སྤྱི་ནོར་༧གོས་ས་མཆོག་གིས་ཨ་རིའི་ནང་མཛད་འཕྲིན་སྐྱོང་གི་ཡོད་པ་ལྟར། ཕྱི་ཚེས་ ༡༠ ཉིན་ཨེ་མོ་རི་གཙུག་ལག་སློབ་གྲྭའི་ནང་ཆིབས་སྒྱུར་བསྐྱངས་ཏེ། མི་གྲངས་ ༤༠༠༠ ལྷག་འདུ་འཛོམས་དབུས་གསུང་བཤད་གནང་དོན། གདོད་མའི་སྤྱི་ཚོགས་སྐབས་མི་རྣམས་དཀའ་ངལ་ལས་གྲོལ་སླད་དཀོན་མཆོག་ལ་ཡིད་ཆེས་བྱ་རྒྱུའི་བསམ་བློ་དེ་བསླེབས་པ་རེད། སྐབས་དེར་མི་རྣམས་ལ་དཀའ་ངལ་འཕྲད་སྐབས། སྨོན་ལམ་རྒྱག་རྒྱུ་ལས་ཐབས་གཞན་རྙེད་ཀྱི་ཡོད་པ་མ་རེད། རིམ་པས་ཚན་རིག་དང་འཕྲུལ་ཆས་ཡར་རྒྱས་ཕྱིན་པ་དང་བསྟུན་ཏེ། མི་རྣམས་ཀྱིས་ཚན་རིག་ལ་ཡིད་ཆེས་བྱེད་མགོ་བརྩམས་པ་རེད། འདས་པའི་དུས་རབས་ཉི་ཤུའི་རིང་ཚན་རིག་དང་འཕྲུལ་ཆས་ཡར་རྒྱས་ཆེན་པོ་ཕྱིན་ཡོད། འདས་མ་ཐག་པའི་དུས་རབས་ཉི་ཤུ་བ་དེ་འཐབ་འཁྲུག་ཆེ་ཤོས་ཤིག་ཆགས་ཡོད།
ཚན་རིག་གི་ལམ་ནས་བརྙེད་པའི་གྲུབ་འབྲས་ཕལ་ཆེ་བ་གཏོར་བཅོམ་ཁོ་ནའི་ཆེད་བེད་སྤྱོད་བཏང་ཡོད། དེར་བརྟེན་ཕྱི་དངོས་པོའི་ཡར་རྒྱས་དེར་ཚད་གཞི་ངེས་ཅན་ཞིག་ཡོད། དཀའ་རྙོག་འདི་དག་ཚན་རིག་རང་གིས་བཟོས་པ་ཞིག་མ་རེད། ཚན་རིག་བེད་སྤྱོད་བྱེད་མཁན་གྱི་མིས་བཟོས་པ་ཞིག་ཆགས་ཡོད་ཀྱང་། དཀའ་ངལ་དེ་དག་སེལ་དགོས་ན་མིའི་རྣམ་དཔྱོད་གཅིག་པུས་ཡོང་གི་མ་རེད། བྱམས་བརྩེ་ནི་དཀའ་རྙོག་དེ་དག་གི་གཉེན་པོ་ལྟ་བུ་ཆགས་ཡོད་ལ། བྱམས་བརྩེའི་ས་བོན་དེ་མི་ཚང་མར་ཡོད། ཡང་བྱམས་བརྩེ་ཕྱོགས་སུ་ལྷུང་བ་དང་མ་ལྷུང་བའི་ཆ་གཉིས་ཡོད་སྟབས། ང་ཚོས་སྦྱོང་བརྡར་གྱི་ལམ་ནས་ཕྱོགས་སུ་མ་ལྷུང་བའི་བྱམས་བརྩེ་དེ་རྒྱ་སྐྱེད་གཏོང་ཐུབ་པ་བྱ་དགོས། ཞེས་གསུངས་ཡོད།
