མི་ནི་ཆོས་ཉིད་ཀྱི་བདམས་གསེས་བྱས་པའི་མཐོ་རིམ་སྲོག་ཆགས་ཤིག་རེད། དེ་ནི་ཐོག་མ་ཉིད་ནས་གཡུང་མ་ཞིག་ཡིན་ནམ་སྙམ་ན་གཏན་ནས་མིན། འཛམ་བུ་གླིང་གི་རྒྱལ་ཁབ་གཞན་དང་ང་ཚོའི་མི་རིགས་ཀྱི་རྒོད་གཡུང་གཏན་ནས་མི་འདྲ། ང་ཚོ་ཇི་ལྟར་གཡུང་མར་གྱུར་བ་རེད། དེ་ལ་དགེ་མཚན་ཡོད་དམ་ཞེ་ན། དགེ་མཚན་གྱི་ཕྱོགས་ནས་ང་ཚོས་ད་བར་དུ་གླེང་བསྡད་པ་ཞིག་ཡིན་པས་ངས་གླེང་འདོད་མི་འདུག ངས་ང་ཚོའི་འཚོ་གནས་ཀྱི་གནད་དོན་ཐད་ནས་ཅུང་ཟད་གླེང་ན་མི་རིགས་གཡུང་མ་ནི་གཡུང་མ་རང་ཡིན་ལ། དེ་ལས་ཀྱང་ཚབ་ཆེ་བ་ནི་ཁྱེད་རང་རྒོད་པོ་མ་ཆགས་བར་དུ་གཞན་གྱི་བྲན་གཡོག་བྱེད་དགོས་པ་དེ་རེད། ང་ཚོ་འདི་ལྟར་གཡུང་མ་ཞིག་ཏུ་གྱུར་བ་ལ་བརྒྱུད་རིམ་ངེས་ཅན་ཞིག་ཡོད། བོད་བཙན་པོའི་སྐབས་ང་ཚོ་བཙན་པོ་ཡིན་ལ་བཙན་པོ་ཡིན་པ་ནི་རྒོད་པོ་ཡིན་ལ་རྒོད་པོ་ཡིན་ན་གཡུང་མ་མིན་པའི་གཏན་ཚིགས་འདི་ང་ཚོས་ཤེས་དགོས་མོད། དེའི་སྐོར་ནས་གླེང་ན་ལོ་རྒྱུས་གླེང་དགོས་པས་ཉོག་ཏུ་མི་འཇུག་པར་གནད་འགག་ཙམ་གླེང་འདོད་བྱུང་། ང་ཚོ་མི་རིགས་གཡུང་མར་གྱུར་བའི་གདོད་མ་རེ་ཞིག་བཞག་སྟེ། ཕ་མས་བསླབ་བྱ་བྱེད་སྟངས་ནས་བཟུང་ཅུང་ཟད་གླེང་ན། མི་ནི་ཕ་མས་བསླབ་བྱས་འཚར་ལོང་བྱུང་གི་ཡོད་པ་ཆོས་ཉིད་ཀྱི་ཐག་གཅོད་ལྟ་བུ་ཡིན། དེའི་ཕྱིར། ང་ཚོའི་མི་རིགས་འདི་དང་པོར་གཡུང་ལ་ཕབ་མཁན་སོ་སོའི་ཕ་མ་གཉིས་ཡིན་ལ། གཉིས་པ་ནི། ཆོས་ལུགས་ཀྱི་བསླབ་བྱ། གསུམ་པ་རང་ཉིད་ཀྱིས་རམ་འདེགས་བཅས་ལ་བརྟེན་ནས་ད་གཟོད་ང་ཚོ་མི་རིགས་གཡུང་མ་ཞིག་ཏུ་གྱུར་འདུག