འདི་ལོའི་ཧྥ་རན་སིའི་བོད་དོན་རྒྱབ་སྐྱོར་ཚོགས་པའི་ལོ་འཁོར་ཚོགས་འདུ་དེ་ཟླ་འདིའི་ཕྱི་ཚེས་ ༡༠ ཉིན་འཚོགས་ཡོད་ལ། ཚོགས་འདུའི་ཐོག་འདས་ལོར་བཞག་པའི་གྲོས་གཞི་གྲོས་ཆོད་ཁག་ལ་བསྐྱར་ཞིབ་དང་། མ་འོངས་པར་ཧྥ་རན་སིའི་བོད་དོན་རྒྱབ་སྐྱོར་ཚོགས་པ་ཁག་དང་། ལྷག་པར་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་ཁག་གི་ལས་འགུལ་དང་ནུས་སྟོབས་རྣམས་ཕྱོགས་གཅིག་ཏུ་སྤུངས་ཐབས། དེ་བཞིན་བོད་དོན་རྒྱབ་སྐྱོར་ཚོགས་པ་ཁག་གིས་བོད་གཞུང་སྐུ་ཚབ་དོན་གཅོད་དང་། ས་གནས་བོད་རིགས་ཚོགས་པར་འབྲེལ་ལམ་གནང་ཐབས་བཅས་ལ་གོ་བསྡུར་གནང་ཡོད་འདུག ཐེངས་འདིར་བོད་དོན་རྒྱབ་སྐྱོར་ཚོགས་པ་ཆེ་ཆུང་ཉི་ཤུ་ལྷག་གི་སྐུ་ཚབ་དངོས་སུ་ཚོགས་བཅར་གནང་ཐུབ་ཡོད་འདུག
ཚོགས་འདུ་འདིའི་སྐོར་ལ་ཡུ་རོབ་སྐུ་ཚབ་དོན་གཅོད་བཀྲ་ཤིས་དབང་འདུས་ལགས་ཀྱིས་ ༼ སྤྱིར་བཏང་ཧྥ་རན་སིའི་ནང་བོད་དོན་རྒྱབ་སྐྱོར་ཚོགས་པ་མང་པོ་ཡོད་པ་རེད། སྔོན་མ་ལོ་ལྟར་ཚོགས་འདུ་རེ་སྐོང་གི་ཡོད་ནའང་ལོ་འགའི་སྔོན་ནས་མཚམས་ཆད་པ་རེད། ན་ནིང་སྐུ་མདུན་ཧྥ་རན་སིར་ཆིབས་བསྒྱུར་གནང་སྐབས་དང་བསྟུན་ནས་ཡང་བསྐྱར་ཚོགས་འདུ་ཐེངས་དང་པོ་དེ་བསྡུས་པ་རེད། ད་ལོའི་ཚོགས་འདུ་འདི་ཐེངས་གཉིས་པ་དེ་རེད། ཚོགས་འདུའི་དམིགས་ཡུལ་གཙོ་བོ་དེ་ན་ནིང་ཚོགས་འདུའི་སྐབས་བཞག་པའི་གྲོས་གཞི་གྲོས་ཆོད་ཁག་ལ་བསྐྱར་ཞིབ་བྱེད་རྒྱུ་དང་། དམིགས་བསལ་གྱིས་མ་འོངས་པར་ཧྥ་རན་སིའི་བོད་དོན་རྒྱབ་སྐྱོར་ཚོགས་པ་ཁག་ཡིན་ནའང་རེད། དེ་བཞིན་རྒྱལ་ཁབ་གཞན་གྱི་ཡིན་ནའང་རེད། རྒྱལ་སྤྱིའི་སྟེང་བོད་དོན་ལས་འགུལ་སྤེལ་སྐབས་ཚང་མ་མཉམ་རུབ་ཡོང་ཐབས་དང་། ལས་འགུལ་གང་འདྲ་ཞིག་སྤེལ་ན་ཡང་དེ་དག་གི་