མི་རིགས་ཀྱི་བླ་སྲོག་དང་བོད་མི་རིགས་ཀྱི་རིག་གཞུང་གི་བླ་སྲོག་ཏུ་གྱུར་བའི་སྐད་ཡིག་སྲུང་སྐྱོབ་བྱ་རྒྱུ་དེ་ཚོགས་པ་སྒྲིག་འཛུགས་ཞིག་གིས་བཤད་པ་ཙམ་མ་ཡིན་པར། སྤྱི་ཚོགས་དང་ཕ་མ། བོད་མི་མི་རེ་ངོ་རེ་རང་ངོས་ནས་དོ་སྣང་དང་འགན་འཁུར་བྱ་དགོས་པ་ཞིག་རེད་ཟེར།
ཁ་སང་ཕྱི་ཚེས་ ༡༦ ཉིན་གྱི་དགོང་མོར་བོད་སྐད་ཡིག་རྒྱུད་འཛིན་ཚོགས་པའི་གོ་སྒྲིག་འོག བཙན་བྱོལ་ནང་གི་བོད་ཀྱི་སྐད་ཡིག་སྲུང་སྐྱོབ་སྐོར་གྱི་རིག་རྩལ་སྤྲོ་ཚོགས་ཐེངས་དང་པོ་དེ་བོད་གཞུང་ཟློས་གར་ཚོགས་ཁང་དུ་བསྡུས་ཡོད་ལ། སྐུ་མགྲོན་གཙོ་བོར་བོད་གཞུང་ཤེས་རིག་བཀའ་བློན་ཐུབ་བསྟན་ལུང་རིགས་མཆོག་དང་ཆོས་རིག་བཀའ་བློན་ཚེ་རིང་ཕུན་ཚོགས་རྣམ་གཉིས་གཙོས་གཞུང་འབྲེལ་མིན་པའི་ཚོགས་པ་ཁག་གི་འགན་འཛིན་དང་སྐུ་ཚབ། ས་གནས་མི་མང་བཅས་འདུ་འཛོམས་བྱུང་ཡོད། སྤྲོ་ཚོགས་དེའི་ཐོག་མར་ཤེས་རིག་བཀའ་བློན་མཆོག་གིས་བོད་སྐད་ཡིག་རྒྱུན་འཛིན་ཚོགས་པའི་ལས་གཞི་འདིར་བསྔགས་བརྗོད་དང་འབྲེལ་བོད་པ་མི་རེ་ངོ་རེ་ནས་སོ་སོའི་སྐད་ཡིག་ལ་བདག་གཅེས་ཀྱི་འགན་འཁྲི་ཡོད་སྐོར་གྱི་གཏམ་བཤད་གནང་ཡོད་ལ། དངོས་གཞིའི་སྟེང་ངྷ་སའི་ཡོངས་གླིང་སློབ་གྲྭ་དང་སཱ་ར་མཐོ་སློབ། ཤེས་རབ་དགའ་ཚལ་སློབ་གླིང་། ངྷ་ས་ཉེ་ཁུལ་བཅས་ཀྱི་གཞས་པ་སྐོར་ཞིག་གིས་བོད་སྐད་ཡིག་དང་འབྲེལ་བའི་གླུ་གཞས་དང་གཏམ་གླེང་། བོད་ཕྱི་ནང་གཉིས་སུ་ཁྱབ་བརྡལ་དུ་འགྲོ་བཞིན་པའི་ཐ་སྙད་ངོས་འཛིན་བཅས་གནང་ཡོད།
