བཀའ་བློན་ཁྲི་པའི་འོས་གཞི།

ང་ཚོ་མ་སུ་རི་སློབ་ཟུར་དང་ལས་བྱེད་ཟུར་པ་ཁག་གཅིག་ཐུན་མོང་ནས་བཀའ་བློན་ཁྲི་པའི་འོས་གཞིར་སྐུ་སྒེར་དྲུང་ཆེ་ཟུར་བ་སྐུ་ངོ་བློ་བཟང་སྦྱིན་པ་མཆོག་ལ་རེ་བ་དང་བཅས་འོས་འཛུགས་ཞུ་གི་ཡོད། ང་ཚོ་སློབ་ཟུར་ཚོར་མཚོན་ན་ལོ་བཅུ་གྲངས་རིང་མཉམ་ཟ་མཉམ་གཤིབ་བྱས་པའི་རྒྱུས་ཡོད་ཡིན། ལས་བྱེད་ཟུར་པ་རྣམས་ལ་མཚོན་ན་ལོ་ཉི་ཤུ་རྩ་གྲངས་མཉམ་ལས་འདྲིས་གཤིབས་བྱས་པའི་ཉམས་མྱོང་བཅས་ང་ཚོས་གནས་ཚུལ་ཤེས་པའི་ཐོག་ནས་སྤོབས་པ་དང་གདེངས་ཚོད་བཅས་རྒྱབ་སྐྱོར་ཞུས་པ་ཞིག་ལས། ནག་ཁུང་ནང་མདའ་འཕེན་པ་ལྟར་རྒྱུས་མེད་འོད་ཚད་ཀྱིས་དམིགས་འཛུགས་ཞུས་པ་ཞིག་མིན། ཁོང་གི་ལོ་རྒྱུས་སྙིང་བསྡུས་སྐུར་ཡོད་ལ་གཟིགས་ཞིབ་བརྟག་དཔྱད་གནང་སྟེ་རྒྱབ་སྐྱོར་ཞུ་རིན་ཆོག་པ་ཞིག་དགོངས་ཀྱི་འདུག་ན། ཕན་ཚུན་ངོ་ཤེས་རྣམས་ལ་ངོ་སྤྲོད་ཐོག་ཁོང་ལ་རྒྱབ་སྐྱོར་གནང་རོགས་ཞེས་ཚང་མར་འབོད་སྐུལ་ཞུ་རྒྱུ་ཡིན། ང་ཚོའི་ཁོངས་ཆོས་ལུགས་ཆོལ་གསུམ་གྱི་མི་སྣ་འཛོམས་ཡོད།

ངོ་སྤྲོད།

༄༅། ། སྐུ་ངོ་བློ་བཟང་སྦྱིན་པ་ལགས་མ་སུ་རི་བོད་གཞུང་སློབ་གྲྭ་ནས་གཞི་རིམ་སློབ་གྲྭ་ཐོན་པ་དང་། སློབ་གྲྭའི་སྐབས་འཛིན་གྲྭའི་འགན་བདག་དང་། སློབ་གྲྭའི་སྒྲིག་ཁྲིམས་འགོ་པ། དྭངས་བླངས་རུ་ཁག་གི་འགོ་འཛིན། ས་གནས་གཞོན་ནུའི་རྒྱུན་ལས་བཅས་གནང་མྱོང་བ་དང་། ལོ་ལྟར་ཀུན་སྤྱོད་ལེགས་ཤོས་ཀྱི་རྟགས་མ་བཞེས་ཏེ་མིག་དཔེ་ཡར་བལྟ་བྱ་ཡུལ་ཞིག་ཡིན།

