བོད་གཞུང་རྟེན་བཞེངས་ཆེན་མོའི་བགྲེས་སོང་སྤེན་པ་རྡོ་རྗེ་ལགས་ཀྱི་སྣེ་ཁྲིད་འོག ནོར་གླིང་གཙོས་པའི་ཉེ་འཁོར་གྱི་དགོན་སྡེ་ཁག་གསུམ་ནས་མཚན་རྟགས་ ༧༨༨ ཙམ་བསྡུ་རུབ་བྱས་ཏེ། དུས་ཡུན་འཁྱོལ་ལ་ཉེ་བའི་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་བགྲེས་ཡོལ་ལྟ་བུར་ངལ་གསོ་མི་གནང་པར་བསྐྱར་དུ་ཆོལ་ཁ་ཆོས་ལུགས་གང་རུང་གི་སྤྱི་འཐུས་འོས་གཞིའི་ཁོངས་སུ་ཞུགས་ཐབས་ཡོང་བའི་གསོལ་འདེབས་ཞུ་ཡིག་ཅིག་བཀའ་ཤག་ལ་ཕུལ་ཡོད་འདུག
ཞུ་ཡིག་དེར་མུ་མཐུད་བསྟན་དོན། བར་ལམ་ཨ་རིའི་རླུང་འཕྲིན་ནང་སྐུ་མཆོག་ནས་མཛད་འཁུར་འཁྱོལ་རྗེས་བགྲེས་ཡོལ་གྱི་ལྷོད་བདེར་བཞུགས་རྒྱུ་འགྲོ་བ་མིའི་ཐོབ་ཐང་ཡིན་ལུགས་གསུངས་པ་དེ་དག་ཐུགས་ཁག་མེད་པ་ལྟ་བུ་ཡང་། དེ་ལྟར་སྐྱེ་བོ་ཕལ་བའི་བསམ་སྤྱོད་ལྷུར་བཞེས་ན་གཏན་ནས་མི་འགྲིག་ཅིང་། གང་ལགས་ཤེ་ན། སྐུ་མཆོག་བསམ་བཞིན་བསྟན་འགྲོའི་དོན་དུ་སྐུ་སྐྱེ་བཞེས་པའི་སྐྱེ་བུ་དམ་པ་ཞིག་ཡིན་ཞིང་། བོད་ཀྱི་བསྟན་སྲིད་ཉག་ཕྲ་ཛ་དྲག་ལ་གྱར་བའི་དུས་འདིར་དོན་ཉུང་བྱ་ཉུང་དུ་བཞུགས་ན་སྐྱེས་བུ་དམ་པའི་ཐུགས་བསྐྱེད་དམ་བཅའ་དང་འགལ་བ་བདག་ཅག་སྐྱེ་བོ་ཕལ་བའི་མཐོང་ཚུལ་ཙམ་མིན་པ། དེ་ཡང་༸རྒྱལ་མཆོག་བསྐལ་བཟང་རྒྱ་མཚོའི་གསུང་ལས། ལས་དང་པོ་གྱུར་བའི་གང་ཟག་བཞིན། ། དོན་བྱ་བ་ཉུང་ངུ་ལྷུར་བཞེས་པ། ། སྤྱིར་དམ་པས་བསྔགས་འོས་མཆོག་ཡིན་ཀྱང་། ། ཁྱེད་སེམས་དཔའ་ཆེ་ལ་མཛེས་མ་ཡིན། ། སྔོན་བསྟན་པ་འཛིན་པར་དམ་བཅས་བཞིན། ། དེང་ལྷག་པར་སྙིང་སྟོབས་གོ་བཞེས་ལ། ། གཞན་བསྡུ་བ་རྣམ་བཞིའི་འཕྲིན་ལས་ཀྱིས། ། ཕན་བདེ་ལེགས་སྒོ་བརྒྱ་འབྱེད་འཚལ་ལོ། ། ཞེས་གསུངས་པའི་རྒྱལ་བའི་བཀའ་ནན་ཞིང་བརྗིད་པ་འདི་ལ་དགོངས་ནས་བསྟན་འགྲོ་སྤྱི་དང་ལྷག་པར་པུར་རྒྱལ་བོད་ཀྱི་བསྟན་སྲིད་འགྲོ་དོན་སླད་ཐུགས་སྟོབས་བསྐྱེད་དེ་༸གོང་ས་སྐྱབས་མགོན་ཆེན་པོའི་དབུ་འོག་དཔུང་འདེགས་ཀྱི་སྲི་ཞུའི་དཀྱིལ་འཁོར་འདིའི་ནང་མུ་མཐུད་ཐུགས་འགན་བཞེས་གནང་ཡོང་བ་ཞེས། ནོར་གླིང་རྟེན་དགེ་རྒན་པོ་སྤེན་པ་རྡོ་རྗེས་སྤྱི་སྨན་ལྷག་བསམ་ཐོག་ནོར་གླིང་དང་། ནོར་གླིང་ཉེ་འདབས་ཀྱི་དགོན་སྡེ་ཁག་གསུམ་བཅས་ནས་དུས་ཐུང་ནང་གདུང་སེམས་མཉམ་འདེགས་གནང་མི་སེར་སྐྱ་ཞལ་གྲངས་ ༧༨༨ ཀྱིས་མཚན་རྟགས་བཅས། ཕྱི་ལོ་ ༢༠༡༠ ཟླ་ ༨ ཚེས་ ༢༠ ཉིན་བཙུན་དགོན་སྒྲོལ་མ་གླིང་གི་སྐུ་ཚབ་དང་ནོར་གླིང་སྐུ་ཚབ། གུས་རྟེན་དགེ་རྒན་པོ་བཅས་མི་གསུམ་རང་གཞུང་བཀའ་ཤག་ཏུ་ངོ་བཅར་གྱིས་དཔལ་ལྡན་སྐུ་ངོ་བཀའ་དྲུང་བརྒྱུད་མི་རྗེ་བཀའ་ཁྲི་ཟམ་གདོང་རིན་པོ་ཆེ་མཆོག་ལ་ཕུལ་སྙན་ཞལ་བཤུས་ཟུར་འབུལ་ཞུས་པར་གཟིགས་ཞིབ་དང་འབྲེལ་དགོངས་མཐུན་ཡོད་རིགས་ནས་དེ་དོན་ཐུགས་འཇགས་ཡོང་བའི་གཞེན་བསྐུལ་གསལ་བསྒྲགས་སུ་ཕུལ། ། ཞེས་བཀོད་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
༈ ཟམ་གདོང་རིན་པོ་ཆེ་སྤྱི་འཐུས་སུ་བཞེངས་རྒྱུར་དགོངས་འཆར་ཕུལ་མཁན་རྣམས་ལ་ 100% རྒྱབ་སྐྱོར་ཞུ་རྒྱུ་ཡིན། ཁྱེད་རྣམ་ཚོས་སྤྱི་དོན་གྱི་ཆེད་དུ་དགོངས་པ་ཡག་པོ་ཞེ་དྲགས་བཞེད་འདུག། ཐུགས་རྗེ་ཆེ་། ད་ལྟའི་ང་ཚོའི་གནས་སྟངས་ཀྱི་ཆ་ནས་སྤྱི་འཐུས་ཟེར་དུས་ཟམ་གདོང་རིན་པོ་ཆེ་ལྟ་བུ་ཤེས་འཇོན་ཡོད་པའི་སྤྱི་མི་ཚད་ལྡན་ཞིག་དགོས་པ་ལས་ལུང་ཚན་ཕྱོགས་རིས་སོགས་རྙོག་ཁྲ་བཟོ་མཁན་བོང་བུ་སྟག་ལྤགས་གྱོན་མཁན་མང་པོ་སླེབས་ན་ཉེན་ཁ་མ་རེད་པས།།
དེང་སངས་མི་ཁ་ཤས་ནས་རྒྱ་མི་ལས་ཀྱང་སེར་མོ་བ་ཚོ་ལ་སྡོང་སེམས་ཆེ་བ་འདི་གང་ཡིན་ནམ། བོད་པས་དགྲ་འདུལ་གཉེན་སྐྱོང་དགོས་ཙང་གོང་ས་མཆོག་གི་དབུས་པའི་སེར་མོ་བ་ཡོང་དགོངས་ཞུས་དགོས་ཀྱི་ཡོད་པ་འདྲ། ཡང་ན་གོང་ས་མཆོག་ནས་དགྲ་གསོད་གཉེན་སྐྱོང་རུང་ལ། སེར་མོ་བ་གཞན་ནས་མི་རུང་ཟེར་རྒྱུ་ཡིན་པ་འདྲ། ད་ལྟའི་ཆར་སྐྱ་སེར་རྩོད་པའི་སྐབས་མ་རེད། ཡུལ་དུས་དེའི་སྐབས་སུ་སྐྱ་སེར་ཁྱད་མེད་ནུས་པ་སུ་ཆེ་དེའི་སྲིད་སྐྱོང་ན་ལེགས།
འོད་ཡུག་པའི་འཁྱམས་པོ་ལགས།
