ཕྱི་ཟླ་ ༧ པའི་ཚེས་ ༢༡ ཉིན་རྒྱ་ནག་རྒྱལ་ཡོངས་ཀྱི་དམར་ཤོག་ཚོགས་པའི་ལས་དོན་ཚོགས་འདུ་ཞིག་པེ་ཅིན་མི་དམངས་ཚོགས་ཁང་ཟེར་བའི་ནང་དུ་འཚོགས་ཡོད་པ་དང་། ཚོགས་འདུ་དེར་རྒྱ་ནག་གི་སྲིད་འཛིན་ཧའོ་ཅིན་ཐའོ་གཙོས། ལི་ཁྲང་ཁྲོན། ཞི་ཅིན་ཕེན། ཧི་ཀོ་ཆང་སོགས་མཉམ་ཞུགས་བྱས་ཡོད་འདུག
ཚོགས་འདུ་དེ་ནི་ཛ་དྲག་དང་དམ་དྲག་གི་ངོ་བོའི་ཐོག་ནས་འཚོགས་ཡོད་པ་དང་། ཚོགས་འདུའི་སྟེང་དམར་ཤོག་ཚོགས་པ་དང་འབྲེལ་བའི་གནད་ཡོད་བརྗོད་གཞི་གཉིས་གླེང་སློང་བྱུང་འདུག བརྗོད་གཞི་དེ་གཉིས་ཚོགས་འདུའི་ལས་འཆར་དངོས་ཀྱི་ནང་བཀོད་མེད་ནའང་ཚོགས་འདུའི་ཉིན་དང་པོ་ནས་བཟུང་བརྗོད་གཞི་དེ་གཉིས་ཀྱི་ཐད་གླེང་སློང་བྱུང་ཡོད་པ་དང་། ཚོགས་ཆུང་ཁག་བགོས་ཀྱིས་འཚོགས་སྐབས་ཀྱང་གནད་དོན་དེ་གཉིས་ཐད་གླེང་སློང་ཤུགས་ཆེར་བྱུང་འདུག
པའོ་ཞོན་གསར་ཁང་གིས་གནས་ཚུལ་སྤེལ་བ་ལྟར་ན། གླེང་གཞི་དང་པོ་ནི་ཉེ་དུས་ནས་རྒྱ་གཞུང་དམར་ཤོག་མཐོ་རིམ་མགོ་ཁྲིད་རིམ་པས་མི་སྒེར་གྱི་ལོ་རྒྱུས་འབྲི་མགོ་རྩོམ་བཞིན་པ་དེ་དག་དམར་ཤོག་པའི་ཚོགས་འདུའི་ཟིན་ཐོར་འབྲེལ་བ་ཡོད་པ་དང་། རྒྱ་ནག་རྒྱལ་ཡོངས་དམར་ཤོག་པའི་ལོ་རྒྱུས་ཐད་ལས་དོན་སྒྲུབ་མཁན་དག་ལ་མཚོན་ན་དེ་ནི་ལྡོག་ཐབས་བྲལ་ལ་གདོང་ལེན་དཀའ་བའི་གནད་དོན་གསར་བ་ཞིག་ཆགས་ཡོད། ལི་ཕིན་གྱི་དྲུག་བཞིའི་ཉིན་ཐོ་སྤྱི་ཚོགས་ཁྲོད་ཁྱབ་བརྡལ་དུ་གྱུར་རྗེས། དམར་ཤོག་པའི་ལོ་རྒྱུས་ཡིག་ཆ་ཉར་ཚགས་སྐོར་ལ་ལས་དོན་སྒྲུབ་མཁན་ཚོས་ཡིག་ཆ་རྣམས་རྒྱལ་ཁབ་ཕྱི་ལོག་ཏུ་བརྒྱུད་སྤྲོད་བྱས་པ་བརྩད་གཅོད་ཀྱིས་ཤེས་རྟོགས་བྱུང་ཚེ་འཛིན་བཟུང་བྱ་རྒྱུ་མགོ་བརྩམས་ཡོད་པ་རེད།
