བོད་ཀྱི་བདག་དབང་བསྒྲཊ་གཏམ། ༼བོད་འབྱོར་རྩོམ་ཡིག༽

གདོན།

འགྲོ་བ་མིའི་རིགས་ཀྱི་ལོ་རྒྱུས་ནི་ཤེས་རིག་ལྡན་པའི་ལོ་རྒྱུས་ཤིག་རེད་མོད་ཀྱང་། འགྲོ་བ་མིའི་རིགས་ཀྱི་བསམ་བློ་དང་ལྟ་བ་། ཡུལ་སྲོལ་གོམས་གཤིས། ཆོས་ལུགས་དད་མོས། མི་ཚེ་ལྟ་ཚུལ། མཛེས་དཔྱོད་ལྟ་ཚུལ་སོགས་ཀྱི་འགལ་འབྲེལ་གྱི་གནད་དོན་ཡང་ཤེས་རིག་གདོང་གཏུག་ལས་བྱུང་བ་ཞིག་ཡིན་པར་མ་ཟད། རྒྱལ་ཁབ་གཅིག་གྱུར་དང་འཛམ་གླིང་གཅིག་གྱུར་གྱི་འགལ་རྐྱེན་ཉག་གཅིག་ནི་ཤེས་རིག་ལྟ་གྲུབ་ཀྱི་འགལ་ཟླ་ཉིན་རེར་ལས་རྣོ་ངར་ཅན་དུ་འགྱུར་བཞིན་ཡོད་པས་རེད།

ཤེས་རིག་ལྟ་བ་དེ་ནི་དུས་རབས་བཅོ་བརྒྱད་པའི་ནང་ཧྥ་རན་སའི་བསམ་བློ་མཁན་རྣམས་ཀྱིས་དམུ་རྒོད་ཀྱི་རྣམ་པའམ་རང་བཞིན་དེ་ལ་བལྟས་ཏེ་བཤད་པ་ཞིག་ཡིན་འདུག ཤེས་རིག་ལྡན་པའི་སྤྱི་ཚོགས་ནི་གདོད་མའི་སྤྱི་ཚོགས་དང་ཁྱོན་ནས་འདྲ་བ་མ་རེད་དེ། རྒྱུ་མཚན། དེ་ནི་གྲོང་རྡལ་དང་གྲོང་ཁྱེར་གྱི་གཞིས་ཆགས་པ། ཡི་གེ་སོགས་ཀྱང་དར་ཡོད་པས་རེད། གང་ལྟར། ད་ལྟའི་འགྲོ་བ་མིའི་རིགས་ཀྱི་སྤྱི་ཚོགས་ངོ་བོར་འགྱུར་ལྡོག་དང་རིག་གནས་སྣང་ཚུལ་མང་དག་ཅིག་བྱུང་དང་འབྱུང་བཞིན་ཡོད་པ་ནི་མ་འོངས་འགྲོ་བ་མིའི་རིགས་ཞི་བདེ་དང་དཀྱེལ་ཡངས། འཆམ་མཐུན་གྱི་སྤྱི་ཚོགས་ངོ་བོ་ཞིག་གཟུགས་ཐུབ་མིན་གྱི་གནད་དོན་གལ་ཆེན་ཞིག་སྟེ། བསམ་བློའི་ནུས་ཚད་དང་ཕྱི་འབྲེལ་ནུས་ཚད། ཆབ་སྲིད་ནུས་ཚད་སོགས་ཀྱི་ཚད་མཇལ་བྱེད་ཅིག་ཏུ་ལྟའོ།།

ཡང་ཤེས་རིག་ལྟ་བའི་ངོས་ནས་གླེང་ན། སྣ་གཅིག་གི་ཤེས་རིག་ལྟ་བ་དང་། སྣ་མང་གི་ཤེས་རིག་ལྟ་བ་དེ་ཁྱབ་ཁོངས་ཀྱི་ངོས་ཆེ་ཆུང་མི་འདྲ་བའི་སྟེང་ནས་དབྱེ་བ་བགར་ཡོད་པ་དང་། འཛམ་གླིང་མིའི་རིགས་ཀྱི་འཕེལ་རྒྱས་ངོས་ནས་བལྟས་ན། སྔ་མ་ནི་ཕྱི་མར་བལྟོས་ན་སྒེར་གཅོད་དང་བཙན་དྲག འབུར་འཇོམས་ཀྱི་རང་བཞིན་དང་ངོ་བོ་ལྡན་པ་དང་། ཀླ་ཀློའམ་དམུ་རྒོད། ཤེས་རིག་མ་དར་པའི་ཆ་འདྲེས་པ་ལས་གཞན།   བཟང་ངན་གཉིས་ལས་ངན་གྱི་ཤན་སྟོབས་ཤུགས་ཆེ་བའོ།  ཕྱི་མ་ནི་སྔ་མ་ལས་དཀྱེལ་ཡངས་དང་འདྲ་མཉམ། རང་དབང་ལྡན་པ་ཞིག་དང་། ཤེས་རིག་ལྡན་པ་ཞིག་རེད་ལ། བཟང་ངན་གཉིས་ལས་བཟང་གི་ཡོན་ཏན་ལྡན་པས་ན།  ལམ་དེ་ནི་འུ་ཅག་ཀུན་གྱི་ཁ་ཕྱོགས་དང་གདམ་ག་ཡིན་པའོ།།

