བོད་རང་དབང་སློབ་ཕྲུག་ཚོགས་པའི་ས་གནས་ཚོགས་གཙོ་བསྟན་འཛིན་ཆོས་དབྱིངས་ཀྱིས་བརྗོད་དོན། ད་ལྟ་སྤྱི་ཚོགས་ནང་ཡོངས་ཁྱབ་ཀྱི་འགྲོ་བཞིན་པའི་བཀའ་ཁྲིའི་གཞི་བཀྲས་མཐོང་བསྟན་འཛིན་རྣམ་རྒྱལ་དང་བློ་བཟང་སེང་གེ། སྤྱི་འཐུས་ཚོགས་གཞོན་རྒྱ་རི་སྒྲོལ་མ་བཅས་གསུམ་རེད། ང་རང་སྒེར་གྱི་ངོས་ནས་ལོ་རྗེས་མའི་བཀའ་བློན་ཁྲི་བར་འཚམ་ཤོས་དེ་བཀྲས་མཐོང་བསྟན་འཛིན་རྣམ་རྒྱལ་ལགས་མཐོང་གི་ཡོད། ཁོང་གིས་མི་ཚེ་ཧྲིལ་པོར་བོད་དོན་ཆེད་ཕྱག་ལས་གནང་བ་རེད་ལ། ཕུགས་རྒྱང་རིང་པོའི་བསམ་བློ་གཏོང་ཐུབ་མཁན་ཞིག་ཀྱང་རེད། དཔེར་ན།བར་སྐབས་ཤིག་ང་ཚོའི་སྤྱི་ཚོགས་ནང་བོད་མི་རྣམས་ཕྱིའི་རྒྱལ་ཁབ་ཁག་ཏུ་ཆས་ཚེ་བོད་པའི་རིག་གཞུང་དང་ངོ་བོ།ལྷག་བསམ་བརླག་འགྲོ་གི་རེད་ཟེར་བའི་བསམ་ཚུལ་ཤུགས་ཆེར་བྱུང་ཡོད། གནས་སྟངས་དེ་འདྲ་ཞིག་གི་འོག་ཏུའང་ཁོང་གིས་ཨ་རིར་བོད་མི་ ༡༠༠༠ སྐྱབས་བཅོལ་ཏུ་བླངས་པའི་དམིགས་བསལ་ཕྱག་ལས་གནང་ཡོད། ཁོང་གིས་མི་ལོ་ ༢༠ སྔོན་ནས་ཕྱག་ལས་དེ་འདྲ་ཞིག་གནང་སྟེ་ཕུགས་རྒྱང་རིང་པོའི་བསམ་བློ་བཏང་ཡོད་ལ། བོད་མི་དེ་དག་གནས་སྤོ་བྱས་རྗེས་ང་ཚོ་བོད་པའི་རྩ་དོན་ལ་ཕན་ཐོགས་ཆེན་པོ་བྱུང་ཡོད། དེ་བཞིན་ཁོང་བོད་གཞུང་གི་སྒྲིག་འཛུགས་ནང་ལོ་མང་རིང་ཕྱག་ལས་གནང་ཡོད་སྟབས་ཉམས་མྱོང་ཡོད་པ་དང་། གཉིས་ནས་རྒྱལ་སྤྱིའི་སྡིངས་ཆའི་ཐོག་ཆ་བཞག་ནའང། ཨ་རི་དང་ཁེ་ན་ཌ། ཡོ་རོབ་སོཊ་ལ་འབྲེལ་བ་བྱས་ཏེ་ཆབ་སྲིད་དང་འབྲེལ་བའི་ཐོག་ཕྱག་ལས་གང་མང་ཞིག་གནང་ཡོད།ཨ་རིར་༧གོང་ས་མཆོག་གི་སྐུ་ཚབ་ཐོག་མ་གནང་མཁན་དང་། རྒྱལ་སྤྱིའི་བོད་དོན་ལས་འགུལ་ཐོག་མར་འཛུགས་མཁན་ཡིན་པར་མ་ཟད། བོད་ཀྱི་གཞོན་ནུ་ལྷན་ཚོགས་དང་བོད་གཞུང་དང་རྒྱལ་སྤྱིའི་སྟེང་བོད་དོན་དྲིལ་བསྒྲགས་ཀྱི་ཕྱག་ལས་གནང་ཡོད་ལ། ད་ལྟའི་ཆར་ཡང་ཨ་རིར་བཞུགས་ཏེ་ཏཱ་ལའི་བླ་མའི་ཐེབས་རྩ་ཁང་དང་ཁ་ལི་ཧྥོར་ནི་ཡའི་ས་གནས་བོད་རིགས་མཐུན་ཚོགས་ནང་ཕྱག་ལས་གང་མང་ཞིག་གནང་གིན་ཡོད་ཅེས་བརྗོད་བྱུང་། ཡང་ཁོང་གིས། ཁོང་ལས་གཞན་ད་ལྟའི་ཆར་རྒྱ་རི་སྒྲོལ་མ་ལཊ་ཀྱིས་དང་བླངས་ཐོག་ང་བཀའ་ཁྲིར་ལངས་གི་ཡིན་ཟེར་བ་དང་། བློ་བཟང་སེང་གེས་ངས་ཅིག་བྱེད་གི་ཡིན་ཟེར་བ་དེ་དག་དངོས་ནས་རྣམ་པ་གསར་པ་ཞིག་ཏུ་མཐོང་གི་འདུག སྔོན་མ་ཡིན་ན་ང་བཀའ་ཁྲིར་ལངས་གི་ཡིན། ངས་ཅིག་བསྒྲུབ་ཀྱི་ཡིན་ཟེར་མཁན་བྱུང་ཡོད་པ་མ་རེད། དེ་ཡིན་དུས་ཁོང་ཚོའི་སྒྲུབ་སྟངས་དེ་མང་གཙོའི་ལམ་སྲོལ་དང་མཐུན་སྟབས་ཧ་ཅང་ཡག་པོ་རེད་བསམ་པ་དྲན་བྱུང་། ཡིན་ཡང་།མཚམས་ལམ་རེར་ང་ཚོའི་སྤྱི་ཚོགས་ནང་མི་རེ་འགས་ང་ཚོར་འགན་འཁུར་མཁན་མི་འདུག་ཟེར་མཁན་དང་། ཕར་འགན་འཁུར་དུ་འགྲོ་དུས་ཡང་ཁོང་ཁྱད་མཚར་འདུག ཁོས་འགན་འཁུར་གྱི་འདུགདེ་འགྲིག་མ་སོང་ཞེས་སྐད་ཆ་འདྲ་མིན་བཤད་ཡོང་གི་ཡོད་པ་རེད། ཡིན་ནའང་། ང་རང་ཉིད་ཀྱི་ངོས་ནས་ཤེས་ཡོན་གྱི་གནས་སྟངས་ཡག་པོ་ཡོད་པའི་རིགས་ཀྱིས་མང་གཙོའི་ལྟ་བ་ཤུགས་ཆེ་རུ་སྤེལ་ཐུབ་པ་དེ་ཡག་པོ་ཞིག་མཐོང་གི་ཡོད་ལ། མ་འོངས་པར་འོས་བསྡུའི་དངོས་གཞིའི་བར་ཁོང་གསུམ་ཙམ་མིན་པར་ང་ལངས་གི་ཡིན་ཟེར་བ་དང་། ངས་འགན་འཁུར་གི་ཡིན་ཟེར་མཁན་མང་པོ་ཡོང་བའི་རེ་བ་ཡོད། ཅེས་བརྗོད་བྱུང་།
བུད་མེད་ཉམས་ཞིབ་པ་ཟླ་སྒྲོན་ཤར་གླིང་གིས་བརྗོད་དོན། ད་ལྟའི་ཆར་ངས་མཐའ་གཅིག་ཏུ་འོས་ཤོས་འདི་རེད་ཅེས་བཤད་ཁག་པོ་རེད། གང་ཡིན་ཞེ་ན་ཚོགས་གཞོན་རྒྱ་རི་སྒྲོལ་མ་ལགས་བཀའ་ཁྲིར་ལངས་རྒྱུ་ཡིན་པ་དེ་ང་ཚོའི་སྤྱི་ཚོགས་ནང་གསལ་པོ་ཆགས་མེད། བློ་བཟང་སེང་གེ་དང་བཀྲས་མཐོང་བསྟན་འཛིན་རྣམ་རྒྱལ་གཉིས་མང་ཚོགས་ནང་གླེང་སློང་ཤུགས་ཆེར་བྱུང་ཡོད་ལ། ཚོགས་པ་ཁག་ཅིག་གིས་ཁོང་གཉིས་བཀའ་ཁྲིའི་འོས་མིར་བཏོན་སྟབས་མང་པོ་ཞིག་གིས་ཁོང་གཉིས་ཡིན་ཤག་ཤག་བྱས་ཏེ་བསྡད་ཡོད་པ་རེད། ངས་བསམ་ན་ད་ལྟ་ཡོངས་ཁྱབ་ཀྱི་གླེང་བཞིན་པའི་འོས་མི་ལས་གཞན་པའི་བཀའ་ཁྲིའི་འོས་མི་ཏན་ཏན་ཡོད་ཀྱི་རེད། མང་ཚོགས་ཁྲོད་བློ་བཟང་སེང་གེ་དང་བཀྲས་མཐོང་བསྟན་འཛིན་རྣམ་རྒྱལ་གཉིས་ཀར་བཀའ་ཁྲིའི་འོས་ཆོས་ཚང་མིན་སྐོར་གླེང་སློང་ཤུགས་ཆེན་བྱེད་བཞིན་པའི་སྐབས་འདིར། ཚོགས་གཞོན་རྒྱ་རི་སྒྲོལ་མས་ང་བཀའ་ཁྲིར་ལངས་རྒྱུ་ཡིན་ཞེས་ཡོངས་ཁྱབ་ཐོག་གསར་འགོད་གསལ་བསྒྲགས་སྤེལ་བ་རེད། དེ་ཡིན་དུས་སོ་སོར་གདེང་ཚོད་དང་ཕྱག་ལས་གནང་འདོད་ཡོད་ན་ལམ་ཁ་འདི་འདྲ་ཞིག་ཡོད་ཅེས་མིག་དཔེ་ཡག་པོ་ཞིག་བསྟན་པ་རེད། གསལ་བསྒྲགས་མ་སྤེལ་བའི་སྔོན་ལ་ཁོ་མོ་བཀའ་ཁྲིར་ལངས་འདོད་ཡོད་མེད་ཤེས་ཡོད་པ་མ་རེད། གློ་བུར་དུ་བཀའ་ཁྲིར་ལངས་ཡོང་དུས། མི་མང་པོ་ཞིག་གིས་བསམ་བློར་འགྱུར་བ་ཐེབས་ཡོད་ལ་ང་རང་ལའང་དེ་འདྲ་ཆགས་སོང་། དེར་བརྟེན་ཕྱི་ཟླ་ ༡༠ པའི་ཚེས་ ༣ སྔོན་ལ་བཀའ་ཁྲིའི་འོས་གཞིར་མི་གང་མང་ཞིག་སླེབས་ཐུབ་པ་ཡིན་ན། མི་མང་ལ་གདམ་ཀ་ཆེན་པོ་ཞིག་རག་གི་རེད། ཅེས་དང་། ཡང་ཁོ་མོས། སྤྱིར་ང་རང་ལ་བཀའ་ཁྲིའི་འོས་མི་གཞན་པ་ཞིག་ཡོད་ཀྱང་། གལ་སྲིད་དངོས་གཞི་འོས་འདེམས་སྐབས་སུའང་ཁོང་གསུམ་ལས་གདམ་ཀ་གཞན་མེད་པ་ཡིན་ན། ང་རང་གི་ངོས་ནས་རྒྱ་རི་སྒྲོལ་མར་འོས་ལྡུག་གི་ཡིན། རྒྱུ་མཚན་ནི། བཀའ་ཁྲིའི་ལས་འགན་ནི་གཞིས་ཆགས་གསར་འཛུགས་དང་བཙན་བྱོལ་སྒྲིག་འཛུགས་ཚགས་ཚུད་ཡོང་ཐབས་བྱ་རྒྱུ་དེ་ཁོ་ན་མ་རེད། བོད་ཀྱི་ཆབ་སྲིད་འཐབ་རྩོད་བྱས་ཏེ་མི་ལོ་ ༥༡ འགྲོ་བཞིན་ཡོད་པ་རེད། ༧གོང་ས་མཆོག་ཀྱང་སྐུ་ན་ཧ་ཅང་བགྲེས་པོ་ཆགས་ཡོད་ལ་ཕྱི་ལོགས་སུ་ཕེབས་རྒྱུར་སྐུ་ངལ་ཆེན་པོ་ཡོད་པ་རེད། འདི་འདྲའི་དུས་སྐབས་ཤིག་ལ་ང་ཚོར་བཀའ་ཁྲི་བཀའ་མོལ་ཡག་པོ་གནང་ཐུབ་མཁན་ཞིག་དགོས་ཀྱི་འདུག་ལ། ཉམས་མྱོང་དང་སེམས་ཤུགས་ཀྱང་དགོས་ཀྱིན་ཡོད་སྟབས།ང་རང་གི་ངོས་ནས་བློ་བཟང་སེང་གེ་དང་བཀྲས་མཐོང་བསྟན་འཛིན་རྣམ་རྒྱལ། རྒྱ་རི་སྒྲོལ་མ་གསུམ་ལས་རྒྱ་རི་སྒྲོལ་མ་འོས་ཤོས་རེད་དྲན་གྱི་འདུགདེ་ནི་བུད་མེད་ཀྱི་ཞེན་ཁོག་གི་སྟེང་ནས་བྱུང་བ་ཞིག་མིན་པར་རྒྱ་རི་སྒྲོལ་མར་ཆ་བཞག་ན་བོད་གཞུང་ལ་ལྷག་བསམ་རྣམ་དག་རེད། དགུང་ལོ་ཡང་གཞོན་གཞོན་རེད།བུད་མེད་ཞིག་ཡིན་པའི་ཐོག་ནས་བུད་མེད་ཀྱི་ཁྱད་ཆོས་ཀྱང་ཚང་འདུགལྷག་པར་དུ་རྒྱ་ནག་གཞུང་དང་རྒྱལ་སྤྱིའི་སྡིངས་ཆའི་ཐོག་བཀའ་མོལ་གནང་ཐུབ་མཁན་ཁོང་ལས་ལྷག་པ་ཞིག་མི་འདུག་བསམ་གྱིན་ཡོད། གལ་སྲིད། མ་འོངས་བཀའ་ཁྲིའི་དངོས་གཞིའི་སྐབས་ད་དུང་ཡང་བཀའ་ཁྲིའི་གདམ་ཀ་གཞན་ཐོན་པ་ཡིན་ན་ངའི་བསམ་བློར་ཡང་འགྱུར་བ་ཐེབས་སྲིད་པ་རེད། ཅེས་བརྗོད་བྱུང་།
རྒྱལ་སྤྱིའི་བོད་དོན་རྒྱབ་སྐྱོར་འབྲེལ་མཐུད་པ་ཚེ་རིང་ཆོས་གྲུབ་ཀྱིས་བརྗོད་དོན། སྤྱིར་བོད་པའི་སྤྱི་ཚོགས་ནང་བཀའ་ཁྲིའི་འོས་གཞིར་འཚམ་པའི་མི་སྣ་མང་པོ་ཞིག་ཡོད་པ་རེད། ཡིན་ནའང་། བཀའ་ཁྲིའི་འོས་འགྲན་སླེབས་ཐུབ་དང་མ་ཐུབ་ཟེར་བ་དེ། གཅིག་ནས་མི་སྒེར་སོ་སོའི་དགོངས་པ་བཞེས་ཕྱོགས་ལ་རག་ལས་ཀྱི་ཡོད་ལ། གཉིས་ནས་མང་ཚོགས་ཁྲོད་ཁོང་རྣམ་པར་གཟིགས་ཕྱོགས་གང་འདྲ་ཡོད་མེད་ཐད་ལྟ་དགོས་པ་རེད་འདོད། ད་ལྟའི་ཆར་བཀྲས་མཐོང་བསྟན་འཛིན་རྣམ་རྒྱལ་དང་བློ་བཟང་སེང་གེརྒྱ་རི་སྒྲོལ་མ་གསུམ་མངོན་གསལ་དོད་པོའི་ཐོག་ནས་ལངས་ཡོད། ཁོང་གསུམ་ལ་ཤེས་ཡོན་དང་སྤྱི་ཚོགས་ཞབས་ཞུའི་ཆ་ནས་སོ་སོར་ཁྱད་ཆོས་རེ་ཡོད་པ་རེད། ཡིན་ནའང་། དེང་སྐབས་ང་ཚོར་ཤེས་འཇོན་གཉིས་ལྡན་གྱི་བཀའ་ཁྲི་ཞིག་དགོས་རྒྱུ་དེ་ཧ་ཅང་གི་གལ་ཆེན་པོ་ཞིག་ཆགས་ཡོད་ལ། ཉམས་མྱོང་ཡང་མེད་དུ་མི་རུང་བ་ཞིག་ཆགས་ཡོད་སྟབས།བཀའ་ཁྲིར་མི་སུ་འདྲ་ཞིག་གདམས་པ་ཡིན་ནའང་། བོད་པའི་འཐབ་རྩོད་དེ་མི་མཐུད་ནས་གོམ་པ་མདུན་སྤོ་བྱ་ཐུབ་རྒྱུ་དང་། ལྷག་པར་དུ་༧གོང་ས་མཆོག་དགུང་གྲང་ས་ ༧༥ ལ་ཕེབས་ཚར་དུས། མ་འོངས་པའི་གནད་འགག་གི་ལོ་ ༡༠ ནང་བོད་གཞུང་གི་གནས་སྟངས་གང་འདྲ་ཆགས་མིན་གྱི་གཙོ་བོ་གཅིག་བཀའ་བློན་ཁྲི་པ་དེར་རག་ལས་ཡོད། མི་མང་ངོས་ནས་ཀྱང་དགོངས་པ་ཡག་པོ་ཞིག་བཞེས་དགོས་པ་རེད། ད་ལྟའི་ཆར་ང་རང་གི་ངོས་ནས་མ་འོངས་པའི་བཀའ་ཁྲིར་འདི་ཡིན་ཞེས་ཞུ་མི་ཐུབ་མོད། ང་རང་གི་ངོས་ནས་འོས་མི་འཚམ་པ་ཞིག་ཡོད་པ་དེ་སྐུ་སྒེར་དྲུང་ཆེ་ཟུར་བ་སྐུ་ངོ་བློ་བཟང་སྦྱིན་པ་ལགས་མཐོང་གི་ཡོད། དེ་ཡང་སྤྱི་ཚོགས་ནང་བཀའ་ཁྲིར་ལངས་མ་ལངས་གི་ཁྱད་པར་ཙམ་ལས་ཕྱག་ལས་གནང་ཐུབ་མཁན་གང་མང་ཡོད་པ་རེད་དྲན་གྱི་ཡོད་ཅེས་དང་། ཡང་ཁོང་གིས། ད་ལྟའི་བཀའ་བློན་ཁྲི་པའི་ངོས་ནས་ཤེས་ཡོན་སྲིད་བྱུས་ཀྱིས་མཚོན་པའི་ལས་དོན་ཁག་ཅིག་ཡག་པོ་ཡོད་ཀྱང་། ལག་ལེན་གྱི་ཕྱོགས་ནས་དཀའ་ངལ་ཕྲན་བུ་འཕྲད་ཡོང་གི་ཡོད་པ་རེད། མ་འོངས་བཀའ་བློན་ཁྲི་པ་མི་སུ་འདྲ་ཞིག་བཞུགས་ཀྱང་ད་ལྟའི་བཀའ་ཤག་གི་སྲིད་བྱུས་མུ་མཐུད་གནས་དགོས་པའི་རྒྱུ་མཚན་གང་ཡང་ཡོད་པ་མ་རེད་བསམ། ཁོ་རང་གི་དགོངས་ཚུལ་བཞིན་སྲིད་བྱུས་ཤིག་ལག་ལེན་བསྟར་ཡོང་གི་རེད། དེ་ཡིན་དུས་སྲིད་བྱུས་ལའང་འགྱུར་བ་འགྲོ་སྲིད་ཀྱི་རེད། གལ་སྲིད། འགྱུར་བ་ཤུགས་ཆེན་པོ་ཞིག་བཏང་བ་ཡིན་ན་བཙན་བྱོལ་སྤྱི་ཚོགས་ནང་བཀའ་བློན་ཁྲི་པའི་དུས་ཡུན་ལོ་ལྔའི་ལོ་གཉིས་ནས་གསུམ་དེ་ཚོད་ལྟ་བྱས་ཏེ་ལུས། མཐའ་མའི་ལོ་གཉིས་ནང་ལག་བསྟར་བྱས་ཏེ་གྲུབ་འབྲས་ཐོན་པའི་རེ་བ་ཞིག་རྒྱག་དུས་དུས་ཚོད་རྫོགས་འགྲོ་རྒྱུ་ལས་ཕན་ཐོགས་ཆེན་པོ་ཡོད་མ་རེད། དེ་བས་བཀའ་བློན་ཁྲི་པ་སུ་འདྲ་ཞིག་སླེབས་ཀྱང་མ་འོངས་པར་རྒྱ་གར་དང་ཕྱི་རྒྱལ་ཁག་ཏུ་ཡོད་པའི་བོད་པའི་མི་རབས་གསར་པ་རྣམས་རྡོག་རྩ་གཅིག་ཏུ་སྒྲིལ་ཏེ་བོད་ཀྱི་རྩ་དོན་ཐད་ཤུགས་སྣོན་ཇི་ལྟར་རྒྱག་རྒྱུའི་ཐད་ལ་བསམ་བློ་ཞིབ་ཚགས་གཏོང་དགོས་ལ། དེ་བཞིན་བོད་གཞིས་བྱེས་ཀྱི་འབྲེལ་ལམ་དང། བོད་རྒྱའིི་འབྲེལ་ལམ་བཅས་ཀྱི་ཐད་ནུས་པ་འདོན་ཐུབ་མཁན་ཞིག་དགོས་པ་རེད། ཅེས་བརྗོད་བྱུང་།
བོད་ཀྱི་རྩོད་རྙོག་འདུམ་འགྲིག་ལྟེ་གནས་ཁང་གི་འགན་འཛིན་ཀརྨ་ལེགས་བཤད་ལགས་ཀྱིས་བརྗོད་རྒྱུར། སྤྱིར་ང་ཚོའི་སྤྱི་ཚོགས་ནང་བཀའ་ཁྲིར་ལངས་ཐུབ་མཁན་མང་པོ་ཡོད་པ་རེད། ཡིན་ནའང་། འོས་ཤོག་དེ་གསང་བའི་ཐོག་ནས་ལྡུག་དགོས་དུས་ངས་འོས་ཤོག་འདིར་ལྡུག་གི་ཡིན་ཞེས་བཤད་ཀྱི་མ་རེད། བཀའ་ཁྲིར་རང་ངོས་ནས་ལངས་གི་ཡིན་ཟེར་མཁན་དེ་ཚོ་ཡག་པོ་རེད། ཁོང་ཚོའི་གྲས་བཀའ་ཁྲིེར་གདམས་པ་ཡིན་ན། རྗེས་མའི་བཀའ་ཁྲིའི་སྐབས་བྱེད་སྟངས་མ་འགྲིག་པ་འདྲ་བྱུང་ནའང་ཁས་ལེན་བྱས་པ་ལྟར་ལག་བསྟར་བྱས་མ་སོང་ཞེས་བཤད་ཆོག་གི་རེད་ལ། སྐབས་དེར་ནུས་པ་ཡང་ཏན་ཏན་ཐོན་གྱི་རེད་དྲན། ད་ལྟའི་ཆར་ཡོངས་ཁྱབ་ཀྱི་འགྲོ་བཞིན་པའི་བློ་བཟང་སེང་གེ་དང་རྒྱ་རི་སྒྲོལ་མ། བཀྲས་མཐོང་བསྟན་འཛིན་རྣམ་རྒྱལ་ཁོང་རྣམ་པ་གསུམ་པོ་ཡག་པོ་འདུགཡིན་ནའང་། ང་རང་གིས་ཁོང་ཚོའི་ཁྲོད་ནས་ལོ་རྗེས་མའི་བཀའ་བློན་ཁྲི་པའི་འོས་མིར་བཀྲས་མཐོང་བསྟན་འཛིན་རྣམ་རྒྱལ་ལགས་འཚམ་ཤོས་རེད་འདོད། རྒྱུ་མཚན་གང་འདྲ་ཞིག་གིས་ཞེ་ན། བཀའ་བློན་ཁྲི་པ་ནི་ལོ་ ༥ ཡི་རིང་བཙན་བྱོལ་བོད་གཞུང་གི་ཆབ་སྲིད་ཀྱི་འགན་འཁུར་མཁན་གཙོ་བོ་ཞིག་དང་གནད་འགག་ཆེན་པོ་ཞིག་ཆགས་ཡོད། བཀའ་བློན་ཁྲི་བའི་བཞུགས་ཁྲི་དེ་སྦྱོང་བརྡར་བྱེད་ས་དེ་འདྲ་མ་ཡིན་པར་དངོས་གནས་ལས་ཀ་བྱེད་སའི་སྡིངས་ཆ་ཞིག་ཡིན་པའི་ཆ་ནས།ཉམས་མྱོང་དང་ཤེས་ཡོན། དྲང་བདེན་བཅས་ཡིན་དགོས་པ་དེ་གལ་ཆེན་པོ་ཞེ་དྲག་རེད། ལས་ཀ་ག་རེ་བྱེད་དགོས་ཀྱང་ཉམས་མྱོང་མེད་པ་ཡིན་ན། ཕྱོགས་གང་ས་ནས་ལས་ཀ་ཚགས་ཚུད་པོ་ཡོང་རྒྱུ་དཀའ་ངལ་ཆེན་པོ་ཡོད། དེ་ཡིན་དུས་ང་རང་གིས་བལྟས་ན་གལ་ཆེ་ཤོས་དེ་ཉམས་མྱོང་། དེའི་ནང་ནས་བོད་གཞུང་འཛིན་སྐྱོང་འོག་ལ་ཉམས་མྱོང་། ཆབ་སྲིད་ཀྱི་ཐོག་ནས་གལ་ཆེན་ཆགས་ཡོད་དུས་བོད་རྒྱ་འབྲེལ་མོལ་ཐད་ཀྱི་ཉམས་མྱོང་དེ་གལ་ཆེན་ཡིན་དགོས། དེ་བཞིན་རྒྱལ་སྤྱིའི་ནང་བོད་ཀྱི་ཆབ་སྲིད་དང་འབྲེལ་བའི་ཕྱག་ལས་གནང་མྱོང་མཁན། ལྷག་དོན་དུ་བོད་ཀྱི་ཆོས་དང་རིག་གཞུང་། གོམས་གཤིས་བཅས་ལ་རྒྱུས་མངའ་ཡོད་མཁན་ཞིག་བྱུང་ན། ང་ཚོ་མི་རབས་གསར་རྙིང་གཉིས་ཀྱི་བར་མཚམས་མཐུད་ཐུབ་མཁན་ཞིག་ཆགས་གི་རེད་བསམ་གི་འདུགདེ་ཡིན་དུས་ཁོང་གསུམ་གྱི་ནང་ནས་གདམས་པ་ཡིན་ན་ཆབ་སྲིད་ཀྱི་ཆ་ནས་ཡིན་ནའང་འདྲ། རིག་གཞུང་གི་ཆ་ནས་ཡིན་ནང་འདྲ། ཤེས་ཡོན་བཅས་གང་གི་ཐད་ནས་བལྟས་ཀྱང་ང་རང་གིས་བཀྲས་མཐོང་བསྟན་འཛིན་རྣམ་རྒྱལ་ལགས་ཤིན་ཏུ་འོས་པ་རེད་དྲན་གྱི་ཡོད། ཅེས་དང་། རྒྱ་རི་སྒྲོལ་མ་ལགས་ལ་མཚོན་ན་བཙན་བྱོལ་སྤྱི་ཚོགས་ནང་ཞབས་ཞུ་རྒྱུན་རིང་པོ་དང་། ལྷག་པར་དུ་སྤྱི་འཐུས་ཚོགས་གཞོན་གནང་ཚར་བ་རེད། བཙན་བྱོལ་བོད་གཞུང་སྒྲིག་གཞིའི་འགྲོ་སྟངས་སོགས་གསལ་པོ་མཁྱེན་གྱི་ཡོད་པ་དང་བུད་མེད་ཅིག་ཡིན་པའི་ཆ་ནས་བཀའ་ཁྲིར་འོས་པ་ཞིག་རེད། ཡིན་ནའང་། བཀྲས་མཐོང་བསྟན་འཛིན་རྣམ་རྒྱལ་ལ་ཐོབ་པ་ཡིན་ན། མ་འོངས་པར་གནས་སྟངས་ཡག་ཏུ་འགྲོ་བའི་རེ་བ་འདུགདེ་བཞིན་སྔོན་མའི་ཤེས་ཡོན་སྲིད་བྱུས་ལག་བསྟར་བྱས་པའི་ཁྲོད་ནོར་འཁྲུལ་གང་བྱུང་ཡོད་པ་སོགས་ཀྱི་ཐད་ཁོ་རང་གི་སྲིད་བྱུས་སྔོན་མ་ལས་མ་འདྲ་བ་ཆགས་གི་རེད་དྲན་གྱི་ཡོད། ཤེས་ཡོན་དེ་ང་ཚོའི་སྐད་ཡིག་གཅིག་པུར་བདག་ཉར་བྱ་རྒྱུ་ཁོ་ན་མིན་པར། བཙན་བྱོལ་གྱི་གནས་སྐབས་རིང་བཙན་བྱོལ་ལ་དཔག་པའི་ཤེས་ཡོན་སྲིད་བྱུས་ཤིག་མ་སྤེལ་བ་ཡིན་ན། དེང་སྐབས་ན་གཞོན་ཚོར་ལས་ཀ་མ་རག་པའི་དཀའ་ངལ་འཕྲད་བཞིན་པ་ལྟར་རྗེས་མ་ཡང་དཀའ་ངལ་དེ་ལས་ཆེ་བ་འཕྲད་ཀྱི་རེད། ཅེས་བརྗོད་བྱུང་།
