བལྟས་ཚོད་ལ་སྐབས་གསུམ་པའི་བཀའ་བློན་ཁྲི་པར་མངོན་ལྐོག་གང་རུང་ན་ལངས་ཡོང་མཁན་གྱི་འོས་མི་གང་འཚམ་འདུག་ལ། སྐབས་སྔོན་མ་དག་དང་བསྡུར་ན་མང་ཚོགས་ཀྱང་གང་འཚམ་གྱིས་བཀའ་སྤྱིའི་འོས་བསྡུ་ཆེན་མོའི་ཁྲོད་ཞུགས་རྒྱུར་ལྟ་གོན་ཟིན་འདུག ཡིན་ནའང་། སྐབས་འདིར་སླེབས་སྐབས་འོས་མི་རྣམས་ཀྱི་བསྒྲགས་གཏམ་དུ་གོ་མི་ཐུབ་པ་དང་མང་ཚོགས་ཀྱི་རེ་བའི་ནང་ནས་ཀྱང་བརླག་འདུག་པའི་གནད་དོན་གཅིག་རང་འདུག་སྟེ། དེ་ནི་འབྱུང་འགྱུར་གྱི་ལོ་ལྔའི་ནང་དུ་༧གོང་ས་མཆོག་དགུང་ལོ་བརྒྱད་ཅུར་ཕེབས་པའི་གྱ་སྟོན་ཡིན་པ་དེ་རེད།
སྐབས་རྗེས་མའི་བཀའ་ཁྲིར་མི་སུ་ཞིག་ཕེབས་རུང་ཁོང་བཀའ་ཁྲིར་བཞུགས་རྒྱུན་རིང་གི་མཇུག་མཐའི་ལོ་དེར། ༧གོང་ས་མཆོག་དགུང་གྲངས་བརྒྱད་ཅུར་ཕེབས་པའི་གྱ་སྟོན་རྟེན་འབྲེལ་གྱི་མཛད་སྒོ་བསྡུ་དགོས་ལ། དེ་ནི་༧གོང་ས་མཆོག་བོད་མིའི་ཆོས་སྲིད་ལུགས་གཉིས་ཀྱི་སྲིད་ཁྲིར་འཁོད་པ་ལས་ཀྱང་། བོད་མི་གཙོས་འཛམ་གླིང་གི་ནང་པ་ཡོངས་དང་དྲང་བདེན་སྐྱོང་བའི་མི་རྣམས་ལ་གལ་འགངས་ཆེན་པོར་ཆགས་ཡོད། རྒྱ་ནག་གཞུང་གིས་ཀྱང་ཡག་སྡུག་གང་ཡིན་རུང་ཁོང་གི་གྱ་སྟོན་གྱི་ཉིན་མོ་འདིར་སྔོན་དཔག་སྣ་ཚོགས་ཤིག་བྱེད་ཀྱིན་ཡོད་སྲིད།
༧གོང་ས་མཆོག་དགུང་གྲངས་བརྒྱད་ཅུར་ཕེབས་པའི་གྱ་སྟོན་དེ་བཙན་བྱོལ་དུ་གནང་ཚེ་མི་ཚེ་ཧྲིལ་བོར་སྐྱབས་བཅོལ་དུ་བཞུགས་ཏེ། བོད་མི་རིགས་ཀྱི་དོན་དུ་སྐུ་ངལ་བསྐྱོན་པའི་༧གོང་ས་མཆོག་གི་སྐུ་ཚེའི་ཐུགས་འདུན་ངོ་མ་དེ་འགྲུབ་མེད་ལ། བོད་གཞིས་བྱེས་གཉིས་ཀྱི་བོད་མི་རྣམས་ཀྱི་རེ་འདོད་ཀྱང་འགྲུབ་མེད།
