བཀའ་ཁྲི་འོས་འདེམས་དང་མང་ཚོགས་ཀྱི་ལས་འགན། ལྷ་སྡེ་གནམ་ལོ་ཡག

བཀའ་ཁྲི་འོས་འདེམས་དང་མང་ཚོགས་ཀྱི་ལས་འགན།
ལྷ་སྡེ་གནམ་ལོ་ཡག

དུས་ཚོད་ཀྱི་མདའ་སྣེ་དུས་རབས་ཉེར་གཅིག་པའི་ལོ་རབས་བཅུ་བའི་སྒང་འཁོར་མཚམས་བཙན་བྱོལ་སྤྱི་ཚོགས་ཁྲོད་བཀའ་ཁྲིའི་འོས་མི་མ་བརྙེད་པའི་གླེང་ཕྱོགས་ཤུགས་ཆེར་ཁྱབ་རྗེས། ཡང་བསྐྱར་བཀའ་ཁྲིའི་འོས་མི་གདམ་ག་བྱེད་མ་ཤེས་པ་ལྟ་བུའི་སྣང་ཚུལ་ཞིག་ག་ལེར་མང་ཚོགས་ནང་ཁྱབ་ཀྱིན་པར་སྣང་མོད། དོན་ལ་མང་ཚོགས་མི་རེ་ངོ་རེ་ཡིས་བསམ་བློ་ཞིབ་ཏུ་བཏང་བའི་དབང་དུ་བྱས་ན། བོད་དོན་གྱི་མདུན་ལྗོངས་ཕྱོགས་གསུམ་ལ་མ་འདུས་པ་མེད་ཅིང་། མདུན་ལྗོངས་དེའི་ཁྲོད་མི་རེ་ངོ་རེ་ཡི་དད་འདུན་དང་དམིགས་འབེན། འཚོ་ཐབས་བཅས་ལ་ལྟོས་ས་ལྟོས་འཇོག་གི་ཁག་ཐེག་ཡོད་པ་ཞིག་བཟོ་མི་ཐུབ་པའང་མིན། ཡིན་ནའང་།  མི་རེ་ངོ་རེ་ཡིས་འོས་ཤོག་ཞེན་ཁོག་གི་དབང་དུ་གཏོང་གི་ཡིན་ནམ། ཡང་ན། བླ་ཆེན་དང་མི་དྲག་གི་ལམ་སྟོན་ལ་ཞུགས་ཀྱི་ཡིན་ནམ། དེ་དག་ལས་ལྡོག་ནས་རང་ཉིད་རང་གི་མགོན་ཡིན་ཞེས་པ་ནང་བཞིན་བཀའ་ཁྲི་མ་ནོར་བ་ཞིག་ལ་བརྩོན་ལེན་བྱེད་རྩིས་ཡོད་མིན་བཅས་ལ་ཐུག་ཡོད་པས། སྔ་མ་གཉིས་སྔ་ཤུལ་སྔ་ལམ་དང་ཕྱི་མ་དེ་རང་དོན་རང་གཅེས་ཀྱི་ངོ་བོར་གྲུབ་ཡོད། དེ་བས། མང་ཚོགས་ཀྱིས་བཀའ་ཁྲི་འོས་འདེམས་བྱེད་སྐབས། ཉུང་མཐར་བཀའ་ཁྲིའི་འོས་མི་སུ་ཞིག་ལ་གཤམ་གྱི་དོན་ཚན་གསུམ་གྱི་སྒང་ནུས་པ་ཡོད་མེད་བརྟག་རྒྱུ་དེ་གལ་ཆེན་ནང་གི་དོན་ཆེན་དུ་བལྟ་འོས་པར་འདོད།

