ལོ་འདིའི་ཕྱི་ཟླ་ ༩ ཚེས་ ༡༢ ཉིན་མཚོ་སྔོན་ཞིང་ཆེན་དམར་ཤོག་ཚོགས་པ་དང་ཞིང་ཆེན་སྲིད་གཞུང་གཉིས་མཉམ་འབྲེལ་ཐོག ཞིང་ཆེན་ཡོངས་ཀྱི་སློབ་གསོའི་ཚོགས་ཆེན་ཐེངས་དང་པོ་དེ་སྐོང་ཚོགས་བྱས་ཏེ། ༼ ཕྱི་ལོ་ ༢༠༡༠ ནས་ ༢༠༢༠ བར་གྱི་མཚོ་སྔོན་ཞིང་ཆེན་དུས་ཡུན་འབྲིང་རིང་གི་སློབ་གསོའི་བཅོས་བསྒྱུར་དང་འཕེལ་རྒྱས་འཆར་འགོད་རྩ་གནད ༽ ཅེས་པའི་ཤེས་ཡོན་སྲིད་ཇུས་གསར་པ་ཞིག་གཏན་འབེབས་བྱས་ཡོད་ཅིང་། དེའི་རྗེས་མཚོ་སྔོན་ཞིང་ཆེན་འོག་གི་བོད་རིགས་ས་ཁུལ་གྱི་སློབ་གྲྭ་ཁག་གི་དགེ་ལས་མང་པོ་ཞིག་མཚོ་སྔོན་ཟི་ལིང་དུ་བསྐངས་ཏེ། གོང་གི་སློབ་གསོ་བཅོས་བསྒྱུར་སྐོར་གྱི་སྲིད་ཇུས་དེའི་ཐོག་ཟབ་སྦྱོང་ཞིག་སྤྲད་ཡོད་ཅིང་། སྐབས་དེར་དགེ་རྒན་མང་པོ་ཞིག་གིས་སྲིད་ཇུས་དེར་འདོད་པ་མེད་པའི་རྣམ་འགྱུར་བསྟན་ཡོད་པ་མ་ཟད། ཕྱི་ཟླ་ ༡༠ ཚེས་ ༡༥ ཉིན་དགེ་རྒན་བརྒྱ་ལྷག་གིས་མཚན་རྟགས་བསྐྱོན་པའི་ཞུ་ཡིག་ཅིག་ཞིང་ཆེན་སློབ་གསོ་སྡེ་ཁག་ལ་ཕུལ་ཡོད་འདུག
ཕྱི་ཟླ་ ༩ ནང་གཏན་འབེབས་བྱས་པའི་༼༢༠༡༠–༢༠༢༠ལོའི་མཚོ་སྔོན་ཞིང་ཆེན་གྱི་དུས་ཡུན་འབྲིང་རིང་གི་སློབ་གསོ་བཅོས་བསྒྱུར་དང་འཕེལ་རྒྱས་གྱི་འཆར་འགོད་རྩ་གནད༽ཅེས་པའི་ཡིག་ཆའི་ནང་གི་ལེའུ་བཅུ་གཅིག་པ། མི་རིགས་སློབ་གསོ་ཞེས་པའི་དོན་ཚན་ནང་བཀོད་དོན། ཕྱོགས་ཡོངས་ནས་ཏང་གི་མི་རིགས་སྲིད་ཇུས་དང་རྒྱལ་ཁབ་ཀྱི་འབྲེལ་ཡོད་ཁྲིམས་ལུགས་དང་སྒྲིག་ཁྲིམས་ལག་བསྟར་བྱས་ཏེ། གོམ་གང་མདུན་སྤོས་ཀྱིས་མི་རིགས་སློབ་གསོའི་བྱ་བར་ཤུགས་སྣོན་དང་། རང་ཞིང་གི་གྲངས་ཉུང་མི་རིགས་དང་མི་རིགས་ས་ཁུལ་གྱི་སློབ་གསོའི་བྱ་བར་འཕྲད་པའི་དམིགས་བསལ་དཀའ་ཁག་དང་འབུར་དུ་ཐོན་པའི་གནད་དོན་ཐག་གཅོད་བྱས་ཏེ། སྒྲིག་གཞི་བཅོས་བསྒྱུར་དང་སྒྲིག་བཀོད་ལེགས་སྒྱུར། སློབ་སྒྲུབ་ཆ་རྐྱེན་ལེགས་བཅོས། སློབ་གྲྭའི་དོ་དམ་ཆུ་ཚད་མཐོར་འདེགས། སློབ་སྒྲུབ་ཕན་འབྲས་ལ་ཤུགས་སྣོན་བཅས་བྱ་དགོས། ནུས་ཤུགས་ཆེན་པོས“སྐད་གཉིས”སློབ་ཁྲིད་བཅོས་བསྒྱུར་དང་འཕེལ་རྒྱས་ལ་སྐུལ་འདེད་བྱ་དགོས།
རྒྱལ་ཁབ་ཀྱི་ཐུན་མོང་དུ་སྤྱོད་པའི་སྐད་དང་ཡི་གེས་སློབ་ཁྲིད་བྱེད་པ་གཙོ་བོར་འཛིན་རྒྱུ་རྒྱུན་འཁྱོངས་བྱ་རྒྱུ་དང་། དེའི་མཚུངས་སུ་མི་རིགས་ཀྱི་སྐད་ཡིག་བསླབ་རྒྱུ། རྒྱལ་ཁབ་ཀྱི་ཐུན་མོང་དུ་སྤྱོད་པའི་སྐད་དང་ཡི་གེ་དེ་སློབ་ཁྲིད་གྱི་སྐད་ཆར་བཞག་སྟེ། གྲངས་ཉུང་མི་རིགས་ཀྱི་སློབ་མས་རྒྱལ་ཁབ་ཐུན་མོང་གིས་སྤྱོད་པའི་སྐད་དང་ཡི་གེ་དང་། མི་རིགས་རང་གི་སྐད་དང་ཡི་གེ་གཉིས་ལ་ཅུང་བྱང་ཆ་ཡོད་པར་བྱ་དགོས། མི་རིགས་ས་གནས་ཁག་ཏུ་སློབ་ལོ་མ་རན་གོང་གི་སྐད་གཉིས་ཅན་གྱི་བུ་བཅོལ་ཁང་འཛུགས་པར་རྒྱབ་སྐྱོར་དང་། གྲངས་ཉུང་མི་རིགས་དང་རྒྱ་རིགས་ཀྱི་བྱིས་པ་མཉམ་བསྲེས་ཀྱི་བུ་བཅོལ་ཁང་དང་། གྲངས་ཉུང་མི་རིགས་དང་རྒྱ་རིགས་ཀྱི་བྱིས་པ་མཉམ་བསྲེས་ཀྱི་འཛིན་གྲྭ་འཛུགས་རྒྱུ་སྐུལ་སྤེལ་བྱ་རྒྱུ། རོགས་སྐྱོར་ཡོད་པའི་འབྲེལ་ཡོད་ཞིང་ཆེན་དང་གྲོང་ཁྱེར་གྱི་རྒྱབ་རོགས་བརྩོན་ལེན་གྱིས་སྐད་གཉིས་བུ་བཅོལ་ཁང་གི་མ་དཔེ་སྐོར་ཞིག་གསར་འཛུགས་བྱ་རྒྱུ།
མི་རིགས་སློབ་འབྲིང་དང་སྤྱིར་བཏང་གི་སློབ་གྲྭ་ཆུང་འབྲིང་རྣམས་ཀྱིས་ཐོན་ཁུངས་མཉམ་སྤྱོད་བྱ་རྒྱུར་སྐུལ་འདེད་བྱས་ཏེ། གྲངས་ཉུང་མི་རིགས་ཀྱི་སློབ་གྲྭ་དང་རྒྱ་རིགས་སློབ་གྲྭ་མཉམ་བསྲེས་བྱ་རྒྱུ་ལག་བསྟར་དང་། སློབ་ཁྲིད་ཁོར་ཡུག་བསྒྱུར་བཅོས་དང་། གསོ་སྐྱོང་གི་རྣམ་པ་ཇེ་ལེགས་སུ་གཏོང་དགོས། སྐད་གཉིས་བསླབ་གཞི་དང་དགེ་རྒན་གསོ་སྐྱོང་ཟབ་སྦྱོང་གི་ལྟེ་གནས་འཛུགས་སྐྲུན་ལ་ཤུགས་སྣོན་བྱ་རྒྱུ་དང་། ༢༠༡༥ ལོའི་བར་དུ་སློབ་ཆུང་ཁག་ཏུ་རྒྱལ་ཁབ་ཀྱི་ཐུན་མོང་དུ་སྤྱོད་པའི་སྐད་དང་ཡི་གེ་གཙོ་བོ་དང་། མི་རིགས་རང་གི་སྐད་དང་ཡི་གེ་ཕལ་བ་ཡིན་པའི་སྐད་གཉིས་སློབ་ཁྲིད་མངོན་འགྱུར་བྱ་རྒྱུ་དང་། དེ་དང་མཉམ་དུ་གྲངས་ཉུང་མི་རིགས་ཀྱི་སློབ་འབྲིང་སློབ་མར་རྒྱལ་ཁབ་ཀྱི་ཐུན་མོང་དུ་སྤྱོད་པའི་སྐད་དང་ཡི་གེ་སློབ་ཁྲིད་བྱ་རྒྱུ་དང༌། དེའི་ཁར་མི་རིགས་རང་གི་སྐད་དང་ཡི་གེ་སློབ་ཁྲིད་བྱ་རྒྱུའི་སྐད་གཉིས་སློབ་གསོའི་གོམ་སྟབས་ཇེ་མགྱོགས་སུ་གཏོང་དགོས། མི་རིགས་ཆེད་སྦྱོང་སློབ་གསོར་ཤུགས་སྣོན་གྱིས་གཞི་རྒྱ་ཅན་དང་ཚད་ལྡན་ཅན་གྱི་ཐབས་ལམ་སྤྱད་དེ། རང་ཞིང་གི་ཆེད་སྦྱོང་སློབ་གསོའི་ཐོན་ཁུངས་ལ་བསྟུན་ཏེ། གྲངས་ཉུང་མི་རིགས་ཀྱི་ཚད་མཐོའི་ཤེས་ཡོན་ཅན་གསོ་སྐྱོང་སྤུས་ཚད་མཐོར་འདེགས་བྱེད་དགོས།
དམིགས་བསལ་སྲིད་ཇུས་གཏན་འབེབ་ཀྱིས་མཐོ་རིམ་སློབ་གྲྭའི་མཐར་ཕྱིན་སློབ་མ་གྲངས་ཉུང་མི་རིགས་ས་ཁུལ་དུ་སོང་ནས་དགེ་རྒན་བྱེད་པར་སྐུལ་ལྕག་དང་རྒྱབ་སྐྱོར་བྱ་རྒྱུ། གྲངས་ཉུང་མི་རིགས་ས་ཁུལ་གྱི་འཕེལ་རྒྱས་རྒྱང་ཁྲིད་སློབ་གསོར་རྒྱབ་སྐྱོར་དང་། སྤུས་ལེགས་སློབ་གསོའི་ཐོན་ཁུངས་ཁྱབ་ཚད་རྒྱ་སྐྱེད་གཏོང་རྒྱུ། ཞིང་ཆེན་ཕྱི་ནང་གི་ས་ཆ་གཞན་དུ་སློབ་གྲྭ་སྒྲུབ་ཚད་དང་། འཛིན་གྲྭ་སྒྲུབ་ཚད་ཇེ་རྒྱས་སུ་བཏང་སྟེ། ཟི་ལིང་ས་ཁུལ་དུ་ཆུ་ཚད་མཐོ་བའི་མི་རིགས་སློབ་འབྲིང་དང་འབྲིང་རིམ་ལས་རིགས་སློབ་གྲྭ་བསྒྲུབ་རྒྱུ། རོགས་སྐྱོར་ཡོད་པའི་འབྲེལ་ཡོད་ཞིང་ཆེན་དང་གྲོང་ཁྱེར་དུ་རང་ཞིང་གི་མི་རིགས་སློབ་འབྲིང་དཀྱུས་མའི་འཛིན་གྲྭ་དང་མི་རིགས་སློབ་འབྲིང་ལས་རིགས་འཛིན་གྲྭ་བསྒྲུབ་རྒྱུ། ༢༠༡༥ ལོའི་བར་དུ་ཞིང་ཆེན་ཕྱི་ལོགས་ཀྱི་སློབ་གྲྭར་ཞུགས་ཚད་ཀྱི་མི་གྲངས་ ༦༠༠༠ ཡན་ལ་སླེབས་ཐུབ་པ་བྱ་རྒྱུ་དང་། ༢༠༢༠ ལོའི་བར་ཞིང་ཆེན་ཕྱི་ལོགས་ཀྱི་སློབ་གྲྭར་ཞུགས་ཚད་ཀྱི་མི་གྲངས་ ༡༢༠༠༠ ཡན་ལ་སླེབས་ཐུབ་པ་བྱ་རྒྱུ། ཞེས་བཀོད་འདུག
གསར་འགོད་པ། དོན་འགྲུབ་བཀྲ་ཤིས།
![Because of high altitudes in the Himalayas, difficult terrain and often poor weather, the Kailash Manasarovar pilgrimage if one of the most challenging in the world [File: Purnima Shrestha/Reuters]](https://tibettimes.net/wp-content/uploads/2026/05/Screen-Shot-2026-05-14-at-5.25.22-PM-360x180.png)
ད་ཧེ་བཏབ་ན་སྙིང་ནད་སངས་བར་ཅུང་ཕན་མི་ཡོང་ངམ། ངའི་བུ་སྤུན་ཚོ་ནི་རྒྱ་གཞས་སང་སང་བ་ཞིག་ལེན་བཞིན་ཅིག་ཡིན་ཁུལ་བྱེད་ཀྱིན་འདུག
སློབ་ཁྲིད་ཀྱི་སྐད་དེ་ཡང་རྒྱ་སྐད་བྱ་དགོས། ཁྲིད་གཞིའི་སློབ་དེབ་དེ་ཡང་རྒྱ་ཡིག་བྱ་དགོས། སློབ་དེབ་ནང་གི་བརྗོད་བྱ་དེ་ཡང་རྒྱའི་རིག་གནས་ཡིན་དགོས། ད་བྱས་ན་གྲངས་ཉུང་མི་རིགས་ཀྱི་སྐད་ཡིག་དང་རིག་གནས་ཟེར་བ་གང་དུ་ཡོད། རྒྱ་རོ་ཐང་མར་བརྡལ་རྒྱུ་འདི་ཚོ།
སློབ་ཕྲུག་ཚོར་ཁག་མི་འདུག ཐུན་མོང་སྐད་དང་ཡི་གེ་ཞེས་པའི་མིང་བྱང་དེའི་འོག་ནས་བཟོ་ལྟ་ཞིག་བྱེད་འདོད་དང་། འདིའི་ཐོག་ཏུ་སྔོན་ཆད་ཡེ་རྡོར་གྱི་མིང་ཐོག་ནས་༸གོང་ས་མཆོག་ལ་དམིགས་བསལ་གྱིས་མཚན་སྨད་ཞུ་མྱོང་ལ་དེ་ནི། ཀྲུང་གོའི་ཐུང་མོང་སྐད་བརྡ་ལ་ཏཱ་ལས་སྣང་མེད་བྱེད་དོན་ཅི་ཡིན་ཞེས་པ་དེ་རེད།
འགོ་བྱང་ལ། སློབ་ཁྲིད་ཀྱི་སྐད་དེ་རྒྱ་སྐད་བྱ་དགོས་ཟེར། ཞེས་པ་མི་དགོས་སམ།