ད་ལྟའི་མི་རིགས་དང་རྒྱལ་ཁབ་གང་ནས་ཀྱང་སྣ་མང་ཤེས་རིག་གི་ལྟ་བ་ནི་ཀུན་གྱི་བརྗོད་གཞི་ཞིག་ཏུ་གྱུར་འདུག་ལ།  དེ་དག་འདོན་སྤེལ་དང་ཁྱབ་བསྒྲགས། འཛིན་སྐྱོང་སྤེལ་གསུམ་གྱི་གཙོ་ཤུགས་ནི་སྲིད་གཞུང་གི་སྟེང་དུ་གནས་ཡོད་པ་ཞིག་རེད། རྒྱུ་མཚན། སྲིད་གཞུང་ལ་རིགས་གཉིས་ཡོད་པ་སྟེ། རང་དབང་འཛིན་སྐྱོང་བྱེད་པའི་སྲིད་གཞུང་ཞིག་དང་། རང་དབང་བཀག་སྡོམ་བྱེད་པའི་སྲིད་གཞུང་ཞིག་ཡོད་པ་རེད། དེ་ནི་རྒྱལ་ཁབ་ཕྱི་ནང་གི་གནས་བབ་ལ་བལྟས་ན་ཤེས་ཡོང་བ་ཞིག་རེད། སྲིད་གཞུང་ག་གེ་མོས་སྤྱི་པའི་རང་དབང་དེ་རང་དབང་ཞིག་ཡིན་དགོས་པའི་རིན་ཐང་ཞིག་གི་ངོས་ནས་སྤེལ་བ་དང་། ཡང་སྲིད་ག་གེ་མོས་སྤྱི་པའི་རང་དབང་དེ་ཁ་བྲལ་རིང་ལུགས་སམ་དྲག་སྤྱོད་རིང་ལུགས་ཤིག་གི་ངོས་ནས་བཀག་འགོག་བྱེད་ཀྱི་ཡོད། དཔེར་ན། ཤར་ཕྱོགས་རྒྱལ་ཁབ་དག་གིས་སྤྱི་པའི་རང་དབང་ནི་ཁ་བྲལ་རིང་ལུགས་ཀྱི་ལྟ་བའི་སྔོན་འགྲོའི་སྟེང་ནས་འགོག་གི་ཡོད་པ་དང་། ནུབ་ཕྱོགས་རྒྱལ་དག་གིས་སྤྱི་པའི་རང་དབང་ནི་ཆོས་ཉིད་དམ་གནས་ལུགས་ཤིག་གི་རིན་ཐང་ངོས་ནས་སྤེལ་གྱི་ཡོད་པ་རེད། ལྟོས་འཇོག་གིས། ཤར་ཕྱོགས་རྒྱལ་ཁབ་དག་ནི་རང་དབང་བཀག་སྡོམ་བྱེད་པའི་སྲིད་གཞུང་གི་ངོ་བོ་ལྡན་པ་ཞིག་དང་། ནུབ་ཕྱོགས་རྒྱལ་ཁབ་དག་ནི་རང་དབང་འཛིན་སྐྱོང་བྱེད་པའི་སྲིད་གཞུང་གི་རང་བཞིན་སྐྱོང་བ་ཞིག་རེད། དེ་བས། སྣ་མང་ཤེས་རིག་གིས་ལྟ་བ་འཛིན་སྐྱོང་སྤེལ་གསུམ་གྱི་གཙོ་ཤུགས་སྲིད་གཞུང་གི་སྟེང་དུ་རང་བཞིན་གྱིས་བབ་ཡོད་པ་ཞིག་རེད།

