ཚའོ་ཁྲེང་ཆིན་གྱིས་བརྩམས། དོན་གོས་བསྒྱུར།
འདི་ལོའི་ནོ་སྦེལ་ཞི་བདེ་གཟེངས་རྟགས་ལིག་ཞོ་པའོ་ལ་ཕུལ་བ་དེ་ནི། རྒྱ་ནག་རྒྱལ་ཁོངས་ཀྱི་མི་སྣ་ཞིག་དང་ལྷག་པར་དུ་རྒྱ་ནག་སྲིད་གཞུང་དང་བསམ་ཚུལ་མ་མཐུན་པར་བཙོན་འཇུག་བྱས་པའི་མི་སྣ་ཞིག་ལ་ཕུལ་བ་ཐེངས་དང་པོ་ཆགས་ཡོད། ཡིན་ནའང་། རྒྱ་ནག་སྲིད་གཞུང་གིས་འདིའི་ཐད་ཁ་རྩོད་དང་རྒོལ་གཏམ་གཏོང་བཞིན་ཡོད་ལ། རྒྱ་ནག་གཞུང་དང་བསམ་ཚུལ་མི་མཐུན་པ་ཁག་ཅིག་གིས་ཀྱང་ལིག་ཞོ་པའོ་ལ་གཟེངས་རྟགས་བཞེས་པའི་ཆ་རྐྱེན་དང་ཐོབ་ཐང་ཡོད་མེད་ཀྱི་ཐད་ལའང་བསམ་ཚུལ་འདོན་བཞིན་ཡོད། དེ་ལྟ་ནའང་། རྒྱལ་སྤྱིའི་སྦྱི་ཚོགས་ཁྲོད་ཡོངས་ཁྱབ་ཀྱི་གླེང་ཕྱོགས་ཤིག་འབྱུང་བཞིན་པ་ནི། ཐེངས་འདིར་ནོ་སྦེལ་ཞི་བདེའི་གཟེངས་རྟགས་གོ་སྒྲིག་ཚོགས་ཆུང་གིས་དཔའ་ངར་ལྡན་པའི་འགུལ་སྐྱོད་ཅིག་དང་། འགུལ་སྐྱོད་འདིས་འཛམ་གླིང་མི་མང་གིས་ཀྲུང་གོའི་གདུག་རྩུབ་ཆེ་བའི་འགྲོ་བ་མིའི་ཐོབ་ཐང་གི་གནས་བབ་ལ་དོ་སྣང་བྱ་དགོས་པའི་བརྡ་ལན་ཞིག་སྤྲད་ཡོད་ལ། ཀྲུང་གོ་ནང་ཁུལ་གྱི་མི་མང་ལའང་འགྲོ་བ་མིའི་རང་དབང་རྩོད་ལེན་ཐད་ལ་འབད་བརྩོན་བྱ་རྒྱུའི་སྐུལ་འདེད་ཀྱི་ནུས་པ་བཏོན་ཡོད།
ཉེ་བའི་ལོ་འགའི་རིང་གི་ནོར་སྦེལ་ཞི་བདེའི་གཟེངས་རྟགས་ཐོབ་མཁན་གྱི་མི་སྣ་འདེམས་སྟངས་དེ་གཡོན་ལྷུང་གི་ཤུགས་ཆེ་ཞིང་། ལྷག་པར་དུ་དབང་ཤུགས་ཅན་གྱི་མི་སྣ་སོགས་ལ་སྤྲད་པའི་དབང་གིས་སྤྱི་ཚོགས་ཁྲོད་རྩོད་གཞི་རྒྱུན་དུ་འབྱུང་གི་ཡོད། དཔེར་ན། འདས་པའི་དུས་སུ་ཨ་རིའི་ཁཱ་ཐི་དང་ཀཱེལ་ཨར་བཅས་སྲིད་འཛིན་ཟུར་པ་གཉིས་དང་ཨོ་བྷ་མ་བཅས་རིམ་པར་ཕུལ་ཡོད་