ཕྱི་ཚེས་ ༡༨ ཉིན་༼ སྐབས་བཞི་བའི་གངས་རིའི་བུ་མོའི་རྩོམ་རིག་གླེང་སྟེགས ༽ ཞུ་བ་དེ་ཁྲིན་ཏུའུ་གྲོང་ཁྱེར་དར་མདོའི་གསོལ་ཚིགས་ཁང་དུ་ཚོགས་ཡོད་པ་དང་། ཚོགས་འདུ་དེའི་སྟེང་སི་ཁྲོན་མི་རིགས་སློབ་གླིང་གི་དགེ་རྒན་རིག་འཛིན་བརྟན་སྲུང༌དང་སི་ཁྲོན་བོད་ཡིག་སློབ་གྲྭའི་དགེ་རྒན་བསོད་ནམས་སྟོབས་རྒྱལ། བྱམས་བུད་མེད་ཚོགས་པའི་ཚོགས་མི་བཀྲ་ཤིས་ལྷ་མོ་དང་ལྷ་མོ་མཚོ། ཀྲུང་དབྱང་མི་རིགས་སློབ་ཆེན་གྱི་ཞིབ་འཇུག་སློབ་མ་གཡུ་མཚོ། མཚོ་སྔོན་དགེ་ཐོན་སློབ་ཆེན་གྱི་ཞིབ་འཇུག་སློབ་མ་ཁ་བ་ལྷ་མོ། མཚོ་སྔོན་གསོ་རིག་སློབ་ཆེན་གྱི་ཞིབ་འཇུག་སློབ་མ་བོད་གཞུག་སྐྱིད། ནུབ་བྱང་མི་རིགས་སློབ་ཆེན་གྱི་ཞིབ་འཇུག་སློབ་མ་དཔལ་མོ་རྒྱལ་དང་སྒྲོལ་དཀར་སྐྱིད། ལྷོ་ནུབ་མི་རིགས་སློབ་ཆེན་གྱི་ཞིབ་འཇུག་སློབ་མ་བྱང་ཆུབ་སྒྲོལ་མ། གངས་རིའི་བུ་མོའི་རྩོམ་སྒྲིག་པ་ཨུར་སྐྱིད། ཁམས་སྐད་བརྙན་འཕྲིན་ཁང་གི་དབང་ཆེན་ལྷ་མོ་བཅས་ཞུགས་ཡོད་འདུག་ལ། གཞན་ལྷོ་ནུབ་མི་རིགས་སློབ་ཆེན་གྱི་ཞིབ་འཇུག་སློབ་མ་སྐོར་ཞིག་བཅས་ཁྱོན་ཚོགས་ཞུགས་མི་སྣ་ ༩༠ ཙམ་ཡོད་འདུག
ཚོགས་འདུའི་ཐོག་མར་གཙོ་སྐྱོང་བ་མགོན་པོ་སྐྱིད་ཀྱིས་གངས་རིའི་བུ་མོའི་གླེང་སྟེགས་སྐབས་རིམ་པ་སྤྱི་ཡོང་ནས་ངོ་སྤྲོད་དང་། ཐེངས་འདིའི་གླེང་སྟེགས་ཀྱི་དགོས་དམིགས་དང་ཁ་ཕྱོགས་གསལ་བཤད་དང་སྦྲགས། ལོ་རབས་བརྒྱད་ཅུ་ཚུན་ལ་སྒེར་དང་གཞུང་གི་དུས་དེབ་གང་འདྲ་ཞིག་ཡིན་རུང་། སྔོན་དང་བསྡུར་ན་བུད་མེད་རྩོམ་པ་པོ་ཇེ་ཅུང་དུ་འགྲོ་བཞིན་ཡོད་པའི་སྣང་ཚུལ་ཞིག་མངོན་གྱི་ཡོད་སྟབས། ང་ཚོས་བུད་མེད་སྨྱུག་ཐོགས་པ་བསྐྱེད་བསྲིང་བྱེད་སའི་གངས་རིའི་བུ་མོ་ཞེས་པའི་སྐྱེས་མའི་ཆེད་དེབ་ཅིག་གཉེར་བ་ཡིན་མོད། འོན་ཀྱང་སློབ་ཆེན་བུ་མོ་དང་ཞིབ་འཇུག་སློབ་མ་ཚོས་ངོས་ནས་ཁ་ཡོད་ལག་ཡོད་ཀྱིས་དེབ་འདི་ལ་རྩོམ་ཡིག་གི་རྒྱབ་སྐྱོར་བྱེད་མཁན་ཤིན་ཏུ་དཀོན་པོ་ཞིག་ཆགས་འདུག དེར་བརྟེན། ང་ཚོས་ཡང་བསྐྱར་བུད་མེད་སྨྱུག་ཐོགས་པའི་བསམ་བློ་བསྐྱེད་བསྲིང་དང་འདུ་ཤེས་གསོ་སྐྱོང་བྱེད་སའི་རྩོམ་རིག་གླེང་སྟེགས་འདི་བསྒྲུབ་པ་ཡིན། ཞེས་ངོ་སྤྲོད་གནང་ཡོད་འདུག
གླེང་སྟེགས་དངོས་གཞིའི་སྐབས་ཀྱི་གཏམ་གླེང་སྐབས། བུད་མེད་ནི་སྤྱི་ཚོགས་ཀྱི་གྲུབ་ཆ་ཞིག་ཡིན་སྟབས་ཕོ་མོ་འདྲ་མཉམ་ཡོང་དགོས་པ་ཧ་ཅང་གལ་ཆེན་ཡིན་པ་དང་། བོད་ཀྱི་སྲོལ་རྒྱུན་རིག་གནས་རྒྱུན་འཛིན་བྱ་རྒྱུ་དེ་བས་གལ་ཆེན་ཡིན་པ། བུད་མེད་ཀྱི་རྩོམ་རིག་དང་བུད་མེད་ཀྱི་འགན་འཁྲི། སྙིང་སྟོབས། ཤེས་ཡོན་སོགས་ངོས་ཟིན་གསལ་བོ་དགོས་པའི་སྐོར་སོགས་བརྗོད་ཡོད་འདུག གངས་རིའི་བུ་མོའི་རྩོམ་རིག་གླེང་སྟེགས་སྐབས་དང་བོ་གཙོས་བོད་རིགས་སློབ་འབྲིང་ནས་ཚོགས་པ་དང༌། སྐབས་གཉིས་པ་མཚོ་སྔོན་མི་རིགས་སློབ་ཆེན། སྐབས་གསུམ་པ་ནུབ་བྱང་མི་རིགས་སློབ་ཆེན། ཐེངས་འདིའི་སྐབས་བཞི་བ་ཁྲིན་ཏུའུ་བཅས་སུ་ཚོགས་ཡོད་འདུག
གསར་འགོད་པ། དོན་འགྲུབ་བཀྲ་ཤིས།
གནས་ཚུལ་འདི་ཐོག་མར་བཀོད་མཁན་བོད་ནང་གི་ན་གཞོན་གསར་བའི་དྲ་ཚིགས་རེད་སྙམ། འདིར་རྩོམ་གྱི་ནང་དོན་དང་པར་བཅས་ཚང་མ་ཇི་མ་ཇི་བཞིན་བཀོད་ཡོད་ཀྱང་། གཞན་ལས་དྲངས་པའི་ཚིག་གཅིག་ཀྱང་མེད་པར་སོ་སོའི་མིང་ཆེན་པོ་ཞིག་བྲིས་འདུག འདི་དུས་བབ་ཚང་གི་ལུགས་སྲོལ་ཡིན་ནམ། སྔོན་མའང་དེ་འདྲའི་གནས་ཚུལ་ཁ་ཤས་མཐོང་སོང༌།
བོད་ཀྱི་སྤྱི་ཚོགས་ནང་ནས་བུད་མེད་ཀྱི་ཐོབ་ཐང་རྩོད་པ་ཧ་ཅང་གལ་ཆེན་རེད། བུད་མེད་ཀྱི་ཐོབ་ཐང་རྩོད་པའི་བུད་མེད་དག་ལ་སྐྱེས་པ་ཚོས་ངེས་པར་དུ་རམ་འདེགས་བྱ་དགོས། སྤྱི་ཚོགས་ཤིག་ཡར་རྒྱས་འགྲོ་དགོས་ན་བུད་མེད་ཀྱི་ཐོབ་ཐང་ཨང་དང་པོའི་གྲས་ལ་བརྩི་དགོས་པར་སེམས། བུད་མེད་ཀྱི་ཐོབ་ཐང་མེད་པའི་སྤྱི་ཚོགས་ནི་བྱ་རྒོད་གཤོག་ཆད་ཞིག་དང་གཅིག་འདྲ་ཡིན། བོད་ཀྱི་བུད་མེད་རྒྱལ་ལོ།
