ང་རང་གི་ལྟེ་ཁྲག་འཕོ་ཡུལ་ནི་མ་ཡུམ་གངས་ཅན་ལྗོངས་ཡིན་ཞིང་། གནས་དེ་ན་ངའི་ཡོད་ཚད་ཀྱི་ཡོད་ཚད་ཀྱང་ཡོད་པ་ཁྱེད་རྣམས་ལ་མ་སྨྲས་ཀྱང་མཁྱེན་ ངེས། ང་དང་ཁོང་། ཁྱོད་དང་ཁྱོད་ཚོ། ཁོ་དང་ཁོ་མོ་ཡོད་ཚད་སྟེས་དབང་ཞིག་གིས་སམ་ལས་དབང་ཞིག་གིས་རྒྱང་རིང་གི་ས་མཐར་ གྱར། ས་མཐར་གྱར་གྱར་བའི་མཐར། ཉིན་ཞག་དང་ལོ་ཟླའི་ཁུར་པོ་གཅིག་ཐོག་གཅིག་ཏུ་བརྩེགས་པའི་རྗེས། གནས་འདི་ནས་ངས་མགྲོན་པོའི་ཁྱུ་ཚོགས་ཤིག་མཐོང་། བསམ་བསམ་པའི་མཐར་ང་ཡང་མགྲོན་པོའི་ནང་གི་གཅིག་དེ་ཡིན་པ་རྟོགས། ང་ཐོག་མར་རྒྱ་གར་དུ་ཡོང་སྐབས་གསོག་སྒར་སློབ་གྲྭ་གཅིག་པུ་མགྲོན་ཁང་གི་ཚུལ་དུ་མཐོང་། ང་རང་ཡང་མགྲོན་པོའི་ཚུལ་དུ་མཐོང་། སྐབས་དེ་ཤེད་དུ་གོང་གི་དབུ་ཁྲིད་འགའ་ཞིག་གིས་ཀྱང་ང་ཚོ་རྒྱ་གར་གྱི་མགྲོན་པོ་ རེད་ཅེས་གླེང་གིན་འདུག དེ་རྗེས་ངས་དྷ་སར་ལོ་ཤས་བསྡད་རྗེས་དྷ་ས་དེ་ཡང་མགྲོན་ཁང་གི་ཚུལ་དུ་མཐོང་། དྷ་སའི་གཡས་གཡོན་སྟེང་འོག་གི་བོད་མི་ཚོ་ཡང་མགྲོན་པོ་རྣལ་མ་ཞིག་ཏུ་མཐོང་། ངས་ལྟ་གིན་ལྟ་གིན་མཐོང་བཞིན་པ་ནི། གཅིག་གིས་གཅིག་ལ་ལག་བརྡ་གཏོང་བ་དང་། གཅིག་གིས་གཅིག་ལ་ཁ་བཏགས་གཡོགས་པ། གྲོང་པ་ཁྱིམ་མཚེས་ཚོ་ཡང་ཡང་ཡང་འགྱུར་བ་འགྲོ་ཚུལ་འདི་མཐོང་སྐབས། ངས་དྷ་ས་ནས་ས་སྐྱེས་རྡོ་སྐྱེས་ཡིན་པའི་བོད་མི་ཚོ་ཡང་མགྲོན་པོར་མཐོང་།
ངས་བོད་མི་འདུས་སྡོད་ཁུལ་གྱི་གཞིས་སྒར་ཁག་གང་སར་སྐོར་བསྐྱོད་ལ་ཐེངས་ཤིག་ཕྱིན། གཞིས་ཆགས་ཀྱི་གྲོང་སྡེ་ཁག་གི་ནང་ཚང་མ་གཅིག་ཤོར་གཉིས་ཤོར་གྱིས་རྡོག་ཆས་རྒྱག་ གིན། གཅིག་མགྱོགས་གཉིས་མགྱོགས་ཀྱིས་ཕར་རྒྱུག་ཚུར་རྒྱུག་གནང་གིན། མགྲོན་ཁང་ཁག་ནས་སང་ཐོིན་གནངས་ཐོན་གྱི་གྲ་སྒྲིག་བྱེད་ཀྱིན་འདུག དེ་ནས་ངས་བལྟས་བལྟས་པའི་མཐར། སྐབས་དེ་དུས་བོད་མི་འདུས་སྡོད་གཞིས་སྒར་ཁག་ཀྱང་མགྲོན་ཁང་གི་ཚུལ་མཐོང་ལ། བོད་མི་ཚོ་ཡང་མགྲོན་པོ་རྣལ་མ་ཞིག་ཏུ་མཐོང་།
