ཁྱེད་ཅག་དགོན་པ་གྲྭ་ཚང་དངུལ་ཅུང་ཡོད་པ་དག་གིས་དཀའ་ངལ་ཅན་དག་་ལ་ལྟ་རྟོགས་བྱ་རྒྱུའི་ལས་འགན་ཡོད། དགོན་པ་འཛུགས་སྐྲུན་དང་ཆབས་ཅིག་སློབ་གཉེར་ལ་ཤུགས་རྒྱག་དགོས་པ་རེད། དེ་དང་མཉམ་དུ་ཉེ་འཁོར་གྱི་སྐྱོ་བོའི་རིགས་ལ་རོགས་རམ་བྱས་ན། བཅོམ་ལྡན་འདས་ཀྱི་དགོངས་པ་དང་མཐུན་གི་རེད། ཁྱེད་ཅག་དགོན་པ་གྲྭ་ཚང་ཁག་ལ་སྦྱིན་བདག་མང་པོ་འདུག ཁོང་ཚོར་འབོད་སྐུལ་ཞུས་ཏེ་མི་ཚང་སྐྱོ་བོའི་རིགས་ལ་རོགས་རམ་འཚོལ་དགོས་ཞེས་༧གོང་ས་མཆོག་གིས་གསུངས་ཡོད།
དེ་རིང་ཞོགས་པར་རྒྱ་གར་ལྷོ་ཕྱོགས་སེ་ར་ཐེག་ཆེན་གླིང་དུ་དམངས་གཙོའི་དུས་དྲན་དང་འབྲེལ་ ༧གོང་ས་མཆོག་ལ་བཀའ་དྲིན་རྗེས་དྲན་གསེར་གྱི་གཟེངས་རྟགས་ཤིག་བོད་གཞིས་བྱེས་གཉིས་ཀྱི་ངོ་ཚབ། བོད་མི་མང་སྤྱི་འཐུས་ལྷན་ཚོགས་ཀྱིས་འབུལ་ལམ་ཞུས་སྐབས། ༧གོང་ས་མཆོག་ཐུགས་ཧ་ཅང་དགྱེས་ཚོར་ཆེན་པོས་ཐེངས་འདིར་ཆེད་ཕེབས་གནང་བའི་ཕྱི་རྒྱལ་གྱི་སྐུ་མགྲོན་རྣམ་པ་དང་སེར་སྐྱ་མི་དམངས་ཡོངས་ལ་བཀའ་སློབ་གནང་དོན། ཁྱེད་ཅག་གིས་གཟེངས་རྟགས་འདི་འདྲ་ཞིག་གནང་པར་ཐུགས་རྗེ་ཆེ་ཟེར་རྒྱུ་ཡིན། ཁྱེད་ཅག་དགའ་དད་སྤྲོ་གསུམ། དད་པ་དང་དམ་ཚིག་གཡོ་བ་མེད་པའི་ཐོག་ནས་གནང་བ་རེད། འདྲ་ཆགས་པོ་བྱས་ཏེ་གནང་བ་མ་རེད་ལ། མི་གནང་ཀ་མེད་ཐོག་གནང་བ་ཞིག་ཀྱང་མ་རེད། ང་རང་གི་སེམས་གཏིང་ནས་ཐུགས་རྗེ་ཆེ་ཞུ་རྒྱུ་ཡིན། དེ་རིང་གི་དུས་ཚིགས་ཁྱད་པར་ཅན་འདིའི་ཐོག་ཀར་ན་ཊ་ཀ་མངའ་སྡེ་གཞུང་གི་བློན་ཆེན་མཆོག་གིས་ང་ལ་ཞྭ་མོ་འདི་སྒྲོན་སྐབས། སྔོན་མའི་མཁས་དབང་ཀུ་ཤཱི་ནར་ཡིད་ལ་དྲན་སོང་། ཁོང་རྒྱ་གར་གྱི་གནའ་རབས་རིག་གཞུང་ལ་མཁས་པ་མ་ཟད། ཨོག་སུ་ཧྥོ་ཌི་གཙུག་ལག་སློབ་གྲྭ་ནས་སློབ་སྦྱོང་གནང་སྟེ་མཁས་དབང་ཆགས་ཡོད། ངར་དེ་འདྲ་མེད་ཀྱང་ངས་སློབ་སྦྱོང་བྱས་པའི་གཞུང་གསར་པ་དག་ནི་དཔལ་ནཱ་ལེན་ཊའི་རྒྱ་གར་མཁས་པ་ཚོས་མཛད་པ་རེད། ཁོང་ཅག་མང་ཆེ་བ་རྒྱ་གར་ལྷོ་ཕྱོགས་པ་རེད། དེ་རིང་ངས་ཀྱང་རྒྱ་གར་ལྷོ་ཕྱོགས་ཀྱི་ཞ་མོ་ཞིག་གྱོན་རྒྱུ་བྱུང་བ་སྐལ་བ་བཟང་པོ་རེད། ཅེས་དང་།
