ཁུང་ཙིའི་སློབ་གླིང་ཁག་སྒོ་རྒྱག་རྒྱུ་ཡིན་པའི་ཉེན་བརྡ་བཏང་།

དབྱིན་ཡུལ་གཞུང་གིས་རྒྱ་ནག་གི་ཁུང་ཙི་ལྟེ་གནས་ཁང་ཁག་ལ་ཞིབ་འཇུག་བྱས་ཏེ། ལྟེ་གནས་ཁང་དེ་དག་གིས་དབྱིན་ཡུལ་གྱི་སློབ་གསོ་དང་གཞི་རྩའི་སྨྲ་བརྗོད་རང་དབང་སོགས་ལ་རྡོག་རོལ་གཏོང་གི་ཡོད་ཚེ་སྒོ་རྒྱག་རྒྱུ་ཡིན་པའི་ཉེན་བརྡ་བཏང་འདུག

ད་ལྟའི་ཆར་དབྱིན་ཡུལ་གྱི་ཆར་དུས་གྲོས་ཚོགས་འཚོག་བཞིན་པའི་སྐབས་འདིར། དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། དབྱིན་ཡུལ་གཞུང་གིས་སྨྲ་བརྗོད་རང་དབང་གི་གནད་དོན་གྱི་འོག་ནས་དབྱིན་ཡུལ་དུ་ཡོད་པའི་རྒྱ་ནག་གི་ཁུང་ཙིའི་སློབ་གླིང་གཙོ་བྱས་པའི་རྒྱའི་སྐད་ཡིག་དང་འབྲེལ་བའི་སློབ་གསོའི་ལྟེ་གནས་ཁང་ཁག་ལ་ཞིབ་འཇུག་བྱེད་མུས་ཡིན་པའི་ཁར། རྒྱ་ནག་དམར་ཤོག་ཚོགས་པའི་ལག་ཆར་གྱུར་བའི་ཁུང་ཙི་ལྟེ་གནས་ཁང་ཁག་ཅིག་སྒོ་རྒྱག་རྒྱུ་ཡིན་པའི་ཉེན་བརྡའང་བཏང་འདུག

དེ་འབྲེལ་དབྱིན་ཡུལ་གཞུང་གིས་སློབ་གསོའི་སྲིད་ཇུས་གསར་བ་ཞིག་གཏན་འབེབ་བྱས་པའི་ནང་། དབྱིན་ཡུལ་གྱི་སློབ་ཆེན་ཁག་གིས་ཕྱིའི་སློབ་གསོའི་ལྟེ་གནས་ཁང་ཁག་བར་གྱི་གྲོས་མཐུན་ལ་བསྐྱར་ཞིབ་བགྱིས་ཏེ། དབྱིན་ཡུལ་གྱི་སློབ་གསོ་དང་སྨྲ་བརྗོད་རང་དབང་སོགས་བཀག་སྡོམ་བྱེད་བཞིན་པའི་ལྟེ་གནས་ཁང་དག་ལ་ཉེས་ཆད་གཅོད་རྒྱུ་ཡིན་ཞིང་། དམིགས་བསལ་གྱིས་ཕྱིའི་རོགས་དངུལ་འོག་ཡོད་པའི་རྒྱའི་ཁུང་ཙིའི་སློབ་གསོ་ལྟེ་ཁང་གིས་ལས་མིར་ལྟ་གྲུབ་དང་ལངས་ཕྱོགས་སོགས་ཀྱི་ཆ་རྐྱེན་འཇོག་གི་ཡོད་པར་གདོང་ལེན་བྱ་རྒྱུ་ཡིན་སྐོར་བརྗོད་འདུག

དབྱིན་ཡུལ་དང་རྒྱ་ནག་ཀུན་གསལ་ཞེས་པའི་ཚོགས་པས། རྒྱའི་སློབ་གསོའི་ལྟེ་གནས་ཁང་ཁག་ཏུ་ལས་ཀ་བྱེད་པར་ཐོག་མར་ཆབ་སྲིད་ཀྱི་ལངས་ཕྱོགས་ཁ་གསལ་བཟོ་དགོས་པའི་ཆ་རྐྱེན་འདོན་གྱི་ཡོད་ཅིང་། དེ་ལ་རྒྱ་ནག་དམར་ཤོག་ཚོགས་པའི་འཐུས་མིའི་སྐུ་ཚབ་ཚོགས་ཆུང་ཞིག་གིས་ཞིབ་འཇུག་བྱེད་བཞིན་ཡོད། ཅེས་དང་། དབྱིན་ཡུལ་དུ་ཡོད་པའི་རྒྱ་ནག་གི་སློབ་གསོའི་ལྟེ་གནས་ཁང་ཁག་གིས་དབྱིན་ཡུལ་གྱི་སློབ་གསོ་དང་གཞི་རྩའི་སྨྲ་བརྗོད་རང་དབང་ལ་རྡོག་རོལ་གཏོང་གི་ཡོད་པ་ནན་བརྗོད་བྱས་འདུག

