རྒྱལ་སྤྱིའི་རྩོམ་པ་པོའི་ཚོཊ་ཆེན།

རྒྱལ་སྤྱིའི་པེན་རྩོམ་པ་པོའི་མཐུན་ཚོགས་ཀྱི་ཚོགས་ཆེན་དེ་ཟླ་སྔོན་མའི་ཕྱི་ཚེས་ ༢༣ ནས་མགོ་འཛུགས་ཀྱིས་ཉིན་ ༧ རིང་ཉི་ཧོང་གི་རྒྱལ་ས་ཊོག་ཁྱོའུ་ནང་ཚོགས་ཡོད་ཅིང་། ཐེངས་འདིའི་ཚོགས་འདུའི་སྟེང་འཛམ་གླིང་རྒྱལ་ཁབ་ཁག་  ༡༢༨ ནས་རྩོམ་པ་པོ་ ༦༠༠ ཙམ་མཉམ་ཞུགས་བྱས་ཡོད། ཚོགས་ཐོག་ཏུ་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཞོན་ཀུན་ཐར་དོན་གྲུབ་ལགས་ཀྱང་མཉམ་བཞུགས་བྱས་ཡོད་ཅིང་། ཚོགས་ཐོག་ཏུ་ཁོང་གིས་ཕྱི་ལོ་ ༢༠༠༨ ལོའི་ཞི་རྒོལ་གྱི་སྐབས་ནས་བཟུང་བོད་ནང་གི་རྩོམ་པ་པོ་ཚོས་རྒྱ་གཞུང་ལ་བོད་མིར་དྲག་གནོན་མི་བྱ་རྒྱུར་ཞུ་ཡིག་དང་རྩོམ་ཡིག་སོགས་སྤེལ་ཡོད་སྟབས། ད་ཆར་རྒྱ་གཞུང་གིས་བོད་རིགས་རྩོམ་པ་པོ་ ༤༠ ཙམ་ཁ་བྲལ་གྱི་ཉེས་མིང་བཏགས་ཏེ་འཛིན་བཟུང་བཀག་ཉར་བྱས་ཡོད་པ་དང་། བཙོན་འོག་གི་རྩོམ་པ་པོ་དེ་དག་གིས་རྒྱ་ནག་གི་རྩ་ཁྲིམས་ནང་འཁོད་པའི་སྨྲ་བརྗོད་རང་དབང་ལོངས་སུ་སྤྱད་པ་ཞིག་ཡིན་ཡང་།  རྒྱ་གཞུང་གིས་ཁོང་ཅག་གི་སྨྲ་བརྗོད་རང་དབང་འཕྲོགས་ཏེ། རྩ་ཁྲིམས་དང་ཡོངས་སུ་འགལ་ཡོད་སྐོར་བརྗོད་ཡོད།

ཁོང་གིས་མུ་མཐུད་དུ། རྒྱ་གཞུང་གིས་བོད་ཡུལ་རྒྱ་ཡུལ་དུ་བསྒྱུར་རྒྱུའི་བྱེད་སྒོའི་ཁྲོད། ད་ཆར་བོད་ནང་བོད་ཀྱི་སྐད་ཡིག་གིས་གྲལ་རིམ་གཉིས་པའི་གོ་གནས་ཙམ་ལས་ཟིན་གྱི་མེད་པ་དང་། བོད་ཀྱི་རི་བོ་དང་ཆུ་བོ། གཞུང་ལམ་བཅས་ཀྱི་བོད་མིང་བསྒྱུར་ཏེ་རྒྱ་མིང་བཏགས་པ་དང་། བཙན་དབངགི་ཐོག་ནས་རྒྱ་ཡིག་རྒྱ་སྐད་བེད་སྤྱོད་བྱེད་འཇུག་གི་ཡོད་པ་སོགས་ཀྱིས་བོད་ཀྱི་གནས་སྟངས་ཧ་ཅང་ཛ་དྲག་གི་གནས་སུ་ལྷུང་ཡོད་སྐོར་སོགས་བརྗོད་ཡོད། ཚོགས་འདུའི་མཇུག་ཏུ་ཚོགས་ཞུགས་པ་ཚང་མས་ཐུན་མོང་ཐོག་གྲོས་ཆོད་ཅིག་བཞག་ཡོད་ཅིང་། གྲོས་ཆོད་དེའི་ནང་། རྒྱ་གཞུང་གིས་བོད་དང་རྒྱ་ནག་གི་རྩོམ་པ་པོའི་སྨྲ་བརྗོད་རང་དབང་ལ་བརྩི་བཀུར་དགོས་པ་མ་ཟད། ད་ཆར་བཙོན་འོག་ཏུ་ཡོད་པའི་བོད་རྒྱའི་རྩོམ་པ་པོ་རྣམས་འཕྲལ་དུ་ཀློད་གྲོལ་དགོས་པའི་འབོད་སྐུལ་ཞུས་ཡོད།

བསྡུ་སྒྲིག་པ། དཔལ་ལྡན།

 ་