ཡང་སྲིད་གཞུང་གང་ཞིག་སྒེར་གཅོད་དང་རང་དབང་ཡིན་མིན་གྱི་ཁྱད་པར་ནི་སྲིད་གཞུང་གང་དེའི་ལང་ཕྱོགས་དང་ལམ་ལུགས།  བྱེད་ཐབས། སྦྱོར་བ་གང་གི་ཆ་ནས་རྡོ་ལ་རི་མོ་བརྐོས་པ་ཇི་བཞིན་མངོན་པར་གསལ་བོ་འདུག་སྟེ། དཔེར་ན། གང་དུ་མང་ཚོགས་ཀྱི་ངོ་རྒོལ་བྱེད་པ་དང་སྐད་འབོད་རྒྱག་པ་། ཁྲོམ་སྐོར་བྱེད་པ། ཟས་བཅད་གནང་བ་སོགས་རང་དབང་དང་འདྲ་མཉམ་སོགས་མི་བུའི་ཐོབ་ཐང་རྩོད་ལེན་བྱེད་སྐབས། སྲིད་གཞུང་གང་དེས་མངོན་ལྐོག་གང་རུང་ནས་མི་བུའི་སྨྲ་བརྗོད་རང་དབང་དང་། འགྲོ་འདུག་རང་དབང་། པར་བསྐྲུན་རང་དབང་། བསམ་བློའི་རང་དབང་། ཆོས་དད་རང་དབང་། འཚོ་གནས་རང་དབང་སོགས་ལ་ཁག་ཐེག་དང་བརྩི་འཇོག་གནང་ཞིང་། ལྷན་སྐྱེས་ཀྱི་རང་བཞིན་དང་དེའི་དེ་ཉིད་ཀྱི་གནས་ལུགས་ལ་དང་དོད་ཆེན་པོའི་སྒོ་ནས་ཡར་འཇོག་བྱེད་པ་དང་། ཉེས་པ་གང་གི་སྦྱོར་བ་བསྟར་པ་ཡིན་ན། འགྱོད་བཤགས་དང་ངོས་ལེན་བླ་ལྷག་གནང་བ་རེད། ཡང་། གང་དུ་མང་ཚོགས་ཀྱི་ངོ་རྒོལ་བྱེད་པ་དང་སྐད་འབོད་རྒྱག་པ་། ཁྲོམ་སྐོར་བྱེད་པ། ཟས་བཅད་གནང་བ་སོགས་རང་དབང་དང་འདྲ་མཉམ་སོགས་མི་བུའི་ཐོབ་ཐང་རྩོད་ལེན་བྱེད་སྐབས། སྲིད་གཞུང་གང་དེས་མངོན་ལྐོག་གང་རུང་ནས་མི་བུའི་ལྷན་སྐྱེས་ཀྱི་རང་དབང་ལ་རྡོག་བརྫིས་གཏོང་བ་དང་། ཁ་རྡུང་གཏོང་བ། བཀག་ཉར་བྱེད་པ། འཛིན་བཟུང་སོགས་བྱེད་སྲིད་ལ། ཉེས་པ་གང་གི་སྦྱོར་བ་བསྟར་པ་ཡིན་ན། འགྱོད་བཤགས་དང་ངོས་ལེན་གང་ཡང་མེད་པའི་ཆ་ནས་མི་རིགས་ཁ་བྲལ་རིང་ལུགས་སོགས་ཀྱི་མ་ཉེས་ཁ་གཡོགས་བྱས་ཏེ། མང་ཚོགས་སྟེང་ལ་གདུག་རྩུབ་ཆེ་བའི་གཉའ་གནོན་རབ་དང་རིམ་པ་སྤེལ་བའོ།།

ཤེས་རིག་ལྟ་བའི་ཁྱབ་ཁོངས་ནས་བསམ་གཞིག་ཅིག་བྱས་ན། ཀྲུང་གོ་ནི་སྣ་གཅིག་ཤེས་རིག་གི་ལྟ་བ་ཤུགས་དྲགས་པའི་རྒྱལ་ཁབ་ཅིག་རེད་ལ། མི་རིགས་གྲངས་འབོར་གྱི་ཆ་ནས་བལྟས་ན། ཀྲུང་གོ་ནི་མི་རིགས་མང་པོའི་རྒྱལ་ཁབ་ཞིག་ཡིན་པ་ཀུན་ལ་གསལ་ཆ་ཡོད་པ་རེད།  ཀྲུང་གོའི་རིག་གནས་ཀྱི་ཉིང་བཅུད་ནི་མི་རིགས་གྲངས་ཉུང་རིག་གནས་ཀྱི་རིན་ཐང་སྟེང་དུ་བབས་པ་ཡོད་པ་དང་། གལ་སྲིད། མི་རིགས་གྲངས་ཉུང་གི་རིག་གནས་རྩ་མེད་གཏོང་བའི་དབང་དུ་བཏང་ན། ཀྲུང་གོའི་གནས་བབས་དེ་ཆུ་བོ་ཆེན་པོ་བྱེ་མའི་ཐང་དུ་ལྷུང་བ་ལྟ་བུའི་སྐྱོ་གར་ཞིག་འབྱུང་བ་ནི་མ་དཔགས་ཀྱང་ཤེས་པ་རེད།  དེ་བས། མི་རིགས་གྲངས་ཉུང་གི་རིག་གནས་གང་ལ་རིས་ལྟ་མེད་པར་འཛིན་སྐྱོང་སྤེལ་གསུམ་བྱེད་པ་ནི་གཞུང་སྒེར་ཀུན་གྱི་འགན་འཁྲི་ཡིན།