ཁ་སང་ཕྱི་ཚེས་ ༡༩ ཉིན་༧གོང་ས་མཆོག་ཨེ་མོ་རི་གཙུག་ལག་སློབ་གྲྭའི་ཚོགས་ཁང་དུ། ཨ་རིའི་ནེའུ་ཡོག་སྐུ་ཚབ་དོན་གཅོད་དང་ཨེ་མོ་རི་གཙིག་ལག་སློབ་གྲྭ་གཉིས་མཉམ་འབྲེལ་ཐོག་གོ་སྒྲིག་བྱས་པའི་རྒྱལ་སྤྱིའི་བོད་བརྒྱུད་ནང་བསྟན་ལྷན་ཚོགས་ཀྱི་ཚོགས་མགོན་དུ་ཕེབས་ཏེ་བཀའ་སློབ་བསྩལ་དོན། ངོས་ལ་རྒྱལ་སྤྱིའི་བོད་བརྒྱུད་ནང་བསྟན་ལྷན་ཚོགས་ཀྱི་ཚོགས་ཆེན་མགོ་འཛུགས་བྱ་རྒྱུའི་གོ་སྐབས་ཐོབ་པ་ནི་ཧ་ཅང་ཆེ་མཐོང་བྱས་པ་རེད། བོད་ཀྱི་སངས་རྒྱས་པའི་ཆོས་དེ་གནའ་བོའི་རིག་གཞུང་ཙམ་མིན་པར་དེང་སང་འཛམ་གླིང་སྤྱི་ལ་འབྲེལ་བ་ཆེན་པོ་ཡོད། འདས་པའི་ལོ་ ༥༡ རིང་རྒྱ་གར་ནང་བོད་ཀྱི་སངས་རྒྱས་པའི་ཆོས་དེ་སྲུང་སྐྱོབ་བྱ་རྒྱུར་འབད་བརྩོན་ཆེན་པོ་བྱས་ཡོད་པ་མ་ཟད། གཡུང་དྲུང་བོན་གྱི་བསྟི་གནས་ཀྱང་སྒྲིག་འཛུགས་སྲ་བརྟན་ཡོད།
ད་ལྟའི་ཆར་རྒྱ་གར་ནང་དགེ་འདུན་པ་ ༡༠༠༠༠ ཙམ་དང་སོག་པོའི་དགེ་འདུན་པ་བརྒྱ་སྐོར་ཙམ་ནས་ནང་ཆོས་སློབ་གཉེར་གནང་བཞིན་ཡོད་ལ། ནང་ཆོས་སློབ་གཉེར་གནང་མཁན་སློབ་ཕྲུག་ལྔ་སྟོང་ནས་དྲུག་སྟོང་བར་ཡོད། དེ་བཞིན། བཙུན་མ་ཡང་གང་ཙམ་ཞིག་ཡོད། ཕྱི་ལོ་ ༡༩༦༠ དང་ ༡༩༧༠ ནང་བོད་ཀྱི་ནང་ཆོས་སློབ་ཁྲིད་གནང་མཁན་བླ་མ་དགེ་བཤེས་འགའ་རེ་ནུབ་ཕྱོགས་སུ་ཕེབས་ཏེ་ཆོས་ཚོགས་བཙུགས་ཡོད། འོན་ཀྱང་སོ་སོའི་ཕ་མེས་ཀྱི་ཆོས་ལུགས་མ་དོར་བ་བྱ་རྒྱུའི་ང་ཚོའི་གཞི་རྩའི་བསམ་བློར་འགྱུར་བ་མེད། ཆོས་ལུགས་བསྒྱུར་རྒྱུ་དེར་ང་ཚོས་ཡིད་ཆེས་བྱེད་ཀྱི་མེད། རང་གི་ཕ་མེས་ཀྱི་ཆོས་ལུགས་གང་ཡིན་པ་དེའི་རྗེས་སུ་འཇུག་རྒྱུ་གལ་ཆེན་པོ་རེད། ཅེས་གསུངས་ཡོད།