བོད་རང་བཙན་འཐབ་རྩོད་པ་བསྟན་འཛིན་འགྲུས་ཀྱིས་བརྗོད་དོན། ད་ལྟའི་ཆར་ང་ལ་བརྒྱ་ཆའི་བརྒྱ་འདི་ཡིན་ཞེས་རྒྱབ་སྐྱོར་ཞུ་ས་གང་ཡང་མེད། ཡིན་ཡང་། ང་རང་གི་ངོས་ནས་བློ་བཟང་སེང་གེ་དང་བཀྲས་མཐོང་བསྟན་འཛིན་རྣམ་རྒྱལ། བཀའ་བློན་བསྟན་པ་ཚེ་རིང། སྤྱི་འཐུས་ཚོགས་གཙོ་སྤེན་པ་ཚེ་རིང། བློ་བཟང་སྙན་གྲགས་བཅས་ཀྱི་ཁྲོད་ནས་སུ་བཀའ་ཁྲིར་བཞུགས་ཀྱང་རྒྱབ་སྐྱོར་ཞུ་ཐུབ་ཀྱིན་འདུག་ལ། མ་འོངས་པའི་བཀའ་ཁྲི་མི་སུ་འདྲ་ཞིག་ལངས་པ་ཡིན་ནའང་། མ་འོངས་པར་སྲིད་བྱུས་གང་འདྲ་ཞིག་འཛིན་མིན་གྱི་ཐད་ལ་འགྲེལ་བཤད་གནང་དགོས་པ་རེད་ལ། ལྷག་པར་དུ་གཞིས་ཆགས་སྲ་བརྟན་དང་ཤེས་ཡོན་སྲིད་བྱུས། འཕྲོད་བསྟེན། ཆབ་སྲིད་ལངས་ཕྱོགས་ཐད་དམིགས་བསལ་གྱི་འཆར་གཞི་གང་འདྲ་ཡོད་མེད་དང་། དེ་མིན་རྒྱ་གར་ནག་གཉིས་ཀྱི་འབྲེལ་ལམ་དུས་ནས་དུས་སུ་འགྱུར་བ་འགྲོ་བཞིན་པར་གཞིགས་ཏེ། བཙན་བྱོལ་བོད་གཞུང་དང་སྒྲིག་སྲོལ། ཆབ་སྲིད་ལངས་ཕྱོགས་སོགས་ལ་འགྱུར་བ་གང་འདྲ་གཏོང་གི་ཡིན་མིན། དེ་བཞིན་བོད་རྒྱའི་འབྲེལ་མོལ་ཇི་ལྟར་མུ་མཐུད་རྒྱུན་སྐྱོང་བྱ་མིན་དང་། རྒྱལ་སྤྱིའི་འབྲེལ་ལམ་བརྒྱུད་ཆབ་སྲིད་ཀྱི་གོ་སྐབས་མང་པོ་ཞིག་ཡོང་གི་ཡོད་པ་དེ་ཇི་ལྟར་ལེན་གི་ཡིན་མིན་དང་བསམ་བློའི་གྲ་སྒྲིག་གང་འདྲ་ཞིག་ཡོད་མེད་སོགས་བཀའ་ཁྲིར་ལངས་མཁན་དག་གིས་ཇི་གསུངས་ལ་ཉན་རྗེས་ང་རང་གིས་འདོད་བློ་དང་མཐུན་ཞིང་ཡིད་ཚིམ་པ་ཞིག་ལ་འོས་ལྡུག་གི་ཡིན་ཞེས་དང་། ཡང་ཁོང་གིས། ད་ལྟའི་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གི་ངོས་ནས་ལས་འགན་ཟབ་ཅིང་རྒྱས་པ་གནང་ཡོད་པ་རེད། ཡིན་ནའང་། མ་འོངས་པའི་བཀའ་བློན་ཁྲི་པ་དེས་ཀྱང་ཁོང་གི་ཕྱག་ལས་དེ་ག་རང་བསྒྲུབ་མིན་བཤད་ཁག་པོ་རེད། བཀའ་བློན་ཁྲི་པ་སུ་འདྲ་ཞིག་སླེབས་ཀྱང་ཁོང་རང་ཉིད་ལ་ལངས་ཕྱོགས་ཤིག་དང་བསྒྲུབ་སྟངས་མི་འདྲ་བ་ཞིག་ཡོང་ངེས་པ་ཞིག་དང་། ང་ཚོའི་ངོས་ནས་སུ་འདྲ་ཞིག་སླེབས་ཀྱང་སླེབས་ཚར་བའི་རྗེས་སུ་རྒྱབ་སྐྱོར་ཞུ་དགོས་པ་ཞིག་ཆགས་ཡོད་སྟབས། འོས་གཞི་གླེང་བའི་སྐབས་སུ་སོ་སོའི་བསམ་བློ་དང་འདོད་པ་མཐུན་མིན་ལ་བལྟས་ཏེ་རྒྱབ་སྐྱོར་བྱ་དགོས་པ་རེད། ཅེས་བརྗོད་བྱུང་ལ། དེ་བཞིན་ཁོང་གིས་ངོས་ནས་བཀའ་ཁྲི་ལས་ཀྱང་ཁ་ཚ་དགོས་གཏུགས་ཀྱི་གྲོས་ཚོགས་ནང་གི་དཀའ་ངལ་ལ་བལྟས་ཏེ་སྤྱི་འཐུས་འོས་གཞི་དེ་གལ་ཆེན་མཐོང་གི་ཡོད་པ་དང་། སྤྱི་འཐུས་ནང་གནད་དོན་སྐོར་ལ་མ་ཡིན་པར་ཕྱོགས་ཁག་རང་བཞིན་གྱི་ཉེན་ཁའི་གནས་སྟངས་ཤིག་ཆགས་ཡོད་སྟབས། མི་མང་གི་ངོས་ནས་བཀའ་ཁྲི་དང་སྤྱི་འཐུས་ཀྱི་འོས་གཞིར་སུ་འདྲ་ཞིག་ལངས་ཀྱི་ཡོད་ཀྱང་། ཁོང་ཚོའི་རྒྱབ་ལྗོངས་ཀྱི་གནས་ཚུལ་ལ་བལྟས་ཏེ་རང་ངོས་ནས་ཐག་གཅོད་བྱ་རྒྱུ་ལས། བླ་སྤྲུལ་དང་མི་ཆེན་དཔོན་ཆེན་གྱི་བརྒྱུད་སྐུལ་ལྟར་གདམ་པ་ཡིན་ན་དམངས་གཙོའི་ལམ་ལུགས་དང་མི་མཐུན་པར་མ་ཟད། དམངས་གཙོའི་ལམ་ལུགས་ལའང་དོ་ཕོག་འགྲོ་གི་རེད་ཅེས་བརྗོད་བྱུང་།
ཨ་རིའི་མེལ་ནེ་སོ་ཌ་མངའ་སྡེའི་ས་གནས་གཞོན་ནུའི་ཚོགས་གཞོན་བསྟན་འཛིན་འཇིགས་མེད་ལགས་ཀྱིས་བརྗོད་དོན། ད་ལྟའི་ཆར་སྤྱི་ཚོགས་ནང་ཡོངས་ཁྱབ་ཀྱི་བཀའ་ཁྲིའི་འོས་གཞིར་མི་སྣ་ཁག་ཅིག་ཡོང་བསྡད་ཡོད་པ་རེད། ཡིན་ནའང་། ཁོང་ཚོས་རྒྱབ་ལྗོངས་ལོ་རྒྱུས་དང་ཉམས་མྱོང། ལངས་ཕྱོགས་སོགས་རྟོགས་རྒྱུ་དེ་གལ་ཆེན་པོ་རེད་བསམ།ང་རང་ལ་མཚོན་ན་མ་འོངས་པའི་དངོས་གཞིའི་བཀའ་ཁྲིའི་འོས་གཞིའི་ནང་མི་མང་པོ་ཞིག་ཡོང་སྲིད་སྟབས་འདི་ཡིན་ཞེས་དམིགས་བསལ་གྱི་གདམ་ཀ་གནང་མེད། ཡིན་ནའང་། ད་ལྟ་ཡོངས་ཁྱབ་ཀྱི་ཐོག་ཤེས་རྟོགས་བྱུང་བའི་མི་སྣ་དེ་དག་ཡག་པོར་མཐོང་གི་འདུག