ད་ལྟ་བཀའ་ཁྲིར་བཞེངས་མཁན་ཚང་མས་བཙན་བྱོལ་སྤྱི་ཚོགས་ཆུང་ཆུང་བོ་རིལ་རིལ་རྡོག་རྡོག་ཅིག་བཟོ་འཆར་ཡོད་སྐོར་བརྗོད་ཀྱིན་པ་ལས། རང་བཙན་གྱི་སྟེང་དུ་སྐད་ཆ་བཤད་ཀྱི་མི་འདུག་ལ། རང་སྲིད་རང་སྐྱོང་ཡང་གླེང་ཕོད་ཀྱི་མེད་པ་འདྲ། བཀའ་བློན་ཁྲི་པའི་སྲིད་སྟེགས་སུ་མི་སུ་འདྲ་ཞིག་ཕེབས་མིན་དེ་གཙོ་བོ་མ་རེད། གལ་ཆེ་ཤོས་གསར་དུ་ཕེབས་རྒྱུའི་བཀའ་བློན་ཁྲི་པ་དེས་འབྱུང་འགྱུར་གྱི་ལོ་ལྔའི་ནང་དུ་བོད་མི་སྐྱབས་བཅོལ་བ་རྣམས་ཕྱིར་རང་ཡུལ་དུ་ལོག་ཐུབ་པ་བྱ་རྒྱུ་དང་། ༧གོང་ས་མཆོག་གི་གྱ་སྟོན་ཡང་རྔམ་བརྗིད་ལྡན་པའི་ཕོ་བྲང་པོ་ཏ་ལར་གནང་ཐུབ་པ་བྱ་རྒྱུ་དེ་རེད།
འདི་ལྟར་བཀའ་ཁྲིར་བཞེངས་མཁན་ཚོས་མ་མཐར་ཡང་གནད་དོན་འདིའི་ཐད་དུ་སྐྱ་ཐིག་ཅིག་འཐེན་དགོས་པར་འདོད། མང་ཚོགས་ཀྱིས་ཀྱང་བཀའ་བློན་ཁྲི་པར་བཞེངས་མཁན་ཚོར་འབྱུང་འགྱུར་གྱི་ལོ་ལྔའི་ནང་གི་སྔོན་རྩིས་དང་པོ་བྱེས་འབྱོར་བོད་མི་རྣམས་ཕྱིར་རང་ཡུལ་དུ་ལོག་པར། མུ་མཐུད་དེ་རྒྱ་ནག་མཉམ་དུ་བོད་རྒྱ་འབྲེལ་མོལ་གནང་ངམ། རྣམ་པ་གཞན་ཞིག་ནས་བོད་རྒྱའི་གནད་དོན་ཐག་གཅོད་བྱེད་ཐུབ་མིན་ཐད་ཚ་འདྲི་ཡང་འདྲི་བྱ་དགོས་སྙམ།
བཀྲ་ ས་མཐོང་བསྟན་འཛིན་རྣམ་རྒྱལ་གྱིས༎
སྔོན་ཆེད་བོད་གཞུང་དཔལ་འབྱོར་ནས༎
ཧུན་སྒོར་འབུམ་ཕྲག་གྲངས་མེད་ཅིག།
ལྐོག་བཟའ་བྱས་ཏེ་བྲོས་བ་རེད༎
ད་ཆ་ལོ་གཞོན་བཀའ་བློན་ལ༎
ལངས་པའི་གོ་སྐབས་རྨད་བྱུང་སྟེ༎
ཧམ་འཕྲོགས་བྱེད་པའི་འདུན་པ་བཟུང་༎
སླར་ཡང་བཀའ་བློན་འོས་ལ་འཚང་༎
ལོ་ངོ་དྲུག་ཅུ་རེ་གྲངས་པར༎
སྐུ་དྲག་བཙན་པོའི་མིང་ངན་དེ༎
འཁྱེར་ནས་དོན་ཕན་སྤུ་ཉག་ཙམ༎
སྒྲུབ་མྱོང་མེད་པ་མི་ཤེས་བསམ༎
ཁ་བདེ་ཁོག་པ་རུལ་བ་ཁྱེད༎
ས་ཡ་དྲུག་གི་ཞབས་འདྲེན་ལས༎
ཕན་པའི་ལས་ཞིག་སྒྲུབ་མྱོང་མེད༎
དེ་བས་ཚེ་མཇུག་སྐྱིེད་པོ་བསྐྱལ༎