སློབ་གྲྭ་ཐོན་རྗེས་སྐབས་དེའི་སློབ་སྤྱི་དང་ཤེས་རིག་བཀའ་བློན་གཅིག་ལྕོག་སྐུ་ངོ་ཕྲེང་རིང་མཆོག་ནས་ཐུགས་རྒྱུས་ཀྱིས་རང་ཉིད་ཀྱི་ལས་ཁུངས་སུ་ཤེས་རིག་ལས་བྱེད་ལ་ཐུགས་ཉར་གནང་བ་ལྟར་ལོ་གཉིས་ཙམ་རིང་ཤེས་རིག་ཁོངས་ཞབས་ཕྱི་ཞུས་པ་རེད། སྐུ་ངོ་ཕྲེང་རིང་མཆོག་ཤེས་རིག་བཀའ་བློན་འཁྱུར་རྗེས་ཅན་དི་སྒར་མཐོ་སློབ་ཏུ་བསྐྱོད། མཐོ་སློབ་ནང་སློབ་སྦྱོང་གནང་རིང་ས་གནས་གཞོན་ནུའི་དྲུང་ཆེ་དང་། གཞོན་ནུའི་གླེང་སྟེགས་ཀྱི་རྩོམ་བྲིས་པ་གནང་བ་རེད།

མཐོ་སློབ་ཐོན་རྗེས་གཞུགས་སྐར་བོད་ཀྱི་དཔེ་མཛོད་ཁང་དུ་དྲུང་ཆེའི་ལས་འཁུར་ཞུ་མུས་སུ་སྐུ་སྒེར་ཡིག་ཚང་ནས་ཞུ་མོས་གནང་བ་ལྟར་གནས་འཕོས་གནང་བ་རེད། བོད་ཀྱི་དཔེ་མཛོད་ཁང་དང་སྐུ་སྒེར་ཡིག་ཚང་གཉིས་ལ་ཞབས་ཕྱི་ཞུས་རིང་བཞུགས་རྡ་རམ་ས་ལའི་ས་གནས་གཞོན་ནུའི་ཚོགས་གཙོའི་ལས་འཁུར་གནང་རིང་ད་ལྟ་ཁྲོམ་གཞུང་དུ་བེད་སྤྱོད་བྱེད་བཞིན་པའི་གསང་སྤྱོད་ཁག་གཉིས་དང་། མཚན་ཉིད་གསུམ་མདོ་ནས་གངས་སྐྱིད་ཕྱོགས་སུ་རྒྱ་ལམ་གསུམ་མདོ་བར་ཕེབས་ལམ་ཆེད་མོ་ཌའི་ལམ་ཆེན་དང་། གླིང་བསྐོར་བསྐོར་ལམ་བཟོ་ཞུས་པ་རེད།

དེ་རྗེས་ཁོངས་ཀྱི་གཞོན་ནུའི་ཚོགས་ཆེན་ཐོག་ནས་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དབུས་རྒྱུན་ལས་ཁང་གི་ཚོགས་གཙོར་སྔ་རྗེས་ཐེངས་གཉིས་བསྟུན་མར་སྤྱི་མོས་འོས་འདེམས་བྱུང་བ་ལྟར་ལས་འཁུར་གནང་རིང་བོད་དོན་དྲིལ་བསྒྲགས་དང་། དཔལ་འབྱོར་འདུ་འགོད། སྒྲིག་འཛུགས་ཡར་རྒྱས་དང་རྒྱ་བསྐྱེད། གཏན་འཇགས་ལས་ཁུངས་ཐོག་མར་གསར་འཛུགས་ཐུབ་པ་བྱུང་བ་དང་། དེ་སྐབས་འབྲུག་ནང་བོད་མིར་དཀའ་ངལ་འཕྲད་སྐབས་རྒྱ་གར་དུ་བཞེས་ཐབས་སྐོར་རྒྱ་གར་གཞུང་ལ་སྔ་རྗེས་ཞུ་གཏུགས་དང་། འབྲུག་གཞུང་ལ་བོད་མིར་བརྡབ་བསིགས་དཀའ་ངལ་མི་ཡོང་བའི་སྔ་རྗེས་ཞུ་བསྐུལ། དེ་བཞིན་གློ་སྒྲིག་འཛུགས་ཀྱི་འགོ་འཛིན་རྣམ་པ་བལ་གཞུང་ནས་འཛིན་བཟུང་བྱས་སྐབས་རྒྱལ་སྤྱི་དང། བལ་གཞུང་ལ་འཕྲལ་དུ་གློད་དཀྲོལ་དགོས་པའི་ཞུ་བསྐུལ་གྱི་ལས་འགུལ་རྒྱ་ཆེ་སྤེལ་བར་བོད་གཞུང་དམངས་ནས་བསྔགས་བརྗོད་ཆེན་པོ་ཐོབ་ཡོད།

ལྷག་དོན་ ༡༩༧༧ ལོར་ཟུང་སྦྲེལ་ཚོགས་ཆུང་ཟེར་བ་ཞིག་བྱུང་བ་རེད། ཚོགས་ཆུང་དེའི་ནང་གཞོན་ནུའི་རྒྱུན་ལས་འགའ་ཞིག་དང་། ས་གནས་ཡན་ལག་འགའ་ཞིག་ནས་མཉམ་བཞུགས་བྱས་པ་རེད། སྟབས་མ་ལེགས་པ་ཞིག་ལ་ཚོགས་ཆུང་དེའི་ཕྱག་ལས་གནང་ཕྱོགས་ལ་བཀའ་ཤག་དང་སྤྱི་འཐུས་ལྷན་ཁང་གཉིས་ཕྱོགས་ནས་གཟིགས་ཕྱོགས་བྱུང་བར་བརྟེན་བོད་པའི་སྤྱི་ཚོགས་ནང་ལབ་རྙོག་མཐོང་ཚུལ་བྱུང་བར་བརྟེན། གཞོན་ནུའི་སྒྲིག་འཛུགས་ནང་དུའང་བསམ་ཚུལ་རིང་ཐུང་ཆགས་རྐྱེན་གཞོན་ནུའི་རྒྱུན་ལས་ཁག་གཅིག་དགོངས་ཞུ་གནང་དགོས་བྱུང་བ་རེད།

ས་གནས་ཡན་ལག་ནང་ཁུལ་ལའང་བསམ་ཚུལ་མ་མཐུན་པ་བྱུང་སྟེ་ཁག་གཉིས་སུ་གྱུར་བའི་སྐབས་དེར་ཁོ་རང་གཞོན་ནུའི་ཚོགས་གཙོར་གསར་འདེམས་བྱུང་བ་རེད། ཁོང་ནས་འགྲིགས་འཇགས་ཡོང་ཐབས་ཀྱི་སྲིད་བྱུས་བཟུང་ནས་ཕན་ཚུན་ཕྱོགས་གཉིས་ཀར་འབྲེལ་བ་གནང་སྟེ་གཞོན་ནུའི་སྒྲིག་འཛུགས་ཁ་འཐོར་མ་བྱུང་བའི་བྱས་རྗེས་བཞག་ཡོད། དེ་བཞིན་དེ་སྐབས་མདོ་ཁམས་གཞོན་ནུ་ཚོགས་པ་ཞེས་པ་ཞིག་བྱུང་བ་དེ་ལ་ཡང་ཐབས་མཁས་ཀྱིས་འབྲེལ་བ་གནང་སྟེ་རིམ་གྱིས་ལབ་རྙོག་མེད་པ་རང་སར་ཞི་བ་རེད། གཞོན་ནུའི་ཚོགས་གཙོ་གནང་རིང་བོད་དུ་གཞུང་འབྲེལ་སྐུ་ཚབ་ཚོགས་པ་ཐེངས་གཉིས་པའི་ཁོངས་སུ་ཟླ་བ་གསུམ་ཙམ་རིང་ཆོལ་ཁ་གསུམ་གྱི་ས་ཁུལ་མང་པོར་འཚམས་གཟིགས་ལ་ཕེབས་ཡོད་པ་རེད།

