གཞོན་ནུའི་སྒྲིག་འཛུགས་ལ་མཚོན་ན། མཐའ་གཅིག་ཏུ་རང་བཙན་རྩོད་ཀྱི་ཡོད་པ་རེད། ཐོག་མ་ཉིད་ནས་ངས་ལབ་རྒྱུ་བྱུང་། ཁྱོད་རང་ཚོས་ཐོབ་ཐང་རྩོད་ཀྱི་ཡོད་པ་རེད། རྒྱ་བོད་ཐ་དད་ཡིན་པ་དེ་ལོ་རྒྱུས་ཀྱི་ཐོག་ནས་ང་ཚོར་ཐོབ་ཐང་ཡོད། བོད་ཀྱི་གནད་དོན་འདི་དེ་ཙམ་ཛ་དྲག་མེད་པ་ཡིན་ན། ཐོབ་ཐང་བརྩད་བསྡད་ན་མ་འགྲིག་པ་གང་ཡང་མེད། བོད་པའི་ཆོས་དང་རིག་གཞུང་། སྐད་ཡིག ཁོར་ཡུག་སོགས་ལོ་རེ་རེ་བཞིན་ཉམས་ཆག་ཏུ་འགྲོ་བཞིན་ཡོད། ཛ་དྲག་གི་གནས་སྟངས་འདི་ལས་བོད་སྐྱོབ་ཐུབ་པའི་ཐབས་ཤེས་ཤིག་བྱ་དགོས་པ་རེད་མ་གཏོགས་ཐོབ་ཐང་གཅིག་པུ་བཤད་འདུག་རྒྱུའི་དུས་ཚོད་མ་རེད། ཅེས་༧གོང་ས་མཆོག་གིས་གསུངས་ཡོད།
བོད་གཞུང་དམངས་རྒྱལ་ཡོངས་ཚོགས་ཆེན་གྱི་མཇུག་བསྡོམས་སྙན་ཐོ་དེ་ཕྱི་ཚེས་ ༣༡ ཉིན་རྒྱ་གར་ལྷོ་ཕྱོགས་སེ་ར་བླ་སྤྱིའི་གཙུག་ལག་ཁང་དུ་༧གོང་ས་མཆོག་ལ་སྙན་སྒྲོན་ཞུས་ཡོད་ཅིང་། སྐབས་དེར་༧གོང་ས་མཆོག་གིས་གྲྭ་མང་དང་ཚོགས་བཅར་བ་ཡོངས་ལ། བཙན་བྱོལ་བོད་མིའི་ཤེས་ཡོན་དང་གཞིས་ཆགས་སྐོར། དགོན་སྡེ་ཁག་གི་འོས་འགན་སྐོར། ཕྱི་ལོ་ ༢༠༡༡ ལོའི་བཀའ་སྤྱིའི་འོས་བསྡུའི་སྐོར། དབུ་མའི་ལམ་དང་རང་བཙན་གྱི་ཁྱད་པར་སོགས་གནད་དོན་ཁག་ཅིག་གི་ཐད་བཀའ་སློབ་གནང་ཡོད་ཅིང་། དགོན་སྡེ་ཁག་གི་འོས་འགན་སྐོར་ལ། ངས་ཁ་སང་གྲྭ་ཚང་ཁག་གི་མཁན་པོ་ཚོར་འདི་ལྟར་བཤད་ཡོད། སློབ་དཔོན་ཕྱོགས་གླང་གིས་༼ཚད་མ་ཀུན་བཏུས ༽ མཛད་འདུག འཕགས་པ་ཐོགས་མེད་ཀྱིས་༼ མངོན་པ་ཀུན་བཏུས ༽ མཛད་འདུག དེ་དང་དེ་ལྟ་བའི་གཞུང་མང་པོ་མཛད་པའི་སྲོལ་ཡོད་པ་རེད། དེང་སྐབས་ང་ཚོས་ཀྱང་ནང་པའི་ཆོས་ཀྱི་ནང་དུ་ཡོད་པའི་ཚན་རིག་དང་། མུ་སྟེགས་པའི་གཞུང་དུ་ཡོད་པའི་ཚན་རིག