གལ་སྲིད་ལྐོག་ཟ་རུལ་བསུངས་ཁྱེད༎
བཀའ་བློན་ཁྲི་བའི་འོས་གཞི་དེ༎
ཐོབ་ན་ཕྱོགས་རེས་ཁོ་ན་ལས༎
དྲང་བདེན་འོས་ཤོག་མིན་པར་ངེས༎
བཀའ་ཁྲིའི་ལེན་མཁན་དང་པོ་དེ་། ༧ཁོང་དགུང་གྲངས་བརྒྱད་ཅུར་ཕེབས་པའི་གྱ་སྟོན་ཡང་ཕོ་བྲང་པོ་ཏ་ལར་གནང་འདུན་ཡོད་པ་བརྗེད་མི་འོས་པར་འདོད་དོ།། ཞེས་པ་ལ་ཐུགས་སེམས་བཞེས་ནས་འོ་ཤོག་འཕེན་དགོས་འདུག
བགྲེས་སོང་ཕར་ཆེར་སེམས་འཚབ་བྱས་ན་འང་༎
དོན་གྱི་གདན་ཀ་འཛིན་པའི་ནུས་པ་མེད༎
གཞོན་སྐྱེ་ཕར་ཆེར་སེམས་ཤུགས་ཆེ་ན་ཡང་༎
ཡོ་རབ་ཨ་རིར་འགྲོ་བའི་ཐབས་ལ་འབུངས༎
བུ་མེད་མང་ཤོས་རྒྱུ་ཆེན་རྐུབ་ལ་འཚང༌༎
སྟོང་ལོར་བསྟན་ན་རིགས་རུས་དབྱེ་བ་མེད༎
རིགས་རྒྱུད་བརླགས་ཀྱང་འགྱོད་མེད་འཇོན་དུ་སེམས༎
རང་རིགས་རྒྱུད་པ་ཡ་མ་ཟུང་དུ་བརྫིས༎
གྲྭ་བ་མང་བོས་ཆོས་ཁྲིམས་མི་སྲུང་པར༎
བླ་མ་རྫུན་མ་བཟོས་ནས་ཕྱི་རྒྱལ་དུ༎
ཆོས་ལོག་འགྲེལ་ལོག་རྒྱག་མཁན་ཧ་ཅང་༎
དེ་ནི་གངས་ཅན་པ་ཡི་ཞབས་འདྲེན་ཡིན༎
གྲྭ་ཡང་དག་སྒར་ན་ཆོས་ལ་འབད༎
བུ་མེད་མཛངས་མས་རིགས་རྒྱུད་བརྟན་པོར་བཟུང༌༎
མི་མཐུན་ལྡོག་ཕྱོགས་མང་པོས་ཞབས་འདྲེན་གྱིས༎
ལས་ཀ་བྱས་པས་བཟང་བོ་འདམ་དུ་གཡུགས༎
དྲ་གྲོགས་བསེ་རུ་ལགས། སྟ་གོན་ལྟ་གོན་གཉིས་ནོར་འདུག བདེན་པ་རེད།
གྱ་སྟོན་ཟེར་བ་མི་ཤེས་ཟེར་ན་ཡིད་ཆེས་མ་སོང་། བོད་མི་ཚོས་མི་རྒན་པ་ལོ་བརྒྱད་ཅུར་ལོན་ན་གྱ་སྟོན་བྱེད་སྲོལ་ཡོད། ཡིན་ནའང་། ཁྱོད་ཚོ་དེ་ལྟར་ཡིན་ས་མ་རེད། གང་ཡིན་ཟེར་ན་ངས་གཙང་གི་མི་ཞིག་ལ་ཁྱོད་ཚོས་གྱ་སྟོན་གཏོང་སྲོལ་ཡོད་མེད་དྲིས་པར། ཁོང་གིས་ཤེས་རྟོགས་མེད་ཟེར།
དེར་བལྟས་ན་ཕལ་ཆེར་གྱ་སྟོན་ཟེར་བ་འདི་ཁྱོད་ལ་ཚིག་གསར་ཆགས་ཡོད་པ་འདྲ།
