ཟླ་འདིའི་ཕྱི་ཚེས་ ༣ ཉིན་ལྡི་ལིར་རྟེན་གཞི་བྱས་པའི་རྒྱལ་སྤྱིའི་བྱམས་བརྩེ་བདེ་རྩ་ཁང་དུ། ཁེ་ཎ་ཌའི་རྩེད་རིགས་བློན་ཆེན་སྐུ་ཞབས་གྷེ་རི་ལོན་ Gary Lunn མཆོག་དང༌། ལྡི་ལིར་བཅའ་བཞུགས་ཁེ་ཎ་ཌའི་གཞུང་ཚབ་ཆེན་མོ་སྐུ་ཞབས་ Stewart Beck མཆོག ཁེ་ཎ་ཌའི་གྲོས་ཚོགས་གོང་མའི་འཐུས་མི་ Vim Kochhar སོགས་ཁེ་ཎ་ཌའི་གཞུང་གི་གནད་ཡོད་དཔོན་རིགས་ ༡༥ ཙམ་གཟིགས་སྐོར་དུ་ཕེབས་ཡོད་ཅིང་། སྐབས་དེར་བདེ་རྩའི་ངེས་སྟོན་པ་འབྲས་སྤུངས་བློ་གསལ་གླིང་གི་གྲགས་པ་རིན་པོ་ཆེ་མཆོག་གིས་དབུས། དགེ་སློབ་རྣམས་ཀྱིས་བོད་ལུགས་ཕེབས་བསུ་ཟབ་རྒྱས་ཞུས་ཤིང་། ཚོགས་པའི་ལས་དོན་ངོ་སྤྲོད་དང༌སྦྲགས་སློབ་ཕྲུག་ཚོས་བོད་ཀྱི་གཞས་སྣ་གཟིགས་འབུལ་ཞུས་ཡོད།
ཉིན་དེར་གྲགས་པ་རིན་པོ་ཆེ་མཆོག་གིས་སྐུ་མགྲོན་རྣམས་ལ། བོད་རྒྱའི་དཀའ་རྙོག་སེལ་ཆེད་ྋགོང་ས་མཆོག་གིས་འབད་རྩོན་མཛད་བཞིན་པའི་བོད་རྒྱ་འབྲེལ་མོལ་ཐད་རྒྱབ་སྐྱོར་ཡོང་བ་དང༌། དེ་སྔོན་བཙན་བྱོལ་བོད་མི་རྣམས་དཀའ་ཚེགས་ཆེ་བའི་སྐབས་སུ་ཁེ་ཎ་ཌའི་གཞུང་ནས་བོད་མི་ཁག་ཅིག་སྐྱབས་བཅོལ་དུ་བཞེས་གནང་བ་མ་ཟད། དེ་རྗེས་གསར་དུ་བོད་ནང་དཀའ་ངལ་འཕྲད་རིགས་བོད་མི་སྐྱབས་བཅོལ་དུ་འབྱོར་བ་རྣམས་ལ་རོགས་རམ་གནང་བཞིན་པ་སོགས་ལ་ཐུགས་རྗེ་ཞུས་ཡོད། ཐེངས་འདིའི་གཟིགས་སྐོར་དེ་ནི། དེ་སྔོན་ཁེ་ཎ་ཌའི་གཞུང་ཚབ་ཀྱིས་རྒྱལ་སྤྱིའི་བྱམས་བརྩེ་བདེ་རྩར་མཁོ་ཆས་ཁག་ཅིག་གི་རོགས་རམ་གནང་ཡོད་ཅིང་། ཚོགས་པ་དེས་ཕྲུ་གུ་ཚོར་བྱམས་སྐྱོང་དང༌། རོགས་རམ་ཞུ་ཕྱོགས་དོན་ཕན་ལྡན་པ་ཞིག་བྱུང་ཡོད་སྟབས། ཐེངས་འདིར་ཆེད་མངགས་གཟིགས་སྐོར་དུ་ཕེབས་པ་ཞིག་ཡིན་འདུག