ཁ་ཕྱོགས་དང་ནུས་ཤུགས་གཅིག་ཏུ་སྤུངས་ཐབས་ལ་བསམ་ཚུལ་བསྡུ་ལེན་བྱེད་རྒྱུ་དང་། དེ་བཞིན་བོད་དོན་རྒྱབ་སྐྱོར་ཚོགས་པ་ཆེ་ཆུང་གང་འདྲ་ཞིག་ཡིན་ཡང་ས་གནས་རང་ན་ཡོད་པའི་བོད་གཞུང་སྐུ་ཚབ་དོན་གཅོད་དང་། བོད་རིགས་ཚོགས་པ། བོད་མི་བཅས་ལ་འབྲེལ་ལམ་སྔར་ལས་གཏིང་ཟབ་ཡོངས་ཐབས་བཅས་གཙོ་བོ་དོན་ཚན་འདི་གསུམ་པོ་དམིགས་ཡུལ་དུ་བཟུང་ནས་ཚོགས་འདུ་བསྐོངས་པ་རེད། ཞོར་ལ་ད་ལོའི་ཕྱི་ཟླ་བཅུ་གཅིག་པའི་ནང་ལྡི་ལིར་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་འཚོག་གཏན་འཁེལ་ཡོད་པ་དེར་ཧྥ་རན་སི་ནས་ཚོགས་ཞུགས་བྱེད་མཁན་གྱི་ཚོགས་པ་ག་ཚད་ཡོད་མེད་དང་། དངོས་སུ་ཚོགས་ཞུགས་མ་ཐུབ་པ་ཡིན་ནའང་ཚོགས་འདུའི་ནང་ཁོ་ཚོའི་བསམ་ཚུལ་ཡོང་ཐབས་ཀྱི་འབད་བརྩོན་ཀྱང་ད་རེས་ཚོགས་འདུ་འདི་བརྒྱུད་ནས་རག་ཐབས་བྱེད་ཆེད་རེད། ཚོགས་འདུའི་དམིགས་ཡུལ་ཟེར་ན་རེད། བགྲོ་གླེང་གནང་རྒྱུའི་དོན་ཚན་རྣམས་དེ་འདྲ་ཞིག་རེད། ༽ཅེས་ཐེངས་འདིའི་ཚོགས་འདུའི་དམིགས་ཡུལ་དང་གྲོས་གཞི་ཁག་གང་ཡིན་འགྲེལ་བརྗོད་གནང་སོང་།
ཉིན་དེའི་སྔ་དྲོ་ཚོགས་པ་ཁག་གིས་རྒྱལ་སྤྱིའི་བོད་དོན་ལས་འགུལ་འབྲེལ་མཐུད་ལས་ཁང་གིས་བཀྲམས་པའི་༼རྒྱལ་སྤྱིའི་ནང་བོད་དོན་མཉམ་ལས་ཡོང་ཐབས་ཀྱི་བསམ་ཚུལ་ཡིག་ཆ།༽ཅེས་པའི་ཐོག་བགྲེ་གླེང་དང་། ཕྱི་ལོ་ ༢༠༡༡ ལོ་ནི་ཧྥ་རན་སི་སྟོབས་ཆེན་རྒྱལ་ཁབ་ G20 དང་ G8 ཚོགས་གཙོ་རྒྱལ་ཁབ་ལ་འཁེལ་ཡོད་པ་དང་། རྒྱལ་ཁབ་དེ་དག་གི་ཚོགས་ཆེན་ཧྥ་རན་སིར་ཚོགས་སྐབས་བོད་དོན་རྒྱབ་སྐྱོར་ཚོགས་པ་ཁག་གིས་མཉམ་རུབ་ཐོག་བོད་དོན་ལས་འགུལ་སྤེལ་སྟངས་ལ་བགྲོ་གླེང་ཞིབ་ཚགས་གནང་ཡོད་པ་དང་། དེ་བཞིན་ལོ་དེའི་ཕྱི་ཟླ་བརྒྱད་པའི་ནང་རྒྱ་ནག་གི་སྲིད་འཛིན་ཧུའུ་ཅིན་ཐོ་ཧྥ་རན་སིར་ཕེབས་སྐབས་ངོ་རྒོལ་ལས་འགུལ་སྤེལ་སྟངས་ཐད་བགྲོ་གླེང་གོ་བསྡུར་གནང་ཡོད། ཚོགས་པ་ཁག་གིས་རྒྱ་ནག་གི་སྲིད་འཛིན་ཡོང་སྐབས་ངོ་རྒོལ་བྱེད་སྟངས་ལ་བོད་གཞུང་གི་ངོས་ནས་དེ་སྔ་བཞིན་ལངས་ཕྱོགས་ཡོད་མེད་དོགས་འདྲི་གནང་ཞིང་། དེར་ཡུ་རོབ་སྐུ་ཚབ་བཀྲ་ཤིས་དབང་འདུས་ལགས་ཀྱིས༼ ཕྱི་ལོ་ ༢༠༠༢ ནས་བོད་གཞུང་བཀའ་ཤག་གིས་བོད་རྒྱ་ཞི་མོལ་གྱི་ཁོར་ཡུག་བསྐྲུན་ཆེད་རྒྱ་ནག་གི་དཔོན་རིགས་ཚོ་ཕྱི་རྒྱལ་དུ་ཕེབས་སྐབས་ངོ་རྒོལ་ལས་འགུལ་མི་སྤེལ་རྒྱུའི་འབོད་སྐུལ་རབས་དང་རིམ་པར་ཞུས་པ་རེད། བོད་གཞུང་གིས་ཀྱང་དེ་ལ་ཐུགས་གཟབ་གནང་ནས་ཐ་ན་གསུང་བཤད་གནང་སྐབས་ཀྱང་ཞི་མོལ་གྱི་ཁོར་ཡུག་ལ་གནོད་གཞིའི་ཐ་སྙད་ཁག་གསུང་མཚམས་བཞག་པ་རེད། ཡིན་ནའང་ཁོར་ཡུག་བསྐྲུན་ཟེར་དུས་ཕྱོགས་གཉིས་ནས་ཡོང་དགོས་སྟབས་རྒྱ་ནག་གིས་ཁོར་ཡུག་ལ་ཕན་པའི་ལས་ཀ་གང་ཡང་མ་བྱས་པ་རེད། དེའི་ཐོག་ཏུ། སྐབས་དེ་རང་ལ་བོད་ནང་སློབ་གསོ་འདྲ་མིན་དང་། སྐུ་མདུན་གྱི་སྐུ་པར་ཡང་བཤམས་མི་ཆོག་པ་བཟོས་རེད། ང་ཚོའི་ངོས་ནས་མཐུན་འགྱུར་གནང་ནའང་རྒྱ་ནག་གིས་སྣང་མེད་བཞག་པ་རེད། སོང་ཙང་ ༢༠༠༦ ལོ་ནས་བཀའ་ཤག་གིས་འབོད་སྐུལ་དེ་ཕྱིར་འཐེན་གནང་བ་རེད། ཡིན་ནའང་ངོ་རྒོལ་ལས་འགུལ་སྤེལ་སྐབས་རྒྱ་ནག་རྒྱལ་ཁབ་ཀྱི་མཚན་མཐོང་དང་། རྒྱ་ནག་མི་དམངས་ཀྱི་སེམས་ཁམས་ལ་གནོད་གཞིའི་ལས་འགུལ་མི་སྤེལ་བའི་འབོད་སྐུལ་མུ་མཐུད་ཞུས་དང་ཞུ་བཞིན་ཡིན།༽ཅེས་ལན་འདེབས་གནང་།
