རྒྱ་ནག་གཞུང་གིས་བོད་ཀྱི་གདན་ས་ཆེན་མོ་ས་སྐྱ་དགོན་པའི་ཐོས་བསམ་གླིང་དགོན་པ་ས་གནས་གཞན་དུ་གནས་སྤོར་ལེགས་འགྲུབ་བྱུང་བའི་དབུ་འབྱེད་མཛད་སྒོ་འཚོགས་འདུག
རྒྱ་ནག་ཞིན་ཧྭ་གསར་ལམ་དུ་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༥ ཉིན་གྱི་སྔ་དྲོར་བོད་རང་སྐྱོང་ལྗོངས་ཀྱི་གཞིས་ཀ་རྩེ་ས་ཁུལ་ས་སྐྱ་རྫོང་དུ་ཡོད་པའི་གདན་ས་ཆེན་མོ་ས་སྐྱ་དགོན་པའི་ཐོས་བསམ་གླིང་དགོན་པ་ས་གནས་གཞན་དུ་གནས་སྤོར་ལེགས་འགྲུབ་བྱུང་བའི་མཛད་སྒོ་ཞིག་བསྡུས་འདུག་ལ། མཛད་སྒོའི་སྟེང་བོད་རྒྱུད་ནང་བསྟན་གྱི་བླ་སྤྲུལ་དང་རྒྱ་ནག་གཞུང་གི་གནད་ཡོད་མི་སྣ་སོགས་གདན་ཞུ་གནང་ཡོད་འདུག ལས་གཞི་འདི་ ༢༠༠༥ ལོའི་ཕྱི་ཟླ་ ༥ བའི་ནང་རྒྱ་ནག་གཞུང་གིས་ས་གནས་ཡུལ་མི་མོས་མཐུན་ཡོད་མེད་ལ་མ་ལྟོས་པར་རྒྱ་སྒོར་ཁྲི་ ༩༦༢ ལྷག་གི་འགྲོ་གྲོན་བཏང་སྟེ་མི་ལོ་ལྔའི་རིང་ཞིག་གསོ་བྱས་ཡོད་པ་དང་། ཐེངས་འདིར་ས་སྐྱ་དགོན་ཐོས་བསམ་གླིང་གི་རྒྱ་ཁྱོན་ལ་རྨི་གྲུ་བཞི་མ་ ༡༌༢ དང་། ཁང་པའི་རྒྱ་ཁྱོན་ལ་རྨི་གྲུ་བཞི་མ་ ༥༠༠༠ ལྷག་ཡོད་ཚུལ་བརྗོད་འདུག
དེ་བཞིན་གནས་ཚུལ་དེའི་ནང་། རྒྱ་ནག་གཞུང་གིས་ཞིག་གསོ་བྱས་པའི་དགོན་པའི་རྡོ་དང་ཤིང་གི་བརྐོས་རིས། རི་མོ་སོགས་བོད་བརྒྱུད་ནང་བསྟན་གྱི་སྲོལ་རྒྱུན་ཁང་པའི་བཟོ་བཀོད་སྒྱུ་རྩལ་དང་དེང་རབས་བཟོ་ལས་ལག་རྩལ་ཟུང་འབྲེལ་ཐོག་བཟོས་ཡོད་ཚུལ་བརྗོད་ཡོད་འདུག་ལ། ཁང་པའི་བཟོ་བཀོད་ཡོངས་རྫོགས་བོད་རང་གི་ཁྱད་ཆོས་འབུར་དུ་བཏོད་ཡོད་ཚུལ་བརྗོད་ཡོད་པར་མ་ཟད། དེང་རབས་བཟོ་བཀོད་ཀྱི་ཁྱད་ཆོས་ཀྱང་ཞོར་དུ་མངོན་ཡོད་སྐོར་བརྗོད་འདུག ད་ལྟའི་ཆར་ས་སྐྱ་དགོན་ཐོས་བསམ་གླིང་དུ་མཚོ་སྔོན་དང་སི་ཁྲོན་གཙོས་བོད་ཁུལ་གྱི་དགོན་སྡེ་ཁག་ནས་ཡོང་བའི་དམའ་རིམ་དང་འབྲིང་རིམ། མཐོ་རིམ་བཅས་ཀྱི་སློབ་མ་ ༢༠༠ ལྷག་ཡོད་ཟེར།