གཅིག རྒྱལ་བའི་སྐུ་ཕྱཱའི་སྐོར།

རྒྱལ་བ་རིན་པོ་ཆེའི་སྐུ་ན་ལོ་གྲངས་དོན་ལྔའི་ཁ་མཚམས་སུ་སླེབས་ཡོད་པས། བོད་ཕྱི་ནང་གཉིས་དང་ནང་ཆོས་ཀྱི་རྗེས་འཇུག་པ་སྤྱི། ཆོས་ལུགས་ཞི་མཐུན་ལ་བརྩོན་ལེན་གནང་བཞིན་པའི་ལས་རིགས་ཁག ཞི་བདེ་ཡུན་གནས་ལ་འདོད་འདུན་འཆིང་བཞིན་པའི་ཚོགས་སྒེར་ཀུན། ཐ་ན་སྲིད་དོན་པ་དང་སྲིད་དོན་སྟོབས་ཤུགས་མ་འདྲ་བ་དུ་མའི་དོ་སྣང་བྱེད་གཞིར་གྱུར་ཡོད་ལ། སྐུ་ནའི་བབས་དང་མཐུན་པའི་སྲུང་སྐྱོབ་ཀྱི་འཆར་གཞི་དོན་འཁྱོལ་ཡོང་བ་ཞིག་ཡོད་མིན་ནི་སྤྱི་སྒེར་ཀུན་གྱི་ཞེ་འདུན་ཇི་མ་ཇི་བཞིན་དུ་འགྲུབ་ཐུབ་མིན་ལ་ཐུག་ཡོད་ཅིང་། དེ་ནི་ཐད་ཀར་འབྱུང་འགྱུར་གྱི་བཀའ་ཁྲིའི་ལས་འགན་གྱི་གྲུབ་ཆ་གཙོ་བའི་གྲས་ཀྱི་གཅིག་ཀྱང་ཡིན། དེ་བས། དེང་གི་བར་བཀའ་ཁྲིའི་འོས་གཞིར་ལངས་མཁན་དང་འོས་དམིགས་སུ་བཏོན་མཁན་སུ་ཞིག་གིས་སྐུ་ཕྱའི་ཐད་ནས་མང་ཚོགས་ལ་འགྲེལ་བརྗོད་བྱས་ཡོད་དམ། ཡང་ན། གསར་འགོད་པའམ་མང་ཚོགས་དཀྱུས་མ་སུ་ཞིག་གིས་འདིའི་ཐད་དྲི་བ་འདོན་མྱོང་ངམ།

གལ་སྲིད་རྒྱལ་བའི་དགོངས་པ་ལས་སྐུ་ཕྱཱར་དོ་སྣང་ཅུང་ཙམ་ཡང་སྤྲད་ཀྱི་མེད་མཁན་ཞིག་ཡིན་ཚེ། དགོངས་པ་ལག་ཆ་དང་སྐུ་དོར་བྱ་ལྟ་བུའི་དོན་དག་ཅིག་ཆགས་ཡོད་པས། རྒྱལ་བ་རིན་པོ་ཆེ་ཞེས་ཁ་ནས་གླེང་བསྡད་པ་ཙམ་གྱིས་ཕན་མི་ཐོགས་པར་ངེས་པར་དུ་སྐུ་ནའི་བབས་དང་མཐུན་པའི་ཞིབ་ཕྲའི་འཆར་གཞི་ཡོད་མེད་ལ་བརྟག་རྒྱུ་དེ་དོན་དག་གལ་ཆེན་ཞིག་ཆགས་ཡོད་ཅིང་། སྒོས་སུ་རྒྱལ་བ་རིན་པོ་ཆེ་ལ་ཆོས་ལུགས་ཀྱི་ཆའམ། ཡང་ན། དབུ་ཁྲིད་ཀྱི་ཆ། གཉིས་ཀ་བཅས་གང་རུང་གི་ཐད་ནས་དད་པ་དམ་ཚིག་ཡོད་མཁན་དག་གི་ལས་བསྐལ་དུ་གྱུར་ཡོད་པ་བཤད་མ་དགོས་པ་ཞིག་ཡིན།