ཉིན་རྒྱབ་ཏུ་བོད་དོན་རྒྱབ་སྐྱོར་ཚོགས་པ་ཁག་གིས་ས་གནས་སྐུ་ཚབ་དོན་གཅོད་དང་བོད་རིགས་ཚོགས་པར་མཐུན་ལམ་འཛིན་སྟངས་ཐད་གོ་བསྡུར་བྱས་ཡོད་ལ། གོ་བསྡུར་སྐབས་དངོས་སུ་ཚོགས་བཅར་མ་ཐུབ་པའི་ཚོགས་པ་ཁག་ཅིག་གིས་ཡིག་ཐོག་ནས་སྙན་ཞུ་ཞིག་ཕུལ་ཡོད་པའི་ནང་༼ ང་ཚོ་ཚོགས་པ་ཁག་ཅིག་མཉམ་འབྲེལ་གྱིས་སྙན་ཞུ་ཞིག་མི་འབུལ་ཐབས་མེད་བྱུང་། འདས་པའི་དུས་ཚོད་ནང་ཚོགས་པ་འདི་དག་གིས་བོད་དོན་ལས་འགུལ་ཆེ་ཕྲ་ཁག་སྤེལ་སྐབས་ཧྥ་རན་སིའི་བོད་རིགས་ཚོགས་པར་མཐུན་འགྱུར་རོགས་ཕན་དང་མཉམ་རུབ་ཀྱི་རེ་སྐུལ་ཞུས་ནའང་། བོད་རིགས་ཚོགས་པའི་ཚོགས་གཙོ་ཐུབ་བསྟན་རྒྱ་མཚོས་དུས་ཐོག་མཐུན་འགྱུར་རོགས་ཕན་མ་གནང་བའི་ཐོག ཚོགས་པ་འདི་དག་གི་མཚན་མཐོང་ལ་གནོད་གཞི་དང་། སེམས་ཤུགས་ཆགས་གཞིར་གྱུར་བའི་ཐད་གལ་ཆེ་བའི་གསུང་མོལ་དངོས་ཤུགས་ཅི་རིགས་ནས་གནང་བ་མ་ཟད། ཁོང་གི་གསུང་མོལ་དེ་དག་ལ་བརྟེན་ནས་ས་གནས་བོད་མིའི་སྤྱི་ཚོགས་ནང་ཚོགས་པ་འདི་དག་ལ་ལྡོག་ཕྱོགས་ཀྱིི་བག་ཆགས་ངན་པ་ཀྱང་བཞག་འདུག གནས་ཚུལ་འདི་ལ་བརྟེན་ནས་བོད་རིགས་ཚོགས་པ་དང་བོད་དོན་རྒྱབ་སྐྱོར་ཚོགས་པ་ཁག་ཅིག་གི་བར་མཐུན་ལམ་ཡག་པོ་མེད་པ་དང་། དེ་དག་ལས་རེ་འགས་བོད་རིགས་ཚོགས་པ་དང་འབྲེལ་ལམ་བཅད་ནས་དུས་ཡུན་ཀྱང་གང་འཚམ་ཕྱིན་ཡོད། ང་ཚོས་བོད་དོན་དང་འབྲེལ་བའི་ལས་འགུལ་གང་ཞིག་སྤེལ་བ་དེ་བོད་དོན་དང་བོད་མི་ཚོའི་ཆེད་དུ་ཡིན། ང་ཚོས་ད་རེས་ཚོགས་འདུའི་སྟེང་ཚོགས་ཞུགས་པ་ཚོས་གནད་དོན་འདི་རྩལ་ཏུ་བཏོན་ནས་གླེང་སློང་བྱེད་རྒྱུའི་རེ་བ་འཛིན་གི་ཡོད་ལ། གླེང་སློང་བརྒྱུད་མ་འོངས་པར་བོད་རིགས་ཚོགས་པར་མཐུན་ལམ་བསྐྱར་གསོ་དང་གོང་འཕེལ་ཡོང་བའི་རེ་བ་ཤུགས་ཆེན་པོའི་ཐོག་ནས་རྒྱག་གི་ཡོད། ༽ཅེས་དང་། དེ་བཞིན་དངོས་སུ་ཚོགས་བཅར་ཐུབ་པའི་
