རྒྱ་ནག་གིས་བོད་དུ་འཛུགས་སྐྲུན་རྒྱ་སྐྱེད་ཀྱི་ལས་འཆར་ཁྲོད་ཡར་ལུང་གཙང་པོའི་འགྲམ་དུ་ཨ་སྒོར་ཐེར་འབུམ་མང་པོའི་འགྲོ་གྲོན་བཏང་ནས་རྒྱལ་སྤྱིའི་ཡུལ་སྐོར་བར་དམིགས་ཏེ་སྐར་མ་ལྔ་རྟགས་ཅན་གྱི་མགྲོན་ཁང་ཞིག་བརྒྱག་འཆར་འདུག
མགྲོན་ཁང་དེ་ནི་ནག་ཆུ་ས་ཁུལ་གྱི་དཔལ་འཛིན་གྲོང་ཁྱེར་གྱི་རི་སྟེང་དུ་བརྒྱག་འཆར་ཡོད་ཅིང་། ས་ཆ་དེ་ནི་རང་བྱུང་གི་མཛེས་བཀོད་ཤིན་དུ་ལེགས་པ་མ་ཟད། དུས་རྒྱུན་རྒྱལ་སྤྱིའི་ཡུལ་སྐོར་བ་འགྲོ་ས་ཤིག་ཀྱང་ཡིན།
བོད་ཁུལ་ཡུལ་སྐོར་སྤྲོ་འཆམ་པའི་ལས་ཁུངས་ཀྱི་ཚོགས་གཙོ་ལེའོ་ཇ་ནེ་ཡོན་ཞེས་བས་ཞིན་ཧྭ་གསར་འགྱུར་ཁང་དུ། ཁོ་ཚོས་ནག་རྫས་ཉུང་ཞིང་ཁོར་ཡུག་ལ་མི་གནོད་པའི་འགན་ཁུར་འོག་མགྲོན་ཁང་འདི་འཛུགས་སྐྲུན་ལེགས་འགྲུབ་ཡོང་བར་བྱ་རྒྱུ་ཡིན་ཞེས་བརྗོད་འདུག
ཡར་ལུང་གཙང་པོ་དང་། པོ་ཏ་ལ། ཇོ་མོ་གླང་མ་བཅས་གསུམ་ནི་བོད་ཡུལ་གྱི་རྒྱལ་སྤྱིའི་ཡུལ་སྐོར་སྤྲོ་འཆམ་པའི་འགྲོ་ཡུལ་ཤུགས་ཆེ་ཤོས་གསུམ་ཡིན་ཞིང་། ཡར་ལུང་གཙང་པོ་ནི་མཐོ་སྒང་ནས་འབབ་པའི་འཛམ་གླིང་ནང་གི་རྒྱུགས་ཆུ་རིང་ཤོས་དེ་ཡང་ཡིན། གཙང་པོ་འདི་རྒྱ་གཞུང་གིས་ཆུ་མཛོད་མང་ཤོས་རྒྱག་སའི་ཆུ་བོ་ཞིག་ཀྱང་ཡིན་པར་བཤད།
རྒྱ་ནག་གཞུང་གིས་བོད་ནང་འཛུགས་སྐྲུན་རྒྱ་སྐྱེད་དང་རྒྱ་རིགས་ཕོན་ཆེན་བོད་དུ་གནས་སྤོས་ཀྱིས་གཏེར་ཁ་སྔོག་འདོན་དང་། བོད་ས་མཁོ་སྤྱོད་ཤུགས་ཆེར་བྱེད་ཀྱིན་པ་དེས་ས་གནས་བོད་རིགས་དང་རྒྱ་རིགས་གནས་སྤོ་བའི་བར་ལ་འགལ་རྐྱེན་བཟོ་བཞིན་ཡོད་ལུགས་ཞིན་ཧྭ་གསར་འགྱུར་ཁང་ནས་གནས་ཚུལ་སྤེལ་ཡོད། གསར་ཁང་དེ་གས། ཉེ་བའི་ཆར་རྒྱ་གཞུང་གིས་བོད་དུ་འཛུགས་སྐྲུན་རྒྱ་སྐྱེད་ལག་བསྟར་བྱས་ཁུངས་སུ་རྒྱ་ནག་ནས་བོད་ལ་མེ་འཁོར་ལྕགས་ལམ་དང་། གཞུང་ལམ། གནམ་ཐང་བཞི་འཛུགས་བསྐྲུན་བྱས་ཡོད་ཚུད་བརྗོད།