ཅིང་། དེའི་ཁྲོད་ཀྱི་ཁཱ་ཐི་ལ་མཚོན་ན་བྱང་ཀོ་རི་ཡའི་སྲིད་འཛིན་ཅིན་ཀྲིན་རིན་དང་གཅིག་མཚུངས་ཀྱི་སྒེར་གཅོད་པ་ཞིག་ལ་ངོས་འཛིན་བྱས་ཏེ། ཨ་རིའི་མི་མང་གིས་ཆེས་ཐབས་རྡུགས་ཀྱི་སྲིད་འཛིན་ཞིག་ཏུ་བགྲང་གི་ཡོད། ཀཱེལ་ཨར་ལ་མཚོན་ནའང་གོ་ལའི་ཚ་དྲོད་ཀྱི་གོ་སྐབས་བཟུང་སྟེ་འབྱོར་ལྡན་དུ་གྱུར་ཡོད་ལ། ནེའུ་ཡོག་དུས་བབ་ཀྱིས་ཁོང་ལ་ཟུར་ཟའི་ཚུལ་གྱིས་ཁོང་ད་ལྟའི་འཛམ་གླིང་གི་སྔོ་ལྗང་ཐོན་ལས་ཀྱི་འབྱོར་ལྡན་པ་ཨང་དང་པོ་ཡིན་པའི་སྐོར་གྱི་གནས་ཚུལ་སྤེལ་ཡོད། ༼མིག་སྔར་ཁོང་ལས་གཞི་དེའི་དབང་གིས་ཨ་སྒོར་ས་ཡ་མང་པོའི་བདག་པོ་ཆགས་ཡོད་པར་བཤད༽ དེ་བཞིན་ཨོ་བྷ་མར་གཟེངས་རྟགས་ཐོབ་པ་དེས་མི་རྣམས་ལ་གད་མོ་སློང་གཞི་ཞིག་ཆགས་ཡོད། ཁོང་ལ་ནོ་སྦེལ་ཞི་བདེ་གཟེངས་རྟགས་ཕུལ་གཏན་འཁེལ་བའི་ཉིན་དེར་སྲིད་འཛིན་གྱི་ལས་སྣེ་ལ་བུད་དེ་ཉིན་ ༡༢ ལས་ཕྱིན་མེད་ཅིང་། ཁོང་ལ་བྱས་རྗེས་ཅི་ཡང་བགྲང་རྒྱུ་མེད། སྐབས་དེར་ཡང་། བརྒྱུད་ལམ་ཁག་གིས་ཟུར་ཟའི་ཚུལ་གྱིས་དེ་ནི་ཁོང་ལ་མ་འོངས་ལས་དོན་གྱི་ཐད་སྐུལ་འདེད་གཏོང་ཆེད་གཟེངས་རྟགས་ཕུལ་བ་ཡིན་ཚུལ་ཡང་བརྗོད་ཡོད།
གནས་ཚུལ་འདི་དག་གི་ཐད་ནོ་སྦེལ་ཞི་བདེའི་གཟེངས་རྟགས་ཚོགས་ཆུང་གིས་རྒྱལ་སྤྱིའི་བརྒྱུད་ལམ་ཁག་ལ་བརྡ་ལན་དང་གཤེ་གཤེ་བཏང་ཡོད་ཀྱང་། དེ་དག་ཡོད་ཚད་ཚོགས་ཆུང་རང་གིས་རང་ཉིད་དམའ་འབེབས་བྱས་པའི་རྒྱུ་ལས་མ་འདས་པར་སྣང་། གནས་ཚུལ་འདི་དག་ལ་བལྟས་རྗེས་འདི་ལོར་ནོ་སྦེལ་ཞི་བདེ་གཟེངས་རྟགས་ཚོགས་ཆུང་གིས་དཀར་ལམ་ཞིག་བཏོད་འདུག