མི་རབས་གསར་བའི་ཕུགས་བསམ་གྱི་འཆར་སྣང་། འཇིགས་མེད་ཚེ་རིང་།

“༼བོད་དོན་༽ ཟེར་བ་ནི་ཅི་ཞིག་གི་བརྡ་ཆད་རེད་དམ། འཛམ་བུའི་གླིང་གི་མི་ཧ་ཅང་མང་པོ་ཞིག་གིས་འདི་ཉིད་རྟོགས་མེད་པ་མ་ཟད།  བོད་མི་མང་ཙམ་ཞིག་ལའང་བོད་དོན་ཟེར་བ་ནི་མདོར་དྲིལ་ན་ཅི་ཞིག་ཡིན་པ་གསལ་བརྗོད་བྱེད་ཐུབ་པའི་གདེངས་ཚོད་མེད་པ་ཡིན།  ཡིད་སེམས་སྨྲེང་བར་བྱེད་པའི་རྒྱུ་མཚན་ཁ་ཤས་ཡོད་པ་ནི་བཙན་བྱོལ་ནང་ཆབ་སྲིད་བཙོན་ཟུར་གྱི་ཁེ་དབང་བླངས་ཡོད་པའི་མི་ཁག་ཅིག་གིས་རྒྱུ་མཚན་ཅི་ཡང་མེད་པའི་བྱེད་སྟངས་ཀྱིས་འཚོ་བ་རོལ་བའི་ལམ་ཁ་ཁེགས་པར་བྱས་ཏེ་བཙན་བྱོལ་དུ་འབྱོར་ཡོད་པ་དེ་དག་ཡིན།  གལ་སྲིད་ཆབ་སྲིད་ཀྱི་ལས་དོན་བྱེད་པོ་ཞིག་གི་ངོས་འཛིན་ཡོད་པའི་སྐད་ཆ་བཤད་ན་དེ་ལ་“༼དམིགས་གཏད་༽”ཅིག་ཡོད་དགོས་ཤིང་། ལས་དོན་གང་ཡིན་ཡང་འདི་ཉིད་གཞིར་བཞག་གིས་མགོ་རྩོམ་ངེས་ཡིན། “༼དམིགས་གཏད་༽”མེད་པའི་ལས་དོན་བྱེད་སྟངས་ཀྱི་རྣམ་འགྱུར་འདི་ཡིས་ངས་རང་ཉིད་ཀྱི་སྤྱི་ཚོགས་ལ་མ་འདོད་པ་བྱེད་ཀྱི་ཡོད་ལ། ཤེས་ཡོན་གྱི་འདབ་ལག་མ་རྒྱས་པའི་མི་སྡེའི་སྤྱི་ཚོགས་ཀྱི་སྣང་བརྙན་གསོན་པོ་དེའང་རེད་ཅེས་སྨྲ་བར་སྤོབས། ཡིད་ཐང་ཆད་བྱེད་ཀྱི་རང་རེའི་མི་ལ་རྒྱ་ཅན་ཁ་ཤས་དང་། སྙན་སྙན་བདེན་བདེན་གྱི་གཏམ་སྨྲ་བར་ཐོགས་པ་མེད་པའི་མི་ཁག་ཅིག་གི་བདེན་པ་ཡིས་ང་ལ་སྲིད་གཞུང་གི་རིག་གནས་འདི་ལ་སུན་སྣང་འབྱུང་བའི་རྒྱུ་མཚན་མང་ཙམ་ཚོར་དུ་འཇུག་ནའང་མི་ལེགས་པ་རྐྱང་རྐྱང་མ་ཡིན་པའི་དམངས་གཙོའི་ལམ་ལུགས་ཀྱི་མིང་འདོགས་བྱས་པའི་སྤྱི་ཚོགས་ལམ་ལུགས་འདི་ཉིད་ཀྱི་ཁྲོད་དུ་སྡུག་སྐད་འདོན་པ་ལས་གཞན་གྱི་ཐབས་ནི་རང་ཉིད་ཀྱིས་ཀྱང་སྤོབས་པ་ཆེན་པོས་བསམ་ཚུལ་ཅིག་སྨྲ་བ་དེའོ།
 

བོད་ཀྱི་ལོ་རྒྱུས་དེབ་ཐེར་མཇལ་མྱོང་བ་ཁག་ལས་ཤེས་གསལ་ལྟར་ན་རང་རེ་བའི་སྐལ་བ་ས་ལ་ཆགས་ནས་བཟུང་བོད་དོན་ཐད་ཚད་མེད་པའི་སྐུ་ལས་བསྐྱོན་གནང་མཁན་ནི་༧གོང་ས་མཆོག་ཡིན་ཞིང་། ཁོང་གིས་“༼བོད་མིར་བདེ་སྐྱིད་ལྡན་ན་ལམ་ལུགས་ཅི་ཡིན་ལ་རྩོད་པ་མེད་པའི་༽”དགོངས་ཚུལ་གནང་ཡོད། དགོངས་ཚུལ་འདི་ལས་བསྟན་པའི་“༼དམིགས་གཏད་༽”ནི་བདེ་སྐྱིད་ཡིན་ཞིང་། དབུ་མའི་ལམ་དང་། རང་བཙན་སོགས་གང་ཡིན་ཡང་འདི་ཉིད་སྒྲུབ་པའི་ཐབས་ལམ་དུ་འཁྱེར་དགོས་པ་གསལ་བོ་ཡིན། མི་སུ་འདྲ་ཞིག་ཡིན་ཡང་“༼བདེ་