དེ་རྗེས་བོད་གཞུང་བདེ་སྲུང་ལས་ཁུངས་སུ་དྲུང་གཞོན་དུ་བསྐོ་གཞག་དང་། ཡིད་ཆེས་འཕེར་བའི་ཕྱག་ལས་གྲུབ་འབྲས་ཡག་པོ་བྱུང་བར་བརྟེན་གོང་རིམ་བཀའ་ཤག་གིས་དྲུང་ཆེ་ཕྱག་རོགས་དང་། དྲུང་ཆེ་ལས་ཚབ་མཐར་དྲུང་ཆེ་བར་གནས་སྤར་གྱིས་ལོ་ ༨ རིང་བདེ་སྲུང་དུ་ཞབས་ཕྱི་ཞུས། བདེ་སྲུང་ལས་ཁུངས་ཀྱི་ངོ་བོའི་ཆ་ནས་ང་ཚོར་ཁོངས་གི་བྱས་རྗེས་འདི་དང་འདི་ཞེས་དམིགས་བསལ་ཞུ་རྒྱུ་མེད་ཀྱང་། ལོ་ ༨ ནང་གནས་རིམ་གསུམ་གནས་སྤར་གནང་སྟངས་ལ་གཞིགས་ན་བྱས་རྗེས་ཡག་པོ་བྱུང་ཡོད་པ་གསལ་པོ་མཐོང་ཐུབ། ད་ལྟ་ལྡི་ལི་སྣེ་ལེན་ཁང་གི་ས་ཆ་འདི་ཡང་ཁོང་གིས་ཐབས་ཤེས་གནང་སྟེ་བྱུང་བ་ཞིག་རེད་འདུག 

དེ་ནས་བལ་ཡུལ་སྐུ་ཚབ་དོན་གཅོད་ལ་བསྐོ་གཞག་གནང་བ་ལྟར་ལོ་གཉིས་སྐོར་གནང་རིང་། ད་ལྟ་བལ་ཡུལ་སྣེ་ལེན་ཁང་གི་ས་ཆ་སྤུས་གཟིགས་དང་རིན་འབབ་ཐབས་འཚོལ། དོན་གཅོད་ཁང་གི་ཐོག་བརྩེགས་སྤར་ཆ། རིག་གཞུང་རྨང་འཛུགས། གློ་སྒྲིག་འཛུགས་ཁོངས་འབའ་པ་རྒན་ཡེ་ཤེས་ཤོག་ཁག་དང་གཞུང་སའི་དབར་ལོ་མང་གོང་འགལ་ཟླའི་གནས་ཚུལ་ཡོད་པ་གཙང་སེལ་བཟོ་ཐུབ་པའི་བྱས་རྗེས་ཐོག  བལ་པོའི་ས་མཚམས་སྙེ་ཤང་ཁུལ་རང་རིགས་ ༣༠༠ སྐོར་ཡོད་པའི་གནས་སྟངས་རྟོགས་ཞིབ་སླད་ས་གནས་སུ་གཞུང་ཞབས་གཟིགས་བསྐོར་ལ་ཕེབས་མཁན་དང་པོ་དེ་ཡང་ཁོང་ཡིན་པ་རེད། གཞན་ཡང་ད་ལྟ་ཡོད་བཞིན་པའི་སྤོག་རར་ཚན་རིག་གི་སློབ་གྲྭ་ཟུར་འཛུགས་ཡོང་ཐབས་སུ་འབྲེལ་ཡོད་ SOS རོགས་ཚོགས་ལ་འབྲེལ་གཏུགས་ཞུ་སྐུལ་གནང་བ་སོགས་བྱས་རྗེས་གང་ལེགས་བྱུང་ཡོད་པ་ཀུན་གསལ་ཡིན།

