ང་ལ་བཀའ་བློན་ཁྲི་པའི་འོས་ཤོག་ལྡུག་རོགས།

ཁ་སང་དགོང་མོར་ངྷ་ས་བོད་གཞུང་ཟློས་གར་ཁང་དུ་བཀའ་བློན་ཁྲི་པའི་སྐོར་ལ་བགྲོ་གླེང་ཆེན་མོ་ཞིག་བྱས་ཡོད་ཅིང་། བགྲོ་གླེང་དེའི་ཐོག་སྤྱི་ཚོགས་ནང་གླེང་སློང་ཤུགས་ཆེ་ཤོས་གྲས་སུ་སླེབས་པ་བཀྲས་མཐོང་བསྟན་འཛིན་རྣམ་རྒྱལ་དང་བློ་བཟང་སེང་གེ སྤེན་པ་ཚེ་རིང་། རྒྱ་རི་སྒྲོལ་མ་བཞི་ཡིས་རང་རང་གི་ལྟ་བ་ལངས་ཕྱོགས་དང་། བཀའ་བློན་ཁྲི་པའི་རྐུབ་སྟེགས་རག་སྐབས་ལས་འཆར་གང་འདྲ་ཡོད་མེད་སོགས་ངོ་སྤྲོད་གནང་ཡོད།

ཁ་སང་ཕྱི་དྲོའི་ཆུ་ཚོད་ ༦ པའི་སྟེང་བོད་གཞུང་ཟློས་གར་ཁང་དུ་མང་གཙོ་གོང་འཕེལ་ན་གཞོན་དང་བླངས་རུ་ཁག་དང་ཕ་ཡུལ་དྲ་ཟུང་འབྲེལ་ཐོག ཕྱི་ལོ་ ༢༠༡༡ ལོའི་བཀའ་བློན་ཁྲི་པའི་སྐོར་གྱི་བགྲོ་གླེང་ཆེན་མོ་ཞིག་གོ་སྒྲིག་ཞུས་ཡོད་ཅིང་། གདན་ཞུའི་སྐུ་མགྲོན་དུ་བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་དང་ཁྲིམས་རྩོད་པ་བློ་བཟང་སེངྒེ། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་། ཚོགས་གཞོན་རྒྱ་རི་སྒྲོལ་མ་བཅས་ཕེབས་འདུག ཐོག་མར་ཁོང་རྣམ་པས་བཀའ་ཁྲིའི་ལས་འགན་སྐོར་ལ་སྐར་མ་བརྒྱད་རེར་གཏམ་བཤད་གནང་རྗེས་མང་ཚོགས་ཀྱི་དྲི་བར་ལན་འདེབས་བྱས་ཡོད། ཐེངས་འདིའི་བཀའ་ཁྲིའི་བགྲོ་གླེང་ཐོག་ངྷ་ས་བཞུགས་སྒར་ཁུལ་གྱི་བོད་མི་སྟོང་ཕྲག་མང་བོ་འདུ་འཛོམས་བྱུང་སྟེ། ཟློས་གར་ཁང་གི་ཚོགས་ཁང་ཆེན་མོ་ཁེངས་ཡོད་པར་མ་ཟད། ཕྱི་ཕྱོགས་ཀྱི་རྩེད་ཐང་དུའང་ལྟ་ཉན་བྱེད་མཁན་གྱི་མི་མང་རྣམས་འཚང་ཁ་ཤིག་ཤིག་གིས་བཀའ་ཁྲིའི་བགྲོ་གླེང་འདིར་དོ་སྣང་ཆེན་པོས་མཉམ་ཞུགས་བྱས་ཡོད་ལ། ཕ་ཡུལ་དྲ་རྒྱ་བརྒྱུད་ཐད་གཏོང་བྱས་ཏེ། ཨ་རི་དང་ཕྱི་རྒྱལ་ཡུལ་གྲུ་ཁག་གི་བོད་མི་མང་པོས་བགྲོ་གླེང་གི་ཆ་ཤས་བཞེས་ཐུབ་པ་བྱུང་ཡོད། ཐེངས་འདིའི་བགྲོ་གླེང་དེ་ནི་ལོ་རྒྱུས་ཐོག་གི་བཀའ་བློན་ཁྲི་པའི་སྐོར་གྱི་བགྲོ་གླེང་འཁྲུགས་ཆ་དོད་ཤོས་དེ་ཆགས་ཏེ། ཕྱི་དྲོའི་ཆུ་ཚོད་ ༦ ནས་དགོང་མོའི་ཆུ་ཚོད་ ༩ བར་བཀའ་ཁྲིའི་འོས་མི་རྣམས་ཚ་འདེད་བྱས་ཡོད།