ཁོང་གིས་མུ་མཐུད་དུ་བོད་ཀྱི་གནད་དོན་སྐོར་གསུངས་དོན། བོད་ཀྱི་གནས་སྟངས་དེ་ཕྱོགས་གཅིག་ནས་བློ་ཕམ་པོ་ཞིག་ཡིན། འོན་ཀྱང་ཕྱོགས་གཞན་ཞིག་ནས་བརྗོད་ན་སྔར་མེད་པའི་གོ་སྐབས་ཤིག་ཀྱང་རེད། སྤྱིར་ཆོས་ལུགས་འདྲ་མིན་བར་འཆམ་མཐུན་ཡོང་རྒྱུར་འབད་བརྩོན་བྱེད་བཞིན་ཡོད་ནའང་ནང་པ་སངས་རྒྱས་པའི་ཆོས་ལུགས་ནང་། ཕན་ཚུན་འཆམ་མཐུན་ཡོང་རྒྱུར་འབད་བརྩོན་འདང་ངེས་ཤིག་བྱུང་ཐུབ་མེད། དཔེར་ན། པཱ་ལིའི་སྲོལ་རྒྱུན་ནང་དུ་ནང་ཆོས་སློབ་གཉེར་གནང་མཁན་དང་། ལེགས་སྦྱར་གྱི་སྐད་ཡིག་ལ་བརྟེན་ནས་ནང་ཆོས་སློབ་གཉེར་གནང་མཁན་བར་གྱི་འབྲེལ་བས་འདང་གི་མེད། བོད་པར་ཆ་བཞག་ནའང་མཚམས་རེར་ཆོས་ལུགས་སོ་སོའི་རིང་ལུགས་དེར་གཙིགས་ཆེན་བྱས་ཏེ། ཚང་མ་སངས་རྒྱས་པའི་ཆོས་ལུགས་ཀྱི་རྗེས་འབྲང་གཅིག་པ་ཡིན་བསམ་པའི་འདུ་ཤེས་ཀྱིས་འདང་གི་མེད། ཅེས་དང་། བོད་པའི་ནང་པ་ཚོས་ཀྱང་ཆོ་ག་ཕྱག་ལེན་དང་འདོན་རྟ་དབྱངས། འཆམ་སོགས་ལ་དོ་སྣང་ཆེན་པོ་བྱས་ཏེ་ནང་པའི་ཆོས་ཀྱི་དོན་དག་ངོ་མ་དེར་དོ་སྣང་དེ་ཙམ་མ་སྤྲད་པར་འཐུས་ཤོར་འགྲོ་རྒྱུའི་ཉེན་ཁ་ཡོད། འོན་ཀྱང་ཚང་མ་དེ་འདྲ་མིན་པར་ནང་ཆོས་ཉམས་ལེན་པ་ཡག་པོ་དེ་འདྲའང་ཡོད་པ་རེད། སྟོན་པ་བཅོམ་ལྡན་འདས་ཞལ་བཞུགས་སྐབས་ནང་ཆོས་ཉམས་ལེན་དེ་གཙོ་བོ་དགེ་སློང་ཚོས་གནང་གི་ཡོད། ཕྱིས་སུ་དུས་རབས་བརྒྱད་པའི་སྐབས། བོད་ནང་གྲྭ་པ་དང་སྐྱ་བོ་གཉིས་ཀས་འགན་ཁུར་རྐང་ལེན་གྱིས་ནང་ཆོས་འཛིན་སྐྱོང་སྤེལ་གསུམ་གནང་ཡོད། ཅེས་གསུངས་ཡོད།
