དོན་ངོ་མར་བརྐུས་པ་རེད། ལུང་རིགས་རྒྱལ།

མི་ནག་ཚང་ལུང་རིགས་རྒྱལ།

ད་ལྟ་ངས་ཟིན་བྲིས་འདི་འབྲི་བཞིན་པའི་སྐབས་སུ། ང་ཚོའི་འོས་སྒམ་གཉིས་དེ་སྔ་མོ་ནས་པེ་ཅིན་ལ་འབྱོར་ཡོད་སྲིད། ཡང་མིན་ན། རྒྱ་ནག་དམར་ཤོག་ཚོགས་པའི་གསང་བའི་ལས་བྱེད་འགས་ཀ་ཐུ་མན་གྲུ་ནས་བཙན་འཕྲོག་བྱས་པའི་འོས་སྒམ་དེ་གཉིས་ཀྱི་རྗེས་འབྲས་གང་འདྲ་ཞིག་ཆགས་མིན་ལ་ཕྱོགས་ཡོངས་སུ་ཉན་ཞིབ་བྱེད་ཀྱིན་པའི་སྒང་ཡིན་ཀྱང་སྲིད།

༧གོང་ས་མཆོག་ད་ཆར་དགུང་ལོ་ ༧༥ ལ་ཕེབས་ཡོད་པ་རེད། ཁོང་གིས་ཡང་དང་བསྐྱར་དུ། ཁོང་ཉིད་དེང་སང་ཕྱེད་བགྲེས་ཡོལ་ཡིན་ཅེས་གསུང་གི་ཡོད་ལ། སྐབས་རེར་ཁོང་གི་ཕྱག་གཉིས་ཀྱི་ཡ་གཅིག་ནི་བོད་རིགས་མི་དམངས་ཀྱིས་ཐད་ཀར་འོས་འདེམས་བྱས་པའི་བཀའ་བློན་ཁྲི་པ་དེ་ཡིན་ཅེས་གསུང་གི་ཡོད།

༧གོང་ས་མཆོག་གི་དགུང་ནའི་བབ་དང་བསྟུན་ནས་བོད་མི་རིགས་ཀྱི་སེམས་ཁམས་ནི་ལོ་རེ་བཞིན་དངངས་སྐྲག་གམ། རྔམ་དྲག་ཅིག་གི་ནང་དུ་ལྷུང་བཞིན་ཡོད། རྔམ་དྲག་འདི་ལ་དཔག་པའི་གྲ་སྒྲིག་ཡག་ཤོས་ནི་གང་ལྟར་ཀྱང་དམངས་གཙོའི་དབུ་ཁྲིད་རྩོད་མེད་ཅིག་འདེམ་རྒྱུ་དེ་ཡིན། དེ་ལྟར་ཕྱི་ཚེས་ ༤ ཉིན་བཙན་བྱོལ་བོད་མི་ཚོས་ལག་དེབ་ལྗང་ཁུ་དེ་ཁྱེར་ནས་ཡུལ་ཕྱོགས་སོ་སོ་ནས་འོས་འཕེན་གྱི་བང་སྒྲིག་པ་རེད།

རྒྱ་དཀར་ནག་གཉིས་ཀྱི་བར་དུ། བལ་གཞུང་འདི་དམངས་གཙོ་དང་དམར་ཤོག་གང་ཡིན་བཤད་ཚོད་མི་ཐུག་པའི་སྐབས་ཤིག་ལ། བལ་ཡུལ་གྱི་ཉེན་རྟོག་པ་ཚོས་རྒྱ་གཞུང་གི་ལད་མོ་བྱས་ཤིང་། འོས་སྒམ་བསྡུ་ལ་ཉེ་བའི་སྐབས་དེར་གློ་བུར་དུ་རྒྱུག་ནས་བོད་མི་ཚོའི་ལག་ནས་བཙན་འཕྲོག་བྱས་ཡོད་ལ། ཚུལ་འདི་ནི་རིག་གནས་གསར་བརྗེ་ཆེན་པོའི་སྐབས་ཀྱི་བྱེད་སྟངས་དང་གཅིག་མཚུངས་ཡིན།

རྒྱ་ནག་གཞུང་གིས་བོད་མིའི་རྩོད་མེད་ཀྱི་དབུ་ཁྲིད་ཅིག་ཡིན་ཚེ་བརྐུ་བའམ་འཕྲོག་པ། གསོད་པ། གནོན་པ། དེ་མིན་ན་རྒོལ་བཞིན་ཡོད། པན་ཆེན་ཆུང་སྲིད་ནི་འདིའི་དཔེ་མཚོན་ཡག་ཤོས་ཡིན་ལ། བོད་ནང་གི་བོད་མིའི་དབུ་ཁྲིད་དང་སྐྱེས་ཆེན་དམ་པ་ཚང་མ་འདི་ལྟའི་གནས་སྟངས་གཅིག་གི་འོག་ཏུ་བཞུགས་ཡོད།

རྒྱ་ནག་གཞུང་གིས་༧གོང་ས་མཆོག་གི་སྐུ་ཚེའི་ན་བཟའ་བརྗེ་བར་སྒུག་བཞིན་པའི་སྐབས་སུ། བོད་མི་རིགས་ཀྱིས་ཐད་ཀར་དུ་ཁོང་གི་ཕྱག་ཡ་གཅིག་འགྱོག་བཞིན་ཡོད། ཁོང་གི་ཕྱག་ཡ་འདིའི་མགོར་འཐམ་ནས་བོད་མི་རྣམས་མུ་མཐུད་ནས་བདེན་དོན་གྱི་ཆེད་དུ་ལངས་རྒྱུ་ཡིན་པ་ཐག་གིས་ཆོད་ཡོད། དེར་བརྟེན། ཕྱི་ཚུལ་ནས་བལྟས་ན། བལ་ཡུལ་ཉེན་རྟོག་པས་བོད་མི་ཚོའི་འོས་སྒམ་འཕྲོག་པ་ལྟར་སྣང་ཡང་། དོན་ངོ་མར། རྒྱ་ནག་གཞུང་གིས་རྒྱལ་སྤྱིའི་ངོ་ཚར་མ་འཛེམས་པར་བལ་ཡུལ་གྱི་རུམ་ནས་ལག་པ་ཚུར་བརྐྱངས་ཏེ། བོད་མི་ཚོའི་འོས་སྒམ་དེ་བརྐུས་པ་རེད།