དེང་གི་རིག་གསར་གྱི་ཚན་རིག་བཅས་བསྡུ་བསྒྲིགས་བྱས་ཏེ། ༼ ཚན་རིག་ཀུན་བཏུས ༽ ཀྱི་གཞུང་ཞིག་དང་། སྔོན་རྒྱ་གར་དུ་ཡོད་པའི་མུ་སྟེགས་པའི་ལྟ་གྲུབ་དང་། ནང་པ་སངས་རྒྱས་པའི་ལྟ་གྲུབ། ནུབ་ཕྱོགས་གྷི་རིག་གི་ལྟ་གྲུབ་ནས་ཕྱིས་ཀྱི་བྷ་ཊན་རཱ་སིལ་བར་གྱི་ལྟ་གྲུབ་སོགས་ལས་བསྡུ་བསྒྲིགས་བྱས་ཏེ། ༼ ལྟ་གྲུབ་ཀུན་བཏུས ༽ ཀྱི་གཞུང་ཞིག་བཅས་བཟོ་དགོས་ཀྱི་འདུག དེ་འདྲ་ཞིག་བྱུང་བ་ཡིན་ན་དཔེ་ཆར་ལྟ་མཁན་ཚོར་ཕན་ཐོགས་ཡོང་གི་རེད་ལ། གལ་ཆེ་ཤོས་སློབ་གྲྭ་ཁག་དང་མང་ཚོགས་ནང་ཕན་ཐོགས་ཡོང་གི་རེད། རིམ་གྱིས་གཞུང་དེ་དག་རྒྱ་ཡིག་དང་དབྱིན་ཡིག་སོགས་སུ་བསྒྱུར་བ་ཡིན་ན་ནང་པའི་ཡུལ་གྲུ་ཁག་ལ་བློ་སྐྱེད་གསར་པ་ཡོང་གི་རེད། འགན་འདི་བོད་པ་གཅིག་པུར་འཁྲུ་བ་ཞིག་རེད་མ་གཏོགས་ནང་པ་གཞན་སུ་གཅིག་གིས་ཀྱང་ཡོང་གི་མ་རེད། ཅེས་གསུངས་བྱུང་།
ཐེངས་འདིའི་གཞུང་དམངས་ཚོགས་ཆེན་སྟེང་། ༧གོང་ས་མཆོག་གིས་ཕྱེད་བགྲེས་ཡོལ་ཡིན་གསུངས་པ་དེར་ནམ་ཡང་དགོངས་བཞེད་མི་གནང་རྒྱུར་སྐྱབས་འཇུག་ཞུས་ཡོད་ཀྱང་། ཐེངས་འདིར་༧གོང་ས་མཆོག་གིས་རིམ་གྱིས་བགྲེས་ཡོལ་ཆ་ཚང་གནང་འདུན་ཡོད་སྐོར་གསུངས་དོན། ཕྱི་ལོ་ ༢༠༠༡ ལོ་ནས་མང་མོས་འོས་བསྡུ་བྱས་པའི་བཀའ་བློན་ཁྲི་པ་ཞིག་བྱུང་བ་རེད། འདི་ང་ཚོའི་རྒྱལ་ཁ་ཆེན་པོ་རེད། དུས་དེ་ནས་བཟུང་ང་རང་གི་གནས་སྟངས་དེ་ཕྱེད་རྒན་ཡོལ་ཡིན་ཟེར་ནས་ལབ་བསྡད་ཡོད། དེ་ངས་བོད་བསྟན་སྲིད་བློས་བཏང་བ་མ་རེད་ལ། ང་སེམས་ཤུགས་ཆགས་པ་ཡང་མ་རེད། ང་ཚོ་ཁ་ཞེ་གཉིས་མེད་ཀྱིས་དམངས་གཙོའི་ལམ་ལ་འགྲོ་དགོས་པ་དང་། དངོས་ཡོད་གནས་སྟངས་ཐོག་ནས་ཀྱང་འཛིན་སྐྱོང་གི་ལས་ཀ་རིགས་ངས་བྱ་དགོས་པ་མི་འདུག