དཔྱད་གཏམ་པའི་སྐད་ཆ་ལ་ལན་གྱིས་ཚུལ་དུ་བཤད་ན། བུད་མེད་ཀྱི་ཐོབ་ཐང་ཇི་ལྟར་རྩོད་མི་དགོས་པ་ཞིག་རེད། བུད་མེད་ཀྱི་ཐོབ་ཐང་ངེས་པར་དུ་རྩོད་དགོས། བུད་མེད་ཅིག་ཡིན་ན་ངེས་པར་དུ་བུད་མེད་ཀྱི་ཐོབ་ཐང་ལས་རྙེད་པའི་ནད་ཟུག་ཡོད་ཚད། དེ་རིང་ནས་བཟུང་ཤུགས་ཆེ་རུ་གཏོང་དགོས། བུད་མེད་ཀྱི་ཐོབ་ཐང་བརྩད་ན་ཅི་ཕྱིར་ལག་ཏུ་ཐོབ་ཡོང་རྒྱུ་མེད་པ་ཞིག་རེད། ཧ་ཅང་ཁྱེད་རང་ནོར་སོང་། བུད་མེད་ཀྱི་ཐོབ་ཐང་བརྩད་ན་ལག་ཏུ་ཐོབ་རྒྱུ་ཡོད་ནི་རེད། བུད་མེད་ཀྱི་ཐོབ་ཐང་རྩོད་མཁན་གྱི་བུད་མེད་ཅིག་ཡིན་ན། རང་གི་ལས་དབང་གླེང་བའི་ཆེད་རྩོམ་དང་དཔྱད་གཏམ་རང་བཞིན་ཅན་གྱི་རྩོམ་ཡིག་གི་རིགས་དེ་དག་ལས་རྙེད་པའི་བུད་མེད་ཀྱི་བདེན་དོན་དང་གནས་ལུགས་ཡོད་ཚད། བུད་མེད་ཀྱི་ཐོབ་ཐང་བརྩད་ནས་ལག་ཏུ་རྙེད་པའི་བུད་མེད་ཀྱི་རིག་གནས་ཤིག་རེད། འདི་དག་ནི་བོད་ཀྱི་རིག་གནས་ཁྲོད་ཀྱི་འདོར་ལེན་རང་བཞིན་འོག་གི་རིག་གནས་ཤིག་ཡིན་པ་ཡང་། བུད་མེད་ཀྱི་ཐོབ་ཐང་བརྩད་ནས་འུ་ཚོའི་ལག་ཐོག་ཏུ་རྙེད་པ་ཞིག་ཡིན་པ་མ་ཟད། བུད་མེད་ཀྱི་ཐོབ་ཐང་རྩོད་དགོས་པ་དང་བརྩད་ན་ལག་ཏུ་ཐོབ་རྒྱུ་ཞིག་ཡོད་པའི་མངོན་རྟགས་ཀྱང་བུད་མེད་ཀྱི་ཐོབ་ཐང་བརྩན་ནས་འུ་ཚོར་སྔོན་བརྡ་བཏང་བ་ཞིག་མ་རེད་དམ།
ང་ཚོ་ལ་འཛམ་གླིང་ས་སྒང་འདིའི་སྒལ་ཚིགས་མ་འཐོར་བར་དུ་ཅིས་ཀྱང་དགོས་པ་ནི་བུད་མེད་ཡིན་པ་མ་ཟད། བུད་མེད་སྙུག་འཛིན་པ་དེ་ལས་ཧ་ཅང་མཁོ། བུད་མེད་ནི་བཟང་སྤྱོད་སྣེ་འཛིན་གྱི་ཨ་མ་དང་། འཇིག་རྟེན་སྒྱུར་བཀོད་ཀྱི་སྒྲོལ་མེ། གཤིས་རྒྱུད་གཞུང་དྲང་གི་མི་གཞིའི་སྣེ་ཁྲིད་པ།
ལྷག་པར་དུ་གངས་མིའི་བུ་མོ་ནི་ང་ཚོའི་མི་རིགས་ལ་མཚོན་ན་ཧ་ཅང་དགོས་གལ་ཆེ་མ་མ་ཟད། ང་ཚོས་ཁོ་མོ་དག་གི་ལས་དབང་ལ་བསམ་བློ་བཏང་ནས། ལམ་སྣེ་གསར་བ་ཞིག་དང་། མདུན་ལྗོངས་གསར་བ་ཞིག་གི་ལམ་ཁར་ཁྲིད་ཐུབ་པར་བྱེད་དགོས་པ་ནི། ད་ལྟའི་གངས་ཅན་ཕ་དམ་པ་དག་གི་འོས་འགན་ཉིད་ཅིག་རེད། དེ་བས་ན་སི་ཁྲོན་མི་རིགས་སློབ་གླིང་གི་དགེན་རིག་འཛིན་བརྟན་སྲུང་དང་། སི་ཁྲོན་བོད་ཡིག་སློབ་གྲྭའི་དགེན་བསོད་ནམས་སྟོབས་རྒྱལ་གཉིས་ཀྱིས་རང་ཉིད་ཀྱི་འོས་འགན་ཕྲག་ཏུ་བླངས་ནས་སྐབས་བཞི་བའི་གངས་རིའི་བུ་མོའི་རྩོམ་རིག་གླེང་སྟེགས་ལ་ཚོགས་ཞུགས་བྱས་པའི་འོག