རྒྱལ་ཁབ་གཞན་གྱི་ཕ་མ་ཚོས་ཕྲུ་གུར་བསླབ་བྱ་བྱེད་སྟངས་གསལ་བོ་མི་ཤེས་ཀྱང་ཟ་ཟུར་ནས་མཐོང་བ་ནི་ཉི་ཟླ་སོགས་ཀྱི་སྟེང་ཡིན་ནའང་འགྲོ་ཐུབ་ཀྱི་རེད། འགྲོ་དགོས་པ་རེད། མི་ཞིག་ཡིན་ན་ཅི་ཞིག་བྱེད་དགོས་བྱུང་ཡང་འཇོན་གྱི་རེད། མི་འཇོན་ཟེར་བ་ཞིག་ཡོད་པ་མ་རེད་ཅེས་གསུངས་ཏེ་དང་པོ་ནས་ཕྲུ་གུ་རྒོད་པོ་ཆགས་རྒྱུར་རེ་བའི་མིག་འབུར་གཏོད་པ་ལས། གན་བྱེད་མི་ཉན་དང་། འདི་བྱས་ན་ཅིག་དང་འགལ་འགྲོ། ཕོག་ཐུག་ཤོར་འགྲོ། ལྷས་མི་ཉན། ཀླུས་གནོད་འགྲོ་ཟེར་ནས་ཕྲུ་གུར་སྐྲག་སློང་མཁན་དང་སེམས་ཤུགས་བཅག་ནས་ཕྲུ་གུ་གཡུང་མར་བསྒྱུར་བའི་བསམ་བློ་གཏན་ནས་མེད་པ་འདྲ། གཉིས་པ་ནི། མི་ཆོས་རིང་ལུགས་ཀྱི་བསླབ་བྱས་ཕྲུ་གུ་ཚོ་རང་གི་རྒྱལ་ཁབ་སྲུང་སྐྱོབ་བྱེད་མཁན་གྱི་བུ་རྒོད་ཁག་ཅིག་ཏུ་སྐྱེད་བསྲིངས་བྱས་ཡོད་ལ། གསུམ་པ་ནི་དེ་དང་མཐུན་པར་རང་ཉིད་ཀྱི་སྤོབས་པ་དང་ཡིད་ཆེས་གྲོགས་སུ་སོང་ཡོད་པ་ལྟ་ཅི་སྨོས། རྒྱུ་མཚན་དེ་དག་གིས་རྒྱལ་ཁབ་གཞན་གྱི་མི་རིགས་དང་ང་ཚོའི་མི་རིགས་ཀྱི་དབར་མཚམས་ཐིག་ཅིག་འཕངས་ཡོད་པ་ཤེས་དགོས་སྙམ། ལྷག་པར་དགོད་བྲོ་བ་ཞིག་ལ་འོ་ན་ཕ་མའི་བསླབ་བྱ་དང་། ཆོས་ཀྱི་བསླབ་བྱས་ང་ཚོ་དངོས་གནས་མི་རིགས་གཡུང་མ་ཞིག་ཏུ་བསྒྱུར་བ་རེད་དམ་ཞེ་ན། མི་རིགས་གཞན་གྱིས་གཉའ་གནོན་དང་བཙན་འཛུལ་འོག་ང་ཚོ་གཡུང་མ་ཞིག་ཏུ་བསྒྱུར་ཡོད་པ་དངོས་ཡོད་ཡིན་ཀྱང་། ནང་ཁུལ་ལ་གཏན་ནས་གཡུང་མ་ཞིག་མིན་པར་མ་ཟད། མི་རིགས་གཞན་ལས་ཀྱང་རྒོད་པོ་རེད། དེ་ནི་ང་ཚོས་རྒོད་གཡུང་གོ་བཟློག་པའི་སྣང་ཚུལ་འཇིགས་རུང་དེ་ཡིན་པས་འཚོ་གནས་རང་གི་ངོས་ནས་གླེང་ན་ང་ཚོ་གཡུང་མར་བསྒྱུར་བའི་བསླབ་བྱ་དེ་དག་གི་འབྲས་བུ་ལ་ཏན་ཏན་བསམ་གཞིགས་བྱེད་དགོས་པ་ཞིག་ཏུ་མཐོང་ངོ། །
འོན་ཀྱང་རང་གི་རྒྱལ་ཁབ་ཀྱི་ཆེད་རང་་སྲོག་བློས་བཏང་བའི་རྒོད་པོ་དཔའ་བོ་འགའ་རེ་བྱུང་ཡོད་པ་ནི་རྒོད་པོ་མ་རེད་སུ་ཞིག་གིས་ཟེར་མོད་དེས་མི་རིགས་ཤིག་གི་རྒོད་གཡུང་གི་ཚབ་མཚོན་བྱེད་མི་ཐུབ་པའི་གནས་ལུགས་འདི་ང་ཚོས་ཤེས་དགོས།