ཤེས་རིག་བཀའ་བློན་མཆོག་གིས་གཏམ་བཤད་གནང་དོན། ད་ལྟའི་དུས་ཚོད་འདི་ནི་ང་ཚོའི་སྐད་ཡིག་ཧ་ཅང་ཉམ་ཆགས་སུ་འགྲོ་བཞིན་པའི་དུས་སྐབས་ཤིག་རེད། བོད་ནང་ལ་མཚོན་ན། རྒྱ་ནག་གིས་ཆེད་མངགས་ཀྱིས་ཉམ་ཆགས་སུ་གཏོང་གི་ཡོད་ལ། ཉམས་ཆག་གཏོང་རྒྱུ་དེ་ཁོང་ཚོའི་ལས་འགན་ཆགས་ཡོད་པ་རེད། ང་ཚོ་བཙན་བྱོལ་རང་དབང་ལུང་པར་ཡོད་པའི་བོད་མི་ཚོས་རང་དབང་ཡོད་པའི་དུས་སྐབས་འདིར་བོད་རང་གི་སྐད་ཡིག་ལ་བདག་པོ་མ་བརྒྱབ་ན། རྒྱ་མི་ལས་སྡུག་པ་རེད་ཅེས་བརྗོད་ཀྱང་མ་འགྲིག་པ་མི་འདུག་བསམ། རྒྱ་མིས་རྩ་མེད་དུ་གཏོང་བཞིན་པ་དེ་དམིགས་ཡུལ་ཞིག་གི་སྒོ་ནས་གཏོང་གི་ཡོད་ཀྱང་། ང་ཚོས་ལས་འགན་དེ་བོད་ཀྱི་སྐད་ཡིག་རྒྱུད་འཛིན་དང་བདག་པོ་རྒྱག་རྒྱུ་དེ་རེད། ང་ཚོ་བཙན་བྱོལ་དུ་ཡོང་དོན་ཡང་བོད་རང་གི་ཆོས་དང་རིག་གཞུང་། སྐད་ཡིག་བཅས་ལ་རང་དབང་མེད་སྟབས། དེ་དག་གི་རང་དབང་འཐབ་རྩོད་ཀྱི་ཆེད་དུ་ཡོང་དགོས་བྱུང་བ་རེད། ང་ཚོ་འདིར་སླེབས་ཏེ་རང་གི་སྐད་དང་ཡི་གེར་དོ་སྣང་མ་བྱས་པ་ཡིན་ན། ཧ་ཅང་ཐབས་སྐྱོ་བོའི་གནས་ཤིག་རེད། ཅེས་གསུངས་སོང་།
ཡང་ཁོང་གིས། ང་ཚོའི་བོད་སྐད་ཡིག་དེ་ང་ཚོ་རང་གི་སྐད་ཡིག་ཡིན་པའི་ཐད་ནས་བདག་པོ་རྒྱག་དགོས་པ་ཞིག་དང་། འཛམ་གླིང་ཁྱོན་ཡོངས་སུ་མཁོ་གལ་ཆེན་པོ་ཞིག་ཆགས་ཡོད་པའི་ཆ་ནས་དེ་ནི་འཛམ་གླིང་ལ་ཞལ་འདེབས་ཆེན་པོ་ཞིག་རེད་བསམ་གྱི་ཡོད། རྒྱ་གར་ལ་མཚོན་ན། སྟོད་ལ་དྭགས་ནས་ཨ་སཱམ་བར་བོད་ཀྱི་སྐད་ཡིག་དེ་ཕལ་སྐད་ལྟར་ཤུགས་ཆེར་བེད་སྤྱོད་བྱེད་ཀྱི་ཡོད་ལ། སོག་པོ་དང་རྒྱ་གར་སོགས་རིག་གཞུང་གཅིག་པ་རྣམས་ལའང་གལ་ཆེན་ཆགས་ཡོད། དེ་བཞིན། རྒྱ་གར་དང་ཕྱི་རྒྱལ་གྱི་མཐོ་སློབ་མང་པོའི་ནང་ཆེད་དུ་རིག་གཞུང་ཞིབ་འཇུག་གི་སྡེ་ཚན་བཙུགས་ཏེ་སློབ་སྦྱོང་དང་ཉམས་ཞིབ་བྱེད་ཀྱི་ཡོད་སྟབས། ང་ཚོས་བོད་ཡིག་བོད་སྐད་དེ་རང་གི་སྐད་ཡིག་ཙམ་དུ་མ་ཟད། འཛམ་