བོད་ནང་གི་སློབ་མའི་ལས་འགུལ་ལ་གདུང་སེམས་མཉམ་སྐྱེད་ཆེད། བཙན་བྱོལ་གྱི་སློབ་གྲྭ་ཁག་ནང་མཚན་རྟགས་བསྡུ་རུབ་བྱས་ཏེ་མཉམ་འབྲེལ་རྒྱལ་ཚོགས་ཀྱི་བྱིས་པའི་ཐེབས་རྩ་ཚོགས་པ་དང་། རྒྱ་ཚོགས་ཀྱི་སློབ་གཞི་དཔྱད་ཞིབ་སྡེ་ཚན་སོགས་ལ་འབྲེལ་ཡོད་ཁག་ལ་གཏོང་རྒྱུ་ཡིན་འདུག
དེ་རིང་ཕྱི་ཚེས་ ༢༡ ཉིན་གྱི་སྔ་དྲོའི་ཆུ་ཚོད་ ༡༡ སྟེང་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་དགེ་སློབ་ཡོངས་དང་བོད་ཀྱི་སྐད་ཡིག་རྒྱུན་འཛིན་ཚོགས་པ་གཉིས་ཀྱིས། དགུ་བཅུ་གསུམ་གྱི་ཚོགས་ཁང་དུ་གསར་འགོད་གསལ་བསྒྲགས་ཤིག་སྤེལ་ཏེ། ཟླ་འདིའི་ཕྱི་ཚེས་ ༡༩ ཉིན་མདོ་སྨད་རེབ་གོང་དང་རྨ་ལྷོ་ཁུལ་གྱི་སློབ་མ་རྣམས་ཀྱིས་ཞི་བའི་ངོ་རྒོལ་བྱས་པ་དང་། ཁ་སང་ཆབ་ཆ་ཁུལ་དང་ཁྲི་ཀ་རྫོང་། རྩི་གོར་ཐང་བཅས་ཀྱི་སློབ་མ་རྣམས་ཀྱིས་ཞི་བའི་ངོ་རྒོལ་བྱས་པ། དེ་རིང་མགོ་ལོག་ཁུལ་གྱི་སློབ་མ་རྣམས་ཀྱིས་ཞི་བའི་ངོ་རྒོལ་བྱེད་ཀྱིན་པ་བཅས་ཀྱི་ཐད་དུ་གདུང་སེམས་མཉམ་སྐྱེད་དང་བཙན་བྱོལ་དུ་མཚན་རྟགས་བསྡུ་རུབ་ཀྱི་ལས་འགུལ་ཞིག་སྤེལ་རྒྱུ་ཡིན་སྐོར་བསྒྲགས་ཡོད།
གསར་འགོད་གསལ་བསྒྲགས་སྐབས་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་སློབ་སྤྱི་ལྷ་ཆབ་སྦྱིན་པ་ལགས་ཀྱིས་ཐེངས་འདིའི་གསར་འགོད་གསལ་བསྒྲགས་ཀྱི་ཡིག་ཆ་ལྗགས་ཀློག་གནང་བའི་ནང་འཁོད་དོན། ཚེས་ ༡༩ ཉིན་མདོ་སྨད་རེབ་གོང་ཁུལ་གྱི་སློབ་གྲྭ་ཆེ་འབྲིང་ཆུང་གསུམ་གྱི་སློབ་ཕྲུག་སྟོང་ཕྲག་ལྷག་གིས་དེ་གའི་ས་གནས་སྲིད་གཞུང་ལ་མི་རིགས་འདྲ་མཉམ་དང་། སྐད་ཡིག་རང་དབང་། སྐད་ཡིག་གི་བདག་དབང་ཕྱིར་སྤྲོད་རོགས་ཞེས་པའི་འབོད་ཚིག་འོག བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་དགོས་པའི་གཞི་རྒྱ་ཆེ་བའི་ལས་འགུལ་ཞིག་སྤེལ་ཞིང་། སློབ་མའི་ལས་འགུལ་དེ་རིམ་བཞིན་ཆབ་ཆ་ཁུལ་དང་ཁྲི་ཀ་རྫོང་། རྩི་གོར་ཐང་། མགོ་ལོག་ཁུལ་བཅས་སུ་ཁྱབ་བཞིན་ཡོད།