འདྲ་མཉམ་གྱི་ལྟ་བ་ནི་འགྲོ་བ་མིའི་རིགས་ཀྱི་བསམ་བློའི་འཕེལ་ཕྱོགས་ཤིག་དང་། རང་དབང་དང་དམངས་གཙོའི་བསམ་བློ་གོང་འཕེལ་གཏོང་བའི་རྨང་རྐང་གཙོ་བོ་ཞིག་ཏུ་ཆགས་ཡོད་པ་རེད། སྤྱིར་འདྲ་མཉམ་གྱི་ལྟ་བ་ནི་དུས་རབས་རང་བཞིན་དང་ལོ་རྒྱུས་རང་བཞིན། ཆབ་སྲིད་རང་བཞིན་གྱི་འགལ་རྩོད་མང་དུ་བྱུང་མྱོང་མོད། འགྲོ་བ་མིའི་རིགས་རང་བྱུང་གི་རྣམ་པ་ནས་གདོད་མའི་ཚུལ་བབ་ལས་རིམ་བཞིན་མིའི་སྤྱི་ཚོགས་སུ་བརྒལ་བ་ནས།  འདྲ་མཉམ་གྱི་ལྟ་བའམ་འདུ་ཤེས་དེ་ནི་འགྲོ་མི་ཀུན་གྱི་གཙོ་རྒྱུགས་བསམ་བློ་ཞིག་ཏུ་གྱུར་ཡོད་པ་དང། ལྟ་བ་དེ་ནི་མིའི་རྩིས་ཐང་དང་རང་དབང་། ཐོབ་ཐང་སོགས་མི་བུ་ཀུན་ལ་རིས་མེད་དུ་ཡོད་པ་ཞིག་རེད།

ཡང་འདྲ་མཉམ་ལྟ་བའི་ངོས་ནས་དབྱེ་ན། མི་བུའི་ཐོབ་ཐང་འདྲ་མཉམ་དང་། མི་བུའི་མི་གཞི་འདྲ་མཉམ། མི་བུའི་རྩིས་ཐང་འདྲ་མཉམ། རྒྱུ་འབྱོར་ལོངས་སྤྱོད་ཀྱི་རང་དབང་འདྲ་མཉམ། བསམ་བློ་རང་དབང་གི་འདྲ་མཉམ། ལས་གནས་རེག་པའི་གོ་སྐབས་འདྲ་མཉམ། འཚོ་གནས་རང་དབང་འདྲ་མཉམ། སྐད་ཡིག་བཀོལ་སྤྱོད་ཀྱི་རང་དབང་འདྲ་མཉམ་སོགས་མང་དུ་ཡོད་པ་དང་། ཡང་གཅིག་བཤད་ན། འདི་ནི་སྤྱི་དམངས་ཀྱི་རྩ་བའི་ཐོབ་ཐང་དང་འོས་འགན་ཡང་ཡིན་པ་རེད། ཀྲུང་གོ་རྒྱལ་ཁབ་ཀྱི་ངོས་ནས་གླེང་ན། མི་རིགས་ཀྱི་སྐད་དང་ཡི་གེ་ནི་མི་རིགས་དེ་ཉིད་གཞི་གྲུབ་ཀྱི་རྩ་བའི་ཁྱད་ཆོས་སུ་བརྗོད་པ་དང་། མི་རིགས་ཀྱི་སྐད་དང་ཡི་གེ་འདྲ་མཉམ་ཡིན་པ་ནི་མི་རིགས་འདྲ་མཉམ་གྱི་མཚོན་རྟགས་གལ་ཆེན་ཞིག་ཡིན་ཚོད། ཕྱོགས་ཡོངས་ནས་མི་རིགས་གྲངས་ཉུང་གི་སྐད་དང་ཡི་གེ་དང་། འདྲ་མཉམ་ཐོབ་ཐང་ལ་བརྩི་འཇོག་དང་ལུགས་མཐུན་གྱིས་ཁེ་དབང་སྲུང་སྐྱོབ་བྱེད་པ་ནི། མི་རིགས་གྲངས་ཉུང་དག་གི་མཐུན་སྒྲིལ་དང་འབྲེལ་བའི་གནད་དོན་ཞིག་ཡིན་སྐད། མི་རིགས་གྲངས་ཉུང་ས་ཁུལ་དུ་མི་རིགས་རང་གི་སྐད་དང་ཡི་གེ་བཀོལ་སྤྱོད་བྱེད་ཆོག་པ་ནི་སྲིད་ཇུས་སུ་གསལ་ལོ།།