དཔེར་ན།བློ་བཟང་སེང་གེར་མཚོན་ན་ཨ་རིའི་ནང་ཁྲིམས་ལུགས་ཀྱི་ཐོག་ལ་སློབ་སྦྱོང་གནང་བཞིན་པར་མ་ཟད། ཨ་རིིའི་ནང་གི་རྒྱ་རིགས་སློབ་མ་དང་འབྲེལ་ལམ་གསར་འཛུགས་སོགས་ཀྱི་ལས་དོན་བསྒྲུབས་ཡོད་པ་རེད། བཀྲས་མཐོང་བསྟན་འཛིན་རྣམ་རྒྱལ་གྱིས་ཀྱང་བོད་ཀྱི་གཞོན་ནུ་ལྷན་ཚོགས་གསར་འཛུགས་སྐབས་ཀྱི་མི་སྣ་གཙོ་བོའི་གྲས་ཀྱི་ཕྱག་ལས་གནང་ཡོད་པར་མ་ཟད། ཨ་རིའི་ནང་བོད་ཀྱི་རྩ་དོན་ལ་ཕན་པའི་ཚོགས་པ་དང་བོད་དོན་རྒྱབ་སྐྱོར་ཚོགས་པ་གསར་འཛུགས་ཀྱི་ལས་དོན་མང་པོ་ཞིག་བསྒྲུབས་ཡོད་པར་མ་ཟད། བོད་གཞུང་གི་ནང་དུའང་ལོ་མང་པོའི་རིང་ཞབས་ཞུ་བསྒྲུབ་མཁན་གྱི་མི་སྣ་གལ་ཆེན་ཞིག་ཆགས་ཡོད་པ་རེད། རྒྱ་རི་སྒྲོལ་མར་མཚོན་ན་ཁོ་མོ་ད་ལྟའི་ཆར་བོད་མི་མང་སྤྱི་འཐུས་གྲོས་ཚོགས་ཀྱི་ཚོགས་གཞོན་གྱི་ཕྱག་ལས་གནང་ཡོད་པ་ལས་རྒྱབ་ལྗོངས་ཀྱི་གནས་ཚུལ་གང་འདྲ་ཡིན་མིན་སོགས་གསལ་བོ་ཤེས་ཀྱི་མེད། ང་རང་ཉིད་ཀྱི་ངོས་ནས་ད་ལྟའི་མི་སྣ་འདི་དག་ལས་གཞན་པའི་འོས་མི་གཉིས་ལངས་བའི་རེ་བ་བྱེད་ཀྱིན་ཡོད། ཁོང་གཉིས་ནི་དབྱིན་ཡུལ་སྐུ་ཚབ་དོན་གཅོད་ཐུབ་བསྟན་བསམ་འགྲུབ་ལགས་དང་བཀའ་ཟུར་བཀྲ་ཤིས་དབང་འདུས་ལགས་རྣམ་གཉིས་ཡིན། བཀའ་ཟུར་བཀྲ་ཤིས་དབང་འདུས་ལགས་ཀྱི་ཁོང་ཉིད་བཀའ་ཁྲིར་ལངས་འདོད་མེད་ཚུལ་གསུངས་ཡོད་ཀྱང་། མི་མང་གི་ངོས་ནས་འདོད་མོས་ཡོད་པ་ཡིན་ན་ཁོང་ཉིད་ལངས་སྲིད་རྒྱུ་རེད་ཅེས་དང་། ཡང་ཁོང་གིས། ད་ལྟའི་དུས་རབས་འདི་སྔོན་མའི་མི་རབས་རྙིང་བའི་སྐབས་ཀྱི་དུས་སྐབས་ལྟ་བུ་མིན་པར་མི་རྣམས་ཀྱི་བསམ་བློ་དང་ཤེས་ཡོན་སོགས་ཕྱོགས་ཡོངས་ནས་ཡར་རྒྱས་སུ་ཕྱིན་ཡོད་པ་རེད་ལ། ལྷག་པར་དུ་རྒྱ་མིར་མཚོན་ནའང་དེང་སྐབས་དྲ་རྒྱའི་བརྒྱུད་ལམ་ཡར་རྒྱས་ཕྱིན་པའི་དབང་གིས་ཨ་རིའི་སློབ་དཔོན་ཆེན་མོ་དེ་འདྲ་ལ་བརྒྱུད་ལམ་གྱི་སྟེང་བོད་དོན་ཐད་འཁྱོག་བཤད་འགྲེལ་བརྗོད་གནང་བཞིན་པའི་གནས་ཚུལ་གང་མང་ཡོང་གི་ཡོད་སྟབས། སྔོན་མའི་བསམ་བློ་རྙིང་པ་ཁུར་བསྡད་མཁན་ཞིག་མ་ཡིན་པར་དེང་རབས་ཀྱི་ཤེས་ཡོན་དང་སློབ་སྦྱོང་ཡོད་མཁན།དབྱིན་ཡིག་དང་རྒྱ་ཡིག་ཐོག་ཤེས་ཡོན་གང་འཚམ་ཡོད་མཁན། འཛམ་གླིང་གི་སྤྱིའི་གནས་ཚུལ་ལ་གཞིགས་ཏེ་བོད་དོན་གྱི་ཕྱག་ལས་གནང་ཐུབ་མཁན་ཞིག་བཙལ་རྒྱུ་གལ་ཆེན་པོ་རེད་ལ། ད་ལྟའི་ཆར་བཀའ་ཁྲིའི་འོས་གཞིར་ལངས་ཟིན་པའི་ཚོགས་གཞོན་རྒྱ་རི་སྒྲོལ་མ་ལྟར།མ་འོངས་པར་ཡང་ང་ཚོའི་སྤྱི་ཚོགས་ནང་ང་རང་གིས་འདི་བྱེད་རྒྱུ་ཡིན་དང་འདི་བསྒྲུབ་ཐུབ་ཀྱི་ཡོད་ཟེར་མཁན་གྱི་ཕོ་མོ་སྐྱ་སེར་དབྱེར་མེད་ཀྱི་མི་སྣ་མང་པོ་ཞིག་དགོས་ཀྱི་འདུག་ལ། མ་འོངས་པའི་བཀའ་ཁྲིའི་འོས་གཞི་ཁྲོད་དུའང་ཁོང་ཚོ་ཙམ་མིན་པར་དང་བླངས་ཀྱི་འོས་གཞི་མང་པོ་འཐོན་པའི་རེ་བ་བྱེད་ཀྱིན་ཡོད།ཅེས་བརྗོད་བྱུང་།
ངས་བློ་བཟང་སེང་གེ་ལས་ལྷག་པའི་བཀའ་བློན་ཁྲི་་པའི་འོས་མི་སུ་ལ་ཡང་འོས་བླུགས་འདོད་མེད།་
གང་ཡིན་ཞེ་ན་ཁ་ཤས་ལ་ཤེས་ཡོན་མེད།་ཁ་ཤས་ལ་འཆར་གཞི་མེད།་་ཡིན་ནའང་ཁོང་ཚོ་བཀའ་བློན་ཁྲི་པའི་ཞབས་སྟེགས་སྒང་ལ་འཚང་ཁ་རྒྱག་་་་་ལྷག་པར་དུ་བློ་བཟང་སེང་གེ་ལྟ་བུའི་གཞོན་སྐྱེས་བཀའ་ྦློན་ཁྲི་་པ་ཞིག་མ་གཏོགས་རྙིང་ལྟ་མཁྲེགས་འཛིན་ཅན་གྱི་མི་རབས་རྒན་པའི་གྲས་སུ་ཚུད་པའི་བཀའ་བློན་ཁྲི་པའི་འོས་མི་ཞིག་ལ་ངས་འོས་བླུགས་རྒྱུའི་གྲྭ་སྒྲིག་ནམ་ཡང་བྱེད་ཀྱིན་མེད།
བསྟན་འཛིན་བརྩོན་འགྲུས་ལགས་ཀྱི་གང་ཞིག་བཤད་ཀྱི་ཡོད་མེད་ངས་ཤེས་མ་སོང་ལ་དེ་ནི་དངོས་གནས་མི་མང་མགོ་རྨོང་བྱེད་ཞིག་དང་དུ་མཐོང་སོང་།
ཁོ་པས་ལོ་སྔོན་མ་སེ་ར་ལ་གཏམ་བཤད་བྱེད་སྐབས། དེང་སང་མི་ཁག་གཅིག་གིས་སྒོ་དྲུག་སྐལ་བཟང་དང་བློ་བཟང་སེངྒེ་སྐབས་གསུམ་པའི་བཀའ་བློན་ལ་འདེམས་དགོས་བཤད་ཀྱི་འདུག་ངས་བསམ་ན་དེ་གཉིས་ཀྱིས་བཀའ་བློན་འགྱོན་རྒྱུ་མ་རེད་འདོད་ཟེར། ཡང་ཁ་སྔོན་གསར་འགོད་པ་ཞིག་ལ་དྲི་བར་ལེན་འདེབས་བྱེད་སྐབས་ད་ལྟའི་བཀའ་བློན་ལང་རྒྱུ་ཡིན་ཟེར་བའི་ཁྲོད་གླེང་གཞི་ཆེ་ཤོས་གསུམ་སྟེ་བཀྲས་མཐོང་། བློ་བཟང་སེངྒེ། རྒྱ་རི་སྒྲོལ་གསུམ་ལས་ངས་བསམ་ན་རྒྱ་རི་སྒྲོལ་མ་འོས་ཤོས་མཐོང་སོང་ཟེར། ཡང་ཐེང་འདིར་སྐད་ཆ་མགོ་གཉིས་མ་ལྟ་བུ་ཞིག་བཤད་ཀྱི་འདུག། ངས་ནམ་རྒྱུན་རང་ལུགས་ཡོད་པའི་མི་ཞིག་ལ་ངོས་འཛིན་བྱེད་ས་དེས་ཐེང་འདིར་ཟང་ཟིན་ཁྲོད་དུ་ཟང་ཟིང་ཅན་ཞིག་དུ་མི་འགྱུར་བའི་རེ་བ་སྙིང་ནས་ཞུ།