བལ་ཡུལ་དོན་གཅོད་གནང་མུར་སྐུ་སྒེར་དྲུང་ཆེར་དྲག་འདེམས་བསྐོ་གཞག་གནང་བ་ལྟར་ལོ་ ༡༣ རིང་༸རྒྱལ་བའི་དབུ་འོག་དཔུང་འདེགས་ཞུ་སྒོ་ཁག་ལམ་སྟོན་བཀའ་མངགས་ཇི་གནང་འབད་འབུངས་ཞུས་རྗེས་རྩ་དགོངས་ཞུས་ཀྱང་དགོངས་འཁྲོལ་མ་བྱུང་བར་བརྟེན་ལས་དོན་འབྲེལ་ཆགས་རྒྱུས་མངའ་ལྟར་ནོར་གླིང་བོད་ཀྱི་རིག་གཞུང་བསྟི་གནས་ཁང་དུ་༸རྒྱལ་བའི་མཛད་རྣམ་སྡེ་ཚན་ཁོངས་ལོ་ ༢ རིང་དམིགས་བསལ་ཞབས་གཡར་གནང་བ་རེད།

སྐུ་སྒེར་ཡིག་ཚང་དུ་ཞབས་ཕྱི་ཞུས་རིང་ལས་ཞོར་ཧི་མ་ལ་ཡའི་རི་རྒྱུད་ཆོས་ལུགས་རིས་མེད་ཀྱི་བཙུན་དགོན་འཇམ་དབྱངས་ཆོས་གླིང་གི་འཛུགས་བསྐྲུན་འཆར་འགོད་དང་རོགས་རམ་ཐབས་འཚོལ་ཞུས། བོད་བསྟན་པ་ཆབ་སྲིད་སྤྱིའི་བདེ་རྩར་དགོངས་ནས་སྤྲེལ་ལོ་དང་བསྟུན་ཁོང་དང་བློ་མཐུན་འགའ་ཤས་ཀྱིས་མཚོ་པད་མར་གསེར་ཟངས་ལས་གྲུབ་པའི་སློབ་དཔོན་རིན་པོ་ཆེའི་སྐུ་བརྙན་ཆེ་ཆུང་ཕི་ཌི་བརྒྱད་ཡོད་པ་ཞིག་གསར་བཞེངས་ཞུས་པ་དང་། དེ་བཞིན་བཙུན་དགོན་འཇམ་དབྱངས་ཆོས་གླིང་དུ་བལ་ཡུལ་གྱི་མཆོད་རྟེན་བྱ་རུང་ཁ་ཤོར་ལ་དཔེ་བསླངས་ནས་མཆོད་རྟེན་གསར་བཞེངས་གནང་བ་རེད།