ལིག་ཞོ་པའོ་ལ་གཟེངས་རྟགས་ཕུལ་བའི་གནད་དོན་འདིའི་ཐད་ཀྲུང་གོའི་ཕྱི་འབྲེལ་བློན་ཆེན་གཞོན་པ་སྔ་ས་ནས་ནོ་ཝེ་རྒྱལ་ས་རུ་ཕྱིན་ཏེ་གཟེངས་རྟགས་ཚོགས་ཆུང་གི་འགན་འཛིན་ལ་ཐ་ཚིག་བསྒྲགས་ཡོད་པར་མ་ཟད། གལ་སྲིད་ཁོང་ལ་གཟེངས་རྟགས་འདི་སྤྲད་ཚེ་མ་འོངས་པར་མཇུག་འབྲས་ཡག་པོ་མེད་པའི་འཇིགས་སྐུལ་ཡང་བྱས་ཡོད། ཡིན་ནའང་། ནོ་སྦེལ་ཞི་བདེེའི་གཟེངས་རྟགས་དཔྱད་འདེམས་ཚོགས་ཆུང་གིས་འཇིགས་སྐྲག་དང་ཕྱི་བྱོལ་མེད་པར་དཔའ་སྤོབས་ལྡན་པའི་ངང་ཁོང་ལ་སྤྲོད་རྒྱུར་གཏན་འཁེལ་བྱས་ཡོད།
འདིའི་ཐད་ཕྱི་ཕྱོགས་ཀྱི་དྲ་རྒྱའི་སྟེང་ནུབ་ཕྱོགས་པའི་མི་སེར་དཀྱུས་མ་ཚོས་ཀྱང་དཔྱད་གཏམ་སྤེལ་ཡོད་ལ། ཁོང་ཚོས་སྔར་ལོའི་དུས་སྐབས་འདིར་མི་རྣམས་གཟའ་འཁོར་གཅིག་རིང་ཁྲེལ་དགོད་བྱས་ཡོད་པ་དང་། དེ་ནི་ཨོ་བྷ་མར་ཞི་བདེའི་གཟེངས་རྟགས་སྤྲོད་རྒྱུ་ཁྱབ་བསྒྲབས་བྱས་པའི་དབང་གིས་རེད། འདི་ལོའི་ཞི་བདེའི་གཟེངས་རྟགས་རྒྱ་ནག་སྲིད་གཞུང་དང་བསམ་ཚུལ་མི་མཐུན་པའི་མི་སྣ་ཞིག་ལ་ཕུལ་བ་དེ་ནི་ཡང་དག་ཚུལ་ལྡན་གྱི་གདམ་གསེས་ཤིག་ཡིན་སྟབས། རང་དབང་གི་ཁོར་ཡུག་ཁྲོད་འཚོ་བ་རོལ་བཞིན་པའི་མི་རྣམས་ཀྱིས་ཀྱང་རྒྱ་ནག་གི་སྒེར་གཅོད་སྤྱི་ཚོགས་ལ་སྐྱོན་བརྗོད་དང་སུན་འབྱིན་གྱི་སྐད་སྒྲ་ཞིག་སྒྲོག་ཐུབ་ཡོད་ལ། རྒྱ་ནག་མི་མང་མང་གཙོའི་ཕྱོགས་སུ་བསྐྱོད་པའི་ཐད་ལའང་སེམས་ཤུགས་སྦར་བ་དང་དྲང་བདེན་གྱི་ཐོག་ནས་ངག་ཐོག་གི་རྒྱབ་སྐྱོར་གནང་གི་ཡོད་པ་རེད།