ས་སྐྱ་བའི་གྲུབ་མཐའ་ནི་བོད་བརྒྱུད་ནང་བསྟན་གྱི་གྲུབ་མཐའ་ཆེན་མོ་བཞིའི་ཡ་གྱལ་ཡིན་ལ། ས་སྐྱ་དགོན་ནི་གྲུབ་མཐའ་དེའི་དགོན་པ་ཐོག་མ་ཡིན། བོད་རབ་བྱུང་དང་པོའི་ཆུ་གླང་སྤྱི་ལོ་ ༡༠༧༣ ལོར་འཁོན་དཀོན་མཆོག་རྒྱ་པོས་དགེ་མཚན་དུ་མར་དམིགས་ཏེ་དགོན་པ་ཕྱག་བཏབ་ཡོད་ཅིང་། ཕྱིས་སུ་ཡུལ་དེའི་སའི་ཁ་དོག་ལ་གཞིགས་ཏེ་ས་སྐྱ་དགོན་ཞེས་བཏགས་ཡོད་པ་རེད། བོད་ཀྱི་ཆབ་སྲིད་ཀྱི་སྲིད་དབང་འཐབ་རྩོད་ཀྱི་སྐབས་སུ་སྔ་ཕྱི་ཐེངས་ཁ་ཤས་ཤིག་ལ་རྒྱ་སྐྱེད་སླར་གསོ་གནང་ཡོད་ཀྱང་། དགོན་པ་དེའི་ནང་བོད་ཀྱི་རྩ་ཆེ་བའི་རྟེན་ཡོན་དང་མིང་རྒྱལ་རབས་སྐབས་ཀྱི་དམ་ཆོས་པོ་ཏི་བགྲངས་ལས་འདས་པ་ཡོད་པ་དང་། གཞན་གསོ་བ་རིག་པ་དང་གནམ་རིག་སྐར་རྩིས། རྣམ་ཐར། རྟོགས་བརྗོད། ཚད་མའི་གཞུང། བོད་ཀྱི་བརྡ་སྤྲོད་བཅས་ཀྱི་དཔེ་ཆ་མང་པོ་ཡོད་པ་སོགས་ཀྱི་དབང་གིས་རྒྱ་ནག་གཞུང་གི་རྒྱལ་ཡོངས་ཀྱི་གཙོ་གནད་རིག་དངོས་སྲུང་སྐྱོབ་སྡེ་ཚན་གྱི་གྲས་སུ་བཞག་ཡོད་སྐོར་བརྗོད་ཀྱིན་ཡོད་ལ། ད་ལྟའི་བར་ལོ་ངོ་ ༩༠༠ ལྷག་གི་ལོ་རྒྱུས་ཡོད་པ་རེད།གསར་འགོད་པ། དོན་གོ།
དྲ་གྲོགས་རྣམ་པ་ལགས། གནས་ཚུལ་འདི་འབྲི་མཁན་དང་སྤེལ་མཁན་གྱི་བར་གོ་ནོར་བྱུང་བའི་དབང་གིས་ནོར་འཁྲུལ་བཟོས་འདུག་སྟབས། ཚང་མས་འཛུབ་སྟོན་གནང་བར་ཐུགས་རྗེ་ཆེ་ཞུ་རྒྱུ་ཡིན།
ད་ལྟ་བཟོ་བཅོས་བརྒྱབ་ཡོད། གནས་གང་དང་གང་དུ་སྤོར་ཡོད་མེད་གནས་ཚུལ་ཡོངས་ཁུངས་ཀྱི་ནང་དུའང་གསལ་ཁ་མི་འདུག གལ་སྲིད། འདིའི་ཐད་ཀྱི་གནས་ཚུལ་གསལ་བོར་ཤེས་ཚེ་དུས་ལྟར་མཁོ་སྤྲོད་བྱ་ངེས་ཡིན།
ཐུགས་རྗེ་ཆེ།
གསར་འགོད་པ་རེ་ཟུང་གིས་གསར་འགྱུར་འགོད་ཐུབ་ཙམ་ལས་རང་གི་བཤད་པར་འགན་རྩ་བ་ནས་འཁྱེར་གྱི་མི་འདུག ང་ཚོའི་དོགས་དྲི་ཁག་ལ་ལན་འདེབས་མེད་པ་དེ་དྲི་བ་ཆུང་དྲག་པའི་རྐྱེན་གྱིས་ཡིན་ནམ་རྒྱུ་རྐྱེན་གཞན་ཞིག་ཡིན།