མི་རབས་གསར་པ་ཚོས་ང་ལས་ལྷག་ཅིག་གནང་ཐུབ་གི་རེད། མི་གཞན་གྱིས་བྱེད་མི་ཐུབ་པའི་ལས་དོན་རིགས་ངས་བྱས་ན་ཡག་གི་རེད། ལོ་སུམ་ཅུ་ཙམ་གྱི་གོང་ནས་རྒྱལ་བ་རིན་པོ་ཆེ་མེད་པ་ལྟར་རྩིས་ཏེ། འགན་ལེན་དགོས་པ་རེད་ཟེར་ནས་ལབ་བསྡད་པ་ཡིན། ང་ཕྱེད་རྒན་ཡོལ་ཡིན་ཟེར་བའི་རྒྱུ་མཚན་ཡང་འདི་ཡིན། ཁྱེད་རང་ཚོས་ང་ལ་དེ་ལྟར་མ་ལབ་ཟེར་གྱི་ཡོད་ཀྱང་། ང་འཛམ་གླིང་ཐོག་མི་དུང་ཕྱུར་བདུན་ཅུ་ལྷག་ཅིག་ཡོད་པའི་ནང་གི་གཅིག་རེད། ང་ལ་ཡང་འགྲོ་བ་མིའི་ཐོབ་ཐང་ཡོད་པ་རེད། ངས་ཕྱེད་རྒན་ཡོལ་ཟེར་བ་དེ་དགོས་པ་རྒྱུ་མཚན་ཞིག་གི་ཐོག་ནས་བཤད་ཀྱི་ཡོད། ཕྱེད་རྒན་ཡོད་དེ་རིམ་གྱིས་རྒན་ཡོལ་ཆ་ཚང་ཞིག་ལ་བསམ་བློ་གཏོང་གི་ཡོད། ཁྱེད་ཅིག་གིས་ཕྱེད་རྒན་ཡོལ་ཟེར་བ་དེ་འགྲིག་གི་མི་འདུག་ཟེར་གི་ཡོད་ཀྱང་། ངས་ཀྱང་ང་རང་གི་ཐོབ་ཐང་དེ་བཤད་དགོས་པ་རེད། ངས་ཁྱེད་རང་ཚོར་སྐད་ཆ་ཞིག་འདྲི། ང་ལ་འགྲོ་བ་མིའི་ཐོབ་ཐང་ཡོད་པ་རེད་དམ་མ་རེད། ཅེས་གསུངས་སོང་།
ཡང་ཁོང་གིས་ཕྱི་ལོ་ ༢༠༡༡ ལོའི་བཀའ་སྤྱིའི་འོས་བསྡུའི་སྐོར་གསུངས་དོན། དེ་རིང་ཁ་སང་བཀའ་བློན་ཁྲི་པའི་སྐོར་ལ། ང་བཀའ་བློན་ཁྲི་པ་བྱ་རྒྱུ་མིན་ཟེར་ནས་དགོངས་པ་ཞུ་མཁན་དང་། ང་བཀའ་བློན་ཁྲི་པ་བྱ་རྒྱུ་ཡིན་ཟེར་ནས་ཐོན་ཡོང་མཁན་མང་པོ་འདུག་ཟེར། ཡག་པོ་ཞེ་དྲག་རེད། བསམ་བློ་ཡག་པོ་ཐོངས། བརྟག་དཔྱད་ཡག་པོ་བྱོས། ལས་འགན་ཆེན་པོ་རེད་ཁྱེད་རང་ཚོས་གཟབ་གཟབ་བྱ་དགོས་པ་རེད། ཡང་ཁག་ཅིག་གིས་མི་འདི་ལ་རྒྱལ་བ་རིན་པོ་ཆེ་ཡིས་རྒྱབ་སྐྱོར་ཡོད་པ་རེད། མི་དེ་ལ་རྒྱབ་སྐྱོར་ཡོད་པ་མ་རེད་ཟེར་བ་དེ་འདྲ་གོ་རྒྱུ་འདུག