གཞིས་ལུས་མི་དམངས་རྒྱ་ནག་འོག་འདུག་མ་འདོད་པའི་སྐད་ཆ་མ་རེད། འདུག་མ་ཐུབ་པར་རང་བཙན་གྱི་དོན་དུ་ཉིན་རེ་བཞིན་སྲོག་གི་འགྲོ་གྲོན་གཏོང་གི་ཡོད། དེ་བཙན་བྱོལ་གཞུང་གིས་ངོས་ལེན་གནང་གི་མི་འདུག འདི་འགྲིག་གི་མི་འདུག་ཟེར་ནས་སྐད་བརྒྱབ་སྐབས། གཞུང་གིས་མང་མོས་འོས་བསྡུ་ཡིན་ཟེར་ནས་བཙན་བྱོལ་ནང་གི་མི་འབུམ་གཅིག་ཙམ་ལ་འོས་བསྡུས་པ་རེད། ས་ཡ་བཞི་ལྔ་ཞིག་བོད་ནང་ལྷག་བསྡད་ཡོད། བཙན་བྱོལ་ནང་གི་མི་འབུམ་གཅིག་མང་མོས་ཆགས་ཀྱི་ཡོད་དམ། བྱེད་སྟངས་འདི་ཁྲིམས་འགལ་ཡིན་ཟེར་ནས་ངས་བཤད་མྱོང་ཡོད་ཟེར།
ཁ་སང་ཕྱི་ཚེས་ ༡༧ ཉིན་འོད་དཀར་དྲ་ཚིགས་ཀྱི་གོ་སྒྲིག་འོག ངྷ་ས་བྷག་སོའུ་ཚོགས་ཁང་དུ་༼ བོད་གཞིས་བྱེས་གཉིས་ཀྱི་བར་ཐག་དང་སྙིང་སྟོབས ༽ ཞེས་པའི་བརྗོད་གཞིའི་ཐོག བཞུགས་སྒར་ཁུལ་གྱི་ཤེས་ལྡན་མི་སྣ་སྐོར་ཞིག་འཛོམས་ཏེ་གཏམ་གླེང་ཚོགས་འདུ་ཞིག་ཚོགས་ཡོད། ཚོགས་འདུ་དེར་བོད་མི་མང་སྤྱི་འཐུས་དང་མཐོ་སློབ་ཀྱི་དགེ་རྒན། གཞུང་འབྲེལ་མིན་པའི་ཚོགས་པ་ཁག་གི་ཉམས་ཞིབ་པ། གསར་ཁང་གི་ཁག་རྩོམ་སྒྲིག་པ་དང་གསར་འགོད་པ། དེ་བཞིན་རང་དབང་གི་ཉམས་ཞིབ་པ་དང་རྩོམ་པ་པོ་སོགས་མི་ ༤༠ ཙམ་ལྷན་འཛོམས་བྱུང་ཡོད། ཐེངས་འདིའི་གཏམ་གླེང་ཚོགས་འདུ་དེར་ནང་དོན་དང་རྣམ་པ་གཉིས་ཐད་ནས་ཅུང་གསར་གཏོད་ཀྱི་སྣང་ཚུལ་ཞིག་མངོན་ཡོད། གཏམ་བཤད་པ་དང་ཟུར་ཉན་པ་སོ་སོར་མེད་པ་མ་ཟད། གཏམ་གླེང་དངོས་གཞིའི་སྐབས་སུའང་གོ་རིམ་ལ་མཐོ་དམན་དང་། བརྗོད་གཞི་ལ་ཚད་བཀག་མེད་པར་སྐུ་མགྲོན་ཉི་ཤུ་ལྷག་གིས་གཏམ་བཤད་ཀྱི་ཆ་ཤས་བླངས་ཏེ་ཉིན་གུང་ནས་ཕྱི་དྲོ་བར་གྱི་ཆུ་ཚོད་ ༥ རིང་། སྤྱི་ཚོགས་ཀྱི་ངོས་དང་ཟུར་སོ་སོ་ནས་བོད་གཞིས་བྱེས་གཉིས་ཀྱི་བར་ཐག་དང་སྙིང་སྟོབས་སྐོར་ལ་དཔྱད་གླེང་བྱས་ཡོད།
གཏམ་གླེང་གི་ཐོག་མར་ཚོགས་འདུ་གཙོ་སྐྱོང་བ་བླ་མ་ཤིང་བཟའ་ཚང་གིས་ཚོགས་འདུ་ངོ་སྤྲོད་གནང་དོན། ཉེ་བའི་དུས་སུ་བོད་ནང་གི་རྩོམ་པ་པོ་ཞོགས་དུང་རྒྱ་གཞུང་གིས་འཛིན་བཟུང་བྱས་ཡོད་ལ། ཉིན་འགའི་སྔོན་ལ་ཡང་བསྐྱར་གཉན་འཛིན་བཟུང་བྱས་སོང་། བོད་ནང་དུ་རྩ་དོན་ཐོག་ལས་ཀ་ག་འདྲ་ཞིག་བྱས་ཀྱང་ཚེ་སྲོག་ལ་འབྲེལ་ཆགས་ཡོང་གི་འདུག འོན་ཀྱང་། ང་ཚོས་དྲ་ཐོག་ནས་ལས་ཀ་བྱས་ཏེ་བོད་ནང་འབྲེལ་བ་བྱེད་སྐབས། བོད་ནང་གི་མི་ཚོས་ཅུང་ཐུགས་ཕམ་གནང་གི་འདུག ང་ཚོས་གང་ཐུབ་ཀྱིས་ལས་དོན་སྒྲུབ་ཀྱི་ཡོད། ཁྱེད་ཚོར་ཕྱི་ལོགས་སུ་གྲགས་འགུལ་གཅིག་ཀྱང་མི་འདུག་ཟེར་གྱི་འདུག བོད་ནང་གི་ཤེས་ལྡན་མི་སྣའི་ཁྲོད་བསམ་ཚུལ་འདི་འདྲ་སླེབས་ཡོང་སྐབས་སོ་སོར་སེམས་འཚབ་ཅིག་ཡོང་གིན་འདུག བོད་གཞིས་བྱེས་གཉིས་ཀྱི་བར་ཐག་ཇེ་རིང་དུ་འགྲོ་རྒྱུའི་ཉེན་ཁ་ཞིག་མཐོང་གི་འདུག