གནད་དོན་དེའི་ཐད་དབྱིན་ཡུལ་དུ་ཡོད་པའི་རྒྱ་ནག་གཞུང་ཚབ་ཁང་གིས་ལན་འདེབས་གང་ཡང་བྱས་མེད་ནའང་། དབྱིན་ཡུལ་གྱི་ཤེས་ཡོན་ལྷན་ཁང་གིས། སློབ་ཆེན་དང་མཐོ་སློབ་ཁག་གིས་རྒྱལ་ཁབ་གཞན་དང་ལྷན་གྲོས་མཐུན་འཇོག་སྐབས། ཁོ་ཚོར་དབྱིན་ཡུལ་གྱི་ཁྲིམས་དང་སློབ་གསོའི་རང་དབང་གཙིགས་ཆེན་དུ་འཛིན་དགོས་པའི་ལམ་སྟོན་བྱེད་དགོས། འོན་ཀྱང་། ཁོ་ཚོས་དབྱིན་ཡུལ་གྱི་ཁྲིམས་ལུགས་གཞིར་བཟུང་བཀོད་ཁྱབ་ལག་བསྟར་བྱེད་ཐུབ་ཀྱི་མེད་ཚེ། དབྱིན་ཡུལ་གྱི་སློབ་གསོའི་སྡེ་ཁག་བར་གྲོས་མཐུན་གན་རྒྱ་འཕྲལ་དུ་མཚམས་འཇོག་བྱེད་དགོས་ལ། དམིགས་བསལ་གྱིས་ལྟ་གྲུབ་དང་ལངས་ཕྱོགས་སོགས་ཀྱི་ཆ་རྐྱེན་འཇོག་གི་ཡོད་པ་ནི་ངོས་ལེན་བྱེད་ཐབས་བྲལ་བ་ཞིག་ཡིན། ཞེས་བརྗོད་འདུག

ད་ལྟའི་ཆར་དབྱིན་ཡུལ་ནང་ཁུང་ཙིའི་སློབ་གསོ་ལྟེ་གནས་ཁང་ ༢༠ དང་རྒྱ་རིགས་སློབ་མ་ཁྱོན་ ༡༥༡༦༩༠ ཡོད་ཅིང་། དེ་དག་གིས་དབྱིན་ཡུལ་དུ་གྲགས་ཆེ་བའི་མན་ཆི་སི་ཊར (Manchester) སློབ་ཆེན་དང་(Liverpool) སློབ་ཆེན་སོགས་ཀྱི་བར་སློབ་གསོའི་གན་རྒྱ་བཞག་སྟེ། རྒྱ་སྐད་རྒྱ་ཡིག་དང་རྒྱའི་རིག་གཞུང་སློབ་ཁྲིད་ཙམ་དུ་མ་ཟད། རྒྱ་ནག་དམར་ཤོག་ཚོགས་པའི་དམར་པོའི་ལྟ་གྲུབ་ཀྱང་རྒྱ་སྐྱེད་དང་དྲིལ་བསྒྲགས་བྱེད་བཞིན་ཡོད་ལ། ཉམས་ཞིབ་པས་རྒྱ་ནག་གི་སློབ་གསོའི་ལྟེ་གནས་ཁང་དག་ནི་དབྱིན་ཡུལ་གྱི་སློབ་གསོའི་ཁོར་ཡུག་གཏོར་བཅོམ་བྱེད་པའི་རྒྱ་ནག་གི་ལག་ཆ་མེད་དུ་མི་རུང་བ་ཞིག་ཡིན་སྐོར་བརྗོད་འདུག