ཚོགས་པ་ཁག་ཅིག་གིས་ཀྱང་དེ་མཚུངས་ཀྱི་བསམ་འཆར་ཚོར་ཤུགས་ཆེན་པོས་གསུངས། འདིའི་ཐད་ཡུ་རོབ་སྐུ་ཚབ་བཀྲ་ཤིས་དབང་འདུས་ལགས་ཀྱིས་༼ གནད་དོན་འདི་རིགས་ཧྥ་རན་སི་གཅིག་པུའི་ནང་མ་རེད། ཡུ་རོབ་རྒྱལ་ཁབ་གཞན་པའི་ནང་ལའང་གནས་ཚུལ་འདི་ལྷག་བསྡད་ཀྱི་འདུག ང་ལ་འདིའི་སྐོར་གྱི་ཡི་གེ་གང་འཚམ་འབྱོར་ཡོང་གི་འདུག འཆར་ཟླའི་ཚེས་ ༡༤ དང་ ༡༥ ཉིན་གཉིས་རིང་ཧྥ་རན་སིར་ཡུ་རོབ་ས་གནས་ཁག་གི་བོད་རིགས་ཚོགས་པའི་ཚོགས་འདུ་ཞིག་འཚོག་གཏན་འཁེལ་ཡོད། ཚོགས་འདུ་དེ་བརྒྱུད་ནས་ངས་གནས་ཚུལ་འདི་རིགས་གཙང་མ་ཆགས་ཐུབ་པའི་རེ་བ་འཛིན་གི་ཡོད་ལ། མ་འོངས་པར་བོད་རིགས་ཚོགས་པ་ཁག་གིས་བོད་དོན་རྒྱབ་སྐྱོར་ཚོགས་པ་ཁག་དང་མཐུན་འགྱུར་རོགས་ཕན་དང་མཉམ་ལས་ཤུགས་ཆེ་རུ་འགྲོ་ཐུབ་པའི་རེ་བ་རྒྱག་གི་ཡོད། ༽ཅེས་འཆར་ཟླའི་ཚོགས་འདུ་དེ་གཙོ་བོ་ས་གནས་བོད་རིགས་ཚོགས་པ་ཁག་གིས་བོད་དོན་རྒྱབ་སྐྱོར་ཚོགས་པ་ཁག་དང་མཉམ་རུབ་དང་། ཚོགས་པ་དེ་དག་གི་ལས་འགུལ་ནང་ཆ་ཤས་ལེན་སྟངས་གཙོ་བོར་དམིགས་ཡོད་པའི་འགྲེལ་བརྗོད་གནང་།
ད་ལྟའི་ཆར་ཧྥ་རན་སིའི་ནང་བོད་དོན་རྒྱབ་སྐྱོར་ཚོགས་པ་ཆེ་ཆུང་བདུན་ཅུ་ལྷག་ཡོད་ལ། ད་ལོའི་ཚོགས་འདུ་འདིའི་སྟེང་ཚོགས་པ་ཁག་ཉི་ཤུ་ལྷག་གི་སྐུ་ཚབ་དངོས་སུ་ཚོགས་བཅར་གནང་ཡོད་འདུག
གསར་འགོད་པ། ཟླ་བ་ཚེ་རིང་། དྲ་ངོས་སུ་སྤེལ་མཁན། ལུང་རིགས་རྒྱལ།
རེ་བ་ཆེ་ས་ནས་བཤད་ན་རྒྱབ་སྐྱོར་ཞེས་བ་འདུན་སྐྱོད་ཀྱི་འགག་སྒོ་སྟེ་་ཕྱི་འཇང་གྱི་དུས་ཚོད་ཞིག་ལ་ཡང་ངོས་འཛིན་བྱས་ཀྱང་ཆོག་གང་ཡིན་ཞེས་ན་ང་ཚོ་བོད་མི་ཚང་མའི་བོད་དོན་ཞེས་བ་ནི་མི་བུ་སོ་སོ་ལ་འགན་མེད་པར་ཏེ་ནི་མི་རིགས་གཞན་དང་རྒྱལ་ཁབ་གཞན་གྱིས་རྒྱབ་སྐྱོར་ཁོ་ནའི་ཐག་གཅོད་བྱེད་དགོས་བ་ཞིག་བསམ་ནས་ཡོད་པ་འདྲ་ཡིན་ན་ཡང་རྒྱབ་སྐྱོར་བ་དག་ལ་ནམ་ཡང་སྨོན་ལམ་འདེབས།