བཙན་བྱོལ་བོད་གཞུང་གི་ངོས་ནས་བོད་ནང་གི་སྙིང་སྟོབས་ཅན་དེ་དག་གི་ཆེད་དུ་ཕྱག་ལས་ག་རེ་གནང་གི་ཡོད་མེད་ལ་ཐེ་ཚོམ་ཡོང་གི་འདུག དེང་སྐབས་བོད་ནང་རྩོམ་ཡིག་ཚིག་རྐང་རེ་ཟུང་འབྲི་རྒྱུར་ཡང་དཀའ་ངལ་འཕྲད་བཞིན་འདུག སྙན་རྩོམ་མཁྲེགས་པོ་དེ་འདྲ་བྲིས་ན། རྒྱ་གཞུང་གིས་འདིའི་བརྗོད་བྱ་ག་རེ་ཡིན་ཟེར་ནས་ཚ་འདྲི་བྱེད་ཀྱིན་འདུག ང་རང་ལ་མཚོན་ན། བཙན་བྱོལ་དུ་སླེབས་ཏེ་ད་ལྟའི་བར་བློ་ཕམ་མང་པོ་བྱུང་སོང་། འོན་ཀྱང། ལས་ཀ་མཚམས་མ་བཞག་པར་འགྲོ་བསྡད་པ་འདི་བོད་ནང་གི་སྙིང་སྟོབས་ལ་ངོ་མ་ཆོད་པ་ཡིན། ཉེན་ཆར་ཞིག་ནས “བཙན་བྱོལ་བོད་གཞུང” ཟེར་བའི་ཚིག་དེ་ཡང་བེད་སྤྱོད་གཏོང་མ་ཐུབ་པར “བཙན་བྱོལ་སྒྲིག་འཛུགས” ཟེར་བ་ཞིག་བཀའ་ཤག་གིས་ལབ་ཀྱི་འདུག འདི་དག་མཐོང་ཡོང་སྐབས། ད་ནི་ས་འདི་ཞིག་ནས་བསྡད་ན་ཕན་ཐོགས་མི་འདུག སོ་སོའི་ལྟོ་གོས་དོན་དུ་གཉེར་ཏེ་ཕྱིན་ཡང་ཁུངས་འཁྱོལ་འགྲོ་བ་རེད་སྙམ་པའང་དྲན་མྱོང་། ཞེ་གསུངས་སོང་།
སྐབས་དེར་རང་བཙན་འཐབ་རྩོད་པ་ལྷ་བཟང་ཚེ་རིང་ལགས་ཀྱིས་གཏམ་བཤད་གནང་དོན། བོད་གཞིས་བྱེས་གཉིས་ཀྱི་བར་ཐག་དང་སྙིང་སྟོབས་ཟེར་བ་འདི་བརྗོད་གཞི་ཆེན་པོ་རེད། སྙིང་སྟོབས་ཟེར་བ་དེ་བོད་གཞིས་གཉིས་ཀར་ཡོད་ཀྱང་། སྙིང་སྟོབས་ལ་ཆེ་ཆུང་ཡོད། སྙིང་སྟོབས་ཆེ་ཆུང་གི་དབང་གིས་བོད་གཞིས་བྱེས་གཉིས་ལ་བར་ཐག་ཡོད། འོན་ཀྱང་བར་ཐག་དེ་ལ་ངོས་ལེན་འདུག་གམ། ཐོག་མ་ང་སློབ་གྲྭར་འགྲོ་སྐབས་སྨན་སྦྱོང་བའི་གོ་སྐབས་ཤིག་རག་པ་རེད། ངས་སྨན་ལ་དཔེ་བཞག་སྟེ་སྐད་ཆ་བཤད་ཀྱིན་ཡོད། སྨན་ཡག་ཤོས་གང་རེད་ཟེར་ན། དེ་ལ་ལན་ཡོད་པ་མ་རེད། ན་ཚ་ལ་བལྟས་ཏེ་བཤད་དགོས། སྙིང་རྩ་འགག་བསྡད་ཡོད་ན་གྲིའི་འོག་ལ་འགྲོ་རྒྱུ་དེ་རེད། འདི་ང་གྲི་ལ་དགའ་དྲགས་ཏེ་བཤད་ཀྱི་མེད། དངོས་ཡོད་གནས་ཚུལ་རེད། དེ་བཞིན་ངས་བོད་གཞིས་བྱེས་གཉིས་ལ་བར་ཐག་ཅིག་འདུག་ཟེར་བ་དེ་ཡང་། བོད་གཞུང་གི་དབུ་ཁྲིད་རྣམ་པ་ཚོས་ངོས་ལེན་གནང་གི་མི་འདུག གཞིས་ལུས་མི་དམངས་རྒྱ་ནག་འོག་འདུག་མ་འདོད་པའི་སྐད་ཆ་མ་རེད། འདུག་མ་ཐུབ་པར་རང་བཙན་གྱི་དོན་དུ་ཉིན་རེ་བཞིན་སྲོག་གི་འགྲོ་གྲོན་གཏོང་གི་ཡོད། དེ་བཙན་བྱོལ་གཞུང་གིས་ངོས་ལེན་གནང་གི་མི་འདུག འདི་འགྲིག་གི་མི་འདུག་ཟེར་ནས་སྐད་བརྒྱབ་སྐབས། གཞུང་གིས་མང་མོས་འོས་བསྡུ་ཡིན་ཟེར་ནས་བཙན་བྱོལ་ནང་གི་མི་འབུམ་གཅིག་ཙམ་ལ་འོས་བསྡུས་པ་རེད། ས་ཡ་བཞི་ལྔ་ཞིག་བོད་ནང་ལྷག་བསྡད་ཡོད། བཙན་བྱོལ་ནང་གི་མི་འབུམ་གཅིག་མང་མོས་ཆགས་ཀྱི་ཡོད་དམ། བྱེད་སྟངས་འདི་ཁྲིམས་འགལ་ཡིན་ཟེར་ནས་ངས་བཤད་མྱོང་ཡོད། སྐབས་དེར་ང་གསོད་རྒྱུ་ཡིན་ཟེར་མཁན་འདུག ང་བསད་དེ་རྩ་དོན་ལ་ཕན་ཐོགས་ན་གསོད་རོགས། འོན་ཀྱང་། བཙན་བྱོལ་གཞུང་གི་མང་མོས་འོས་བསྡུ་ཁྲིམས་འགལ་ཡིན། བོད་ནང་སྲོག་གིས་འོས་བླུཊ་ཏེ་རང་བཙན་རྩོད་བཞིན་ཡོད་པ་དེ་ངོས་ལེན་གནང་རོགས། ཞེས་གསུངས་སོང་།
