གྲོས་ཚོགས་སུ་བཀའ་ཁྲིའི་ཡུན་ཚད་ལ་བཅའ་ཁྲིམས་བསྐྱར་བཅོས་ཀྱི་ཡིག་ཆ་ཞིག་བསླེབས་པར་ཚོགས་མིའི་སུམ་ཆ་གཉིས་ཀྱི་རྒྱབ་སྐྱོར་མ་ལོན་པར་ཟགས་ཡོད།
དེ་རིང་སྔ་དྲོར་བོད་མི་མང་སྤྱི་འཐུས་གྲོས་ཚོགས་སུ་སྤྱི་འཐུས་ཚེ་རིང་གཡུ་སྒྲོན་ལགས་ཀྱི་མཚན་ཐོག་ནས་གཞུང་འབྲེལ་བཅའ་ཁྲིམས་བསྐྱར་བཅོས་ཁྲིམས་འཆར་ཡིག་ཆ་ཨང་ ༤༣ པ་བསྣམས་ཕེབས་ཡོད་ལ། ཡིག་ཆ་དེ་ནི་ད་ལྟའི་བཅའ་ཁྲིམས་ཀྱི་དགོངས་དོན་ལྟར། བཙན་བྱོལ་བོད་གཞུང་གི་བཀའ་བློན་ཁྲི་པའི་ཡུན་ཚད་བསྟུན་མར་ཐེངས་གཉིས་ལས་མི་ཆོག་པ་ཕྱིར་བསྡུ་བྱ་རྒྱུ་དེ་ཡིན།
ཡིག་ཆ་ཨང་ ༤༣ ནང་གསལ་དོན། དོན་ཚན་ཉེར་གཅིག་པ། བཀའ་བློན་ཁྲི་པའི་འོས་བསྡུ་ཞེས་པའི་ནང་གསེས་ ༣ ༼ ཇ ༽ ཡུན་ཚད་གཉིས་བསྟུད་མར་བཀའ་བློན་ཁྲི་པའམ་བཀའ་བློན་གྱི་ལས་ཁུར་བྱེད་བཞིན་པ་མ་ཡིན་པ་ཞེས་པ་ཕྱིར་བསྡུ་ཞེས་གསལ་ཡོད།
ཡིན་ནའང་། གྲོས་ཚོགས་སྐབས་བཅུ་བཞི་བའི་ཚོགས་དུས་བཅུ་བའི་སྤྱི་འཐུས་ཀྱི་རྩ་འབོར་ལས་སུམ་ཆ་གཉིས་ཀྱི་རྒྱབ་སྐྱོར་མ་ལོན་པར་བརྟེན། ཡིག་ཆ་ཨང་ ༤༣ དེ་ཟགས་ཡོད་ལ། ཡིག་ཆ་དེ་གྲོས་ཚོགས་སུ་སླེབས་རྗེས་བཀའ་ཁྲི་མཆོག་གིས། གྲོས་ཚོགས་སུ་ཡིག་ཆ་དེ་ཚུད་གི་མ་རེད་བསམ་པའི་རེ་བ་བྱུང་ལ་ཡིད་ཆེས་ཀྱང་ཡོད་ནའང་། ཡིག་ཆ་དེ་ཚུད་པར་བརྟེན་ཧ་ཅང་གི་ཐ་ཞན་ཏུ་མཐོང་གི་ཡོད། ཅེས་བློ་ཕམ་གྱིས་གསུངས།
སྐབས་དེར་ཁོང་གིས་གསུངས་དོན། བཅའ་ཁྲིམས་ནང་ལས་ཡུན་གཉིས་བསྟུད་མར་བྱས་པ་མ་ཡིན་པ་ཟེར་བ་དེར་བསམ་ཞིག་མ་བྱས་པ་དང་ཧོལ་རྒྱུག་གི་ངང་ནས་བཅུག་པ་དེ་འདྲ་མིན་པར་བསམ་བློ་མང་བོ་བཏང་བ་དང་། ཞིབ་འཇུག་མང་བོ་བྱས་ཏེ་དགོས་པ་རྒྱུ་མཚན་ཡོད་པའི་ཐོག་ནས་བཅུག་པ་ཞིག་རེད། དེའི་ཐོག་ཏུ་སྔོན་མ་བགྲོ་གླེང་གནང་མྱོང་ནའང་ཚུད་མེད། དེ་མ་ཚུད་པ་དེ་ནི་ཡང་དག་པ་ཞིག་རེད་བསམ་གི་འདུག་ཅེས་གསུངས།
