དེ་རིང་སྔ་དྲོ་རྒྱ་ནག་རྒྱལ་ཡོངས་ནས་ཀན་ལྷོ་འབྲུག་ཆུ་རྫོང་གི་གོད་ཆག་ཁྲོད་རྐྱེན་ལམ་དུ་ཕྱིན་པ་དག་ལ་མྱ་ངན་གུས་འདུད་ཞུས་ཡོད་ཅིང་། སྐབས་དེར་པེ་ཅིན་གནམ་བདེ་སྒོ་མོ་ཆེ་ཐང་ཆེན་གྱི་རྒྱ་ནག་གི་རྒྱལ་དར་ཕྱེད་ཙམ་མར་ཕབ་ཅིང་། སྲིད་འཛིན་ཧུའུ་ཅིན་ཐའོ་དང་སྲིད་བློན་ཝོན་ཅ་པའོ། ཅ་ཆིན་ལིན། ལི་ཁྲང་ཁྲོན། ཞི་ཆེན་ཕིན། ལི་ཁེ་ཆང་། ཧི་གོ་ཆང་། ཀྲུག་ཡོན་ཁཱང་བཅས་གཙོས་ཀྱིས་མགོ་བོ་བསྒུར་ཏེ་མྱ་ངན་ཞུས་ཡོད། དུས་དེར་རྒྱལ་ནག་རྒྱལ་ཡོངས་ཀྱི་རོལ་རྩེད་ཁང་དག་གི་རོལ་རྩེད་མཐའ་དག་མཚམས་འཇོག་དགོས་པའི་བཀའ་བཏང་ཡོད་པ་མ་ཟད། ཕྱི་རྒྱལ་ཁག་གི་ཀྲུང་གོའི་གཞུང་ཚབ་དང་ཕྱིར་སྐྱོད་སློབ་མ་སོགས་ཀྱིས་ཀྱང་དུས་མཉམ་དུ་མྱ་ངན་ཞུས་ཡོད་འདུག
ཀན་ལྷོ་འབྲུག་ཆུའི་ཉེན་སེལ་བཀོད་འདོམ་ཚན་པས་བསྒྲགས་པ་ལྟར་ན། ཁ་སང་ཕྱི་དྲོའི་པེ་ཅིན་གྱི་ཆུ་ཚོད་ ༥ བའི་བར་རི་ཉིལ་འདམ་ཟེགས་ཀྱི་དོན་རྐྱེན་ཁྲོད་མི་ཤི་བའི་གྲངས་འབོར་ ༡༢༣༩ ཙམ་ལ་བུད་པ་ཡོད་འདུག་ལ། མི་ ༥༠༠ ཙམ་གར་སོང་ཆ་མེད་དུ་གྱུར་ཡོད་འདུག འབྲུག་ཆུ་རྫོང་གི་རྫོང་དཔོན་ཏེ་མུའུ་ཅཱང་ཐེན་ཞུ་བ་ཁང་བོད་རིགས་ཤིག་ཡིན་ཞིང་། ཁོས་ཐེངས་འདིའི་གོད་ཆག་བྱུང་ཡུལ་བོད་རིགས་ཀྱི་ས་ཁུལ་ཡིན་པ་དང་། རྐྱེན་འདས་སུ་སོང་བ་མང་ཆེ་བ་བོད་རིགས་ཡིན་སྟབས། ཕྱི་ཚེས་ ༨ ཉིན་འདས་གྲོངས་སུ་སོང་བ་དག་གི་ཚན་རྡོ་ལ་བརྐོས་ཏེ་རྗེས་དྲན་རྡོ་རིང་བཞེངས་རྒྱུ་དང་། རྡོ་རིང་གི་མདུན་དུ་བོད་པའི་ལུགས་སྲོལ་ལྟར་མ་ཎི་རྡོ་འབུམ་བརྩིག་དགོས་པའི་བསལ་ཚུལ་བཏོན་ཡོད་འདུག
