རྟ་ནག་སྐལ་བཟང་ལུང་རིགས།
ཕྱི་ལོ་ ༢༠༡༡ ཟླ་ ༩ ཚེས་ ༡༡ ཉིན་རེས་གཟའ་སྤེན་པ། ཕྱི་དྲོའི་དུས་ཚོད་དྲུག་གི་སྟེང་བདག་ཕྱིར་རང་མལ་དུ་ལོག་པའི་ལམ་བར་དུ་ལོ་ན་དྲུག་ཅུ་ཡས་མས་ཡིན་པའི་བགྲེས་སོང་གཉིས་ཀྱི་གླེང་མོལ་ཐོས་པས། དར་ཅིག་ལ་སེམས་པ་བློང་བློང་བོའམ་འཁྱག་སིབ་སིབ་ཏུ་གྱུར་སོང་། བགྲེས་སོང་ཀ་བ་ན་རེ། “ཐེངས་འདིར་ང་ཚོའི་སྐྱིད་སྡུག་གིས་བཀྲས་མཐོང་བསྟན་འཛིན་རྣམ་རྒྱལ་བཀའ་ཁྲིའི་འོས་གཞིར་ཐག་གིས་བཅད་པ་དེ་ཡག་པོ་བྱུང་བ་རེད”
བགྲེས་སོང་ཁ་བ་ན་རེ། “ང་ཚོའི་སྐྱིད་སྡུག་ལ་མི་སྟོང་གཉིས་ལྷག་ཡོད་པས་ཕལ་ཆེར་རེ་བ་ཡོད་རེད”
བགྲེས་སོང་ཀ་བ་ན་རེ། “ཚོགས་གཙོས་བཤད་པ་ལྟར་ན། རྒྱ་གར་ལའང་འབྲེལ་བ་བྱས་ཚར་ཡིན་ཟེར། རྒྱ་གར་ནས་ཀྱང་རྒྱབ་སྐྱོར་བ་འཚོལ་བཞིན་ཡོད་ས་རེད” བགྲེས་སོང་གཉིས་ཀྱི་གླེང་མོལ་ལ་ཇི་ལྟར་ཉན་ནའང་། སྐྱིད་སྡུག་ཚོགས་པ་དེའི་མིང་ལ་ཅི་ཟེར་གླེང་མོལ་དེའི་ཁྲོད་དུ་རྙེད་མ་སོང་ལ། བཀྲས་མཐོང་ལ་ཤེས་འཇོན་ནུས་གསུམ་གང་ལྡན་ཡང་ཐོས་མ་སོང་། དེ་མ་རྙེད་ནའང་གཙོ་མི་ཆེ་སྟེ་གལ་ཆེན་པོ་ནི། ཕྱོགས་ཁག་ཆེན་པོ་ཞིག་གིས་དཔུང་བསྒྲིགས་ནས་སྤྱི་དོན་ཞིག་རྨེག་མེད་དུ་གཏོང་རྩིས་ཡོད་པ་དེ་རེད། བཀའ་ཁྲིའི་འོས་གཞིར་འགྲེང་ཟིན་པ་ཀུན་གྱི་རྒྱབ་དཔུང་དུ་འདི་ལྟར་ཕྱོགས་ཁག་གཏོས་ཆེ་བ་རེ་བསྒྲིགས་དང་སྒྲིག་བཞིན་པ་ཡིན་ན་ངའི་བློ་བཟང་སེང་གེ་ཕམ་སྲིད། གལ་སྲིད་བློ་བཟང་སེང་གེ་ཕམ་པ་ཡིན་ན་དེ་ནི་ང་ཚོ་མི་རབས་གསར་བ་རྣམས་ཕམ་པ་དང་། མ་འོངས་པའི་བོད་ཕམ་པ་རེད།
མཚམས་འདིར་བདག་གིས་རྒྱ་ནག་གི<ཀློག་པ་བོ>ལས་བཀླགས་མྱོང་བའི་གཏམ་རྒྱུད་ཅིག་དྲན་བྱུང་། དགོན་དུང་ཞིག་ན་གྲོང་གསེབ་ཅིག་ཡོད། གྲོང་གསེབ་དེར་བཀྲུ་ཆུ་ཕར་ཟད་བཏུང་ཆུའང་མེད། ཉིན་མཚན་གསུམ་གྱི་ལམ་དུ་བཀལ་ནས་ཡོང་བའི་ཆུ་དེའུ་རེ་དེ་བཀྲུ་ཆུ་ལ་བེད་སྤྱོད་དུས་གོ་རིམ་འདི་ལྟར་ཏེ། ཐོག་མར་སྣོད་ཆས་བཀྲུས། བཀྲུ་ཆུ་དེས་གྱོན་ཆས་བཀྲུས། དེས་ཡང་བསྐྱར་ཁ་ངོ་བཀྲུ་བ་རེད། བཏུང་ཆུའི་དཀའ་ངལ་སེལ་ཆེད་གྲོང་གསེབ་པ་ཀུན་ཚོགས་ར་གཅིག་ཏུ་འདུས། ཚོགས་མི་ག་གེ་མོ་ཞིག་ཡར་ལངས་ནས་ཆུའི་དཀའ་ངལ་སེལ་བར་ཐོག་མར་གྲོང་གསེབ་ལ་དབུ་ ཁྲིད་ཅིག་དགོས་པར་བསྙད་པས། ཀུན་པོས་བསྟུན་པར་བྱས་ཀྱང་དབུ་ཁྲིད་སུ་འཇོག་མིན་ཐད་ལ་རྩོད་པ་ཤོར་བྱུང་། གཞོན་སྐྱེས་སྐོར་ཞིག་གིས་ན་གཞོན་ཞིག་བདམ་དགོས་ཚུལ་དང་། གཞོན་སྐྱེས་ཚོར་ཤེས་རབ་མངའ་བས་ཆུ་གསར་དུ་འཚོལ་བ་ལ་གསར་གཏོད་ཀྱི་སྟོབས་དགོས་ཟེར། རྒན་པོ་ཚོས། ལོ་རྒན་ཞིག་བདམས་ན་ཉམས་མྱོང་མངའ་བས་ཆུ་གསར་དུ་འཚོལ་བ་ལ་ཉམས་མྱོང་གི་གྲོགས་དགོས་ཟེར།
མང་དུ་བརྩད་མཐར། གཞོན་སྐྱེས་ཚོ་གཞི་ནས་ཕམ་སོང་། ད་ལྟ་ཆུ་མེད་གྲོང་གསེབ་ཀྱི་དབུ་ཁྲིད་ལོ་ན་དྲུག་ཅུ་ཡས་མས་ཡིན་པའི་བགྲེས་སོང་ཞིག་རེད། ཆུའི་སླད་དུ་བསྡུས་པའི་མ་དངུལ་དག་ཁྱེར་ནས་ཆུ་བཙལ་བའི་ལས་ལ་ཞུགས། ལམ་བར་ནས་ཀླུ་མཆོད་མཁན་གྱི་དྲང་སྲོང་ཞིག་དང་འཕྲད་པས། ཆུ་མེད་གྲོང་གསེབ་ལ་ཀླུའི་གནོད་པ་ཐེབས་འདུག་པས་མྱུར་མོར་ཀླུ་མ་མཆོད་ན་ཆུ་ཡོང་བའི་རེ་བ་གཏན་ནས་མེད་ཚུལ་བཤད། ཆུ་མེད་དབུ་ཁྲིད་ཀྱིས་དྲང་སྲོང་ཁྲིད་ནས་ཆུ་མེད་གྲོང་གསེབ་ཏུ་ཡོང་ནས་ཀླུ་མཆོད་པའི་ཆོ་ག་བསྒྲུབས། དྲང་སྲོང་གིས་ཉིན་ཞག་བཅོ་ལྔར་ཀླུ་ལ་མཆོད་པ་འབུལ་དགོས་ཚུལ་དང་། དེའི་བར་དུ་སྡེ་མི་གཅིག་ཀྱང་གཉིད་ཀྱི་བདེ་བ་སྤྱད་མི་ཆོག་ཟེར། ཉིན་ཞག་བཅོ་ལྔ་ཡོལ་བའི་མཚན་མོར་སྡེ་མི་ཀུན་ངལ་དུབ་ཀྱིས་གཉིད་དུ་ཡུར། ཆུ་མེད་སྡེ་དཔོན་ཡང་གཉིད་དུ་ཡུར། དྲང་སྲོང་གིས་ཆུའི་མ་དངུལ་གཙོས་སྡེ་མི་ཀུན་གྱི་དངོས་པོ་རྩ་ཆེན་ཡོངས་རྫོགས་ཁྱེར་ནས་ཡུལ་གཞན་དུ་བྲོས་སོང་།
ཆུ་མེད་སྡེ་བ་ད་དུང་གཉིད་དུ་ཡུར་འདུག ཁོ་ཚོ་ག་དུས་གཉིད་སངས་སམ། གཏམ་རྒྱུད་འདི་ལྟར་མཇུག་རྫོགས་སོང་། འདི་ནི་ཆུ་མེད་སྡེ་བའི་གཏམ་རྒྱུད་མཇུག་རྫོགས་པ་ཙམ་ཡིན་ཡང་། འུ་ཚང་གི་དབུ་ཁྲིད་སུ་བསྐོ་ཡི་གཏམ་རྒྱུད་གཞི་ནས་མགོ་བརྩམ་དགོས། ཀློག་པ་བོ་ལགས། གཏམ་རྒྱུད་འདིས་ཁྱེད་ལ་གསལ་བཤད་བྱ་རྒྱུ་ནི་དྲི་གཞི་གཅིག་ལས་མེད་དེ། ཁྱེད་ལ་གསར་གཏོད་ཀྱི་སྟོབས་ཡོད་པའི་དབུ་ཁྲིད་མཁོའམ། ཉམས་མྱོང་གི་གྲོགས་ཡོད་པའི་དབུ་ཁྲིད་དགོས། འདི་ལྟར་བསམས་ཚེ་ཆུ་མེད་སྡེ་བ་དང་ང་ཚོར་མཚུངས་ས་ཅི་འདྲའི་མང་ཨང་། །