གླིང་ཁྱོན་ཡོངས་སུ་དགོས་གལ་ཆེན་པོ་ཞིག་ཡིན་པ་ཤེས་པར་བྱས་ཏེ། མི་རིགས་ཀྱི་བླ་སྲོག་དང་བོད་མི་རིགས་ཀྱི་རིག་གཞུང་གི་བླ་སྲོག་ཏུ་གྱུར་བའི་སྐད་ཡིག་སྲུང་སྐྱོབ་བྱ་རྒྱུ་དེ་ཚོགས་པ་སྒྲིག་འཛུགས་ཞིག་གིས་བཤད་པ་ཙམ་མ་ཡིན་པར། སྤྱི་ཚོགས་དང་ཕ་མ། བོད་པ་མི་རེ་ངོ་རེ་ནས་དོ་སྣང་དང་འགན་འཁུར་བྱ་དགོས་པའི་རེ་བ་དང་འབོད་སྐུལ་ཡང་གནང་བྱུང།
མཇུག་མཐར་༼ སྐད་ཡིག ༽ ཚགས་པར་གྱི་རྩོམ་སྒྲིག་པ་འབྲོག་རུ་ཆོས་གྲགས་ལགས་ཀྱིས་ཐུགས་རྗེ་ཆེའི་གསུང་བཤད་དང་སྦྲགས། བོད་སྐད་ཡིག་རྒྱུན་འཛིན་ཚོགས་པའི་དམིགས་ཡུལ་གཙོ་བོ་བོད་རང་གི་བླ་སྲོག་ཏུ་གྱུར་བའི་སྐད་ཡིག་ཉམས་པ་སླར་གསོ་དང་མི་ཉམས་གོང་སྤེལ་བྱ་ཆེད་ཡིན་སྐོར་བཅས་ངོ་སྤྲོད་དང་འབྲེལ། བོད་པའི་སྐད་ཡིག་རྒྱུན་འཛིན་གོང་སྤེལ་གྱི་གལ་ཆེའི་རང་བཞིན་དང་། མ་འོངས་པར་བོད་པ་མི་རེ་ངོ་རེས་བོད་སྐད་གཙང་མ་ཞིག་དང་བོད་ཀྱི་རིག་གཞུང་སྲུང་སྐྱོབ་ཐད་འབད་འབུང་བྱ་དགོས་པའི་འབོད་སྐུལ། གཞུང་དང་ཚོགས་པ་ཁག་གིས་ཀྱང་བོད་སྐད་ཡིག་དང་འབྲེལ་བའི་ལས་དོན་ཐད་བསམ་བློའི་རྒྱབ་སྐྱོར་དང་། དཔལ་འབྱོར་གྱི་རོགས་སྐྱོར་སོགས་གནང་སྐྱོང་ཡོང་བའི་རེ་བ་ཡང་བཏོན་སོང་།
བོད་ཀྱི་སྐད་ཡིག་རྒྱུན་འཛིན་ཚོགས་པ་ནི། ༢༠༠༥ ལོའི་ཟླ་ ༧ པའི་ཚེས་ ༦ ཉིན་བོད་ནས་གསར་དུ་འབྱོར་བའི་ཆོལ་གསུམ་བོད་མི་གཞོན་སྐྱེས་ཁག་ཅིག་གིས་བལ་ཡུལ་སྣེ་ལེན་ཁང་ནས་དང་བླངས་ཐོག་གསར་འཛུགས་གནང་ཞིང་། ད་ལྟའི་ཆར་ཨ་རི་དང་ཐེ་ཝན་གཙོས་རྒྱ་བལ་འབྲུག་གསུམ་ནང་ཚོགས་མི་ ༧༠ ལྷག་ཡོད་འདུག འདས་པའི་མི་ལོ་ལྔའི་རིང་ཚོགས་པ་འདིས་དཔལ་འབྱོར་གྱི་དཀའ་ངལ་ལ་མ་འཛེམས་པར་སྐད་ཡིག་སྲུང་སྐྱོབ་དང་འབྲེལ་བའི་བགྲོ་གླེང་དང་ཟབ་སྦྱོང་། སྐད་ཡིག་གི་ཉིན་མོ་སྲུང་བརྩི་སོགས་ཀྱིས་ལས་འགུལ་སྤེལ་ཡོད་པ་མ་ཟད། ཉེ་ལམ་བོད་གཞུང་བཀའ་ཤག་གཙོས་ལྷན་ཁག་ཁག་བདུན་དང་སློབ་གྲྭ། དགོན་སྡེ་ཁག གཞུང་འབྲེལ་མིན་པའི་ཚོགས་སྡེ་ཁག་ ༡༤༠ ཙམ་ལ་བོད་ཡིག་བེད་སྤྱོད་ཁྱབ་གདལ་དང་བོད་སྐད་གཙང་མ་བཤད་དགོས་པའི་ཐད་ལ་སྙན་ཞུ་ཞིག་ཀྱང་ཕུལ་ཡོད་འདུག ༢༠༠༧ ལོ་ནས་བཟུང་༼ སྐད་ཡིག༽ ཚགས་པར་ཟླ་རེར་ཐེངས་གཉིས་རེར་རྒྱ་བལ་འབྲུག་གསུམ་གཙོས། ཨ་རི་དང་ཡུ་རོབ་སོགས་སུ་འགྲེམ་སྤེལ་བྱེད་ཀྱིན་ཡོད།
གསར་འགོད་པ། དོན་གོ
ལོ་ངོ་སྟོང་ཕྲག་སྔོན་གྱི་ཕ་མེས་ཀྱིས་བཞག་པའི་བཟང་པོའི་ཡོན་ཏན་གྱི་རྒྱུད་པ་དུས་རབས་ཉེར་གཅིག་པ་དེར་ཆད་པར་དོགས་པས་སོ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་དྲན་ནོ།
བོད་ནང་སྐད་ཡིག་སྲུང་སྐྱོབས་ཐད་རྒྱ་གཞུང་ལ་ངོ་རྒོལ་བྱེད་བཞིན་ཡོད་པ་དང།
འདི་ག་ངེད་ཅག་ནས་ཚོགས་འདུ་ར་ཚོགས་ཏེ་གཞས་ཞབས་བྲོ་འཁྲབ་པའི་ལུགས་སྲོལ་འདི་སྐུ་ངོ་དེ་དག་གི་ལམ་དང་ལུགས་སྲོལ་མིན་ནམ།
སྐད་ཡིག་རིག་གནས་དང་འབྲེལ་བའི་ལས་དོན་དན་ནམ་ཚོགས་འདུ། བགྲོ་གླེང་སོགས་ལ་སྐད་ཡིག་གནས་རིག་གནས་ཀྱི་ཆེད་ལས་མི་སྣ་དང་ཆེད་མཁས་པ་གདན་ཞུས་ཀྱིས་གསུང་བཤད་དང་ཁོ་ཚོའི་ཉམས་མྱོང་གསུང་གི་བཅུག་ན། བཤད་རྒྱུ་དང་ཉན་རྒྱུ་གཉིས་ཀ་ཡོད་པ་རེད།
ང་ཚོའི་བཙན་བྱོལ་ནང་དུ་སྤྱིར་བཏང་གི་བགྲོ་གླེང་དང་ཚོགས་འདུ། ཆེད་དོན་གླེང་སློང་སོགས་གང་སར་དཔོན་པོ་དང་བླ་མ་རེ་གདན་ཞུས་ཀྱིས་༼གསུང་བཤད་༽གནང་གི་འཇུག་གིན་འདུག འདིའི་དོན་ཅི་ཡིན་ཤེས་མ་སོང་། ངས་འདི་ལྟར་བཤད་པ་ནི་བྨ་དཔོན་ལ་མི་དགའི་བའི་རྣམ་འགྱུར་བཟུང་བ་མིན། དེ་དོན་དག་དང་འབྲེལ་བ་ཆེར་མི་འདུག་བསམས་པ་ཡིན།