བློ་བཟང་སེངྒེ་ལགས་ཀྱིས་ཁོང་བཀའ་ཁྲིར་བསླེབ་ན་བསྒྲུབ་བྱ་གསུམ་ཡོད་ཅེས་གསུངས་ལ། དེ་དག་ནི་ཆིག་སྒྲིལ་དང་གསར་བཏོད། རང་མགོ་རང་ཐོན་བཅས་རེད། ཁོང་གིས་འགྲེལ་བཤད་བསྐྱོན་དོན། གཅིག་སྒྲིལ་ནི་ཆོལ་ཁ་དབྱེར་མེད་དང་ཆོས་ལུགས་རིས་མེད། ཕོ་མོ་དབྱེར་མེད་བཅས་ལ་གོ་དགོས། ང་ཚོ་བཙན་བྱོལ་དུ་ཡོང་མཁན་ཐོག་མ་མ་རེད་ལ་མཐའ་མའང་མ་རེད། དཔེ་ཡག་པོར་ལྟ་རྒྱུ་ཡོད་ལ་སྡུག་པོར་ཡང་ལྟ་རྒྱུ་ཡོད། གང་འདྲ་ཞིག་ཏུ་འགྲོ་མིན་ང་ཚོ་རང་ལ་རག་ལས་ཡོད། དཔེ་ཡག་པོར་ལྟ་གི་ཡིན་ན་མི་རིགས་དཀར་པོ་མང་བའི་ལུང་པ་ཨ་རི་ན་མི་རིགས་ནག་པོའི་སྲིད་འཛིན་བདམས་ཡོད། དེ་བཞིན་པ་ལི་སི་ཐན་ལ་བལྟས་ན། ཧི་མ་སི་དང་ཧྥ་པ་སི་བར་དུ་དམག་འཁྲུག་བྱང་སྟེ་མི་གསོད་ཁྲག་སྦྱོར་བྱས་པ་རེད། དེ་དཔེ་སྡུག་པོ་རེད། དེར་བརྟེན་ལོ་ལྔ་བཅུའི་རྗེས་དང་། དུས་རབས་ཉེར་གཅིག་འདིར་ད་དུང་ཞེན་ཁོག་དང་ཆོས་བརྒྱུད་དབྱེ་འབྱེད། ཕོ་མོ་དབྱེ་འབྱེད་བྱས་ན་ང་ཚོ་དུས་རབས་བཅུ་དགུ་བར་ཕྱིར་ནུར་བྱེད་ཀྱིན་པ་ལས་དུས་རབས་ཉེར་གཅིག་པར་འགྲོ་གི་མེད།