རྒྱ་གཞུང་གིས་ཆེད་མངགས་སྤྱི་བདེ་མི་སྣ་བཏང་སྟེ། སློབ་ཕྲུག་དང་དགེ་རྒན་རྣམས་ལ་ལས་འགུལ་སྤེལ་མི་ཆོག་པའི་སློབ་གསོ་དང་དམ་དྲག་བྱེད་བཞིན་ཡོད་འདུག ཅེས་དང་། ༡༩༨༧ ལོར་བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་བྱ་རྒྱུའི་གཏན་འབེབས་བྱས་ཡོད་ཀྱང་། དོན་དངོས་ཐོག་བཅའ་ཁྲིམས་དང་ཡིག་ཆའི་ཐོག་གི་གཏན་འབེབས་དང་ནང་དོན་ཚང་མ་ཡིག་ཐོག་ཙམ་དང་འབོད་ཚིག་ཙམ་དུ་གྱུར་ནས། ད་ལྟའི་བར་དུ་བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་བྱ་རྒྱུའི་ཡང་དག་པའི་ཁོར་ཡུག་དང་། ཆ་རྐྱེན་ཞིག་བསྐྲུན་མེད་པར། དེ་ལས་ལྡོག་སྟེ་སྲིད་གཞུང་གིས་ལས་ཁུངས་ཁག་དང་སྡེ་ཚན་ཁག ཚོགས་པ་ཁག་གི་ནང་དུ་ཚོགས་འདུ་འཚོགས་པ་དང་བགྲོ་གླེང་བྱེད་པ། ཡིག་ཆ་བཟོ་བ་སོགས་ཀྱི་བརྒྱུད་རིམ་ནང་རྒྱ་སྐད་ཀྱིས་བོད་སྐད་ཀྱི་ཚབ་བྱེད་པ་དང་། རྒྱ་ཡིག་གིས་བོད་ཡིག་གི་ཚབ་བྱེད་པའི་རྣམ་པ་འབུར་ཐོན་ཡིན་ལ། བོད་ཀྱི་སློབ་གྲྭ་ཆེ་འབྲིང་ཆུང་གསུམ་གྱི་ནང་དུའང་སློབ་ཚན་གྱི་རྣམ་གྲངས་ཚང་མ་རྒྱ་ཡིག་གི་ཐོག་ནས་འཆད་ཁྲིད་བྱེད་པ་ལས་བོད་ཡིག་གི་ཐོག་ནས་འཆད་ཁྲིད་བྱེད་ཀྱི་མེད་ཅིང་། ཐ་ན། སློབ་གྲྭ་འགའ་ཞིག་གི་ནང་དུ་བོད་ཡིག་སློབ་ཚན་རྐྱང་པ་གཅིག་ལས་མེད་པ་དེར་ཡང་མཐོང་ཆེན་མི་བྱེད་པ་དང་། རྩ་བ་ནས་སློབ་ཁྲིད་མི་བྱེད་པའི་གནས་སུ་གྱར་ཡོད།
ཐེངས་འདིའི་རེབ་གོང་ནས་འགོ་བརྩམས་པའི་སློབ་མའི་ལས་འགུལ་འདི་སློབ་གཞི་བཅོས་སྒྱུར་ལས་བྱུང་ཞིག་ཡིན་མོད། གནས་ཚུལ་ཡོང་ཁུངས་ལྟར་ན། ད་ལྟ་ད་དུང་སློབ་གཞི་བཅོས་བསྒྱུར་གྱི་སྲིད་ཇུས་དངོས་སུ་ཁྱབ་བསྒྲགས་བྱས་མེད་ཀྱང་། ཉེ་ཆེར་མཚོ་སྔོན་ཞིང་ཆེན་གྱི་བཀའ་ལྟར་རེབ་གོང་དུ་སློབ་གྲྭ་ཆེ་འབྲིང་གི་དགེ་རྒན་ཚོར་བོད་ཀྱི་སྐད་ཡིག་གི་སློབ་གཞི་བཅོས་བསྒྱུར་བཏང་ནས་ཟབ་སྦྱོང་འཛིན་གྲྭ་ཞེས་པ་བསྡུས་པ་དང་། ཉེ་ཆར་མཚོ་སྔོན་ཞིང་ཆེན་གྱི་སློབ་གསོའི་ཚོགས་འདུ་ཞིག་ཏུའང་འབྲེལ་ཡོད་དཔོན་རིགས་ཀྱིས་བོད་རིགས་སློབ་གྲྭ་ཁག་གི་སློབ་དེབ་རྒྱ་ཡིག་ཐོག་འཆད་ཁྲིད་ལག་ལེན་བྱེད་དགོས་པའི་གླེང་སློང་བྱས་ཡོད་པར་བརྟེན། མི་འགྱངས་པར་མཚོ་སྔོན་ནས་སྲིད་ཇུས་དེ་ལག་ལེན་བྱེད་པར་སེམས་ཁྲལ་གྱིས་སློབ་མའི་ལས་འགུལ་འདི་བྱུང་བ་རེད། གནད་དོན་འདི་ནི་སྐད་ཡིག་གི་གནད་དོན་རྐྱང་པ་ཙམ་མ་ཟད། མི་རིགས་ཤིག་དར་རྒྱས་གོང་འཕེལ་དུ་གཏོང་ཐུབ་མིན་གྱི་ཆེས་རྩ་བར་གྱུར་བའི་རྩ་དོན་ཞིག་ཡིན་ཞེས་གསུངས།