སྐད་ཡིག་སྲུང་སྐྱོབ་ཚོགས་པས་གོ་སྒྲིག་གནས་བའི་བགྲོ་གླེང་ཚོགས་འདུ་འདི་བཞིན་གང་ལེགས་ལེགས་དང་ཚགས་ཚུད་པོ་བྱུང་སོང་སྙམ་པས་དགའ་ཡོད། སླད་ནས་ཀྱང་ཡར་རྒྱས་གོང་སྤེལ་བྱ་ཐུབ་པའི་རེ་བ་ཆེ་ནས་ཆེ་རུ་བྱས་ཡོད་ལགས།
སྐད་ཡིག་ཚོགས་པའི་ཚོགས་མི་ཡོངས་ལ་ཐུགས་རྗེ་ཆེ་ཞུ།
ལས་འགུལ་འདི་རྒྱུན་སྲིང་ཐུབ་པ་ཞིག་ཅི་ནས་ཀྱང་འབད་བརྩོན་གནང་རོགས་ཞུ་རྒྱུ་དང་རྒྱུ་རྐྱེན་འདྲ་མིན་དབང་གི་ལས་དོན་དཀའ་ངལ་འཕྲད་སྲིད་ཀྱང་སྙིང་སྟབས་ཆེརསྐྱེད་ནས་མུ་འཐུད་དུ་ཡུན་གནས་ཡོང་བར་བདག་གི་སྨོན་ཚིག་ཡོད།
སྐད་ཡིག་རྒྱུན་འཛིན་ཚོགས་པས་ལས་འགུལ་འདི་འདྲར་སྤེལ་པར་རྗེས་སུ་ཡུན་རིང་དང་རྒྱབ་སྐྱོར་གཙང་མ་ཡོད། ཐུགས་རྗེ་ཆེ། མུ་མཐུད་ནས་ལས་འགུལ་གང་མང་སྤེལ་གནང་ཡོང་བའི་རེ་མདུན་ཞུ།
སྤྱིའི་ཆ་བྱ་འགུལ་འདི་རིགས་ཡག་པོ་ཡིན་ཀྱང༌། དོན་དངོས་སུ་ཚོགས་པ་ཆེ་ཆུང་འདྲ་མིན་གཙུགས་ཏེ་རང་གི་མདུན་ལམ་འཚོལ་ཆེད་ལས་མ་འདས། ང་ཚོའི་འདས་ཟིན་པའི་སྐབས་འཚོལ་བ་དག་ལ་བལྟས་དུས་རང་དོན་སྒྲུབ་ས་འདྲ་པོ་ཆགས་ཡོད་པ་ཤེས་གསལ་རེད། ལོ་གཅིག་ལོ་གཉིས་རྗེས་ནས་ཚོགས་པ་སྒོ་བརྒྱབ་མ་དངུལ་རག་པ་ཁུར་གྱིས་ཕྱིན་པའི་ལོ་རྒྱུས་ཉུང་ཉུང་བརྟན་མ་རེད། ཚང་མས་གཟབ་དགོས་ཡ།
སྤྱིར་རྗེས་སུ་ཡི་རིང་དང་ཐུགས་རྗེ་ཆེ་ཞུ་དགོས་ངེས་རེད།
འོན་ཀྱང་ངའི་གཤེས་ཀ་འདི་རང་ཉིད་ལ་ཚོ་ལ་བ་གང་ཞིག་བྱུང་བརྗོད་རྒྱུ་མ་གཏོགས་
བརྗོད་བྱེད་དང་གང་བརྗོད་པར་བྱ་བ་སྙན་མོ་སོགས་ལ་གཙོ་འདོད་མི་བྱེད་ལ་བྱེད་ལྱང་མི་ཤེས།