ལྡི་ལིའི་རྒྱལ་སྤྱིའི་བྱམས་བརྩེ་བདེ་རྩ་ནི། ྋགོང་ས་མཆོག་གི་བཀའ་སློབ་ལམ་སྟོན་འོག ཕྱི་ལོ་ ༡༩༩༧ ལོར་གསར་འཛུགས་བྱས་ཤིང་། རྒྱ་གར་གཞུང་ལ་དེབ་སྐྱེལ་བྱས་ཡོད་པའི་ཚོགས་པ་ཞིག་ཡིན་འདུག ཚོགས་པའི་ལས་དོན་ཐོག་མར། སྐབས་དེར་ལྡི་ལི་བོད་སྒར་དུ་ཉལ་ཐ་འཐེན་ཅིང་མི་ཚེ་འཕྲོ་བརླག་འགྲོ་བཞིན་པའི་བོད་ཕྲུག་ ༡༥ ཙམ་ལ། ཌེ་ཊོག་སན་ཊར་སྨན་ཁང་དུ་ཟླ་བ་ ༦ རིང་སྨན་བཅོས་ཀྱིས་དྲག་སྐྱེད་བྱུང་མཚམས་སོ་སོའི་ནང་མིར་རྩིས་སྤྲོད་ཞུས་ཤིང་། སྨན་ཁང་དེ་བརྒྱུད་འཛམ་གླིང་འཕྲོད་བསྟེན་ལྷན་ཚོགས་ W.H .O ནས་ཤེས་རྟོགས་བྱུང་རྗེས། གྲགས་པ་རིན་པོ་ཆེ་དང་ལྷན་ཚོགས་དེའི་དབུ་འཛིན་ Dr Cornela devid དང་། ལས་རོགས་རྣམས་ཕོ་བྲང་དུ་མཇལ་བཅར་གྱི་བསྐལ་བཟང་ཐོབ་ཡོད་འདུག
བྱམས་བརྩེ་བདེ་རྩས་ད་བར་བཙན་བྱོལ་བོད་མིའི་གཞིས་སྒར་ཁག་དང༌། ཧི་མ་ལ་ཡའི་རི་རྒྱུད་བཅས་ནས་དྭ་ཕྲུག་དང༌། ཕྱེད་དྭ་ཕྲུག དབང་པོ་སྐྱོན་ཅན་བཅས་ཁྱོན་བསྡོམས་ཕྲུ་གུ་གྲངས་ ༢༣ ཙམ་བདག་ཉར་གྱིས་སློབ་གྲྭ་ལེགས་ཤོས་སུ་གཏོང་བཞིན་པའི་ཐོག སྔ་དགོང་དང་གུང་སེང་སྐབས། བོད་ཡིག་དང༌། ནང་ཆོས་སོགས་རིག་གཞུང་ངོ་སྤྲོད་བྱེད་ཀྱི་ཡོད། དེ་མིན་ཉམ་ཐགས་ཕྲུ་གུ་གྲངས་ ༣༠ ལ་སློབ་ཡོན་དང༌། རྒས་ཁོག་གྲངས་ ༡༥ ཙམ་ལ་འཚོ་བའི་རོགས་དངུལ་ཡང་འབུལ་བཞིན་ཡོད། སྤྱིར་ྋགོང་ས་མཆོག་གི་ཐུགས་རྗེ་དང༌། རྒྱ་གར་གཞུང་གི་བཀའ་དྲིན། དེ་བཞིན་བཙན་བྱོལ་བོད་གཞུང་དང༌། བོད་ཁྱིམ་སློབ་གྲྭ་བཅས་ཀྱི་ཐུགས་རྗེ་བཀའ་དྲིན་ལ་བརྟེན། ཚང་མར་སྤྱི་མཚུངས་སློབ་སྦྱོང་གི་གོ་སྐབས་བཟང་པོ་ཐོབ་དང་ཐོབ་མུས་ཡིན། ཞེས་ལྡི་ལིའི་རྒྱལ་སྤྱིའི་བྱམས་བརྩེ་བདེ་རྩའི་ཡིག་གིས་གནས་ཚུལ་མཁོ་སྤྲོད་བྱུང་།
གྲགས་པ་སྤྲུལ་སྐུ་མཆོག་གི་མཛད་རིམ་རྒྱལ་བ་ལ་བརྟེན་ནས་དྭ་ཕྲུག་གི་སློབ་མ་རྣམས་ལ་སློབ་སྦྱོང་གི་གོ་སྐབས་ཐོབ་ཡོད། དེ་དག་གི་མཛད་འཕྲིན་ལ་གུས་པའི་སྙིང་ཐག་པ་ནས་རྗེས་སུ་ཡིད་རང་ཞུ་རྒྱུ་ཡིན་ནོ།