དེའི་རྗེས་བོད་མི་མང་སྤྱི་འཐུས་འབའ་པ་སྐལ་བཟང་རྒྱལ་མཚན་ལགས་ཀྱིས་དོན་ཚན་བཞིའི་ཐོག་ནས་བོད་གཞིས་བྱེས་གཉིས་ཀྱི་བར་ཐག་སྐོར་ལ་གཏམ་བཤད་གནང་དོན། རྒྱ་གཞུང་གི་སྲིད་བྱུས་ནང་བོད་ཕྱི་ནང་གི་འབྲེལ་ཐག་གཅོད་རྒྱུའི་ཐབས་ལམ་མང་པོ་ཡོད། ༡༩༨༩ ལོའི་རྗེས་ལ་རྒྱ་ནག་གི་དམངས་གཙོ་དོན་གཉེར་བ་དང་། སློབ་གྲྭ་ཁག་གི་སློབ་དཔོན་མང་པོ་ཞིག་ཕྱི་ལོགས་སུ་ཕྱིན་ཏེ། རྒྱ་ནག་དམངས་གཙོར་འགྱུར་ཆེད་ལས་ཀ་བྱས་ཀྱང་གྲུབ་འབྲས་ཐོན་མེད། དེ་རྒྱ་གཞུང་གིས་ཕྱི་ཡི་དམངས་གཙོ་དོན་གཉེར་བ་དང་ནང་གི་མི་དམངས་བར་དཀྲུག་ཤིང་བརྒྱབ་སྟེ་རྡོག་རྩ་ཆིག་སྒྲིལ་ཡོང་གི་བཅུག་མེད། སྲིད་བྱུས་དེ་ང་ཚོའི་སྟེང་ལག་བསྟར་བྱེད་ཀྱིན་ཡོད་ཀྱང་གྲུབ་འབྲས་ཐོན་མེད། དེ་ནི་བོད་གཞིས་བྱེས་གཉིས་ནས་བརྩི་བཀུར་བྱེད་པའི་དབུ་ཁྲིད་ཅིག་ཡོད་པས་རེད། དབུ་ཁྲིད་ཁོང་གི་བཀའ་དགོངས་འོག་ང་ཚོ་ཏག་ཏག་འགྲོ་མ་ཐུབ་པ་ཡིན་ན། བོད་གཞིས་བྱེས་གཉིས་ཀྱི་འབྲེལ་ཐག་ལ་ཉེན་ཁ་ཡོད། གཉིས་པ། བོད་ནང་ཞི་རྒོལ་བྱུང་སྐབས་ང་ཚོས་གྲོང་གསེབ་ཚུན་གྱི་གནས་ཚུལ་བསྡུ་ཐུབ་སྟེ་འཛམ་གླིང་ལ་བསྒྲགས་ཡོད། དེ་ནི་༧གོང་ས་མཆོག་ཕུད་པའི་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང་། དགོན་པ་ཆུང་ཆུང་དག་གི་བླ་མ་དང་དགེ་བཤེས་མང་པོ་རྒྱ་གར་དུ་སླེབས་ཡོད་པ་དང་། ཁོང་ཅིག་གིས་དུས་རྒྱུན་བོད་ནང་གི་སོ་སོའི་ལུང་པར་ལྟ་སྐྱོང་དང་ཕན་ཚུན་འབྲེལ་ལམ་རྒྱུན་མ་ཆད་པ་གནང་གིན་ཡོད་པའི་གྲུབ་འབྲས་རེད། བཙན་བྱོལ་ནས་ཁོང་ཅག་ལ་ཕོག་ཐུག་འདྲ་བཏང་བ་ཡིན་ན། དགོན་པ་ཆུང་ཆུང་གི་བླ་མ་ཡིན་ཡང་བོད་ནང་རྗེས་འབྲང་བ་མང་པོ་ཡོད་སྟབས། རྒྱ་ནག་འཐབ་ཕྱོགས་གཅིག་གྱུར་གྱིས་གོ་སྐབས་འདི་འདྲར་བསྒུག་སྟེ་བོད་ཕྱི་ནང་བར་འགལ་བ་བཟོ་བ་རེད། གསུམ་པ། བོད་ཕྱི་ལ་ཕེབས་ཡོད་པ་ཚོས་བོད་ནང་གི་རྒྱ་ནག་འོག་སྡུག་པོ་མྱོང་མཁན་དག་གི་གནས་ཚུལ་དུས་ཐོག་ལ་རྒྱལ་སྤྱིའི་ཐོག་ཁྱབ་བསྒྲགས་ན་ཕན་ཐོགས་ཆེན་པོ་ཡོང་གི་ཡོད། བཞི་པ། བོད་མི་ཚོ་འཐབ་རྩོད་བྱེད་མཁན་གྱི་མི་རིགས་ཤིག་ཡིན་སྟབས། ཨེ་ཤ་ཡ་རང་དབང་རླུང་འཕྲིན་ཁང་གཙོས་པའི་གསར་འགྱུར་བརྒྱུད་ལམ་ཁག་གིས་གཟབ་ནན་བྱ་དགོས། ནང་ཁུལ་གྱི་རྙོག་དྲ་ཆུང་ཚགས་ཤུགས་ཆེན་པོས་ཁྱབ་བསྒྲགས་བྱས་ན། གཞིས་བཞུགས་མི་དམངས་ལ་བློ་ཕམ་ཡོང་གི་རེད། ཅེས་གསུངས་རྗེས་དགེ་བསོད་ནམས་རྒྱལ་མཚན་སོགས་ཀྱིས་རིམ་པ་བཞིན་གཏམ་བཤད་བྱས་ཡོད།
གསར་འགོད་པ། དོན་འགྲུབ་བཀྲ་ཤིས།
ལྷ་བཟང་ཚེ་རིང་གི་ཁ་དེ་ཁྲིམས་འགལ་ཡིན།
བོད་རང་བཙན་ཁ་ན་ཁྱེར། རྒྱ་གར་ལུང་པ་དོར་མ་འདོད་པའི་ཁྱིམ་ཚང་ཁ་ཤས་ཀྱི་རྗེས་སུ་འབྲང་ནས་གོང་ས་མཆཽག་གི་སྟོན་པའི་གཉིས་སྨན་དབུ་མའི་ལམ་ལ་རྒྱབ་ཀྱི་ཕྱོགས་པ་དེ་ཡག་པོ་མ་རེད།