མ་གཞི། རྒྱལ་ཁབ་གཅིག་གྱུར་དང་མི་རིགས་མཐུན་སྒྲིལ་སོགས་ཀྱི་གཏམ་བཟློ་བ་ནི་སྐྱག་རྫུན་ཁོ་ན་རེད། དེ་དག་ནི་མི་རིགས་གྲངས་ཉུང་རྩ་མེད་གཏོང་བྱེད་ཀྱི་ལག་ཆ་འབའ་ཞིག་ཡིན་ཚོད་འདུག འདི་ནི་འགལ་བ་གཙོ་བོ་སྟེ། མི་རིགས་དང་རྒྱལ་ཁབ་བར་གྱི་འགལ་བ་ཞིག་ཡིན་པ་དང་། ངོ་བོའི་ཆ་ནས་བལྟས་ན། སྒེར་གཅོད་སྲིད་གཞུང་དང་བོད་མང་ཚོགས་བར་གྱི་འགལ་བ་ཡིན་ཅིང་། རིན་ཐང་གི་ཆ་ནས། སྣ་གཅིག་ཤེས་རིག་གི་ལྟ་བ་དང་སྣ་མང་ཤེས་རིག་གི་ལྟ་བའི་བར་གྱི་འགལ་བ་ཞིག་ཡིན་པ་རེད། འགྲོ་བ་མིའི་རིགས་ཀྱི་ལོ་རྒྱུས་ལྟར་ན། སྒེར་གཅོད་སྲིད་གཞུང་དང་མང་ཚོགས་བར་གྱི་འགལ་བ་ནི་ལུ་གུ་བརྒྱུད་དུ་མཐུད་པ་བཞིན་བྱུང་མྱོང་བ་དང་། མ་འོངས་སྤྱི་ཚོགས་སུའང་དེའི་མུར་སྐྱོང་བ་ནི་ཆོས་ཉིད་ཡིན། གཅིག་གིས་བདེན་དོན་རྩོད་ལེན་བྱེད་པ་རེད་ལ། གཅིག་གིས་བདེན་པ་རྡོག་བརྫིས་བྱས་པ་རེད། སྲིད་གཞུང་གི་ཚབ་བྱེད་ནི་སྒེར་གཅོད་དང་། མང་ཚོགས་ཀྱི་ཚབ་བྱེད་ནི་བདེན་པའོ།། རྒྱུ་མཚན་དེའི་ཕྱིར་ན། ང་ཅག་མི་རིགས་ནི་ཏག་ཏག་རྒྱུ་འབྲས་བློ་མིག་དང་སྡོངས་གྲོགས་མཛད་ཡོད་ལ། བདེན་པར་གཏན་དུ་ལུས་དང་གྲིབ་མ་བཞིན་གྲོགས་དགོས་སོ།།

 སྦྱོར་བའི་ངོས་ནས་བལྟས་ན། སྲིད་གཞུང་གི་སྦྱོར་བ་ནི་གཉའ་གནོན་དང་། མང་ཚོགས་ཀྱི་སྦྱོར་བ་ནི་ཞི་བ་རེད། ཞི་བ་ནི་ནམ་ཡང་གཞན་ལ་འཚེ་བ་མེད་པའི་སྒོས་ནས་སྤྱོད་པ་དང་། གཉན་གནོན་ནི་གཏུམ་དྲག་དང་གདུག་རྩུབ་ཀྱིས་མནར་བ་ཞིག་རེད། ཞི་བའི་ཁྱད་ཆོས་ནི་རང་གཞན་ཀུན་ལ་བརྩི་འཇོག་བྱེད་པ་དང་། མིའི་རིགས་ཀྱི་རང་བཞིན་དང་མཐུན་པའི་གནས་ལུགས་ཀྱི་དེ་ཉིད་ལ་ངོས་ལེན་བྱེད་པའི་ཀུན་སྤྱོད་ཚུལ་ལྡན་ཞིག་ཡིན་ལ། གཉའ་གནོན་གྱི་ཁྱད་ཆོས་ནི་རྡུང་བཅག་འཕྲོག་གསོད་དང་། གནོན་དྲག་སྤྱོད་གསུམ་སོགས་མིའི་རིགས་ལ་འཚེ་བའི་ཀུན་སྤྱོད་སྤེལ་བ་རེད། དེའི་ཕྱིར། རྡུང་བཅག་འཕྲོག་གསུམ་དང་མི་རིགས་ཁ་བྲལ་རིང་ལུགས། དྲག་སྤྱོད་རིང་ལུགས། གཏུམ་དབང་རིང་ལུགས་སོགས་ཀྱི་ཉེས་མིང་ནི་སྒེར་གཅོད་པར་བཏགས་པ་ཞིག་ཡིན་པ་ལས། རང་དབང་དང་འདྲ་མཉམ། མང་གཙོ་སོགས་དཔྲལ་བའི་མི་འབྲས་བཞིན་སྲུང་བའི་བདེན་དོན་རྩོད་ལེན་བགྱི་མཁན་རྣམས་ལ་བཏགས་པ་ཞིག་མིན་པ་ཤེས་དགོས་སོ།།