བློ་བཟང་སེང་གེ་ལ་རྒྱབ་སྐྱོར་མཐའ་ཅིག་ཏུ་ཡོད།
རེད་རེད། གང་བསམ་དྲང་མོར་བཤད་ན་སྐྱོན་ནི་མ་རེད། ཡིན་ནའང་བཀའ་ཁྲི་དེ་ཁ་བདེ་བོ་བཤད་ནས་ཡོང་གི་མ་རེད། ཐོབ་ནི་བསྟན་འཛིན་རྣམ་རྒྱལ་ལ་ཐོབ་རྒྱུ་རེད། བཀའ་ཟུར་རྣམ་པས་རྒྱབ་སྐྱོར་དང་ཨ་ལགས་འཇིགས་མེད་དང་འཇུ་ཆེན་གཉིས་ཀྱིས་ཇུས་འགོད། ཐུབ་བསྟན་འཕེལ་རྒྱས་དང་འཕེན་པོ་རྒྱལ་མཚན་ཕྱོགས་ཀྱི་ལས་འགུལ་སོགས་ཆ་རྐྱེན་ཚང་འདུག
བཀྲས་མཐོང་བསྟན་འཛིན་རྣམ་རྒྱལ་ལགས་དང་རྒྱ་རི་སྒྲོལ་མ་ལགས་གཉིས་ནས་ལོ་ མང་རིང་ལ་ཕྱག་ལས་གནང་ཟིན་པ་རེད། བཀའ་ཁྲི་ཐོབ་ནའང། སྔོན་ཕྱག་ལས་གནང་ཟིན་པའི་ལམ་རྙིང་པ་ནང་འགྲོ་བ་མ་གཏོགས་། སྔར་འགྲོ་མ་མྱོང་བའི་ལམ་གསར་པ་གང་ཡང་བྱེད་མི་ཐུབ་།
ད་ང་ཚང་ལ་དགོས་པའི་བཀའ་ཁྲི་ནི་བློབ་བཟང་སེང་གེ་ལགས་རེད།
ཁོ་ནི་དེང་རབས་མཐུན་པའི་འཛམ་གླིང་ཆབ་སྲིད་དང་འཛམ་གླིང་ཁྲིམས་ལུགས་ཀྱི་ མཁྱེན་ཡོན་ལྡན་ཞིང་།
རྒྱ་བོད་དཔོན་རིགས་ཀྱི་འབྲེལ་བ་བཟང་བ་དང་འཕོ་འགྱུར་མདུན་སྐྱོད་ཀྱི་སྤོབས་པ་ཡོད་པ།
ལྷག་བསམ་བརྟན་ཅིང་སྤྱོད་ལམ་གཙང་དང་བོད་མིའི་སྤྱི་ཚོགས་ཀྱི་ཤེས་རྟོག་ཟབ་བ། རྒྱ་མིའི་ཆབ་སྲིད་དང་ སྔོན་བྱུང་ལོ་རྒྱུས་ཀྱི་མཁྱེན་རྒྱ་ཆེ་བ་། འབྱུར་འགྱུར་ལས་འཆར་ནི་རྒྱལ་བའི་དགོངས་དོན་བཞིན་དབུ་མ་སྐྱོང་བ།
ཆོལ་གསུམ་ཁ་ཁ་ཡི་བསམ་ཚུལ་དང་གསར་རྙིང་དབྱེ་འབྱེད་ཀྱི་ཕྱོགས་ཞེན་མེད་པ། སྤྱི་ཚོགས་ཀྱི་ནད་རྙིང་མེད་ལ་མ་འོངས་ཕུགས་འདུན་གྱི་ལྟ་རྒྱ་ཆེ་བ།
སོགས་ཀྱི་ཡོན་ཏན་བརྗོད་ཀྱིས་མི་ལོངས་པ་ཡོད་པའི་མཁས་དབང་བློ་བཟང་སེང་གེ་ མཆོག་བཀའ་བློན་ཁྲི་པ་ཐོབ་རྒྱུའི་རེ་བ་དང་རྒྱབ་སྐྱོར་ཡོད།
༑ ༡ རྒྱ་རི་སྒྲོལ་མ་ལ་འོས་བབ་མི་འདུག དེང་སྐབས་རྒྱ་རི་སྒྲོལ་མ་འོས་ཉོ་རུ་གྲྭ་ས་ཁག་ཏུ་བསླེབས་ཚོམ་ཇ་བཏང་བ་དང་སྐད་ཆ་སྙན་མདོག་ཁ་བོ་བཤད་དེ་ཚོང་ལས་ལ་བྲེལ་བཞིན་མཆིས་པས་རྒྱ་ཆེའི་ཀློག་པ་པོ་རྣམས་མགོ་མ་འཁོར་བར་གཟབ་གཟབ་གནང་གལ་ཆེ། དེ་ནི་དེ་སྔའི་མོ་རང་གི་ལོ་རྒྱུས་ནང་ཆུ་སྒང་གསར་རྙིང་གི་ཕུགས་སུ་འཚང་སྟེ་སྤྱི་ཚོགས་ཧྲིལ་པོ་ཕུ་དཀྲུག་མདའ་དཀྲུགས་བྱས་པ་དང་། ལྷག་པར་སྔ་ལོའི་སྤྱི་འཐུས་གྲོས་ཚོགས་ཀྱི་སྐྱུགས་བྲོ་བའི་རྙོག་ཟེང་འདིའི་འབྱུང་ཁུངས་དེ་ཡིན་པས་སོ། ལྷག་པར་ད་ལྟའི་འོས་མིར་ལངས་སྟངས་གཅིག་པུའི་མོའི་རང་གཟུགས་དེ་གསལ་པོ་མཐོང་སོང་། སྤྱིར་ན་རྒྱ་རི་ཚང་གིས་མིང་སྲིང་ཚང་མས་སྤྱི་དོན་ཁ་ལ་ཁྱེར་ཏེ་ཆོལ་ཁ་ཕན་ཚུན་དང་ཆོས་ལུགས་ཕན་ཚུན་ཐུག་དཀྲུགས་བས་སོང་ལ། བཀའ་ཁྲིའི་འོས་མིར་ལངས་པ་དེ་ཡང་ཆུང་འདྲིས་བྱམས་པ་ཞིག་བཀའ་ཁྲིའི་རྐུབ་ཐོག་བཞག་སྟེ་སོ་སོ་བཀའ་བློན་ཞིག་ལ་རེ་བཞིན་པ་གསལ་པོ་རེད། གཅིག་བྱས་ན་ཁོ་གཉིས་ཁོ་གཉིས་གྲོས་བསྡུར་ཡང་བྱས་སྲིད་པར་མངོན།
༢ བཀྲས་མཐོང་བསྟན་རྣམ་གྱིས་བཀའ་ཁྲིའི་འགན་འཁྲི་ལྕོགས་ཀྱི་མ་རེད། གང་ཡིན་ཞེ་ན། ཁོ་རང་བཀའ་ཁྲིར་ལངས་པ་ཡིན་ན་དེ་སྔོན་གྱི་ན་ཚ་རྙིང་པའི་རྨ་ཁ་ལ་ཚ་བཏབ་པ་ལྟར་ན་ཟུག་ཇེ་ཆེར་ཕྱིན་ཏེ། བཙན་བྱོལ་སྤྱི་ཚོགས་འཐོར་ཞིག་འགྲོ་བའི་ཉེན་ཁ་ཏན་ཏན་ཡོད་ལ། ཁོ་རང་བློ་རིག་བཀྲ་བའི་གནས་སྐབས་སུ་ཐོབ་ཐང་སྤྲད་ཀྱང་ཅི་ཡང་མ་འཇོན་པ་ཡིན་པས་སླར་ཡང་ཁོ་རང་གིས་གང་ཡང་བྱེད་མི་ཐུབ། དེར་མ་ཟད་སྤྱི་ཚོགས་ནང་རྐུན་མའི་མིང་དང་། ཕྱོགས་ཞེན་སྒེར་སེམས་ཅན་མིང་ཡོད་པ་ཙམ་གྱིས་དངོས་ཡོད་གནས་སྟངས་གང་ཡིན་ཀྱང་རྩི་བཀུར་ཞུ་མཁན་ཉུང་ཟད་ཙམ་ལས་མི་འབྱུང་བ་ཁོ་ཐག་རེད། དེས་ན་ལྷོད་ལྷོད་བཞུགས་ན་འོས་འཚམས་རེད། ང་ཚོའི་སྤྱི་ཚོགས་ནང་རྙོག་ཁྲ་མང་བ་མ་གཏོགས་ཉུང་སྐྱོན་རྩ་བ་ནས་མེད།
༣ སྐབས་དུས་ལ་བབ་པའི་བཀའི་ཁྲི་དེ་བློ་བཟང་སེང་གེ་ཁོ་ནས་ངེས། ༧གོང་ས་མཆོག་གིས་ན་གཞོན་ཤེས་ཡོན་ཅན་ཞིག་ཐུགས་རེ་གནང་བཞིན་ཡོད་པ་དང་། ཁོ་ལ་རང་ཐུན་མིན་གྱི་ཁྱད་ཆོས་མང་པོ་ཡོད་ཅིང་། རྒྱལ་སྤྱི་དང་སྟོབས་ཆེན་རྒྱལ་ཁབ་ཁག་གིས་རྒྱབ་སྐྱོར་སྔར་ལྷག་པར་འབྱུང་བ་དང་། རྒྱ་མི་རིགས་ཤེས་ཡོན་ཅན་མང་པོ་དང་འབྲེལ་བ་དམ་ཟབ་ཡོད་དྲིལ་བསྒྲགས་ཁག་གི་ནུས་པ་ཆེན་པོ་འབྱུང་བ་བཅས་སོ།
བོད་རང་དབང་སློབ་ཕྲུག་ཚོགས་པའི་ཚོགས་གཙོ་ཟུར་པ་བཀྲས་མཐོང་ལྷ་སྒྲོན་གྱི་ནུས་པ་འདི་ནས་མངོན་གྱི་འདུག དེ་ནི་ཆོས་དབྱིངས་ཀྱི་བརྗོད་བབ་དེ་རེད།