ཕྱི་རྒྱལ་སྐུ་མགྲོན་རྣམས་ལ་ཆེད་དམིགས་ཀྱིས་གསུངས་དོན། དེ་རིང་འདིར་རྒྱལ་ཁབ་མང་པོ་ཞིག་གི་སྐུ་མགྲོན་ཕེབས་འདུག ཁྱེད་ཅག་ལ་ཕྱོགས་གཅིག་ནས་དུས་ཚོད་དཀོན་པོ་རེད་ལ། ཕྱོགས་གཞན་ཞིག་ནས་ཆབ་སྲིད་ཀྱི་གནོན་ཤུགས་ཀྱང་ཡོད་པ་རེད། འོན་ཀྱང་བདེན་པར་རྒྱབ་སྐྱོར་བྱེད་པར་སྙིང་སྟོབས་དང་། འཛེམ་ཟོན་མེད་པར་དྲང་བདེན་གྱི་ལངས་ཕྱོགས་བརྟན་པོ་དགོས་པ་རེད། དེ་རིང་ཁོང་རྣམ་པའི་གསུང་བཤད་ཧ་ཅང་དོན་སྙིང་ལྡན་པ་དང་། སྐབས་བབ་ཀྱི་གནས་ཚུལ་ཐོག་ལ་ཏག་ཏག་ཕོག་པ་བྱུང་སོང་། དངོས་གནས་སེམས་ཤུགས་སྐྱེས་པ་དང་། ང་ཚོའི་བདེན་པའི་གནས་ཚུལ་ཇེ་གསལ་ཏུ་བཏང་སོང་། ཐུགས་རྗེ་ཆེ་ཞུ་རྒྱུ་ཡིན། ཁོང་ཅག་ཁ་ཤས་ཤིག་ངོ་ཤེས་རྙིང་པ་རེད། ཐེངས་འདིར་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཆེ་ཁག་དང་ལོ་སྟོང་ཕྲག་རིང་གི་གཙུག་ལག་སློབ་གཉེར་ཁང་ཡོད་ས་ཞིག་ཏུ་འཛོམས་པ་རེད། ང་ཚོ་བཙན་བྱོལ་བ་ཆགས་ཏེ་ལོ་ ༥༡ རིང་བོད་པའི་ཆོས་དང་རིག་གཞུང་། མདོར་ན་རང་ཉིད་ཀྱི་མི་རིགས་གཙང་མ་ཡོང་ཐུབ་པའི་ཆེད་དུ་གཞིས་ཆགས་ཁག་དང་སྤྱི་བའི་སྒྲིག་འཛུགས་བཙུགས་པ་རེད། བོད་རིགས་ན་གཞོན་ཕོ་མོ་ཚོ་ལུས་པོ་འཚར་ལོངས་འབྱུང་གི་ཡོད་པ་དང་ཆབས་གཅིག སེམས་ཀྱི་འཚར་ལོངས་ཉིན་རེ་བཞིན་ཡར་རྒྱས་སུ་འགྲོ་བཞིན་ཡོད་ལ། འདི་དང་མཉམ་དུ་བོད་པའི་རྣམ་པ་ཆ་ཚང་བརླག་མེད་པར་སྲུང་ཡོད། རྒྱ་གར་ཙམ་དུ་མ་ཟད་ཡུ་རོབ་དང་ཨོ་སི་ཁྲི་ལེ་ཡ་སོགས་སུ་བོད་པ་བརྒྱ་ཕྲག་དང་སྟོང་ཕྲག་བསྡད་ཡོད་པ་ཕལ་ཆེ་བའི་སོ་སོའི་མི་རིགས་ཀྱི་རྣམ་པ་བཟུང་བསྡད་ཡོད། བོད་སྐད་ཤེས་མིན་གྱི་དཀའ་ངལ་ཕྲན་བུ་ཡོད་