ཕྱི་ཟླ་ ༦ པའི་ཚེས་ ༢༠ ཉིན་རྒྱ་ནག་དབུས་དམར་ཤོག་ནང་ཁུལ་གྱི་ཡིག་ཆའི་ནང་ཐོན་པ་ལྟར་ན། ལས་ཁྱུར་ངལ་གསོ་བྱས་ཟིན་པའི་དམར་ཤོག་མཐོ་རིམ་དཔོན་རིགས་ཚང་མས་རང་ཉིད་ཀྱི་མི་ཚེ་ཕྱིར་དྲན་ཟིན་ཐོ་ལྟ་བུའི་མི་སྒེར་ལོ་རྒྱུས་འབྲི་བཞིན་ཡོད། ཉུང་མཐར་ཡང་དེ་སྔའི་དམར་ཤོག་ཚོགས་པ་དང་རྒྱལ་ཁབ་ཀྱི་མཐོ་རིམ་མགོ་ཁྲིད་དྲུག་ལྷག་གིས་སྒེར་གྱི་ལོ་རྒྱུས་ཟིན་ཐོ་གཉིས་རེ་བྲིས་ཡོད་པ་དང་། ཟིན་ཐོ་གཅིག་རྒྱ་ནག་དབུས་ཆབ་སྲིད་ལྷན་ཁང་ལ་སྤྲད་དེ་ཁྲིམས་མཐུན་དཔར་སྐྲུན་ཡོང་བའི་རེ་བ་བྱས་ཡོད་ལ། དེ་དང་དུས་མཚུངས་སུ་ཟིན་ཐོ་གཅིག་ཤོས་དེ་རང་ཉིད་ཀྱི་རྗེས་སྐྱོང་བར་བཞག་སྟེ་དུས་ཚོད་འོས་འཚམ་ཤིག་ལ་ཡོངས་ཁྱབ་པར་འགྲེམས་ཡོང་བའི་ཁ་ཆེམས་འཇོག་བཞིན་ཡོད་པ་རེད། ཟིན་ཐོ་རྗེས་མ་དེའི་ནང་དུ་རྒྱ་ནག་དམར་ཤོག་པའི་གསང་བའི་ལོ་རྒྱུས་མང་པོ་བཀོད་ཡོད་འདུག རྒྱ་ནག་དམར་ཤོག་དབུས་གཞུང་གིས་བསྡོམས་རྩིས་བྱས་པ་ལྟར་ན། ལོ་རྒྱུས་ཟིན་བྲིས་འདི་དག་འབྲི་བའི་ཆེད་དུ་ཉུང་མཐའ་ཡང་རྒྱལ་ཁབ་ཀྱི་པུའུ་རིམ་པའི་མཐོ་རིམ་དཔོན་རིགས་ ༥༤ ཡིས་དམར་ཤོག་པའི་ལོ་རྒྱུས་ཡིག་ཚགས་བལྟ་ཀློག་གི་རེ་བ་བཏོན་མྱོང་ཡོད་འདུག གནས་ཚུལ་དེར་རྒྱ་ནག་མཐོ་རིམ་དཔོན་རིགས་ཚོས་འཚེར་སྣང་དང་དོ་སྣང་ཆེན་པོ་བྱེད་བཞིན་པ་དང་། ཐེངས་འདིའི་ཚོགས་ཞུགས་པ་རྣམས་ཀྱིས་ཀྱང་ཚོགས་འདུ་དེ་ནི་གནད་དོན་དེ་དང་འབྲེལ་བ་ཡོད་པར་བརྗོད་ཀྱིན་ཡོད།
གླེང་གཞི་གཉིས་པ་དེའང་ཡོངས་ཁྱབ་རང་བཞིན་གྱི་ཚོགས་འདུའི་སྟེང་གླེང་མྱོང་མེད་ནའང་། ཐེངས་འདིའི་ཚོགས་ཞུགས་པ་ཚོས་མགོ་ནས་མཇུག་བར་དུ་དེའི་ཐད་གླེང་སློང་མང་པོ་བྱུང་ཡོད། གླེང་གཞི་དེ་ནི་མ་འོངས་པར་སྤྱི་ཚོགས་ལ་གཡོ་འགུལ་འབྱུང་སྲིད་པ་དང་། དེ་བཞིན་དམར་ཤོག་པའི་ཡིག་ཚགས་ཁང་ལ་རྒོལ་གཏོར་གྱི་གནས་ཚུལ་བྱུང་སྐབས་ཇི་ལྟར་ཕོན་ཆེ་བའི་དམར་ཤོག་པའི་ལོ་རྒྱུས་ཡིག་ཚགས་ཀྱི་གནད་དོན་ཐག་གཅོད་ཕྱོགས་སྐོར་ཡིན་འདུག