གྲྭ་དབང་འདུས་རྒྱ་མཚོ་ལགས་ཀྱི་གཅེན་པོ་ཨ་པད་སྐལ་བཟང་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ལོ་ ༢༠༠༩ ལོའི་ཟླ་ ༨ པའི་ཚེས་ ༢ ཉིན་སྡེ་དགེ་དཔལ་ཡུལ་དུ་སློབ་གཉེར་གནང་བཞིན་པའི་གྲྭ་དབང་འདུས་རྒྱ་མཚོ་ཆབ་མདོར་ཕྱིན་ཏེ། ཁོང་གཅིག་པུས་ཆ་མདོའི་ཁྲོམ་གཞུང་དུ་༸རྒྱལ་བ་རིན་པོ་ཆེ་བོད་དུ་ཕེབས་འཇུག་དགོས། བོད་ལ་རང་བཙན་དགོས་ཞེས་ཞི་བའི་ངོ་རྒོལ་གྱི་ལས་འགུལ་སྤེལ་མཐར། རྒྱ་ནག་གཞུང་གིས་ཉིན་དེར་འཛིན་བཟུང་བྱས་ཡོད་འདུག་ལ། ཁོང་གིས་སྐད་འབོད་བྱས་པར་རྐྱེན་བྱས་ཏེ་ཁོང་གི་ཕ་པདྨ་ཡེ་ཤེས་ཡང་ལས་གནས་ནས་ཕྱིར་ཕུད་བཏང་འདུག ད་ལྟའི་བར་ཁོང་ནང་མི་གཉེན་འབྲེལ་སུལའང་ཐུག་འཕྲད་ཀྱི་གོ་སྐབས་མ་སྤྲད་པར་གནས་སྟངས་ཤེས་རྟོགས་བྱུང་མེད་ཀྱང་། ཟླ་འདིའི་ཕྱི་ཚེས་ ༨ ཉིན་ཆབ་མདོ་མི་མང་ཁྲིམས་ཁང་གིས་ཁོང་ལ་ལོ་ ༡༣ གྱི་ཁྲིམས་ཐག་བཅད་ཡོད་འདུག
རང་ལོ་ ༢༣ ཡིན་པའི་གྲྭ་དབང་འདུས་རྒྱ་མཚོ་ལགས་ནི། ཕྱི་ལོ་ ༡༩༨༤ ལོར་ཁམས་གོ་འཇོ་གླིང་ཆུང་ར་ས་གྲོང་དུ་ཕ་པདྨ་ཡེ་ཤེས་དང་མ་ཚེས་དགའ་གཉིས་ཀྱི་བུ་རུ་སྐྱེས་ཤིང་། ཆུང་དུས་ནས་གོ་འཇོ་ར་རྒྱ་དགོན་པའི་ཆོས་སྒོར་ཞུགས་ཏེ་དགོན་པའི་འདོན་རྟ་དབྱངས་དང་ཆོ་ག་ཕྱག་ལེན་ལེགས་པར་སྦྱངས་ཡོད་པ་མ་ཟད། ཕྱིས་སུ་དཔལ་ཡུལ་དགོན་པའི་བཤད་གྲྭར་ཞུགས་ཏེ་འཛིན་རིམ་ལྔ་པའི་བར་སློབ་གཉེར་གནང་ཡོད་པ་རེད།
གསར་འགོད་པ། དོན་གོ
ཡང་གཅིག་བཟུང་འདུག
མགྱོགས་མྱུར་བཙོན་གྲོལ་ཡོང་བར་ཤོགས།
ང་རང་ལ་དེ་ལས་ལབ་ཡག་མི་འདུག