བདེན་པ་རེད། ཕྱི་ལ་བསྐོར་ན་བལ་དཀར་ལས་འཇམ་དང་ནང་ལ་བསྐོར་ན་དུག་ཚེར་ལས་རྩུབ་ཟེར་བའི་གཏམ་དཔེ་འདིས་འུ་ཅག་རང་མཚོན་ཡོད།
ཨ.བཙན་པོ་ལགས་ཁྱེད་ཀྱིས་བཤད་པ་དེ་ཟུར་ཙམ་བདེན་མོད།འོན་ཀྱང་བུ་མཐོ་བར་ལྟ་བ་དང་བུ་མོར་དམའ་རུ་ལྟ་བའི་ལྟ་བ་དེ་ནང་ཆོས་བརྒྱད་རྒྲ་གར་ཀྱི་ལུགས་སྲོལ་དེ་བོད་དང་རྒྱ་ནག་ཉི་ཧོང་ཀོ་རི་ཡ་སོགས་ལ་ཤུགས་ཆེན་པོ་དར་བ་ཞིག་རེད།
དྲ་གྲོགས་སྤོབས་པ་མཐའ་ཡས་ཟླ་བ་ལྷ་མོ་རྣམ་གཉིས་ལགས་”སྔོན་མ་བཙན་པོའི་སྐབས་སུ་བོད་འབངས་ལ་རྒོད་ཀྱི་སྡེ་དང་གཡུང་གི་སྡེ་ཟེར་བའི་རིགས་གཉིས་དབྱེ་”ཡོད་པ་དེ་ནི་རིགས་རྒྱུད་ཞིག་ལ་ངོས་འཛིན་ན་ནོར་བ་རེད། དེ་ནི་ཁྱིམ་ཚང་ཞིག་ལ་དམག་འགྲོ་མཁན་ཡོད་མེད་ཀྱིས་དབྱེ་གི་ཡོད་རེད། དེ་ཡང་ཁྱིམ་ཚང་ཞིག་ལ་བུ་ལོ་ཚོད་དམག་དང་རན་པ་ཞིག་ཡོད་ན་དེ་ནས་བཟུང་ཁྱིམ་ཚང་དེ་བ་ཚང་རྒོད་སྡེའི་གྲས་སུ་ཚུད་པ་རེད། སྐབས་དེར་ཁྱིམ་ཚང་ཆེ་བ་ཞིག་ལ་བུ་ཞིག་མ་སྐྱེས་ཚེ་ཧ་ཅང་གི་ལྟས་ངན་པ་ཞིག་ལ་རྩི་གི་རེད། དེའི་རྐྱེན་གྱིས་ཕོ་མཆོག་མོ་དམན་གྱི་ལྟ་བ་དེ་ཡང་དེ་འདྲ་ཞིག་ལས་དར་བ་རེད། དེ་འདྲའི་ལྟ་མ་དར་བའི་སྔོན་ལ་ཕོ་ལས་མོ་མཆོག་ཏུ་བརྩི་བ་ཡིན་པ་ནི་རུས་དེད་སྟངས་ལས་ཤེས་ནུས་སོ།། དེ་ནི་གསལ་འདེབས་ཙམ་ཡིན།
བཀྲ་ ཤིས་དོན་གྲུབ་ལགས།
ཁྱེད་ཀྱིས་གསུང་བ་དེ་གནད་དུ་ཁེལ་པའི་གཏམ་ཞིག་རེད།
ནད་ཐོག་ལ་སྨན་དང་སྐྲངས་ཐོག་ལ་ཁབ་ཅེས་པའི་དཔེར་བཞིནརེད།
ང་ཚོའི་མི་རིགས་འདི་སྤྱི་ཡོང་གིས་ན། ལྷག་བསམ་ཆེ་མདོག་དང་།
སྙིང་རྗེ་ཡོད་མདོག་བྱེད་མཁན་ཧ་ཅང་མང་མོད།
དོན་དངོས་པོའི་ཆ་ནས་དེ་འདྲ་ཞིག་ག་ལ་ཡིན།
བོད་མི་སུ་དང་སུ་ཡིན་ནའང་།