གསར་འགོད་པ། དོན་འགྲུབ་བཀྲ་ཤིས།
དངོས་ནས་དེ་འདྲ་ཡིན་ན་རྫོང་དཔོན་ལགས་ལ་ཐུགས་རྗེས་ཆེ་ཞུ་ཡག་ཡིན
རྫོང་དཔོན་ཁོང་བོད་མི་རིགས་ཀྱི་ལ་རྒྱ་ཆེན་པོ་ཡོད་མཁན་ཞིག་ཡིན་པ་འདྲ་ དགའ་པོ་བྱུང་
གསར་འགོད་དོན་འགྲུབ་བཀྲ་ཤིས་ལགས་རྗེ་ཆེ། གསར་འགྱུར་མགྱོགས་མྱུར་ལྡན་ལ་ད་དུང་བོད་ཀྱི་མཐའ་མཚམས་ཀྱི་ས་ཁུལ་འདིའི་གནས་ཚུལ་གང་ཡོད་འཚོལ་སྒྲུབ་བྱ་རྒྱུ་ཧ་ཅང་གལ་འགངས་རང་བཞིན་ཅན་ཞིག་རེད། བཙན་བྱོལ་གྱི་ཁྱབ་བསྒྲགས་ཀྱིས་འདང་གིན་མེད་པའི་གནས་ཚུལ་འདུག་པས་མུ་མཐུད་དེ་ང་ཚོས་འབད་འབངས་བྱ་གལ་ཆེ་བར་མཐོང་།
གཅན་བཟོད་རྒྱལ་ལགས། སྨྱུག་ཁ་ཅུང་གཡོ་བཞིན་ཡོད་པ་མིན་འགྲོ། གསར་འགྱུར་འདི་མདང་ནུབ་ཆུ་ཚོད་ ༡༡ ཐོག་བཏང་བ་ཡིན། སྐབས་དེར་མཚོན་ན། དེ་རིང་མི་ཟེར་ཐབས་མེད་རེད། མཚན་མོ་ཆུ་ཚོད་ ༢ སྟེང་ཡང་བསྐྱར་བཟོ་བཅོས་ཐེངས་ཤིག་བརྒྱབ་པ་ཡིན། དུས་ཚོད་སྐར་ཆ་གང་ཡིན་དང་། ཧོང་ཀོང་དམིགས་བསལ་སྲིད་འཛིན་ས་ཁུལ་དང་ཨའོ་མིན། ཕྱི་རྒྱལ་གཞུང་ཚབ་ཁང་ཁག ཐད་གཏོགས་གྲོང་ཁྱེར་ཁག རྒྱལ་ནང་གི་ཞིང་ཆེན་རིམ་པ་དང་ཁུལ་རིམ་པ་བཅས་སུ་མྱ་ངན་ཞུ་སྟངས་ལ་ཚད་གཞི་མི་འདྲ་བའི་བརྡ་ཁྱབ་བཏང་ཡོད་པ་ང་དངོས་སུ་མཐོང་ཡོད།
རེད་རེད། ཡིན་ནའང་རྒྱལ་དར་ཕབ་སྟེ་མྱ་ངན་ཞུས་པ་དང་གསར་འགྱུར་སྤེལ་བའི་ཚེས་གཉིས་ལ་ད་དུང་ཡང་བསྐྱར་བཅོས་ཤིག་དགོས་སྙམ་མཐོང་སོང་། གཞན་བོད་ཀྱི་དུས་བབ་ཀྱིས་གསར་འགྱུར་དུས་ཐོག་གཏོང་བ་དང་གསར་འགོད་ལས་རིགས་ལ་དཀའ་ཁེག་ཅི་ཙམ་ཡོད་མེད་ངས་ཀྱང་ཤེས་ཡོད་ན། བཀའ་དྲིན་ཆེ་ཞུས་པ་ཡིན།
