ལོ་ ༡༥ ཁྲིམས་ཆད།

ཡུ་གུར་གྱི་གསར་འགོད་པ་ཞིག་ལ་རྒྱ་གཞུང་གིས་ལོ་ ༡༥ ཡི་ཁྲིམས་ཐག་བཅད་ཡོད་འདུག

ཕྱི་ཚེས་ ༢༤ ཉིན་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་ཡོངས་ཁྱབ་གསལ་བསྒྲགས་ཤིག་སྤེལ་པའི་ནང་། རྒྱ་གཞུང་གིས་ཡུ་གུར་གསར་འགོད་པ་ཧི་ལེ་ཁྲི་ནི་ཡ་ཛིས་རྒྱལ་ཁབ་ཀྱི་བདེ་འཇགས་ལ་གནོད་སྐྱོན་ཚབས་ཆེན་བཟོས་པའི་ཉེས་འཛུགས་འོག་ཚེས་ ༢༣ ཉིན་ཁོང་ལ་ཤིན་ཅང་མི་དམངས་ཁྲིམས་ཁང་དུ་མི་ལོ་བཅོ་ལྔའི་ཁྲིམས་ཐག་བཅད་ཡོད་འདུག་ལ། དེ་ནི་ཁོང་གིས་ཕྱི་ལོ་ ༢༠༠༩ ལོར་ཤིན་ཅང་དུ་ཡུ་གུར་མི་རིགས་ཚོས་གཞི་རྒྱ་ཆེ་བའི་ངོ་རྒོལ་སྐབས་གནད་དོན་དེ་འབྲེལ་གྱི་རྒྱུ་རྐྱེན་འཚོལ་ཞིབ་དང་ནག་ཉེས་དཀར་འདོན་གྱི་ཆེད་དུ་ལས་འགུལ་སྣ་མང་ཞིག་སྤེལ་བ་དང་། ལྷག་པར་དུ་ཧོང་ཀོང་བདུན་རེའི་དུས་དེབ་ཀྱི་བཅར་འདྲི་ཞིག་གི་སྐབས། ཁོང་གིས་ཤིན་ཅང་དམར་ཤོག་དྲུང་ཆེའི་སྲིད་ཇུས་འཛིན་སྟངས་ཐད་ཤུགས་ཆེའི་སྐྱོན་བརྗོད་བྱས་སྟབས་ཁྲིམས་ཐག་བཅད་པ་ཞིག་ཡིན་འདུག

འདིའི་ཐད་གསར་འགོད་མཐུན་ཚོགས་དེས་གསར་འགོད་པ་ཡ་ཛི་ལགས་ཀྱིས་ ༢༠༠༩ ལོའི་ཤིན་ཅང་གི་དོན་རྐྱེན་དངོས་དྲང་པོའི་ལམ་ནས་འགྲེལ་བརྗོད་བྱས་པར་ཁྲིམས་ཐག་བཅད་པ་དེ་གསར་འགོད་རང་དབང་དང་རྦད་དེ་འགལ་ཡོད་པའི་སྐྱོན་བརྗོད་བྱས་ཡོད་པར་མ་ཟད། ཁོང་གང་མགྱོགས་གློད་གྲོལ་གཏོང་དགོས་པའི་འབོད་སྐུལ་ཀྱང་ཞུས་འདུག  

སྐུ་ཞབས་ཡ་ཛི་ལགས་ནི་ན་ནིང་ཕྱི་ཟླ་ ༡༠ པའི་ཚེས་ ༡ ཉིན་རྒྱ་ནག་གི་ཉེན་རྟོག་པས་རང་ཁྱིམ་ནས་འཛིན་བཟུང་བྱས་འདུག་ལ།  ཟླ་འདིའི་ཚེས་ ༢༣ ཉིན་ཤིན་ཅང་འབྲིང་རིམ་མི་དམངས་ཁྲིམས་ཁང་གིས་ཁོང་ལ་ལོ་ ༡༥ ཡི་ཁྲིམས་ཐག་བཅད་པ་རེད།  

གསར་འགོད་པ། དཔལ་ལྡན་རྒྱ་མཚོ།