོ་ཡོད་མེད་ཀྱི་སྐད་ཆ་མ་རེད། མི་སྒེར་བ་སོ་སོའི་བྱ་སྤྱོད་དང་རྣམ་འགྱུར་ཡག་པོ་ཡོད་མེད་ཡིན་ས་རེད། འདིའི་ཐད་ནས་ཕྱོགས་གཉིས་ཀར་ལྟ་དགོས་པ་གལ་ཆེན་པོ་རེད།
དཔེར་ན། གཤམ་དུ་མཐུ་སྟོབས་ཀྱིས་བཤད་པ་བཞིན། མི་རེ་ཟུང་གི་ཆ་ལུགས་དེ་གཞུང་གི་ལས་བྱེད་ཚོའི་སྣང་བར་མ་སོང་ནས་ག་རེ་བཤད་དགོས་ཀྱང་མ་ཤེས་པར་རྣམ་འགྱུར་དེ་བསྟན་པ་ཡིན་སྲིད།
ཁོང་ཚོའི་རྣམ་འགྱུར་དེ་མཐོང་རྗེས་འཕྲིན་ལས་དང་མི་གཞན་པ་དག་གིས་བཙན་བྱོལ་བོད་གཞུང་གི་རྐུབ་སྟེགས་སྟེང་ན་མི་རྒྱག་པ། ཁ་རྒྱག་པ། དབང་ཤེད་ཚ་བོ་དེ་འདྲ་འདུག་སྙམ་གྱི་ཡོད་པ་རེད།
སྤྱིར་བཏང་བོད་གཞུང་གི་ལས་བྱེད་ཚང་མ་མིན་ཡང་། འགའ་རེ་ཞིག་གི་རྣམ་འགྱུར་ཡག་པོ་མེད་པ་དེ་བདེན་པ་རེད། དེ་ལ་ཡར་རྒྱས་རེ་བཏང་ན་འགྲིག་གི་རེད། ལས་བྱེད་ཚོགས་འདུའི་སྐབས་དེ་དོན་གསལ་བོ་དག་པོ་བྱས་ནས་བཤད། གོང་ནས་གང་བཤད་པ་དེར་ལས་བྱེད་སོ་སོས་དོ་སྣང་དང་གཟབ་ནན་བྱས་ན་འགྲིག་སོང་བ་རེད།
ངའི་དོ་སྣང་ནོར་མེད་ན། དེང་སྐབས་བོད་ནས་ཡོང་མཁན་གཞོན་སྐྱེས་འདི་ཚོ་ཡང་ཨུ་ཚུགས་ཚ་བོ་དང་། རང་གཤིས་གྱོང་པོ། མགོ་ཚོས་མི་ཚོས་གང་ལ་ཡང་སྐེ་བསྲིང་ཡོང་བ། རང་རློམ་ཆེན་པོ། སྤྱོད་པ་ལད་པོ་དེ་འདྲ་ཡོང་གི་འདུག་ལ། ཁོང་ཚོའི་གྲངས་འབོར་ཇེ་མཐོར་སོང་བ་དང་མཉམ་དུ་གཞུང་ཞབས་ལས་བྱེད་ཚོར་ཡང་མཛད་དཀའ་བཟོ་གི་ཡོད་པ་འདྲ། དེ་འདྲ་ཡིན་ན་ཡག་པོ་མ་རེད།
སྤྱི་ཚོགས་ཤིག་ཡིན་དུས་འགྲོ་ཤེས་འདུག་ཤེས་དང་། སྐད་ཆ་བཤད་མཁས་པོ། རྣམ་འགྱུར་ ཕུལ་དུ་བྱུང་བ་དེ་འདྲ་ཞིག་ཁྱེར་ནས་འགྲོ་དགོས་པ་རེད། གླེན་ཤེད་འགྲན་རེས་བྱས་ན་བྱབ་ཆུང་རེད།
བོད་པ་ཚོར་རྣམ་འགྱུར་གྱི་ཕྱོགས་ནས་ཞན་པོ་རེད། རྣམ་འགྱུར་ནི་མགོ་དཔོན་པོ་ནས་འབངས་མི་སེར། ཐ་ན་ཤེས་ཡོན་པ་ཚོར་ཡང་རྣམ་འགྱུར་ལེགས་པོ་མི་འདུག འདི་ལ་སྦྱོང་བ་བྱེད་རྒྱུ་ཡོད་པ་རེད།
གནས་སྐབས་འདི་ཙམ་ཡིན།
འཕྲིན་ལས་ལགས། དེ་འདྲ་རང་ད་ཨེ་ཡིན། སྤོ་ལངས་ནས་རྩོམ་འབྲི་མི་ཉན་ཡ། ཁྱེད་ཀྱིས་ཕལ་ཆེར་རང་བཙན་དཔྱ་དངུལ་ཙམ་ཡང་འབུལ་གྱི་མེད་པ་འདྲ།