ཁ་སྔོན་ཞིག་ནས་ངའི་སྨྱུ་གུ་འདིར་ཁ་བཙོག་རྐྱང་བྲིས་བསྡད་པ་ཡིན་ན་གང་ཡིན་མ་ཤེས། སྨྱུག་ཁ་ཅུང་གཡོ་གིན་ཡོད་ནའང་ཐང་ཡ། ཧ་ཧ་ཧ།
ཟུར་ངོས་གཞན་ཞིག་ནས་བལྟས་ན། དེང་སྐབས་རྒྱ་ནག་གི་རྒྱལ་དར་དང་རྒྱལ་ཁྲིམས། རྒྱལ་དམངས་ཡོད་ཚད་གུང་བྲན་ཏང་གི་ལག་གི་རྩེད་སྤྱད་ལྟ་བུ་ཞིག་ཏུ་གྱུར་མི་འདུག་གམ།
རྒྱ་དར་ཕབ་ནས་མྱ་ངན་ཞུ་ཡོད་རེད་དེ་གཙོ་བོ་ས་ཁུལ་རང་ལ་རོགས་སྐྱོར་གང་ཡོང་གཏོང་རྒྱུ་ཧ་ཅང་གལ་བ་ཆག་འདུག རྒྱུ་མཚན་ད་ལྟ་ས་ཁུལ་རང་ལ་རོགས་སྐྱོར་ཤར་གཏོང་མ་བྱས་པའི་དཀའ་ངལ་འདུག དེ་ནི་ཧ་ཅང་བློ་ཕམ་དགོས་པའི་གནས་སྟངས་ཤིག་རེད། ཁོང་ཚོ་སྙིང་མ་རྗེ་རེ་མིག་སྐྲངས་ཁར་ཁུ་ཚུར་ཞེས་པའི་དཔེ་ལྟར་ད་དུང་ཁོང་ཚོར་རོགས་སྐྱོར་བྱེད་ཉིད་ཡོད་ཀྱང་ཤར་གཏོང་མ་བྱས་པ་དངོས་གནས་ཐབས་སྡུག་རེད།
༼གལ་སྲིད་མྱ་ངན་མ་བྱས་ན་ཁྲིམས་ཆད་གཅོད་རྒྱུ་ཡིན་༽ཞེས་འཇིགས་སྐུལ་དང་བཅས་མྱ་ངན་བྱས་འདུག མྱ་ངན་གྱི་ཉིན་དེར་ཉིན་ཧྲིལ་བོར་རྒྱ་ནག་རྒྱལ་ཡོངས་ཀྱི་བརྙན་འཕྲིན་ལས་ཚན་ཚང་མ་མཚམས་འཇོག་ཏུ་བཅུགས་ཏེ་རྒྱ་ནག་དབུས་བརྙན་འཕྲིན་ཁང་གི་གཅིག་གྱུར་སྟངས་འཛིན་གྱིས་མྱ་ངན་སྐོར་གྱི་ལེ་ཚན་རྐྱང་རྐྱང་བཏང་སོང་། རྒྱ་ནག་གི་ཏང་དེ་དངོས་གནས་དྲག་སྤྱོད་རིང་ལུགས་པ་རང་རེད། བྱ་ངན་རང་གིས་བསགས་རྗེས་ལས་ངན་དམངས་ལ་འགེལ་གྱིན་འདུག