ཀྱང་། རྩ་བའི་བོད་པ་ཡིན་སྙམ་པའི་འདུ་ཤེས་དང་། བོད་པའི་རང་དབང་འཐབ་རྩོད་ཀྱི་སེམས་ཤུགས་ཞེ་དྲག་ཤུགས་ཆེན་པོ་རེད། བོད་པའི་མི་རབས་བརྗེ་བཞིན་ཡོད་ཀྱང་། བོད་པའི་རིག་གཞུང་དང་འཚེ་མེད་ཞི་བའི་ལྟ་གྲུབ། བྱམས་བརྩེ། བདེན་པའི་འཐབ་རྩོད་སོགས་མི་རབས་ནས་མི་རབས་ལ་རྒྱུན་འཛིན་ཐུབ་པ་གཏན་འཁེལ་བ་རེད། ཅེས་གསུངས་སོང་།
ཁོང་གིས་མུ་མཐུད་དུ་གསུངས་དོན། བོད་ནང་ལ་མཚོན་ན་ཡང་དཀའ་ངལ་དཔག་ཏུ་མེད་པ་ཡོད་ཀྱང་། ཅི་ཙམ་གྱི་འཇིགས་སྐྲག་ཡོད་པ་དེ་ཙམ་གྱིས་མི་རིགས་ཀྱི་ལྟ་བ་ཇེ་བརྟན་དུ་འགྲོ་བཞིན་འདུག བོད་པར་རྒྱབ་སྐྱོར་བྱེད་མཁན་ཚོ་ཕྱོགས་སུ་ལྷུང་སྟེ་རྒྱབ་སྐྱོར་བྱས་པ་མ་རེད། བོད་པའི་འཐབ་རྩོད་ཀྱི་བདེན་པ་ལ་རྒྱབ་སྐྱོར་བྱས་པ་རེད། ཁྱེད་ཅག་གིས་ད་བར་རྒྱབ་སྐྱོར་གནང་བ་དེས་བོད་མིའི་སེམས་ཤུགས་གོང་ནས་གོང་དུ་འཕེལ་བར་ཕན་གྱི་ཡོད། འཛམ་གླིང་མི་དམངས་ལ་བོད་པའི་བདེན་དོན་རྟོགས་པར་ཕན་ཐོགས་བྱུང་ཡོད། འཛམ་གླིང་སྤྱིའི་འགྱུར་འགྲོས་དང་བསྟུན་ཏེ་རྒྱ་ནག་ལ་ཡང་འགྱུར་བ་འགྲོ་བཞིན་ཡོད། ཉེ་བའི་ཆ་ལ་རྒྱ་རིགས་ཤེས་ལྡན་མི་སྣ་ཙམ་དུ་མ་ཟད་གུང་ཁྲན་ཏང་གི་ཆབ་སྲིད་དབང་འཛིན་པའི་ནང་དུའང་ཆབ་ཀྱི་འགྱུར་བ་ཞིག་དགོས་པ་དང་། མི་རིགས་སྲིད་ཇུས་ལ་བསྐྱར་ཞིབ་དགོས་ཀྱི་འདུག་ཟེར་མཁན་ཇེ་མང་རེད། དེ་འགྱུར་བ་ཆེན་པོ་རེད། བོད་པའི་གནས་ཚུལ་ལ་ད་བར་འགྱུར་བ་ཕྱིན་མེད་པ་ང་ཚོའི་འཐབ་རྩོད་བདེན་པ་ཉག་གཅིག་ཡིན་པས་རེད། འདི་ང་ཚོའི་ནུས་པ་དང་སྟོབས་ཤུགས་རེད། མེ་མདའ་དང་དྲག་པོའི་སྟོབས་ཤུགས་དེ་འཕྲལ་སེལ་ཙམ་ཡིན་པ་འཛམ་གླིང་སྒྱུ་མའི་གྲོང་ཁྱེར་གྱི་སྡིངས་ཆ་འདིའི་སྟེང་གསལ་བོ་ཆགས་པ་རེད། བདེན་པའི་གནས་ཚུལ་ཐོག་འཐབ་རྩོད་བྱེད་པའི་ནུས་པ་དེ་ནམ་ཡང་བརླག་རྒྱུ་ཡོད་པ་མ་རེད། རྒྱབ་སྐྱོར་གནང་མཁན་ཚོའི་སེམས་ཤུགས་མ་ཆགས་པར་ད་ལྟ་བཞིན་རྒྱབ་སྐྱོར་གནང་རོགས་ཞུ་རྒྱུ་ཡིན་ལ། ང་ཚོ་བོད་མི་ཚོས་ཀྱང་ད་ལྟ་བཞིན་སེམས་ཤུགས་བསྐྱེད་དེ་ཧུར་ཐག་གནང་རོགས་ཞུ་རྒྱུ་ཡིན། ཞེས་གསུངས་སོང་།
མཇུག་ཏུ་༧གོང་ས་མཆོག་གིས་དགོན་པ་གྲྭ་ཚང་རྒྱུ་འབྱོར་ཡོད་རིགས་ཚོས་ཉེ་འཁོར་གྱི་མང་ཚོགས་སྐྱོ་བོའི་རིགས་ལ་རོགས་རམ་གྱི་འགན་འཁྲུ་ཡོད་སྐོར་གསུངས་དོན། དེ་རིང་གི་སྐུ་མགྲོན་ཚོར་ཞུ་འདོད་པ་ཞིག་ལ། ཁྱེད་རང་ཚོ་འདིར་ཕེབས་ཏེ་དགོན་པ་ཁག་གི་འཛུགས་སྐྲུན་མཐོང་སྐབས། བོད་པ་ཚོ་ཕྱུགས་ཐག་ཆོད་འདུག་དྲན་སྲིད་པ་རེད། ངས་ནམ་རྒྱུན་དགོན་པ་གྲྭ་ཚང་ཁག་རྫིག་པོ་རྒྱག་པ་འགྲིག་གི་མི་འདུག་ཅེས་སྐྱོན་བརྗོད་བྱེད་ཀྱི་ཡོད། འོན་ཀྱང་ང་ལ་ཐབས་ཤེས་ཡོད་པ་མ་རེད། ཁོ་རང་ཚོར་སྦྱིན་བདག་རག་སྟེ་སྦྱིན་བདག་གིས་འགྲོ་སོང་བཏང་བ་རེད། ཁྱེད་ཅག་གིས་དགོན་པར་བལྟས་ཏེ་གཞིས་ཆགས་ཡོངས་ལ་དཔེ་འགེབས་བྱ་རྒྱུ་ཡོད་པ་མ་རེད། ས་ཆ་རེ་ཟུང་ནང་ཉམ་ཐག་སྐྱོ་བོ་མང་པོ་ཡོད། ང་གནམ་གྲུའི་ནང་ཡོང་སྐབས། དགོན་པ་གྲྭ་ཚང་ཁག་ཞེ་དྲག་གྲ་རྒྱས་པོ་འདུག་ཀྱང་། ཞིང་ཁའི་དཀྱིལ་རེ་ན་གནའ་སྔ་མོའི་ཁང་པ་རེ་ཟུང་མཐོང་རྒྱུ་འདུག གཞིས་མགོ་དང་ས་གནས་ཀྱི་ཚོགས་པ་སྐྱིད་སྡུག་ཁག་གིས་མི་ཚང་སྐྱོ་བོ་དག་ལ་ལྟ་རྟོགས་ཡག་པོ་མ་བྱས་ན་ཁྱོན་ནས་འགྲིག་གི་མི་འདུག ཕ་མ་བརྒས་གཅོང་དང་། བུ་ཕྲུག་དབང་བོ་སྐྱོན་ཅན་སོགས་ལྷག་ཡོད་རིགས་ལ་དམིགས་བསལ་གྱི་དོ་སྣང་བྱས་ཏེ། ལྟ་རྟོགས་ཡག་པོ་མ་བྱས་བར་སྐྱབས་མེད་མགོན་མེད་དུ་ལྷག་པ་ཡིན་ན། ང་ཚོའི་སྤྱི་ཚོགས་འདི་བྱམས་པ་དང་སྙིང་རྗེའི་སྤྱི་ཚོགས་ཤིག་ཡིན་ཟེར་བ་དེ་དོན་ལ་མ་གནས་པ་རེད། ཁྱེད་ཅག་དགོན་པ་གྲྭ་ཚང་དངུལ་ཅུང་ཡོད་པ་དག་གིས་དཀའ་ངལ་ཅན་དག་་ལ་ལྟ་རྟོགས་བྱ་རྒྱུར་ལས་འགན་ཡོད་པ་རེད། དགོན་པ་འཛུགས་སྐྲུན་དང་ཆབས་ཅིག་སློབ་གཉེར་ལ་ཤུགས་རྒྱག་དགོས་པ་རེད། དེ་དང་མཉམ་དུ་ཉེ་འཁོར་གྱི་སྐྱོ་བོའི་རིགས་ལ་རོགས་རམ་བྱས་ན། བཅོམ་ལྡན་འདས་ཀྱི་དགོངས་པ་དང་མཐུན་གི་རེད། ཁྱེད་ཅག་དགོན་པ་གྲྭ་ཚང་ཁག་ལ་སྦྱིན་བདག་མང་པོ་འདུག