ཡང་ཁོང་གིས། མང་གཙོའི་མངོན་འདོད་ཟེར་བ་དེ་གལ་ཆེན་པོ་རེད་ལ། དེ་ལ་འཛིན་སྐྱོང་དང་གྲོས་ཚོགས་སུ་ཡིན་རུང་ཚོར་སྣང་མེད་པ་ལྟར་བྱས་ན་འགྲིག་གི་མེད་པར། ཐུགས་སྣང་གནང་དགོས་ཀྱི་ཡོད་མོད། དུས་ཤེས་པ་དང་སྐབས་ཤེས་པ་ཞིག་དགོས་ལ། ད་ལྟའི་བཅའ་ཁྲིམས་འདིར་འགྱུར་བ་འགྲོ་མིན་ནི་ད་ལྟ་བཀའ་བློན་ཁྲི་པའི་ལས་གནས་ཞུ་བཞིན་པའི་གང་ཟག་དེ་ལ་ཕན་གནོད་གང་ཡང་མེད་པར། གང་ཟག་དེའི་རང་དབང་ག་དུས་ཡིན་ནའང་གང་ཟག་དེས་ཉར་རྒྱུ་མ་གཏོགས། བཅའ་ཁྲིམས་བསྒྱུར་བ་བཏང་ནས་འཕྲོག་ཐུབ་པ་དང་། བསྒྱུར་བ་མ་བཏང་ནས་འཕྲོག་ཐུབ་པ་གཉིས་ཀ་མེད་ཅེས་དང་། ད་ལྟའི་གནས་སྐབས་སུ་དབུས་སྤྱི་ཁྱབ་འོས་བསྡུ་ལྷན་ཁང་གིས་སྐབས་གསུམ་པའི་བཀའ་ཁྲིའི་འོས་བསྡུའི་ལས་རིམ་ཁྱབ་བསྒྲགས་བྱས་ཟིན་པ་དང་། མང་ཚོགས་ནང་ཚ་ཚ་འུར་འུར་གྱིས་ལས་འགུལ་འགྲོ་བཞིན་པའི་སྐབས་འདིར་བཅའ་ཁྲིམས་བསྐྱར་བཅོས་ཀྱི་ལས་རིམ་བསྣམས་ཕེབས་པ་འདི། ཁྲིམས་ཀྱི་དབང་བསྒྱུར་གྱི་ལྟ་གྲུབ་དང་མཐུན་གི་མི་འདུག་ཅེས་གསུངས་ཡོད།
སྤྱི་འཐུས་ཚེ་རིང་གཡུ་སྒྲོན་ལགས་ཀྱིས་འདི་གའི་གསར་འགོད་པར། ཁོ་མོས་བཀའ་ཁྲིའི་ཡུན་ཚད་བསྐྱར་བཅོས་ཀྱི་ཡིག་ཆ་དེ་ཁྱེར་ཡོང་དོན། ད་ལྟའི་བཀའ་ཁྲི་ཙམ་མིན་པར་མ་འོངས་པར་བཀའ་བློན་ཁྲི་པ་གཞན་རྣམས་ལའང་ལམ་ཁ་ཡོད་པ་ཞིག་ལ་བསམ་བློ་བཏང་བས་ཡིན་ཞེས་གསུངས།