ལམ་དབུ་མས་བཀའ་དྲིན་དང་ཀྲུང་ཧྭ་མི་དམངས་སྤྱི་མཐུན་རྒྱལ་གྱི་རྩ་ཁྲིམས་ལ་ངོས་བྱས་པས་རྒྱུ་མཚན་གྱིས་བོད་རྒྱབ་སྐྱོར་བ་ཚོ་ཕྱི་ནུབ་རྒྱབ་བཞིན་ཡོད།
སྤྱིན་བདག་བ་མོ་ཉལ་ཉལ་བྱས་དུས་་་ཨ་མཆོད་ཁྱི་ཟུག་ཟུག་བྱེད་ཀྱི་མ་རེད་པྭ།
༄༅༎ཕེ་རན་སིའི་གྲོས་ཚོགས་འཐུས་མི་ཁག་ཅིག་གིས་གྲོང་ཁྱེར་ལྷན་ཁང་གི་ཐོག་བོད་ཀྱི་རྒྱལ་དར་སྒྲེངས་འཛུགས་བྱ་རྒྱུ་བཀག་སྡོམ་དགོས་པའི་བསམ་འཆར་བཏོན་ཡོད་འདུག
འདས་པའི་ལོ་ངོ་ཁ་ཤས་རིང་གསུམ་བཅུའི་དུས་དྲན་ཉིན་ཕེ་རན་སིའི་གྲོང་ཁྱེར་ཕད་རོ་སི་ཡིས་གྲོང་སྡེ་ལས་ཁང་གི་རྒྱལ་སྒོའི་སྟེང་བོད་ཀྱི་རྒྱལ་དར་སྒྲེངས་བཙུགས་བྱས་ནས་ཕེ་རན་སི་གཞུང་གིས་བོད་དོན་ཐོག་རྒྱབ་སྐྱོར་གྱི་རྣམ་འགྱུར་བཏོན་གྱི་ཡོད་པ་རེད་ ཡིན་ནའི་ད་རེས་གཟའ་ལྷག་པའི་ཉིན་ཕེ་རན་སའི་གྲོས་ཚོགས་ཀྱི་འཐུས་མི་ཁག་ཅིག་དང་ཕད་རོས་སེ་གྲོང་སྡེ་ལས་ཁང་གི་འབྲེལ་ཡོད་མི་སྣ་ཉུང་ཤས་ནས་གསུམ་བཅུའི་དུས་དྲན་ཉིན་ཕད་རོས་སེའི་གྲོང་སྡེ་ལས་ཁང་གི་སྒོ་སྟེང་དུ་བོད་ཀྱི་རྒྱལ་དར་སྒྲེངས་འཛུགས་བྱ་རྒྱུ་དེ་ནི་ས་ཆ་འོས་འཚམས་ཞིག་མིན་པ་དང་གཞན་ཡུལ་གྱི་བདག་དབང་ལ་གུས་ཞབས་མེད་པའི་བྱ་སྤྱོད་དེ་རིགས་ནི་ཕེ་རན་སི་ཡུལ་གྱི་གྲོས་ཚོགས་འཐུས་མི་དང་མི་མང་གིས་འདོད་མོས་བྱེད་དགོས་ཡས་ཤིག་མ་རེད་ཅེས་ཕེ་རན་སིའི་གྲོས་ཚོགས་ཀྱི་འཐུས་མི་ཨིལྦ་པོ་ཛོ་ཌི་སྦོར་གོ་ནས་བརྗོད་འདུག་ལ་ བོད་ཀྱི་རྒྱལ་དར་འགྲེངས་འཛུགས་བྱ་རྒྱུ་མཚམས་འཇོག་གི་གྲོས་གཞི་ཕེ་རན་སི་གྲོས་ཚོགས་ནང་བཏོན་ནས་གྲོས་གཞིར་གྲོས་ཆོད་འཇོག་རྒྱུར་འབད་བརྩོན་བྱ་རྒྱུ་ཡིན་ལུགས་ཕད་རོས་སི་གྲོང་སྡེ་ལས་ཁང་གི་དཔོན་རིགས་ནས་བརྗོད་འདུག
Copyright © 1998-2010 Radio Free Asia. All rights reserved.