བོད་རང་བཙན་གྱི་ལྟ་བ་ཡིན་ཟེར་སྡོད་ཡ་དེ་རྒྱ་གར་ལུང་པ་་སོགས་དོར་ནས་ཕྱིར་བོད་ལ་ལོག་འདོད་མེད་པའི་རྟགས་རེད། གང་ཡིན་ཟེར་ན་བོད་ཀྱི་གནས་བབ་དང་རྒྱ་ནག་གི་འཁོར་ཡུག་ལ་ལྟོས་པ་ཡིན་ན་བོད་རང་བཙན་ཕལ་ཆེར་ཁག་པོ་རེད། དེ་འདྲ་སོང་ཙམ་ཆབ་སྲིད་ཀྱི་ལམ་ཕྱོགས་ཞིག་ལ་བེད་སྤྱོད་ནས་བོད་རང་བཙན་ཡིན་ཟེར་སྡོད་པ་ཡིན་ན་ནམ་ཡང་བོད་ལ་ལོག་དགོས་ཀྱི་མ་རེད་བསམ་ནས་རང་བཙན་སྐད་འབོད་སོགས་བྱུང་བ་རེད། སྤྱི་ཚོགས་ཀྱི་འགྲོ་སྟངས་རྒྱ་བོད་ཀྱི་འབྲེལ་བ་བོད་མིའི་སྟོབས་ཤུགས་གང་ལལྟོས་ཀྱང་དབུ་མའི་ལམ་དེ་འགྲིག་པ་ཞིག་རེད
ཚ་སྒང་ཕོ་ཉ་ཁྱེད་ཀྱིས་དོན་དངོས་མང་པོ་ཞིག་ཁྱོན་ནས་རྟོགས་མི་འདུག
དེ་བས་ཁྱེད་ལ་དྲང་བདེན་གྱི་གླེང་སློང་ཞིག་བཤད་ས་མེད་པས་བཤད་རྒྱུ་མིན། གལ་སྲིད་ཁྱེད་ལ་ངོ་མས་བཤད་འདོད་ཡོད་ན་ངའི་ཟིན་བྲིས་རྭ་བ་རུ་ཤོག་དང་དེ་ནས་ངེད་གཉིས་གཏུག་ཆོག
སྐུ་ཕྱོགས་ཤིང་བཟའ་ལགས་ཐུགས་རྗེ་ཆེ། དེང་དུས་སྤྲུལ་སྐུ་ཚོའི་བསྟན་པ་ཟེར་ནས་སྦྱིན་བདག་མགོ་སྐོར་གཅིག་ལས་བསམ་རྒྱུ་མེད་མོད། སྐུ་ཉིད་ཀྱིས་བོད་མི་རིགས་ཀྱི་ཆེད་དུ་ཐུགས་ཁུར་མཛད་པ་དེ་ངས་སྤྲུལ་སྐུའི་མཛད་བཟང་ཞིག་ལ་ངོས་འཛིན་ཞུ་གི་ཡོད།། ལྷ་བཟང་གི་གཏམ་དེ་དངོས་འབྲེལ་རེད་གཞིས་ལུས་སྤུན་ཟླས་ཚེ་སྲོག་གི་འོས་འཕེན་གྱི་ཡོད་པ་དེ་མ་གོ་ན་འོན་པའམ་ལོང་པ་ཡིན་རྒྱུ་རེད།།
སྐལ་བཟང་རྒྱལ་མཚན་གྱི་གཏམ་དེའང་སྣང་བ་འགྲོ་པོ་འདུག།
འདི་ལྟར་གོ་སྒིག་བྱས་པར་དགའ་བསུ་ཡོད་ལ་གོང་གི་གང་བརྗོད་པ་ཚང་མ་རང་
དབང་ཡིན་རྒྱུ་རེད།ཡིན་ཡང་ལྷ་བཟང་གི་གཏམ་བཤད་དེ་ཧམ་པ་ཆེ་ཐག་ཆོ་མི་
འདུག་གམ།གཞིས་ལུས་མི་དམངས་ཀྱིས་༧རྒྱལ་བ་རིན་པོ་ཆེས་གང་གསུང་བ་དེ་ཡིན་ཟེར་རྒྱུ་ཡོད་པ་དེ་ལྷ་བཟང་ཁྱོད་ཀྱིས་མ་གོ་དམ།གལ་སྲིད་གོ་མེད་ན་གཞན་ལ་སྐད་ཆ་འདྲི་རོགས།གོ་ན་ཡང་མ་གོ་མདོག་བྱེད་ཀྱི་ཡོད་ན་ཅི་ཡང་ཞུ་རྒྱུ་མེད་དོ།དྲ་གྲོགས་ཚོས་གོ་ཡོད་ན་ཁོ་ལ་གསལ་བོ་གསུང་
རོགས་གནང་།
ཤིང་བཟའ་རིན་པོ་ཆེས་དགོས་པའི་བསླབ་པ་སློབ་གཉེར་ལ་འབད་པ་མི་གནང་བར་མི་དགོས་པའི་ལུང་ཁུག་གི་སྲིད་དོན་རྫུན་མར་མགོ་འཁོར་ན་མ་འོངས་པར་འགྱོད་པའི་གཞི་རུ་འགྱུར་རྒྱུ་ཉག་ཅིག་རེད་སྙམ། ལྷག་པར་དུ་ཚོགས་སྡེ་དང་གདན་ས་ཁག་ནས་གཏོ་དང་གཏོར་མ་བཞིན་བཟློག་པ་དགུ་བཟློག་བརྒྱབ་སྟེ་ཕྱིར་ཕུད་བཏང་བའི་གང་ཟག་དེ་དག་དང་མཉམ་བསྲེས་ག་ལ་རུང་་་་་་་་་་་