ཡང་ཅིག་བཤད་ན། དེ་ནི་མི་རེ་ངོ་རེ་ཡིས་འོས་ཤོག་སུ་ལ་ལྡུག་འོས་མིན་གྱི་ཚད་གཞི་རྒྱག་བྱེད་ཀྱི་ཆ་གཅིག་ཡིན་པར་མ་ཟད། མ་འོངས་སྐབས་བཅུ་བཞི་བའི་བཀའ་ཤག་སྐབས་སུ་སྐུ་ཕྱཱའི་ཐད་ཉམས་མྱོང་གིས་མ་འདང་བ་ལྟ་བུའི་དཀའ་ངལ་མི་འཕྲད་པའི་ཁག་ཐེག་གི་སྔོན་འགྲོའང་གྱུར་ཡོད།

གཉིས། ཕྱི་སྲིད་ཀྱི་སྐོར།

བཙན་བྱོལ་བོད་གཞུང་གི་ཕྱི་སྲིད་ནི་མདོར་དྲིལ་ནས་བཤད་ན། བོད་ཀྱི་གནད་དོན་སེལ་ཐབས་ཡིན་ཞིང་། བོད་ཀྱི་གནད་དོན་སེལ་རྒྱུ་ནི་གཞིས་བྱེས་གཉིས་ཀྱི་འདོད་འདུན་དང་རྒྱལ་བ་རིན་པོ་ཆེ་ཡི་དགོངས་གཞིའང་ཡིན། དེ་བས། ད་ལྟ་འགྲོ་བཞིན་པའི་བོད་རྒྱའི་འབྲེལ་མོལ་དེ་བཞིན་རྒྱུན་སྐྱོང་གནང་རྒྱུ་གལ་ཆེ་ནའང་། དེ་ལས་ཀྱང་གལ་ཆེ་བ་ནི་གྲུབ་འབྲས་ཤིག་ཨེ་ཐོན་ལྟ་རྒྱུ་གལ་འགངས་ཤིན་ཏུ་ཆེ་བས། བོད་ཕྱི་ནང་གཉིས་སུ་མི་མང་ཆེ་བས་གྲུབ་འབྲས་ཐོན་ཐབས་གཙོ་བོ་ནི་གྲོས་གཞི་དེ་བཞིན་ལག་ལེན་དུ་གཏན་ལམ་མ་འཁེལ་བའི་ཡར་སྔོན་གྲོས་གཞིའི་བརྗོད་དོན་ཁག་ལ་འགན་འཁུར་འོས་མེད་ཚུལ་དང་། རྒྱལ་བ་རིན་པོ་ཆེ་དབུ་ལ་བཞུགས་པའི་བཙན་བྱོལ་བོད་གཞུང་དེ་བཞིན་ཡུ་རོབ་མཐུན་ཚོགས་སོགས་ཀྱི་གྲོས་ཆོད་གཞིར་བཞག་གིས་བོད་མིའི་མགྲིན་ཚབ་པའི་ངོ་བོར་སྤར་ཐབས་གནང་རྒྱུ་དེ་བོད་ཀྱི་གནད་དོན་སེལ་ཐབས་ཡིན་པར་འདོད་ཀྱི་ཡོད་པས། བོད་ཀྱི་གནད་དོན་གྱི་ལྟེ་བ་གཞིས་པར་ཐུག་ཡོད་ཕྱིན་བསམ་ཚུལ་དེ་རིགས་ཟུར་ལྟའི་ཁོངས་སུ་ལེན་ཐུབ་མཁན་ཞིག་ཡིན་མིན་ཡང་བཀའ་ཁྲིའི་འོས་ཤོག་ལྡུག་འོས་མིན་ལ་ཐུག་ཡོད་ལ། ཉེ་ཆར་རྒྱལ་བ་རིན་པོ་ཆེ་ཡི་བཀའ་ཡིན་ཞེས་ཐ་གཅིག་ཏུ་འགན་ཐམས་ཅད་གཡོགས་ཀྱིན་པའང་བསྐྱར་ཞིབ་བྱེད་ཐུབ་དགོས་ཀྱི་ཡོད་ལ། གང་དག་ཡེ་ཤེས་དབྱིངས་དཔྱད་ཡིན་པ་དང་གང་དག་སྙན་སེང་ཞུས་པའི་ཆོག་མཆན་ཡིན་པར་དབྱེ་འབྱེད་ཀྱིས་སྔ་མར་བརྩི་སྲུང་དང་ཕྱི་མ་བསྐྱར་ཞིབ་ཀྱི་ཁོངས་སུ་འཇོག་འདུན་ཡོད་མེད་ཀྱང་གནད་དོན་གྱི་ལྟེ་བ་གཅིག་ཆགས་ཡོད།

ཕྱོགས་གཞན་ཞིག་ནས་བོད་ཀྱི་གནད་དོན་སེལ་བར་ཆིག་སྒྲིལ་གྱི་གོང་བུ་ཞིག་དགོས་པ་ཚང་མས་བརྗོད་ཀྱིན་ཡོད་ནའང་། བཙན་བྱོལ་སྤྱི་ཚོགས་ཁྲོད་རང་བཙན་གླེང་མཁན་དག་དགྲ་ཟླར་སྣང་བཞིན་པ་དང་དབུ་མའི་ལམ་གྱི་ཁྱབ་ཁོངས་སུ་ལྟ་བ་གཞན་འཁུར་མཁན་གཞན་དག་རྒྱལ་བའི་དགོངས་པ་དཀྲུགས་མཁན་ལྟ་བུའི་སྣང་ཚུལ་ཤུགས་ཆེར་བསྐྲུན་བཞིན་པས།  དེ་ནི་དགྲ་དགའ་གཉེན་སྡུག་གི་ལམ་ཁ་ཡ་ང་བ་ཞིག་ལས་གཞན་མིན་པས། ལྟ་བ་སྣ་མང་འདུ་བའི་ཆིག་སྒྲིལ་གྱི་སྤྱི་ཚོགས་ཤིག་བསྐྲུན་པར་གདེངས་སྤོབས་དང་འདོད་པ་ཡོད་མེད་ལ་བརྟག་རྒྱུའང་མང་ཚོགས་ཀྱིས་གཡོལ་མི་རུང་བའི་དོན་ཆེན་ཞིག་ཡིན། 

བོད་དོན་སེལ་ཐབས་གཞན་ཞིག་དེ་དྲིལ་བསྒྲགས་ཡིན་ཞིང་། བརྒྱུད་ལམ་ཁག་དང་ཚོགས་འདུ་ཆེ་མ་ཆུང་གསུམ་རྩ་ཆེར་བརྩི་འོས་པ་ཞིག་རེད། ཡིན་ནའང་། ཕྱི་རྒྱལ་ཡུལ་གྲུ་ཁག་གི་ཆོས་ཚོགས་ཁག་དང་སློབ་ཕྲུག་སོགས་ཀྱི་ནུས་པ་བསྔོག་འདོན་ཆེར་གནང་ཐུབ་མེད་པའི་སྣང་ཚུལ་མང་བོ་ཞིག་ཡོང་བཞིན་པའི་ཁར། མི་ལ་ལས་བཤད་པ་ལྟར་ན།  རིན་པོ་ཆེ་དང་དགེ་བཤེས་ལྷན་རྒྱས་དམིགས་བཀར་གྱིས་ཚོགས་པ་ཞིག་འཛུགས་ཐུབ་པ་ཡིན་ན། ཆོས་རིག་དར་སྤེལ་ཙམ་ལས་བརྒལ་ནས་འགྲོ་བ་མིའི་རིགས་ཀྱི་བསམ་བློའི་རུ་འདྲེན་པ་དང་། སྒོས་སུ་བོད་ཀྱི་བདེན་མཐའ་སེལ་བར་གཞོགས་འདེགས་ཀྱི་ནུས་པ་ཐོན་ཐུབ་ཀྱི་འདུག་བརྗོད་བཞིན་པས། ནུས་པ་དེ་རིགས་བསྔོག་འདོན་གནང་ཤེས་མཁན་ཞིག་ཡིན་མིན་ནི་བཀའ་ཁྲིར་འོས་མིན་གྱི་ཚད་གཞི་གཞན་ཞིག་ཡིན།  