སྐྱིད་༽”བརྩོན་ལེན་བྱེད་པ་ནི་རྩོད་མེད་ཅིག་ཡིན་ཡང་། དེ་ཉིད་ཇི་ལྟར་སྒྲུབ་པའི་ཐབས་ནི་ཧ་ཅང་བཤད་ཁག་པོ་ཆགས་ཡོད། མི་ལོ་ལྔ་བཅུའི་རིང་གི་བོད་དོན་འཐབ་རྩོད་ཀྱི་བྱུང་རིམ་ཁྲོད་དུ་བོད་མིའི་བདེ་སྐྱིད་སྒྲུབ་པའི་ཐབས་ལམ་ལ་རང་བཙན་དང་དབུ་མའི་ལམ་གཉིས་བྱུང་ཡོད་པ་དང་། རང་བཙན་ལམ་ལུགས་ཀྱིས་བདག་དབང་ཐད་ལོ་རྒྱུས་ཀྱི་རྗེས་འདེད་བྱས་པ་ཞིག་ལས་གཞན་གྱི་སྒྲོམ་གཞི་ཅི་ཡང་འདོན་ཐུབ་མེད་པ་མ་ཟད། རང་བཙན་རིང་ལུགས་པ་ཁག་ཅིག་གི་བཤད་སྲོལ་ལྟར་ན་“ང་ཚོའི་(རང་བཙན་)ལངས་ཕྱོགས་འདི་ཉིད་ཀྱི་མ་འོངས་པའི་མཇུག་འབྲས་ག་འདྲ་ཞིག་ཡིན་མིན་བརྗོད་དུ་མེད་ནའང་ལོ་རྒྱུས་ཀྱི་ནག་ཉེས་མི་ཕོག་པའི་གདེངས་ཚོད་ཡོད་”ཟེར་གྱི་ཡོད་པ་དང་། གཞན་དེ་སྔ་ཕྱི་ལོ་ ༢༠༠༨ ལོའི་དམིགས་བསལ་ཚོགས་ཆེན་སྐབས་ཀྱི་གཏམ་གོ་ཐོས་ཤིག་ལ་ནུབ་ཕྱོགས་ནས་ཡོང་བའི་གཞོན་ནུ་མ་ཞིག་གིས་“ཕྱི་ཡུལ་ནས་སྐྱེས་པའི་མི་རབས་གསར་པ་ང་ལྟ་བུའི་བོད་དོན་སེམས་འཁུར་ནི་རང་བཙན་ཞེས་པའི་ཚིག་འདི་ལ་འཇུས་ནས་ཡོང་བ་ཞིག་ལས་རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་འོག་ནས་འདུག་འདོད་ཀྱི་བསམ་ཚུལ་འཁྱེར་ནས་ཡོང་བ་མིན་”ཞེས་མི་རབས་གསར་པའི་བོད་དོན་སེམས་འཁུར་གྱི་འབྱུང་རྩ་ནི་རང་བཙན་ལངས་ཕྱོགས་ལ་རེག་ལས་པར་སྒྲུབ་ཡོད་པ་ལྟ་བུ་ཡིན། འོན་ཀྱང་། དབུ་མའི་ལམ་ནི་རང་བཙན་ལངས་ཕྱོགས་ལས་གཞུང་ལུགས་ཅན་དུ་གྱུར་ཡོད་པ་དང་། དེ་སྔ་《སི་ཊ་སི་སྦག་གི་གྲོས་འཆར་》ནས་དེང་གི་《བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་ཡོང་ཐབས་ཀྱི་བསམ་འཆར་》གྱི་བར་དུ་བཙན་བྱོལ་བོད་གཞུང་གིས་རང་སྐྱོང་གི་ངོ་བོ་དང་སྒྲོམ་གཞི་བཀོད་དེ་རིམ་འགྱུར་སྲིད་བྱུས་ཀྱི་དོན་སྙིང་ལྡན་པའི་དབུ་མའི་ལམ་གྱི་ལངས་ཕྱོགས་ཤིག་གསལ་བོར་བརྗོད་ཡོད།

ལངས་ཕྱོགས་གཉིས་ཀྱི་གང་ཡིན་ཡང་མི་ལོ་ལྔ་བཅུའི་རིང་ལ་“༼དམིགས་གཏད་༽”དང་ཉེ་བའི་རེ་བ་ཅི་ཡང་འཆར་མེད་པ་དང་། རིམ་འགྱུར་དབུ་མའི་ལམ་གྱི་སྲིད་བྱུས་ཀྱིས་བོད་ཀྱི་བདེ་སྐྱིད་དེ་ཚད་གང་ཞིག་ཏུ་བཞག་ཡོད་པ་གཏིང་ཟབ་པའི་སློབ་སྦྱོང་བྱེད་དགོས་པ་ཞིག་ཡིན། ལྷག་པར་དུ་《བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་ཡོང་ཐབས་ཀྱི་བསམ་འཆར་གྱི་འགྲེལ་བརྗོད་》ཀྱི་ཡིག་ཆ་དེ་ལས་རང་གི་སྲིད་གཞུང་ལ་དགོས་འདོད་འདོན་པའི་ཞུ་སྙན་གྱི་རྣམ་པ་ང་ཚོས་ཡང་ཡང་ཚོར་ཐུབ་པ་དང་། ཡིག་ཆ་འདིའི་ནང་དུ་མི་རིགས་ས་གནས་རང་སྐྱོང་གི་བཅའ་ཁྲིམས་ལས་གསལ་བའི་ཐོབ་ཐང་དེ་ཞིང་ཆེན་ཕལ་བའམ་རྒྱ་མི་རང་གི་ཞིང་ཆེན་དང་འདྲ་མཚུངས་སམ། དེ་ལས་དམའ་བ་ཡིན་པའི་གནས་བབ་ལ་འགྱུར་བ་ཐེབས་དགོས་པའམ་མི་འདོད་པ་བྱེད་ཀྱི་ཡོད་པ་ལས་གཞན་ཀྲུང་གོའི་རྩ་ཁྲིམས་ཀྱི་གཞི་རྩའི་ལྟ་གྲུབ་དང་མ་འགལ་བའི་ཐོག་ནས་རང་ཁྱིམ་རང་བདག་བྱེད་ཀྱི་ཡིན་པར་བསྟན་པ་དེ་ཡིན།

འོན་ཀྱང་ཀྲུང་གོ་གུང་ཁྲན་ཏང་གིས་འདི་ཉིད་ལ་མིང་འདོགས་སྣ་ཚོགས་བྱས་ཏེ་ངོས་ལེན་བྱེད་ཀྱི་མེད་པ་དང་། རང་བཙན་གྱི་ཐེམ་སྐས་རེད་ཟེར་བའི་བཤད་ཕྱོགས་སྤེལ་ཏེ་འཇིགས་སྣང་བྱེད་ཀྱི་ཡོད། འཇིགས་སྣང་འདི་ཉིད་ཀྱིས་ལོ་ངོ་དུ་མའི་རྗེས་སུ་རྒྱ་ལག་ནས་བོད་འདི་ཉིད་སྔར་གནས་སུ་གཤེགས་པར་དོགས་པ་དང་། མཁྲེགས་བཟུང་གིས་བོད་ཀྱི་མི་རབས་གསར་བ་རྣམས་ཀྱིས་ལོ་རྒྱུས་བརྗེད་ཐབས་སུ་མི་སེར་སྤེལ་བའི་སྲིད་བྱུས་ལག་བསྟར་བྱེད་ཀྱིན་པ་ནི་རྩོད་མེད་ཅིག་ཡིན། གལ་སྲིད་ཀྲུང་གོ་གུང་ཁྲན་ཏང་གིས་བོད་ལ་མི་སེར་སྤེལ་བའི་ལམ་ལུགས་འདི་ཉིད་འགྱུར་བ་ཐེབས་དགོས་ན་ང་ཚོས་ངེས་པར་དུ་གསར་བརྗེ་ཡི་ལས་དོན་ཞིག་ལ་གོམ་པ་སྤོ་དགོས་པ་དང་། གསར་བརྗེ་དེ་ཡང་དབུ་མའི་ལམ་གྱིས་དབུས་གཞུང་དུ་སྨྲ་བའི་ཀྲུང་གོ་སྲིད་གཞུང་གི་དམངས་གཙོ་གཅིག་སྡུད་ལམ་ལུགས་དེ་ཡང་དག་པའི་དམངས་གཙོའི་ལམ་ལུགས་སུ་བསྒྱུར་རྒྱུ་དེ་ཉིད་ལགས།

ངས་བསམ་ན་བོད་དོན་འཐབ་རྩོད་ཀྱི་མཇུག་འབྲས་ཅི་འབྱུང་ལ་མ་ལྟོས་པར་མིའི་ཚེ་སྲོག་གི་རྩིས་ཐང་ནི་བླ་ན་མེད་པ་དེ་རུ་ལྟ་དགོས་ཤིང་། རང་དབང་གི་ཆེད་དུ་རང་དབང་ཤོར་བ་དང་། རང་དབང་གི་ཆེད་དུ་ཚེ་སྲོག་ཤོར་བ་ནི་མཇུག་འབྲས་མེད་པའི་སྡུག་ལས་ཁོ་ན་ཡིན་པ་ལས་འདི་ལ་གནའ་བོའི་སོ་ཁུ་ར་ཏིས་བཞིན་རང་དབང་གི་ཆེད་དུ་ཚེ་སྲོག་ཤོར་བར་རྩ་ཆེན་དུ་བརྩི་བའི་བསམ་བློ་རང་རེའི་གནས་བབ་ལ་བལྟས་ཚེ་ང་ལ་ནམ་ནམ་ཞར་ཞར་དུ་འཁོར་གྱི་མི་འདུག་ལགས། དོན་དངོས་བཤད་ན་ང་ལ་བོད་དོན་འཐབ་རྩོད་ཁྲོད་ཀྲུང་གོ་གུང་ཁྲན་ཏང་གིས་འགྲོ་ཞོར་ལམ་དུ་བགྲོངས་པའི་རྔ་ཡུལ་གྱི་སློབ་ཕྲུག་ལྷུན་གྲུབ་མཚོ་དང་འཐབ་རྩོད་ཀྱིས་སྲོག་ཐོག་གི་ཉེས་ཆད་ཕོག་པའི་མོ་ལོ་ཉེར་གསུམ་སོན་པའི་ཕུན་སྐྱིད་སོགས་ལས་ཚེ་སྲོག