གང་ལྟར་བཀའ་ཁྲིའི་ལས་ཡུན་འདིའི་སྐོར་ལ་ལོ་སྔོན་མར་ཧོང་སུར་མི་མང་གིས་བོད་མི་མང་སྤྱི་འཐུས་གྲོས་ཚོགས་སུ་སྙན་ཞུ་ཕུལ་ཏེ། བཙན་བྱོལ་དུ་ད་ལྟའི་ཆར་ཤེས་འཇོན་གང་ཐད་ནས་ད་ལྟའི་བཀའ་བློན་ཁྲི་པ་ལས་ལྷག་པའི་བཀའ་བློན་ཁྲི་པར་འོས་པའི་མི་གཞན་པ་མི་འདུག་སྟབས། བཀའ་བློན་ཁྲི་པར་བསྟུད་མར་སྐབས་གཉིས་ལས་བཞུགས་མི་ཆོག་པའི་བཅའ་ཁྲིམས་དེར་བོད་མི་མང་སྤྱི་འཐུས་གྲོས་ཚོགས་བརྒྱུད་བསྐྱར་བཅོས་དང་ཕྱིར་བསྡུ་གནང་དགོས་སྐོར་ཞུས་ཡོད་ལ། དེ་བཞིན་ཉེ་ཆར་ཡང་མོན་གྷོ་འདོད་རྒུ་གླིང་ནས་མི་ ༩༦༠ ཙམ་གྱིས་མཚན་རྟགས་བཀོད་པའི་སྙན་ཞུའི་ཡི་གེ་ཞིག་གྲོས་ཚོགས་སུ་ཕུལ་ཏེ། བཀའ་ཁྲིའི་ཡུན་ཚད་ལ་བསྒྱུར་བ་གཏོང་དགོས་སྐོར་ཞུས་ཡོད་འདུག
དེ་ལྟར་གྲོས་ཚོགས་སུ་བཀའ་ཁྲིའི་ཡུན་ཚད་སྐོར་ལ་བཅའ་ཁྲིམས་བསྐྱར་བཅོས་གཏོང་ཐུབ་མེད་ནའང་། ཁ་སང་གྲོས་ཚོགས་སྐབས་བོད་མི་མང་སྤྱི་འཐུས་ག་ཟི་དགེ་བཤེས་ཚེ་རིང་པོ་ལགས་ཀྱིས་གྲོས་འཆར་བཏོན་པ་ལྟར། ཨ་རི་དང་ཁེ་ན་ཌ་ཁུལ་དུ་མི་གྲངས་གཅིག་བཅས་བོད་མི་མང་སྤྱི་འཐུས་འོས་འདེམས་བྱུང་བ་ཡིན། ཞེས་པར། གྲོས་ཚོགས་སྤྱི་མོས་ཐོག བྱང་ཨ་རི་ཁུལ་དུ་མི་གྲངས་གཉིས་ཞེས་བསྐྱར་བཅོས་གནང་ཐུབ་པ་བྱུང་ཡོད།
གསར་འགོད་པ། ཨ་རིག་འགྱུར་མེད།
བཅའ་ཁྲིམས་ལ་བསྒྱུར་བཅོས་གཏོང་དང་མི་གཏོང་སྤྱི་མཐུས་རྣམས་ཀྱི་ཕྱག་ལ་ཡོད་པ་ཞིག་ལས་བཏང་མི་ཆོག་པ་ཞིག་ག་ལ་ཡིན་ཟབ་མདོང་རིན་པོ་ཆེས། དུས་ཤེས་པ་དང་སྐབས་ཤེས་པ་ཞིག་དགོས་ལ། གསུང་པ་ལ་གོ་རྒྱུ་ཞིག་ཡོད་པ་རེད། བཅའ་ཁྲིམས་ནང་ཨ་རི་དང་ཁེ་ན་ཌ་ཁུལ་དུ་སྤྱི་མཐུས་ས་དམིགས་གཅིག་ལས་མེད་ཀྱང