མཇུག་ཏུ་༧གོང་ས་མཆོག་གིས་རེ་བ་གཉིས་གསུངས་དོན། ཁྱེད་ཚོར་དོན་དག་གལ་ཆེན་པོ་གཉིས་འབོད་སྐུལ་ཞུ་རྒྱུ་ཡོད། དང་པོ་དེ་རིང་འདིར་ཕེབས་པ་ཚང་མས་ཕན་ཚུན་ངོ་ཤེས་པའི་ཐོག་བསམ་ཚུལ་བརྗེ་ལེན་གནང་དགོས་པ་རེད། ནང་པའི་ཆོས་ཚོགས་དར་རྒྱས་ཆེ་རུ་སོང་བ་དང་བསྟུན་ཏེ་མིའི་གྲངས་འབོར་ཡང་འཕེལ་བཞིན་ཡོད། དེར་བརྟེན་རང་བཞིན་གྱིས་ལྐོག་ཟ་རུལ་སུངས་དང་ཀུན་སྤྱོད་སོགས་ལ་ཉམས་རྒུད་འགྲོ་རྒྱུའི་ཉེན་ཁ་ཏན་ཏན་ཡོད་པ་རེད། ཉེན་ཁ་དེ་དག་ཐོག་བགྲོ་གླེང་གནང་དགོས། གཉིས་པ། ནང་པའི་ཆོས་ཚོགས་ཚང་མས་ནཱ་ལེཎྜའི་སྲོལ་རྒྱུན་ལ་དོ་སྣང་མང་ཙམ་སྤྲོད་དགོས། བོད་ཀྱི་སངས་རྒྱས་པའི་ཆོས་དང་བོན་གྱི་གཞུང་གཉིས་ཀའི་ནང་། ནཱ་ལེཎྜའི་སྲོལ་རྒྱུན་ཐོག་སློབ་སྦྱོང་བྱེད་པའི་ལམ་སྲོལ་ཡོད། ཚང་མས་ནཱ་ལེཎྜའི་མཁས་པ་ཚོས་བརྩམས་པའི་གཞུང་ལ་ཁུངས་གཏུགས་ཏེ། ནང་ཆོས་སློབ་གཉེར་བྱ་རྒྱུ་དེ་གལ་ཆེན་པོ་རེད། གནད་དོན་འདི་དག་ཐོག་ཚོགས་བཅར་བ་ཚང་མས་ཐུགས་ཁུར་ཆེ་བཞེས་གནང་སྟེ་བགྲོ་གླེང་ལྷུག་པོ་གནང་རོགས། ཞེས་སོགས་གསུངས་ཡོད།
གསར་འགོད་པ། དོན་འགྲུབ་བཀྲ་ཤིས།
༸ གོང་ས་སྐྱབས་མགོན་ཡིད་བཞིན་ནོར་བུའི་མཁྱེན་རླབས་མཚུངས་པའི་ཐུགས་རྗེའི་བཀའ་དྲིན་འོག་བོད་ཀྱི་ཆོས་ལུགས་ཁག་དབར་སྔར་བྱུང་མ་མྱོང་བའི་མཐུན་སྒྲིལ་ཆེན་པོ་ཞིག་དང་སྔར་དར་མ་ཐུབ་པ་ཞིག་ད་ཆ་འཛམ་གླིང་ཧྲིལ་པོར་དར་རྒྱས་འགྲོ་བཞིན་ཡོད།
དེ་ཙམ་མ་ཟད་འཛམ་གླིང་ཆོས་ལུགས་སྤྱི་ཡོངས་ཀྱི་མཐུན་སྒྲིལ་ཆེན་པོ་དར་རྒྱས་སུ་གཏོང་བཞིན་ཡོད་འདི་བོད་ཀྱི་བླ་ན་མེད་པའི་དབུ་འཁྲིད་༸ གོང་ས་མཆོག་གང་ཉིད་ཀྱི་མཛད་རྗེས་རྨད་དུ་བྱུང་བ་ཞིག་ཡིན།