ད་ལྟ་བོད་མི་རིགས་ཀྱི་སྐད་ཡིག་བཀོལ་སྤྱོད་ཀྱི་རང་དབང་མེད་པར་བཟོས་པ་དེ་ནི། སྐད་ཡིག་བཀོལ་སྤྱོད་རང་དབང་གི་གནད་དོན་ཁོ་ནར་ལྟ་རུང་བ་ཞིག་མ་ཡིན་ཏེ།  འདི་ནི་མི་རིགས་འདིའི་འབྱུང་འགྱུར་བདག་དབང་ལ་འབྲེལ་བ་ཡོད་པ་ཞིག་ཡིན་པས་ན། བདག་དབང་དེ་ངེས་པར་ཕྱིར་སྤྲོད་དགོས་པ་དང་། དེའི་དོན་དུ་རང་སྲོག་བློས་གཏོང་དགོས་ཀྱང་འགྱོད་པ་སྤུ་ཙམ་ཡང་མེད་དོ།།

༼ བར་སྐབས་འདིར། ཁོ་བོ་ཤུགས་དྲགས་པའི་ཚོར་བ་འདི་ལ་ལྡོག་མ་ཐུབ་པས་ན། གཤམ་གྱི་ཚན་པ་འདི་གཏམ་བཤད་ཀྱི་ཚུལ་དུ་བཀོད་པ་ཡིན།༽

སྤུན་ཟླ་རྣམ་པ། ཁྱེད་ཅག་ལ་འཇིགས་སྐྲག་ཆེའམ། ང་ལ་སྡུག་བསྔལ་བསམ་གྱིས་མི་ཁྱབ་པ་ཞིག་འདུག དོ་ནུབ། ང་གློག་ཀླད་མདུན་ན་འཇིགས་སྐྲག་གིས་སུག་འདར་རྒྱག་བཞིན་ཡོད། རྒྱུ་མཚན། ང་ཅག་མི་རིགས་འདིའི་སྐད་དང་ཡི་གེ་ལ་གཞན་གྱིས་རྩ་མེད་གཏོང་རྩིས་འདུག ང་ཅག་མི་རིགས་འདིའི་ལས་དབང་ལ་གཞན་གྱིས་ཁ་ལོ་བསྒྱུར་བཞིན་འདུག འུ་ཅག་མི་རིགས་འདི་ལ་སྡུག་བསྔལ་ཇི་འདྲའི་ཆེ་བ་ལ། འདི་ལྟར། མངོན་ལྐོག་གང་རུང་ནས། འདི་ལྟར། བསམ་བཞིན་དང་བསམ་བཞིན་དུ་བཙན་གྱིས་གསོད་རྩིས་བྱས་ན། འཇིག་སྐྲག་འདི་ཇི་འདྲའི་ཡ་ང་བ་ཞིག་རེད་ཨང་།

ད་ལྟ། ང་ཅག་ལ་གདམ་ང་ཉག་གཅིག་འདུག་སྟེ། དེ་ནི་མི་རིགས་འདི་གསོན་ནམ་འཆི་བའོ།། གལ་སྲིད། ང་ཧོན་ལོག་པ་མིན་ན། ཁ་སང་། ཆབ་ཆ་དང་རེབ་གོང་། མགོ་ལོག་སོགས་ནས་བྱིས་པ་མང་པོ་ཞིག་གིས་རི་བོ་གངས་ཅན་པའི་སྐྱེ་འགྲོ་ཡོངས་ལ་གསོན་དགོས་པའི་སྐད་འབོད་རྒྱག་བཞིན་འདུག བྱིས་པ་དེ་དག་ནི་སུ་ཞིག་ཡིན་ནམ། ལྟོས་དང་། ཁོ་ཚོས་ཅིའི་ཕྱིར་གསོན་པ་ལ་གཡབ་མོ་གཏོང་དགོས་པ་ཡིན། རེད་དེ། ཁོ་ཚོ་ནི་གསོན་པའི་ཆེད་དུ་འཆི་ཡང་ཕོད་པའི་རི་བོ་གངས་ཅན་པའི་མི་རབས་ཚ་བརྒྱུད་རེད། ཁོ་ཚོས་རང་གི་སྐད་དང་ཡི་གེའི་ཆེད་དུ། ཁོ་ཚོས་རང་གི་བདག་དབང་གི་ཆེད་དུ། དེ་ལྟར་བློ་གྲོས་ལྡན་པའི་ངང་དུ། བདེན་པའི་ལམ་ལ་ཆས་བྱུང་། སྤུན་ཟླ་ལགས།  ཁྱོད་ཀྱིས་ལམ་དེ་མཐོང་བྱུང་ངམ། མཐོང་བྱུང་ངམ།