་འདི་ལོ་ནས་ཁུལ་འདིའི་མི་འབོར་ལ་ཞིགས་ཏེ་སྤྱི་མཐུས་གཅིག་ཕར་ཡོད་པ་ནི་བཅའ་ཁྲིམས་ལ་བསྒྱུར་བཅོས་སོང་ཡོད་པ་ཡིན་ལའང་དེ་ནི་དགོས་ངེས་ཀྱི་བསྒྱུར་བ་ཞིག་ཡིན། འོན་ཀྱང་སྤྱིར་བོད་མའི་མི་འབོར་ཇེ་ཉུང་ཇེ་ཉུང་དང་སྤྱི་མཐུས་ཀྱི་གྲངས་འབོར་ཇེ་མང་ཇེ་མང་དུ་སོང་ན་བོད་ཀྱི་གཏམ་དཔེར་༼བོ་གདོང་བཀྲིས་ཁང་ང་། ལུག་ལས་ལུག་རྗི་མང་བ། ཞེས་པ་བཞིན་མི་རྒྱུར་བའི་ངེས་པ་མེད་པ་ཞིག་ཏུ་གྱུར་ན་ཅི་འདྲ་ཞིག་ཡོང་ས་རེད་དགོངས་པ་བཞེས་དགོས་པ་མ་ཟད། དེ་སྔོན་བསམ་ཚུལ་ཞུ་མྱོང་བ་ཇི་བཞིན་སྤྱི་མཐུས་ནི་ང་ཚོའི་རྒྱལ་ཁབ་བསྲ་བརྟན་ཡོངས་མིན་གྱི་ཞི་རྩ་ཡིན་པས་དེ་ལ་མི་མང་ནས་དོ་ནན་གྱི་དབྱེ་ཞིབ་མཛད་ནས་འདེམས་ཁ་མ་ལོག་པ་ཞིག་དགོས་རྒྱུ་ནི་རང་རང་སོ་སོའི་བུ་རབ་ཚ་རྒྱུད་བདེ་སྡུག་དང་འབྲེལ་བ་ཡོད་པས་ཚང་མས་མ་ནོར་བ་ཞིག་ངེས་དགོས་སོ་ཞེས་དྲན་བསྐུལ་དུ་ཕུལ་ལོ།
ད་ཐེངས་ང་ཚོའི་སྤྱི་འཐུས་མང་མོས་རྒྱབ་སྐྱོར་མ་གནང་བ་དེ་།རླབས་ཆེན་གྱི་རྒྱལ་ཁ་ཞིག་ལ་ངོས་འཛིན་བྱེད་ཀྱིན་ཡོད།
ཆོལ་ཁ་སོ་སོ་དང་ཆོས་རྒྱུད་སོ་སོས་སྤྱི་འཐུས་འདི་དག་ལ་ཡང་བསྐྱར་འོས་འཕེན་དགོས་མིན་ལ་བསམ་ཞིབ་གནང་རྒྱུ་ནི་མེད་དུ་མི་རུང་བ་ཞིག་རེད་ལ། དགོས་ངེས་ཅན་ཞིག་ཡིན་པ་གསལ་བོ་ཆགས་ཡོད། དེ་བས། ཚང་མ་ལོས་འདིའི་ཐད་གོ་བསྡུར་གནང་ན་མི་ལེགས་སམ།
སྤྱི་འཐུས་གྲོས་ཚོགས་ཀྱི་རྭ་བའི་ནང་སྤྱི་འཐུས་རེ་ཟུང་གིས་ཧོལ་རྒྱུགས་བྱས་ཏེ་མི་དམངས་ཀྱི་མངོན་འདོད་རེད་ཟེར་ནས་ཡིག་འཁྱར་རེ་ཟུང་ལ་ཡིད་རྟོན་ཁུལ་གྱིས་བཅའ་ཁྲིམས་ལ་འགྱུར་བ་བཏང་སྟེ་ཡང་བསྐྱར་ཟམ་གདོང་རིན་པོ་ཆེ་བཀའ་ཁྲིར་སྡོད་རྒྱུའི་རེ་བ་བརྒྱག་བཞིན་འདུག