་ལ་ཕངས་སེམས་སྐྱེས་པའི་ཚོར་བ་སླེབས་ཤིང་། ཚོར་བ་དེ་ཉིད་ཀྱིས་ཕྱིར་མི་ལོ་ལྔ་བཅུའི་རིང་གི་ཀྲུང་གོ་གུང་ཁྲན་ཏང་གིས་བསད་བསད་ཤི་ཤི་ཐམས་ཅད་ཀྱི་ཚེ་སྲོག་ལ་ཕྱིར་དྲན་ཞིག་བྱས་པས་བོད་དོན་འཐབ་རྩོད་ཀྱི་ལས་རིམ་ཁྲོད་དུ་“༼འགན་ལེན་༽”ཞིག་དགོས་པའི་མྱོང་བ་སླེབས་པ་དང་། འགན་ལེན་དེ་ནི་རྙོག་དྲ་ཅན་གྱི་སྡོམ་དྲ་ལྟ་བུ་ཞིག་ཏུ་བཟོ་འདོད་མ་བྱས་པར་ཐད་ཀར་“༼ཚེ་སྲོག་ལ་འགན་ལེན་༽”ཞེས་ཐག་བཅད་ནས་སྨྲ་བའི་འདོད་པ་བྱུང་།  ངས་ཡིད་ཆེས་བྱེད་ཐུབ་པ་ཞིག་ལ་བོད་མི་རིགས་ཀྱི་སེམས་ཁམས་འདི་ཡིས་བསམ་གཟས་ནས་མིའི་ཚེ་སྲོག་ལ་གནོད་པའི་ལས་བགྱི་མི་ཐུབ་པ་ངེས་ནའང་། གནས་སྟངས་རྒྱུས་མ་ལོན་པའི་བྱེད་སྟངས་ཀྱི་ཁྲོད་ནས་བོད་མིའི་ཚེ་སྲོག་མང་པོ་གཏུམ་སྤྱོད་ལྡན་པའི་ཀྲུང་གོ་གུང་ཁྲན་ཏང་བའི་ལག་ཏུ་ལྷུང་ཡོད་པ་དང་།  ཡ་ང་སྙིང་རྗེ་མེད་པའི་གསོད་སྟངས་དེ་ཉིད་ནི་ཁོ་ཚོས་མུ་མཐུད་ནས་གསོད་ཐུབ་པའི་སྦྱོང་བརྡར་གྱི་ལས་རིམ་ཞིག་ཏུ་ལྟ་གིན་ཡོད་ན་ཚོགས་པ་འདིའི་འཇིགས་སྐུལ་གྱི་ལྟ་བ་འདི་མེད་པར་མ་སོང་བར་དུ་ང་ཚོས་བོད་དོན་འཐབ་རྩོད་ཀྱི་ཁྲོད་དུ་ཚེ་སྲོག་ལ་འགན་ལེན་བྱེད་པའི་གདེངས་ཅི་ཡང་རྙེད་མི་ཐུབ་བོ།  

གནད་དོན་འདི་ནི་ང་ཚོས་བླ་བྲང་འཇིགས་མེད་ལགས་ཀྱིས་བརྙན་འཕྲིན་བརྒྱུད་བཙོན་ཁང་གི་མྱོང་ཚོར་བཤད་པ་ལས་བདེན་དཔང་བྱེད་ཐུབ་པ་དང་། དམར་ཤོག་དམག་མིའི་གཏུམ་དྲག་གི་སྤྱོད་པ་མཐོང་མྱོང་བའི་སྐྱེ་བོ་ཀུན་གྱིས་འདི་ཉིད་ལ་བདེན་དཔང་བྱེད་པར་ངས་ཡིད་ཆེས་བྱེད་ཐུབ། དེ་སྔ་བོད་དོན་འཐབ་རྩོད་ཆེད་ཚེ་སྲོག་ཤོར་བའི་དཔའ་བོར་བསྔགས་པ་དག་གི་བསམ་ཚུལ་ལ་འདང་ཞིབ་མོར་རྒྱབ་ན་རང་གི་བདེ་སྐྱིད་དོན་གཉེར་གྱི་ཆེད་དུ་འཐབ་རྩོད་བྱས་པས་ཐ་མ་རང་ཉིད་དགའ་སྡུག་གི་ཚོར་བ་ཅི་ཡང་ལོངས་སུ་སྤྱོད་མི་ཐུབ་པའི་གནས་སུ་བསྐྱལ་བ་དང་། ཤོར་བའི་ཚེ་སྲོག་གི་རིན་ཐང་ནི་“༼རླབས་ཆེན་པོའོ་༽”ཟེར་བའི་ཁ་གཡང་ཞིག་གི་ངོགས་སུ་གནས་པ་ལས་གཞན་གྱི་ཐོབ་བྱ་ཅི་ཡང་མེད་པས་ཁ་གཡང་ཙམ་གྱི་ཆོ་ལོ་འདི་ནི་ངས་མི་འདོད་ལ་འདས་པོ་དག་གིས་ཀྱང་འདོད་མི་སྲིད། ཤོར་བའི་ཚེ་སྲོག་ལ་ཁ་གཡང་བསྒྲགས་ཏེ་བེད་སྤྱོད་གཏོང་མཁན་རྣམས་ཀྱིས་དེ་བས་ཀྱང་འདོད་མི་སྲིད། དེ་ཡི་ཕྱིར་ན་དེང་གི་གནས་སྟངས་ལ་བསམ་ན་བོད་དོན་འཐབ་རྩོད་ཀྱི་ཁྲོད་དུ་ཆེས་གནད་འགག་ཆེ་ཤོས་ནི་“༼ཚེ་སྲོག་ལ་འགན་ལེན་༽”བྱེད་རྒྱུ་འདི་ལགས་ཤིང་། དེ་སྔ་ཕྱི་ལོ་ ༢༠༠༨ ལོར་བཙན་བྱོལ་བོད་གཞུང་གིས་“༼རྨས་པའི་མི་ལ་སྨན་བཅོས་བྱེད་དགོས་༽”སོགས་ཀྱི་དགོས་འདུན་འདོན་དུས་གུས་པའི་ངོས་ནས་“༼ཤོར་བ་མེད་ན་ཐོབ་པ་མེད་༽”ཅེས་རྩོམ་ཡིག་ཏུ་བྲིས་པ་ལ་གནོང་འགྱོད་ཆེན་པོ་བྱེད་ཀྱིན་ཡོད།  ལྷག་པར་དུ་གུང་ཁྲན་ཏང་གི་སྲིད་བྱུས་ཀྱི་འོག་ནས་བོད་དོན་འཐབ་རྩོད་དང་འཐབ་རྩོད་མཁན་གྱི་ཚེ་སྲོག་ལ་འགན་ལེན་བྱེད་པ་མཉམ་དུ་འགྲོ་མི་ཐུབ་པས་ང་ཚོས་འགན་ལེན་འདི་ཉིད་སྲིད་བྱུས་ཀྱི་དོན་དངོས་གཞན་ཞིག་གི་འོག་ཏུ་འཁྱེར་བར་བསམ་བློ་གཏོང་དགོས་ཀྱི་འདུག

དེང་གི་སྤྱི་ཚོགས་ཀྱི་ཁྲོད་དུ་བསམ་བློ་གཏོང་སྟངས་ཀྱི་ཁྱད་པར་ཙམ་ལས་ “རང་དབང་”ཞེས་པ་འདི་མེད་པར་ངེས་ནའང་། རང་ཉིད་མི་རིགས་གང་གི་ཁོངས་སུ་གཏོགས་པའི་སེམས་ཀྱི་འཁྱེར་སོའི་རང་དབང་ནི་མང་མང་ལ་ཡོད་པ་ཡིན་པས་རང་རེ་བ་ལའང་འདི་ཉིད་གལ་ཆེན་པོ་ཡིན་པ་ནི་བརྗོད་མ་དགོས་པ་ཞིག་ལགས། སྲིད་གཞུང་ལམ་ལུགས་ཀྱི་ནང་དུ་ཧ་ཅང་གལ་ཆེན་པོ་ཞིག་ནི་རང་ཐག་རང་གཅོད་ཡིན་ཅིང་། ཀྲུང་གོ་གུང་ཁྲན་ཏང་གི་ལས་དོན་བྱེད་ཕྱོགས་ལྟར་ན་རང་སྐྱོང་ས་གནས་ལ་སྤྲད་པའི་དབང་ཆའམ་རང་དབང་ཅི་ཡང་མེད་པར་དམར་ཤོག་རང་ནས་ཐག་གཅོད་བྱེད་པ་དང་། ས་གནས་མི་རིགས་ཀྱི་དགོས་མཁོ་དང་འཚམ་པའི་ཆབ་སྲིད་ལམ་ལུགས་དང་། དཔལ་འབྱོར། རིག་གནས་བཅས་ཀྱི་ཐད་ཀྲུང་གོ་གུང་ཁྲན་ཏང་གི་མི་རིགས་ས་གནས་རང་སྐྱོང་གི་བཅའ་ཁྲིམས་ནང་དབུས་གཞུང་གིས་མོས་འདོད་མེད་པར་ཐག་གཅོད་མི་ཆོག་པར་གཏན་འབེབ་བྱས་ཏེ་རང་སྐྱོང་གི་རང་དབང་མེད་པ་བཟོ་ཡོད་པ་དང་།  མི་རིགས་ས་གནས་རང་སྐྱོང་དང་དབུས་གཞུང་གཉིས་ཀྱི་དབང་ཆ་ཆ་བགོས་མེད་པར་ས་གནས་རང་སྐྱོང་གི་འཛིན་སྐྱོང་རང་དབང་འཕྲོག་ཡོད་པ་སོགས་མདོར་ན་མངགས་བཅོལ་དེང་ལེན་གྱི་ལས་ཀ་ཞིག་ལས་རང་གི་དགོས་མཁོར་འཚམ་པའི་ཐག་གཅོད་ཀྱི་རང་དབང་མེད་པས་ང་ཚོས་ཆེས་ཐོག་མར་རང་དབང་འདི་དག་“དམིགས་གཏད་”སྒྲུབ་པའི་ཐབས་ལམ་དུ་འཛིན་དགོས།  ཀྲུང་གོ་གུང་ཁྲན་ཏང་གི་འཛིན་སྐྱོང་གི་ནང་དུ་འདྲ་མཉམ་རང་དབང་མེད་པའི་གནས་ཚུལ་ཧོན་ཐོར་བྱེད་ཅིག་ཡོད་པ་ནི་མི་རིགས་ས་གནས་རང་སྐྱོང་དང་ཞིང་ཆེན་གཞན་པ་ཁག་བར་གྱི་ཧེ་བག་དེ་ཡིན། མི་རིགས་ས་གནས་རང་སྐྱོང་ནི་རྒྱ་རིགས་མ་ཡིན་པའི་བོད་དང་ཤིན་ཅང་། སོག་པོ་ལྟ་བུའི་གྲངས་ཉུང་མི་རིགས་སུ་བརྩིས་ཡོད་པ་གཙོ་བོ་ཡིན་པའི་ས་ཁུལ་ཁག་ཅིག་དང་། ཞིང་ཆེན་དུ་གནས་པ་ནི་རྒྱ་རིགས་གཙོ་བོ་ཡིན་པ་དང་་གྲངས་ཉུང་མི་རིགས་ཁ་སྦྱར་གྱི་ཞིང་ཆེན་ཁག་བཅས་ཡིན། མི་རིགས་ས་གནས་རང་སྐྱོང་གི་ཁྲིམས་བཟོའི་དབང་ཚད་ལྟ་བུར་མཚོན་ན་དབང་ཚད་གཏན་མ་འཁེལ་བའི་རྣམ་པའི་ངང་ཡོད་པ་དང་། ལས་དོན་གང་ལའང་འགོག་རྐྱེན་ཧ་ཅང་ཆེན་པོ་ཡོད་པ་མ་ཟད། ཀྲུང་གོའི་རྒྱལ་ཡོངས་མི་དམངས་འཐུས་མིའི་ཚོགས་ཆེན་གྱི་བཀའ་འཁྲོལ་ཐོབ་དགོས་པ་ཡིན།  ཞིང་ཆེན་གཞན་པ་ཁག་ལ་ཀྲུང་གོའི་རྒྱལ་ཡོངས་མི་དམངས་འཐུས་མིའི་ཚོགས་ཆེན་གྱི་་བཀའ་འཁྲོལ་ཐོབ་པར་འབད་བརྩོན་བྱེད་མི་དགོས་པར་སྙན་ཞུ་ཙམ་གྱིས་ཆོག    མི་རིགས་ས་གནས་རང་སྐྱོང་ཁག་གི་ལས་དོན་ལ་ཀྲུང་གོ་གུང་ཁྲན་ཏང་གིས་སྟངས་འཛིན་ནན་མོ་བྱེད་ཀྱིན་པ་དང་། དམར་ཤོག་གི་དགོས་མཁོ་གཞིར་འཇོག་པ་ལས་མི་རིགས་ས་གནས་རང་གི་དགོས་མཁོ་སྐོང་བའི་རང་དབང་མེད་པ་ཡིན།  གནས་སྟངས་འདི་ལས་ང་ཚོས་མི་རིགས་ས་གནས་རང་སྐྱོང་ཁག་དང་ཞིང་ཆེན་གཞན་པ་ཁག་ལ་དབུས་གཞུང་ངོས་ནས་འདྲ་མཉམ་གྱི་ལྟ་སྟངས་མེད་པ་མ་ཟད། ཆེས་སྤྱིར་བཏང་གི་འདྲ་མཉམ་རང་དབང་ཙམ་ཡང་མེད་པའི་གནས་སྟངས་ལའང་ཚོད་དཔག་ཆོག་པ་ཡིན།  དེ་ལས་གཞན་འཚོག་འཛོམས་དང་།  སྨྲ་བརྗོད་རང་དབང་། དཔར་བསྐྲུན་རང་དབང་། མདོར་ན་སྤྱི་དམངས་ལ་ཡོད་ཆོག་པའི་རང་དབང་ཅི་ལའང་ཐེ་གཏོགས་བྱེད་པ་དང་། དབང་བསྒྱུར་གྱི་དགོས་མཁོ་དང་མི་མཐུན་པའི་ལས་དོན་གང་ཅི་ཡོད་ཚང་མར་བཀག་འགོག་དང་། ཉེས་འདོགས་སྣ་ཚོགས་ཀྱིས་བཙོན་འཇུག་བྱེད་པ།  སྲོག་ཐོག་གཏོང་བ་སོགས་མི་མང་ལ་འཇིགས་སྐུལ་གྱི་ལས་དོན་ཅི་ཡང་བྱེད་ཀྱིན་ཡོད། བོད་དོན་འཐབ་རྩོད་ཀྱི་དམིགས་གཏད་འགྲུབ་པ་ལ་གཞི་རྩའི་རང་དབང་གི་ཆ་རྐྱེན་ནི་མེད་དུ་མི་རུང་བ་ཡིན་པས་རང་སྐྱོང་ས་གནས་ཐད་འཛིན་པའི་དབང་ཆ་གཅིག་སྡུད་ཀྱི་ལམ་ལུགས་ལ་འགྱུར་བ་མ་ཐེབས་པར་རང་ཡུལ་གྱི་འཐབ་རྩོད་ནི་རྨི་ལམ་ཞིག་ལས་དངོས་ཡོད་ཅིག་ནམ་ཡང་ཡིན་མི་སྲིད་པ་དང་། གལ་སྲིད་འཐབ་རྩོད་ཀྱི་རྣམ་པ་ཞིག་བྱུང་བ་ཡིན་ནའང་།  སྒོ་ང་རྡོ་ལ་གཞུས་པའི་གནས་སྟངས་ལས་ང་ཚོས་འགྱུར་བ་གཞན་ཅི་ཡང་མཐོང་མི་སྲིད།