གསར་བཏོད། གཞི་རྩའི་བཙན་བྱོལ་གཞུང་དུ་ལོ་ལྔ་བཅུའི་རིང་ལས་འགུལ་མང་བོ་སྤེལ་ཡོད། དེ་དག་མུ་མཐུད་དེ་གནས་དགོས་ལ་ཡར་རྒྱས་གཏོང་དགོས། ཡིན་ནའང་། བཀའ་ཤག་གསར་བར་བསྐྱར་ཞིབ་བྱེད་སྐབས་ཆད་པ་དང་ལྷག་པ་ལྟ་བུ་ཡོད་ཚེ། གསར་བཏོད་ཐོག་དེང་དུས་དང་བསྟུན་ནས་གོ་སྐབས་འཇུས་ཏེ་ཡར་རྒྱས་གཏོང་རྒྱུ་གལ་ཆེན་པོ་རེད། རང་མགོ་རང་ཐོན། ལོ་ལྔ་བཅུའི་རིང་ཕྱི་ལ་མང་བོ་རེ་བསྡད་པ་དང་ཕྱི་ལ་བསྟུན་དགོས་བྱུང་ཡོད། ང་ཚོའི་ཕ་མ་རྒས་འཁོགས་ཚོ་དང་ཐོག་འདིར་ཡོང་དུས་རྒྱ་གར་སྐད་ཤེས་ཀྱི་མེད་ལ། ཕར་ཚུར་འགྲོ་སྟངས་ཤེས་ཀྱི་མེད་སྟབས་མི་ལ་མི་རེ་ག་མེད་རེད། ལོ་ལྔ་བཅུའི་མཚམས་འདིར་ང་ཚོས་ད་དུང་རྒྱ་གར་སྐད་ཤེས་ཀྱི་མེད། འཛམ་གླིང་གི་འགྲོ་སྟངས་ཤེས་ཀྱི་མེད་ཟེར་བའི་དུས་ཚོད་ཡོལ་ཚར་བར་བརྟེན། རང་མགོ་རང་ཐོན་གྱི་ལམ་དུ་འགྲོ་བའི་མགོ་འཛུགས་དགོས་ཞེས་གསུངས།

སྤེན་པ་ཚེ་རིང་མཆོག་གིས། ད་ལྟའི་བཀའ་ཤག་གི་སྲིད་བྱུས་མང་ཆེ་བ་རྒྱུན་འཁྱོངས་བྱ་རྒྱུ་དང་། ༧གོང་ས་མཆོག་གི་ཆབ་སྲིད་ཙམ་མིན་པར་དུས་རྒྱུན་བཀའ་སློབ་གནང་བཞག་པའི་དགོངས་གཞི་གང་ཡོད་པ་དག་འགྲུབ་ཆེད་འབད་བརྩོན་མཐའ་གཅིག་ཏུ་བྱ་རྒྱུ། བོད་རྒྱ་འབྲེལ་མོལ་དབུ་མའི་ལམ་གྱི་སྲིད་བྱུས་མཇུག་སྐྱོང་དགོས་པས། དེར་མུ་མཐུད་དེ་བསྐྱོད་རྒྱུ་དང་མདུན་སྐྱོད་བྱ་རྒྱུ། བུད་མེད་ཀྱི་ནུས་ཤུགས་སྤེལ་བའི་སྐད་ཆ་ག་ཚོད་བཤད་ཀྱང་དབང་ཆ་ཡོད་སར་བུད་མེད་མ་བསླེབ་ན་ནུས་པ་གང་ཡང་ཐོན་ཐུབ་ཀྱི་མེད་སྟབས། གལ་སྲིད་ང་བཀའ་བློན་ཁྲི་པར་བསླེབ་ན་བུད་མེད་གསུམ་བཀའ་བློན་ནང་དུ་བསྐོ་འཇོག་བྱ་རྒྱུ་ཡིན་ཞེས་དང་། བཀའ་ཤག་ལ་སྲིད་བྱུས་གང་ཡོད་ནའང་དེ་བསྒྲུབ་མཁན་ལས་བྱེད་དག་རེད། ངའི་གཤིས་ཀའི་སྟེང་ནས་ལས་བྱེད་ལ་འདྲིས་པོ་ཡོད་ལ། ཁོང་ཚོའི་གནས་སྟངས་ཡག་ཏུ་གཏོང་རྒྱུ་དང་ཁོང་ཚོའི་རྣམ་དཔྱོད་རྩལ་དུ་འདོན་པའི་གོ་སྐབས་སྤྲོད་རྒྱུ་ཡིན། ཞེས་དང་།