མང་ཚོགས་ཤིག་གིས་ཀྱང་གསར་ལམ་ཁག་ཏུ་འདི་ལྟར་བརྗོད་འདུག ༼དངོས་གནས་མི་སེམས་ཟེར་བ་མི་འདུག གནོད་འཚེ་བྱུང་རྐྱེན་གྱི་དངོས་དོན་ནག་ཉེས་ལ་འགན་ཁུར་བའི་སྒོ་ནས་ཉེས་སེལ་གནོད་འགོག་གྱི་འདུ་ཤེས་བཟུང་སྟེ་མྱ་ངན་མི་ཞུ་བར། ཐེངས་རྗེས་མར་ཡང་བསྐྱར་གནོད་འཚེ་ཞིག་འབྱུང་རྒྱུ་གཞིར་བཞག་ཐོག་བཙན་འགེལ་སྒྲིག་གཞི་རང་བཞིན་གྱི་མྱ་ངན་གྱི་ལམ་སྲོལ་གཏོད་བཞིན་འདུག༽ཅེས་སྐད་ཤོར་འདུག
ཨོ་ལེ།སྙིང་མ་རྗེ།རྐྱེན་ལམ་དུ་ཕྱིན་པ་རྣམས་ཀྱི་ཆེད་དུ་བོད་མི་ཡོད་དོ་ཅོག་གིས་གསོལ་བ་བསྔོ་སྨོན་ཞུ་རྒྱུ་ཤིན་ཏུ་གལ་ཆེ་མོད།འོན་ཀྱང་བཤུལ་ལུས་ནང་མི་ཚོས་ཅི་བྱེད།སྙིང་རེ་རྗེ།གློ་བུར་བའི་ནང་ཡིད་ལ་དྲན་མ་མྱོང་བའི་དཀའ་ངལ་དེ་འདྲ་ཡོང་དགོས་དོན་གང་ཡིན་ནམ།ལྷག་ལུས་ནང་མི་ཚོ་གང་དུ་འགྲོ།གང་དུ་སྡོད།དམིགས་ཡུལ་ཅི་ཞིག་འཛིན་དགོས་ཡ།ཨ་ཙི།མ་སེམས་ཅད་ཐམས་ཅན་འགྲོ་བ་རིགས་དྲུག་གི་མགོ་ཐོག་ཏུ་དེ་འདྲ་མི་ཡོང་བའི་སྨོན་ལམ་རྩེ་གཅིག་ཏུ་ཞུའོ།།མ་གཞི་རྫོང་དཔོན་ལགས་ཀྱི་ཕྱག་ལས་གནང་སྟངས་སྔོན་ཐོན་རེད།ཧ་ཅང་ཡག་པོ་རེད།
དེ་རིང་ནི་སྤྱི་ཚེས་བཅུ་དྲུག་རེད་མོད། རྒྱལ་དར་ཕབས་ནས་མྱ་ངན་བྱས་པ་སྤྱི་ཟླ་༨ པའི་ཚེས་༡༥ ཉིན་གྱི་ཞོགས་པ། པེ་ཅིན་གྱི་དུས་ཚོད་དུས་ཚོད་ལྔ་དང་སྐར་མ་ཉེར་ལྔའི་སྟེང་མྱ་ངན་བྱས་འདུག
ད་དུང་སྤྱི་ཟླ་༨ པའི་ཚེས་༡༥ ཉིན་གྱི་ཞོགས་པ་ཞང་ཀང་གི་སྔ་དྲོའི་དུས་ཚོད་བརྒྱད་ཀྱི་སྟེང་། ཞང་ཀང་དམིགས་བསལ་སྲིད་འཛིན་ས་ཁུལ་སྲིད་གཞུང་གི་ཧི་ཧྲུའུ་ཐང་ཆེན་དུ་རྒྱལ་དར་དང་སྲིད་འཛིན་ས་ཁུལ་གྱི་དར་ཆ་གཉིས་དལ་བུར་ཡར་བསྒྲེངས་རྗེས། ཕྱིར་དར་ཤིང་གི་སྐེད་ཙམ་ལ་ཕབ། ཙི་ཅིན་ཐང་ཆེན་ནས་ཀྱང་དར་ཆ་སྐེད་ཙམ་ལ་ཕབ་སྟེ་འབྲུག་ཆུའི་ཆུ་ལོག་གིས་གོད་ཆགས་བཟོས་པར་མྱ་ངན་བྱས་འདུག