ངས་སུ་གཅིག་ལའང་རྒྱབ་སྐྱོར་མེད། འདི་འོས་པ་དང་དེ་མི་འོས་ཀྱི་སྐད་ཆ་ཚིག་གཅིག་ཀྱང་བཤད་མེད། འདི་མང་ཚོགས་ཀྱིས་ཐག་གིས་གཅོད་དགོས་པ་ཞིག་རེད། ངས་སྐད་ཆ་ཞིག་བཤད་པ་ཡིན་ན། མང་ཚོགས་ཀྱིས་རྒྱལ་བ་རིན་པོ་ཆེའི་ཡེ་ཤེས་དབྱིངས་དཔྱད་རེད་ཟེར་གི་རེད། དེ་ལ་ཆོ་ཡོད་པ་མ་རེད། དེ་བཞིན་བོད་མི་མང་སྤྱི་འཐུས་ལའང་གཟབ་གཟབ་བྱ་དགོས་པ་རེད། ལུང་པའི་ཕྱོགས་འཐེན་དང་ཆོས་ལུགས་ཀྱི་ཕྱོགས་འཐེན་ཁྱོན་ནས་བྱ་རྒྱུ་ཡོད་པ་མ་རེད། བར་སྐབས་ཞབས་འདྲེན་ཆེན་པོ་ཞུས་སོང་། དེ་རྒྱ་ནག་གིས་བེད་སྤྱོད་ག་ཚོད་བཏང་སོང་། གཟབ་གཟབ་མ་བྱས་ན་དགྲ་དགའ་གཉེན་སྡུག་ཟེར་བ་དེ་ཡོང་གི་རེད། ཅེས་གསུངས་སོང་།
མཇུག་མཐར་༧གོང་ས་མཆོག་གིས་དབུ་མའི་ལམ་དང་རང་བཙན་གྱི་ཁྱེད་པར་སྐོར་གསུངས་དོན། དབུ་མའི་ལམ་གྱི་སྐོར་ལ་སྐད་ཆ་ཞིག་བཤད་འདོད་བྱུང་སོང་། དབུ་མའི་ལམ་རྒྱལ་བ་རིན་པོ་ཆེ་ཡི་བཀའ་རེད་ཟེར་བ་དང་། རྒྱལ་བ་རིན་པོ་ཆེའི་ཡེ་ཤེས་དབྱིངས་དཔྱད་རེད་ཟེར་བ་དེ་ནོར་བ་རེད། དབུ་མའི་ལམ་ལ་གྲུབ་འབྲས་གང་ཐོན་འདུག ལམ་ཁ་དེ་བདམས་པའི་དགོས་པ་རྒྱུ་མཚན་གང་རེད། འདི་དག་ལ་བསམ་བློ་གཏོང་དགོས། གཞོན་ནུའི་སྒྲིག་འཛུགས་ལ་མཚོན་ན། མཐའ་གཅིག་ཏུ་རང་བཙན་རྩོད་ཀྱི་ཡོད་པ་རེད། ཐོག་མ་ཉིད་ནས་ངས་ལབ་རྒྱུ་བྱུང་། ཁྱོད་རང་ཚོས་ཐོབ་ཐང་རྩོད་ཀྱི་ཡོད་པ་རེད། རྒྱ་བོད་ཐ་དད་ཡིན་པ་དེ་ལོ་རྒྱུས་ཀྱི་ཐོག་ནས་ང་ཚོར་ཐོབ་ཐང་ཡོད། བོད་ཀྱི་གནད་དོན་འདི་དེ་ཙམ་ཛ་དྲག་མེད་པ་ཡིན་ན། ཐོབ་ཐང་བརྩད་བསྡད་ན་མ་འགྲིག་པ་གང་ཡང་མེད། བོད་པའི་ཆོས་དང་རིག་གཞུང་། སྐད་ཡིག