དེ་བཞིན་འདས་པའི་ལོ་འདི་གར་བོད་མི་འདུས་སྡོད་ཀྱི་ས་གནས་ཕལ་ཆེ་བར་ཕྱིན་ཏེ་གནས་སྟངས་ཤེས་ཀྱི་ཡོད་སྟབས། གཞུང་མང་བར་ལ་འབྲེལ་ལམ་དམ་དུ་གཏོང་རྒྱུ་དང་གཞིས་ཆགས་སྲ་བརྟན། བོད་ཀྱི་ཆོས་དང་རིག་གཞུང་གོང་འཕེལ་དུ་གཏོང་བ། ལྷག་པར་དུ་བོད་ནང་དུ་ག་རེ་བྱེད་ཐུབ་ཀྱི་འདུག ཆབ་སྲིད་ཙམ་མིན་པར་དེ་མིན་པའི་བརྒྱུད་ལམ་གཞན་ནས་ག་རེ་བྱེད་ཐུབ་ཀྱི་ཡོད་མེད་ཐད་བསམ་བློ་འཁོར་གྱི་འདུག་ལ། བཀའ་བློན་ཁྲི་པར་བསླེབ་ན་དེ་བས་ཀྱང་གལ་ཆེ་བར་འབད་བསྒྲུབ་བྱ་རྒྱུ། རྒྱ་ནག་གི་སྤྲུལ་སྐུ་ངོས་འཛིན་གྱི་ལམ་ལུགས་གསར་བ་སོགས་ལ་ཁ་གཏད་གཅོག་པའི་ཆོས་དོན་ལྷན་ཁང་ཡར་རྒྱས་གཏོང་རྒྱུ་དང་བཀའ་ཤག་གིས་གཏན་ལ་ཕབས་པའི་ཤེས་ཡོན་སྲིད་བྱུས་ཀྱི་ལངས་ཕྱོགས་རྒྱུན་འཁྱོངས། དཔལ་འབྱོར་འདུ་འགོད་ཆེད་དམིགས་སུ་བཀར་ནས་དཔལ་འབྱོར་འདུ་འགོད་ཀྱི་ལས་བྱེད་བསྐོ་བ། བོད་ནས་གསར་དུ་འབྱོར་བ་དང་བཙན་བྱོལ་གྱི་མི་ཉམས་ཐག་ལ་རོགས་རམ་སོགས་ཀྱི་ཐད་ནུས་པ་འདོན་རྒྱུ་སོགས་ཡིན་གསུངས།

བཀྲས་མཐོང་བསྟན་འཛིན་རྣམ་རྒྱལ་མཆོག་གིས། གཙོ་བོ་བཀའ་བློན་ཁྲི་པར་སུ་བསླེབ་ནའང་བོད་གཞུང་གི་སྲིད་བྱུས་ལམ་སང་བསྒྱུར་བ་ཐུབ་ཀྱི་མེད། གཙོ་བོ་༧གོང་ས་མཆོག་དབུ་ལ་བཞུགས་ཡོད་ལ། ༧གོང་ས་མཆོག་གིས་ལམ་སྟོན་གནང་གི་རེད། ཁོང་གིས་རྒྱལ་ཁབ་དང་མི་མང་གི་ཆེད་དུ་བཀའ་གནང་བ་དེ་གཙི་སྲུང་བྱས་ཏེ། ང་ཚོས་ལས་འགན་བསྒྲུབ་ཀྱིན་ཡོད་ལ། ད་ལྟ་ཡང་བོད་མི་མང་སྤྱི་འཐུས་གྲོས་ཚོགས་ཀྱིས་གཙོ་བོ་༧གོང་ས་མཆོག་གིས་བོད་ཀྱི་རྩ་དོན་བསྒྲུབ་ཆེད་དུས་ནས་དུས་སུ་ཡེ་ཤེས་དབྱངས་དཔྱད་གནང་རོགས་ཞེས་འབོད་སྐུལ་ཞུས་བསྡད་ཀྱིན་འདུག དེ་བཞིན་ང་ཚོའི་མང་གཙོའི་ལམ་སྲོལ་ནང་། མི་མང་གི་བསམ་ཚུལ་ཡང་གྲོས་ཚོགས་བརྒྱུད་ནས་ཡོང་དགོས་ཀྱི་ཡོད་ལ། མི་མང་གི་བསམ་ཚུལ་ལའང་ཚང་མས་ལྟ་དགོས་ཀྱི་ཡོད། དེར་བརྟེན་བཀའ་བློན་ཁྲི་པར་སུ་བསླེབ་ནའང་ཡར་༧གོང་ས་མཆོག་གི་བཀའ་རེད་ཅེས་དང་། མར་མང་ཚོགས་ཀྱི་བསམ་ཚུལ་རེད་ཅེས་བར་མ་བར་ནས་མཁས་པོ་བྱས་ནས་འདུག་ས་མེད་པ། མི་སུ་ཡིན་རུང་བོད་ཕྱི་ནང་གཉིས་ཀྱི་གནས་ཚུལ་མཁྱེན་གི་རེད་ལ། བཙན་བྱོལ་བོད་གཞུང་མང་གི་གནས་སྟངས་མཁྱེན་གི་རེད་ཅེས་དང་།