འདིའི་གནས་ཚུལ་དེ་གསར་འགོད་པ་དོན་གོ་ལགས་ལ་བཀའ་འདྲི་དང་དོག་ཅོད་གནང་དགོས་འདུག་གཞན་དུས་བབ་ཚང་ལས་བྱེད་ཚང་མ་ལ་ཉག་ཉེས་འདི་འགེལ་ཐབས་མི་འདུག་
གནས་ཚུལ་འདི་ལ་གསལ་ཁ་མི་འདུག ཤེལ་དཀར་བློ་བཟང་ལགས་ཀྱི་གསུངས་པ་བཞིན་རེད་འདུག གསར་འགྱུར་འདི་ངས་ཐེངས་གཉིས་ཙམ་བཀླགས་ཀྱང་ཁ་བྱང་དང་ནང་དོན་གཉིས་མི་མཐུན་པ་དེས་དོགས་འཆར་མང་དུ་བཏང་བྱུང་། དེས་ན་གསར་འགོད་ལགས་ཀྱིས་འདི་ལ་གསར་བཤད་ཅིག་ཡོད་པར་ཞུ། བཀའ་དྲིན་ཆེ།
ས་སྐྱ་དགོན་པ་གནས་སྤོར་
ཞིག་བྲིས་འདུག་པའི་ལམ་སེང་འགོ་བརྗོད་དེ་ཀློག་དུས་ལ་འཛམ་གླིང་འདི་ཡིས་ཐོག་ས་སྐྱ་དགོན་པ་བརྒྱ་ཕྲག་སྟོང་ཕྲག་མང་པོ་ཡོད་པའི་ནང་ནས་གང་དེ་ཡིན་ཤེས་མ་སོང་། བོད་དང་རྒྱ་གར། རྒྱ་ནག བལ་ཡུལ། འབྲུག་བཅས་གཙོས་འཛམ་གླིང་རྒྱལ་ཁབ་ཁག་དྲུག་ཅུ་ལྷག་ཙམ་ནང་ས་སྐྱ་དགོན་པ་ཡོད་ཤག གང་ཡིན་ཞེ་ན་བོད་འབངས་གཙན་བྱོལ་དུ་འབྱོར་ནས་བཟུང་ནང་ཆོས་འདི་འཛམ་གླིང་ཐོག་དར་ཡོད། དེ་བཞིན་བོད་ལ་གྲུབ་མཐའ་བཞི་ཡོད་པའི་ནང་ནས་ས་སྐྱ་གདན་ས་དེ་ནི་སྤྲུལ་པའི་ལྷ་ཁང་ཆེན་པོ་ཞིག་པ་དེ་ཡིན་པ་གོ་མྱོང་། དེ་ནི་གངས་ཅན་ལྗོངས་གྱིས་རྡོ་རྗེ་གདན་ཡིན་དུས་དུས་ནམ་ཡང་སྤོར་མི་ནུས།
མདོར་དོན་ས་སྐྱ་དགོན་པ་ས་གནས་གཞན་དུ་གནས་སྤོ་བྱས་པ་ཡིན་ནམ་ས་ཆ་དེ་རང་དུ་ཞིག་གསོ་བྱས་པ་རེད།
གོང་དུ་༼ས་སྐྱ་དགོན་ཐོས་བསམ་གླིང་དགོན་པ་ས་གནས་གཞན་དུ་གནས་སྤོར་ལེགས་འགྲུབ་བྱུང་བའི་མཛད་སྒོ་ཞིག་བསྡུས་འདུག་ལ།༽
འོག་ཏུ་༼རྒྱ་སྒོར་ཁྲི་ ༩༦༢ ལྷག་གི་འགྲོ་གྲོན་བཏང་སྟེ་མི་ལོ་ལྔའི་རིང་ཞིག་གསོ་བྱས་ཡོད་པ་དང་། ༽ཞེས་གསུངས་འདུག། ས་གནས་གཞན་དུ་གནས་སྤོས་བྱས་ན་ས་ཆ་གང་ནས་གང་དུ་སྤོས་པ་ཡིན་མིན་ཁ་གསལ་ཞིག་གསུངས་རོགས།