བལྟས་ཚོད་དུ། བྱིས་པ་དེ་དག་ལ་འཇིགས་སྐྲག་ཆེན་པོ་ཞིག་འདུག མ་རེད། ང་ནོར་འདུག ཁོ་ཚོ་ལ་འཇིག་སྐྲག་ཅི་ཡང་མི་འདུག ཁོ་ཚོས་འཆི་བར་རྒོལ་ལན་སྤྲོད་ཀྱི་འདུག ཁོ་ཚོས་དེ་ལྟར་བདེན་དོན་གྱི་མཉམ་སྒྲོག་རོལ་དབྱངས་ཤིག་སྒྲོག་གི་འདུག སྤུན་ཟླ་ལགས། ཐོས་བྱུང་ངམ།  གཟབ་ནན་གྱིས་ཉན་རོགས་གྱིས། དེ་ནི་གསོན་པའི་ལག་བརྡ་རེད་ཡ།

ཇི་འདྲའི་བླ་སྲོག་འགུག་པའི་རོལ་དབྱངས་གསོན་པོ་ཞིག་རེད། ཇི་འདྲའི་སྒལ་ཚིགས་སློང་བའི་དབྱངས་རྟ་སྙན་མོ་ཞིག་རེད། ཇི་འདྲའི་མི་སེམས་འདྲེན་པའི་བརྩེ་དུང་རྣལ་མ་ཞིག་རེད་། ཇི་འདྲའི་འཚོ་གནས་སྲུང་བའི་མི་སྐད་དྭངས་མ་ཞིག་རེད་ཨང་།

ཐལ་མོ་རྡོབས་དང་། དགའ་བསུ་གནང་རོགས། མུ་འབྲེལ་བརྙན་འཕྲིན་དེའི་ལེ་ཚན་ཡོངས་སུ་མཇུག་རྫོགས་སོང་བ་འདྲ།  མ་རེད། མ་རེད། ང་དངོས་ནས་ཧོན་འཐོར་འདུག ང་ཚོ་རྒས་པོ་ཆགས་འདུག དེ་བརྙན་འཕྲིན་ཞིག་ཡིན་ཚོད་མ་རེད། དེ་ནི་སྙིང་སྟོབས་ཤིག  དེ་ནི་བསམ་བློ་ཞིག་རེད། དེ་ནི་མི་རབས་གསར་པའི་སྙིང་གསོན་པོ་སྟེ། རང་དབང་རེད། དམངས་གཙོ་རེད། འདྲ་མཉམ་རེད། ཞི་བདེ་རེད།

ལྟོས་དང་། བྱིས་པ་དེ་དག་ནི་ལོ་ན་བཅུ་ཡས་མས་ལོན་ཡོད་མེད་ཀྱི་ན་ཆུང་རྐྱང་རྐྱང་རེད། ཁོ་ཚོའི་རིགས་ཞེན་དཀར་པོ་དེ་མཐོང་ན། ཁོ་ཚོའི་རྣམ་དཔྱོད་རྒོད་པོ་དེ་བསམ་ན། ཁོ་ཚོའི་རིགས་ཤེས་དྭངས་མོ་དེ་འདོད་ན། ཁོ་ཚོའི་གོ་རྟོགས་མཐོན་པོ་དེ་སྒོམ་ན། ང་ཚོས་ཅི་ལ་འཛེམས་དོགས་བྱ་དགོས་པ་རེད། འོ།  བདེན་དེ། སྐད་ཡིག་དེ་ནི་འུ་ཅག་དང་འབྲེལ་བ་མེད་པས་རེད། དེ་ནི་རི་བོ་གངས་ཅན་པ་དང་འབྲེལ་བ་གང་ཡང་མེད་པ་ཞིག་རེད། ངས་བོད་སྐད་མི་ཤེས། ངས་བོད་ཡིག་མི་ཤེས། བོད་ཡིག་ཡོད་ཀྱང་མེད་ཀྱང་དགོས་པ་མི་འདུག

