རྒྱ་ནག་གཞུང་གིས་ད་ལྟ་ཡང་བོད་དང་ཞིན་ཅང་གཙོས་རྒྱ་ནང་ནང་ཁུལ་དུ་ཆབ་སྲིད་བཙོན་པ་ལྔ་སྟོང་བརྒྱད་བརྒྱ་ལྷག་འཛིན་བཟུང་བཀག་ཉར་བྱས་ཡོད་ཚུལ་འདུག
ཉེ་བའི་ཆར་ཨ་རིའི་གྲོས་ཚོགས་འོག་མའི་ཚོགས་དུས་དེ་ཝ་ཤིན་ཊོན་ཌེ་སེ་རུ་སྐོང་འཚོགས་གནང་ཡོད་འདུག་ལ། གྲོས་ཚོགས་སྟེང་ཨ་རིའི་འགྲོ་བ་མིའི་ཐོབ་ཐང་དང་ཁྲིམས་ལུགས་ཆེད་མཁས་པས། རྒྱ་ནག་གཞུང་གིས་འཛམ་གླིང་དཔལ་འབྱོར་ཉམ་ཉེས་དང་སྟབས་བསྟུན་ཏེ་བྱང་ཀོ་རི་ཡ་དང་ཨི་རན་བཅས་རྒྱལ་ཁབ་ཁག་ལ་མཉམ་འབྲེལ་གྱི་ཆིངས་ཡིག་འཇོག་གི་ཡོད་པའི་སྐབས་འདིར་ཝ་ཤིན་ཊོན་གྱི་ངོས་ནས་ཀྱང་ཞི་འཇམ་གྱི་ལམ་ནས་རྒྱ་ནག་ནང་ཁུལ་གྱི་འགྲོ་བ་མིའི་ཐོབ་ཐང་གི་གནད་དོན་ཐག་གཅོད་བྱ་དགོས་སྐོར་དང་། དེ་བཞིན་རྒྱ་ནག་གཞུང་གིས་ཐོག་མཐའ་བར་གསུམ་དུ་རྒྱལ་ཁབ་ཀྱི་བདེ་འཇགས་ལ་བཏོར་བརླག་ཅེས་པའི་ཉེས་མིང་ཁ་རུ་འཁྱེར་ཏེ་རྩོམ་པ་པོ་དང་ཁྲིམས་རྩོད་པ། དེ་བཞིན་བོད་དང་ཞིན་ཅང་གཙོས་པའི་གྲངས་ཉུང་མི་རིགས་ཚོར་དྲག་གནོན་བྱེད་ཀྱིན་ཡོད་པ་དང་། ལྷག་པར་དུ་ ༢༠༠༨ ལོ་ནས་བཟུང་མངོན་གསལ་གྱིས་ཤུགས་ཆེ་རུ་ཕྱིན་ཏེ་རྒྱལ་ཁབ་ཀྱི་སྲིད་བྱུས་ལ་དགག་བཞག་བྱེད་མཁན་དང་ཆབ་སྲིད་ཀྱི་ལངས་ཕྱོགས་ལ་མོས་པ་མེད་པའི་མི་སྣ་མང་པོ་ཞིག་འཛིན་བཟུང་བཀག་ཉར་བྱས་ཏེ། ད་ལྟའི་ཆར་བོད་དང་ཞིན་ཅང་གཙོས་པའི་གྲངས་ཉུང་མི་རིགས་ཁག་དང་རྒྱ་ནག་ནང་ཁུལ་དུ་ཆབ་སྲིད་བཙོན་པ་ ༥༨༠༠ ལྷག་བཀག་ཉར་བྱས་ཡོད་པའི་སྐོར་འགྲེལ་བརྗོད་གནང་ཡོད་འདུག
གནས་ཚུལ་འདི་དག་གི་ཐད་ཨ་རིའི་ནིའུ་ཡོག་སློབ་ཆེན་གྱི་ཁྲིམས་ལུགས་སློབ་དཔོན་ཆེན་མོ་ཁེལ་ཧེན་ལགས་ཀྱིས། དེ་ནི་རྒྱ་ནག་གཞུང་གི་ཕྱི་གསལ་ནང་གསལ་མེད་པའི་སྲིད་བྱུས་དང་། ད་ལྟ་རྒྱ་ནག་གི་བཙོན་པའི་གྲངས་འབོར་འཕར་ཞིང་གནས་སྟངས་ཛ་དྲག་གི་ཕྱོགས་སུ་འཕེལ་བཞིན་པར་བློ་འཚབ་ཡོད་སྐོར་བརྗོད་ཡོད་འདུག་ལ། ཐེངས་འདིའི་ཚོགས་ཐོག་ཏུ་ཕེབས་པའི་གནས་ཚུལ་དབྱེ་ཞིབ་པ་མང་པོས་ཨ་རིའི་གཞུང་ཕྱོགས་ནས་རྒྱ་ནག་དང་ལྷན་དུ་ལོ་རེར་འཆར་ཅན་གྱི་འབྲེལ་མོལ་གནང་བཞིན་པའི་འགྲོ་བ་མིའི་ཐོབ་ཐང་གི་ཚོགས་འདུ་དེ་ལོ་རེར་ཐེངས་གཉིས་རེར་འཚོགས་དགོས་པའི་རེ་བ་དང་འབོད་སྐུལ་གནང་ཡོད་པར་མ་ཟད། དེ་བཞིན་ཚོགས་འདུའི་ཁྲོད་འགྲོ་བ་མིའི་ཐོབ་ཐང་ཐོག་ཕྱག་ལས་གནང་བཞིན་པའི་མི་སྣ་མཉམ་ཞུགས་ཀྱི་གོ་སྐབས་སྤྲད་དེ་དམིགས་བསལ་གྲངས་ཉུང་མི་རིགས་ཐོག་དྲག་གནོན་བྱེད་ཀྱིན་པའི་རིགས་དང་ཁྲིམས་རྩོད་པ་དང་རྩོམ་པ་པོ་སོགས་བཙོན་འཇུག་བྱེད་བཞིན་པའི་སྐོར་ལ་གླེང་མོལ་བྱ་དགོས་པའི་རེ་འདུན་ཡང་བཏོན་ཡོད་འདུག
གསར་འགོད་པ་དོན་གོ།