དེང་སྐབས་བཀའ་བློན་ཁྲི་པར་བསླེབ་ན་ག་རེ་བྱ་རྩིས་ཡིན་ཟེར་ནས་བཀའ་འདྲི་གནང་གི་འདུག ང་ཚོ་མང་གཙོའི་ལམ་ལུགས་སྟེང་འགྲོ་གི་ཡོད་ནའང་། རྒྱལ་ཁབ་ཡོད་པ་ནང་བཞིན་ངས་འདི་བྱ་རྒྱུ་ཡིན། གན་འཇོན་གི་ཡོད་ཟེར་ན་ལན་པོ་ཡོད་པ་མ་རེད། རྒྱལ་ཁབ་གཞན་པའི་སྲིད་འཛིན་ཚོར་མཐུན་རྐྱེན་འཛོམས་སྟབས་ཁས་ལེན་བྱས་པ་དེ་ཚོ་ལམ་སང་བསྒྲུབ་ཐུབ་གི་ཡོད་མོད། ང་ཚོ་བཙན་བྱོལ་གཞུང་གི་ནང་དུ་བཀའ་བློན་ཁྲི་པར་སུ་ཕེབས་ནའང་ཁས་ལེན་མང་བོ་གནང་ཚེ་དེ་ཚོ་བསྒྲུབ་ཐུབ་གི་མ་རེད། དེ་དངོས་ཡོད་གནས་ཚུལ་ཡིན་སྟབས་ཚང་མས་མཁྱེན་དགོས། གཙོ་བོ་བཀའ་བློན་ཁྲི་པའི་ལས་འགན་བོད་ཀྱི་ཆབ་སྲིད་དང་བོད་ཀྱི་རྩ་དོན་བསྒྲུབ་རྒྱུའི་ལས་འགན་རེད་ཅེས་གསུངས།

རྒྱ་རི་སྒྲོལ་མ་མཆོག་གིས་གསུངས་དོན། ད་ལྟའི་བར་དུ་ང་ཚོར་བཀའ་ཤག་གི་སྲིད་བྱུས་ཟེར་རྒྱུ་གང་ཡང་མེད་པར། བཀའ་ཤག་གསར་བ་བསླེབ་སྐབས་སྤྱི་འཐུས་གྲོས་ཚོགས་ཀྱི་སྲིད་བྱུས་གསར་བ་བསྣམས་ཕེབས་ཀྱིན་ཡོད་སྟབས། གྲོས་ཚོགས་ཀྱིས་གཏན་ལ་ཕབས་པའི་བོད་གཞུང་གི་སྲིད་བྱུས་ཆགས་ཀྱི་ཡོད། ང་ཡང་གཏན་ལ་ཕབས་པའི་སྲིད་བྱུས་མང་བོར་རྒྱབ་སྐྱོར་བྱེད་མཁན་ཞིག་ཡིན་པས། དེ་དག་ཚང་མར་ལམ་སང་བསྒྱུར་བ་གཏོང་དགོས་པ་རེད་བསམ་གི་མེད་མོད། སྲིད་བྱུས་གང་འདྲ་ཞིག་ཡིན་རུང་དུས་སྐབས་དང་དངོས་ཡོད་ཀྱི་དགོས་དོན་འགྲུབ་ཀྱི་ཡོད་མེད་ལ་བལྟས་ཏེ། བསྒྱུར་བ་གཏོང་དགོས་རིགས་ངེས་པར་དུ་བསྒྱུར་བ་གཏོང་གི་ཡིན།