ནང་ལོག་ལ་ཐུག་དུས་སྟག་རྒོད་ནགས་ནས་མཆོང་བ་ལྟ་བུའི་ངར་ཤུགས་ཆེན་པོ་ཡོད།་ བདེན་ནམ་མི་བདེན།
སྔོན་བཙན་པོའི་སྐབས་སུ་བོད་ཀྱི་དམག་དཔུང་གི་སྡེ་ལ་ཚན་པ་དུ་མར་དབྱེ་ནས་གཡུང་སྡེ་དང་རྒོད་སྡེ་སོགས་ཞེས་བཏགས་པ་ཞིག་རེད་མ་གཏོགས།གཡུང་སྡེ་དང་རྒོད་སྡེ་ཞེས་པ་དེ་སྐབས་དེའི་བོད་མིའི་སེམས་ཁམས་སམ་གཤིས་ཀར་བལྟས་ཏེ་བཏགས་པ་ཞིག་རྩ་བ་ཉིད་ནས་མ་རེད།
ངས་ནི་བོད་མི་རིགས་འདིར་སྡོམ་ཚིག་བརྒྱབ་ཤེས་ཀྱི་མི་འདུག ཆོལ་ཁ་ཕར་ཞོག་ལུང་ཚན་རེར་ཡང་མི་གཤིས་མ་འདྲ་བ་འདུག བོད་ཕྱི་ནང་གཉིས་ཀྱི་མི་གཤིས་ཀྱང་འདྲ་གི་མི་འདུག
གང་ལྟར་གླ་གློ་དང་མུན་ནག་རྗེས་ལུས་ཡིན་མིན་ནི་མི་ཤེས། མི་རིགས་ངར་ཤ་དོད་པོ་ཞིག་ནི་མ་རེད་
སྔོན་མ་བཙན་པོའི་སྐབས་སུ་བོད་འབངས་ལ་རྒོད་ཀྱི་སྡེ་དང་གཡུང་གི་སྡེ་ཟེར་བའི་རིགས་གཉིས་དབྱེ་འདུག དེའི་རྗེས་སུ་གཡུང་གི་མ་གཏོགས་རྒོད་ཀྱི་སྡེ་ཟེར་བ་དེའི་རིགས་རྒྱུད་ཆད་སོང་བ་ཡིན་ནམ།
བོད་རིགས་ནང་ལ་མི་གཡུང་མ་མང་པོ་ཡོད་སྲིད་ཀྱང་། ༧གོང་ས་མཆོག་ནི་འཛམ་བུ་གླིང་འདི་ཡི་མི་ཚོགས་ནང་ནས་མི་རྒོད་ཤོས་དེ་ཡིན་པ་རེད། འདི་ནི་ངའི་ལྟ་སྟངས་རེད།
རང་གི་རྒྱལ་ཁབ་ཀྱི་ཆེད་རང་་སྲོག་བློས་བཏང་བའི་རྒོད་པོ་དཔའ་བོ་འགའ་རེ་བྱུང་ཡོད་ཟེར་བ་དང་། གཡུང་མ་དང་གཡུང་མ་ཟེར་ནས་བཤད། ཡིན་ནའང་བོད་མི་མང་གིས་བོད་ཀྱི་ཆེད་དུ་དགྲ་བོའི་མདུན་དུ་གཅེས་པའི་ཚེ་སྲོག་དོར་བ་ནི་རེ་འགའ་འམ་གྲངས་ཀ་ཉུང་ཉུང་ཞིག་ག་ལ་ཡིན། ཕྱི་ལོ་ ༡༩༧༢ ཡས་མས་ནས་གླེང་ན། མདོ་སྨད་མཚོ་སྔོན་ས་ཁུལ་དང་། ཕྱི་ལོ་ ༡༩༠༣ དང་༤ ནས་མགར་ཐར་ཁུལ། ཕྱི་ལོ་ ༡༩༡༢ ཡས་མས་ནས་དཀར་མཛེས་ཁུལ། ཕྱི་ལོ་ ༡༩༥༡ དང་ ༥༤ ༥༥ ༥༦ ༥༧ ༥༨ ༥༩ ཉུང་མཐར་བོད་མི་ཁྲི་ཁ་ཤས་ཀྱིས་གཅེས་པའི་ཚེ་སྲོག་དགྲ་དང་གདོང་གཏུག་འོག་དོར་ཡོད་མེད་ལ་ང་ཚོ་ཐེ་ཚོམ་བྱེད་དགོས་དོན་རྩ་བ་ནས་མེད་ལ། ད་ལྟ་འམ་ད་དུང་གཅེས་པའི་ཚེ་སྲོག་གི་མཆོད་པ་འབུལ་དང་འབུལ་བཞིན་པ་ལ་རེ་འགའ་ཟེར་བ་ནི་ཏག་ཏག་ཅིག་མ་རེད། དེ་བཞིན་ཕྱི་ལོ་ ༢༠༠༨ དང་ ༢༠༠༩ ལོའི་ཞི་རྒོལ་དོན་རྐྱེན་ཁོ་ན་ནས་གླེང་ན་ཕྱི་དགྲ་རྒྱ་དམར་གྱི་མེ་མདའི་སོ་ཁ་ནས་ལངས་པ་ཁོ་ན་ལ་བསམ་ན་བོད་མི་མང་འདི་གཡུང་མ་ཞིག་གཏན་ནས་མིན་པ་དེ་ར་འཕྲོད་ཀྱི་འདུག
ནང་དོན་དང་རྩོམ་མིང་མི་མཐུན། རྩོམ་མིང་ལ་བོད་དེ་མི་རིགས་གཅིག་ཡིན་པ་དང་། དེ་འདྲ་བའི་མི་རིགས་དེ་གཡུང་མ་ཡིན་པར་གོ་བཞིན་འདུག བོད་ནི་མི་རིགས་ཤིག་གཏན་ནས་མ་རེད། བོད་ནི་ལུང་པའི་མིང་ཡིན་པ་ལས་མི་རིགས་ཀྱི་མིང་མ་རེད། མ་ཟད་བོད་ལ་མི་རིགས་གཅིག་གིས་གཏན་ནས་མི་ཚད། མི་རིགས་ཁ་ཤས་ཡོད། དེ་ཡང་བོད་མི་རིགས་ཟེར་བ་དེ་གདོད་མའི་དུས་སུ་བོད་ལུང་པ་ཐོག་མར་གནས་གཞིར་འཛིན་མཁན་གྱི་མི་རིགས་དེ་ཡིན། ཡིན་ནའང་དེའི་རྗེས་སུ་བོད་དུ་མི་རིགས་ཁ་ཤས་བྱུང་ཡོད། དེ་དག་ཀྱང་བོད་མི་རེད། ང་ཚོས་བོད་གླེང་སྐབས་དེ་དག་དོར་མི་རུང་། དོར་བ་ཡིན་ན་བོད་མི་ཆ་ཚང་བ་ཞིག་གླེང་གི་མེད་པར་བོད་རིགས་གླེང་གི་ཡོད། དེ་ནི་ད་ལྟའི་དུས་འདིར་ཤེས་དགོས་པ་ཞིག་རེད།
མགོ་ཡོད་པ་མཐོང་བཞིན་དུ་ཀླད་པ་མེད་ཟེར་བ་དང་མིག་ཡོད་པ་ཤེས་བཞིན་དུ་ལོ་བ་ཡིན་ཟེར་བ་དེ་རང་ཉིད་ཀྱི་རང་གཡུང་མ་རྒྱུར་བ་མ་ཡིན་ནམ།།
མགོ་ཡོད་པ་མཐོང་བཞིན་དུ་ཀླད་པ་མེད་ཟེར་བ་དང་མིག་ཡོད་པ་ཤེས་བཞིན་དུ་ལོ་བ་ཡིན་ཟེར་བ་དེ་རང་ཉིད་ཀྱི་རང་ཉིད་གཡུང་མ་རྒྱུར་བ་མ་ཡིན་ནམ།།