དེ་ རྗེས་ལོ་ཤས་རིང་ངས་ནུབ་ཕྱོགས་དང་ཡོ་རོབ་ཁུལ་སོགས་ས་གནས་མང་པོ་ཞིག་ལ་སྐོར་ བསྐྱོད་དུ་ཕྱིན། གནས་དེ་དག་ནི་བོད་མི་ཚང་མས་ལྷ་ཡུལ་ལྟ་བུར་བརྩི་གིན་ཡོད་ཅིང་། བྱིས་པ་འཛིན་རིམ་གསུམ་པ་བཞི་པ་ཙམ་ལས་མ་སླེབས་པ་ཚོས་ཀྱང་། ངའི་སྤུན་མཆེད་ཨ་རི་ལ་ཡོད། ངའི་ཨ་ཁུ་ཡོ་རོབ་ལ་ཡོད། ང་ཡང་མ་འོངས་པར་འགྲོ་གིན་ཡིན་ཟེར། ཡང་མཐོ་སློབ་ཐོན་པ་ཚོས་ཀྱང་ག་ལེར་ག་ལེར་ཐབས་ཤེས་གཏོང་གི་ཡིན་ཟེར། གཞུང་ཞབས་དང་དགེ་རྒན་ལས་བྱེད་ཚོས་ཀྱང་གནས་སྐབས་ཞབས་ཕྱི་ཞུ་གི་ཡིན་ཟེར། རྒས་པོ་དང་རྒན་མོ་ཚོས་ཀྱང་འཚོ་བའི་ཐོག་དཀའ་ངལ་མེད་ཟེར་བཞིན་ཕྲུ་གུ་དང་སྤུན་ མཆེད་ཕྱི་རྒྱལ་དུ་ཡོད་པ་ཚོ་ངོམས་གསོ་གཏོང་གིན་གནས། ཐ་ན་གདན་ས་གྲྭ་ཚང་ཁག་གི་དགེ་འདུན་འདུས་པ་རྒྱ་མཚོའི་ཟས་གོས་གནས་མལ་སོགས་ཀྱང་ སྐུ་ངལ་དང་ཐུགས་ཁྲལ་མེད་གསུང་གིན་ཆོས་ཚོགས་ཁག་དང་མཁན་བླ་དགེ་བཤེས་ཚོ་ཡང་ཡང་ གནས་དེ་ན་ཕེབས་ཀྱི་ཡོད་ཟེར། རྒྱུ་མཚན་དེ་དག་གི་དབང་གིས་གཅིག་བྱས་ན་ལྷ་ཡུལ་ལྟ་བུར་བརྩི་གིན་ཡོད་ཤས་ཆེ།
ང་རང་ནུབ་ཕྱོགས་དང་ཡོ་རོབ་ཁུལ་དུ་སྐོར་གྱིན་སྐོར་གྱིན་མཐོང་བཞིན་པ་ནི། ཚང་མས་གནས་དེ་ནས་རྡོག་ཐོན་གྱི་གྲ་སྒྲིག་བྱེད་ཀྱིན་འདུག ངའི་བསམ་པར་བོད་མི་འདི་ཚོ་ལྷ་ཡུལ་ལྟ་བུའི་ཞིང་ཁམས་དེར་མ་བཞུགས་པར་ཡང་མགྲོན་པོའི་ཚུལ་གྱིས་ཐོན་གྲབས་བྱེད་ཀྱིན་འདུག་སྙམ། ངས་ རང་ཉིད་ཀྱི་ཐོག་བསམ་བློ་ཞིག་བཏང་། ངས་དེ་ན་ལོ་ཤས་ལས་སྡོད་རྩིས་མེད་པ་དང་། གནས་དེ་ནི་བློ་ཕུགས་བཅོལ་ཡུལ་དེ་མིན་པ་མ་བཤད་ཀྱང་ཁྱེད་རྣམས་ཀྱིས་མཁྱེན་ངེས། ཨོའོ། བོད་མི་ཚོ་སླར་ཡང་ལྷ་ཡུལ་གྱི་ཞིང་ཁམས་ལྟ་བུའི་མགྲོན་ཁང་དེ་ཚོ་ཡང་གཡུགས་ཏེ་ ཕེབས་གྲབས་གནང་གིན་ཡོད་པར་ཐུགས་ཁག་མི་འདུག་སྙམ། ད་བོད་མི་ཚོ་ཤར་ཨེ་ཤ་དང་ནུབ་ཕྱོགས་ཨ་རི། ཡོ་རོབ་སོགས་ཡོད་ཚད་བསྐོར་ཟིན་པ་རེད། དངོས་གནས་མགྲོན་པོ་ཚོ་ལོག་ཕེབས་ཀྱང་ཡུལ་སྐོར་གནང་ཟིན་པ་རེད་སྙམ། ད་སྟེང་ལྷ་ཡུལ་དུ་བོད་མི་ཚོ་ཕེབས་པའི་ནུས་པ་མེད་ལ། འོག་ཀླུ་ཡུལ་དུའང་བོད་མི་ཚོ་མགྲོན་པོ་གནང་བར་ཕེབས་པའི་སྐལ་བ་མེད། མཐར་མགྲོན་པོ་ཚོ་ཕེབས་ཕེབས་པའི་མཐར། སྐུ་ངལ་གྱིས་རྔུལ་ཆུ་བཞུར་གྱིན་འདུག་ལ། ལ་ལ་ནི་ཡི་ཐང་ཡང་ཆད་བཞིན་འདུག