དེ་ལྟར་ལྷ་དར་ས་ལ་བདུད་དར་ཟེར་བ་བཞིན་བོད་ཀྱི་ལོ་རྒྱུས་སྔ་ཕྱི་རིམ་པའི་ནང་ཕན་ཚུན་ཕྱགས་གཏོགས་བེད་སྤྱོད་ཁོངས་སུ་མེད་པའི་ལྷག་བསམ་ཅན་གྱི་མི་སྣར་ཕྱི་ནང་ཁ་མཐུན་ནས་ཁུངས་ལུང་གཞི་རྩ་མེད་པ་མི་དཀར་ལ་ཞྭ་ནག་གཡོགས་ཐབས་ཀྱི་བྱས་ཉེས་བྱུང་ཡོད་པ་ལྟར། ཁོ་རང་ལ་ཡང་སྐུ་སྒེར་ཡིག་ཚང་དུ་ཕྱག་ལས་གནང་རིང་དངུལ་ཆད་བྱུང་བ་དང་། ༸གོང་ཆ་མཆོག་ནས་གཟིགས་ཚུལ་ཡོད་ལུགས་མིང་ཆ་བཟོ་ཐབས་ཀྱི་ངན་བྱུས་བརྩམས་ཏེ་སྤྱི་ཚོགས་ནང་གཏམ་འཚལ་སྤེལ་ཡོད་པ་དེ་སྐོར་ཉེ་ཆར་རྒྱ་གར་དང་ཕྱི་རྒྱལ་ཁུལ་ནས་བསམ་ཡོད་སྤྱི་སེམས་ཅན་གྱི་མི་སྣ་ཁག་བློས་མ་བཟོད་པར་སྐུ་སྒེར་ཡིག་ཙང་དུ་དེ་ལྟར་དངོས་འབྲེལ་ཡིན་མིན་དགོངས་བསྐོར་ཕྱག་བྲིས་སྔ་རྗེས་ཕུལ་བའི་བཀའ་ལན་དུ་སྐུ་སྒེར་ཡིག་ཚང་ནས་ ༢༠༡༠ ཟླ་ ༥ ཚེས་ ༥ འཁོད་པའི་ནང་ ༼སྤྱི་དངུལ་མ་ཚང་བ་དང་རྩིས་ཆད་ཐོན་པ་བྱུང་མེད། གཞུང་ཞབས་ཐེག་པ་རིམ་འཛིགས་ཀྱིས་ལོ་མང་ཞབས་ཞུས་ཤེས་འཇོན་གཉིས་ལྡན་ལྷག་བསམ་ཅན་ཞིག་ཡིན༽ཞེས་དང་། བཀའ་ལན་གཞན་དེ་ ༢༠༡༠ ཟླ་ ༥ ཚེས་ ༡༢ ཉིན་གནང་བའི་ནང་༼སྐུ་ངོ་བློ་བཟང་སྦྱིན་པ་གཞུང་ཞབས་ནས་རྒས་ཡོལ་སྔ་སྣུར་ཞུས་ཏེ་ཨ་རིར་མ་ཕེབས་གོང་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུས་ཐོན་ཨ་རིར་མ་འོངས་ལས་གཞིའི་སྐོར་༸སྙན་གསེང་དང་རྒྱབ་གཉེར་བཀའ་ཡིག་ཀྱང་ཞུས་རྩལ་བྱུང་ཡོད༽ཅེས་འཁོད་ཡོད་པ་དེ་ནས་ངན་སེམས་བཅངས་པའི་དཀྲོག་གཏམ་གྱི་རྫུན་རྐུབ་བརྟོལ་བ་རེད། གོང་གསལ་སྐོར་དངོས་འབྲེལ་ཡིན་མིན་སྐུ་སྒེར་ཡིག་ཚང་ལ་དྭོགས་གཅོད་གནང་ཚེ་ཕྱི་གསལ་ནང་གསལ་མཁྱེན་རྟོགས་གསལ་པོ་ཡོང་རྒྱུ་ཡིན། དེ་ལྟར་ཕྱི་ལོ་ ༢༠༠༩ ཕྱི་ཟླ་ ༧ ནང་བགྲེས་ཡོལ་ཞུས་ཏེ་ཨ་རིར་ཐོན་ཁར་༸གོང་ས་༸སྐྱབས་མགོན་ཆེན་པོས་གཟིམ་ཆུང་དུ་ཟུར་མཇལ་སྩལ་ཐོག་གནང་སྐྱེས་དད་རྟེན་གསོལ་སྩལ་དང་། སྐུ་དཔར་ལྷན་བཞེས། མ་འོངས་བྱེད་སྒོའི་ནང་མའི་བཀའ་སློབ་སྩལ་ཏེ་དཔོན་འབངས་བླ་སློབ་དགའ་དབྱེ་འཛུམ་བྲལ་བྱུང་ཡོད་པ་རེད།