ཡང་ཡིག་ཆ་དེའི་ནང་གསལ་དོན། ཐེངས་འདིར་སློབ་ཕྲུག་རྣམས་ཀྱིས་བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་དང་། སྐད་ཡིག་ལ་མཐོང་ཆེན་བྱེད་དགོས་པ། བོད་ཀྱི་སྐད་ཡིག་ལ་རང་དབང་དགོས་པའི་ལས་འགུལ་དང་། ཁོང་ཚོའི་འབོད་ཚིག་ནི་རྦད་དེ་ཡང་དག་པ་ཞིག་དང་། དོན་དངོས་ཀྱི་གནས་ཚུལ་དང་མཐུན་པ་མ་ཟད། ཐ་ན། རྒྱ་ནག་གཞུང་གིས་གཏན་འབེབས་བྱས་པའི་མི་རིགས་རང་སྐྱོང་བཅའ་ཁྲིམས་ཟེར་བ་དང་རྦད་དེ་མཐུན་ཡོད་མོད། བོད་ནང་དེ་སྔ་འདི་འབྲེལ་གྱི་ལས་འགུལ་བྱུང་བ་རྣམས་ལ་རྒྱ་གཞུང་གིས་ཉེས་འཛུགས་སྣ་ཚོགས་ཀྱིས། ལས་འགུལ་ནང་མཉམ་ཞུགས་བྱེད་མཁན་ཚོར་མི་ཆོས་ལས་འདས་པའི་ཉེས་རྡུང་བཏང་བ་དང་། བཙོན་འཇུག་བྱས་པ་སོགས་ཀྱི་ལོ་རྒྱུས་ཀྱི་ཉམས་མྱོང་དང་བསླབ་བྱར་བཟུང་ཡོད་སྟབས། འདི་གའི་ཚོགས་པའི་དགེ་སློབ་ཡོངས་དང་། བོད་ཀྱི་སྐད་ཡིག་རྒྱུན་འཛིན་ཚོགས་པའི་ངོས་ནས་རླབས་ཆེ་བའི་ལས་འགུལ་འདིར་བོད་མིའི་སྐྱིད་སྡུག་མཉམ་མྱོང་གི་ཆེད་དུ་རྒྱབ་སྐྱོར་བྱ་རྒྱུ་དང་ཕྱོགས་མཚུངས། གནད་དོན་འདིར་ང་ཚོས་བཙན་བྱོལ་གྱི་སློབ་གྲྭ་ཁག་གི་ནང་མཚན་རྟགས་བསྡུ་རུབ་བྱས་ཏེ། མཉམ་འབྲེལ་རྒྱལ་ཚོགས་ཀྱི་བྱིས་པའི་ཐེབས་རྩ་ཚོགས་པ་དང་། རྒྱལ་ཚོགས་སློབ་གཞི་དཔྱད་ཞིབ་སྡེ་ཚན་སོགས་འབྲེལ་ཡོད་ལ་གཏོང་རྒྱུ་ཡིན་ཞེས་གསལ་ཡོད།
གསར་འགོད་གསལ་བསྒྲགས་སྐབས་བོད་ཀྱི་སྐད་ཡིག་རྒྱུན་འཛིན་ཚོགས་པའི་ཚོགས་གཙོ་འབྲོག་རུ་ཆོས་གྲགས་ལགས་ཀྱིས། ད་ལྟ་ང་ཚོས་རྒྱ་ནག་ལ་འབོད་སྐུལ་གསུམ་ཞུ་གི་ཡོད། གཅིག