ས་གནས་ཁག་གི་མང་ཚོགས་ལ་འོས་བསྡུའི་སྒྲིག་གཞི་དང་འབྲེལ་བའི་ལམ་སྟོན་ག་རེ་བྱེད་དགོས་ཀྱི་འདུག མང་ཚོགས་ལ་བཤད་དགོས་པ་ག་རེ་འདུག བཤད་མི་དགོས་པ་གང་འདུག དེ་ཚོར་ས་མཚམས་ཤིག་ཕྱེ་ཐུབ་ན་ཡག་པོ་འདུག་ཟེར།
ངྷ་ས་དབུས་འོས་བསྡུ་ལྷན་ཁང་གིས་དེ་སྔོན་ཟླ་རྗེས་མའི་ཕྱི་ཚེས་ ༡༢ ཉིན་བཀའ་སྤྱིའི་སྔོན་འགྲོའི་འོས་བསྡུའི་གྲུབ་འབྲས་ཕྱིར་བསྒྲགས་བྱ་གཏན་འཁེལ་ཡོད་ནའང་། སྔོན་འགྲོའི་འོས་བསྡུའི་སྐབས་བལ་ཡུལ་གྱི་ས་གནས་ཁག་གཉིས་ནས་འོས་སྒམ་ ༡༩ བལ་ཡུལ་ཉེན་རྟོག་པས་བཙན་འཕྲོག་བྱས་སྟབས། དབུས་འོས་བསྡུ་ལྷན་ཁང་གིས་གཅིག་བྱས་ན་འོས་བསྡུའི་གྲུབ་འབྲས་ཡོངས་བསྒྲགས་བྱ་རྒྱུར། གཏན་འབེབས་བྱས་པའི་དུས་ཚེས་ལ་འགྱུར་བ་འགྲོ་སྲིད་སྐོར་ཡང་གསུངས་ཡོད་པར་མ་ཟད། སྔོན་འགྲོའི་འོས་བསྡུ་གྲུབ་ཏེ་ཉིན་ཉི་ཤུ་ཉེ་བའི་རིང་དབུས་འོས་བསྡུ་ལྷན་ཁང་གིས་བཀའ་སྤྱིའི་སྔོན་འགྲོའི་འོས་བསྡུའི་གྲུབ་འབྲས་སྐོར་ལ་གང་ཡང་གསུངས་མེད། ཡིན་ནའང་། ས་གནས་ཁག་ཅིག་ནང་དབུས་འོས་བསྡུ་ལྷན་ཁང་གིས་བཀོད་ཁྱབ་དང་འོས་བསྡུའི་སྒྲིག་གཞི། བཅའ་ཁྲིམས་ཀྱི་འབྲི་དོན་བཅས་སྣང་མེད་ཐོག ས་གནས་འོས་བསྡུའི་ཚོགས་མི་ཁག་ཅིག་གིས་འོས་བསྡུའི་གསང་བ་ཕྱིར་བསྒྲགས་བྱས་དང་བྱེད་བཞིན་ཡོད་ལ། ཟླ་འདིའི་ཕྱི་ཚེས་ ༡༨ ཉིན་ཨོ་སི་ཊི་ལའི་ཡ་དང་ཧོ་ལན་ཌི་གཉིས་ཀྱི་ས་གནས་འོས་བསྡུའི་འགན་འཛིན་དྭགས་པོ་བསོད་ནམས་ལགས་ཀྱིས་ཨེ་ཤ་ཡ་རང་དབང་རླུང་འཕྲིན་ཁང་གི་ས་གནས་གསར་འགོད་པའི་བཅར་འདྲི་དང་ལེན་སྐབས། གོང་གསལ་ས་གནས་གཉིས་ནང་བཀའ་བློན་ཁྲི་པའི་སྔོན་འགྲོའི་འོས་བསྡུའི་གྲངས་འབོར་མང་ཤོས་བློ་བཟང་སེངྒེ་རེད་ཅེས་ཡོངས་བསྒྲགས་བྱས་ཡོད། དེ་ནི་ད་བར་ས་གནས་ཁག་གི་འོས་བསྡུའི་ཚོགས་མི་དང་ཟུར་དཔང་ཁག་ཅིག་གིས་བཀའ་སྤྱིའི་སྔོན་འགྲོའི་འོས་བསྡུའི་གསང་བ་ཕྱིར་བསྒྲགས་བྱས་པ་ལས། ས་གནས་འོས་བསྡུའི་འགན་འཛིན་ཞིག་གི་མཚན་ཐོག་ནས་འོས་བསྡུའི་གསང་བ་ཕྱིར་བསྒྲགས་བྱས་པ་ཐོག་མ་ཆགས་ཡོད།
འདི་གའི་གསར་འགོད་པས་ཕྱི་ཚེས་ ༡༥ ཉིན་ངྷ་ས་དབུས་འོས་བསྡུའི་ལས་འཕར་འགན་འཛིན་རིན་འཛིན་ཆོས་གྲགས་ལགས་ལ་བཅར་འདྲི་ཞིག་གི་སྐབས། ཁོང་གིས་གསུངས་དོན། ས་གནས་འགའ་རེར་བཀའ་བློན་ཁྲི་པའི་འོས་བསྡུའི་སྐོར་ལ་གནས་ཚུལ་གང་སར་ཁྱབ་བསྡད་པ་ལྟ་བུ་ཡོད་ས་རེད། དེ་རྩ་བ་ནས་འགྲིག་གི་མེད། འོས་བསྡུའི་སྒྲིག་གཞི་དང་བཅའ་ཁྲིམས་ནང་གསང་རྒྱ་བྱེད་དགོས་པའི་རིགས་ཡིན་སྟབས་མ་ནོར་བ་བྱེད་དགོས། ད་ལྟའི་ཆར་ས་གནས་འོས་བསྡུའི་འགན་འཛིན་དང་ཚོགས་མི་སུ་ཡིན་རུང་གསང་རྒྱ་བྱེད་དགོས་པ་དང་། འོས་བསྡུ་དང་བཅའ་ཁྲིམས་ཀྱི་སྒྲིག་གཞིར་བརྩི་དགོས་པ་གལ་ཆེན་པོ་རེད། དབུས་འོས་བསྡུ་ལྷན་ཁང་གིས་ས་གནས་ཁག་གི་མང་ཚོགས་ལ་འོས་བསྡུའི་སྒྲིག་གཞི་དང་འབྲེལ་བའི་ལམ་སྟོན་ག་རེ་བྱེད་དགོས་ཀྱི་འདུག མང་ཚོགས་ལ་བཤད་དགོས་པ་ག་རེ་འདུག བཤད་མི་དགོས་པ་གང་འདུག དེ་ཚོར་ས་མཚམས་ཤིག་ཕྱེ་ཐུབ་ན་ཡག་པོ་འདུག་ཅེས་གསར་འགྱུར་བརྒྱུད་ལམ་ཁག་ལ་ཞུ་བཞིན་པ་ཡིན་གསུངས།
དེ་བཞིན་བཀའ་སྤྱིའི་སྔོན་འགྲོའི་འོས་བསྡུའི་སྐབས་འོས་ཤོག་མང་བོ་རྩིས་མེད་དུ་ཕྱིན་ཡོད་ལ། འོས་བསྡུའི་ལས་འཕར་འགན་འཛིན་གྱིས་དེའི་སྐོར་གསུངས་དོན། འོས་ཤོག་རྩིས་མེད་ཕྱིན་པའི་སྐོར་ལ་སྤྱི་ཚོགས་ནང་བསམ་ཚུལ་མ་འདྲ་བ་བཤད་མཁན་ཡོང་གི་འདུག