གླེང་གཞི་འདི་ཐོག་མར་འདོན་མཁན་གྱི་དམིགས་ཡུལ་ནི་གནད་དོན་དེ་རིགས་མི་འབྱུང་བའི་ཆེད་ཡིག་ཚགས་ཁང་གི་བདག་ཉར་སྒྲིག་གཞི་དང་བདེ་འཇགས་འགྲོ་གྲོན་གོང་མཐོར་གཏོང་རྒྱུ་དེ་ཡིན་མོད། ཡིན་ནའང་། གནད་དོན་དེས་དཔོན་རིགས་རེ་འགར་བསམ་གཞིགས་དང་འཚེར་སྣང་ཆེན་པོ་བྱུང་ཡོད། གལ་སྲིད་སྤྱི་ཚོགས་ལ་གཡོ་འགུལ་བྱུང་སྟེ་སྲིད་ཇུས་ལ་འགྱུར་ལྡོག་ཐེབས་པ་ཡིན་ན། དམར་ཤོག་པའི་ལོ་རྒྱུས་ཡིག་ཚགས་དེ་དག་ནི་གཅིག་བྱས་ན་དམར་ཤོག་པ་རང་ཉིད་ཁྲིམས་ལ་སྦྱོར་བྱེད་ཀྱི་དཔང་ཡིག་ཏུ་འགྱུར་སྲིད་པའི་ལྟ་ཚུལ་བཟུང་ཡོད། གོ་ཐོས་ལྟར་ན། རྒྱ་ནག་དམར་ཤོག་པའི་མཐོ་རིམ་ཤེས་ལྡན་དག་གི་བསམ་ཚུལ་ནི། གནད་ཡོད་ཡིག་ཚགས་གསང་ཉར་ཁང་དག་ལ་རང་འགུལ་གྱིས་ཡིག་ཚགས་མེ་སྲེག་གཏོང་བྱེད་བཟོས་ཏེ་དགོས་ངེས་ཀྱི་དུས་སྐབས་བྱུང་ཚེ་དམར་ཤོག་པ་རང་ཉིད་ལ་གནོད་པའི་ཡིག་ཚགས་ཡོད་ཚད་རྩ་མེད་དུ་གཏོང་ཐུབ་པ་བཟོ་དགོས་པའི་འདོད་ཚུལ་བཏོན་ཡོད། བསམ་ཚུལ་དེར་ཆབ་སྲིད་ལྷན་ཁང་གི་རྒྱུན་ལས་གསུམ་གྱིས་རྒྱབ་སྐྱོར་བྱས་ཡོད་འདུག ཡིན་ནའང་། གནད་དོན་དེ་ནི་ཧ་ཅང་ཚོར་བ་སྐྱེན་དྲགས་པས་རྐྱེན་གྱིས། ཚོགས་ཞུགས་པ་ཚང་མའི་གླེང་གཞིར་གྱུར་ཡོད་འདུག
ཐེངས་འདིའི་ཚོགས་འདུར་ད་དུང་དམིགས་ཡུལ་གལ་ཆེན་གཅིག་འདུག་པ་ནི། གསང་བའི་ཡིག་ཚགས་དེ་དག་བདག་ཉར་བྱེད་མཁན་རྣམས་ལ་སློབ་གསོ་ཤུགས་ཆེན་པོ་སྤྲོད་རྒྱུ་དང་། ཁོ་ཚོའི་ཡོང་འབབ་འཕར་སྣོན་དང་ཁོ་ཚོ་དམར་ཤོག་པར་ཡིད་ཆེས་ལྡན་པ་བཟོ་དགོས་རྒྱུ་དེ་རེད། དེའི་རྒྱུ་མཚན་ནི་མི་འདི་དག་ནི་དེང་སྐབས་དམར་ཤོག་པའི་ལོ་རྒྱུས་ཡིག་ཚགས་ལ་ཐད་ཀར་ལག་པ་རག་མཁན་གྱི་མི་ཆགས་ཡོད་པས། གལ་སྲིད་བློ་འགལ་ཡིད་ལོག་འདྲ་བྱུང་བ་ཡིན་ན། དམར་ཤོག་པ་དག་གི་སྲོག་དང་འབྲེལ་བ་ཡོད་པའི་ཡིག་ཚགས་དེ་དག་བསྐྱར་དཔར་གྱིས་ཕྱིར་གཏོང་བྱེད་པ་དང་། ཡང་ན་རང་ཉིད་ཀྱིས་ཉར་ཚགས་བྱས་ཏེ་རྗེས་ཕྱོགས་རིན་གོང་མཐོན་པོས་ཚོང་བསྒྱུར་བྱེད་སྲིད་པའི་ཉེན་ཁའི་བློ་འཚབ་སྐྱེས་བཞིན་ཡོད་འདུག
ཡ་མཚར་བ་ཞིག་ནི། ཐེངས་འདིའི་ཚོགས་འདུའི་སྟེང་དམིགས་བསལ་ཆེད་བཙུགས་ཀྱིས་གནས་ཚུལ་ལེན་དུ་མངགས་པའི་ཞིན་ཧྭ་གསར་ཁང་གི་གསར་འགོད་པ་ཞིག་གིས་བརྗོད་པ་ལྟར་ན། གཞུང་ཕྱོགས་ནས་ཁོ་ཚོར་མཁོ་སྤྲོད་བྱས་པའི་གནས་ཚུལ་དག་གཅིག་མཚུངས་མིན་པ་དང་། ཐེངས་འདིའི་ཚོགས་འདུའི་སྟེང་བློ་ཕམ་ཡིད་ཆད་ཀྱི་རྣམ་པས་ཁེངས་ཡོད་ལུགས་བརྗོད་འདུག
གསར་འགྱུར་འབྲི་མཁན། ཚེ་རིང་རྒྱལ།
གཞན་རྣམས་རང་ཉམས་སྟོན་ཕྱིར་རང་རྣམ་བརྩམས། །
ཏང་རྣམས་རང་རྣམ་རང་སྲོག་ཉེན་ཁར་མཐོང་། །
ཏང་གི་ཡིག་ཆ་མེ་ལ་མ་བསྲེགས་གོང་། །
མྰ་འོའི་རོ་དེ་མེར་བསྲེག་བཏང་ན་ལེགས། །
ཁྲིམས་ལུགས་ཡིག་ཐོག་ལས་ཏང་རང་གི་སྒང་ན་ཁྲིམས་ལུགས་མེད་པས་ཏང་ཁྲིམས་ལ་ཇི་ལྟར་སྦྱོར་རམ། གང་ལྟར་ཁོང་ཚོས་ཟློས་གར་དེ་མུ་མཐུད་དུ་འཁྲབ་རྒྱུ་ཡིན་པ་གཏན་འཁེལ་འདུག
གལ་སྲིད་བདེན་པ་ཡིན་ཚེ་ད་རྒྱ་ནག་དམར་ཕྱོགས་ཚོགས་པའི་ཚེ་ཙད་ཀྱང་རིང་བོ་ཡོད་ས་མ་རེད་པ། རྒྱ་ནག་ལོ་རྒྱུས་ནང་དུ་སྲིད་གཞུང་མགོ་རྟིང་སློག་མཁན་རྒྱ་ནག་མི་དམངས་པས་ན། ད་དམར་ཕྱོགས་ཚོགས་པའི་འགོ་ཁྲིད་ཚོ་མི་དམངས་ལ་སྐྲག་གིན་ཡོད་པའང་གསལ་བོ་རེད། དམར་ཕྱོགས་ཚོགས་པས་དབང་བསྒྱུར་འོག་ལོ་བརྒྱ་འདུག་ཐུབ་མཁན་ཞིག་ད་མེད་པ།
འདི་ནི་རང་ཤི་རྒྱག་པའི་སྟ་གོན་བྱེད་པ་དང་འདྲ་བ་ཞིག་འདུག་པས་ད་ལྟའི་རྒྱ་ནག་གི་མཐོ་རིམ་དཔོན་རིགས་ཚོས་འདི་འདྲ་གླེང་ཚུལ་བདེན་པ་ཨེ་ཡིན་སྙམ་པ་ཞིག་ཀྱང་བྱུང་།