ཉེ་བའི་ལོ་འགའི་རིང་ཀྲུང་གོའི་དཔལ་འབྱོར་དང་དམག་དོན་འཕེལ་རྒྱས་སུ་ཕྱིན་ཡོད་སྟབས། གུང་ཁྲན་ཏང་གིས་ཕྱི་ཕྱོགས་སུ་རང་ཉིད་ཀྱི་ནུས་པ་བཙན་དབང་གིས་རྒྱ་སྐྱེད་གཏོང་འདོད་ཀྱི་རྣམ་འགྱུར་སྟོན་གྱིན་ཡོད་ལ། ནང་ཁུལ་དུ་ཚད་ལས་བརྒལ་བའི་དྲག་གནོན་དང་བཙན་དབང་གི་སྲིད་ཇུས་ལག་བསྟར་བྱས་ཏེ། ད་ལྟའི་བར་དམངས་གཙོ་དོན་གཉེར་བ་ཕལ་ཆེ་བ་བཙོན་འཇུག་བྱས་ཡོད་པར་མ་ཟད། ཡེ་ཤུའི་ཆོས་ལུགས་པ་དང་ཆོས་འཁོར་རྩ་རླུང་སྦྱོང་བརྡར་བ་རྣམས་ཀྱང་རང་དགར་བཞག་མེད།
རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པའི་སྙན་ཐོ་ཞིག་ཏུ་བཀོད་པ་ལྟར་ན། འདས་པའི་ལོ་བཅུའི་ནང་རྒྱ་ནག་གཞུང་གིས་ཆོས་འཁོར་རྩ་རླུང་སྦྱོང་བརྡར་བ་ཁྲི་བཅུ་ལྷག་བཙོན་འཇུག་དང་། དེའི་ཁྲོད་ཀྱི་མི་སུམ་སྟོང་ལྷག་དམར་གསོད་བཏང་ཡོད་ཚུལ་བརྗོད་ཡོད། དེ་བཞིན་ལིག་ཞོ་པའོ་ལ་མཚོན་ནའང་། རྒྱ་ནག་གཞུང་གིས་ཁོང་ལ་ཐེ་ཚོམ་ཅི་ཡང་མེད་པའི་ཐོག་ཁོང་གི་སྐད་ཆ་ནག་ཉེས་སུ་བགྲང་ཡོད་པར་མ་ཟད། དྲ་ཐོག་ཏུ་བཀོད་པའི་རྩོམ་ཡིག་དྲུག་ལ་བརྟེན་ནས་མི་ལོ་ ༡༡ གི་ཁྲིམས་ཐག་བཅད་ཡོད་ལ། ཕལ་ཆེར་ཁོང་གི་བརྩམས་ཆོས་རེར་ལོ་གཉིས་རེའི་ཁྲིམས་ཐག་བཅད་ཡོད། ཡིན་ནའང་། ནུབ་ཕྱོགས་ཀྱི་རྒྱལ་ཁབ་མང་བོས་རྒྱ་ནག་གི་ཁྲོམ་རྭ་དང་རྒྱལ་སྤྱིིའི་དབུ་ཁྲིད་ཀྱི་ངན་སྤྱོད། འོས་མེད་ཞོད་འཇགས་རིང་ལུགས་ལ་དོ་སྣང་བྱེད་པ་ལས། རྒྱ་ནག་གཞུང་གིས་གདུག་རྩུབ་ཀྱིས་འགྲོ་བ་མིའི་རང་དབང་དང་ཐོབ་ཐང་ཐད་དྲག་གནོན་བྱེད་ཀྱིན་པའི་བྱ་སྤྱོད་ལ་དོ་སྣང་དང་གྲུབ་འབྲས་ལྡན་པའི་སུན་འབྱིན་བྱས་མེད་ལ། ཁྲིམས་ལུགས་ཀྱི་ལག་ལེན་ཐད་དེ་བས་ཀྱང་སྨྲ་མི་དགོས་པ་ཞིག་ཡིན་སྟབས། ད་ལྟ་རྒྱ་ནག་སྲིད་གཞུང་གིས་འཛེམ་དོགས་ཅི་ཡང་མེད་པའི་ཐོག་དྲག་པོའི་བྱ་སྤྱོད་སྤེལ་གྱིན་ཡོད།