སྤྱིར་ང་ཚོས་ལས་འགུལ་མགོ་བརྩམས་པ་ནས་འོས་ཤོག་རྩིས་མེད་གཏོང་ཕྱོགས་ཀྱི་སྐོར་ལ་དཀའ་ངལ་མང་བོ་འཕྲད་ཀྱིན་འདུག་ཅེས་བསམ་ཚལ་མང་བོ་བྱུང་བ་དང་། ངེད་ཅག་དབུས་སྤྱི་ཁྱབ་ཡིག་ཚང་གི་འགན་འཛིན་གསུམ་རྒྱ་བལ་འབྲུག་གསུམ་དང་ལྷག་པར་དུ་རྒྱ་གར་ནང་ལོགས་ཀྱི་ས་གནས་ཁག་གི་འོས་བསྡུའི་འགན་འཛིན་རྣམས་ལ་ཐུག་འཕྲད་དང་། མང་ཚོགས་ལ་ཟབ་སྦྱོང་སྤྲོད་དུ་ཕྱིན་ཡོད། དེར་བརྟེན་གནད་འགག་ཆེ་ཤོས། བཙན་བྱོལ་བོད་མིའི་འོས་བསྡུའི་སྒྲིག་གཞིའི་ནང་གསལ་འོས་ཤོག་རྩིས་མེད་གཏོང་ཕྱོགས་ལྟར། དོན་ཚན་ང་བརྒྱད་པ། འོས་ཤོག་རྩིས་མེད་གཏོང་ཕྱོགས་ཞེས་པར། འོས་ཤོག་གྲངས་བཤེར་སྐབས་དོན་ཚན་ ༣༤ ནང་གསེས་ ༢ ནང་གསལ་ལྟར་རམ། འོས་བསྡུ་ལས་ཁང་གིས་གོ་སྒྲིག་བྱས་པའི་རྟགས་ཐེལ་ལམ་སྨྱུ་གུ་བེད་སྤྱོད་མ་བྱས་པའི་འོས་ཤོག་དེ་ཉིད་རྩིས་མེད་དང་། འོས་སྒམ་ནས་འོས་འཕེན་གྲངས་ཚད་ལས་བརྒལ་བའི་འོས་ཤོག་ཐོན་ཚེ། འོས་ཤོག་ཡོངས་རྫོགས་རྩིས་མེད་ཀྱིས་བསྐྱར་དུ་འོས་བསྡུ་བྱེད་དགོས། དོན་ཚན་སོ་བཞི་པ། འོས་ཤོག་གྲངས་བཤེར། ཤོག་ངོས་ ༢༧ དང་ ༢༨ ནང་གསེས་ ༢། ཀ འོས་ཤོག་ངོས་སུ་འོས་འཕེན་པ་སུ་ཡིན་ངོས་འཛིན་ཐུབ་པའི་རྟགས་སམ། མི་མིང་འཁོད་པ། ཁ། རང་མོས་འོས་འདེམས་སུས་བྱེད་མི་མིང་དང་རྟགས་གང་ཡང་མི་གསལ་བ། ག ཐོབ་ཁོངས་སོ་སོའི་ཐོབ་ཆའི་སྤྱི་འཐུས་ཀྱི་གྲངས་ལས་བརྒལ་བའི་མི་མིང་དང་འོས་རྟགས་བརྒྱབ་པ། ང་། འོས་འདེམས་སུ་དང་། སུར་བྱེད་ངོས་འཛིན་མ་བདེ་བའི་མི་མིང་དང་འོས་རྟགས་གང་བྱུང་བརྒྱབ་པ། ཅ། འོས་ཤོག་ནང་མ་གསལ་བའི་རང་མོས་འོས་གཞི་མིང་གསལ་བཀོད་རིགས། ཆ། འོས་ཤོག་ངོ་མ་མིན་པའི་དོགས་གནས་ཅན་གྱི་རིགས་བཅས་གསལ་ཡོད་ལ། ཡང་ཤོག་ངོས་ ༧༡ གཤམ་གསལ་རེའུ་མིག་ཆ་ཚང་ངེས་པར་བསྐང་དགོས། ཞེས་སོགས་གསལ་ཡོད་ཅེས་གསུངས།