ངའི་སེམས་ཚོལ་ལ་་་་་་་ང་ཚོ་བོད་ཀྱི་སྐད་ཡིག་ ཁྲབས་སྟོན་ལྟ་བུ་ཞིག་དུ་འགྱུར་རྒྱུའི་འགོ་རྩམ་ཡོང་གིན་འདུག་པའི་ཚོལ་བ་ཞིག་ངང་གིས་ཡོང་གིན་འདུག
འདི་འདྲ་ཞིག་དུ་མི་གྱུར་བར་ཤོག
ཧ་ཅང་རིན་ཐང་ཅན་དང་གཟི་བརྗིད་ཅན།འགན་ཁུར་ཅན་གྱི་བྱ་འགུལ་རང་བཞིན་གྱི་རིག་རྩལ་སྤྲོ་ཚོགས་འདི་ནི་ངོ་མ་འུ་ཚང་གི་མིའི་སྤྱི་ཚོགས་སུ་ཁ་ཚ་དགོས་གཏུག་དང་གནད་ལ་འཁེལ་བའི་ལས་འགུལ་ཞིག་རེད་འདོད་ལ།མི་རེ་རེར་འགན་རེ་ཡོད་པ་ནང་བཞིན་བོད་མི་ཚང་མས་བོད་སྐད་གཙང་མ་ཞིག་བཤད་དགོས་པ་ནི་དེ་བས་ཀྱང་གལ་ཆེན་ཞིག་རེད།ཁྱེད་ལ་མི་རིགས་དགོས་ན་སྐད་ཡིག་ཀྱང་ངེས་པར་དུཤེས་དགོས་ནི་རེད།སྐད་ཡིག་དང་མི་རིགས་གཉིས་ངོ་བོ་དབྱེར་མེད་ཀྱི་ཆོས་སུ་གྲུབ་པས་བྱ་ཐབས་མེད།དེའི་ཕྱིར།འུ་ཚོ་ཚང་མས་རང་ཉིད་ཀྱིས་རང་ཉིད་ཀྱི་འགན་ཁུར་ནས་རང་ཉིད་ཀྱི་ཤ་ཁྲག་རུས་གསུམ་ན་བཞུར་གྱིན་པའི་སྐད་ཆ་དེའང་བོད་སྐད་གཙང་མ་ཞིག་བྱེད་ཨེ་ཐུབ་ལ་འབད་དགོས་པར་འདོད།
སྐད་ཡིག་ཚོགས་པའི་མི་སྣ་ཡོངས་ལ་ཐུགས་རྗེ་ཆེ་ཞུ།
ད་ལྟའི་བར་ཟབ་སྦྱོང་གནང་ས་དེ་གྲྭ་ས་ཁག་དང་བོད་མི་འདུས་སྡོད་མི་འབོར་ཆེ་སའི་ས་གནས་ཁག་ཡིན་པས་དེ་ཚོ་བོད་སྐད་མཉམ་ཆགས་ལས་བོད་སྐད་བསྲུང་སྐྱོབས་བྱས་པ་བཟང་གི དེ་ཡིན་དུས་ད་ནས་བཟུང་སྐད་ཡིག་ཉག་ཕྲ་ས་རྡོ་རྗེ་གླིང་དང་ཀ་ལུམ་ཕུག་སོགས་ལ་ལས་འགུལ་རེ་རྩོམ་ཐུབ་ན་ཕན་ཐོགས་ཆེ་པོ་ཡོངས་ངེས་རེད་ཅེས་རེ་བསྐུད་ཞུ་བ་ལགས།
ལོ་ངོ་ལྔ་བཅུའི་དེ་རིང་བོད་སྐད་ཡིག་སྲུང་སྐྱོབ་སྐོར་གྱི་རིག་རྩལ་སྤྲོ་ཚོགས་དང་པོ་
ཚོགས་ཐུབ་པ་ལ་བཀྲ་ཤིས་བདེ་ལེགས་ཞུ་བ་དང་ཆབ་ཅིག་ཚོགས་བཅར་བ་དང་སྐུ་ངོ་ཡོངས་ནས་བོད་སྐད་གཙང་མ་ཞིག་གྱོན་པས་པར་ཞུ་ཞུ་………………
…xxx……………………………………………..