འདི་ནི་སླེབས་ལ་ཉེ་བའི་བཀའ་ཁྲིའི་འོས་འདེམས་ཐད་དཀའ་ངལ་འཕར་མ་ཞིག་རྐང་བཙུགས་ནས་སྤྱི་འཐུས་ཚོས་ཡང་བསྐྱར་བཟོས་པ་ཞིག་རེད། འདི་ནི་ཁྲིམས་ཀྱིས་དབང་བསྒྱུར་ལས་གང་ཟག་གིས་དབང་བསྒྱུར་ལ་སླར་ཡང་རོ་ལངས་བརྒྱག་འདོད་པས་རེད། གང་ཟག་རེ་ཟུང་ལ་ལྟོས་ནས་བོད་ཀྱི་བཅའ་ཁྲིམས་ལ་བཟོ་བཅོས་བརྒྱག་དགོས་ན་བཟོ་བཅོས་བརྒྱག་ཚོད་ཡོད་ཀྱི་མ་རེད། ལར་ནས་མི་དམངས་ཀྱི་མངོན་འདོད་ཟེར་བ་མི་དམངས་དམངས་ཀྱི་མངོན་འདོད་ཡིན་དགོས་པ་ལས་ཡིག་འཁྱར་རེ་ཟུང་གི་མི་དམངས་ཀྱི་མངོན་འདོད་མཚོན་མི་ཐུབ་པས་ཆབ་སྲིད་ཀྱི་རྩེད་མོ་མ་རྩེ་རོགས།
བཀའ་ཁྲིའི་ཡུན་ཚད་རང་འཇགས་བཞག་ན་ཡག་པོ་འདུག བཀའ་ཁྲི་མཆོག་གིས་གསུངས་པ་ལྟར་ཐེངས་གཉིས་ལས་ལྷག་མི་ཆོག་པའི་བཅའ་ཁྲིམས་མཛད་པར་དགོས་པ་རྒྱུ་མཚན་ཆེན་པོ་ཡོད་ངེས་རེད། ལྷག་པར་དུ་༸གོང་ས་མཆོག་སྐུ་འཚོ་བཞུགས་ཀྱི་བསྐལ་བཟང་དུས་བཟང་འདིར་གཞོན་སྐྱེས་རྣམས་ལ་གོ་སྐབས་ཕུལ་ཏེ་ལྟ་ཚོད་ཅིག་གནང་ཐུབ་ན་ཡག་པོ་འདུག
མ་འོངས་རྒན་རབས་རྣམས་རིམ་གྱིས་བྱོན་ནས་གློ་བུར་དུ་གཞོན་སྐྱེས་ཚོས་འགན་འཁྱེར་དགོས་ན་དཀའ་ངལ་འཕྲད་སྲིད་པ་རེད།
དེར་བརྟེན་ད་ཐེངས་རྒན་རབས་རྣམས་ཀྱིས་སློབ་སྟོན་འོག་གཞོན་སྐྱེས་རྣམས་ཀྱིས་ཐུགས་འགན་བཞེས་ཐུབ་ན་ཡག་པོ་འདུག
གསར་འགྱུར་འདི་ལ་གཟིགས་ནས་ད་གཟོད་སྔོན་མ་སྟེ་
གྲོས་ཚོགས་ཀྱི་གྲུབ་ཆ་མ་ཚང་ཞེས་པ་དེའི་རྒྱུ་རྐྱེན་ཤེས་བྱུང་།
གསར་འགྱུར་སྤེལ་ན་འདི་ལྟར་མགོ་སྔ་ཡོད་པ་ཞིག་སྤེལ་ན་ད་གཟོད་ང་ཚོས་གྲོས་བསྡུར་བྱེད་ཐུབ།