མཆན་བུ་བ་ཟུར་མཁར་ལགས། ༼ཕཱ་རན་སིའི༽ཞེས་བྲིས་ན་སྒྲ་གདངས་དང་ཡི་གེ་གཉིས་ཀ་ནོར་འདུག།
དེ་ལས་ང་ཚོའི་བོད་ཡིག་ནང་དུ་ཡོད་བསྡད་པའི་་་ཧྥ་རན་སི་་ཞེས་བྲིས་ན་མི་ལེགས་སམ།
ཕཱ་རན་སིའི་བོད་དོན་རྒྱབ་སྐྱོར་ཚོགས་པ་ཁག་དང་བོད་རིགས་ཚོགས་པའི་དབར་ལ་མི་མཐུན་པ་ཡོད་པ་དེ་སྔོན་ནས་གོ་མྱོང་ཡོད་ལ་དངོས་ཡོད་གནས་ཚུལ་ཡང་རེད། དེ་ནི་གོ་བདེ་ཁ་གསལ་དུ་བརྗོད་ན། ཨ་མདོ་ཐུབ་བསྟན་གྱིས་ཟམ་གདོང་རིན་པོ་ཆེའི་ཁོར་ཡུག་བསྐྲུན་པའི་སྲིད་ཇུས་ལག་བསྟར་བྱས་ཏེ་བོད་དོན་རྒྱབ་སྐྱོར་ཚོགས་པ་ཁག་གི་ལས་དོན་ལ་རྒྱབ་སྐྱོར་མ་བྱས་པ་ལས་བྱུང་བ་རེད། གནས་སྟངས་འདི་ཕཱ་རན་སི་དཔེ་མཚོན་ཙམ་རེད། ནུབ་ཕྱོགས་ཀྱི་ཡུལ་གྲུ་ཕལ་མོ་ཆེར་དེ་ལྟར་བྱུང་ཡོད། མདོར་བསྡུས་ན་རང་གཞུང་གི་ཕྱི་སྲིད་ནོར་འཁྲུལ་ཅན་ལས་བྱུང་བའི་མཇུག་འབྲས་རེད།
ཐེང་༨༩ བཀླགས་ཀྱང་བསམ་ཆར་གཅིག་ཀྱང་མི་འདུག
དེ་ནི་བོད་དོན་ལ་ཐུགས་ཁུར་མེད་པའི་ཀློགས་པ་པོ་རེད་ལབ་ནའང་ཐལ་དྲག་མི་འདུག
གོང་བཀོད་འདི་དངོས་གནས་ཡག་པོ་འདུག
སླད་མར་བོད་དོན་ཐོག་ལ་རྒྱབ་སྐྱོར་བ་རྣམས་དང་བོད་མི་ཐམས་ཅད་ཀྱིས་བོད་དོན་ལས་འགུལ་ཐོག་ལ་གྲ་བསྒྲིག་ཡོད་པ་བསྒྲིགས་འཛུགས་ཡོད་པ།
ལངས་ཕྱོགས་གཅིག་པ།
ལས་འགུལ་སྤེལ་སྟངས་གཅིག་པ།
དུས་ཚོད་གཅིག་པ་སོགས་རྡོག་རྩ་ཆིག་བསྒྲིལ་གྱི་བོད་དོན་བསྒྲུབ་པ་ཡིན་ན་ཉིན་མ་གཅིག་ལ་འཛམ་གླིང་སྟེང་བོད་དོན་ག་རེ་བྱས་པ་ཡིན་ནའང་གཅིག་མཚུངས་ཡོང་གི་རེད་ལ་ལས་འགུལ་དེ་སྟོབས་དང་ནུས་པ་ཡང་ཆེ་གི་རེད།