རྐང་སྤོལ་དང་རྒྱན་ཤོག

ང་ཚོའི་བྱ་འགུལ་འདིའི་དམིགས་ཡུལ་གཙོ་བོ་མི་མང་ལ་རྐང་རྩེད་སྤོ་ལོ་གཙོས་རྩེད་མོའི་རིགས་ལ་དོ་སྣང་དང་དགའ་མོས་བྱ་ཆེད་དང་། མ་འོངས་བོད་རྒྱ་ཡོངས་རྐང་རྩེད་སྤོ་ལོ་རུ་ཁག་གི་མི་རབས་རྗེས་མར་མཐུན་རྐྱེན་བསྐྲུན་ཆེད་ཡིན་ཟེར།

ཟླ་འདིའི་ཕྱི་ཚེས་ ༡༧ ནས་ ༡༨ བཅས་ཉིན་གྲངས་གཉིས་རིང་བོད་རྒྱལ་ཡོངས་རྩེད་རིགས་ཚོགས་པས་གོ་སྒྲིག་འོག བཞུགས་སྒར་ཉིན་མོའི་སློབ་གྲྭའི་རྒྱལ་ཡུམ་ཆེན་མོའི་ཚོགས་ཁང་དུ་ཚོགས་པ་འདི་ཉིད་ཀྱི་འདས་པའི་ལོ་རྒྱུས་དང་འབྲེལ་བའི་པར་རིས་དང་བྱ་དགའི་རྟགས་མ། སྒྲིག་ཆས་སོགས་འགྲེམས་སྟོན་དང་། བོད་རྒྱལ་ཡོངས་རྐང་རྩེད་སྤོ་ལོ་རུ་ཁག་གིས་རྩེད་མོ་བ་རྣམས་ལ་སྦྱོང་བརྡར་སྤྲོད་བཞིན་པའི་གོ་རིམ་དང་རྣམ་པ། དེ་བཞིན་ཕྱི་རྒྱལ་ཡུལ་གྲུ་ཁག་ཏུ་སྐོར་སྐྱོད་ཀྱིས་རྩེད་འགྲན་བྱས་པའི་གློག་བརྙན་འོད་སྡེར་སོགས་གཟིགས་འབུལ་གནང་བྱུང་། ཚོགས་པ་འདི་ཉིད་ཀྱིས་ད་ལོ་ལྷོ་ཨ་ཧྤེ་རི་ཀའི་འཛམ་གླིང་རྐང་སྤོལ་རྩེད་འགྲན་དང་བསྟུན་ཏེ། རྒྱན་ཤོག་བཀྲམས་པའི་བྱ་འགུལ་ཞིག་སྤེལ་ཡོད་པ་དེའི་ཨང་དང་པོ་ནས་གསུམ་པའི་བར་གྱི་མི་དྲུག་ལ་བྱ་དགའི་གསོལ་རས་བསྩལ་བྱུང་། སྐབས་དེར་བོད་རྒྱལ་ཡོངས་རྩེད་རིགས་ཚོགས་པའི་ཚོགས་གཙོ་སྐལ་བཟང་དོན་འགྲུབ་ལགས་ཀྱིས། ཐེངས་འདིའི་བྱ་འགུལ་གྱི་དམིགས་ཡུལ་གཙོ་བོ་དེ་བོད་པའི་སྤྱི་ཚོགས་ནང་རྐང་རྩེད་སྤོ་ལོ་གཙོས་རྩེད་མོའི་རིགས་ལ་དོ་སྣང་བྱ་མཁན་མང་དུ་འགྲོ་ཆེད་དང་། ལྷག་པར་འཛམ་གླིང་གི་རྩེད་འགྲན་འདི་བརྒྱུད་དེ། མ་འོངས་པར་བོད་ཀྱི་གཞོན་སྐྱེས་རྣམས་ཀྱིས་རྐང་རྩེད་སྤོ་ལོར་དོ་སྣང་དང་། སྦྱང་བརྩོན་གྱི་འདུན་པ་ཆེ་རུ་འགྲོ་ཆེད་ཡིན་ཚུལ་བརྗོད་བྱུང་།