གངས་ཅན་བུ་མོའི་སྣེ་ཁྲིད་ཀྱི་ལམ་ལ་ཞུགས་པ་ནི་གངས་ཅན་ཕ་ལོ་ཡིན་པའི་ལས་འགན་རང་ཐོག་ནས་འགོ་རྩོམ་པ་ཡིན་པས། ཁྱེད་དགེ་རྒན་གཉིས་ལ་གུས་པ་རྐང་གསུམ་གྱིས་རྒྱང་རིང་རྒྱང་རིང་ཞིག་ཐུགས་རྗེ་ཆེ་དང་། བཀྲ་ཤིས་བདེ་ལགས་ཞུ་བཞིན་ཡོད། བཀའ་དྲིན་ཆེ།
ཁྱད་མཚར་རྩོམ་རིག་གླེང་སྟེགས་ཟེར་བ་དེ་ལྟར་ཡང་དོན་དུ་བུད་མེད་ཀྱི་ཁེ་དབང་བསྐོར་རྩོད་བཞིན་པ་ཡིན་ན་ངོ་མ་ངི་བྲོ་བ་རེད་དེ་གལ་སྲིད་བོད་ཀྱི་ཐུན་མིན་རིག་གཞུང་བསམ་པ་ཡིན་ན་སྙིང་དབུས་ན་དགའ་བསུ་ཞུ་གངས་རིའི་བུ་མོ་ཚོ།
༼ གོང་གི་གསར་འགྱུར་འདིའི་ཐད་དཔྱད་གཏམ་པས་སྐད་ཆ་འདི་ལྟར་བཤད ༽
མི་ལ་ལས་འདི་འདྲའི་ཚོགས་འདུའི་སྟེང་དུ་བུད་མེད་ཚོས་ཁེ་དབང་ངམ་ཐོབ་ཐང་རྩོད་ལེན་བྱེད་བཞིན་ཡོད་སྐོར་བཤད་ཅིང་། ལ་ལས་སྤྱི་ཚོགས་ཁྲོད་སྲོལ་རྒྱུན་གྱི་ཕོ་མོ་འདྲ་མཉམ་མིན་པའི་གོམས་སྲོལ་ངན་པའི་འཆིང་རྒྱ་ཤུགས་ཆེ་རབས་བཤད། འོན་ཀྱང་ངའི་བསམ་ཚུལ་ཡིན་ན། བུད་མེད་ཀྱི་ཐོབ་ཐང་ནི་རྩོད་དགོས་པ་ཞིག་མིན་པར་འདྲ་ལ། བརྩད་ན་ཐོབ་ཡོང་རྒྱུ་ཞིག་ཀྱང་མེད་པར་སྙམ། ལྷག་པར་སློབ་ཆེན་སློབ་མ་དང་ཞིབ་འཇུག་སློབ་མ་ཞིག་ལ་མཚོན་ན། རང་གི་འཇོན་ཐང་དང་ནུས་པའི་ཐོག་ནས་ཐོབ་ཐང་མཚོན་ཐུབ་དགོས་པ་རེད་སྙམ། རྒྱུ་མཚན་ནི། བོད་ཀྱི་འདས་པའི་ལོ་རྒྱུས་ཐོག མ་ཅིག་ལབ་ཀྱི་སྒྲོན་མེ་ལྟ་བུའི་བུད་མེད་བསམ་བློ་བ་དང་། འགྲོ་བཟའ་ཁྲི་མ་ལཱོད་ལྟ་བུའི་སྲིད་དོན་མཁས་པ་འཁྲུངས་ཐུབ་པར་བརྟག་ན། ཁོར་ཡུག་དང་སྤྱི་ཚོགས་ཀྱི་སྣང་ཚུལ་ཇི་འདྲ་ཡིན་རུང༌། གཙོ་བོ་རང་གི་འབད་བརྩོན་གྱི་སྙིང་སྟོབས་དང་འགྱུར་མེད་ཀྱི་སྤོབས་པའི་ངར་ཤུགས་ལྡན་ན། སྐྱེས་པ་ལས་ལྷག་པ་ཡོང་ཐུབ་ཅིང་། དེ་བས་གཙོ་བོ་སྐྱེས་མ་ཚོས་རང་རང་གི་ཐད་ནས་བྱ་བ་ཆུང་ཙག་ལ་འབད་པ་བྱེད་རྒྱུར་རེ་བ་བཏོན་ཡིན།