འོད་དཀར་དྲ་ཚིག་ནས་བགྲོ་གླིང་འཚོགས་འདུ་གཙོ་སྐྱོང་གནང་བ་ཐུགས་རྗེ་ཆེ། ཡིན་ནའང་རིན་པོ་ཆེ་དགོང་ལོ་གཞོན་ནུའི་སྐབས་འདིར་བསླབ་པ་སློབ་གཉེར་གནང་རྒྱུ་ཆེས་གལ་ཆེན་རེད། གོང་ས་མཆོག་ནས་ཀྱང་ཡང་ཡང་སྤྲུལ་སྐུ་རྣམས་ལ། ཁྱེད་རང་ཚོས་སློབ་སྦྱོང་ཡག་པོ་དང་མཐར་ཕྱིན་པ་གནང་དགོས། གལ་སྲིད་ང་མེད་པའི་ཉིན་མོར་བོད་མི་མང་གི་ཁྱེད་རང་ཚོ་ལ་རེ་བ་དང་སྐྱབས་བཅོལ་གནང་གི་རེད། ཁྱེད་རང་ཚོས་རང་ཉིད་སློབ་སྦྱོང་གི་ཚད་མཐོན་པོར་སླེབ་ཐུབ་པ་ངེས་པར་དུ་བྱེད་དགོས་ཞེས་བཀའ་ནན་ཏན་གྱིས་གསུངས་ཡོད་པ་རིན་པོ་ཆེ་ནས་བརྗེད་ཡོད་རྒྱུ་མ་རེད་བསམ་གི། གང་ལྟར་ད་རུང་ནི་རིན་པོ་ཆེའི་གསུངས་རྩོམ་དང་གསུངས་བཤད་གང་ལ་མཇལ་རུང་རིན་པོ་ཆེ་ཞིག་གི་བྱིན་རླབས་བསླེབ་མི་འདུག མཐའ་ན་གདན་སའི་གྲྭ་བ་དཀྱུ་ས་མ་ཞིག་གི་རྣམ་དཔྱོད་དང་རིག་ལམ་གཏོང་སྟངས་ཀྱང་མཁྱེན་རྒྱུ་མེད་པ་འདྲ། དེང་སང་གི་དུས་ལ་ཆོས་པ་དང་ཆབ་སྲིད་པ་སུ་ཡིན་ནའང་སློབ་སྦྱོང་མེད་ན་ལྷག་བསམ་གཅིག་བུའི་གཞན་མ་ཟེར་རང་ཁ་ཡང་གསོ་ཁག་པོ་རེད།
ད་ལྟའི་དུས་ཚོད་འདིར་ང་ཚོས ཁ་བཤད་པ་ཙམ་གྱིས་ཅི་ཡང་ཕན་ཐོགས་མེད།
ང་ཚོད་བྱེད་དགོས་པ་དེ་ལས་ཀ་ཡིན།
རྒན་བསོད་ནམས་རྒྱལ་མཚན་ནི་ལོ་རྒྱུས་ལ་རྒྱུས་མངའ་ཆེ་ཞིང་ཕྱི་རབས་པ་གསོ་སྐྱོང་བྱེད་མཁན་་གྱི་སློབ་དཔོན་ཚད་ངེས་ཅན་ཞིག་ཡིན་པས་ཁོང་གི་གཏམ་བཤད་དེ་ཡང་དྲ་ངོས་སུ་བཀོད་ཐུབ་ན་ཁེ་ཕན་ཆེ་བས་གསར་འགོད་པས་རེ་བ་འདི་ལ་དང་ལེན་ཡོང་བར་མཁྱེན།་
ཁྲིམས་འགལ་་་་ སྐད་ཆ་བཤད་སྟངས་འདི་ཡ་མཚན་ཞིག་རེད། བོད་གཞིས་བྱེས་གཉིས་གཅིག་ཏུ་བསྡུས་པའི་ཁྲིམས་ཤིག་གང་ན་ཡོད།
བོད་མི་ས་ཡ་དྲུག་གི་རྒྱབ་སྐྱོར་ཡོད་པར་བཤད་དེ་ལས་འགུལ་སྣ་ཚོགས་སྤེལ་བ་ནི་སླུ་བྲིད་རེད། བོད་ལ་མི་སླེབས་པ་ཤེས་བཞིན་དུ་བོད་ལ་ཡོང་གི་ཡོད་ཅེས་གོམ་འགྲོ་ཐན་ཐུན་བྱེད་པ་ཡང་སླུ་བྲིད་རེད། ལས་འགུལ་འདིའི་རིགས་ཀྱིས་བོད་ནང་གི་མི་མང་པོ་ཞིག་གི་ཚེ་སྲོག་རྩེད་སྤྱད་བྱེད་བཞིན་ཡོད།
ཉིན་འདིར་རང་ཉིད་ཀྱང་ཚོགས་འདུ་ལ་བཅར་བ་ཡིན་ལ། མི་རེ་རེའི་བསམ་ཚུལ་ལ་ཉན་པ་ཡིན། ་ཡིན་ན་ཡང་རྒན་ལྷ་བཟང་གི་གཏམ་བཤད་ལས་གསོན་ཤུགས་ཤིག་བྱིན་སོང་།
ཁ་ཉིན་གྱི་བགྲོ་གླེང་འདིའི་གསར་འགྱུར་བཀོད་པ་ཁག་གསུམ་འདུག་པ་ལས་དུས་བབ་ཀྱི་གསར་འགྱུར་འགོད་སྟངས་འདི་ཡག་པོར་མཐོང་སོང་།
ཉིན་དེར་ང་ཚོར་བས་བཟི་སོང་།
ཁྱེད་རྣམ་པའི་དེ་དག་གསུངས་བཤད་ཤིན་ཏུ་གཡག་པོ་གནང་འདུག་ གུས་པའི་དེ་ལ་བརྒྱབ་སྐྱོར་ཡོད་པ་དང་བོད་རང་བཙན་ཆེད་དུ་འབད་བརྩོན་གནང་དགོས་ཆེ། བཙན་འབྱོལ་གཞུང་ལ་མི་ལྟ་བྱེད་རྒྱུ་གང་ཡང་ལྷག་ཡོད་མེད་པ་ཁྱེད་རྣམས་པའི་མཁྱེན་གསལ་རེད། དེ་ལ་རེ་བ་བརྒྱབ་ན་རེ་བ་གཏོང་གསལ་རེད་དོ།།།
རེད་རེད། ཡག་པོ་གསུངས་འདུག
དུས་དང་གནས་བབ་ལ་༸གོང་ས་སྐྱབས་མགོན་ཆེན་པོ་མཆོག་གིས་ལམ་བསྟན་ལ་ཡར་ཡོར་མ་གནང་ན་བཟང་། ཤིང་བཟའ་བླ་མ་ལ་བོད་ནང་གི་ཤེས་ལྡན་མི་སྣ་འགའི་བསམ་ཚུལ་ལ་ཉན་ནས་ཐུགས་ཕམ་ཡོད་ན་བོད་ནང་རང་གི་སློབ་མ་མང་དག་གཅིག་གིས་གྲྭ་ས་ལ་བཞུགས་ནས་སློབ་གཉེར་གནང་དགོས་པའི་རེ་བ་ཞུས་པ་དེ་ལ་ལན་ཇི་ལྟར་འབུལ་རྩིས་ཡོད།
