ས་རཱ་མཐོ་སློབ་ཏུ་ཤེས་ཡོན་སྲིད་བྱུས་དང་འབྲེལ་བའི་གཞི་རིམ་འོག་མའི་དགེ་རྒན་འོས་སྦྱོང་ཐེངས་གཉིས་པ་མགོ་འཛུགས་བྱས་པ།
དེ་རིང་བོད་གཞུང་དྲ་རྒྱས་གནས་ཚུལ་སྤེལ་བ་ལྟར་ན། དེ་རིང་སྔ་དྲོར་ཤེས་རིག་ལས་ཁུངས་ཀྱིས་གོ་སྒྲིག་འོག ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་ཤེས་ཡོན་སྲིད་བྱུས་དང་འབྲེལ་བའི་གཞི་རིམ་འོག་མའི་དགེ་རྒན་འོས་སྦྱོང་ཐེངས་གཉིས་པ་མགོ་འཛུགས་ཞུས་ཡོད་པ་དང་། དབུ་འབྱེད་མཛད་སྒོའི་སྐུ་མགྲོན་གཙོ་བོར་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་ཕེབས་ཡོད་འདུག
དབུ་འབྱེད་མཛད་སྒོའི་ཐོག་མར་ཤེས་ཡོན་འགན་འཛིན་ཚེ་རིང་བསམ་གྲུབ་ལགས་ཀྱིས་ཐེངས་འདིའི་དགེ་རྒན་འོས་སྦྱོང་གི་དུས་ཡུན་ནི། འདི་ལོའི་ཟླ་ ༩ ཚེས་ ༡ ནས་༢༠༡༢ ལོའི་ཟླ་ ༣ ཚེས་ ༣༠ ཉིན་བར་ཡིན་པ་དང་། འོས་སྦྱོང་ཁོངས་སུ་ཤེས་ཡོན་སྲིད་བྱུས་དགོས་མཁོ་དང་འཚམ་པའི་ཉེ་བའི་གཙུག་ལག་རབ་འབྱམས་ (BA) སློབ་ཐོན་པ་ ༡༤ འཛུལ་ཞུགས་གནང་ཡོད་ཅིང་། འོས་སྦྱོང་རིང་ཤེས་ཡོན་གྱི་ལྟ་གྲུབ་དང་ཤེས་ཡོན་གྱི་ལོ་རྒྱུས། བྱིས་པའི་སེམས་ཁམས་རིག་པ། གཞི་རིམ་འོག་མའི་སློབ་ཚན་ཁག་གི་སློབ་ཁྲིད་ཐབས་ལམ། གཞན་ཡང་ཤེས་ཡོན་སྲིད་བྱུས། རིགས་ལམ། དམིགས་བསལ་ཤེས་ཡོན། སློབ་འཁྲིད་སྦྱོང་བརྡར་བཅས་གོ་སྒྲིག་ཞུ་འཆར་ཡོད་སྐོར་གསུངས་ཡོད།
ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་ཀྱིས་ད་ལྟའི་བཙན་བྱོལ་བོད་མིའི་གནས་སྟངས་ཉག་ཕྲ་བའི་སྐབས་སུ་དགེ་རྒན་གྱི་ཕྱག་ལས་གནང་རྒྱུའི་འདུན་པ་ཡོད་པ་ནི་ངོ་མཚར་སྨད་དུ་བྱུང་བ་ཞིག་ཡིན་པ་དང་། ལྷག་པར་གཞི་རིམ་འོག་མའི་དགེ་རྒན་ཁོངས་སུ་ཤེས་ཡོན་སྲིད་བྱུས་དང་དགོས་མཁོའི་ཤེས་ཚད་ཉེ་བའི་གཙུག་ལག་རབ་འབྱམས་ལེགས་ཐོན་ཐོག་བརྒྱ་ཆ་ ༥༠ ཡན་ལོན་པ་ཤ་སྟག་མཉམ་ཞུགས་གནང་བ་ནི་བསྔགས་བརྗོད་གནང་བར་མ་ཟད། ཁོང་གིས། ཤེས་ཡོན་སྲིད་བྱུས་ཀྱི་དགོངས་དོན་དང་མཐུན་པའི་དགེ་རྒན་ཚད་ལྡན་ཡོང་ཐབས། དགེ་རྒན་གྱི་གལ་གནད། འོས་སྦྱོང་གི་དུས་ཚོད་དང་གོ་སྐབས་དམ་འཛིན་གནང་ཐབས་སྐོར་གྱི་གསུང་བཤད་གནང་འདུག
ཕྱི་ལོ་ ༢༠༠༤ ལོར་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་གཏན་འབེབས་གནང་བ་ནས་བཟུང་ཤེས་ཡོན་སྲིད་བྱུས་དང་འབྲེལ་བའི་སྔོན་འགྲོ་དང་གཞི་རིམ་འོག་མ། གཞི་རིམ་བར་མ། ཆོས་དགེ་བཅས་ཀྱི་འོས་སྦྱོང་ཁག་ལྔ་ཙམ་གོ་སྒྲིག་ཞུས་པའི་ནང་དགེ་རྒན་ ༡༢༩ ཙམ་གསོ་སྐྱོང་ཐུབ་པ་བྱུང་ཡོད་སྐོར་བོད་གཞུང་ཤེས་རིག་ལས་ཁུངས་ཀྱིས་འགྲེལ་བརྗོད་གནང་འདུག
གསར་འགོད་པ། ཨ་རིག་འགྱུར་མེད།
ཤེས་རིག་དྲུང་ཆེ་མཆོག་གིས་གསུངས་པ་ལྟར། ལས་དང་པོ་པའི་གནས་སྐབས་སུ་དགེ་རྒན་ཚད་ལྡན་ཞིག་དགོས་རྒྱུ་ཧ་ཅང་གལ་ཆེན་པོ་རེད། དགེ་རྒན་ཚད་ལྡན་ཞེས་པ་ཡང་ཤེས་ཡོན་འདང་ངེས་ཡོད་པ་ཙམ་གྱི་མི་ཆོག་པར་བསམ་པ་ཐག་པས་སློབ་འདོད་ཡོད་པ་ཞིག་དང་། དེ་ཡང་བྱ་ཐབས་སྣ་ཚོགས་ཀྱིས་སློབ་ཁྲིད་བྱེད་ཐུབ་པ། ཕྱི་ཀུན་སྤྱོད་སོགས་ཀྱི་ཆ་ནས་ཀྱང་ཕྲུག་གུའི་རྒྱུད་ལ་ཡ་རབས་བཟང་སྤྱོད་འཇགས་ཐུབ་པ་བྱེད་རྒྱུ་སོགས་མདོར་ན་མཁས་བཙུན་བཟང་གསུམ་གྱི་དགེ་རྒན་བསྐྲུན་རྒྱུ་ཤིན་ཏུ་གལ་ཆེ།།
བྱམས་པ་མགོན་པོས།
བཤེས་གཉེན་དུལ་བ་ཞི་བ་ཉེར་ཞི་བ།།
ཡོན་ཏན་ལྷག་པ་བརྩོན་བཅས་ལུང་གི་ཕྱུག།
དེ་ཉིད་རབ་ཏུ་རྟོགས་ལ་སྨྲ་མཁས་ལྡན།།
བརྩེ་བའི་བདག་ཉིད་སྐྱོ་བ་སྤངས་ལ་བརྟེན།།
ཞེས་དགེ་བའི་བཤེས་གཉེན་ཆོས་བཅུ་ལྡན་དུ་གསུངས་སོ།།