རྒྱའི་གཏམ་དཔེར། ཕན་ཚུན་གཉིས་ཀར་རྒྱུས་ཡོད་ན། ཐེངས་བརྒྱར་འཐབ་ཀྱང་ཕམ་པ་མེད་ཅེས་པ་ལྟར་རྒྱ་ནག་སྲིད་དོན་གྱི་རིགས་ལམ་སྤྱི་དང་སྒོས་སུ་དེང་གི་རྒྱ་ནག་དཔོན་རིགས་ཀྱི་འགལ་འབྲེལ་གྱི་དྲ་བ་ལག་མཐིལ་དུ་ལེན་ཐུབ་མཁན་ཞིག་དང་། གལ་སྲིད་རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་ནང་ཟིང་བྱུང་བའམ། དམག་དོན་བཅད་བཟུང་གི་རྣམ་པའི་དུས་སྐབས་ཤིག་སླེབས་པ་ཡིན་ན། འཕྲལ་མར་དེ་རིགས་ལ་གདོང་ལེན་བྱེད་པའི་སྐྱ་ཐིག་དགོངས་པར་ཡོད་མཁན་ཞིག་ཡིན་མིན་ཡང་འོས་ཤོག་ལྡུག་འོས་མིན་ལ་བལྟ་ཆོག་པར་ཐེ་ཚོམ་མེད་པ་ཞིག་ཡིན།

གསུམ། ནང་སྲིད་ཀྱི་སྐོར།

ཤེས་ཡོན་སྲིད་བྱུས་གསར་བ་དང་སྲོལ་རྒྱུན་སོ་ནམ་འདེབས་ལས། དཔལ་འབྱོར་སྒེར་བདག་ཅན་བཅས་ནི། བཀའ་ཤག་སྐབས་བཅུ་གསུམ་པའི་སྲིད་བྱུས་གལ་ཆེན་ཁག་རེད་ལ། སྲིད་ཇུས་དེ་དག་ལག་བསྟར་བྱེད་རིང་མ་འདང་བའམ། བསམ་ཚུལ་མ་འདྲ་བ་མང་བོ་ཞིག་བྱུང་ཡོད་པས།  དེང་ཕྱིན་མང་ཚོགས་ཁྲོད་བཤད་སྟངས་དེ་རིགས་མི་འབྱུང་བ་དང་ཡང་དག་པའི་ལམ་ནང་འཇུག་པར་བྱེད་ཐབས་གང་དག་ཅིག་ཡོད་མེད་དང་། 