ཁོང་གི་དམིགས་བསལ་ཁྱད་ཆོས་ནི། མི་རང་བཞིན་བརྟན་པོ་དང་། ཆོས་ལུགས་དང་ལུང་ཚན་ཐད་ཕྱོགས་ལྷུང་འཐེན་འཁྱེར་རྩ་བ་ནས་མི་གནང་མཁན། སྤྱི་དོན་ཐོག་དོ་སྣང་སེམས་འཁུར་ཆེ་ཞིང་། གཞན་གྱི་བེད་སྤྱོད་འོག་མི་འགྲོ་མཁན། དྲང་ཚུགས་ལྡན་པ། ཆེ་ཉམས་མེད་པ་འབྲེལ་བ་ཞུ་བདེ་པོ། རྒྱུན་གྱི་ཀུན་སྤྱོད་ཆོས་པ་ལྟ་བུ། ཉམ་ཐག་རིགས་ལ་གང་ཐུབ་བལྟ་སྐྱོང་རོགས་རམ་དང་། རྩག་རྩིག་གནས་དོན་ཆུང་རྩག་ཐོག་གུ་ཡང་ཁོག་རྒྱ་ཆེ་ཡང་། རྩ་དོན་དང་འབྲེལ་བའི་གནས་དོན་གལ་གནད་ཆེ་སར་གྱོང་ཐག་ཆོད་ཡོད་པ་ང་ཚོར་རྒྱུས་མངའ་ཡིན།

མདོར་ན་ཁྱོན་གཞུང་ཞབས་ལོ་ ༣༣ ལྷག་ཙམ་ཞབས་ཕྱི་ཞུས། ཤེས་རིག་དང་བདེ་སྲུང་། བལ་དོན་བཅས་གནང་བས་བོད་ཕྱི་ནང་གཉིས་ཀའི་བདེ་སྡུག་གནས་སྟངས་མཁྱེན་པ། བདེ་སྲུང་ཕྱག་ལས་གནང་བས་མི་ངོ་ཡག་ཉེས་ཐུགས་རྒྱུས་ཡོད་པ། སྐུ་སྒེར་ཡིག་ཚང་དུ་ཞབས་ཕྱི་ཞུས་རིང་མཇལ་བཅར་བས་མཚོན་ཡིག་ཚང་དུ་འབྲེལ་གཏུགས་ཞུ་མཁན་མི་སྣ་ཆེ་ཕྲར་འབྲེལ་བ་དང་། ལྷག་དོན་དུ་བོད་མིའི་གཞིས་ཆགས་ཁག་དང་། སློབ་གྲྭ། སྨན་ཁང་། དགོན་པ་གྲྭ་ཚང་ཁག་དང་བཅས་པར་ཡང་ཡང་༸རྒྱལ་བའི་ཆིབས་ཞབས་སུ་བཅར་རྒྱུའི་གོ་སྐབས་བྱུང་ཡོད་པ་ལྟར། བོད་མིའི་སྤྱི་ཚོགས་ཀྱི་གནས་སྟངས་གསལ་པོ་མཁྱེན་རྟོགས་ཡོད་པ། གཙོ་ཆེ་༸གོང་ས་ཆེན་པོའི་དགོངས་གཞི་དགོས་པ་གསལ་རྟོགས་ཡོད་པ་མ་ཚད་འཛིན་སྐྱོང་གི་ཉམས་མྱོང་ཆ་ཚང་ཡོད་པ་ཞིག་ཡིན།