ལ་ལ་ནི་དབུགས་ཧལ་ཧལ་ངང་ལུས་ལ། འགའ་ཤིག་ནི་འཆི་ལ་ཁད་དུ་གནས། རེ་འགའ་ནི་གོམ་སྟབས་འཁྱར་འཁྱོར་ངང་ར་བཟི་ལྟ་བུར་གྱུར་འདུག
ངས་རང་ཉིད་ཀྱི་ནང་དུ་ཡོད་པའི་མེ་ལོང་གི་ངོར་ལྟ་སྐབས། ངའི་ཐོད་པར་གཉེར་མའི་ཆུ་རིས་གཡོ་གིན་འདུག་ལ། མགོ་བོའི་གནག་སྣུམ་གྱི་སྐྲ་ལོ་དག་ཀྱང་སྐྱ་ཕྱེད་སྔོ་ཕྱེད་དུ་གྱུར་འདུག ད་དུང་ཞིབ་པར་ངའི་ལུས་པོ་ཆ་ཚང་ལ་ལྟ་སྐབས། རང་ལོ་སུམ་ཅུ་ལྷག་ལས་མ་སོན་ཀྱང་ལོ་རྒན་དྲུག་ཅུ་བདུན་ཅུར་སླེབས་པའི་རྒས་ཉམས་ ཤིག་སླེབས་འདུག་ལ། ལག་པས་གདོང་པར་བྱིལ་བྱིལ་བྱེད་སྐབས། མིག་ཆུའི་རླན་གྱིས་ལག་ཟུང་རློན་པར་གྱུར་འདུག དེ་ནས་ངའི་དབུགས་ཀྱི་རྒྱུ་བ་ལ་བསམ་སྐབས། དབུགས་རྒྱུན་སྔར་ལས་འཕར་ཤུགས་ཇེ་ཆེ་རེད་ལ། སྙིང་ག་ཡང་རྒྱུན་གཏན་མ་ཡིན་པའི་ལྡེམ་ཤུགས་ཆེ་རུ་སོང་འདུག ངས་དལ་བུར་ལག་པ་གཉིས་ཀས་སྙིང་ག་མནན་ཏེ། ཁང་ཆུང་གྲུ་བཞིའི་ནང་དུ་ཡོད་པའི་༧གོང་ས་མཆོག་གི་སྐུ་པར་དེ་ལན་ཅིག་མཇལ་བ་ དང་། དེ་ནས་ཕར་ངོས་ཀྱི་རྩིག་ལྡེབས་ཀྱི་ཕོ་བྲང་ཕོ་ཏ་ལའི་སྐུ་པར་དེར་མཇལ་ཞོར་ངའི་ ཕ་ཡུལ། ངའི་ཕ་མ། ངའི་མི་རིགས། ངའི་ཡོད་ཚད་ང་ལ་མི་དབང་བ་ཅི་ཡིས་ལན་པ་ཡིན་ནམ་ཞེས། ང་དང་ངའི་འཁོར་རྣམས་དངོས་གནས་མི་ཚེ་གཅིག་མགྲོན་པོར་སྡོད་དགོས་སམ། ང་ང་ང་༌༌༌༌ངའི་༌༌༌ངའི་༌༌༌ངའི་༌༌ཞེས་ངག་འདར་འདར་ངང་སྨྲེ་ངག་དབང་མེད་དུ་ཤོར་ བྱུང་། མིག་ཟུང་མཆི་མས་གང་སྟེ་མིག་ཟུང་རབ་རིབ་ཏུ་གྱུར་སྟབས། མགྲོན་པོའི་ཟིན་ཐོ་འདིར་མི་འཇོག་ཀ་མེད་དུ་གྱུར།།
མ་གཞི་མི་ལུས་བླངས་པ་འདི་ཡང་མགྲོན་པོ་ཞིག་ལས་མ་འདས་པ་དེ་ང་ཚོའི་སེམས་གསོ་བྱེད་ཡིན།
དང་པོ་ང་ཞེས་བདག་ལ་ཞེན་གྱུར་ཅིང་། །
བདག་གི་འདི་ཞེས་དངོས་ལ་ཆགས་བསྐྱེད་པས །
ཟོ་ཆུན་འཕྱན་ལྟར་རང་དབང་མེད་པ་ཡིས། །
འགྲོ་ལ་སྙིང་རྗེ་གྱུར་གང་དེ་ལ་འདུད། །
