འདེམས་སྟངས་མི་ནོར་བ་གནང་རོགས། སད་མ་དཀར།

མང་གཙོའི་རྒྱལ་ཁབ་ཀྱི་ངོ་བོ་ཞིག་སྒྲུབ་ཡོད་ན་ངེས་པར་མང་གཙོའི་ཀ་བ་གསུམ་གྱིས་གཙོས་པའི་གང་ལྟར་མི་མང་གི་འགོ་འཁྲིད་ཐུབ་མཁན་ཞིག་དང་འགན་འཁྱེར་ཐུབ་མཁན། དེ་བཞིན་དུས་རབས་ཀྱི་འགན་འཁྱེར་ཐུབ་མཁན། ད་དུང་རྣམ་དཔྱོད་དང་ལྷག་བསམ་གཉིས་ཀ་སྐྱེ་བོ་གཞན་ལས་ལྷག་པ་ལྡན་པའི་དབུ་འཁྲིད་ཀྱི་དཔུང་ཁག་ཅིག་ངེས་པར་ཡོད་དགོས་པ་འདྲ།

བོད་རྒྱལ་ཁབ་ཆེན་པོའི་ད་ལྟའི་གནས་བབས་ལ་བསམ་བློ་བཏང་ཚེ་དངོས་འབྲེལ་གཉན་འཕྲང་གི་དུས་རབས་ཤིག་ཡིན་པས་སྐྱེ་བོ་སུས་གཞུང་གི་རྐུབ་སྟེགས་ཐོག་བསྡད་རུང་རང་གིས་རང་ཉིད་ལ་བསྐུལ་ལྕག་དང་ལས་རྒྱུ་འབྲས་བརྩི་ཤེས་པ་ཞིག་བྱེད་དགོས་རྒྱུ་ནི་ཁ་ཚ་དགོས་གཏུག་ཅིག་རེད། ལྷག་པར་དུ་རང་ཉིད་ཀྱིས་རྐུབ་སྟེགས་དེའི་ཐོག་བསྡད་ནས་བོད་རྒྱལ་ཁབ་ལ་ཕན་པའི་བྱ་བ་གང་ཞིག་སྒྲུབ་མིན་རང་བློ་རང་ལ་ལྐོག་ཏུ་འགྱུར་བ་ཞིག་མིན་པས་༸གོང་ས་རྒྱལ་བའི་དབང་པོ་སྐྱབས་མགོན་ཏ་ལའི་བླ་མར་ཞལ་མཇལ་དུས་ངོ་གནོངས་མི་དགོས་པ་ཞིག་ཅིས་ཀྱང་དགོས་འགལ་ཆེ། རང་ཉིད་ལ་བོད་རྒྱལ་ཁབ་ཆེན་པོ་དེའི་འགན་འཁྱེར་བའི་འཇོན་ཐང་མེད་བཞིན་དུ་རྟ་ལམ་བོང་བུས་བཀག་པའམ། ཡང་ན་མིང་རྫིག་པོ་ཞིག་གི་ཆེད་དུ་ཉི་མ་གང་འཁྱོལ་གྱིས་བསྡད་པ་ཡིན་ན་བོད་ནས་ཚུར་རེ་བའི་མིག་འབྲས་ཧུར་ཧུར་དུ་ལྟ་བཞིན་ཡོད་ལ་རྒྱལ་གཅེས་དཔའ་བོ་དང་དཔའ་མོ་ཚོས་སྡུག་སྦྱོང་དེ་ལྟར་མྱོང་བ་དག་བློས་བཟོད་ཐབས་མེད་པ་ཞིག་རེད། འོན་ཀྱང་ང་ཚོས་གོ་ཐོས་ལ་བོད་མི་མང་སྤྱི་འཐུས་ལ་ལོ་བཅུ་གྲངས་ཁ་ཤས་བསྡད་ཀྱང་གྲོས་ཚོགས་ལ་བོད་རྒྱལ་ཁབ་དང་མི་མང་གི་ཆེད་དུ་གྲོས་མོལ་ཙམ་ཡང་འདོན་མྱོང་མེད་ཟེར་བ་ཡོད་པ་མ་རེད་དམ། གལ་སྲིད་རང་ཉིད་ཀྱིས་མ་འཇོན་ན་ཨུ་ཚུགས་ཀྱིས་བསྡད་ནས་༸གོང་ས་རྒྱལ་བའི་དབང་པོས་སྐུ་ལས་འདི་ལྟར་བསྐྱོན་པ་མིག་ཡོད་ཀུན་གྱིས་ཤེས་ཚོད་རེད་ན་རྒྱུ་འབྲས་རྣོག་ནས་ཅི་བྱེད། མ་གཞི་སྤྱི་འཐུས་དེ་དག་མི་མང་གིས་འདེམས་པ་རེད་ཟེར་མོད། རྡ་སའི་མི་མང་རྣམས་གོ་རྟོགས་མཐོ་ཙམ་ཡོད་མདོག་ལས་ས་གནས་གཞན་ཁག་གི་མི་མང་ལ་གོ་རྟོགས་ཤིགཁག་པོ་རེད། མི་མང་ཆེ་བས་སྤྱི་འཐུས་དེའི་ལྟ་སྤྱོད་དང་འཇོན་ཐང་གང་ཅིར་རྒྱུས་མངའ་མེད་པས་མིའི་ཟེར་གྲོས་ཉན་ནས་འོས་གཞིའི་སྟེང་གང་ལྕོག་གིས་རྡ་རྟགས་འཐེན་རྒྱུ་ལས་མ་འདས། དེར་བརྟེན་རབ་བྱུང་ན་བཀའ་ཁྲི་དང་སྤྱི་འཐུས་འོས་གཞི་སུ་དང་སུ་ཡོད་རུང་འོས་མི་ངོ་མ་མི་མང་དཀྱིལ་དུ་ཕེབས་ཏེ་དམིགས་ཡུལ་དང་ལྟ་གྲུབ་སོགས་ངོ་སྤྲོད་གནང་རྒྱུ་དང་རླུང་འཕྲིན་དང་བརྙན་འཕྲིན་སོགས་ལས་ངོ་སྤྲོད་དང་བཅར་འདྲི་གནང་བ་སོགས་ཐབས་ལམ་འདྲ་མིན་ལས་འོས་མི་རྣམས་མི་མང་གིས་རྒྱུས་མངའ་ཡོང་ཐབས་བྱེད་རྒྱུ་དེ་གལ་ཆེན་པོར་མཐོང། ལྷག་པར་དུ་སྤྱི་འཐུས་ཀྱི་འོས་མི་བཏོན་མཁན་ནང་དུ་སྐབས་དེའི་སྤྱི་འཐུས་ལས་ཐོག་པ་བཞུགས་མི་ཆོག་པ་བྱུང་ན་ལས་ཀ་དེ་གཙང་སིང་བ་ཡོང་ངམ་སྙམ། 

འདས་ལོའི་སྤྱི་འཐུས་ཚོའི་ཕྱག་ལས་གནང་སྟངས་ལས་ད་ཆ་སྤྱི་ཚོགས་ནང་དུ་གང་སར་དམིགས་ཡུལ་རྒྱབ་ནས་འདེམས་སྒྲུག་ལེགས་པོ་ཞིག་མ་བྱས་པར། བླ་མའི་ཁྱིས་སོ་རྒྱབ་ཀྱང་ཤ་ཚིལ་གྱི་སྤྲེལ་ལད་འཁྲབ་ན་སྤྱི་དོན་ལ་འཐུས་ཤོར་འགྲོ་རྒྱུ་ལས་མེད། དེར་བརྟེན་བོད་མི་སྤྱི་བོ་གནམ་བསྟན་སུས་ཀྱང་རང་ཉིད་ཀྱི་སྤྱི་ཚོགས་ནང་དུ་རྒྱུས་མངའ་ཡོད་པའི་ཤེས་འཇོན་ལྷག་བསམ་གྱིས་ཕྱུག་པའི་སྐྱེ་བོ་ཡོད་ན་ངོ་སྤྲོད་གནང་རོགས་གསུངས་མཁན་མེད་ཀྱང་ངོ་སྤྲོད་བྱེད་རྒྱུ་དེ་གལ་ཆེན་པོར་མཐོང་ནས་འདིར་མི་ངོ་ཁ་ཤས་ངོ་སྤྲོད་ཞུ་རྒྱུ།  