འདི་ལོའི་ལོ་སྟོད་དུ་རྒྱ་ནག་དབུས་གཞུང་གི་བོད་ཁུལ་འཕེལ་རྒྱས་བཞུགས་མོལ་ཚོགས་ཆེན་སྟེང་། བོད་ས་ཡར་རྒྱས་གཏོང་བའི་ཐད་བོད་ཡུལ་འདི་འཛམ་གླིང་ཡུལ་སྐོར་སྤྲོ་འཆམ་པའི་རྟེན་གཞིའི་ས་ཁུལ་ཞིག་ཏུ་འཛུགས་སྐྲུན་བྱ་འཆར་གྱི་ཐག་གཅོད་བྱུང་ཡོད་པར་བརྗོད་འདུག
ལེའོ་ཇ་ནེ་ཡོན་གྱིས། ཡར་ལུང་གཙང་པོའི་འགྲམ་དུ་བརྒྱག་འཆར་ཡོད་པའི་སྐར་མ་ལྔ་རྟགས་ཅན་གྱི་མགྲོན་ཁང་འདི་གཙོ་བོ་བོད་ཀྱི་རིག་གཞུང་དང་ཡུལ་སྲོལ་གོམས་གཤིས་ཀྱི་ཁྱད་ཆོས་གཞིར་བཞག་ཐོག བཟོད་བཀོད་འཛུགས་སྐྲུན་བྱ་རྒྱུ་ཡིན་ལུགས་ཀྱང་བརྗོད་ཡོད།
ད་ལྟའི་ཆར་ནག་ཆུའི་དཔལ་འཛིན་གྲོང་ཁྱེར་དེར་སྐར་མ་རྟགས་ཅན་གྱི་མགྲོན་ཁང་མེད་པར་མ་ཟད། དེར་ཡོད་པ་དེ་ཚོ་མི་ ༣༠༠ ལས་མི་བཤོང་པའི་འགྲུལ་ཁང་ཆུང་ཆུང་ཁག་ཅིག་ཡིན་པར་བཤད་འདུག
གསར་འགོད་པ། བནྡེ་སྐྱབས།
སྐར་ལྔའི་མགྲོན་ཁང་།
སྐར་བཞིའི་མགྲོན་ཁང་།
སྐར་གསུམ་མགྲོན་ཁང་།
སོགས་ངག་ལ་འཇགས་བདེ་བ་འདུག
བོད་ཀྱི་ཁྱད་ཆོས་ཞེས་བརྗོད་ཁུལ་བྱས་ཡོད་ཀྱང་ཕྱི་ཤུན་མཛེས་ཀྱང་ནང་སྙིང་མེད་པ་ཞིག་ཡིན་རྒྱུ་རེད་ཀོ
ཨོ་རེད། སྐར་མ་ལྔ་རྟགས་ཅན་ཟེར་དགོས་སམ། སྐར་ལྔ་རིམ་པ་ཟེར་དགོས་སམ། སྤྱིར་བཏང་དུ་ཡིག་ལོག་ཉུང་དུ་གཏོང་བ་དང་། བརྗོད་པ་ཇེ་བདེར་གཏོང་བ་གཉིས་ཀྱི་ཕྱོགས་ལ་ཁྱེད་རྩོམ་སྒྲིག་ཁང་གིས་ཤུགས་སྣོན་གསར་པ་ཞིག་བྱེད་དགོས་ཀྱི་འདུག གསར་འགྱུར་གྱི་བརྗོད་པ་དེ་ཚོ་ནར་ནར་ལྕེ་དང་། གོར་གོར་ཁ་ནས་འབྱིན་དཀའ་བ་དེ་འདྲ་ག་རེ་རེད།