དངོས་ནས་རྩོམ་སྒྲིག་པ། དུས་བབ་ཀྱི་མིང་དོན་མཚུངས་པའི་རྩོམ་སྒྲིག་པ་རེད་འདུག ཁ་ཡག་བཤད་དགོས་དོན་མེད་ལ། རང་ཉིད་ཀྱི་ལྟ་ཚུལ་གླེང་བ་ཡིན། ཉིན་འདི་དག་དུ་ངས་དྲ་ངོས་གང་ས་ནས་བཀའ་ཁྲི་དང་སྤྱི་འཐུས་སོགས་ཀྱི་སྐོར་ནས་རྩོམ་ཡིག་ཕལ་ཆེ་བ་མ་ཀློག་པ་མེད་ཀྱང་། མཆན་པུ་འདེབས་འདོད་མི་འདུག རྒྱུ་མཚན་ནི་ཚང་མས་རྩོམ་སྒྲིག་པའི་སྐད་ཆ་གསུངས་མ་ཐག་པ་བཞིན། བོད་གཞིས་བྱེས་གཉིས་ཀྱི་འབྲེལ་ཐག་དང་བྱེས་པ་བོད་ཡུལ་དུ་ལོག་ཐབས། གཞིས་ཀྱི་སྡུག་བསྔལ་སངས་ཐབས་་སྐོར་གླེང་མཁན་དངོས་ནས་དཀོན་པོ་འདུག་ལ། ལོ་ན་བགྲེས་པའི་ས་མཐའི་བླ་མ། གངས་ཅན་སྤྱི་བོའི་ནོར་བུ་མཆོག་གི་མི་ཚེ་སྨད་ཀྱི་ཐུགས་ཀྱི་བཞེད་པ་འགྲུབ་མིན་ལ་བསམ་བློ་གཏོང་གི་མེད་པ་ཡིན་དུས། ང་རང་གིས་ཀྱང་རྒྱལ་བ་རིན་པོ་ཆེ་ལ་ཡིད་ཆེས་ཡོད་དམ་ཟེར་བའི་རྩོམ་ཡིག་དེ་ཡང་དེ་ལྟར་འབྲི་དགོས་ཐུག་སོང་།
རྩོམ་ཡིག་དེ་ཀློག་འདོད་ཡོད་མཁན་ཚོ་བདག་གི་ཟིན་བྲིས་སུ་ཕེབས་རོགས་ཞུ། ཨོ་རེད། རྩོམ་སྒྲིག་པ་ལགས། ཁ་ཕྱོགས་འདི་ནས་སྐད་ཆ་འདི་ལྟར་རྣོ་བོ་དག་མུ་མཐུད་དུ་གསུང་རྒྱུར་རེ་སྐུལ་ནན་པོ་བྱེད་ཀྱི་ཡོད་ལགས།
རྩོམ་སྒྲིབས་པས་སྐད་ཆ་དེ་དངོས་གནས་གོ་རྒྱུ་འདུག་དེ་རང་རེད། ཁོང་གིས་གསུང་པའི་སྐད་ཆ་དེ་བཀའ་ཁྲི་སུ་ལ་ཐོབ་ཀྱང་དེ་དོན་སྒྲུབ་རྒྱུ་དམ་བཅའ་དགོས། དངོས་གནས་རྩོམ་སྒྲིབས་པའི་གཏམ་ལ་བྲོ་བ་འདུག
དེ་རིང་སུ་གང་གིས་གླེང་མྱོང་མེད་པའི་གཏམ་ཞིག་དུས་བབ་རྩོམ་སྒྲིག་པས་བཤད་འདུག འདི་ནི་ངོ་མོ་དོན་ལྡན་གྱི་སྐད་ཆ་ཞིག་རེད། འདིའི་ཕྱོགས་ལ་ང་ཚོས་ད་ནས་བསམ་བློ་གཏོང་དགོས་པ་ཞིག་རེད།
བཀུར་འོས་རྩོམ་སྒྲིག་པ་མཆོག་ལ།