ཁོར་ཡུག་སོགས་ལོ་རེ་རེ་བཞིན་ཉམས་ཆག་ཏུ་འགྲོ་བཞིན་ཡོད། ཛ་དྲག་གི་གནས་སྟངས་འདི་ལས་བོད་སྐྱོབ་ཐུབ་པའི་ཐབས་ཤེས་ཤིག་འཐེན་དགོས་པ་རེད་མ་གཏོགས་ཐོབ་ཐང་གཅིག་པུ་བཤད་འདུག་རྒྱུའི་དུས་ཚོད་མ་རེད། ཅེས་དང་། ཉེ་ཆར་གཞོན་ནུ་ཚོར་ཐུག་སྐབས་སྔ་ཕྱིའི་ལོ་རྒྱུས་ཆ་ཚང་བཤད་རྒྱུ་བྱུང་། ང་ཚོ་རང་བཙན་ཐོག་ཕྱིན་པ་ཡིན་ན། ང་ཚོར་རྒྱབ་སྐྱོར་ག་ཚོད་ཡོང་གི་རེད། འདི་ལ་བསམ་བློ་གཏོང་དགོས། ༢༠༠༨ ལོར་དམིགས་བསལ་ཚོགས་ཆེན་ཚོགས་སྐབས་བཀའ་བློན་ཁྲི་པར་ལབ་རྒྱུ་བྱུང་། མང་མོས་ཐོག་ནས་སྲིད་བྱུས་ལ་བསྒྱུར་བཅོས་གཏོང་དགོས་བྱུང་ན་གཏོང་རྒྱུ་ལས་ཡོད་པ་མ་རེད། འོན་ཀྱང་ངས་མུ་མཐུད་འགན་འཁུར་དགོས་མིན་ཐད་ངས་བསམ་བློ་ཞིག་གཏོང་རྒྱུ་རེད། འགྲུབ་རྒྱུ་མེད་པ་ཞིག་ལ་ངས་འགན་འཁུར་ནས་ཆོ་ཡོད་པ་མ་རེད། གཞོན་ནུས་ཐོབ་ཐང་རྩོད་ཀྱི་ཡོད་པ་དེར་སྒྲུབ་ཐབས་འདི་ཡོད་དང་། རྒྱབ་སྐྱོར་ཇི་ལྟར་འཚོལ་རྒྱུ་ཡིན་པ། བྱེད་ལུགས་བྱེད་སྟངས་འདི་འདྲ་ཡིན་ཟེར་ནས་གོམ་པ་རིམ་སྤོས་ཀྱི་འགྲོ་སྟངས་གསལ་གསལ་ཐང་ཐང་ཞིག་བྱུང་བ་ཡིན་ན་བསམ་བློ་གཏོང་གི་རེད། དེ་འདྲའི་སྒྲུབ་ཐབས་དང་རྒྱབ་སྐྱོར་འཚོལ་ཐབས་གང་ཡང་མེད་པར་ང་ཚོར་རང་བཙན་དགོས་ལབ་ན་ཐལ་ཆ་རེད། ཅེས་གསུངས་སོང་།
༼ གོང་གི་གསར་འགྱུར་དེ་མདང་དགོང་དྲ་ཐོག་ལ་སྤེལ་ཡོད་ཀྱང་། དེ་རིང་ཞོགས་པ་བསྐྱར་བཅོས་ཤིག་གི་དབང་གིས་ཀློག་པ་པོ་དག་གི་རིག་པ་ ༡༧ ཙམ་རྩ་བརླག་ཏུ་ཕྱིན་སོང་བར་དགོངས་དག་ཞུས་པ་ཡིན། ༽
གསར་འགོད་པ། དོན་འགྲུབ་བཀྲ་ཤིས།