ཨ་ཚ་ཚ། བྱིས་པ་དེ་དག་གིས་ང་ལ་འགྲམ་ལྕག་ཚ་ཐག་ཆོད་པ་ཞིག་བྱས་སོང་། ཁོ་ཚོས་བཤད་ན། དེ་ནི་ངའི་ཕ་མེས་ཡང་མེས་ཀྱི་རིང་དེ། བཙན་པོ་རིམ་བྱུང་གི་རིང་ནས་དར་བའི་ལོ་རྒྱུས་ཀྱང་འཆད་བྱུང་། ཁོ་ཚོས་བཤད་ན། ང་ལ་དྲན་པ་ཉམས་འདུག་ཟེར། ཁོ་ཚོས་བཤད་ན། ད་ལྟ། བོད་སྐད་ཡིག་གི་ཚེ་སྲོག་ལ་རླུང་ནང་གི་མར་མེ་ཇི་བཞིན་ཉེན་ཁ་ཧ་ཅང་ཆེན་པོ་གནས་འདུག་པ་མ་ཟད། ང་ཅག་གི་འཚོ་གནས་ལའང་དེ་བཞིན་ཉེན་ཁའི་ནང་དུ་ལྟུང་ཡོད་ཅེས་ངུ་སྐད་འདྲེས་མའི་ངང་དུ་ཁྲོམ་སྐོར་ལ་བུད་སོང་།

ཀྱེ་ཀྱེ། བོད་རིགས་སྤུན་ཟླ་ལགས། ངའི་དྲན་པ་ཉམས་འདུག་གམ། ཁྱོད་ཀྱིས་གནས་ཚུལ་དངོས་དེ་ང་ལ་བརྗོད་རོགས་གནང་དང་། ཁྱོད་ཁོ་ན་ད་གཟོད་འདུ་ཤེས་དེའི་དྲན་པ་གསོ་བའི་རྟོགས་སད་པ་ཡིན།

སྤུན་ཟླ་རྣམ་པ།   འཇིགས་དངངས་ཅི་ཡང་མེད་པར་ཡར་ལ་ལོངས་ཤོག    འདི་ནི་མི་རིགས་རང་སྐྱོང་མ་ཡིན་ནོ།

སྤུན་ཟླ་རྣམ་པ།     གུ་ཡངས་གང་མེད་པར་ཡར་ལ་ལོངས་ཤོག  འདི་ནི་མི་རིགས་རང་སྐྱོང་མ་ཡིན་ནོ།

ང་ཚོ་ལ་དགོས་པ་ནི། མི་རིགས་བདག་དབང་གི་རང་དབང་ཡིན་པའོ།།

གཤམ་ནས་ཁོ་བོ་སྒེར་གྱི་ལྷག་བསམ་དྭངས་མའི་ཀུན་སློང་སྔོན་དུ་བཏང་དེ། བོད་ཁུལ་གྱི་སློབ་གྲྭ་སོ་སོ་དང་ལས་ཁུང་སོ་སོ། མི་སྒེར་ཀུན་ལ་རེ་སྐུལ་བྱེད།

ཀྲུང་དབྱང་མི་རིགས་སློབ་གྲྭ་ཆེན་མོ། ནུབ་བྱང་མི་རིགས་སློབ་གྲྭ་ཆེན་མོ། བོད་ལྗོངས་སློབ་གྲྭ་ཆེན་མོ། མཚོ་སྔོན་མི་རིགས་སློབ་གྲྭ་ཆེན་མོ། སི་ཁྲོན་མི་རིགས་དགེ་ཐོན་སློབ་གླིང་། གཙོད་དགེ་ཐོན་མི་རིགས་སློབ་གླིང་། མཚོ་སྔོན་མི་རིགས་དགེ་ཐོན་སློབ་གླིང་། ཁམས་པའི་བརྙན་འཕྲིན་ཁང་། མཚོ་སྔོན་བརྙན་འཕྲིན་ཁང་། བོད་ལྗོངས་བརྙན་འཕྲིན་ཁང་། མཚོ་སྔོན་རླུང་འཕྲིན་ཁང་སོགས་དང་། དེ་མིན། བོད་ཁུལ་གྱི་སློབ་ཆུང་དང། དམའ་མཐོ་འབྲིང་གི་སློབ་གྲྭ་ཁག་སོ་སོ་ལས་གཞན། སྨན་ཁང་ཁག་སོ་སོ་དང་། ཤེས་ཡོན་ཅན་གཙོ་བྱས་པའི་བོད་ནང་གི་སྤུན་ཟླ་ཡོངས་ལ་མེ་སྦར་རླུང་སྐུལ་གྱི་ཚུལ་སྤྲིངས་པ་ཡིན་ནོ། གལ་སྲིད། མི་སྒེར་དང་ཚོགས་པ། ཐུན་མོང་གིས་འདི་ནི་ངན་སྐུལ་གྱི་ཉེས་མིང་བཙུགས་ན། ངས་ནི་མི་རིགས་སྐད་ཡིག་སྲུང་སྐྱོབ་ཀྱི་འོས་འགན་ལག་བསྟར་བྱེད་ཙམ་ཞིག་བྱེད་པའོ།།  

སྤྱི་ལོ་ ༢༠༡༠ ཟླ་ ༡༠ ཚེས་ ༢༣ ཉིན།