ཡང་ཁོང་གིས། གོང་གི་རེའུ་མིག་ཆ་ཚང་ངེས་པར་དུ་བསྐང་དགོས་ཞེས་པ་འོས་བསྡུའི་སྒྲིག་གཞིའི་ཟུར་རྒྱན་ནང་གསལ་ཡོད་ལ། དེ་གནད་འགག་ཆེན་པོར་མཐོང་སྟེ་འོས་ཤོག་རང་གི་སྟེང་དུ་ཡང་བཀོད་ཡོད་མོད། ཐེངས་འདིར་རེའུ་མིག་ཆ་ཚང་མ་བསྐང་པའི་འོས་ཤོག་མང་བོ་ཞིག་རྩིས་མེད་དུ་ཕྱིན་འདུག་ལ། དབུས་སྤྱི་ཁྱབ་འོས་བསྡུའི་ངོས་ནས་ས་གནས་སོ་སོར་རེའུ་མིག་ཆ་ཚང་བསྐང་མེད་པའི་འོས་ཤོག་རྣམས་རྩིས་མེད་དུ་གཏོང་དགོས་པ་རེད་ཅེས་བཤད་ཡོད། དེ་ནི་འོས་བསྡུའི་སྒྲིག་གཞིའི་ནང་འོས་ཤོག་རྩིས་མེད་དུ་འགྲོ་དགོས་རིགས་རྩིས་མེད་དུ་གཏོང་དགོས་པ་འཁོད་ཡོད་སྟབས། དབུས་ས་གཉིས་ཀྱིས་ལག་བསྟར་བྱེད་དགོས་པ་གལ་ཆེན་པོ་ཆགས་ཡོད་ཅེས་གསུངས།
ཡང་ཁོང་ལ་སྔོན་འགྲོའི་འོས་བསྡུའི་སྐབས་སྦེལ་ཀོབ་བོད་ཁྱིམ་གྱི་སློབ་ཕྲུག་ཉིས་བརྒྱ་ལྷག་གིས་དེབ་སྐྱེལ་བྱས་མེད་པར་འོས་བསྡུ་བྱེད་མ་ཐུབ་པའི་དཀའ་ངལ་བྱུང་ཡོད་པའི་སྐོར་བཀའ་འདྲི་ཞུས་པར། ཁོང་གིས་གསུངས་དོན། ང་ཚོས་སྦེལ་ཀོབ་ས་གནས་འོས་བསྡུ་འགན་འཛིན་ལ་འཕྲིན་ཡིག་བཏང་སྟེ། དེའི་སྐོར་ལ་ཞིབ་འཇུག་བརྟག་དཔྱད་གནང་རོགས། དངོས་ཡོད་གནས་སྟངས་གང་ཡིན་པ་དེ་ཡར་གཏོང་རོགས། དེ་ལ་བརྟེན་ཏེ་དངོས་ཡོད་གནས་ཚུལ་གང་ཡིན་པ་དང་ཕྲུ་གུ་ཉིས་བརྒྱ་སུམ་བརྒྱ་ལྷག་གིས་དེབ་སྐྱེལ་བྱས་མེད་པ་དེ། དོ་བདག་རང་གིས་ནོར་འཁྲུལ་བྱས་ཡོད་ཚེ་ཞུ་རྒྱུ་གང་ཡང་མེད་མོད། མི་གཞན་ཞིག་གིས་བརྒྱུད་སྐུལ་ལྟ་བུའི་རིགས་ཡིན་ཚེ། ཁྲིམས་འགལ་ཆགས་ཡོད་ལ། དེ་ལ་གསལ་བོ་གནང་རོགས་ཞུས་ཡོད་ཅེས་གསུངས། ཕྱི་ཚེས་ ༡༩ ཉིན་འདི་གའི་གསར་འགོད་པས་དབུས་འོས་བསྡུ་ལྷན་ཁང་ལ་འབྲེལ་བ་བྱས་ཏེ། བཀའ་སྤྱིའི་སྔོན་འགྲོའི་འོས་བསྡུའི་སྐབས་ས་གནས་གཉིས་ནས་འོས་སྒམ་ ༡༩ འཕྲོག་པའི་སྐོར་ལ་བཀའ་འདྲི་ཞུས་པར། ད་ལྟའི་ཆར་ད་དུང་འགྱུར་བ་གང་ཡང་བྱུང་མེད་ཅེས་གསུངས་ཡོད།
གསར་འགོད་པ། ཨ་རིག་འགྱུར་མེད།
གང་ལྟར་ས་གནས་ཀྱི་འོས་བསྡུའི་ལས་བྱེད་རྣམས་ཀྱིས་ལས་ཀ་དྲང་པོར་བྱེད་ཀྱི་ཡོད་པའི་ཡིད་ཆེས་ཡོད་ སྲང་ལམ་གྱི་གནས་ཚུལ་ལ་གཞིགས་ན་དྲང་པོ་བརྒྱ་ཆ་བརྒྱ་བྱེད་ཀྱི་ཡོད་མེད་ཐེ་ཚོམ་ཡིན་ གང་ཡིན་ཟེར་ན་ སྦེལ་ཀོབ་གཞིས་ཆགས་རྙིང་པའི་ནང་བཀའ་ཁྲི་དང་ཆོས་ལུགས་ཀྱི་འོས་གྲངས་མཐོ་ཤོས་སུ་ལ་ཐོབ་མིན་དེ་ཕལ་ཆེར་མང་ཆེ་བས་གསལ་པོ་ཤེས་ཀྱི་འདུག་ དཔེར་ན་ བཀའ་ཁྲིའི་འོས་མཐོ་ཤོས་དེ་བློ་བཟང་སེང་གེ་དང་ དེ་ནས་དགེ་ལུགས་ཆོས་བརྒྱད་ཀྱི་འོས་ཁོངས་སུ་ཀརྨ་ཆོས་འཕེལ་ཡོད་པ་སོགས་གོ་རྒྱུ་འདུག་ དེ་བདེན་པ་ཡིན་མིན་མི་ཤེས་
འདི་ཚོ་ཚང་མ་ད་ལྟ་ང་ཚོའི་སྤྱི་ཚོགས་འདི་མང་གཙོ་ཡང་དག་གཅིག་བྱེད་པའི་ཚད་དུ་སླེབས་མེད་པའི་རྟགས་མཚན་རེད། རེ་བ་བྱེད་ཡུལ་ལམ་ལས་ཀྱི་སྣེ་མོར་ཡོད་པ་ཚོས་སྒྲིག་ཁྲིམས་ལ་རྩི་གི་མེད་དུས་གཞན་ཤེས་ཡོན་ཡོད་ལ་མེད་ལ་རྣམས་ནས་ག་འདྲ་བྱས་ཡོང་། ད་དུང་ང་ཚོས་ཤེས་ཡོན་ལ་དོ་སྣང་གནང་རྒྱུ་གལ་ཆེ། མང་ཚོགས་ལ་ཤེས་ཡོན་ཚད་ལོངས་པ་ཞིག་མེད་ན་འོས་གྲངས་ཕྱིར་བསྒྲགས་བྱས་པ་ལས་ལྷག་པ་གཞན་གྱི་མགོ་སྐོར་འོག་ཚུད་ནས་འོས་མི་དེའང་ག་འདྲ་ཞིག་ཡོང་མིན་བརྗོད་དཀའ།