ཐོག་མར། སློབ་སྐབས་གསར་པའི་ནང་དུ་སློབ་གྲོགས་ཚོ་རང་མོས་གླེང་སྟེགས་ལ་ཞུགས་པར་ངས་བཀྲ་ཤེས་བདེ་ལེགས་ཞུས་པ་ཡིན། ང་ཚང་མ་ཁྱིམ་ཚང་གཅིག་གི་མི་རེད། ང་རང་ཚོ་མགོ་ཡོད་པ་མཐོང་བཞིན་དུ་ཀླད་པ་མེད་ཟེར་བ་དང་མིག་ཡོད་པ་ཤེས་བཞིན་དུ་ལོ་ང་ཡིན་ཟེར་བ་དེ་རང་ཉིད་ཀྱི་རང་ལ་གཡུང་མ་རྒྱུར་བ་མ་ཡིན་ནམ།།
བཟོད་སེམས་དང་སྙིང་སྟོབས་མཉམ་དུ་དགོས།
རང་དོན་དང་གཞན་དོན་མཉམ་དུ་དགོས།
སྒེར་སེམས་དང་སྤྱི་སེམས་མཉམ་དུ་དགོས།
རང་རྒྱལ་དང་གཞན་རྒྱལ་མཉམ་དུ་དགོས།
གཉིས་སྨན་དང་དབུ་མ་མཉམ་དུ་དགོས།
གཉའ་འབྲོང་ལགས་བོད་ནི་མི་རིགས་གཡུང་མ་ཞིག་མ་རེད་རང་རེད།
ཨོ་ལེ། ནམ་རྒྱུན་རྒྱལ་ཁབ་ཀྱི་གོ་བབ་བློས་གཏོང་བཟོད་སྒོམ་བྱེད་མཁན། ཕ་ཡུལ་གྱི་ས་ཁོངས་བློས་གཏོང་བཟོད་སྒོམ་བྱེད་ཕོད་མཁན། མི་རིགས་ཀྱི་ལོ་རྒྱུས་བློས་གཏོང་བཟོད་སྒོམ་བྱེད་མཁན་ཞིག་དེ། རྒྱལ་ཁབ། ས་ཁོངས། ལོ་རྒྱུས་གསུམ་གྱི་ཡ་མེད་བློས་གཏོང་བྱེད་པའི་ཐད་ནས་འཛམ་གླིང་འདིར་ང་ཚོ་ལས་གཡུང་མ་ཞིག་མེད་ཞེས་བརྗོད་ཀྱང་མི་ཆོག་པ་མི་འདུག འོན་ཀྱང་། སྒེར་གི་གོ་དབང་། ཆོལ་ཁའི་ཕྱོགས་དབང་། ཆོས་ཀྱི་འཐེན་དབང་། ཁྱིམ་གྱི་ཁེ་དབང་བཅས་ཀྱི་ཐད་ནས་མི་རིགས་གཞན་ལས་ལྷག་པའི་རྣོ་ངར་ཅན་ཞིག་འདུག ན་ནིང་གྲོས་ཚོགས་ནང་ནས་ཀྱང་སེར་མོ་བས་དབུ་ཁྲིད་དེ་སྐྱ་སེར་མེད་ལ་འདྲོགས་ཞོགས་བརྒྱབ་པ་མ་ཡིན་ནམ།
རྟ་གཡུང་མོ་ཞིག་དང་མཚུངས།
ང་ཚོ་ང་ཚོ་གཡུང་མ་མིན། དད་པ་གླེང་སྐབས་གཡུང་མ་མིན། རྩྭ་ས་བརྩོད་སྐབས་གཡུང་མ་མིན། ནང་འཁྲུག་བྱེད་སྐབས་གཡུང་མ་མིན། གླེན་རྟགས་སྟོན་སྐབས་གཡུང་མ་མིན། རྒྱལ་འཇོག་བྱེད་སྐབས་གཡུང་མ་མིན། ནག་ཚོང་བྱེད་སྐབས་གཡུང་མ་མིན། ནག་འཕེལ་འཇོག་སྐབས་གཡུང་མ་མིན། གྲུབ་མཐའ་བརྩོད་སྐབས་གཡུང་མ་མིན། བླ་མ་བརྩོད་སྐབས་གཡུང་མ་མིན། བདེན་བར་བརྒོལ་སྐབས་གཡུང་མ་མིན།