སྐུ་ཉིད་ཀྱི་དགོངས་ཚུལ་ཐད་འདི་བདེན་དེ་རྫུན་གྱི་བསམ་ཚུལ་ཤོད་འདོད་མེད་ཀྱང་། གོང་གི་ལྟ་གོན་ཟེར་བའི་ཚབ་ཏུ་སྟ་གོན་དང་། འོག་ཏུ་རིམ་པར་གྱ་སྟོན་ཞེས་པའི་ཚིག་གསར་མི་ཉུང་བ་ཞིག་བེད་སྤྱོད་གནང་འདུག་པས། ཁོ་བོ་ལྟ་བུའི་ཤེས་དམན་པ་ཚོར་སྐུ་ཉིད་ཀྱི་རྩོམ་ཡིག་དེ་གོ་བདེ་ཁ་གསལ་དུ་འགྲོ་ཆེད། གྱ་སྟོན་ཞེས་པའི་ཚིག་གསར་དེར་འགྲེལ་པ་ཞིག་བསྐྱོན་རོགས་ཞུ་རྒྱུ་ཡིན། །
རིང་ནས་འདྲིས་ཤིང་འགྲོགས་པའི་དྲ་གྲོགས་བསེ་རུས།
བློ་བཟང་སེང་གེ་བོད་ཀྱི་བཀའ་བློན་ལ༎
འོས་པར་སེམས་པ་ཁྲོན་པའི་སྤལ་བ་ཉིད༎
དབྱིན་ཡིག་ཤེས་པས་བཀའ་བློན་འོས་ཟེར་ན༎
རྡ་སའི་ཁྲོམ་ན་དབྱིན་སྐད་ཤེས་མཁན་མང་༎
རྒྱལ་རི་སྒྲོལ་མ་དེ་བས་མི་འོས་པ༎
འདས་ཟིན་ལོ་རྒྱུས་དག་ལ་གསལ་གཟིགས་ན༎
སྤང་གི་མེ་ཏོག་འདམ་གྱིས་དྲི་འགོས་བཞིན༎
སྐྱར་སློག་བྱས་ན་ཆམ་ནད་ཕོགས་དངོས་སོ༎
བཀྲ ས་མཐོང་བསྟན་འཛིན་ལོ་ན་ཡོལ་ཟིན་པས༎
ཚོགས་ཐོག་ཕེབས་ན་སྐད་ཆ་འཆོལ་ཉེན་ཆེ༎
ཚིག་གཅིག་འཆོལ་ན་ཁོ་ལ་སྐྱོན་མེད་ཀྱང་༎
ས་ཡ་དྲུག་གི་ཚེ་སྲོག་བརླག་ཉེན་ཆེ༎
དེ་བས་གངས་ཅན་པ་ཡི་ཚེ་སྲོག་ལ༎
གཅེས་སྤྲོས་བྱེད་པའི་འདུན་པ་ཡོད་གྱུར་ན༎
མཁོ་མེད་དངོས་པོའི་རིགས་ལ་མི་བལྟ་བར༎
དོན་དམ་འབྲས་བུ་མངོན་གྱུར་བྱེད་མཁན་གཟིགས༎
༸རྒྱལ་པའི་དགུང་ལོ་མཐོ་ནས་མཐོ་རུ་ཕྱིན༎
མི་སེར་སེམས་པ་དངངས་འཚབ་ཇེ་ཆེར་སོང་༎
དམར་ནག་སྲིན་པོའི་ཧམ་ཤེད་རི་ལྟར་ཆེ༎
ཉེན་ཁའི་གནད་དུ་ཁེལ་པའི་བཀའ་བློན་འཚོལ༎
རྡོག་རྩ་གཅིག་སྒྲིལ་སྟོབས་ཤུགས་གསོན་པོ་ཡིན༎
ཆོ་ག་ཆོས་ལུགས་མི་མཐུན་བཀག་རྡོ་ཡིན༎
མི་ཚེའི་སྙིང་པོ་གཟི་འོད་འབར་པའི་ཐོག།
བསྐྱལ་བ་ཡིན་ན་མི་རིགས་དཔའ་བོ་ཡིན༎
དོན་ཆུང་རྩོད་པ་བརྒྱབ་པའི་བླུན་པོ་ཚོས༎