ཤར་གླིང་ཟླ་སྒྲོན་མ་འདི་བུད་མེད་ཀྱི་ལར་ཞེན་ཅན་ཞིག་ཡིན་པ་ལྟར་རྒྱ་རི་སྒྲོལ་མ་བདམས་པ་ལ་ཧ་ལས་རྒྱུ་མི་འདུག
བོད་ཀྱི་རྩོད་རྙོག་འདུམ་འགྲིག་ལྟེ་གནས་ཁང་གི་འགན་འཛིན་ཀརྨ་ལེགས་བཤད་འདི་མི་གཟབ་པོ་ཞིག་རེད། ཐེངས་འདིར་ཁོང་གིས་དབུས་གཙང་མི་མང་ལ་གཟབ་འདུག དུས་རྒྱུན་ནས་ཁོང་གི་སྤྱོད་ཚུལ་དེ་འདྲ་ཞིག་རེད།
བསྟན་འཛིན་བརྩོན་འགྲུས་འདི་བཙན་བྱོལ་ནང་གི་ཁྱིམ་ཚང་ཆེན་པོ་གསུམ་ལ་དེ་ཙམ་གྱི་དགའ་པོ་མེད་མཁན་ཞིག་རེད། དེ་བས་བཀྲས་མཐོང་ལ་རྒྱབ་སྐྱོར་ཡོད་ཅེས་བརྗོད་ཐུབ་མི་འདུག་མོད། ཕྲག་དོགས་ཡང་ཚ་ཙམ་ཡོད་པས་བློ་བཟང་སེང་གེ་ལ་ཡང་རྒྱབ་སྐྱོར་ཞུ་གི་ཡིན་ཅེས་ལབ་མི་འདུག དེ་ལས་ལྡོག་ནས་ཁོ་རང་གིས་སྐད་ཆ་དྲང་མདོག་ཁ་པོ་ཞིག་བཤད་འདུག
ཨ་རིའི་ས་གནས་ཚོགས་གཙོ་ཟེར་བ་འདི་སྤྱི་ཚོགས་ལ་ཐོན་པའི་མི་གསར་པ་རེད། ཁོ་རང་གི་ལངས་ཕྱོགས་ནས་བཤད་པའི་བཀའ་ཟུར་བཀྲ་ཤིས་དབང་འདུས་ནི་རེ་བ་མེད་པ་ཞིག་རེད། དེ་ནི་བཀའ་ཟུར་ཁོ་རང་ལ་དོན་དངོས་ཀྱི་དཀའ་ངལ་ཞིག་ཡོད་པས་རེད།
གང་ལྟར་ཡང་། བོད་ཀྱི་དུས་བབ་ཚང་གི་བཅར་འདྲི་བྱེད་ཡུལ་ན་བློ་བཟང་སེང་གེའི་སྐོར་ལ་སྐད་ཆ་ཤོད་མཁན་རག་མི་འདུག དེ་ཡང་གནད་འགག་ཅིག་རེད། རྡ་ས་ན་བློ་བཟང་སེང་གེར་རྒྱབ་སྐྱོར་བྱེད་མཁན་གཅིག་ཀྱང་མེད་སོང་བ་ག་ལ་ཡིན།
སྐྱབས་བཅོལ་སྤྱི་ཚོགས་སམ་བཙན་བྱོལ་བོད་གཞུང་འདི་ཁྱིམ་ཚང་རེ་ཟུང་ཞིག་གི་རེད་དམ། ཡང་ན་སྐྱབས་བཅོལ་སྤྱི་ལ་དབང་བའི་གཞུང་ཞིག་རེད་དང་། ང་ཚོའི་མ་འོངས་བར་འཐབ་རྩོད་ཀྱི་ནུས་པ་གོང་མཐོར་གྱི་ལངས་ཕྱོགས་གསར་བ་འཛིན་ནུས་པའི་ན་གཞོན་ཤེས་ཡོན་ཅན་ཚོར་སྐྱེད་སྲིང་དང་གོ་སྐབས་སྤྲད་པའི་དུས་ཚོད་རེད་དམ། ཡང་ན། དོན་ཆེན་ཆུད་ཟོས་སུ་བཏང་བའི་རྒན་ཁོག་མཁྲེགས་འཛིན་པ་ཚོར་མི་ལོ་ལྔ་བཅུའི་ཐུས་ཤོར་དང་རྩོད་རྙོག་རྒྱུན་སྐྱོང་བྱེད་པའི་འགན་དེ་མཐུད་དུ་སྤྲད་རན་རེད། བློ་གཟུ་བོ་བྱ་རན་རེད་འདོད་ཀྱིན།
བཀྲས་མཐོང་དང་། རྒྱ་རིས་བོད་པའི་སྤྱི་ཚོགས་ནང་བཟང་ངན་ལ་མ་ལྟོས་པའི་ལས་ཀ་མང་པོ་བྱས་ཟིན་པ་རེད། བཀའ་ཁྲིའི་འོས་ཐོབ་ནའང་། མི་རྙིང་པ་ལ་མིང་གསར་པ་བཏགས་པ་ཙམ་ཡིན་ཕྱིར། སྔར་དང་མ་འདྲ་བའི་ལམ་འགག་གསར་པ་ཡོང་ཡག་ཡོད་པ་མ་རེད། དེ་ལས་བློ་བཟང་སེངྒེ་བཀའ་ཁྲིར་བཞག་ན་ཡག་གི་རེད། ཁོང་མི་གསར་པ་དང་མིང་གསར་པ་ཡིན་ཕྱིར། དཔྱད་གཞིའི་ལམ་འགག་གསར་པ་མང་པོ་ཞིག་ཡོང་ངེས་པ་ཡིན། ད་ལྟ་རྒྱལ་བ་རིན་པོ་བཞུགས་བཞིན་པ་ཡིན་ཕྱིར། གང་ལྟར་ཐབས་སྐྱོ་བོ་ནི་ཡོང་གི་མ་རེད། ལམ་འགག་གསར་པ་མང་པོ་ཞིག་ལ་ཚོད་ལྟ་བྱ་ཐུབ་པ་ཡིན་ན་རྗེས་མ་བཟང་ངན་ཇི་ཡིན་སྒྲོ་འདོགས་ཆོད་ཐུབ་པ་ཡོང་གི་རེད། ཉམས་མྱོང་ལ་ཁ་གཡར་ནས་རྟག་པར་ལམ་འགག་རྙིང་པར་འགྲོ་འདོད་པ་ནི་ཡར་རྒྱས་ཀྱི་འགག་རྡོ་ཆེ་ཤོས་དེ་ཡིན་པ་གསལ་པོ་རེད།
བློ་བཟང་སེང་གེ་ལ་འོས་ཐོབ་ན་བསམ་གི རྒྱུ་མཚན་གང་ཞེ་ན། མི་སུ་ལ་ཐོབ་ན་དམིགས་བསལ་གྱིས་བཙན་བྱོལ་སྲིད་གཞུང་ལ་འགྱུར་བ་གཏོང་ཐུབ་ཀི་མ་རེད། དེ་ནི་རྒྱ་ནག་དང་བསྟུན་དགོས་པས་ཡིན། གཞན་བཀའ་བློན་ཉམས་མྱོང་ཅན་དག་ཕྱག་རོགས་ལ་འདེམས་ཆོག བློ་བཟང་སེང་གེ་ལ་ཐོབ་ན་རྒྱལ་སྤྱིའི་མཐོང་སྣང་ལ་ལྟ་རྒྱུ་འདུག
བཀྲས་མཐོང་བསྟན་འཛིན་རྣམ་རྒྱལ་གྱི་ཡོན་ཏན་གྱི་ཆ་གོང་དུ་གླེང་ཟིན་འདུག ད་ངས་ཞན་ཆ་ཁ་ཤས་བཤད།
༡༽ བཙན་བྱོལ་ནང་འཚར་ལོངས་བྱས་པའི་མི་ཐོག་དང་པོ་དང་གཉིས་པའི་ནང་། ཞིབ་ཚགས་པོས་བལྟས་ན། རིགས་གཉིས་ཡོད། རིགས་དང་པོ་ནི། བོད་ཀྱི་སྲོལ་རྒྱུན་དང་དེང་རབས་གཉིས་ལས། སྲོལ་རྒྱུན་གྱི་བག་ཆགས་ཆེ་བའི་གྲས་རྣམས་ཡིན་ཞིང་། དེ་དག་མང་ཆེ་བ་བཙན་བྱོལ་བོད་མིའི་སློབ་གྲྭ་རང་ལས་ཐོན་པ་རེད། དཔེ་མཚོན་འོས་པའི་མི་ནི། སྐུ་སྒེར་དྲུང་ཆེ་ཟུར་པ་བློ་བཟང་སྦྱིན་པ་དང་བདེ་སྲུང་བཀའ་བློན་འབྲོང་ཆུང་དངོས་གྲུབ་ལྟ་བུ་རེད།