བཙན་བྱོལ་བོད་གཞུང་གི་ལས་འགན་གཙོ་བོ་བཅའ་ཁྲིམས་ནང་དུའང་འཁོད་ཡོད་ལ། བཙན་བྱོལ་བོད་གཞུང་གི་ཆབ་སྲིད་ལས་འགན་དང་པོ་དེ་ཆབ་སྲིད་ཀྱི་བདེན་མཐའ་གསལ་བ་བྱ་རྒྱུ་དང་། བོད་ནང་དུ་གཞིས་ལུས་བོད་མི་རྣམས་དཀའ་ངལ་དང་སྡུག་བསྔལ་ལས་སྐྱོབ་ཐུབ་རྒྱུ་ནི་ང་ཚོ་བཙན་བྱོལ་བོད་མིའི་ལས་འགན་ཆེ་ཤོས་ཆགས་ཡོད། བཙན་བྱོལ་དུ་ཡོད་པའི་མི་མང་གི་བདེ་སྡུག་སེལ་རྒྱུ་ནི་གཞུང་གི་ལས་འགན་ཆགས་ཡོད། ཡིན་ནའང་། བོད་ཀྱི་ཆབ་སྲིད་བདེན་མཐའ་གསལ་ཆེད་ད་ལྟ་༧གོང་ས་མཆོག་གི་དགོངས་གཞི་ལས་ལྷག་པ་ཞིག་འཇོན་གི་ཡོད་ཟེར་ནས་ཞུ་རྒྱུ་གང་ཡང་མེད་མོད། ངས་ཧམ་བཤད་མིན་པར་༧གོང་ས་མཆོག་གི་དགོངས་གཞི་གང་ཡིན་པའི་ཐོག་ཏུ་ལས་ཀ་བྱེད་ཀྱི་ཡིན་ཞེས་ད་ལྟའི་བར་དུ་ཞུས་ཡོད་ལ། མ་འོངས་པར་བྱ་ཐུབ་པའི་གདེང་ཚོད་དང་ཡིད་ཆེས་ཡོད།

བོད་ནང་གི་བོད་མི་ཚོ་དང་མཉམ་དུ་འབྲེལ་བ་བྱས་ཏེ་མཉམ་རུབ་ཀྱི་ཐོག་ནས་འགྲོ་དགོས་པ་གལ་ཆེན་པོ་རེད། ང་སྤྱི་འཐུས་བྱས་ཏེ་ལོ་བཅུ་དགུ་ཕྱིན་ཏེ་མི་མང་གི་དཀའ་ངལ་ཤེས་ཀྱི་ཡོད་ལ། ངྷ་སར་ཡོད་པའི་བོད་མི་གསར་འབྱོར་བ་མང་བོ་ཞིག་ལ་སྡོད་གནས་དང་ཟ་འཐུང་གི་དཀའ་ངལ་ཡོད་སྟབས། བོད་གཞུང་གིས་རོགས་སྐྱོར་གནང་གི་མེད་པ་མིན་ནའང་། སྐབས་རྗེས་མའི་བཀའ་ཁྲིར་མི་སུ་བསླེབ་ནའང་སྔར་ལས་ལྷག་ཅིག་གནང་དགོས་ཀྱི་འདུག དེ་བཞིན་གཞིས་ཆགས་ཁག་ཡིན་ནའང་དཀའ་ངལ་མང་བོ་ཡོད་སྟབས། གནས་སྟངས་ཚང་མ་ཤེས་པའི་ཐོག་ནས་འགྱུར་བ་གཏོང་དགོས་ཀྱི་འདུག་ཅེས་གསུངས།

གསར་འགོད་པ། ཨ་རིག་འགྱུར་མེད།

པར་བ། དོན་གོ