དྲ་རྒྱ་ནི་འཛམ་གླིང་གི་ས་ཕྱོགས་གང་ས་ནས་ལྟ་་ཐུབ་པའི་དེང་རབས་ལགས་རྩལ་ཕུལ་དུ་བྱུང་བ་ཞིག་རེད་། དེ་ལྟ་བུའི་ཕུལ་དུ་བྱུང་བ་དེ་རྒྱུད་ནས་ཕུལ་དུ་བྱུང་བའི་རང་མི་རིགས་ཀྱི་ཤེས་རིགས་དག་ཡུལ་གྲུ་གང་སར་མངོན་པར་བྱེད་ཐུབ་ཀྱི་ཡོད་པས་དེར་བརྟེན་དུས་བབ་རྩོམ་སྒྲིགས་པས་ནོར་བ་ཡིན་ནམ་ཡང་ན་གློག་ཀླད་དུ་འཇུག་མཁན་གྱིས་ནོར་བ་ཡིན་གང་ལྟར་ཡང་རྒན་ཡོལ་ཞེར་པར་རྒན་ཡོད་ཞེས་བྲིས་འདུག་པས་དོན་སྣང་གནང་གལ་ཆེ །
ངས་བསམ་ཚུལ་བྱས་ན། རང་བཙན་རྩོད་མཁན་ཚོས་༧གོང་ས་མཆོག་ཕྱེད་རྒས་ཡོལ་ནས་ཚ་ཚང་རྒས་ཡོལ་དུ་འབུད་པར་ལྟ་བུར་མཐོང་བས། བཏང་སྙོམས་སུ་མ་འཇོག་པར་ང་དང་འདྲ་བར་སེམས་ལ་དྭོགས་པ་ཡོད་ན། ཁ་ནས་ཤོད་ཐུབ་ན་ཕན་ཐོགས་མི་ཆེ་བའམ། ཕྱིས་སུ་འགྱོད་ན་ཕྱིས་དྲགས་པ་རེད་དོ། །ང་གཞོན་སོགས་ལ་མི་དགའ་ནས་མིན་ལ། བོད་སྤྱི་པ་ལ་ཞེན་རྒྱ་བྱས་ནས་འདིར་ལབ་པ་ཡིན་ནོ། །
༧གོང་ས་མཆོག་གི་གསུང་བཤད་འདིའི་འོག་ལ་རིག་པ་མང་པོ་འདོན་མཁན་མེད་པའི་རྒྱུ་མཚན་ཅི་ཡིན་ནམ།
དྲྭ་བདག་ལགས་ངོས་ནས་དེ་སྔོན་༸གོང་ས་མཆོག་གི་བཀའ་སློབ་<<རྒྱ་གུང་ཁྲན་ལ་མགོ་འབུལ་ལུས་འབུལ་བྱེད་མཁན་ཆཊ་སོང་།>> ཞེས་པའི་ནང་གི་༧གོང་ས་ལྔ་བ་ཆེན་པོའི་གསུང་ཡོངས་གྲགས་པོད་༼ ཏ ༽ བའི་ནང་། ཞེས་པ་འདི་ནོར་འདུག པོད་(ད) པ་རེད། མྱུར་དུ་བཅོས་རོགས་ཞེས་ཞུ་བ་ཕུལ་ཡོད་ཀྱང་ཁ་ཡ་གནང་མ་བྱུང༌། ད་རེས་ཡང་བསྐྱར་<<ཕྱེད་རྒན་ཡོད་དེ་རྒན་ཡོལ་ཆ་ཚང་ཐོག་བསམ་བློ་གཏོང་གི་ཡོད།>> ཅེས་པའི་༸གོང་ས་མཆོག་གི་བཀའ་སློབ་ཀྱི་ཁ་བྱང་ཕྱེད་ སྒས་ཡོལ་ དུ་བཅོས་རོགས་ཞུ། རེ་བ་ཙམ་ཞུ་ཁུལ་ཡིན། ལར་ནས་ཆོལ་ཁ་གསུམ་ལ་ཁྱབ་པའི་གསར་འགྱུར་ཚགས་ཤོག་འདི་ལྟ་བུ་ཞིག་གི་ནང་ཡུལ་སྐད་མང་དྲགས་ན་གོ་བདེ་པོ་མི་འདུག་པས་དགོངས་བཞེས་གནང་རོགས་ཞུ། ཐུགས་རྗེ་ཆེ།