དོན་མེད་རྙོག་ཟིང་ལངས་ན་དགྲ་བོ་དགའ༎
དེ་བས་ཁོག་རྒྱ་བཀྱེད་ནས་རང་རིགས་ཀྱི༎
རང་དབང་བརྩོན་ལེན་བགྱི་ནས་དཔའ་བོ་དངོས༎
རྩོམ་སྒྲིག་པའི་སྐད་ཆ་སེམས་གཏིང་ནས་རྒྱབ་སྐྱབ་སྐྱོར་ཞུ་རྒྱུ་ཡིན། སྲིད་དོན་སྐད་ཆ་ཚད་ལྡན་བཤད་མཁན་འདི་ལྟ་བུ་དག་ལ་མི་བུ་རྣམས་མིག་ཡོད་ན་རྒྱབ་སྐྱོ་བྱ་རན་འདུག
དངོས་ནས་བདེན་པ་རེད།
འོན་ཀྱང་དེའི་གནད་འགག་གི་གནས་ལུགས་གཙོ་བོ་དེ་བོད་མི་ཚང་མས་ཁ་གསལ་གཏིང་གསལ་གྱིས་ཤེས་ཀྱི་ཡོད་མོད། ཡིན་ནའང་མཐོ་གཞུང་ཞབས་ཡིན་ནའང་འདྲ། འོག་འབངས་མི་ཡིན་ནའང་འདྲ། དེ་དག་ཚང་མས་རང་དོན་ལ་ཐུག་དུས་གཞུང་དོན་དྲན་པ་བརྗེད་དེ་སྒེར་དོན་ཁོ་ནའི་ཆེད་དུ་འབད་བརྩོན་བྱ་རྒྱུ་ལས་གཞུང་དོན་བཤད་མཁན་ཧ་ཅང་ཉུང་ཉུང་རེད་འདུག ཚོགས་འདུ་ཞིག་ཚོགས་པ་ཡིན་ན། དེའི་ཚོགས་ཐོག་ནས་གཏམ་རྫིག་པོ་རི་འདྲ་འགའ་རེ་གཡུགས་ཏེ་མི་མང་མང་ཚོགས་ཀྱི་མགོ་སྐོར་གཏོང་བ་ལས་ཕན་འབྲས་ཐོན་པའི་བྱ་བ་སྣེ་གཅིག་ཀྱང་སྒྲུབ་མྱོང་མེད་ཟེར་ན་མང་པོ་ཞིག་བསྒྲུབས་ཡོད་ཅེས་རེ་ཟུང་ཞིག་གསར་བསྒྲགས་བྱེད་སྲིད་མོད། བྱ་བ་ཙག་ཙིག་སྒྲུབ་པ་ཙམ་གྱི་བོད་མི་ས་ཡ་གཅིག་གི་རེ་འདོད་འགྲུབ་པ་རེད་ཟེར་ན་ཧ་ཅང་ཐལ་པའི་གནས་མ་ཡིན་ནམ།
འདི་དང་འདི་འདྲ་བའི་གནས་ལུགས་མང་པོ་ཞིག་བོད་མི་རྒན་གཞོན་ཚང་མས་དོ་སྣང་བྱེད་རྒྱུ་མི་འདུག
ང་ཚོས་ད་ལྟ་ནས་རིག་པ་མ་སྒྲིམ་པ་ཡིན་ན་དུས་ཚོད་ཀྱི་ང་ཚོ་ལ་ཁོམ་པ་སྟེར་རམ།་ ཞེས་བློ་འཚབ་ཀྱིས་ཐོག་ནས་སྐད་ཆ་ཚིག་འགའ་འདི་ཤོད་དགོས་བྱུང༌།
བཀའ་ཁྲིའི་ལས་འགན་དང་པོ་ཞེས་པའི་ནང་དོན་གཏིང་ཟབ་ལ་རྒྱ་ཆེ་བའི་གནས་ལུགས་འདིས་ངའི་ུཡིད་དབང་བཀུག་སོང་།
ཧ་ཅང་གི་ཡག་པོ་བྲིས་འདུག
རྒྱབ་སྐྱོར་ཡོད།