ང་རང་ས་གནས་འོས་བསྡུའི་ཚོགས་མི་ཞིག་ཡིན་པའི་ཆ་ནས་་་་་་འོས་བསྡུའི་སྒྲིག་གཞིའི་ནང་གི་་་་ངོས་འཕྲོད་ཐུབ་པའི་ཁྱད་མིང་ཡོད་ན་ལས་་་་་ཞེས་པ་སོགས་དངོས་སུ་བཀླགས་ནས་་་་་་ཁ་པར་གྱི་བརྒྱུད་ལམ་ཚུན་ཆད་ནས་ཀྱང་གསལ་པོ་ཆགས་ཐབས་མང་པོ་བྱས་ཀྱང་་་་ད་དུང་ཡང་དཀའ་ངལ་སེལ་ཐུབ་མ་སོང་། ཟུར་རྒྱན་་་་་ཟུར་རྒྱན་་་་ག་རེ་ཟུར་རྒྱན་་་་་་་་་་་་་་་་་་་་་་་་་་་་་ཧྥུའུ་་ཤུའུ་་འུ་་་་་་
བདུན་ཕྲག་སྔོན་མའི་གཟའ་ཉི་མའི་ཉིན་ང་ཧྥི་རན་ཁི་ཧྥོར་ཊི་ལ་འགྲོ་སྐབས་གྲོགས་པོ་ཞིག་དང་ཁ་བརྡ་ཡར་མར་བཅོ་བརྒྱད་བྱས་རྗེས་བཀའ་ཁྲིའི་སྔོན་འགྲོའི་འོས་གཞིའི་སྒང་ལ་བབས་སོང་། སྐབས་དེར་གྲོགས་པོ་ཞིག་གིས་སྔོན་འགྲོའི་འོས་མཐོ་ཤོས་ཏེ་བློ་བཟང་སེང་གེ་ལགས་སུ་འཐོབ་གི་རེད་ཅེས་ཨེ་ཤེ་ཡ་རང་དབང་རླུང་འཕྲིན་ནས་བསྒྲགས་བྱུང་ཟེར། ངས་ལམ་སེང་ཡིད་མ་ཆེས་བའི་ངང་ད་དུང་གཞུང་འབྲེལ་གྱི་ངང་འོས་ཤོག་གི་གྲུབ་འབྲས་མ་བསྒྲགས་གོང་ཨེ་ཤེ་ཡ་ཚང་ལ་འདི་འདྲའི་བསྒྲགས་གཏམ་ཞིག་གང་ནས་རེགས་པ་ཡིན་ནམ་ཅེས་དྲིས་བ་ཡིན། སྐབས་དེར་གྲོགས་པོ་དེས་ཨེ་ཤ་ཡ་རང་དབང་ཚང་གིས་མི་ལས་དགུ་ཞིག་མ་གཏོགས་མི་བྱེད་ཀི་ཟེར། ཉེ་འཆར་ལྷ་ས་ནས་ཁྲིམས་ཐག་བཅད་པའི་ཚོང་བ་རྡོ་རྗེ་བཀྲ་ཤིས་ཟེར་བ་དེའི་སྐོར་ཕ་ཡུལ་རེབ་གོང་ནས་ཡིན་པའི་ཕྱི་སྡོད་བོད་པ་ཞིག་ལ་བཅར་འདྲི་བྱེད་བཞིན་འདུག་མོད། ཁོས་རྡོ་རྗེ་བཀྲ་ཤིས་ཟེར་བ་དེ་རྒྱ་དགའ་ཡིན་རབས་དང་བོད་པའི་ལ་རྒྱ་མེད་ཚུལ་ལུང་བ་གང་བཤད་སོང་། རྗེས་སུ་ཤེས་རྟོགས་བྱུང་བ་ལྟར་ན་ཚོང་བ་དེ་ཨ་མདོ་བླ་བྲང་ཕྱོགས་ནས་རེད་ཟེར། གསར་འགོད་པ་ཁ་ཤས་ལ་ལས་ཀ་མེད་ན་མི་ཆོ་མེད་གི་ཁ་སློགས་ནས་ཡུལ་ལུང་དང་སྡེ་ཁག་བར་དཀྲུགས་ཤིང་འཕེན་བཞིན་འདུག་ཟེར། ཨེ་ཤེ་ཡ་ཚང་ལ་ལས་རྒྱུ་མེད་ན་དྲ་ཐོགས་ཀྱི་བོད་ཡིག་གསར་འགྱུར་འདི་ལ་དག་བཅོས་ཞིག་བྱས་ན་ཅི་མ་རུང་།