རིགས་གཉིས་པ་ནི། དེང་རབས་དང་སྲོལ་རྒྱུན་གཉིས་ལས། དེང་རབས་ཀྱི་ཤེས་ཡོན་གྱི་ཤུགས་རྐྱེན་ཆེ་བའི་གྲས་རེད། དེ་དག་མང་ཆེ་བ་རྒྱ་གར་ནང་གི་དབྱིན་ཇིའི་སློབ་གྲྭ་དང་ཕྱི་རྒྱལ་གྱི་སློབ་གྲྭ་འགྲིམས་ནས་སླེབས་པ་རྣམས་རེད། དཔེ་མཚོན་ནི། དྷ་ས་བོད་ཁྱིམ་གྱི་དབུ་འཛིན་ཚེ་དབང་ཡེ་ཤེས་དང་། འཇམ་དབྱངས་ནོར་བུ་ལྟ་བུ་རེད། བཀྲས་མཐོང་བསྟན་རྣམ་ཡང་འདིའི་ཁོངས་སུ་གཏོགས། རིགས་ཕྱི་མ་འདིའི་སྐད་ཡིག་ཙམ་མ་ཡིན་པར། བསམ་ཕྱོགས་ཀྱི་ནང་དུ་ནུབ་ཕྱོགས་ཀྱི་བསམ་བློ་གཏོང་ཕྱོགས་ཤུགས་ཆེན་པོ་ཡོད། ༡༩༧༥ ནས་ད་བར་གྱི་བཙན་བྱོལ་བོད་གཞུང་གི་ལས་ཁུངས་ཁག་དང་སློབ་གྲྭ་ཁག ཚོགས་པ་ཁག་གི་ལོ་རྒྱུས་ལ་ལེགས་པར་གཟིགས་ན། རིགས་སྔ་མ་ལ་དབང་ཆ་རག་སྐབས། སྲོལ་རྒྱུན་གྱི་རིག་གནས་དང་དམིགས་བསལ་བོད་རང་གི་སྐད་ཡིག་ལ་ཡར་རྒྱས་ཡོང་གི་ཡོད་པ་དང་། ཕྱི་མ་འདི་ལ་དབང་ཆ་ཆེན་པོ་རག་སྐབས། དབྱིན་སྐད་དང་དེང་རབས་ཤེས་ཡོན་ལ་དང་འདོད་དང་། སྲོལ་རྒྱུན་ཤེས་ཡོན་ལ་སྣང་ཆུང་འགྲོ་བའི་རྣམ་པ་ཞིག་མཐོང་རྒྱུ་ཡོད། དཔེར་ན། ༡༩༨༠ གྱ་གྲངས་ནང་རིགས་ཕྱི་མར་དབང་ཆ་ཆེན་པོ་རག་པ་དང་མཉམ་དུ་བཙན་བྱོལ་ནང་བོད་ཡིག་ཉམས་པ་ལྟ་བུ་རེད། དེར་བརྟེན་བཀྲས་མཐོང་བཀའ་ཁྲིར་སླེབས་ན། བོད་ཀྱི་སྲོལ་རྒྱུན་རིག་གཞུང་ལ་རང་བཞིན་གྱིས་ཤུགས་རྒྱག་ཚད་ཆུང་དུ་འགྲོ་ངེས་རེད་སྙམ།
༢༽ བཀྲས་མཐོང་བསྟན་འཛིན་རྣམ་རྒྱལ་གྱིས་གཞུང་དངུལ་རྩིས་ཆད་བྱས་ལུགས་སོགས་ནི་ལྐོག་ཟོས་བྱས་པ་ལྟ་བུའི་གནད་དོན་རེད་མི་འདུག དེ་ཚོ་སྐྱོན་གནད་མ་རེད། ང་རང་གིས་སྐྱོན་ཆ་ཆེན་པོ་གཅིག་མཐོང་བ་ནི། བཙན་བྱོལ་གྱི་སྤྱི་ཚོགས་ནང་། དེ་སྔོན་སྟག་མཚེར་རིན་པོ་ཆེས་གསུངས་པ་བཞིན། ཡབ་གཞིས་དང་རྒྱ་རི་ཚང་། བཀྲས་མཐོང་ཚང་བཅས་ཁྱིམ་ཚང་གསུམ་གྱི་དབང་སྒྱུར་རམ་མི་མངོན་པའི་ཤུགས་རྐྱེན་ཧ་ཅང་ཆེན་པོ་རེད། བརྒྱུད་རིམ་དེའི་ནང་ན་ཚ་རྙིང་པ་མང་པོ་ཞིག་ཀྱང་བསྐྲུན་ཡོད། བཀྲས་མཐོང་བསྟན་རྣམ་བཀའ་བློན་ཁྲི་པ་བྱེད་པའི་སྐབས་ལའང་། ནད་རྙིང་འདི་ཚོ་དང་འབྲེལ་བ་ངེས་ཅན་ཡོད་སྲིད་པ་རེད། བར་ལམ་ཁྱིམ་ཚང་ཆེན་པོ་གསུམ་གྱི་དབང་ཆའི་འཐབ་རྩོད་དེ་མི་མངོན་པ་ལྟ་བུར་གྱུར་ཡོད་ཀྱང་། ཁོང་ཡང་བསྐྱར་བཀའ་ཁྲིར་སླེབས་ཚེ། ན་ཚ་རྙིང་པ་དེ་ཚོ་ཡང་བསྐྱར་ལངས་སྲིད་པ་རེད།
༣༽ ཨ་རི་ལ་བོད་མི་ ༡༠༠༠ གཞིས་ཆགས་སུ་བཏང་བ་དེ་ནི་བཀྲས་མཐོང་གི་སྐབས་སུ་བྱུང་བ་རེད། མི་མང་ཆེ་བས་ལས་ཀ་དེ་འགྲིག་པ་ཞིག་དང་ཡང་དག་པ་ཞིག་ཡིན་པར་བརྩི་བཞིན་འདུག འོན་ཀྱང་ང་རང་གིས་ལྟ་སྟངས་ལྟར་ན། བོད་མི་ ༡༠༠༠ ཨ་རིར་བཏང་ནས་བྱུང་བའི་ཁེ་ཕན་དང་གནོད་སྐྱོན་གཉིས་ད་དུང་ཡང་དཔྱད་བསྡུར་བྱེད་དགོས་པ་ཞིག་རེད། ད་ལྟ་རྒྱ་གར་ནང་གཞིས་ཆགས་ཁག་བརྟན་ཚུགས་མེད་པ་དང་། བཙན་བྱོལ་བོད་མིའི་སེམས་པ་རྒྱ་གར་ནང་མི་གནས་པ། འཇོན་ཐང་དང་ཤེས་ཡོན་ཅན་མང་པོ་ཞིག་ཕྱི་ལ་ཤོར་བཞིན་པའི་དཀའ་ངལ་འདི་ཚོ་ཁོང་གི་སྐབས་སུ་འགོ་བཙུགས་པ་ཞིག་རེད། གལ་ཏེ། ཁོང་ཡང་བསྐྱར་བཀའ་ཁྲིར་བདམས་ན། ཁོང་གི་སྔོན་མའི་སྲིད་ཇུས་དེ་ཚོར་རྒྱབ་སྐྱོར་བྱས་པ་ལྟ་བུ་ཆགས་ངེས་རེད།
ད་དུས་ཚོད་མི་འདུག འདི་ཙམ་གྱིས་འགྲིག་པར་བྱ། དྲྭ་རོགས་ཚོ། གནས་སྐབས་བྱ་བའི་དབང་གིས་འདི་ན་ཡང་ཡང་ཡོང་ཐུབ་ས་མ་རེད། དེ་ཐུགས་ལ་འཛིན་རོགས།
མང་པོ་ཞིག་གིས་རྒྱ་རི་སྒྲོལ་མ་ལགས་བཀའ་ཁྲི་འོས་མི་དང་བླངས་ཡིན་པ་བརྗོད་པ་ནི་
གནས་ཚུལ་དངོས་མ་མ་ཤེས་པའི་འབྲས་རྟགས་རེད
རྒྱ་རི་སྒྲོལ་མ་ལགས་ཚོགས་པ་ཁག་བཞི་ནས་འོས་མིར་སྟོན་པ་མ་ཟད་དུས་བབ་་དྲ་རྒྱ་ཐོག་བལྟས་ན་མི་དམངས་ནས་མངོན་འདོད་དང་རེ་བ་ཆེ་ཤོས་ཡོད་པ་དེ་རྒྱ་རི་སྒྲོལ་མ་རེད། འོས་གྲང་1000་ལས་རྒལ་ཡོད། འོས་ཐོབ་ན་བཀའ་ཁྲི་ལང་རྒྱུ་ཡིན་ཞེས་ཞལ་བཞེས་གནང་བ་ཙམ་ལ་དང་བླངས་རེད་བརྗོད་པ་ཡིན་ན་བཀྲས་མཐོང་དང་བློ་་བཟང་སེང་གེ་ སོགས་ཚང་མ་དང་བླང་ཡིན་པ་གཅིག་མཚུངས་རེད་
ལོ་རྒྱུས་ཐོག་བཤད་པ་ཡིན་ན་རེད་གོང་ས་མཆོག་གིས་དགོངས་དོན་ལ་གཞིག་ན་རེད་ཚགས་ཤོག་ཐིག་འོས་མི་སོ་སོ་ནས་གསུང་བཤད་གནང་ཕྱོགས་སོགས་གང་ལ་བལྟས་ཀྱང་རྒྱ་རི་སྒྲོལ་མ་འོས་མཚམ་ཤོས་རེད་འདུག
ངས་བཀའ་ཁྲི་མཁས་དབང་བློ་བཟང་སེང་གེ་འོས་འཚམ་དུ་མཐོང་གི་ཡོད་རྒྱུ་མཚན་ཁོང་ལ་ང་ཚོས་མང་མང་གི་བཤད་པའི་ཆ་རྐྱེན་འཛོམས་པར་མ་ཟད་ལྷག་དགོས་ངེས་ཆ་རྐྱེན་དང་པོ་མི་ཚུལ་རིང་ལུགས་ཀྱི་ལྟ་ཚུལ་ཡོད་བསམ་པས་ཡིན།ཞིབ་ཏུ་ངའི་ཟིན་བྲིས་སུ་”ཐེངས་རྗེས་མའི་བཀའ་བློན་ཁྲི་བ་མི་ཡིན་དགོས”་ཞེས་པར་གསལ།
http://www.youtube.com/watch?v=sRHz50z5Fl8&feature=related དྲ་ཐག་འདི་ལ་གཟིགས་རོགས།