ས་རྭ་མཐོ་སློབ་ཏུ་རྒྱ་གར་མཐོ་སློབ་ཁག་གི་བོད་རིགས་སློབ་མ་དང་ངྷ་ས་ཉེ་ཁོར་གྱི་རིག་ལམ་སློབ་གཉེར་ཁང་ཁག་གི་སྐུ་ཚབ་བཅས་ཀྱིས་ ༼ ༧གོང་ས་མཆོག་གི་དགོངས་དོན་ལ་སློབ་སྦྱོང་བྱེད ༽ ཅེས་པའི་བརྗོད་གཞིའི་ཐོག་བགྲོ་གླེང་གནང་ཡོད།
ས་རཱ་ས་གནས་གཞོན་ནུས་གོ་སྒྲིག་འོག་ཟླ་འདིའི་ཕྱི་ཚེས་ ༢༧ ཉིན་ནས་ ༣༠ བར་གྱི་ཉིན་བཞིའི་རིང་། ས་རྭ་མཐོ་སློབ་ཏུ་བོད་ཀྱི་རིག་གནས་བགྲོ་གླེང་ཐེངས་བཞི་པ་དེ་ཚོགས་ཡོད་པ་དང་། ཚོགས་འདུ་དབུ་འཛུགས་ཐོག་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ཆེད་ཕེབས་ཀྱིས་གཏམ་བཤད་གནང་ཡོད། ཐེངས་འདིར་ལྡི་ལི་མཐོ་སློབ་དང་ཅན་ངྷི་སྒར། དེ་བཞིན་རྒྱ་གར་ལྷོ་ཕྱོགས་ཀྱི་གྲོང་ཁྱེར་ཆེ་ཁག་དག་གི་མཐོ་སློབ་ཁག འབྲི་གུང་བཀའ་བརྒྱུད་མཐོ་སློབ་དང་རྫོང་གསར་བཤད་གྲྭ དེ་བཞིན་ངྷ་ས་ཉེ་ཁོར་གྱི་སློབ་གཉེར་ཁང་ཁག་གི་སྐུ་ཚབ་བཅས་ས་གནས་ ༡༡ ཙམ་གྱི་སྐུ་ཚབ་ ༣༠ ལྷག་མཉམ་ཞུགས་གནང་ཡོད་འདུག
བགྲོ་གླེང་དངོས་གཞིའི་སྐབས། སཾབྷོ་ཌའི་སྤྱི་ཁྱབ་འགན་འཛིན་རྒན་ཀརྨ་ཆུང་བདག་ལགས་ཀྱིས། མིའི་རིགས་ཀྱི་སློབ་སྦྱོང་དང་༧གོང་ས་མཆོག་གི་དགོངས་དོན། ཞེས་པའི་བརྗོད་གཞིའི་ཐོག་གཏམ་བཤད་དང་། རིགས་གཅིག་རྐང་འཛིན་ཉམས་ཞིབ་པ་ཨ་འབྲུག་དཀོན་མཆོག་ལགས་ཀྱིས། ༧གོང་ས་མཆོག་དང་བོད་མིའི་སྤྱི་ཚོགས་ཀྱི་བར་ཐག ས་རཱ་མཐོ་སློབ་ཀྱི་སྐུ་ཚབ་དག་གིས། བོད་ཀྱི་སྲོལ་རྒྱུན་རིག་གཞུང་གི་རིན་ཐང་དང་དེང་རབས་ཤེས་ཡོན་གྱི་དགོས་མཁོའི་ཐད་ཀྱི་དགོངས་དོན་དང་ཆོས་ཕྱོགས་ཀྱི་དགོངས་དོན། བུད་མེད་ཀྱི་འགན་འཁུར་དང་འབྲེལ་བའི་དགོངས་དོན། སྨན་རྩིས་ཁང་མཐོ་སློབ་ཀྱི་སྐུ་ཚབ་ཚོས། བོད་ཀྱི་གསོ་བ་རིག་པའི་ཐད་ཀྱི་དགོངས་དོན། རྫོང་སར་བཤད་གྲྭའི་སྐུ་ཚབ་ཚོས། བཤད་གྲྭ་དང་སྒྲུབ་གྲྭ་ཁག་གི་ཐད་ཀྱི་ལམ་སྟོན་ཐད་ཀྱི་དགོངས་དོན། བྷེང་ལོར་མཐོ་སློབ་ཀྱི་སྐུ་ཚབ་ཀྱིས། བོད་ཀྱི་སློབ་གྲྭའི་ཤེས་ཡོན་སློབ་གསོའི་སྐོར་གྱི་ལམ་སྟོན་དགོངས་དོན། ཅིན་ནཡེ་མཐོ་སློབ་ཀྱི་སྐུ་ཚབ་ཚོས། ཁོར་ཡུག་སྐོར་གྱི་དགོངས་དོན་སོགས་ཀྱི་ཐད་གཏམ་བཤད་བགྲོ་གླེང་གནང་ཡོད།
ས་རྭ་ས་གནས་གཞོན་ནུ་གོ་སྒྲིག་གནང་བཞིན་པའི་བགྲོ་གླེང་གི་ལས་རིམ་འདི་ནི་རྒྱ་གར་ནང་ཁ་འཐོར་དུ་གནས་པའི་མཐོ་རིམ་སློབ་མ་ཕན་ཚུན་བར་བསམ་ཚུལ་བརྗེ་རེས་དང་རིག་གནས་འགྲོ་འོང་བྱེད་སའི་སྡིངས་ཆ་གལ་ཆེན་ཞིག་ཡིན་ཞིང་། ཐེངས་འདིར་དམིགས་བསལ་གྱི་༸གོང་ས་མཆོག་གི་དགོངས་དོན་སློབ་སྦྱོང་བྱེད་པ་ཞེས་པའི་བརྗོད་གཞི་གདམ་གསེས་ཀྱིས་མཐོ་སློབ་ཙམ་མིན་པར་ངྷ་སའི་ཉེ་འགྲམ་གྱི་དགོན་སྡེ་ཁག་དང་། ཤེས་རབ་དགའ་ཚལ་སློབ་གླིང་གི་སྐུ་ཚབ་བཅས་གདན་ཞུའི་ཐོག་བགྲོ་གླེང་ལྷུག་པོར་གནང་ཡོད་འདུག
གསར་འགོད་པ། དོན་གོ
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཐེངས་འདིར་ང་རང་ཉིད་མཉམ་ཞུགས་བྱས་པ་ཡིན་ལ། ཉིན་མ་དེ་དག་གི་རིང་ལ་རང་ཉིད་ཀྱིས་༸གོང་ས་མཆོག་གི་བཀའ་སློབ་དག་ཇི་ལྟར་སློབ་སྦྱོང་བྱེད་དགོས་པ་ཤེས་སོང་། ལྷག་པར་ཐོག་མའི་དམིགས་ཡུལ་ལྟར་མཐོ་སློབ་ཁག་གི་སློབ་ཕྲུག་མི་ཉུང་བ་ཞིག་ངོ་ཤེས་བྱུང་བས་ཧ་ཅང་དགའ་ཡོད།།
བགྲོ་གླེང་ཇི་ལྟར་གནང་བ་ལྟར་ལག་ལེན་དེ་ལྟར་བསྒྲུབ་ཐུབ་ན་ཅི་མ་རུང་།