སྤྱིར་བཏང་ཤིང་བཟའ་བླ་མའི་བྱེད་སྟངས་ཁ་ཤས་ངའི་སྣང་བ་འགྲོ་གི་མི་འདུག མི་ལ་མིང་དང། མདུང་ལ་ཡུ་བ་ཞེས་པའི་དཔེ་ལྟར། ཁྱེད་རང་གི་མིང་དང་འཚམས་པའི་གཞོན་དུས་ཆོས་འཆད་ཉན་བསླབ་པ་སློབ་གཉེར་བྱེད་ཐུབ་ན། དེས་བོད་བསྟན་པ་ཆབ་སྲིད་ལ་ཕན་བསྡད་ཡོད་སྙམ།
རྨོག་རུ་བསྟན་པ་ལགས་ཀྱིས་གསུངས་པ་དེ་དངོས་ཡོད་གནས་ཚུལ་རེད་སྙམ། ཤིང་བཟའ་བླ་མས་གསུངས་པ་དེ་དངོས་ཡོད་གནས་ཚུལ་མ་རེད།
རང་བཙན་རྩོད་ལེན་པའི་མིང་སྐམ་པོ་སྒལ་པར་འཁུར་ཏེ་ལོ་མང་རིང་ཁ་སྟོང་བཤད་དེ་བཙན་བྱོལ་གྱི་བོད་མི་འབུམ་གཅིག་ཁྲོད་དུ་འུར་བརྒྱབ་ནས་བསྡད་མཁན་ལྷ་བཟང་ཚེ་རིང་གི་སྐད་ཆའི་ཚིག་གཅིག་པུ་དེ་དུས་བབས་གསར་འགོད་པ་དོནགྲུབ་བཀྲིས་ཀྱིས་འགོ་བརྗོད་དུ་བཞག་སྟེ་འོད་དཀར་དྲ་ཚིགས་ཀྱི་བགྲོ་གླེང་གཞི་རིམ་ངོ་སྤྲོད་བྱེད་པ་ནི་ཧ་ཅང་ནོར་འཁྲུལ་ཅན་ཞིག་རེད། གལ་སྲིད་ལྷ་བཟང་ཚེ་རིང་གི་བཤད་པ་ནང་བཞིན་བཙན་བྱོལ་ནང་བོད་མི་འབུམ་གཅིག་གི་འོས་བླུགས་ཏེ་མང་མོས་འོས་བསྡུ་བྱས་པ་དེ་ཁྲིམས་འགལ་ཆགས་ཀྱི་ཡོད་ན། གཞིས་ཞུགས་བོད་མི་ས་ཡ་མང་པོས་ཉིན་མཚན་འཁྱོལ་དཀའ་བའི་ལོ་ངོ་ཧྲིལ་པོ་ལྔ་བཅུའི་ནང་ལུས་པོ་གངས་ཅན་ཡུལ་དུ་གནས་ཀྱང་སེམས་པ་འཕགས་པའི་ཡུལ་དུ་ཕྱོགས་ཐུབ་པའི་སྟོབས་ཤུགས་ཀྱི་སྣེ་ཁྲིད་པ་དེ་ཁྲིམས་འགལ་རེད་ཅེས་འགྲེལ་བཤད་རྒྱག་རྒྱུ་ཡིན་ནམ། ད་བར་ལོ་ངོ་ལྔ་བཅུ་ཙམ་ནང་བོད་ནང་བོད་མི་ས་ཡ་མང་པོས་རང་སྲོག་བློས་བཏང་ནས་རང་བཙན་རྩོད་ཀྱི་ཡོད་པ་ཁ་རུ་འཁྱེར་ཏེ་༸གོང་ས་མཆོག་གི་དབུ་ཁྲིད་པའི་གཞུང་གི་ལས་དོན་གྲུབ་ཕྱོགས་ལ་མ་འགྲིག་པའི་སྐྱོན་འཛུགས་བྱ་གི་ཡོད་ཚེ། དེ་སྔ་ཁ་དྲོན་མོ་ནས་ས་འདི་རུ་ངའི་གཅིན་པ་བཏང་ཡང་ཕངས་ས་རེད་ཅེས་འུད་ཤོབ་བྱས་ཏེ་ད་ལྟ་ས་འདི་རུ་སྡོད་ཁང་གཞན་ལ་འགྲན་ཕོད་པའི་ཁང་བཟང་དང༌། དཔེ་དེབ་ཚོང་བའི་ཚོང་ཁང་ཆེན་པོ་དེ་འདྲ་ཞིག་གཉེར་ཏེ་བཙན་བྱོལ་སྤྱི་ཚོགས་ནང་མགོ་བརྒྱུད་དེ་སྡོད་དགོས་པ་ག་རེ་ཡིན་པ་རེད་དམ། དེ་སྔ་ང་ཚོ་མཉམ་དུ་བོད་རང་བཙན་ཆེད་དུ་བོད་དུ་འགྲོ་དགོསཞེས་གཞོན་ནུའི་ཚོགས་ཐོག་ཏུ་ངར་སྐབས་ཁ་གཏད་འདོན་ཏེ་མཉམ་དུ་བོད་དུ་འགྲོ་དགོས་ལབ་དུས་ཕྱིར་འཐེན་བྱ་མཁན་དེ་ལྷ་བཟང་ཚེ་རིང་མ་རེད་དམ། ལྷ་བཟང་ཚེ་རིང་རང་བཙན་རྩོད་རྒྱུར་ཞེན་པ་དང་ལྷག་བསམ་ཡོད་པ་ཞིག་རེད་ཀྱང༌། དོན་དག་ངོ་མའི་ཐོག་ཁ་ནས་ཤོད་ཕོད་པ་ཙམ་ལས་དགྲ་བོ་རྒྱ་དམར་གྱི་ཕྱོགས་སུ་ཁ་གཏད་དེ་མདུན་ངུ་ཐོན་མ་ཕོད་པར་ད་ལྟ་ལོ་ན་རྦད་དེ་རྒས་ཡིན་ཡང་སྔར་གྱི་འུར་གཏམ་འདི་རང་གཤིས་སུ་འཇགས་ཏེ་འུར་རྒྱག་པར་དེ་ལྟའི་བརྗོད་གཞི་བཀོད་དགོས་དོན་འདུག་གམ། གསར་འགོད་པ་དོན་གྲུབ་བཀྲིས་ལགས། བསམ་བློ་རྒྱ་ཆེ་ཙམ་ཐོངས། ཁོང་ཚིག་འདི་སུ་ལ་ཐད་ཀར་བཤད་ཀྱི་ཡོད་པ་རེད་དམ། བོད་མི་འབུམ་གཅིག་གི་ཁྲོད་དུ་གཞིས་བྱེས་ས་ཡ་དྲུག་གི་བློ་གཏད་བཅོལ་ཡུལ་གཅིག་པུ་དེ་བཞུགས་ཡོད་པས་གང་གི་ལམ་སྟོན་འོག་ཏུ་བསྐྱོད་པ་དེ་ནོར་འཁྲུལ་ཡིན་ཚེ་ལོ་ངོ་ལྔ་བཅུའི་ནང་འུར་གཏམ་རྒྱག་མཁན་དེ་དག་ད་ལྟ་རང་གི་ལྟོ་གོས་དང་རང་གི་ཁང་བཟང་བསྐྲུན་ཏེ་རྡ་སར་བསྡད་ན་རྡ་སར་བསྡད་རྒྱུ་ཡོད་པ་དང༌། གཞུང་ཁང་ཟིན་ན་གཞུང་ཁང་འཛུལ་རྒྱུ་ཡོད་པ། བོད་ལ་ལོག་ན་རྒྱ་མིས་སྣེ་ལེན་བྱེད་པ་དེ་འདྲ་ཡོང་བཞིན་འདུག་པས་འར་ཆེན་གྱི་རྗེས་སུ་མ་རྒྱུགས་རོགས།
བོད་ནང་གི་བོད་མི་རེ་ཟུང་གིས་བཙན་བྱོལ་ནང་གྲགས་འགུལ་གང་ཡང་མི་འདུག་ལབ་ན་དེ་ཡང་སྐད་ཆ་ཚད་ལྡན་ཞིག་དང་། རྒྱུས་མངའ་ཡོད་པའི་སྐད་ཆ་ཞིག་མ་རེད།
དགུང་གྲངས་བདུན་ཅུ་དོན་ལྔར་ཕེབས་པའི་༸གོང་ས་ཡིད་བཞིན་ནོར་བུ་ཉིན་མཚན་དུས་དྲུག་ཏུ་བཞུགས་ལོང་མེད་པ་རེད། འདི་ཡང་བཙན་བྱོལ་ནང་གི་འཕག་འཚག་ཆེ་ཤོས་དང་། ལོ་ངོ་ལྔ་བཅུའི་གྲུབ་འབྲས་ཆེ་ཤོས་དེ་རེད།
དེ་བཞིན་བཙན་བྱོལ་གཞུང་གི་ངོས་ནས་ཀྱང་འབྱོན་ཀྱང་རུང་། མ་འབྱོན་ཀྱང་རུང་ཉིན་ལྟར་ལས་ཁུངས་སྒོ་ཕྱེས་ཕྱེས་པ་རེད།
འདི་ཡང་ས་མཐར་སླེབས་པའི་འཕག་འཚག་ཞིག་གི་ང་རོ་རེད།
དེ་བཞིན་གཞུང་འབྲེལ་མ་ཡིན་པ་རེ་ཟུང་ཀྱང་སྐབས་རེར་བོད་ཀྱི་ས་མཚམས་གངས་འདབས་སུ་སླེབས་ཀྱིན་ཡོད་པ་རེད། དེ་ཡང་བཙན་བྱོལ་ནང་གི་འཕག་འཚག་དང་འགུལ་བསྐྱོལ་ཞིག་རེད།
བཙན་བྱོལ་བོད་མི་ཉུང་དྲག་པོས་དབང་གིས་བྱེད་སྟངས་དེ་ཁྲིམས་འགལ་ཡིན་ན། བོད་ནང་གི་ཚོར་བ་ཅན་རེ་ཟུང་གི་སྐད་ཆ་ཚད་མར་བཟུང་བ་དེ་ཡང་ཁྲིམས་འགལ་ཆགས་ཀྱི་རེད།
གཞིས་ལུས་མི་མང་བརྒྱ་ཆ་དྲུག་ཅུའི་བསམ་ཚུལ་ལ་ང་ཚོས་གོ་བསྡུར་དང་ཉམས་ཞིབ་བྱེད་དགོས་པ་རེད།
འདི་ཚོ་སེམས་ངོར་བབ་པའི་ཐོག་ནས་ང་ཚོས་སྐད་ཆ་བཤད་དགོས་པ་རེད།
ཁ་སང་གི་གཏམ་གླེང་ཚོགས་རའི་རྣམ་པ་དེ་མཐོང་ན། རང་དབང་གི་ཁ་དབུགས་འབྱིན་རྔུབ་བྱེད་སའི་འདས་དུས་ཀྱི་དཔྱད་གླེང་ཚོགས་ར་འགའ་དྲན་གི གསུང་བཤད་གནང་མཁན་རེ་ཟུང་གི་ཆབ་སྲིད་ཤ་གཟུགས་ཕྱིར་མངོན་ཡོང་སྐབས། སླར་ཡང་ངྷ་སའི་རི་ངོགས་ཀྱི་བབ་བསྟུན་ཚོར་ཤུགས་རྣོན་པོ་དང་རྒྱང་འཇལ་བསམ་གཞིག་རྟུལ་བོའི་སྡིངས་ཆ་དག་མཐོང་སོང་།
གང་ལྟར། འོད་དཀར་དྲ་ཚིགས་ཀྱི་བྱེད་སྒོ་འདི་ལ་ཡི་རངས་དང་རྒྱབ་སྐྱོར་ཡོད་ལ། འབྱུང་འགྱུར་ཡང་འདི་ལྟ་བུ་སྤེལ་རྒྱུར་རེ་བ་དང་རྒྱང་ལྟ་ཡོད།
བྱ་གཞུང་འཇམ་དབྱངས་ལགས།
ཁྱེད་ཀྱིས་གཞི་ལུས་རྒྱ་ཆེ་མི་མང་གི་མངོན་འདོན་དེ་ཡང་གཉིས་ཕན་གྱི་ལམ་དེས་ཚིམས་ཀྱི་མེད་པ་དང་དེ་ལ་འདོད་པ་མེད་ལ་ཞིག་གཏན་མིན་ཞེས་བརྗོད་པ་ལ་ང་མུས་མཐུན་མེད། རྒྱུ་མཚན་ནི་ང་༡༩༩༧་༩་༡་ཉིན་རྒྱ་དམར་གྱིས་བཅོན་ནང་བཅུག་ནས་༢༠༠༠་༡༠་༡་ཉིན་བཙོན་གྲོལ་ཐོབ་སོང་ལོ་ངོ་གསུམ་དང་ཟླ་གཅིག་གི་རྒྱུད་རིམ་ཁྲོད་ང་དང་ཆབ་སྲིད་བཙོན་པ་བཞི་བརྒྱ་ལྷག་ཙམ་དང་འབྲེལ་བ་བྱུང་ཡོད་དེ་དག་ཚང་མས་རང་བཙན་དགོས་བརྗོད་ཀྱི་ཡོད་པ་ལས་དབུ་མའི་ལམ་དགོས་ཞེས་བརྗོད་ཀྱི་མི་འདུག། དེ་དག་གིས་དབུ་མའི་ལམ་གྱི་གོ་དོན་མི་ཤེས་པ་ཡང་མ་ཡིན་ཏེ་ང་རང་དབུ་མའི་ལམ་གི་དོན་གསལ་པོ་སློབ་ཁྲིད་གནང་མཁན་ཡང་དེ་དག་ཡིན་པས་སོ། དེས་ན་ཁྱེད་ཀྱིས་བཤད་པའི་སྐད་དེ་ལ་ཁུང་ལུང་དགོས་རྒྱུ་ལས་དེ་ལྟ་མེད་ན་ཁྱེད་རང་ཡང་སྐབས་མཚོ་བ་ཞིག་ཡིན་པ་བདོན་མི་ཟ་འོ།
གཞིས་ལུས་མི་མང་གི་སེམས་ཚོར་དངོས་མ་དེ་ཐིང་འདིར་གླེང་འདུག་ཐུགས་རྗེ་ཆེ། ང་ནི་རང་གི་མེས་པོ་འབུམ་ཕྲག་དུ་མའི་ཚེ་སྲོག་འཕྲོག་མཁན་དེ་དག་ལ་མེས་པོ་ཞེས་འབོད་འདོད་མེད་ལ་རང་གི་སྤུན་ཟླ་ཁྲི་ཕྲག་མང་པོ་གནར་ཅོད་གཏང་མཁན་དེ་དག་དང་མཉམ་དུ་སྡད་འདོད་ཀྱང་དེ་བའི་མེད་ང་ལ་རེ་བ་ཉག་གཅིག་ཡོད་པ་ནི་གངས་སེང་ཅན་གྱི་དར་ཆ་འཁྱེར་ནས་རང་ཡུལ་དགྲ་ལག་ནས་འཕྲོག་རྒྱུ་དེ་ཡིན་ལ་དེ་ལྟར་ཡོད་བའི་སྤོབ་པ་ཡང་ཡོད་དེ་ང་ལྟ་བུ་གཞོན་སྐྱེས་རྣམས་ཀྱི་ལུས་སྟེང་ནས་གདོང་དམར་ཚང་གི་ཁྲག་རྒྱུན་སློག་སློག་དུ་འཕྱུར་བཞིན་འདུག་ལ་གངས་ཅན་པའི་ལས་དབང་ལ་སེམས་ཐག་ཀྱང་ཉེ་རུ་འགྲོ་བཞིན་འདུག་པས་སོ།
་མིང་པོ་བཤད་ན་མི་འདོད་གི
སྤྱི་མཐུས་འབའ་ཚང་གིས་གསུངས་ལ་རྒྱུ་མཚན་འདུག
་ད་རེས་བགྲོ་གླེང་གཙོ་སྐྱོང་བ་དང་མཉམ་ཞུགས་པ་ཡོངས་ལ་མཚམས་འདྲི་ཞུ་བ་དང་ཆབས་ཅིག རང་ཉིད་ཀྱི་འདོད་ཚུལ་ཞིག་བརྗོད་ན་སྤྱིར་བཏང་ནས་བཤད་ན་ང་ཚོ་ཚང་མའི་འདོད་པ་རང་བཙན་རེད། དེ་ནི་དུས་ཀྱི་གནས་བབས་དང་བསྟུན་ན་ང་ཚོ་ལ་རེག་ཐབས་མེད་པ་ཞིག་རེད། དེ་བས་༧གོང་ས་མཆོག་གིས་དུས་དང་བསྟུན་ནས་རང་བཙན་དོར་ནས་བོད་རྒྱ་གཉིས་ཕན་གྱི་དབུ་མའི་འདི་འདེམས་པ་རེད་མ་གཏོགས་རང་བཙན་ལ་འདོད་པ་མེད་པ་དང་ཡང་ན་རྒྱ་ནག་ལ་པེ་ལབ་འཁྲབ་པ་་་་་་་རྒྱ་ནག་སྟོབས་ཤུགས་ལ་འཇིག་ནས་་གཉིས་ཕན་གྱི་ལམ་ཁ་དེ་འདེམས་པ་མིན་པ་ཤེས་དགོས། གཞི་ལུས་རྒྱ་ཆེ་མི་མང་གི་མངོན་འདོན་དེ་ཡང་༧་གོང་ས་མཆོག་གི་གཉིས་ཕན་གྱི་ལམ་དེས་ཚིམས་ཀྱི་མེད་པ་དང་དེ་ལ་འདོད་པ་མེད་ལ་ཞིག་གཏན་ནས་མ་རེད།
ཡིན་ན་ཡང་། དེང་གི་སྐབས་འཚོལ་བ་སྐོར་ཞིག་གིས་བཤད་སྟངས་འདི་ཁྱོན་ནས་ཡག་པོ་ཞིག་མཐོང་མ་སོང་། སྐད་ཆ་དང་གླེང་སློང་འདྲ་མིན་བཤད་ནས་གཞི་བྱེས་གཉིས་ཀའི་འབྲེལ་ལམ་དང་ཕུགས་འདུན་ལ་གནོད་པ་བཟོས་ན་ང་ཚོ་ལ་ཅོང་ལས་ཁེ་ཞིག་མི་འདུག་བསམ། རང་ཉིད་ཀྱི་ལངས་ཕྱོགས་དང་ལྟ་བ་གང་ཡིན་་དེ་མི་དམངས་ཀྱི་ལངས་ཕྱོགས་དང་ལྟ་བ་རེད་ཅེས་ལབ་ན་ཡག་པོ་ཁྱོན་ནས་མི་འདུག
དངོས་གནས་གོ་དོན་ཡོད་པའི་སྐད་ཆ་བཤད་མཁན་བོད་མི་མང་སྤྱི་འཐུས་འབའ་པ་སྐལ་བཟང་རྒྱལ་མཚན་ལགས་གཅིག་པོ་རེད།
ང་ནི་ད་ལྟའི་རྒྱ་གཞུང་ལྟ་བུའི་འོག་ལ་བཙན་འོག་ཏུ་སྡོད་འདོད་ཀྱང་མེད། བོད་རང་བཙན་རྒྱལ་ཁབ་ཅིག་བྱས་ནས་སྡོད་འདོད་ཀྱང་མེད།