དངོས་ཡོད་ཀྱི་གནས་ཚུལ་མང་ཙམ་ཞིག་ལ་གདོང་གཏད་ནས་བལྟས་པ་ཡིན་ན་རྒྱ་ནག་གི་དམངས་གཙོ་ནི་བོད་དོན་འཐབ་རྩོད་ཀྱི་དམིགས་གཏད་ལ་གལ་ཆེན་ཞིག་ཏུ་གྱུར་ཡོད། མི་མང་གི་མངོན་འདོད་ལ་བདག་པོ་རྒྱག་དགོས་པ་དང་། སྲིད་གཞུང་གིས་སྤྱི་དམངས་འདྲ་མཉམ་གྱི་ཐོབ་ཐང་གསལ་བརྗོད་བྱེད་པར་བགེགས་རྐྱེན་མེད་པ་ཞིག་བཟོ་དགོས་པ་སོགས་ཀྱི་རྒྱུ་མཚན་གྱིས་དམངས་གཙོའི་ལམ་ལུགས་ཀྱི་ཁྲོད་ནས་བོད་དོན་འཐབ་རྩོད་ཀྱི་དམིགས་གཏད་མངོན་པར་གསལ་ཐུབ་པ་ནི་ངེད་ཀྱི་ཚོད་དཔག་གིས་ཐག་གཅོད་ཞིག་ལགས། དེ་སྔ་ཐེ་ཝན་དམངས་གཙོ་ཚོགས་པའི་ཐེ་ཝན་གྱི་སྲིད་འཛིན་ཁྲིན་ཧྲུའུ་ཕེན་གྱིས་བཙན་བྱོལ་དུ་གནས་པའི་བོད་མི་རྣམས་ཀྲུང་གོ་གུང་ཁྲན་ཏང་ངམ་ཀྲུང་ཧྭ་མི་དམངས་སྤྱི་འཐུན་རྒྱལ་ཁབ་ཀྱི་ཆ་ཤས་མ་ཡིན་པར་ངོས་ལེན་བྱས་པའང་དམངས་གཙོའི་ལེགས་བྱང་གི་སྟོབས་ཤུགས་ལས་བྱུང་བ་ཞིག་ཡིན་པས། ངོས་ལེན་འདི་ཉིད་ནི་རྒྱ་ནག་དམངས་གཙོར་འགྱུར་རྗེས་བོད་དོན་འཐབ་རྩོད་ཀྱི་དམིགས་གཏད་འགྲུབ་པར་བརྗོད་པའི་རྒྱུ་མཚན་དུ་བགྲང་ཆོག་པ་དང་།  ནམ་རྒྱུན་རང་རེའི་སྤྱི་ཚོགས་ཁྲོད་དུ་དབྱིན་ཇིའི་རྒྱ་གར་ལ་བཙན་འཛུལ་བྱས་ཀྱང་སྨྲ་བརྗོད་རང་དབང་ཡོད་པས་རང་ས་རང་ནས་རང་བཙན་འཐབ་རྩོད་བྱེད་ཐུབ་ཀྱི་ཡོད་པ་དང་།  ཀྲུང་གོ་གུང་ཁྲན་ཏང་གི་འོག་ཏུ་བཅུག་པའི་བོད་ནི་དེ་སྔའི་དབྱིན་ཇིའི་འོག་གི་རྒྱ་གར་དང་མི་འདྲ་བའི་གནས་ལུགས་རྒྱུ་མཚན་མང་དག་ཅིག་བརྗོད་པའི་བགེགས་ཀྱང་རྒྱ་ནག་གི་དམངས་གཙོའི་ལམ་ལུགས་ཀྱིས་སེལ་བར་ངེས་སོ།  ཕར་བལྟས་ཚོད་ཀྱིས་འཛམ་བུའི་གླིང་གི་རང་སྲིད་རང་སྐྱོང་གི་མངའ་ཁུལ་གང་ཡོད་དམངས་གཙོའི་ལམ་ལུགས་ཅན་གྱི་རྒྱལ་ཁབ་ནང་ཐོན་གྱི་ཡོད་པ་དང་། “འཛམ་གླིང་སྐྱོང་བར་བྱེད་པའི་ཀུན་སྤྱོད་བཟང་པོའི་ནུས་པས་མ་ལྡང་བའི་རྐྱེན་ལས་བྱུང་བའི་དགོེས་ངེས་ཀྱི་ཐབས་ཤེས་”སམ་སྲིད་ཀྱི་ལམ་ལུགས་ལས་ཀྱང་། དམངས་གཙོའི་ལམ་ལུགས་ནི་འོས་ཤིང་འཚམ་པ་རུ་ཀུན་པོས་འགྲེལ་བ་གནང་གི་ཡོད། འདིའི་ཁྲོད་ཀྱི་སྲིད་འཛིན་ལམ་ལུགས་དང་། གྲོས་ཚོགས་ལམ་ལུགས་གང་ཡིན་ཡང་མི་མང་གི་མངོན་འདོད་ལ་བདག་པོ་རྒྱག་པའི་རིམ་པ་ཞིག་ཡོད་པས་ཀྲུང་གོ་རུ་དམངས་གཙོའི་ལམ་ལུགས་དར་བར་བྱས་ཚེ་བོད་མི་རྣམས་ཀྱང་རང་ཉིད་ཀྱི་སྐད་ཆ་ཡོད་པའི་ལམ་དུ་འགྲོ་བར་རེ་བ་ཡོད་པ་ཡིན།   རྒྱ་ནག་པའི་ཧམ་སེམས་ཀྱི་མཆེ་བ་རིང་མོ་དེས་ང་ཚོའི་སེམས་སུ་བློ་དོགས་ཀྱི་ཚོར་བ་ཡང་ཡང་སྟེར་གྱི་ཡོད་ནའང་། ང་ཚོའི་རང་ཐག་རང་གཅོད་ཀྱི་འདོད་པ་ལ་ནམ་ཡིན་ཡང་རེ་བ་ཆེན་པོ་བྱས་ཆོག་པ་དང་།  