ཡང་ཁོང་གིས་ཐེངས་འདིར་ང་ཚོས་བསྡོམས་པའི་རྒྱན་ཤོག་༨༢༨ ཙམ་བཙོང་སྟེ། ཧིན་སྒོར་བཞི་ཁྲི་ཆིག་སྟོང་བཞི་བརྒྱ ༤༡༤༠༠ ཙམ་རག་ཡོད་སྐོར་དང་། དེའི་ཁྲོད་ཀྱི་བརྒྱ་ཆ་དྲུག་ཅུ་གསོལ་རས་སུ་གནང་རྒྱུ་དང་། ལྷག་མ་རྣམས་སློབ་གྲྭ་ཁག་ཏུ་གསར་འཛུགས་གནང་ཡོད་པའི་རྐང་སྤོ་རུ་ཁག་གི་སོན་རྩ་ཚོར་མཐུན་རྐྱེན་སྦྱོར་རྒྱུ་ཡིན་སྐོར་དང་སྦྲགས། ཐེངས་འདིའི་རྒྱ་ཤོག་ཁྲོད་ཨང་དང་པོ་ཐོབ་མཁན་ཀིརྟི་བྱེས་བ་གྲྭ་ཚང་གི་གྲ་ཚེ་རིང་ལགས་སུ་ཧིན་སྒོར་ ༧༤༥༢ དང་། ཨང་གཉིས་པ་ཅོང་ཏ་ར་སློབ་གྲྭའི་བསྟན་འཛིན་པདྨ་དང་ཚེ་རིང་བཀྲ་ཤིས། བསྟན་འཛིན་ཆོས་འཛིན་བཅས་ལ་སྒོར་ ༡༦༥༦ རེ། ཨང་གསུམ་པ་འཇིགས་མེད་ནོར་བུ་དང་བསྟན་འཛིན་བློ་ལྡན་གཉིས་ལ་སྒོར་ ༡༢༤༢ རེ་བཅས་ཀྱི་བྱ་དགའ་སྤྲད་སོང་། བོད་རྒྱལ་ཡོངས་རྩེད་རིགས་ཚོགས་པ་འདི་ནི། སྤྱི་ལོ་ ༡༩༦༠ ལོར་རྒྱ་གར་གཞུང་ལ་དེབ་སྐྱེལ་དང་བོད་གཞུང་གིས་ངོས་ལེན་ཡོད་པ་ཞིག་ཡིན་འདུག་ལ། ༢༠༠༢ ལོའི་ཟླ་ ༥ བའི་ནང་སྐབས་དེའི་བོད་ཁྱིམ་སྤྱི་ཁྱབ་འགན་འཛིན་རྗེ་བཙུན་པདྨ་མཆོག་གིས་དཔལ་འབྱོར་གྱི་མཐུན་རྐྱེན་འཚོལ་སྒྲུབ་འོག་གསར་འཛུགས་གནང་རྗེས། ༢༠༠༣ ལོ་ནས་བཟུང་རྩེད་རིགས་དངོས་སུ་རྩེད་རིགས་ཚོགས་ཆུང་གོ་སྒྲིག་བྱེད་མགོ་བརྩམས་པ་དང་། ད་ལྟའི་བར་ཨེ་ཊ་ལི་དང་ཌེན་མག  སུད་སི་ལན་ཌི། འཇར་མན། ཧྤ་རན་སི། བྱང་ས་ཡ་པ་རས། ཧོ་ལན་ཌི། ཝོ་སི་ཊི་ལི་ཡ་བཅས་རྒྱལ་ཁབ་ ༨ ཙམ་ལ་ཕྱིན་ཏེ་འགྲན་བསྡུར་བྱས་ཡོད་འདུག

གསར་འགོད་པ། དོན་གོ།