རྒྱལ་བ་རིན་པོ་ཆེ་གང་ཉིད་ཀྱིས་གསུང་ལྟར་འདས་པའི་ལོ་རྒྱུས་ལ་ཕྱིར་མིག་གཅིག་བལྟས་ན་བོད་བརྒྱུད་ནང་བསྟན་ཆོས་ལུགས་ཁ་ལ་ཁྱེར་ནས་དབང་བསྒྱུར་གྲལ་རིམ་དང་སྤྱི་ཚོགས་ནང་བསམ་སྤྱོད་ལས་འདས་པའི་གནད་དོན་ལྷག་ཡོད།
དཔེར་མཚོན་ན་རྭ་སྒྲེང་དང་སྟག་བྲག་གཉིས་སངས་རྒྱས་ཀྱི་རྗེས་འཇུག་ཞིག་དང་། དགེ་སློང་ཞིག ནང་པ་ཞིག བོད་རིགས་ཞིག་བཅས་ལས་རྒྱུ་འབྲས་དང་སྐྱེ་བ་སྔ་ཕྱིར་ཡིད་ཆེས་བྱེད་མཁན་གྱི་བོད་ཀྱི་རྒྱབ་ཚབ་ཡིན་ཟེར་མཁན་གྱི་མི་སྣ་དེ་དག་གིས་མི་རིགས་ནང་ཁུལ་དང་། ཆོས་ལུགས་ནང་ཁུལ། བོད་མི་ནང་ཁུལ་དུ་གསོད་རེས་བཏང་ཡོད།
དེ་བཞིན་བོད་བརྒྱུད་ནང་བསྟན་དེ་བོད་རིགས་མི་དམངས་ཚོས་ཤེས་ནས་དད་པ་ཐོབ་པ་སྤྱི་ཚོགས་ཁྲོད་ད་བར་བྱུང་མྱོང་མེད། ད་ལྟའང་མི་དམངས་དཀྱུས་མ་ཚོས་སངས་རྒྱས་ཀྱིས་ཆོས་ལ་བསླབ་གཉེར་བྱེད་ཐུབ་ཀྱིན་མེད་ལ་༸ སྟོན་པ་བླ་ན་མེད་པའི་རྒྱལ་ཚབ། འཛམ་གླིང་ཞི་བདེའི་དེད་དཔོན། བོད་མིའི་བླ་ན་མེད་པའི་དབུ་འཁྲིད། འགྲོ་བ་ལྷ་དང་བཅས་པའི་གཙུགས་རྒྱན། ༸ གོང་ས་སྐྱབས་མགོན་ཐམས་ཅད་མཁྱེན་གཟིགས་ཆེན་པོ་འདི་འདྲ་ཞིག་ཡོད་ཀྱང་ང་ཚོའི་བོད་རིགས་མི་དམངས་ཚོས་ཁོང་གི་སྐུ་གསུང་ཐུགས་ཀྱི་མཛད་མཐའ་མེད་པའི་ཐུགས་རྗེའི་མཁྱེན་ཡོན་དང་། ཟབ་རྒྱས་གསུང་གི་དུད་རྩིའི་རོ་བཅུད་ད་དུང་མྱོང་ཐུབ་ཀྱིན་མེད།
ཁོང་གི་མཛུངས་ཟླ་མེད་པའི་མཁྱེན་རླབས་དང་གཞལ་བར་དཀའ་བའི་མཁྱེན་ཡོན་དག་ལ་ལོངས་སུ་སྤྱོད་མཁན་མང་ཆེ་བ་ཕྱི་རྒྱལ་བ་དག་ཡིན།
བོད་བརྒྱུད་ནང་བསྟན་ལ་སློབ་སྦྱོང་བྱེད་དགོས་ལ་བོན་གྱི་ཆོས་ལུགས་ལ་སློབ་སྦྱོང་བྱེད་དགོས། ཤེས་ཡོན་དེ་དག་སྤྱི་ཚོགས་ལ་ཁ་ཕྱོགས་དགོས་ལ་མི་དམངས་ལ་ཁ་ཕྱོགས་ནས་ཤེས་ཡོན་སློབ་གཉེར་སྤྲོད་ཐུབ་པ་བྱེད་དགོས།
དེ་ནི་ཆོས་ལུགས་ཀྱི་བླ་ཆེན་དང་། མཁན་པོ། དགེ་བཤེས། དགེ་འདུན་བཅས་ཚང་མར་འཁྲི་བའི་འགན་ཁྲི་ཆེན་པོ་ཞིག་རེད།
བོད་བརྒྱུད་ནང་བསྟན་དང་བོན་གྱི་ཆོས་ལུགས་འདི་མི་གནས་ཡུན་རིང་གི་སྐུ་ཚེ་བརྟན་དགོས་ན་ངེས་པར་སྤྱི་ཚོགས་ལ་ཁ་ཕྱོགས་པ་དང་། མི་དམངས་ལ་ཁ་ཕྱོགས་པ། དུས་རབས་ལ་ཁ་ཕྱོགས་པ་བཅས་ཁ་ཕྱོགས་གསུམ་ལ་བརྟེན་དགོས།
ཁ་བརྡའི་ནང་ལ་བན་བོན་བགྲོ་གླེང་སྐབས་ལ། ང་ནི་བོད་ཀྱི་ནང་བསྟན་བཞི་གར་དག་སྣང་སྦྱོང་བཞིན་སྟེང་། ལྟ་གྲུབ་ཚང་མ་ཨ་ཤེས་མི་ཤེས་ལྟ་མཁན་ཅིག་ཡིན་ཀྱང་། བོན་ཆོས་དེ་ངས་མི་ཤེས། ཟེར་དགོས་པ་དེ་ཡི་ཁུངས་ཕྱོགས་གཅིག་ནི། དེང་ཀྱི་བོན་ཆོས་ནྰལེནཌའི་ནང་ཆོས་ལ་ཁུངས་གཏུགས་ཡོད་པ་འདི་གཅིག་རེད། རྒྱུ་མཚན་གཞན་ནི་བོན་ཆོས་ནང་ལ་ནང་ཆོས་ནང་ལ་མེད་པའི་ཐུན་མོང་པ་གཅིག་ཡོད་དགོས་ལ། དེ་ང་ལྟ་བུས་མི་ཤེས་པས་སོ། །
གནས་ཚུལ་ཡག་པོ་བཀོད་འདུག འོན་ཀྱང་མཇུག་མཐའི་རེ་སྐུལ་ལས་གཉིས་པ་དེར། ༼བོད་ཀྱི་སངས་རྒྱས་པའི་ཆོས་དང་བོན་གྱི་གཞུང་གཉིས་ཀའི་ནང་། ནཱ་ལེཎྜའི་སྲོལ་རྒྱུན་ཐོག་སློབ་སྦྱོང་བྱེད་པའི་ལམ་སྲོལ་ཡོད། ༽ཅེས་པ་འདི་གོ་བ་ཐེངས་དང་པོ་ཡིན། འདི་ལ་ངེས་པར་དུ་ཤེས་རྟོག་རེ་བྱ་དགོས་པ་གལ་ཆེན་པོར་མཐོང་། ཐུགས་རྗེ་ཆེ་ཞུ།
གསར་འགོད་པ་ལགས། ཐུགས་རྗེ་ཆེ། སྡེབ་སྦྱོར་དང་དག་ཆ་སྤུས་ཚང་གི་ལམ་ནས་དོན་སྙིང་ལྡན་པའི་གསར་འགྱུར་འདོན་སྤེལ་གནང་པར་བསྔགས་བརྗོད་དང་འབྲེལ། འབྱུང་འགྱུར་ཡང་༸མགོན་པོ་མཆོག་བཀའ་སློབ་གང་མང་འདོན་སྤེལ་གནང་རོགས།།