དུས་རྒྱུན་རང་འཁྲིིའི་ཞུ་སྒོ་ཁག་གི་ཐོག  ༸གོང་ས་ཆེན་པོའི་ཡིད་ཆེས་མ་དངུལ་གྱི་ཐེབས་རྩའི་ཚོགས་མི་དང་། བོད་གཞུང་སྨན་རྩིས་ཁང་གི་འགན་འཛིན་ལྷན་ཚོགས་ཀྱི་ཚོགས་མི། ཆོས་དོན་དང་ཤེས་རིག་ལས་ཁུངས་ཀྱི་འབྲེལ་ཡོད་སྡེ་ཚན་གྱི་ཚོགས་མི་བཅས་དང་། དེའི་གོང་ལས་བྱེད་བདག་གཉེར་ཁང་དང་། འོས་བསྡུ་ལས་ཁུངས། ཆེས་མཐོའི་སློབ་ཡོན་ཚོགས་ཆུང་། མདོ་སྟོད་འོས་བསྡུ་ཚོགས་ཆུང་བཅས་ཀྱི་ཚོགས་མི་གནང་ཡོད་པ་རེད།

ཕྱག་ལས་ཞོར་ལ། བོད་རང་བཙན་ཁུངས་བསྐྱེལ་བདེན་དོན་གསལ་བའི་སྒྲོན་མེ་དང་། བོད་ཀྱི་ཕྱི་སྲིད་དང་འབྲེལ་བའི་གཏམ། ཤིང་སྟག་སིམ་ལའི་ཆིངས་ཡིག་ལ་བསྐྱར་ཞིབ་བྱས་པ། གྲོས་མཐུན་དོན་ཚན་ ༡༧ ཟེར་བར་དཔྱད་གཏམ། བསླབ་བྱ་ཡ་རབས་འཇུག་ངོགས། མཛད་རྣམ་སྙིང་བསྡུས། ཕ་ཡིས་བུ་མོར་གདམས་པའི་དེབ་ཕྲེང་སྔ་རྗེས་གསུམ། སྲོག་གཅོད་ཀྱི་ཉེས་མིག་དང་སྲོག་བླུའི་ཕན་ཡོན་བརྗོད་པ། ༸རྒྱལ་སྲས་ཆེན་པོ་ཞི་བ་ལྷའི་རྣམ་ཐར་སྙིང་བསྡུས། སྒྲོལ་མའི་རྒྱུད་ཀྱི་འབྱུང་ཁུངས་དང་། འདོན་པའི་ཕན་ཡོན། སྒྲོལ་བསྟོད་ཕྱག་འཚལ་ཉེར་གཅིག་གི་འགྲེལ་པ། གར་ཞ་འཕགས་པའི་གནས་བཤད་སྙིང་བསྡུས་བཅས་ཕྱོགས་སྒྲིག་དཔར་སྐྲུན་གནང་ཡོད་པ་ཐུགས་སྣང་ཅན་ཚང་མས་མཁྱེན་གསལ་ཡིན།

དེས་ན་ལྷ་ཁང་རྙིང་པར་གནས་བཤད་གསར་པའི་དཔེ་ལྟར་དུས་རྒྱུན་ནས་བོད་སྤྱི་དོན་ལ་དོ་སྣང་སེམས་འཁུར་ཡོད་པ་རྣམས་ལ་ཁོང་གི་སྐོར་ཟུར་དུ་ངོ་སྤྲོད་དགོས་གལ་མེད་ཀྱང་། བྱས་རྗེས་བརྗེད་ངེས་ཅན་འགར་དྲན་གསོ་ཞུས་པ་དང་ཆབས་ཅིག་ཐུགས་རྒྱུས་མེད་མཁན་རྣམས་ནས་ང་ཚོས་གང་བཤད་ལ་ཆ་འཇོག་མ་གནང་བར་དངོས་འབྲེལ་བདེན་པ་ཡིན་མིན་བློ་གཟུ་བོར་གནས་པའི་མྱོང་རྒྱུས་ཡོད་པའི་མི་སྣར་འདྲི་བརྩད་གནང་ཚེ་གསལ་པོ་མཁྱེན་རྟོགས་ཡོང་བའི་རེ་བ་ཞུ་གི་ཡོད།

འབྲེལ་གཏུགས་ཁ་པར་ཨང་།
ནོར་བུ། 9882499269