དོན་དངོས་དང་མཐུན་པའི་རྩོམ་ཡིག་ཡག་པོ་བྲིས་འདུག ང་ཡང་སྔོན་ཆད་དེ་ལྟར་དཀའ་ངལ་འཕྲད་སོང༌། སྐབས་ཤིག་བཀའ་ཤག་ནང་ལས་དོན་ཞིག་གི་ཆེད་ཕྱིན་པ་ཡིན་པས། བཀའ་དྲུང་མི་འགྱུར་རྡོ་རྗེས་ཟེར་བ་ཐུགས་སོང༌། དང་པོ་ཁོ་དཔོན་ཉམས་དང་རྫིག་མདོག་བྱས་ཏེ་ཁ་མར་སྐོར་ནས་ལྟ་ཙམ་བྱེད་ཀྱི་མི་འདུག་ རྗེས་ནས་མར་ཁ་སྐོར་སོང་ཡང༌། མཐུང་ཆུང་དང་གཤེ་གཤེ་འདྲ་པོ་བཏང་སོང༌། ངའི་དྲི་བ་ཁག་ལ་ལན་གསལ་པོ་ཞིག་རག་མ་སོང༌། ཕྱིར་ལོག་ཡོང་དགོས་ཁེལ་སོང༌། ཁོ་ཚོ་ནི་དཔོན་དང་ང་ཚོ་འབངས་མི་སེར་ཡིན་དུས་དེ་གཉིས་བར་ད་དུང་ཧེ་བག་ཡང་ཆེན་པོ་ཤོར་ཡོད་དུས་བྱེད་ས་འདི་ས་གང་ཡང་མེད་པ་རེད།
འཕྲིན་ལས་རྒྱ་མཚོ་ལགས་ང་ཚོ་མང་གཙོ་དང་ཐག་ཉེ་ཡོད་པ་ལས་ཉག་རིང་བ་མ་རེད། ཐག་ཉེ་བ་ཡོད་པ་ལས་ཁྱེད་རང་ཁ་བདེ་པོ་བྱས་ཏེ་གཞི་མེད་ཀྱི་སྐྱོན་འཛུགས་འདི་ལྟ་བུ་བྱ་ཐུབ་ཀྱི་ཡོད། བཙན་བྱོལ་སྤྱི་ཚོགས་ནང་མང་གཙོའི་རང་དབང་ཆེ་དྲག་སྟེ་རང་དབང་ལྡན་པའི་ཐོག་གསར་འགྱུར་འགོད་ལེན་བྱ་ཆོག་པ་མ་ཟད། ད་ལྟ་ཁྱེད་རང་ནས་བསམ་ཚུལ་བརྗོད་ཡུལ་ཡོད་པའི་བོད་ཀྱི་དུས་བབས་ཀྱི་སྡིངས་ཆ་དེའང་བཙན་བྱོལ་སྤྱི་ཚོགས་ཀྱི་མང་གཙོའི་གྲུབ་ཆའི་ནང་གསར་འགོད་རང་དབང་དང་མི་མང་གི་སྨྲ་བརྗོད་རང་དབང་ནང་གསལ་ཡོད་པའི་རང་དབང་བེད་སྤྱོད་བྱ་བཞིན་པ་འདི་ཡིན། བོད་གཞུང་གི་ལས་ཁུངས་ལ་བཅར་དང་རྒྱ་གར་ལས་ཁུངས་ལ་བཅར་ན་སྟབས་བདེ་བ་ཡོད་པ་དེ་རྟག་ཏུ་ལས་ཁུངས་སུ་བཅར་མཁན་དེ་དག་གིས་གང་ཞིག་སྟབས་བདེ་བ་ཡོད་མེད་གསལ་པོ་ཤེས་ཀྱི་རེད། དོན་ངོ་མའི་ཐོག་ཁྱོད་རང་ལས་ཁུངས་ནང་འཛུལ་སྐབས་བོད་མིའི་སྲོལ་རྒྱུན་གྱི་གུས་ཞབས་དང་གང་ཡང་མེད་པར་གྱོན་པ་ཡ་མ་ཟུང་ཞིག་གྱོན་ནས་ཡོང་ཡོད་ཀྱི་རེད། དེ་མིན་ཁྱོད་ལ་སྐྱོན་གཞན་ཞིག་ཡོད་སྲིད་པ་ལས། དེ་མིན་ནོར་འཁྲུལ་དེ་བོད་གཞུང་གི་གཞུང་ཞབས་པའི་ཁྲོད་དུ་དེ་ཙམ་ཆེན་པོ་ཡོད་མ་སྲིད་པ་ཞིག་རེད། བཙན་བྱོལ་སྤྱི་ཚོགས་ལ་མང་གཙོ་མི་འདུག་ཅེས་རྒྱ་མིས་ཉིན་ལྟར་དཀྲོག་གཏམ་སྤེལ་བཞིན་ཡོད་རེད། དེས་ཁྱེད་ལ་བསླབ་བྱ་ཐེབས་ཡོད་ཚེ་ཐབས་སྐྱོ་པོ་ཞིག་རེད། ཁྱེད་རང་གི་བཤད་པར་མང་གཙོ་མི་མཁོ་ལ་ཤེས་འཇོན་མི་མཁོ་ཚེ་བཙན་བྱོལ་སྤྱི་ཚོགས་ནང་ཉིན་མ་གང་འཁྱོལ་གྱི་དུས་ཚོད་འབུད་ནས་སྤྱི་ཚོགས་ནང་གཞི་མེད་ཀྱི་དཀྲོག་གཏམ་ཁོ་ན་བཟོ་མཁན་དེ་དག་ནི་བཙན་བྱོལ་སྤྱི་ཚོགས་ཀྱི་མང་གཙོའི་རང་དབང་བེད་སྤྱོད་ལོག་པར་བཏང་སྟེ་གཞུང་མང་དབྱེན་དཀྲུག་བྱ་མཁན་གྱི་བྱེད་གཏེ་ཞིག་ཡིན་པ་ཧ་ཅང་གསལ་པོ་རེད།