ང་ཚོ་ནི་མ་བོད་མགྲོན་པོ་རེད་ལ་ཆབ་སྲིད་ཀྱི་མགྲོན་པོ་ཞིག་ཀྱང་རེད། ང་ཚོ་ནི་དུས་ངེས་མེད་ཀྱི་མགྲོན་པོ་ཞིག་རེད་ལ་གར་འགྲོ་འདི་འགྲོ་མེད་པའི་མགྲོན་པོ་ཞིག་ཀྱང་རེད། ཅི་བྱེད་འདི་བྱེད་མེད་པའི་མགྲོན་པོ་ཞིག་རེད་ལ་ཅི་ཡོང་འདི་ཡོང་མེད་པའི་མགྲོན་པོ་ཞིག་ཀྱང་རེད།
མ་གཅིག་དཔལ་ལྡན་ལྷ་མོ་ཡིས།།
དྲེལ་རྟ་བཞོན་ནས་སྟོང་གསུམ་བསྐོར།།
རྭ་གཅིག་བསེ་རུ་ཁྱེད་ཉིད་ཀྱིས།།
འཕྲུལ་རྟ་བཞོན་ནས་གླིང་གསུམ་བསྐོར།།
སྒོམ་སྡེ་ལྷ་རམས་པ་ཞིང་ལ་ཕེབས་ཡོད་ན་བློ་ཕམ་ཆེ་ཁུ།་ དེ་འདྲ་ཡིན་མི་སྲིད་སྙམ།
ང་ཚོ་ནི། མི་བདག་བདག་ཏུ་བཟུང་། བདག་པོ་སྒོ་ཕྱིར་སྟོན་པའི་མི་རེད།
ང་ཚོ་ནི། འབོད་མཁན་མེད་པའི་མགྲོན་པོ་དེ་ཚོའི་དེའི་གྲལ་རེད།
ང་ཚོ་ནི། རང་ཡུལ་ལ་མ་བོས་མགྲོན་པོ་གསར་པས་ལོ་ངོ་༦༠བར་ལ་གཞན་ཡུལ་དུ་ཕུད་དང་འབུད་བཞིན་པའི་གསར་འབྱོར་བ་རྐྱང་རྐྱང་རེད།
ང་ཚོ་ནི། རང་ཁྱིམ་དུ་ནམ་ཡང་ལོག་ས་མེད་མཁན་གྱི་འཛམ་གླིང་སྤྱི་ཡི་མགྲོན་པོ་མ་རེད་དམ།
ང་ཚོའི་མགྲོན་པོ་རྒྱ་རིགས་དེ་ཚོས་ང་ཚོ་མགྲོན་པོའི་མི་ཚེ་ནས་ཁྱིམ་བདག་ཅིག་ག་དུས་བྱེད་དུ་བཅུགས་སམ། ???????????????????????????
འུ་ཅག་གི་ཁྱིམ་ལ་མ་བོས་མགྲོན་པོ་ཞིག་བསླེབས་པ་དེས་རེད། ཁོས་ང་ཚོར་རྡུང་། བཀྱིག བཟུང་། མནར་གཅོད་བཏང་། མཐོང་ཆུང་བྱས། མགོ་སྐོར་བཏང་། དམར་གསོད་བྱས། ཁྱིམ་གཞི་ཚང་མ་བཟུང་། དེ་ལྟར་ང་ཚོ་རང་གི་ཕ་ཡུལ་ནས་བྲལ། མི་ཡུལ་ནས་མགྲོན་པོར་གྱུར། མཚམས་རེར། མགྲོན་པོ་ལས་ཀྱང་སྤྲང་པོ་ཞིག་གི་སྣང་བ་ཤར།
བཙན་བྱོལ་དུ་བསླེབས་པ་ནས་བཟུང་ཆེ་ཆུང་ཚང་མའི་ཁ་ནང་གི་ལན་མང་ཤོས་ནི་ ༼མེད་༽ ཅེས་པ་འདི་རེད། བཙན་རྒྱལ་ཁབ་མེད། ལུང་པ་མེད། ཕུ་ནུ་མེད། ཁང་པ་མེད། ཡིག་ཆ་མེད། སྒོར་མོ་མེད། ཤེས་ཡོན་མེད། འཇོན་ཐང་མེད། ་་་་
མེས་པོ་བཙན་པོ་དེ་དག་གི་རྗེས་ནས་མི་རབས་མེད་པོ་ཞིག་གིས་དུས་རབས་གཅིག་བརྒལ་གྱིན་འདུག
མགྲོན་པོ་བྱེད་རྒྱུ་འདི་ཡང་ལས་སླ་བོ་ཞིག་མ་རེད་ཨང་།