དེང་སྐབས་གཞིས་ཆགས་སྲ་བརྟན་མེད་པ་དང་གཞོན་སྐྱེས་མང་བོ་ལས་མེད་ཆགས་ཡོད་པའི་དཀའ་ངལ་སེལ་ཐབས་ནི་ནང་ཚང་རེ་ནས་ཕྱིའི་རྒྱལ་ཁབ་ཁག་ལ་ལས་ཀའི་ཐོངས་མཆན་སྒང་མི་རེ་མངགས་རྒྱུའི་ཐབས་ཤེས་ཤིག་བཙལ་འོས་པ་དུས་བབ་ཀྱིས་ཐག་བཅད་ཡོད་ཅིང་། དེ་ནི་གཞན་མ་ཡིན་པར་བཙན་བྱོལ་སྤྱི་ཚོགས་མཉམ་འབྲེལ་རྒྱལ་ཚོགས་སྐྱབས་བཅོལ་ལས་ཁུངས་ཀྱི་གཟིགས་སྐྱོང་འོག་གནས་ཡོད་སྟབས། གཅིག་ནས་རང་ཁ་རང་གསོའི་སྲིད་བྱུས་ལ་རྒྱབ་བསྐྱོར་ཐོབ་སྲིད་པ་དང་། གཉིས་ནས་ནང་ཚང་ཆ་སྙོམས་ཀྱི་དཔལ་འབྱོར་དཀའ་ངལ་སེལ་ཐུབ་པར་མ་ཟད། གཞན་བརྟེན་འཚོ་བ་ནས་རང་འཚོའང་སྣེ་ཁྲིད་བྱེད་ཐུབ་ཡོད་པ་དང་། བཙན་བྱོལ་སྤྱི་ཚོགས་ཆིག་སྒྲིལ་གྱི་ལམ་ཆེན་ཞིག་གི་ནང་དུ་ཤར་བསྐྱོད་གནང་བར་གཞོགས་འདེགས་བླ་ན་མེད་པ་ཞིག་ཐོན་ཐུབ་ཀྱི་ཡོད་པས། ཐབས་ཤེས་དེ་བཞིན་བེད་སྤྱོད་གཏོང་འོས་པའི་ཁོངས་སུ་གཟིགས་ཀྱི་ཡོད་མེད། 

 འདབ་གཤོག་གཉིས་ལྡན་གྱི་ཤེས་ཡོན་པ་མང་ནས་མང་དུ་ཡོང་ཐབས་སྤྱི་དང་སྒོས་སུ་བོད་ཕྲུག་ཁྱིམ་སྡེ་ཁག་གི་འཛིན་སྐྱོང་དང་སློབ་སྦྱོང་བསྐུལ་འདེད་ཐད་སྲིད་ཇུས་ག་རེ་ལག་བསྟར་བྱེད་ཀྱི་ཡིན་མིན་དང་། སྒོས་སུ་ཕྱི་རྒྱལ་ཡུལ་ལུང་ཁག་གི་བོད་མི་བརྒྱ་ཕྲག་ཁ་ཤས་འདུས་སྡོད་བྱས་ཡོད་པའི་གྲོང་ཁྱེར་རམ། གྲོང་གསེབ་ཁག་གི་གཞུང་འབྲེལ་སློབ་ཆུང་རིམ་པའི་ནང་བོད་ཡིག་གདམ་གཞིའི་སློབ་ཚན་དུ་འཇོག་པར་ཐབས་ཤེས་གནང་འདུན་ཡོད་མེད་ཀྱང་ཤིན་ཏུ་གལ་ཆེ། རྒྱུ་མཚན་ནི་ཕྱི་རྒྱལ་གྱི་སྲིད་གཞུང་གང་ཡིན་ནའང་། བོད་པའི་ཆོས་རིག་སྲུང་སྐྱོབ་ལ་རྒྱབ་བསྐྱོར་ཡོད་ཚུལ་བརྗོད་ཀྱིན་པས། ཁ་བཤད་རྒྱབ་བསྐྱོར་ནས་ལག་ལེན་རྒྱབ་བསྐྱོར་དུ་བསྐུལ་འདེད་གཏོང་དགོས་ཀྱི་ཡོད་ལ། བོད་ཕྲུག་ཚོར་ཡང་བོད་ཡིག་བསླབ་གཞི་གདམ་ག་བྱེད་པར་མཐུན་རྐྱེན་བསྐྲུན་ཐུབ་ཡོད།