ཁོང་ཚོར་འབོད་སྐུལ་ཞུས་ཏེ་མི་ཚང་སྐྱོ་བོའི་རིགས་ལ་རོགས་རམ་བྱ་རྒྱུར་འབོད་སྐུལ་ཞུ་དགོས། ཞེས་གསུངས་སོང་།
༼ གསར་འགོད་པ་དོན་འགྲུབ་བཀྲ་ཤིས་ཀྱིས་རྒྱ་གར་ལྷོ་ཕྱོགས་སེ་ར་ཐེག་ཆེན་གླིང་ནས་སྤེལ ༽
རྒྱལ་བ་མགྱེས་པའི་མཆོད་པ་ངོ་མ་དེ་བཀའ་སྲུང་ཅི་སྒྲུབ་དེ་རེད།།་
ཕྱག་ན་པདྨོའི་རྣམ་སྤུལ་༸གོང་ས་ལྷ་མིའི་རྣམ་འདྲེན་རྒྱལ་དབང་སྐུ་ཕྲེང་བཅུ་བ་པ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་འཚེ་མེད་ཞི་བའི་ལྟ་གྲུབ་དང་འཛམ་གླིང་ཞི་བདེའི་བསྟི་གནས་ཤིག་ཏུ་བསྒྱར་བའི་མཛད་འཕྲིན་རླབས་ཆེན་དེ་ལ་བོད་གཞུང་དམངས་གཉིས་ཀྱིས་དགའ་དད་སྤྲོ་གསུམ་གྱིས་བཀའ་དྲིན་རྗེས་དྲན་དུ་གསེར་གྱི་རྟགས་མ་ཕུལ་བ་ལ་བཀྲ་ཤིས་བདེ་ལེགས་གྲངས་མེད་ཞུ་རྒྱུ་ཡིན།།
དད་གུས་སྤྲོ་གསུམ་གྱི་སྒོ་ནས་བཀྲ་ཤིས་བདེ་ལེགས་གྲངས་མེད་ཞུ་ཞུ་ཞུ།།
༧གོང་ས་མཆོག་གིས་གསེར་གྱི་གཟིངས་རྟགས་བཞེས་པར་སྙིང་ནས་དགའ་དད་སྤྲོ་གསུམ་བརྟས། ཁོང་སྐུ་ཚེ་མི་འཇིག་རྡོ་རྗེའི་ངོ་བོར་བཞུགས་ཤིང་། མཛད་འཕྲིན་འཇིག་རྟེན་སྲིད་པ་གསུམ་དུ་ཁྱབ་གྱུར་ཅིག །བླ་མ་མཁྱེན་ནོ་འཕགས་མཆོག་ཕྱག་ན་པད་མོ་ཁྱེད་མཁྱེན་ནོ།།
འཛམ་བུ་གླིང་དུ་འགྲོ་བའི་དོན་བྱེན་པ།།
འགྲོ་དོན་རྒྱུན་མི་ཆད་པའི་ཐུགས་རྗེ་ཅན།།
འདི་དང་ཕྱི་མའི་སྐྱབས་མགོན་མ་ཆུང་ཞིག།།
བསམ་པའི་དོན་ཀུན་འགྲུབ་པར་བྱེན་གྱིས་རློབས།།
༧གོང་ས་མཆོག་ལ་བཀའ་དྲིན་རྗེས་དྲན་གསེར་གྱི་གཟེངས་རྟཊ་ཕུལ་བ་ལ་དགའ་དད་སྤྲོ་གསུམ་གྱིས་ངང་ནས་བརྟེན་འབྲེལ་ཞུ་།།
༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནས་མང་གཙོའི་གཟེངས་རྟགས་ཞེས་གནང་བར་འཚམས་དྲིན་བཀྲ་ཤིས་བདེ་ལེགས་གྲང་མེད་ཞུ་བ་དང་ཆབ་གཅིག་བོད་རྒྱཆེའི་མི་དམངས་ལ་ཡང་ཐུགས་རྗེ་ཆེ་ཞུ།།
༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཐུགས་ཧ་ཅང་དགྱེས་ཚོར་བྱུང་བ་འདི་ནི་རང་ཅག་རྣམས་ཀྱིས་དོན་དམ་གྱི་བརྟན་བཞུགས་ཞིག་ཡིན་ལགས།
བཀྲ་ཤིས་གནམ་ལ་གཟའ་སྐར་བཟང་།།
བཀྲ་ཤིས་བར་སྣང་འཇའ་ཚོན་བཀྲ།།
བཀྲ་ཤིས་ས་ལ་དགེ་བཅུ་འཛོམས།།
བཀྲ་ཤིས་གསེར་གྱི་གཟེངས་རྟགས་ཕུལ།།
༸གོང་ས་མཆོག་ལ་བཀའ་དྲིན་རྗེས་དྲིན་
མཚོན་ཕྱིར་དུ་གུས་པས་ལྷ་ཕྱག་དང་བཅས།
ཕྱི་ལོ་༢༠༡༠ ༩ ༢ཉིན།
རྒྱལ་བའི་དགོངས་པ་ནམ་མཁའི་མཁའ་ལྟར་ཡངས།།
བྱམས་དང་སྙིང་རྗེས་འགྲོ་རྣམས་མ་ལྟར་སྐྱོང་།།
ས་ཡ་དྲུག་གིས་བཏེགས་པའི་སེམས་པའི་རྟེན།།
དགྱེས་བཞེས་མཛོད་ལ་སྐུ་ཚེ་བརྟན་གྱུར་ཅིག།
༧གོང་ས་མཆོག་ལ་བརྟེན་འབྲེལ་ཞུ་བ་དང་ཆབ་གཅིག་བོད་མི་རྣམས་ཀྱིས་
༧གོང་ས་མཆོག་གི་བཀའ་སློབ་ལམ་བསྟོན་རྣམས་ལག་ལེན་ཐུབ་ཐབས་བྱེད་རོག་ཞུ། བཀྲ་ཤིས་བདེ་ལེགས།
རྟེན་འབྲེལ་ཞུ། རྟེན་འབྲེལ་ཞུ། གཞིས་བཞུགས་ཚོས་ཚབ་ཞུས་ཏེ་རྟེན་འབྲེལ་ཞུ།
འོ་ད་ཡིན་ན་བཀའ་གསུང་ནན་མོ་གསུངས་འདུག་ག
༸གོང་ས་མཆོག་གིས་ཁྱེད་ཅག་དགའ་དད་སྤྲོ་གསུམ། དད་པ་དང་དམ་ཚིག་གཡོ་བ་མེད་པའི་ཐོག་ནས་གནང་བ་རེད། འདྲ་ཆགས་པོ་བྱས་ཏེ་གནང་བ་མ་རེད་ལ། མི་གནང་ཀ་མེད་ཐོག་གནང་བ་ཞིག་ཀྱང་མ་རེད། ང་རང་གི་སེམས་གཏིང་ནས་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་ལྟར་ང་ཚོ་ཚང་མས་འདི་ལྟ་བུའི་དགའ་སྟོན་ལ་ལྟ་ཐུབ་པ་ནི་ཧ་ཅང་དགའ་སྤྲོ་སྐྱེ་འོས་པ་ཞིག་རེད། འོན་ཀྱང་སེམས་སྐྱོ་བ་ཞིག་ལ་གཞིས་ལུས་རྒྱ་ཆེ་མང་ཚོགས་ལ་འདི་ལྟ་བུའི་སྤྲོ་སེམས་ཡོད་ཀྱངཕྱིར་མངོན་དབང་མེད་པ་རེད།
རྟེན་འབྲེལ་ཞུ།
དགའ་དད་སྤྲོ་གསུམ་གྱིས་ངང་ནས་རྟེན་འབྲེལ་ཞུ