མོས་འདོད་ཀྱི་གཏམ་བཤད་པ་ཙམ་གྱིས་ཁྲི་མུན་དང་སྲོག་ཐོག་གཏོང་བ་སོགས་ཀྱི་འཇིགས་པ་ལས་སྐྱོབ་ཐུབ་པས་ང་ཚོར་ཚེ་སྲོག་ཤོར་དོགས་ཀྱི་སྐྲག་སྣང་དེ་ཙམ་མེད་པར་དམིགས་གཏད་སྒྲུབ་པའི་ལས་ལ་འཇུག་ཐུབ་ཀྱི་ཡོད།  ལར་ང་ཚོས་“བསད་པས་མི་སོད་བརྒྱ་གསོད་དམ་སྟོང་གསོད། བྲོས་པས་མི་ཐར་བརྒྱ་འབྲོའམ་སྟོང་འབྲོ།” གཏམ་གྱི་མགོ་བོ་ཅི་ཙམ་ཕབ་ཀྱང་སྣང་བ་མཐོ་པའི་དམར་ཕྱོགས་པའི་ང་རྒྱལ་ནི་རི་བོ་ཆིལ་ཆིལ་ཉིལ་བའི་འུར་སྒྲ་ལས་ཀྱང་ཆེན་པོར་གྲགས་ཤིང་།  རྨ་ཀླུང་རབ་ཏུ་ཀྲུག་པའི་སྒྲ་ཆེན་ལས་ཀྱང་རྒྱང་དུ་མཆེད་ན་བསམ་པའི་གདེང་མེད། རྩད་པའི་གོ་བ་མེད། ལྷོད་པས་རང་རེ་བ་དམར་ཕྱོགས་གུང་ཁྲན་པས་མདུན་སར་ཉམས་ཤོར་བའི་བཟོ་ལྟ་བསྟན་པ་ལས་ཐོབ་པར་བྱ་བ་ཅི་ཡང་ཡོད་པར་མི་བསམ་པས་རབ་ཏུ་ལེགས་ཤིང་། ཤིན་ཏུ་མཁས་པར་བསྒྲུབ་པའི་ལས་ལ་འཇུག་པའི་ལམ་ཆེན་ཧ་ཅང་གི་ཡངས་པོ་ནི་རྒྱ་ནག་དམངས་གཙོར་འགྱུར་རྗེས་རང་གི་སྐད་རང་གིས་བསྒྲགས་ཤིང་། རང་གི་དོན་རང་གིས་བྱེད་པའི་ལས་སུ་ལེགས་པར་འཇུག་པ་དེ་ཉིད་དོ།

འཛམ་བུའི་གླིང་གི་ཆབ་སྲིད་ཀྱི་འགྱུར་བར་བློ་ཡི་དཔྱོད་ཚད་ཀྱིས་བལྟས་ན་འདི་ཉིད་ཐབས་སུ་ལེན་པ་ནི་ལེ་ལོའི་བྱ་སྤྱོད་ཅིག་མ་ཡིན་པར་ཧ་ཅང་སྟོབས་དང་ལྡན་པ་ཞིག་ཏུ་ངེས་སོ་ཞེས་སྤྱི་བམ་པའི་གཏམ་ཞིག་དང་བཅས་བརྗོད་རྒྱུ་དང་།   གཞན་ཡིག་ཚོགས་འདིའི་རྩོམ་བྱང་དུ་དོན་དངོས་བཤད་ན་《མི་རབས་གསར་བའི་ཕུགས་བསམ་གྱི་འཆར་སྣང་》 མ་ཡིན་པར་《མི་རབས་གསར་བ་ཞིག་གི་ཕུགས་བསམ་གྱི་འཆར་སྣང་》 ཞེས་འགོད་དགོས་ནའང་བརྗོད་པ་སྙན་པའི་ཆེད་དུ་བྱེ་བྲག་སྟོན་པའི་“ཞིག་”སྒྲ་བཅད་ནས་སྤྱི་བའི་བརྡ་ཆད་དུ་སྒེར་གྱི་བསམ་ཚུལ་སྤྲོས་པར་བཟོད་གསོལ་དགོས་སར་དེ་བཞིན་བྱེད་པ་དང་། འཆར་སྣང་འདི་ཉིད་ཀྱིས་གཞོན་ནུ་གློ་བུར་བ་ཞིག་གི་སེམས་ཀྱི་འཁྱེར་སོ་སྟོན་པ་ལས་རྒན་པ་དཔྱོད་ཤེས་ཅན་གྱི་རྗེས་དཔག་གི་བློ་རིག་ལ་འགྲན་འདོད་པ་མ་ཡིན་ལ། ཕོགས་གཟན་ཉམས་མྱོང་ཅན་ལ་འགྲན་པའི་བཟོ་སྟོན་པ་དེ་བས་ཀྱང་མ་ཡིན་པས་རང་ཁ་གསོ་ཐབས་ཀྱི་རྩལ་ནུས་མེད་པར་སྤྱི་བའི་ལས་དོན་ལ་སེམས་ཁ་མ་དལ་བའི་བླུན་པོ་སྤྱི་བརྟོལ་ཅན་ཞིག་གི་ལབ་ལོབ་ཏུ་ཆ་བཞག་ཀྱང་ནོངས་འགྱོད་མེད་པའོ།