མི་ཚང་མས་གསར་འབྱོར་བ་ནི་བོད་ཕྱི་ནང་གཉིས་ཀྱི་སྐས་རྐང་རེད་ཅེས་ལབ་ཀྱི་ཡོད་ལ།  སྐས་རྐང་དེ་བཞིན་སྲ་བརྟན་དང་ཡར་རྒྱས་གཏོང་ཐབས་ག་འདྲ་ཞིག་གཟིགས་ཀྱི་ཡོད་མེད་དང་ཉིས་སྟོང་ལོའི་རྗེས་ཀྱི་གསར་འབྱོར་ལས་བྱེད་པར་རང་ཁོངས་ཀྱི་ཐོབ་ཐང་མ་གཏོགས་གཞུང་ཞབས་ཐོབ་ཐང་སྤྲད་ཀྱི་མེད་ལ། ཡང་སྒོས་དྲུང་གཞོན་ལས་རོགས་ཡན་འདབས་ཀྱི་ཁྱབ་ཁོངས་སུ་འཛུལ་ཞུགས་གཏན་ནས་བྱེད་མི་ཆོག་པའི་གཟུགས་མེད་བཀག་རྒྱ་ཅན་གྱི་སྲིད་བྱུས་དེ་རྩ་གཏོར་གཏོང་འདུན་ཡོད་མེད།

ལུས་པོ་བདེ་ཐང་ཅན་གྱི་སྤྱི་ཚོགས་ཤིག་ཡུན་གནས་ཐུབ་མིན་ནི་འཕྲོད་བསྟེན་ལ་ཐུག་ཡོད་ཅིང་། བཙན་བྱོལ་གཞིས་ཆགས་ཁག་གི་གནས་སྟངས་ལ་བལྟས་ན། ཡོངས་གྲགས་ཀྱི་གསང་བ་ཞིག་ཡོད་པ་ནི་ཨའེ་ཙིའི་ནད་ཚ་ཁྱབ་བརྡལ་དུ་འགྲོ་བཞིན་པ་དེ་ཡིན་ཞིང་། ཐ་ན་གྲྭ་ལྭ་གྱོན་པའི་ཨའེ་ཙིའི་ནད་ཚ་ཅན་ཡང་བྱུང་ཡོད་ཚོད་ཡིན་ན། གནད་དོན་དེ་ལྟེ་བར་བཟུང་བའི་འཕྲོད་བསྟེན་གྱི་སྲིད་བྱུས་ག་འདྲ་ཞིག་ཡོད་མེད།

དབུ་ཁྲིད་ཅིག་ལ་མཚོན་ན། འཛིན་སྐྱོང་གི་འཁོར་རྒྱུགས་དེ་ཨང་དང་པོར་གྱུར་ཡོད་ཅིང་། གལ་སྲིད་མིས་བཟོས་འགོག་རྐྱེན་གྱིས་འཁོར་རྒྱུགས་ཡག་པོ་མ་བྱུང་བ་ཡིན་ན། ༼ནང་བཀྲ་མ་ཤིས་ན་ཕྱི་དོན་མི་འགྲུབ༽ཅེས་པ་ལས་མེད་པས། རྩ་བ་མཐུག་ཅིང་རྩེ་མོ་རྒྱས་པའི་འཛིན་སྐྱོང་མ་ལག་ཅིག་འཁོར་བསྐྱོད་ཤར་གཏོང་ཐུབ་པར་གདེངས་ཚོད་ག་རེ་འདུག་མིན་བཅས་ནི་བཀའ་ཁྲིར་འོས་མིན་གྱི་ཚད་གཞི་ཅིས་མ་ཡིན།

མཇུག་བསྡུ་བའི་གཏམ།

གོང་དུ་བརྗོད་ཟིན་པའི་རྒྱལ་བའི་སྐུ་ཕྱཱ་དང་ཕྱི་སྲིད། ནང་སྲིད་གསུམ་ནི་མ་འོངས་སྐབས་བཅུ་བཞི་བའི་བཀའ་བློན་ཁྲི་བའི་བསྒྲུབ་བྱ་གཙོ་བོ་ཡིན་ཞིང་། དོན་ཚན་དེ་རིགས་ཐད་ནུས་པ་ཡོད་མིན་བརྟག་རྒྱུ་ནི་མང་ཚོགས་ཀྱི་ལས་འགན་ཡིན་པར་མ་ཟད། བོད་ཀྱི་གནད་དོན་སེལ་ཐབས་ཡག་ཤོས་ཀྱང་ཡིན་ལ། མི་རེ་ངོ་རེ་ཡི་འཚོ་ཐབས་ལའང་ཐད་ཀར་འབྲེལ་བ་ཆགས་ཡོད་པ་ནི་ནང་ཚང་རེ་ནས་མི་རེར་ལས་ཀའི་ཐོངས་མཆན་ཐབས་ཤེས་གཏོང་འདུན་ཡོད་མཁན་ཞིག་ཡིན་མིན་ལྟ་བུ་ཡིན་ཞིང་། སྨྱུག་ཐོགས་པས་ཉི་ཧོང་དང་ལྷོ་ཀོ་རི་ཡ། ཐའེ་ཝན་བཅས་ནས་ཟླ་དྲུག་རེའམ། ཡང་ན། ལོ་རེ་ཡི་དུས་ཡུན་འོག་ལས་ཀའི་ཐོངས་མཆན་སྒང་ཨོ་སི་ཁྲི་ལི་ཡའི་བཟོ་གྲྭ་ཆེ་ཁག ཞིང་ར་དང་གཏེར་ལས་བཅས་སུ་སླེབས་ཀྱིན་པའི་མཐོ་རིམ་སློབ་ཕྲུག་མང་བོར་ཐུག་མྱོང་ལ། སློབ་ཕྲུག་དེ་དག་གིས་ཉུང་མཐར་ལོ་རེར་མ་འོངས་སློབ་ཡོན་ཆ་ཚང་དང་དུས་ལྟར་ཕྱིར་ལོག་གནང་ཚེ། སང་ལོར་ཡང་བསྐྱར་ཐོངས་མཆན་རེག་གི་ཡོད་པའི་ཁར། རྒྱལ་ཁབ་གཞན་དག་ལའང་ལས་ཀར་བསྐྱོད་པའི་སྒོ་མོ་འབྱེད་འདུག 

གོ་སླ་བའི་ལམ་ནས་ཞུས་པ་ཡིན་ན། དམངས་གཙོའི་ལམ་སྲོལ་ནི་ཁྱོད་ལ་འོས་ཤོག་དགོས་ན་མང་ཚོགས་ལ་ཁེ་བཟང་ཅིས་མ་དགོས་ཞེས་པ་ལྟ་བུའི་འབྲེལ་བ་ཞིག་ཀྱང་ཡིན། ལས་འགན་དེ་དང་གོ་སྐབས་དེ་ཤོར་གྱི་འཇོག་མིན་ཡང་མི་རེ་ངོ་རེི་ཡིས་འོས་ཤོག་ལྡུག་ས་དེར་ཐུག་ཡོད་ཅིང་། སྤྱི་འཐུས་ཀྱི་ཚད་ཤིང་ཡང་གོང་བཀོད་མང་ཚོགས་ཀྱི་ལས་འགན་དང་ཁེ་དབང་ཐད་རྒྱབ་བསྐྱོར་རྒྱག་མིན་ལྟར་གདམ་ཆོག་པ་ཞིག་ཡིན་པར་མ་ཟད། སྤྱི་འཐུས་ལ་རྒྱབ་བསྐྱོར་ཡོད་མེད་ཐད་ཀར་མ་འོངས་བཀའ་ཁྲིའི་ལས་གཞི་དེ་དག་ལམ་ལྷོང་ཡོང་མིན་ལ་ཐུག་ཡོད་པས་ཀྱང་ཡིན།