འ་ཆད་འུ་ཐུགས་དུས་མི་དྲན་དགུ་དྲན་མ་བསམ་དགུ་བསམ་ཡོང་གི་རེད་དེ་དུས་ཆོལ་གྱི་རེད་ཆོལ་ནས་མདུན་ལམ་ཤོར་གྱི་རེད།
སྲིད་རང་སྐྱ་བོས་བསྐྱངས་ནས་དགྲ་འདུལ་གཉེན་སྐྱོང་བྱེད་དགོས།
དེ་འདྲ་གནང་ན་ད་ལྟའི་ཡ་ང་བའི་གནས་སྟངས་འདི་ལས་གྲོལ་གྱི་རེད།
བཀའ་ཁྲི་ཟམ་གདོང་རིན་པོ་ཆེ་མཆོག་ཡང་བསྐྱར་མདོ་སྟོད་སྤྱི་མཐུས་སུ་ཕེབས་རོག་གནང་།
དྲ་གྲོགས་གཅེན་པོ་ཟེར་བས་བཤད་པར་བདེན་ཁ་མིན་འདུག་ཅེས་ཤོད་དཀའ་ན་ཡང་དོན་ངོ་མ་རང་ཅག་རྣམས་ཀྱི་གནས་ཡུལ་ག་བ་ཡིན་མིན་དང་། གནས་འདིར་གནས་དགོས་པའི་རྒྱུ་མཚན། ཇི་ལྟར་བྱས་ཏེ་ང་ཚོ་གཞན་ཡུལ་དུ་གྱར་དགོས་དོན། ད་དུང་རང་ཅག་རྣམས་རྒྱལ་ཁབ་གཞན་ལ་འགྲན་བཟོད་པའི་གནས་མེད་པ། ང་ཚོར་ཁ་ཚ་དགོས་གཏུགས་ཀྱིས་ལག་ལེན་ག་རེའི་ཐོག་ཕྱིན་ན་མ་འོངས་པར་རྒྱལ་ཁབ་དང་མི་རིགས་ཀྱི་ཁེ་ཕན་ཆེ་བ་མ་ཤེས་པས་དེ་ལྟར་བྲིས་པ་ཡིན་རྒྱུ་རེད། གྲོགས་མཆོག་མདོར་བསྡུས་ན་ཁྱེད་ཀྱིས་བཤད་པའི་སེར་མོ་བའི་བཀའ་ཁྲི་ཐོག་མ་ཡིན་ལ་ཕྱིས་འབྱུང་དེ་ལྟར་མི་འབྱུང་བའི་སྲིད་ཇུས་ཞིབ་གཏན་འབེབས་བྱེད་དགོས་ཟེར། མི་ཤེས་སྔ་ཕྱི་མེད་པའི་སྐད་ཆ་དེ་རིགས་དྲ་རྒྱ་འདིར་མ་བཀོད་ན་གནོད་ལས་ཕན་ཆེ། ད་ལྟའི་ཆར་རང་ཅག་རྣམས་འ་ཆད་འུ་ཐུག་གི་དུས་འདིར་སྐྱ་སེར་དང་ཆོལ་ཁའི་དབྱེ་མཚམས་མེད་པར་བསྟན་སྲིད་མི་ིརགས་ལ་ཕན་སེམས་ཀྱི་དགོངས་པ་བཞེས་དགོས་པ་གལ་ཆེར་མངོན།
ཟམ་གདོང་རིན་པོ་ཆེ་མཆོག་བོད་ཀྱི་བཀའ་བློན་ཁྲི་པའི་ལས་འགན་རྫོགས་ནས་ད་དུང་ཆོལ་ཁ་ཆོས་ལུགས་ཀྱི་སྤྱི་མཐུས་སུ་བཞུགས་རོགས་ལབ་པ་འདི་ནི་མ་འོངས་པའི་བོད་པའི་རིགས་གཞུང་ལ་འགན་མེད་པའི་ཆོལ་ལབ་རང་རེད།
ད་ལྟའི་སྐབས་ཀྱི་སེར་མོ་བའི་བཀའ་ཁྲི་ཐ་མ་དེ་ཁོང་ཆགས་ཡོད་པ་རེད་ལ་མ་འོངས་པར་བོད་པའི་ཆབ་སྲིད་ནང་སེར་མོ་བའི་རིགས་གཏན་ནས་བཞུགས་མི་ཆོག་པའི་སྲིད་ཁྲིམས་ཞིག་ངེས་པར་དུ་བཟོ་དགོས།
དེ་འདྲ་གནང་ན་བོད་པའི་ཆོས་དང་ཆབ་སྲིད་རང་བཞིན་གྱི་ཁ་བྲལ་གྱི་རེད་ལ་ཆོས་ལུགས་མི་སྣས་རྒྱལ་བ་ཡང་དག་པ་རྫོགས་པའི་སངས་རྒྱས་ཀྱི་གསུངས་པའི་བཀའ་དྲི་མ་མེད་པ་མདོ་སྔགས་གཉིས་ཀྱི་བསྟན་པ་རིན་པོ་ཆེ་དེ་ཉིད་འགྲོ་བ་རིགས་དྲུག་སེམས་ཅན་ཐམས་ཅད་ཀྱི་དོན་དུ་ཉིན་མཚན་ཀུན་ཏུ་བཤད་བསྒྲུབ་ལས་གསུམ་སྒོ་ནས་བསྟན་པ་དང་སེམས་ཅན་ལ་ཕན་པའི་སླད་དུ་ཞབས་ཞུ་བསྒྲུབ་དགོས་ལ་བོད་ཀྱིི་རྒྱལ་ཁབ་འདི་ཉིད་སྐྱོང་མཁན་ནི་སྐྱ་བོ་ཡིན་དགོས་ལ་དེ་དགྲ་འདུལ་གཉེན་སྐྱོང་ཀྱི་སྒོ་ནས་བོད་རྒྱལ་ཁབ་འདི་ཉིད་འཛམ་གླིང་གི་མདུན་གྲལ་དུ་སླེབས་ཐུབ་པའི་ཐབས་ཤེས་བྱེད་དགོས།
ནང་པ་སངས་རྒྱས་པའི་རྗེས་འཛིན་སེར་མོ་བ་ཞིག་ཡིན་ཚེ་དེས་དུས་ནམ་ཡང་ཉེ་དགའ་ཕྱོགས་ཞེན་དང་དགྲ་འདུལ་གཉེན་སྐྱོང་བྱེད་མི་ཆོག་པ་གསལ་པོ་རེད།
རྒྱལ་ཁབ་ཞིག་དང་ཚོགས་པ་ཞིག་མདོར་ན་འཇིག་རྟེན་པ་ཞིག་གིས་ངོས་ནས་བཤད་ན་དགྲ་འདུལ་གཉེན་སྐྱོང་དང་རང་རྒྱལ་གྱི་བསམ་བློ་ཞིག་ངེས་པར་དུ་དགོས།
མཐའ་དོན་བླ་ན་མེད་པའི་མཁས་དབང་ཟམ་གདོང་རིན་པོ་ཆེ་མཆོག་བཀའ་ཁྲིའི་ལས་འགན་ཡོངས་སུ་ལེགས་གྲུབ་བྱུང་བ་དང་རིན་པོ་ཆེ་དབེན་པའི་གནས་སུ་རང་སེམས་ཀྱི་གནས་ལུགས་བཙལ་ནས་བཞུགས་པའི་གསོལ་བ་ཕུར་ཚུགས་སུ་འདེབས་ངེས་ཡིན།
དུས་ད་ན་ས་བཟུང་བོད་ཀྱི་ཆབ་སྲིད་ནང་སེར་མོ་བའི་རིགས་མི་ཡོང་བའི་གསོལ་བ་འདེབས་ངེས་ཡིན་ལ་རིན་པོ་ཆེ་མཆོག་ནས་ཀྱང་དེ་དོན་སྐྱབས་འཇུག་ཡོང་བའི་སྨོན་འདུན་བཅས།
ངས་བལྟས་ན་ནོར་གླིང་ཉེ་འདབས་ཀྱི་དགོན་སྡེ་ཁག་གསུམ་གྱིས་གསོལ་བ་བཏབ་པ་བཞིན་བཀའ་ཁྲི་ཟམ་གདོང་རིན་པོ་ཆེ་མཆོག་གཞུང་ས་དགའ་ལྡན་ཕོ་བྲང་གི་ལས་བྱེད་ལ་བསྐྱར་དུ་གསོལ་བ་བཏབ་པ་ལས། མཁས་དབང་ཁོང་ལ་བཀའ་ཁྲིའི་ལས་ཡུན་རྫོགས་མཚམས་སུ་གཞུང་ས་དགའ་ལྡན་ཕོ་བྲང་དང་བོད་བསྟན་པ་ཆབ་སྲིད་ཀྱི་ཆེད། ཡང་ན་མ་འོངས་བོད་ཀྱི་སོན་རྩ་ཚོར་དམིགས་ནས་བཀའ་རྩོམ་གང་མང་ཞིག་མི་འགྱང་བར་འབྲི་རྩོམ་གནང་རོགས་ཞེས་ཁྱེད་ཚོས་གསོལ་བ་རེ་ཐོབས་ར་དེའི་ཡག་གི་རེད་འདྲ་སོང་།
གུས་པ་རྐང་གསུམ་གྱིས་དུས་ནས་དུས་སུ་མཁས་དབང་ཁོང་ལ་འདི་ལྟར་གསོལ་བ་འདེབས་བཞིན་ཡོད་ཡ།