ཕྱི་ལོ་ ༢༠༢༣ ལོར་དབྱིན་ཇིའི་ཤེས་ཡོན་སློབ་གསོ་དང་འབྲེལ་བའི་ཞིབ་འཇུག་སྙན་ཐོ་ཞིག་བཏོན་པའི་ནང་། ཕྱི་ལོ་ ༢༠༡༧ ལོ་ནས་དབྱིན་ཇིའི་སློབ་ཆེན་ཁག་ ༨༨ ཀྱི་ནང་ནས་སློབ་ཆེན་ ༤༦ གིས་རྒྱ་ནག་གི་ལག་ནས་དབྱིན་སྒོར་པོ་ཌིན་ས་ཡ་ ༡༢༢ ནས་ ༡༥༦ བར་བླངས་ཡོད་པ་དང་། དངུལ་འབོར་དེ་དག་ལས་བརྒྱ་ཆ་ ༣༠ རྒྱ་ནག་མི་དམངས་བཅིངས་གྲོལ་དམག་དང་འབྲེལ་བ་ཡོད་པ་ཡིན་འདུག་ལ། དབྱིན་ཡུལ་དུ་སློབ་སྦྱོང་བྱེད་པར་ཡོང་མཁན་གྱི་རྒྱའི་སློབ་མ་རྣམས་ཞི་ཅིན་ཕིན་དང་དམར་ཤོག་ཚོགས་པར་བློ་དཀར་ཡིན་པ་ཤ་སྟག་འདེམས་ཀྱི་ཡོད་ཅིང་། དེས་དབྱིན་ཡུལ་གྱི་རྒྱལ་སྲིད་བདེ་འཇགས་ལ་ཉེན་ཁ་བསྐྲུན་ཡོད་པ་མ་ཟད། རྒྱ་ནག་འཐབ་ཕྱོགས་གཅིག་གྱུར་ཁང་གི་ལས་ཚབ་ལྟ་བུར་དབྱིན་ཡུལ་གྱི་སློབ་གསོའི་རང་དབང་དང་སྨྲ་བརྗོད་རང་དབང་སོགས་ལ་ཁྱད་གསོད་བཏང་ཡོད་སྐོར་ཐེར་འདོན་བྱས་ཡོད།

ཁུང་ཙི་ལྟེ་གནས་ཁང་ནི་རྒྱ་ནག་གིས་ཕྱིའི་རྒྱལ་ཁབ་ཁག་ཏུ་དམར་ཤོག་ཚོགས་པའི་ལྟ་གྲུབ་ཁྱབ་སྤེལ་དང་རྒྱ་ནག་དམར་ཤོག་ཚོགས་པའི་ཆབ་སྲིད་རྒྱ་བསྐྱེད་ཀྱི་ལག་ཆ་ཞིག་ཏུ་གྱུར་ཡོད་པ་ལྟར། ཨ་རིས་རྒྱལ་སྲིད་བདེ་འཇགས་དང་སློབ་གསོའི་རང་དབང་སོགས་ལ་ཉེན་ཁ་ཆེ་བའི་ངོས་འཛིན་འོག ད་སྔ་བར་ཨ་རིར་ཡོད་པའི་ཁུང་ཙི་ལྟ་གནས་ཁང་ ༡༡༨  ལས་ ༡༠༤ སྒོ་བརྒྱབ་ཡོད་ཅིང་། དེ་བཞིན། འཇར་མན་དང་ཨོ་གླིང་སོགས་ནུབ་ཕྱོགས་རྒྱལ་ཁབ་མང་པོས་འདས་པའི་ལོ་ཟླའི་ནང་རིམ་བཞིན་ཁུང་ཙི་ལྟེ་གནས་ཁང་མང་པོ་སྒོ་བརྒྱབ་ཡོད།  རྒྱ་ནག་གཞུང་ཕྱོགས་ཀྱི་གྲངས་ཐོ་ལྟར་ན། འདས་པའི་ལོ་ཤས་ནང་ཕྱིའི་རྒྱལ་ཁབ་ ༡༦༠ ཡི་སློབ་ཆེན་དང་མཐོ་སློབ་ཁག་ནང་ཁུང་ཙི་ལྟེ་གནས་ཁང་ ༥༠༠ ལྷག་མཉམ་འབྲེལ་འཛུགས་སྐྲུན་དང་ཁུང་ཙི་སློབ་ཆུང་ཟེར་བ་ ༡༡༧༢ བཙུགས་ཡོད་པ་དང་། ད་ལྟའི་བར་སློབ་གྲྭ་དེ་དག་ནང་སློབ་གཉེར་བ་ཁྲི་ ༩༡༦ དང་། མི་གྲངས་ཁྲི་ ༡ ལྷག་གིས་ཁུང་ཙི་རིག་གནས་ལ་དང་ལེན་བྱས་ཡོད་སྐོར་སོགས་བརྗོད་ཡོད་པ་རེད།

གསར་འགོད་པ། སྐལ་བཟང་སྦྱིན་པ།