ཐེངས་འདིར་སློབ་མ་སྟོང་ཕྲག་མང་བོས་ངོ་རྒོལ་བྱས་པ་འདི་ནི་རྒྱ་ནག་གི་ཁྲིམས་དང་སྒྲིག་གཞི་དང་མཐུན་པའི་སྒོ་ནས་ངོ་རྒོལ་བྱས་པ་ཞིག་ཡིན་སྟབས། རྒྱ་ནག་གཞུང་གིས་དེ་ལ་ངོས་ལེན་བྱ་རྒྱུ། གཉིས། ཐེངས་འདིའི་ཞི་བའི་ངོ་རྒོལ་སྐབས་སློབ་ཕྲུག་ཚོར་ཚབས་ཆེའི་ཉེས་རྡུང་བཏང་བ་སོགས་བྱུང་མེད་པ་ནི། རྒྱ་ནག་རང་གི་ངོས་ནས་འགྱུར་བ་ཆེན་པོ་ཞིག་ཡིན་སྟབས། འདི་ལྟ་བུའི་འགྱུར་བ་འདི་དུས་ནམ་ཡང་མི་གློད་པ། གསུམ། སྐད་ཡིག་སྲུང་སྐྱོབ་དང་མི་རིགས་འདྲ་མཉམ་ཟེར་བ་རྒྱ་ནག་གཞུང་གིས་དུས་རྒྱུན་བཤད་ཀྱིན་ཡོད་ལ། ཐེངས་འདིའི་སློབ་མ་སྟོང་ཕྲག་མང་བོའི་ཞི་བའི་ངོ་རྒོལ་གྱི་འབོད་ཚིག་ཀྱང་འདི་ཉིད་ཡིན་སྟབས། གང་མགྱོགས་སྒོས་བོད་ཀྱི་སྐད་ཡིག་སློབ་ཁྲིད་མེད་པ་བཟོ་རྒྱུའི་སྲིད་ཇུས་དེ་ཕྱིར་འཐེན་རྒྱག་རྒྱུ་བཅས་ཀྱི་འབོད་སྐུལ་ཞུས་ཡོད།
ཐེངས་འདིའི་སློབ་མའི་ལས་འགུལ་འདི་ཟླ་འདིའི་ཕྱི་ཚེས་ ༡༩ ཉིན་ནས་མདོ་སྨད་རེབ་གོང་ནས་འགོ་བརྩམས་ཏེ། ཉིན་དེར་རེབ་གོང་དང་རྨ་ལྷོ་ཁུལ་གྱི་སློབ་མ་རྣམས་ཀྱིས་ཞི་བའི་ངོ་རྒོལ་བྱས་པ་དང་། ཁ་སང་ཆབ་ཆ་ཁུལ་དང་ཁྲི་ཀ་རྫོང་། རྩི་གོར་ཐང་བཅས་ཀྱི་སློབ་མ་རྣམས་ཀྱིས་ཞི་བའི་ངོ་རྒོལ་བྱས་ཡོད་ལ། དེ་རིང་འདི་གར་གནས་ཚུལ་འབྱོར་བ་ལྟར་ན། དེ་རིང་ཞོགས་པར་མགོ་ལོག་ཁུལ་དུའང་སློབ་མ་རྣམས་ཀྱིས་ངོ་རྒོལ་གྱི་ལས་འགུལ་སྤེལ་གྱིན་ཡོད་ཀྱང་། ད་ལྟའི་ཆར་ལས་འགུལ་འདིའི་ཁྲོད་སློབ་གྲྭ་གང་དག་གི་སློབ་མ་ཡོད་མེད་དང་། སློབ་ཕྲུག་མང་ཉུང་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་བྱུང་མེད།
གསལ་བཤད། གོང་གི་སློབ་མའི་ངོ་རྒོལ་གྱི་པར་དེ་ཁ་སང་མཚོ་ལྷོ་ཁུལ་དུ་སློབ་མའི་ལས་འགུལ་སྤེལ་སྐབས་ཀྱི་པར་ཡིན་ལ། འདྲ་པར་མཁོ་སྤྲོད་པ་བྷེལ་རྗམ་དུ་གནས་བཞུགས་ཚེ་བརྟན་ལགས་ཡིན།
གསར་འགོད་པ། ཨ་རིག་འགྱུར་མེད།
ཨ་རོ་ཨ་རིག་འགྱུར་མེད་ལགས། གོང་ན་པར་འདྲ་མཐོང་རྒྱུ་མེད་ཀ ལས་འགུལ་རིག་གཞུང་གི་སྡེ་ཁག་ནས་སྤེལ་བ་དེ་ཧ་ཅང་ཡག་པོ་རེད། ཡིན་ནའང་། ༼ མི་རིགས་འདྲ་མཉམ། སྐད་རིགས་རང་དབང་། ༽ ཞེས་པའི་འབོད་ཚིག་འདི་ལ་འགྱུར་བ་གཏོང་མི་ཉན། འདི་གདུང་སེམས་མཉམ་བསྐྱེད་བྱེད་པོ་ཚང་མས་ཡིད་ལ་འཇགས་དགོས་པ་ཞིག་རེད། འབྲོག་རུ་ཆོས་གྲགས་ཀྱིས་སྐད་རིགས་རང་དབང་ཞེས་པ་སྐད་ཡིག་སྲུང་སྐྱོབ་ཞེས་པ་འདི་ཡིན་པ་ལྟ་བུ་ཞིག་བཤད་འདུག འདི་མི་འགྲིག་གི།