ཡིན་ནའང་། འདི་ལོའི་ནོ་སྦེལ་ཞི་བདེའི་གཟེངས་རྟགས་ཀྱིས་རྒྱ་ནག་གཞུང་ལ་ན་ཟུག་ཐེངས་ཤིག་སྤྲད་འདུག ད་ལྟའི་རྒྱ་ནག་སྲིད་གཞུང་གིས་ལན་འདེབས་ལ་བལྟས་ཚེ་ཅི་བྱ་གཏོལ་མེད་དང་ཁོང་ཁྲོོ། ཞེད་སྣང་སོགས་ཀྱིས་ཐེངས་འདིའི་གནས་ཚུལ་བཀག་སྡོམ་བྱ་ཐབས་བྱེད་བཞིན་ཡོད་མོད། བརྒྱུད་ལམ་དུ་གནས་ཚུལ་སྤེལ་བར་གཞིག་ན། གཟེངས་རྟགས་ཁྱབ་བསྒྲགས་བྱས་པའི་ཉིན་མོར་རྒྱ་ནག་ནང་ཁུལ་གྱི་མི་མང་བོས་ཤོག་སྦག་བཀད་དེ་རྒྱབ་སྐྱོར་གྱི་རྣམ་པ་བསྟན་ཡོད་སྟབས། ཐེངས་འདི་ནི་རྒྱ་ནག་གཞུང་སེམས་སྐྱོ་བའི་དུས་སྐབས་ཤིག་དང་རྒྱ་ནག་གི་མི་མང་ལ་སྤྲོ་སྐྱིད་ལྡན་པའི་དུས་སྐབས་ཤིག་ཏུ་གྱུར་ཡོད།
ཞི་བདེའི་གཟེངས་རྟགས་འབུལ་བཞེས་ཀྱི་བསྒྲགས་གཏམ་དུའང་། རྒྱ་ནག་གཞུང་གིས་ཐེངས་དུ་མར་རང་ཉིད་ཀྱིས་མིང་རྟགས་བཀོད་ཟིན་པའི་རྒྱལ་སྤྱིའི་ཆིངས་ཡིག་ལ་རྒྱབ་འགལ་བྱས་པར་མ་ཟད། ཐ་ན་རྒྱ་ནག་རང་གི་ཁྲིམས་ལུགས་ཀྱི་འགན་ལེན་བྱས་པའི་ཆབ་སྲིད་ཀྱི་བདག་དབང་ལའང་རྒྱབ་འགལ་བྱས་ཡོད་ཚུལ་བཀོད་འདུག
ད་ལྟའི་ཆར་རྒྱ་ནག་ཕྱི་ནང་གི་མི་མང་བོས་འགྲོ་བ་མིའི་ཐོབ་ཐང་གི་ཐད་ལ་ནུས་པ་གང་ཡོད་འདོན་བཞིན་ཡོད་ཀྱང་། རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྩོད་ལེན་བྱེད་མཁན་ཁྲོད་ཀྱི་འབུར་ཐོན་མི་སྣ་ལིག་ཞོ་པའོ་ལ་ཁྲིམས་ཐག་བཅད་ཡོད། ཡིན་ནའང་། ཐེངས་འདིར་ཁོང་ལ་ཞི་བདེའི་གཟེངས་རྟགས་རེག་པ་དེས་རྒྱ་ནག་གི་འགྲོ་བ་མིའི་ཐོབ་ཐང་རྩོད་ལེན་པ་ཡོངས་དང་ཕྱོགས་ཡོངས་ཀྱི་དྲང་བདེན་གྱི་བྱ་བཞག་ལ་རྒྱབ་སྐྱོར་བྱས་ཡོད་པ་གསལ་བོར་བསྟན་ཡོད་ལ། ནོ་སྦེལ་ཞི་བདེའི་གཟེངས་རྟགས་དེ་འོད་ཐིག་ཅིག་དང་འདྲ་བར་པེ་ཅིན་སྲིད་གཞུང་ལ་ན་ཟུག་ཅིག་སྤྲད་ཡོད་སྟབས། འཛམ་གླིང་མི་མང་ལ་མུན་ནག་ཁྲོད་ཀྱི་རྒྱ་ནག་མི་མང་གི་གནས་སྟངས་གང་འདྲ་ཞིག་ཡིན་མིན་གསལ་སྟོན་བྱས་པར་མ་ཟད། མ་འོངས་པར་རྒྱ་ནག་གིམང་གཙོའི་ལས་འགུལ་ལེགས་ལམ་དུ་འཇུག་པར་སྐུལ་འདེད་ཀྱི་སྟོབས་ཤུགས་སྦྱིན་ཡོད།
༢༠༡༠ ལོའི་ཟླ་ ༡༠ ཚེས་ ༡༡ ཉིན་ཚའོ་ཁྲང་ཆིན་གྱིས།
གོ་སྐབས་བྱུང་དུས་ངེས་པར་དུ་ཟིན་ཐུབ་དགོས་པ་དང་དེ་ཉིད་ཆུད་ཟོས་སུ་མ་འགྲོ་བ་བྱས་ནས་གོ་སྐབས་ཆེ་ཆུང་ལ་མ་ལྟོས་པར་རིག་པ་སྒྲིམ་དེ་བེད་སྐྱོད་ཡག་པོ་གཏོང་ཐུབ་དགོས།
སྐབས་འདིར་རྒྱ་ནག་གི་ལིན་ཞོའོ་པོའོ་ལ་ཞི་བདེའི་གཟེངས་རྟག་ཐོབ་པ་དང་མཉམ་དུ་ང་ཚོས་ཀྱང་ཞི་བདེ་ལ་དགའ་བའི་རྒྱ་ནག་མི་དམངས་དང་འཛམ་གླིང་མི་དམངས་་་ཞི་བདེ་ལ་དགའ་བའི་རྒྱལ་ཁབ་སོགས་དང་མཉམ་དུ་གནད་དོན་དེ་ལ་དམིགས་གསལ་དོ་སྣང་བྱེད་དགོས་པ་ནི་ང་ཚོས་ཧ་གོ་དོན་གསལ་རེད།་་
དེར་རྟེན་གཉིད་ཁུག་ནས་མ་སྡོད་པར་སྨྱུགས་ཐོག་པ་དང་ཆབ་སྲིད་པ་སོགས་ཀྱི་ཤུགས་གང་ཡོད་ཀྱི་བོད་དོན་འདི་གླེང་སླང་བྱེད་དགོས་པ་དང་སྐབས་འདིར་གོ་སྐབས་ཡག་པོ་ཞིག་དུ་གྱུར་ཡོད།་
ལྷག་པར་དུ་བོད་ཀྱི་ན་གཞོན་ཤེས་ཡོན་པ་རྣམས་ལ་དམིགས་གསལ་འགན་ཁུར་དགོས་པས་ཅི་ནས་ཀྱང་མཐུས་ཤོར་མ་ཕྱིན་པ་ངེས་པར་དུ་བྱེད་དགོས།།།།
་་་་་ཨོ་ད་ཐེངས་གཟེངས་རྟགས་དེས་་་་་་དྲང་བདེན་ཟེར་བ་ཞིག་འཇིག་རྟེན་ལ་ཡོད་པའི་དན་རྟགས་གསོན་པོ་ཞིག་རེད་་་་་་གནས་ཚུལ་འདིས་རྒྱ་ནག་སྲིད་འཛིན་ཉིན་ཁ་ཤས་སེམས་མ་བདེ་བ་ཏན་ཏན་བཟོས་ཡོད་་་་་་་་་་་
ཁྱད་དུ་འཕགས་པའི་རྩོམ་ཡིག་འདི་བསྒྱུར་བར་ཐུགས་རྗེ་ཆེ་ཞུའོ།།