བཀའ་བློན་སྦུག་གཏན་སློབ་ཀྱི་སློབ་སྤྱི་གནང་བཞིན་པ་སྐུ་ངོ་སྐལ་བཟང་བསྟན་འཛིན།  རྡོ་རྗེ་གླིང་གཏན་སློབ་ཀྱི་མཐོ་རིམ་རྒྱལ་རབས་དགེ་རྒན་བསོད་ནམས་ཆོས་སྒྲོན། སྦེལ་ཀོབ་གཏན་སློབ་ཀྱི་སློབ་སྤྱི་མཐར་ལམ་སྒྲོལ་མ། སིམ་ལ་དང་མ་སུ་རི་གཏན་སློབ་ཀྱི་བོད་རིགས་དབུ་འཛིན་༼རེག་ཌར་༽ཟུར་པ་ཀརྨ་རྣམ་རྒྱལ་བཅས་ཡིན། ཁོང་རྣམས་ནི་ཤེས་ཡོན་གྱི་གཤོག་རྩལ་རྒྱས་ལ་ལྷག་བསམ་གྱི་རྒྱབ་འཁྱོངས་པ། དྲང་བདེན་དཔའ་ཚུགས་ལྡན་པའི་མི་བོ་ཤ་སྟག་ཡིན་པ་རྒྱུས་ལོན་བྱུང་བས་བཀའ་ཁྲི་སྤྱི་འཐུས་གང་ལྟར་བོད་དོན་ལ་ལྷག་བསམ་རྣམ་དག་གི་མི་ངོ་སྤུས་དག་ཤ་སྟག་ཡིན། གོང་གསལ་གྱི་སྐྱེས་བོ་ཁག་མཐོང་དུས་༸སྐྱབས་མགོན་རྒྱལ་བའི་དབང་པོ་མཆོག་ནས་བཙན་བྱོལ་དུ་ཕེབས་མ་ཐག་ཤེས་ཡོན་སློབ་སྦྱོང་ལ་ཐུགས་འཁུར་ཆེ་བཞེས་བསྐྱངས་ནས་བྱུང་བའི་ཤེས་ལྡན་པ་ངོ་གནོང་མི་དགོས་པ་ཤ་སྟག་ཡིན་པའི་ངེས་ཤེས་འདྲོངས་པོ་བྱུང། གལ་སྲིད་ས་གནས་ཁག་སོ་སོར་ཁོང་དང་ཁོང་འདྲ་བའི་སྐྱེ་བོ་སུ་ཡོད་ནའང་སྐྱེ་བོ་སྒེར་སོ་སོས་ཀྱང་མི་ངོ་སྤྱན་འབུལ་ཞུ་དགོས། ཚོགས་པ་སྐྱིད་སྡུག་ཁག་མིན་ཀྱང་གང་ལྟར་རང་ཡུལ་དགྲ་ལག་ཏུ་ཤོར་བའི་བོད་མི་སྤྱི་བོ་གནམ་བསྟན་ཡོངས་ཀྱི་ངོས་ནས་ལས་འགན་རེ་འཁྱེར་ཐུབ་ན་ཐིག་པ་བསགས་པའི་རྒྱ་མཚོ་བཞིན་ནམ་ཞིག་གཉེན་ལ་འཕྱར་རིན་ཡོད་པ་དང་དགྲ་ལ་ངོམས་རིན་ཡོད་པའི་བོད་སྤྱི་པའི་དབུ་འཁྲིད་སྤུས་དག་ཤ་སྟག་སླེབས་ས་དེར་སླེབས་ཐུབ་པའི་རེ་བ་དང་སྨོན་འདུན་བཟང་པོའང་ལྷན་དུ་ཡོད།